მუაჩქიმ კანადას ადგილობრივ პროტესტანტულ ეკლესიას უხუცეს რდჷ. თინა ირ ჟეშხა ოჭმარეს მა დო ჩქიმ დას ეკლესიაშა სპეციალურ სკოლაშა მიტენდეს დო უკულ 11 საათშო თიწკუმა ართო წირვას ვურჩქილედით. ონდღეს დიაჩქიმს დარბაზშა კრებაშ შეხვალამაშა მეპჸუნდით. თე ჟირ რელიგიაშ შქას განსხვავებაშ ძირაფა შურო ვა გაბჭირებნა.

დიაჩქიმქ მუშ ახალ რწმენაშ გურშენ მუშ ბრელ ხანიშ მეგობრეფს ბობ დო მარიონ ჰაჩესონეფს ხოლო ქუგაგებაფუ. ჭიჭე ხანშა თინეფქ ხოლო იეჰოვაშ მოწმეეფო გინირთეს. 1958 წანას ჰაჩესონეფქ მუნეფიშ სუმ ბოშწკუმა ართო მიდამიჸონეს ნიუ-იორკშა, სოდეთ 8 დღიან საერთაშორისო კონგრეს იტარებაფუაფუდ. თი დროს იფშინანქინ ასე ფხვადუქ, მუშმადიდა მონდომას ითხინდჷ თეშმაშორა შარაშა ხოლო ართ ბაღანაშ ჸონაფა. თი კონგრეს ჩქიმ ცხოვრებას დღას ვაგმოჭყორდუ.

მოზარდობაშ წანეფს ფერმას ფცხოვრენდით. მანგარო მიჸორდჷ ცხოველეფიშ მიკოლუაფა, ათეშენ ვეტერინარობაშე სერიოზულო ფიფქრენდჷ. თეშ გურშენ დიაჩქიმქ უხუცესის ქეჩუ, მიდგაქ ტაქტიანო ქუგმოშინ, ნამდა „ბოლო დღალეფს“ ფცხოვრენთ დო დუმაფიქრჷ, მუჭო იმოქმედენდჷ იეჰოვაწკუმა ჩქიმ ურთიერთობაშა უნივერსიტეტის მუსხირენ წანას გურაფა (2 ტიმ. 3:1). თეშ უკულ გინობჭყვიდ, ვებგურეკო უნივერსიტეტის.

თიშე მაფიქრუაფუდ, მუ ოკო ვაკეთკო, მუჟამსით სკოლას გუვათენდჷ. მართალ რე, ირ საბატონ  დო ჟეშხას მსახურებაშა გილეფშჷ, მარა იშენდოიშენ ვა მოსიამოვნუდ თეშ კეთება დო ვართ ჩქიმ დუდ მაფუდ წარმოდგენილ პიონერო. თიმ პერიოდის ჩქიმ მუმა დო ბიძია, მით ვა რდეს იეჰოვაშ მოწმეეფ, მირაგადდეს, ნამდა მუშობა ქიდიბჭყიკო სადაზღვეო კომპანიას, ნამუთ ტორონტოს რდჷ. ჩქიმ ბიძიას თექ დიდ თანამდებობა უღუდ. მა ხოლო დევეთანხმჷ თიშ შემოთავაზებას დო ქიდიბჭყჷ მუშობა.

ჩქიმ დროშ უმენტაშ სამუშას მეუღუდ დო ურთიერთობა მიღუდ თიცალ კათაწკუმა, მით ვამსახურდეს იეჰოვას. თენა მოცილუდ, მონაწილება მიბღიკო სულიერ საქმეეფს, მუნერით რდჷ კრებაშ შეხვალამეფშა დასწრება დო მსახურება. ტორონტოს ჩქიმ ბაბწკუმა ფცხოვრენდჷ, მით ვა რდჷ იეჰოვაშ მოწმე, მარა თიქ დოღურუნ უკულ ახალ ოცხოვრებელ ადგილ მაფუდ ოშიბელ.

