ართ ოჭმარეს ბრუკინგსის (სამხრეთ დაკოტა, აშშ) ჸინ ქარ ირქენდ. თენა თის ნიშნენდ, ნამდა მალას თეს ჩხურუეფ ქუმაჸუნუდ. შილებე გაიკვირდან, მარა ზუსტას თე დღას მუსხირენ კოჩ შაყარელ ვორდით შენობას, სოდეთ მოსავალს ჩუანდეს; თე შენობას თიცალ ჩხურ რდუ, ნამდა არძა ართო პკანკალანდით. ჩქი გივორდით ორინჯშო კეთებულ საწყაროშ წოხოლე, ნამუსით გვერდშახ ჸინ წყარ ინოდგუდუ! ასე ქიგეჩიებუთ, მუშენ მოფხვად თეცალ სიტუაციას.

დებაბდი 1936 წანაშ 7 მარტის დო ოთხ და დო ჯიმაშე არძაშ უკლაშ ვორდი. ჩქი ფცხოვრენდით სამხრეთ დაკოტაშ აღმოსავლეთით, მუფშენდით სოფელიშ მეურნეობას დო ორინჯის ხოლო ულუანდით. თეთ ეიბჯუმუანდით ოჯახის, მარა თენა ვარდ ჩქინო არძაშ უმოს მთავარი. ჩქიმ მშობლეფქ დუდ მეუძღვინეს იეჰოვას დო 1934 წანას დინათეს. თინეფშო იეჰოვაშ ნებაშ შესრულება ირფელიშ უმოს მნიშვნელოვან რდუ. მუაჩქიმ კლარენს დო უმოს გვიანო ბიძია ალფრედი მსახურენდ კონდეს (სამხრეთ დაკოტა), ჩქინ ჭიჭე კრებას, მუჭოთ კრებაშ მსახურეფი (ასე უხუცესეფიშ საბჭოშ კოორდინატორი).

ჩქინ ოჯახის მთავარ ადგილ უკინებუდ კრებაშ შეხვალამეფიშ დასწრებას დო მომავალიშ გურშენ ბიბლიურ იმენდიშ კარდოკარ ქადაქებას. ჩქიმ მშობლეფიშ მაგალითიქ დო გეწურაფაქ ჩქინწკუმა ხოლო იმოქმედ. მა დო ჩქიმ და დოროთიქ ამშვ წანერეფი ვორდითინ თეშ მაუწყებელეფო ქიდიპჭყით მსახურება. 1943 წანას თეოკრატიულ მსახურებაშ სკოლაშა ქინიპჭარით დუდ, ნამუთ თიწკუმა სიახალე რდუ კრებას.

კონგრესეფ მნიშვნელოვან ღონისძიებეფ რდუ ჩქინ ცხოვრებას. 1949 წანას სუ-ფოლზის (სამხრეთ დაკოტა) ჩეტარ კონგრესიქ, სოდეთ მოწვიებულ  მომხსენებელ რდუ ჯიმა გრანტ სუიტერი. მა ასე ხოლო ფშუ თიშ მოხსენება: „თინა თქვა ფიქრენთინ, თიშე უმოს ხოლოს რე!“. თიქ მთავარ ყურადღება მიაქცუ თის, ნამდა არძა იეჰოვაშ მსახურს მუნეფიშ ცხოვრება მეუძღვინებუდკო ღორონთიშ სამეფოშ გურშენ სახიოლო ამბეშ გაცხადებაშა. თექ გინმოჭყვიდრაფუ იეჰოვაშა დუდიშ მეძღვინუა. უკულიან რაიონულ კონგრესის ბრუკინგსის თი გოჸინილ შენობას ვორდ, ნამუთ დაჭყაფუს მიფშინე დო მზათ ვორდ დიმნათიკო. 1949 წანაშ 12 ნოემბერს ფოლადშე კეთებულ საწყაროს, ნამუთ „აუზიშ“ მანგიორო რდუნ, ოთხ პიროვნებაქ დიმნათით.

თეშ უკულ ჩქიმ მიზან რდუ პიონერო მსახურებაშ დოჭყაფა. 1952 წანაშ 1 იანარს 15 წანერ ვორდინ თეშ პიონერო მსახურება ქიდიპჭყ. ბიბლია იჩიებ: „ბრძენეფწკუმა გილურსინ თინა, მუ ხოლო დებრძენებ“ (იგავ. 13:20). ჩქიმ ოჯახის ბრელ ბრძენ პიროვნება რდუ, ნამუქით ელამდირთეს პიონერო მსახურებაშ დოჭყაფას. მა დო ჩქიმ ბიძია, ნამუთ 60 წანერ რდუნ, ართო ვმსახურენდით პიონერო. თიშ უმკუჯინუო, ნამდა ჩქიმდე ბრელით უნჩაშ რდუნ, მოხიოლუდეს ართო მსახურება. თინა ცხოვრებას გამოცდილ კოჩ რდუ დო თიშე ბრელ ჯგირ დიბგურე. მალას დოროთიქ ხოლო ქიდიჭყ პიონერო მსახურება.

