1. მუშენ რე ჭკვერულ წინასწარ მომზადება?

 ᲬᲘᲜᲐᲡᲬᲐᲠ მომზადებას ადამიანეფიშ სიცოცხლეშ რსხება შეულებ. მაგალთო, მუჟამსით სტიქიურ უბედრობეფ ხვადუ, თის, მით წინასწარ რდჷ მომზადებულ უმოს შანს უღჷ, გინოსქიდას დო შხვეფს ხოლო მეხვარას გინოსქილადას. ჰუმანიტარულ ორგანიზაციეფ ხოლო თე აზრის უკინენა ხუჯის დო თეცალ მუდგარენს იჩიებნა: „ჯგირ მომზადებას შეულებ ირფელ დოთირუას“.

2. მუშენ ოკო მივემზადათ „დიდ გაჭირებაშო“? (მათ. 24:44).

² „დიდ გაჭირება“ მითინ ველუნ თეშ დიჭყაფუ (მათ. 24:21). მარა სტიქიურ უბედრობეფიშ გინაწონს, თე მოვლენა არძაშო ვეჸუაფ გასაკვირ. სოდგარენ 2 000 წანაშ წოხოლე იესოქ გაფრთხილ მუშ მიმაჸუნალეფ, ნამდა მზათ ჸოფედესკო თე დღაშო (წეკითხით მათეშ 24:44). თაშ ნამდა, წინასწარ ქიმვემზადებუთ-და, უმოს ადვილ მაჸინა, ქუგურზათ თე რთულ დროს დო შხვეფს ხოლო ქიმვეხვარათ გარზებას (ლუკ. 21:36).

3. მუჭო მოხვარნა მოთვინება, შხვეფიშ გაჭირებაშ გურშა მეღალა დო ჸოროფა, მზათ ვორდათ „დიდ გაჭირებაშო“?

³ მორთ გუვარჩუათ, ნამ სუმ თვისება მიმეხვარებნა, მივემზადათ „დიდ გაჭირებაშო“. მუს გუვაკეთენთ მკაცრ განაჩენიშ გაცხადებას დუმავალენა დო ხალხ ქიმეწინააღმდეგებნან-და? (გამოცხ. 16:21). თე დროს მოთვინება დემესაჭირებნა, ნამდა დევემორჩილათ იეჰოვას დო ბჯერდან, თინა დოფთხილანა. მუს გუვაკეთენთ, ჩქინ საჸოროფო თანაქრისტიანეფ მატერიალურო დეზარალებნა ვარდა გვალო ირფელს მიოდინუანან-და? (აბაკ. 3:17, 18). თე დროს შხვეფიშ გაჭირებაშ გურშა მეღალა დემესაჭირებნა, ნამდა ქელუდირთათ დო ქიმვეხვარათ თინეფს. მუ რეაქცია მაღვენუნა, მუჟამსით ერეფიშ კოალიცია ღორონთიშ ხალხის დუდის ქიგიანთხუ დო თეშ გურშენ და დო ჯიმალეფწკუმა ჭიჭე სივრცეს ოცხოვრებელქ ქუმაჸის-და? (ეზეკ. 38:10—12). თე დროს თანაქრისტიანეფიშ მიმართ ძალიერ ჸოროფა დემესაჭირებნა, ნამდა ართო გეგნიბღათ თე რთულ დრო.

4. მუჭო იძირე ბიბლიაშე, ნამდა აუცილებერ რე, გუვავითარათ მოთვინება, შხვეფიშ გაჭირებაშ გურშა მეღალა დო ჸოროფა?