ჰაჩესონეფ, მიდგაქ 1958 წანას კონგრესშა მიჸონეს, ჩქიმო მშობლეფცალ რდეს. თინეფქ მუნეფიშ ჸუდეს ცხოვრება შემოფთავაზეს დო მანგარო მიმეხვარეს სულიერო წიმი ულას. 1960 წანას თინეფიშ ბოშ ჯონწკუმა ართო დიბნათ. ჯონიქ ნათუაშ უკულ პიონერობა ქიდიჭყჷ, მუდგაქ აღბძრჷ, მა ხოლო უმოსო მიბღიკო მონაწილება მსახურებას. კრებას ჯიმალეფ ორწყედეს ჩქიმ სულიერო წიმი ულას, ათეშენ „თეოკრატიულ მსახურებაშ სკოლაშ“ ზედამხედველო დუმანიშნეს. a

1966 წანას დებქორწინ ენთუზიაზმით ეფშა პიონერშა, რანდი ბერგშა. თის მანგარო ოკოდ თიცალ ტერიტორიას მსახურება, სოდეთ მაქადაგებელეფიშ საჭიროება რდჷ. გილმალ ზედამხედველქ პირად ინტერეს გიმირჩქინ ჩქინ მიმართ დო ელამჩეს, გეგნოფრთითკო ონტარიოშ ქალაქ ორილიაშა, ნამდა თექიან კრებას ქიმვეხვარითკო. ჩქი ხოლო ბრელ ვამფიქრებნან თეშ გეგნოფრთით თი ქალაქშა.

რანდიშ ენთუზიაზმიქ ჩქიმდა თეშ იმოქმედ, ნამდა ორილიაშა გინულაშ უკულ ხეთეშე მა ხოლო სრულ დროთ პიონერობა ქიდიბჭყჷ. პიონერობაშ დოჭყაფაშ უკულ ჩქიმ დუდშა გეგმოფცად, მუშმადიდა ხიოლ მოუღ ადამიანეფწკუმა ბიბლიაშე ჩიებას დო თიშ ძირაფას, მუჭო ოხუ ჭეშმარიტება თინეფიშ გურს. მანგარო მახიოლეს, მუჟამსით ართ წყვილქ, მიდგას ბიბლიას ვოგურუანდით, დოთირუეს მუნეფიშ ცხოვრება დო იეჰოვაშ მოწმეეფო გინირთეს.

ართშა, ტორონტოშა ინულაშ დროს ქეშეფხვად ჯიმა არნოლდ მაკნამარას, მით ბეთელს მსახურენდჷ. თიქ ბკითხჷ ქუმოკოდეს დო ვარ მა დო რანდის სპეციალურ პიონერეფო მსახურება. მა ხეთეშე ვუპასუხ: „მუშო ოკო რაგად, ირდიხაშა ურთჷ, ოღონდ კვებეკშა ვარ!“. თიმ პერიოდის კვებეკის პოლიტიკურ არეულობა რდჷ. ფრანგულ ნინაშა მორაგადე კვებეკელეფ მთავრობაშ წინააღმდეგ რდეს გიშულირ დო ითხინდეს, კვებეკიშ პროვინცია დამოუკიდებელ დო კანადაშე გიშართილ ჸოფედკო. ათეშენ, ინგლისურ ნინაშა მორაგადე კანადელეფს დაძაბულ ურთიერთობა უღდეს ფრანგულ ნინაშა მორაგადე კვებეკიშ პროვინციას მახორუ ხალხწკუმა. თე ირფელიშ გურშენ ვა მოკოდ კვებეკშა ულა.

არნოლდიქ მიწუ: „ქო მარა თე მომენტის სპეციალურ პიონერეფს ფილიალ ხვალე კვებეკშა უტენს“. თე სიტყვეფიშ გაგებაშ უკულ ხეთეშე გეგნობჭყვიდ თევრე ულა. უკვე მიჩქუდ, ნამდა რანდის მანგარო ოკოდ თექ მსახურება. უმოს გვიანო, მა ხოლო ქიმეფხვად, ნამდა თენა არძაშ უჯგუშ გადაწყვეტილება რდჷ ჩქინ ცხოვრებას!