⁴ ღორონთიშ სიტყვა ელამჩანა, გუვავითარათ მოთვინება,  შხვეფიშ გაჭირებაშ გურშა მეღალა დო ჸოროფა. მაგალთო, ლუკაშ 21:19-ს ბკითხულენთ: „მოთვინებათ გინისქილიდუანთ დუდის“. კოლოსელეფიშ 3:12-ს ჭარჷ: „გურშა მიღით შხვაშ გაჭირება“ დო 1 თესალონიკელეფიშ 4:9 დო 10-ის ბკითხულენთ: „ღორონთ გოგურუანა ართიანიშ ჸოროფას . . . მარა იშენით ელაიჩანთ, ჯიმალეფ, ნამდა ხოლო უმოსო გემანგარათ ჸოროფა“. თე სიტყვეფქ თი მოწაფეეფშო იჸუ ჭარილქ, მით უკვე გიმირჩქინანდეს თე ძვირფას თვისებეფს, მარა, მუჭოთ იძირე, იშენით ოსაჭირდეს თინეფიშ გაუჯგუშება. ჩქი ხოლო ზუსტას თაშ ოკო მიფქცუათ. ათეშენ, თე სტატიას გუვარჩიენთ, მუჭო გიმირჩქინანდეს პირველ საუკუნეს თე თვისებეფს დო უკულ თის ხოლო ქობძირუნთ, მუჭო შემლებნა მივაჸუნათ თინეფიშ მაგალითის დო ქუვოძირათ, ნამდა მზათ ვორეთ „დიდ გაჭირებაშო“.

5. მუ ოხვარუდ პირველ საუკუნეშ ქრისტიანეფს სირთულეეფიშ გარზებას?

⁵ პირველ საუკუნეშ ქრისტიანეფს მოთვინებაშ გიმორჩქინა ოსაჭირდეს (ებრ. 10:36). ირდღაშიან პრობლემეფწკუმა ართო თინეფს შხვა სირთულეეფშა ხოლო აფდეს გარზებელ. მაგალთო, თინეფშე ბრელს, რწმენაშ გურშენ, ხვალე იუდეველ რელიგიურ წინამძღოლეფ დო რომაელ მართველეფ ვარინ, ოჯახიშ წევრეფ ხოლო თხოზუდეს (მათ. 10:21). ხვალე თენა ვარინ, მინშა განდგომილეფიშ გლახა გავლენაშა ხოლო აფდეს გარზებელ, მით ოცადდეს, მუნეფიშ ტყურა გურაფეფით კრებას ართობა მეუდინუესკო (საქ. 20:29, 30). მარა ირფელიშ უმკუჯინუო, თე ქრისტიანეფ მოთვინებას გიმირჩქინანდეს (გამოცხ. 2:3). მუ ოხვარუდ თინეფს თე თვისებაშ გიმორჩქინას? თე ქრისტიანეფ ფიქრენდეს წმინდა წერილეფს მოჩამილ მოთვინებაშ მაგალითეფშე, ნამდგაშე ართ-ართ რდჷ იობ (იაკ. 5:10, 11). თეს გეძინელ, ღორონთის ლოცვას ძალას თხინდეს (საქ. 4:29—31) დო ყურადღება თი ჯგირ შედეგეფშა აფდეს გინოღალირ, მუთ მოთვინებას მაჸუნუდ (საქ. 5:41).

6. მუქ მეხვარ მერიტას, მითვინკო წინააღმდეგობა დო მუს ბგურაფლენთ თიშ შემთხვევაშე?

⁶ ღორონთიშ სიტყვას დო პუბლიკაციეფს მოჩამილ მოთვინებაშ მაგალითეფიშ რეგულარულ გიმორკვიება დო თინეფშე დაფიქრება მიმეხვარებნა, ჩქი ხოლო გიმიფრჩქინათ თე თვისება. ზუსტას თექ მეხვარ ალბანეთის მახორუ ართ დას, მერიტას, გეგმირჩქინკო მოთვინება, მუჟამსით რწმენაშ გურშენ ოჯახშე სერიოზულ წინააღმდეგობას შეხვად. თინა იჩიებ: «ჩქიმ გურს მანგარო შეხუ ბიბლიას მოშინაფილ იობიშ შემთხვევაშ გიმორკვიებაქ. თის ქიანაშ სირთულექ აჸუ გინაღალარქ დო მანგარო იტანჯებუდ, თიშ უმკუჯინუო, ნამდა ვა უჩქუდ, მი რდჷ თიშ ოტანჯებელიშ მიზეზ, იშენით თქუ: „ონდო ცოცხალ ვორექ, ვა უღალატენქ ღორონთის!“ (იობ. 27:5). უკულ დეფიფქრჷ, ნამდა იობიშ პრობლემეფიშ კარს ჩქიმ პრობლემეფ მუთუნ ვა რდჷ. თეს გეძინელ, იობიშ გინაწონს, მა თინა ვარა ქომჩქუდ, მი რდჷ ჩქიმ პრობლემეფიშ მიზეზ».

7. მუ ოკო ვაკეთათ ამდღა, თიშ უმკუჯინუო, ნამდა შილებე სერიოზულ პრობლემეფ ვა მიღდან?

⁷ მოთვინებაშ გამანგარებას ჩქინ ოწუხებელიშ გურშენ იეჰოვაწკუმა ხშირას დო ალალას დორაგადაფა ხოლო მიმეხვარებნა (ფილ. 4:6; 1 თეს. 5:17). შილებე ამდღა სერიოზულ პრობლემეფ ვაიღნა, მარა ქოგორუნთო იეჰოვაშ ხემძღვანელობას, მუჟამსით გურგოტახილ რეთ ვარდა ვაიჩქუნა, მუჭო მიქცუათ? იეჰოვას ამდღა ჭიჭე პრობლემეფშე ხოლო მოხვარას რეგურალურო ქოთხინთ-და, თეშ კეთება ვართ მომავალს გაიჭირდუნა, მუჟამსით უმოს დიდ სირთულეეფს ქეშეხვადუთ. თეშ უკულ დარწმუნებულ იჸით, ნამდა იეჰოვას ზუსტას უჩქჷ, მუჟამ დო მუჭო იმოქმედას თქვან საჯგირობუოთ (ფსალმ. 27:1, 3).

8. მუჭო ოძირანს მირაშ მაგალით, ნამდა ამდღარ სირთულეეფიშ გარზება მიმეხვარებნა, გივორჯგინათ მომავალ სირთულეეფს? (იაკ. 1:2—4; ქოძირით სურათ).

⁸ ამდღარ პრობლემეფს მოთვინებათ ვურზუთ დო იეჰოვაშ ართგურ ქოფსქიდუთ-და, შემლებნა დარწმუნებულ ვორდათ, ნამდა „დიდ გაჭირებაშ“ დროს უმოს ადვილო გეგნიბღანთ სირთულეეფს (რომ. 5:3). მუშენ იფჩიებუთ თეს? ბრელ და დო ჯიმაქ მუშ დუდშა გიმოცად, ნამდა ირ რწმენაშ გამოცდაქ,  ნამდგას მოთვინებათ გურზეს, მამზად თინეფ მომავალ სირთულეეფშო. მუშენდა თე სიტუაციეფიშ დროს ქოძირეს, ნამდა იეჰოვა ირიათო მზათ რე თინეფიშ მახვარებელო. შედეგო, ხოლო უმოსო გემანგარ თინეფიშ რწმენაქ დო თეშნერო შეიალებუეს, გაურზესკო ირ უკულიან განსაცდელს (წეკითხით იაკობიშ 1:2—4). ალბანეთის მახორუ ართ პიონერ დაქ, მირაქ, მუშ დუდშა გიმოცად, მუჭო ოხვარ ულირს გინოღალირ განსაცდელეფ, ამდღა ხოლო მოთვინებათ გურზას არძა სირთულეს. მუჭოთ მირა იჩიებ, მინშა დუდის თეშ გინაფლენს, ითამ მუს უღუნ თიზმა პრობლემა შხვას მითინს ვა უღჷ. მარა თეცალ დროს იშინანს, მუზმა მუდგარენ აკეთ იეჰოვაქ 20 წანაშ დინახალე თიშ მახვარებელო დო მუშ დუდის თეცალ მუდგარენს ურაგად: „გემანგარ, წყარს ვენარღვა თი ირფელ, მუდგას თეზმა წანაშ დინახალე იეჰოვაშ მოხვარათ გიორჯგინ“. მირაცალო, თქვა ხოლო შეილებნა ყურადღება თიშა გეგნიღათ, მუჭო მიგეხვარეს იეჰოვაქ გარზებას. რჯერდან, თინა ირიათო ორწყე, ნამდა მოთვინებათ გინოიღნა სირთულეეფ დო აუცილებერო დუგაჯილდოვენა (მათ. 5:10—12). თეს გაკეთენთ-და, მუჟამსით „დიდ გაჭირება“ ქიდიჭყაფ, ვა გაიჭირდუნა მოთვინებაშ გიმორჩქინა დო გინოჭყვიდილ გაჸინა, ვადინუათ ართგურობა.