ფრანგულ ნინაშ ხუთმარიან კურსიშ მიკულაშ უკულ, მა დო რანდიქ ართ წყვილწკუმა ართო რიმუსკშა მიდაფრთით, ნამუთ მონრეალიშ ჩრდილო-აღმოსავლეთით 540 კილომეტრიშ მაშორას რდჷ. ართშა კრებაშ შეხვალამას განცხადებეფიშ კითხირიშ დროს კურიოზიქ მაღოლ, სოვრეშეთ ჯგირო ქიძირ, ნამდა ფრანგულ ნინა დიო ხოლო ვა მაფდეს ჯგირო დოგურაფილ. ოკო მითქუალუდკო: „კონგრესის ბრელ ავსტრიელ დელეგატ მაჸვენუნა“, მარა ავსტრიელიშ მანგიორო თის მოგენდუნ ფერ სიტყვა გიმიბრინე, მუთ „სირაქლემას“ ნიშნენს.

ჭიჭე ხანშა, რიმუსკშა ოთხ დაუქორწინებელ დაქ დო ჰიბერდოეფიშ წყვილქ ქუმორთეს მუნეფიშ ჟირ ცირასქუაწკუმა ართო. ჰიბერდოეფიშ წყვილს ჸუდე აფუდ დაქირებულ, ნამდგას შქვით დანჯირალ ოთახ უღუდ დო არძა პიონერ ვოხვარუდით ქირაშ გაფას. ჩქი თე ჸუდეს „ჩე ჸუდე“ ქიგვოდვით, მუშენდა გალეშე მთლიანო ჩე რდჷ დო ჩე სტოლბეფ უღუდ. მა დო რანდი სპეციალურ პიონერეფო მსახურენდითინ თიშენ მინშა ოჭმარეს, ონდღეს დო ონჯუას მიფშით მსახურებაშა, მარა პარტნიორიშ უმშო დღას ვა ფსქიდუდით, მუშენდა თი ჸუდეს 12—14 კოჩ ფცხოვრენდით. პარტნიორ თიმწკუმა ხოლო პჸუნდეს, მუჟამსით ზოთონჯის მანგარ ჩხურუს, ონჯუას მიფშით ოქადაგებშა.

თე ართგურ პიონერეფქ ჩქინო ოჯახცალო გინირთეს. მინშა „პელმენეფიშდღას“ ვონწყუნდით. არძა ვორთუდით პელმენეფს, მუდგას შხვადოშხვა მუდგარენეფს მიშმაბდვანდით დო უკულ გალე დაჩხირწკუმა აკობდოხოდუდით. ართ-ართ ჯიმა მუსიკალურ ინსტრუმენტის მიოგანდჷ. თაშ ნამდა, საბატონ სერს ხშირას იბიბრდით დო ფსხაპუნდით.

რიმუსკის ქადაგებას ჯგირ შედეგეფ მოუღუდ. მანგარო მოხიოლდეს თიშ ძირაფა, ნამდა ხუთ წანაშ დინახალე მუსხირენ ბიბლიაშ მაგურაფალქ დინათ. კრებაშ მაუწყებელეფიშ რიცხვიქ 35-შახ მიძინ.

კვებეკის, ქადაგებაშ ჯგირ გამოცდილება მიბღით. ქობძირით, მუჭო მოხვარდეს იეჰოვა მსახურებას დო მუჭო ზრუნენდჷ ჩქინ მატერიალურ საჭიროებეფშე. თეს გეძინელ, ქიპჸოროფეთ ფრანგულ ნინაშა მორაგადე ხალხ, თინეფიშ ნინა დო კულტურა, მუდგაქ მიმეხვარეს, თეცალ დამოკიდებულება მიღდესკო შხვა კულტურაშ მიმართ ხოლო (2 კორ. 6:13).