9. მუჭო ოძირეს ანტიოქიელ და დო ჯიმალეფქ, ნამდა გურშა მიღეს თანაქრისტიანეფიშ გაჭირება?

⁹ გუვარჩუათ მუქ მოხვად, მუჟამსით იუდეას დიდ შქირენაქ ქუდოდირთჷ. თე ამბექ სირიაშ ანტიოქიას მახორუ და დო ჯიმალეფიშ ჸუჯშა ქიმერთუნ, გურშა მიღეს იუდეველ თანაქრისტიანეფიშ გაჭირება დო საქმეეფით ხოლო ქაძირეს თენა. მუჭოთ ბიბლიაშე ბგებულენთ თინეფქ „იუდეას მახორუ და დო ჯიმალეფიშ მახვარებელო მუდგარენეფიშ ჯღონუა გინოჭყვიდეს, მიდგას მუსხი შეიალებედ“ (საქ. 11:27—30). მართალ რე, იუდეა დო ანტიოქიაშ შქას შორ შარა მეძუდ, მარა თეს ვა უცილებ ანტიოქიელ ქრისტიანეფშა, ნამდა განსაცდელიშ დროს ქელუდირთესკო იუდეას მახორუ და დო ჯიმალეფს (1 იოან. 3:17, 18).

10. მუჭო შემლებნა ვოძირათ, ნამდა გურშა მემიღნა სტიქიურ უბედრობათ დაზარალებურ და დო ჯიმალეფიშ გაჭირება? (ქოძირით სურათ).

¹⁰ ჯვეშ დროს მახორუ ქრისტიანეფცალო, ჩქი ხოლო მერზიებნა შესაძლებლობა ვოძირათ, ნამდა გურშა მემღუნა შხვეფიშ გაჭირება. მაგალთო, მუჟამსით ჩქინ თანაქრისტიანეფს შხვადოშხვა სტიქიურ უბედრობეფ გიოტირხუნა დუდის, შემლებნა გუვაკეთათ შესაწირავეფ მსოფლიო საქმეშო, ქიბლოცათ დაზარალებურ და დო ჯიმალეფშო დო ქობკითხათ უხუცესეფს, შემლებნან დო ვარ მონაწილება მიბღათ თინეფიშ მახვარებელო ნამდგაინ საქმეს b (იგავ. 17:17). მაგალთო, 2020 წანას ᲙᲝᲕᲘᲓ-19 პანდემიაშ გურშენ, მთელ მსოფლიოს 950-შე უმოს დაზარალებურეფიშ მოხვარაშ კომიტეტიქ იჸუ ჩამოყალიბებურქ. მთელ გურით მარდულ ვორეთ თი და დო ჯიმალეფიშ, მით დაზარალებურეფს ოხვარნა, თინეფ მართალო ცქვაფაშ ღირს რენა. ზუსტას შხვეფიშ გაჭირებაშ გურშა მეღალა აღძრენს თე და დო ჯიმალეფს, მატერიალურო დო სულიერო ქიმეხვარან თანაქრისტიანეფს დო ნამთინე შემთხვევას, გურემონტან დაზიანებულ ჸუდეეფ დო დარბაზეფ (ქეშუდარით 2 კორინთელეფიშ 8:1—4).

11. მუჭო განადიდენს იეჰოვას თინა, ნამდა გურშა მემიღნა შხვეფიშ გაჭირება?