შურო ვეველუდითინ თეშ, ფილიალქ ფთხუეს, გეგნოფრთითკო ნიუ-ბრანსუიკიშ აღმოსავლეთით რდუნ თი ქალაქ ტრაქადიშა. მართალ ქოიწუათინ, თენა ჩქინო შუროთ ვა რდჷ ადვილ, მუშენდა თი პერიოდის ახალ დაქირებულ მაფდეს ბინა. თეს გეძინელ, სკოლაშ დირექციაწკუმა კონტრაქტ მაფუდ დოდვალირ, ნამდა მასწავლებერო ოკო იმუფშეკო გვერდ განაკვეთის. ხვალე თენა ვარინ, ნამთინე ჩქინ ბიბლიაშ მაგურაფალ ხოლო ახალ დანიშნულ რდჷ მაუწყებელო დო თეწკუმა ართო,  დარბაზიშ მშენებლობას ხოლო ბღებულენდით მონაწილებას.

მთელ საბატონ დო ჟეშხას თე საკითხიშ გურშენ ლოცვა ვემემტებნა დო უკულ ტრაქადიშ ოძირაფშა მიდაფრთით. თექიანობა მანგარ განსხვავებულ რდჷ რიმუსკშე, მარა რახანს იეჰოვას ოკოდ, თე ქალაქშა გეგნოფრთითკო მა დო რანდიქ ხოლო გეგნობჭყვიდით თეშ კეთება. ჩქი თაშ ქოფთქუათინ, გეგმოფცადით იეჰოვა დო ქობძირით, მუჭო ჩამთხინუეს ირნერ დაბრკოლება (მალ. 3:10). მუჭოთ ირიათო, თე შემთხვევას ხოლო რანდიშ სულიერობაქ, დუდგინოდვალირობაქ დო იუმორიშ გრძნობაქ მიმეხვარეს, გივორჯგინითკო სირთულეეფს.

ახალ კრებას, სოდეთ გინოფრთით ხვალე ართ უხუცეს, ჯიმა რობერტ როს რდჷ. თინა დო თიშ მეუღლე ლინდა პიონერეფო მსახურენდეს თი ტერიტორიას. პირველ სქუაქ გეურჩქინდესინ უკულ, პიონერობაქ მიოტებელქ აჸუეს, მარა იშენით ქუდოსქიდეს თექ. თიშ უმკუჯინუო, ნამდა მუნეფიშ ჭიჭე ბოშშა აფდეს მიკაჯინალ, გიმირჩქინანდეს სტუმარიშ ჸოროფას დო დუდის ვა ზოგენდეს მსახურებას, მუდგაშ ძირაფა მა დო რანდის მანგარო ელამკინანდეს გურშა.

ტრაქადის ჟირ წანიან პიონერულ მსახურებაშ უკულ, კინ ვეველუდითინფერ დანიშნულება მიბღით, იბჭყანდით გილმალ მსახურებას. ჩქი ინგლისურ რაიონს შქვით წანას ვმსახურენდით დო უკულ კვებეკის ფრანგულ რაიონს დუმანიშნეს. ჩქინ საოლქო ზედამხედველ, ლეონ სკრაპო, მოხსენებეფიშ კეთებაშ უკულ ირიათო მოცქვანდჷ, მარა თეს ხოლო მოკითხუდ: „მუჭო ფიქრენქ, მუჭო შეილებ სქან მოხსენება უმოს პრაქტიკულ გინაშქვე?“. b ჩქიმ მიმართ გიმორჩქინელ თიშ პირად ინტერესიქ მიმეხვარ, უმოს მარტივო დო გასაგებო გეგნოფჩიკო აზრეფ მარჩქილეს.