¹¹ მუჟამსით სტიქიურ უბედრობეფიშ დროს შხვეფიშ გაჭირება გურშა მემიღნა, თენა ხალხიშ თოლს ვამკაკორდუ. მაგალთო, 2019 წანას ბაჰამიშ კუნძულეფს მოხვალამირ ქარბორია „დორიანქ“ ჩქინ ართ-ართ დარბაზ აკარღვჷ. ჯიმალეფქ ქიმერთეს ართ კონტრაქტორშა, მით ვა რდჷ იეჰოვაშ მოწმე დო ქოთხუეს, გეგმოჭარკო ხარჯეფ, მუთ დარბაზიშ აღდგენას დესაჭირებუდ. თიქ ჯიმალეფს თეცალ მუდგარენ უწუ: „ჩქიმდა მანგარო იმოქმედ თიშ ძირაფაქ, მუჭო ელურეთ ართიანს. მა ხოლო მოკო გუვაკეთე მუდგარენ თქვან ორგანიზაციაშო. ათეშენ, მასალეფით დოჭყაფილ მუშეფით თებულ ირფელს მა  მიკვოჯინექ“. მართალ რე, ამდღა ხალხიშ უმენტაშ ვეჩინენს იეჰოვას, მარა ბრელ ოკვირ თიშ მსახურეფს. ხალხ ორწყე, მუჭო მემიღნა გურშა შხვეფიშ გაჭირება. ჩქინო დიდ პატი რე, ნამდა თენა აღძრენს თინეფს, გეჩინებაფუან მოჭყოლოფე ღორონთ იეჰოვა (ეფეს. 2:4).

12. მუჭო მუმამზადენა „დიდ გაჭირებაშო“ ასეშე შხვეფიშ გაჭირებაშ გურშა მეღალა? (გამოცხ. 13:16, 17).

¹² მუშენ იჸუაფ საჭირო „დიდ გაჭირებაშ“ დროს გურშა მიბღათ შხვეფიშ გაჭირება? ბიბლია მოგებაფუანა, ნამდა თინეფ, მით მუთუნნერო ვა დუკინენა ხუჯის პოლიტიკურ სისტემას, სირთულეეფს შეხვადუნა, მუჭოთ ამდღა, თეშ „დიდ გაჭირებაშ“ დროს ხოლო (წეკითხით გამოცხადებაშ 13:16, 17). და დო ჯიმალეფს შილებე ჩქინ მოხვარაქ დესაჭირან, ნამდა უღდან აუცილებერ საჭიროებეფ. მთელ გურით მოკონა, ნამდა, მუჟამსით იესო ხალხიშ გასამართლებერო ქუმურს, ქოძირას, ნამდა გურშა მემღუნა შხვეფიშ გაჭირება დო ქომჩან პატი, დევმკვიდრათ ღორონთიშ სამეფო (მათ. 25:34—40).

13. მუჭოთ რომაელეფიშ 15:7-შე იძირე, მუჭო გემანგარეს პირველ საუკუნეშ ქრისტიანეფქ ჸოროფა ართიანიშ მიმართ?

¹³ პირველ საუკუნეშ ქრისტიანეფ შხვეფშე ჸოროფათ გიშეჩინებედეს, მარა მუშო ოკო რაგად, ირო ადვილ ვა რდჷ ჸოროფაშ გიმორჩქინა. გუვარჩუათ რომიშ კრებაშ მაგალით. თი კრებას რდეს იუდეველეფ, მიდგას ბაღანობაშე ოგურუანდეს მოსეშ კანონიშ მორჩილებას დო უცხოტომელეფ, მით განსხვავებულ წარმომავლობაშ რდეს დო გვალო შხვა კულტურას რდეს ნარდ. თეს გეძინელ, რდეს თიცალეფ, მიდგას შილებე მონეფ ჸუნდჷ ვარდა მუ თვითონ რდჷ მონა. თეცალ განსხვავებეფიშ უმკუჯინუო, მუჭო შეიალებედეს თე ქრისტიანეფს გეგმირჩქინესკო ართიანიშ მიმართ ჸოროფა? პავლექ ელუჩ თინეფს: „მთელ გურით მიღით ართიან“ (წეკითხით რომაელეფიშ 15:7). მუშ რაგად ოკოდ თე სიტყვეფით თის? ფრაზა, ნამუთ თარგმნილ რე, მუჭოთ „მთელ გურით მეღება“, ნიშნენს მიდგარენიშ გემუანო მეღებას დო თიშ მიმართ სტუმარიშ ჸოროფაშ გიმორჩქინას, მაგალთო, ჸუდეს ვარდა სამეგობროს. ართშა პავლექ უწუ ფილიმონს, ნამდა ჯგირო დო გემუანო მიღკო ნტებულ მონა ონისიმე (ფლმ. 17). თეს გეძინელ, პრისკილა დო აკვილაქ ხოლო მთელ გურით მიღეს აპოლოს, მიდგას ბრელ მუდგარენ ვა უჩქუდ ჭეშმარიტებაშ გურშენ დო მეხვარეს ღორონთიშ გურშენ უმოსიშ გაგებას (საქ. 18:26). თაშ ნამდა, პირველ საუკუნეშ ქრისტიანეფქ თე განსხვავებულობეფს ვემეჩეს უფლება, ეცილკო თინეფიშ ართობას, თეშ მანგიორო, გემუანო ღებულენდეს ართიანს.