1978 წანას, მონრეალს ჩეტარ საერთაშორისო კონგრესიქ თემათ, „რწმენა, ნამდგას გამარჯვება მოუღ“. თე კონგრესის მა ოჭკუმალეფშე ვორდჷ პასუხიშმგებელ. თენა რდჷ ართ-ართ დანიშნულება, ნამუთ ირიათო ჯგირო გუმაშინე. ჩქი 80 000 კოჩის ველუდით დო ულირიშ გინაწონს, ირფელ განსხვავებულო რდჷ ოკეთებელ. დუდშე ბოლოშა ირფელ ახალ რდჷ, სამზარეულოშ ნივთეფ, მენიუ დო ოჭკუმალიშ მომზადებაშ მეთოდეფ ხოლო. პჸუნდეს 20 დიდ მაცივარიშ ტრაილერ, ნამუთ მინშა გილმელებუდ. კონგრესიშ წოხოლენ დღას სტადიონშა შქა სერშახ ვენმართინეს, მუშენდა სპორტულ ღონისძიება იტარებუდ. ვარინ ფეჩქეფ მაფდეს გაფურაფალ, ნამდა ოჭმარეშო ოჭკუმალ მუვამზადითკო. მართალ რე, დიფქერქით მარა თი მოხანდე, სულიერო მოწიფულ დო იუმორიშ გრძნობა უღდესინ ფერ და დო  ჯიმალეფშე, მით მოხალისეეფო მსახურენდეს, ბრელ მუდგარენ დიბგურე. ჩქი მანგარო დევეახლოვით ართიანს დო ამდღარშახ ჯგირ მეგობრეფ ვორეთ. ქიანაშმადიდა ხიოლ გიმოფცადით თე ისტორიულ კონგრესის, ნამდგაქ კვებეკის ჩეტარ, სოდეთ 1940—1950-იან წანეფს ჩქინ თანაქრისტიანეფს რწმენაშ გურშენ თხოზუდეს.

ბრელ მუდგარენ დიბგურე თი ჯიმალეფშე ხოლო, მით მონრეალს ჩატარებულ კონგრესეფს ზედამხედველეფო მსახურენდეს. ართ წანას, კონგრესიშ ზედამხედველ, ჯიმა დეივიდ სპლეინ რდჷ, მით ამდღა ხემძღვანელ საბჭოს მსახურენს. უმოს გვიანო, მა ფთხუეს თე პასუხიშმგებლობაშ შესრულება, მარა დეივიდიქ მანგარო მიმეხვარ თე საქმეშ კეთებას.

გილმალ მსახურებას მა დო რანდი 36 წანას ვორდით. თეშ უკულ, 2011 წანას უხუცესეფიშ სკოლაშ მასწავლებერო დუმანიშნეს. ჟირ წანაშ დინახალე 75-შა გიმიფთირეთ ოცხოვრებელ, მარა თე ირფელ მართალო ღირუდ მონდომაშა. ირ მარაშ ბოლოს უხუცესეფ მარდულობას გიმოხანტუნდეს, მუშენდა ორწყედეს, მუჭო ზრუნენდჷ ხემძღვანელ საბჭო თინეფიშ სულიერო წიმი ულაშენ.

უმოს გვიანო, მახარობელეფიშ სკოლას ვოგურუანდჷ. სტუდენტეფს დატვირთულ გრაფიკ უღდეს დო მანგარო გინოშურდუდეს. წერმიდგინით, ირდღას კლასის შქვით საათის მილახედეს, ირ ონჯუას სუმ საათის მეცადინენდეს დო მარაშ დინახალე ოთხ ვარდა ხუთ დავალება უღდეს. მა დო მაჟია მასწავლებერ ირიათო ვურაგადუდით, ნამდა იეჰოვაშ მოხვარაშ უმშო ვეშიალებედეს თე ირფელიშ კეთება. დღას ვაგმოჭყორდუ, მუჭო მოქმედენდჷ სტუდენტეფშა თიშ ძირაფა, ნამდა იეჰოვაშა მენდებათ თიშე უმოსის ორთუდეს, ვინემ ფიქრენდეს, ნამდა შეიალებედეს.