14. მუჭო გიმირჩქინ ჸოროფა ართ მისიონერ წყვილქ?

¹⁴ ჩქი ხოლო შემლებნა ჸოროფაშ გიმორჩქინა თანაქრისტიანეფიშ მიმართ თით, ნამდა დევემეგობრათ დო დრო გუვატარათ თინეფწკუმა. თეშ უკულ, თინეფს ხოლო აღვენუნა სურვილ, გეგმოხანტან ჸოროფა ჩქინ მიმართ (2 კორ. 6:11—13). გუვარჩუათ ართ მისიონერ წყვილიშ შემთხვევა. თიშ უკულ ხეთეშე, მუთ თინეფ დასავლეთ აფრიკას დანიშნეს, ᲙᲝᲕᲘᲓ-19 პანდემიაქ ქიდიჭყჷ. პანდემიაშ გურშენ თინეფს ვემიაჩეს საშვალებაქ, პირისპირ გეჩინებაფესკო ახალ კრებაშ და დო ჯიმალეფ. მუჭო შეიალებუ თე წყვილს ჸოროფაშ გიმორჩქინაქ? თინეფ ვიდეოკონფერენციათ ოკავშირდეს და დო ჯიმალეფს დო ურაგადდეს, ნამდა მანგარო ოკოდეს თინეფიშ უჯგუშო გაჩინებაფა. და დო ჯიმალეფიშ გურს მანგარო შეხუ თე მისიონერ წყვილიშ გიმორჩქინილ ყურადღებაქ, ათეშენ თინეფ ხოლო ხშირას მიკითხანდეს, ურეკუნდეს დო ჭარუნდეს თინეფს. მუქ აღძრჷ თე წყვილ, გიმირჩქინესკო თეცალ ჸოროფა ახალ კრებაშ მიმართ? თე მისიონერ და იჩიებ: „და დო ჯიმალეფ ირიათო გიმირჩქინანდეს ჸოროფას ჩქიმ დო ჩქიმ ოჯახიშ მიმართ, მუჭოთ ჯგირ, თეშ გლახა დროს ხოლო. თინეფიშ მაგალითიქ მიმეხვარ, მა ხოლო გიმიფრჩქინკო შხვეფიშ მიმართ ჸოროფა“.

15. მუს ბგურაფლენთ ვანესაშ მაგალითშე და დო ჯიმალეფიშ მიმართ ჸოროფაშ გიმორჩქინაშ გურშენ? (ქოძირით სურათ).

¹⁵ ჩქინ კრებეფს რენა თიცალ და დო ჯიმალეფ, მიდგას განსხვავებულ წარმომავლობა,  ულირ ცხოვრება დო ხასიათ უღნა. ყურადღებას თინეფიშ დადებით მხარეეფშა გეგნიბღანთ-და, თენა მიმეხვარებნა, გიმიფრჩქინათ ჸოროფა. ართ დას, ვანესას, ნამუთ ახალ ზელანდიას ცხოვრენს, უჭირდჷ კრებას ნამთინეწკუმა ჯგირ ურთიერთობა უღუდკო. მარა თიშ მანგიორო, ნამდა დუდ შორს დეკინკო თინეფშე, მით აღიზიანენდჷ, გეგნოჭყვიდ, უმოს დრო გეგმურთუკო თინეფწკუმა ურთიერთობას. თეშ კეთებაქ მეხვარ ვანესას, ქოძირკო, მუშენ უჸორს იეჰოვას თინეფ. თინა იჩიებ: „თიშ უკულ, მუთ ჩქიმ ქომონჯიქ რაიონულ ზედამხედველო დენიშნჷ, ბრელ შხვადოშხვა ხასიათიშ ადამიანეფწკუმა მიხვადუნა ურთიერთობა, მარა ასე თეშ კეთება ვამჭირს. მობწონს მრავალფეროვნება. არგამა რე, იეჰოვას ხოლო უჸორს მრავალფეროვნება, მუშენდა მუშ ორგანიზაციაშა ართიანშე განსხვავებულ ხასიათიშ ადამიანეფ მიჸონ“. მუჟამსით შხვეფს იეჰოვაშ თოლით ვუჯინეთ, ვოძირანთ, ნამდა მიჸორა თინეფ (2 კორ. 8:24).