დიაჩქიმ, ირიათო პირად ინტერესის გიმირჩქინანდჷ შხვეფიშ მიმართ, მუდგაშ ჭყოლოფათ თიშ ბიბლიაშ მაგურაფალეფ სულიერო წიმი მიშეს დო მუაჩქიმქ ხოლო დითირუ ჭეშმარიტებაშ მიმართ დამოკიდებულება. დიაჩქიმიშ ღურაშე სუმ დღაშ უკულ, შურო ვეველუდითინ თეშ, მუაჩქიმქ დარბაზშა მოხსენებაშ მარჩქილაფშა ქუმორთჷ. თიმ დღაშ უკულ ირიათო ოსწრუდ კრებაშ შეხვალამეფს 26 წანაშ დინახალე. მართალ რე, მუაჩქიმ ვანათე, მარა მუჭოთ უხუცესეფქ მიწის, დარბაზშა არძაშე პირველ მიშჷ.

დიაჩქიმქ მუშ თეცალ დამოკიდებულებათ, ჯგირ მაგალით დომტეს მა დო ჩქიმ დალეფს. ჩქიმ სუმხოლო და მუნეფიშ ქომონჯეფწკუმა ართო ართგურო ომსახურნა იეჰოვას. თინეფშე ჟირ ფილიალს მსახურენს, ართ პორტუგალიას დო მაჟია — ჰაიტის.

რანდი დო მა ასე ჰამილტონს სპეციალურ პიონერეფო ვმსახურენთ. მუჟამსით გილმალ მსახურებას ვორდით, შხვა და დო ჯიმალეფს გილაპჸუნდით მუნეფიშ კინ მეკითხირეფშა დო ბიბლიაშ გურაფეფშა, მარა ასე ჩქი პჸუნა ბიბლიაშ მაგურაფალეფ დო მანგარო მოხიოლნა თიშ ძირაფა, მუჭო მეულა თინეფ სულიერო წიმი. ჩქინ ახალ კრებას, მუთ უმოსო დევახლოვით და დო ჯიმალეფს, თით უმოსო ქობძირით, მუჭო ელურე იეჰოვა თინეფს გლახა დროს დო ჯგირ დროს.

ულირ წანეფს იფშინანთინ, გურ მარდულობათ მაფნა ეფშა, მუშენდა ბრელ ჩქინ თანაქრისტიანქ პირად ინტერეს გიმირჩქინ ჩქინ მიმართ. მა დო რანდი ხოლო ვოცადუთ, თეცალ დამოკიდებულება მიღდან შხვეფიშ მიმართ დო ირიათო ელუჩანთ თინეფს, მუთ შეულებნან ირფელ გაკეთან იეჰოვაშ მსახურებას (2 კორ. 7:6, 7). მაგალთო, ჯგირო ფშუ, ართ ჯიმაშ ოსურ დო ჟირ სქუა პიონერეფო მსახურენდეს, მარა თე ჯიმა ვა რდჷ პიონერ. ართშა თის ბკითხჷ, დღას ქუფიქრებუნ დო ვარ პიონერობაშ დოჭყაფაშენ. თიქ მიწუ, ნამდა მუშ ოჯახის სუმ პიროვნებას უნწყუნდჷ ხეს პიონერო მსახურებას. უკულ თეცალ მუდგარენ ბკითხჷ: „მუჭო ფიქრენქ, იეჰოვაშ უჯგუშო სი შეგალებენო ხე შეუნწყუე თინეფს?“. თის ელუჩ, ნამდა მუქ ხოლო გეგმოცადკო მუშ დუდშა თი ხიოლ, ნამუთ მუშ ოჯახშა თეცალ მსახურებას მოუღუდ. ამშვ თუთაშ უკულ თე ჯიმაქ ხოლო ქიდიჭყჷ პიონერო მსახურება.

მა დო რანდი ამდღარშახ ვაგრძელენთ „მომავალ თაობაშა“ იეჰოვაშ „სარკო საქმეეფშენ“ ჩიებას დო იმენდ მიღნა, ნამდა ღორონთიშ მსახურებას თინეფ ხოლო გეგმოცადნა თიცალ ხიოლს, მუნერით ჩქი მიღნა (ფსალმ. 71:17, 18).