16. მუშენ იჸუაფ ჸოროფაშ გიმორჩქინა განსაკუთრებულო მნიშვნელოვან „დიდ გაჭირებაშ“ დროს? (ქოძირით სურათ).

¹⁶ ჸოროფაშ გიმორჩქინა განსაკუთრებულო მნიშვნელოვან იჸუაფ „დიდ გაჭირებაშ“ დროს. მუჭო დოფთხილანა იეჰოვა თიმ პერიოდის? გუვარჩუათ, მუ მითითება მეჩჷ იეჰოვაქ მუშ ხალხის, მუჟამსით ბაბილონს ნტერეფქ ქიგიანთხეს დუდის. თიქ უწუ: „ჩქიმ ხალხ, მეუთ დო გემნორთით თქვან-თქვან ოთახეფშა დო ქინიკილეთ კარეფ! ჭიჭე ხანს დიტყობით, ონდო რისხუა ვეგნიშას“ (ეს. 26:20). შილებე „დიდ გაჭირებაშ“ დროს ჩქი ხოლო დემესაჭირან თე მითითებაშ მეჸუნაქ დო მინაულარქ მაჸუან „ოთახშა“, ნამუთ შილებე კრება რდას. და დო ჯიმალეფწკუმა ართო ღორონთიშ მსახურებას გუვაგრძელენთ-და, იეჰოვა მოპირნა, ნამდა „დიდ გაჭირებაშ“ დროს დოფთხილანა. ათეშენ ამდღარშე ბრელ ოკო იფხანდათ, ნამდა თანაქრისტიანეფიშ მიმართ ხვალე მოთვენა ვარინ, ძალიერ ჸოროფა ხოლო გეგმიფრჩქინათ, მუშენდა ჩქინ რსხებაქ შილებე თეშა იჸუას დამოკიდებულქ!

17. მუშ კეთება შემალებენა „დიდ გაჭირებაშ“ დროს, ამდღარშე ქიმვემზადებუთ-და?

¹⁷ მუჟამსით „იეჰოვაშ დიდ დღა“ ქიდიჭყაფუ, მთელ კაცობრიობას მანგარ რთულ პერიოდ ქუდუდირთუ (სოფ. 1:14, 15). იეჰოვაშ ხალხ ხოლო ქეშეფხვადუთ სირთულეეფს, მარა ამდღარშე მივემზადებუთ-და, ვა ვოდინუანთ შინაგან სიმშვიდეს, შემალებენა შხვეფიშ მოხვარა დო გურზუთ ირნერ სირთულეს, ნამდგას შეფხვადუთ. თეს გეძინელ, მუჟამსით ჩქინ და დო ჯიმალეფ სირთულეეფს ქეშეხვადნა, თინეფიშ გაჭირებაშ გურშა მეღალათ, შემალებენა ირნერო მივეხვარათ დო ქელუდირთათ თინეფს. ხვალე თენა ვარინ, თანაქრისტიანეფიშ მიმართ ძალიერ ჸოროფას ამდღარშე გუვავითარენთ-და, მომავალს მუდგაქ ვა მოხვადასინ, მუთუნით ვეჩვეთხიებუთ თინეფს. ჩქინ მოჸოროფე ღორონთ იეჰოვა დუმაჯილდოვენა დო ქომჩანა ულიებ სიცოცხლეს თიცალ მსოფლიოს, სოდეთ ვეჸუაფ უბედრობა დო მითინ ვეგიშინანს ულირს (ეს. 65:17).