მუჟამს ახალგაზრდა ვორდინ, ჩქიმ მშობლეფ ხშირას აპეჯენდეს ჸუდეშა რაიონულ ზედამხედველეფს დო თინეფიშ მეუღლეეფს. ართ ჩილ დო ქომონჯიქ, ჯესი დო ლინი კანტუელეფქ მანგარო ელამდირთეს დო თექ ხოლო გინმოჭყვიდრაფუ პიონერო მსახურებაშ დოჭყაფა. თინეფშე დიდ ყურადღებას ბგინაფლენდინ თიქ, მიმეხვარ თეოკრატიულ მიზნეფშე მიფიქრებუდკო. მუჟამსით უხოლაშ კრებეფიშ მონახულება უღუდესინ, მაპეჯენდეს მუნეფწკუმა ართო მიდამრთუმუდკო მსახურებაშა. თინეფწკუმა მსახურება მანგარ სასიამოვნო დო დღას ვაგმოჭყორდუნ ფერ რდუ!

უკულ გილმალ ზედამხედველეფო მსახურენდეს ბად მილერი დო თიშ მეუღლე ჯოანი. 18 წანერ ვორდინ თეშ ჯარშა ქუდომძახეს. დუდშე გაწვიებაშ კომისიაქ თიშნერ საქმეშ კეთება ქუდმავალ, ნამუთ ოწინააღმდეგუდ იესოშ მითითებას — თიშ მიმაჸუნალეფქ პოლიტიკურო ნეიტრალურეფქ ქუდოსკიდესკო. მა მოკოდ სამეფოშ გურშენ სახიოლო ამბეშ ქადაქება, ათეშგურშენ თინეფს მიმაფრთი, ნამდა მღვდელმსახურიშ სტატუს ქომჩესკო (იოან. 15:19).

გურშა მანგარო ელამკინ თიქ, ნამდა ჯიმა მილერქ მიკორინუ, მოლმაჸუნუკო საქმეშ მარჩქილაფშა. ხასიათით თინა გაბედულ კოჩ რდუ დო ეფას ხოლო ვაუშკურდუდ  მუთუნს. ხასლას თეცალ ხასიათიშ სულიერ პიროვნება ელამირდუნ თიქ უმოსო ქომუჩ ჩქიმ დუდიშ რწმენა! თე საქმეშ მორჩქილაფაშ უკულ, 1954 წანას კომისიაქ მღვდელმსახურიშ სტატუს ქომუჩ. თექ შარა გომინწყ, ქიმვოჭირნეკო შხვა თეოკრატიულ მიზნეფს.

თე დროშო მემწვიეს ბეთელშა, ნამუსით გინაჯინალ კოშკიშ მეურნეობა ჯოხოდ; თინა სტატენიშ კუნძულს (ნიუ-იორკი) რდუ დო თექ სოდგარენ სუმ წანას ქივმსახური. თექ უმოს გამოცდილება ქომუჩ, მუშენდა ბრელ ბრძენ კათაწკუმა იმუფშე.

თე მეურნეობას რადიოსადგურ (WBBR) ხოლო რდუ, ნამუთ იეჰოვაშ მოწმეეფქ გონწყეს დო 1924 წანაშე 1957 წანაშახ მუშენდ. მეურნეობას ხვალე 15—20 ბეთელიშ ოჯახიშ წევრ მსახურენდ; თავრეშე უმენტაშ ახალგაზრდეფ ვორდით დო თისხი გამოცდილება ვა მიღუდეს. მარა ჩქინწკუმა რდუ ხანშამიშულირ ცხებულ ჯიმა ელდონ ვუდვორთი. თინა მართალო ბრძენ პიროვნება რდუ, ნამუთ მუმაცალო მაქცენდეს ყურადღებას დო თენა მოხვარდეს სულიერ წონასწორობაშ შენარჩუნებას. კანკალეშა, მუჟამსით შხვეფიშ არასრულყოფილებაშ გურშენ პრობლემეფ რჩქინდუდუნ, ჯიმა ვუდვორთი იჩიებუდ: „იეჰოვა მუშ სარკო საქმეეფიშ ოკეთებელო არასრულყოფილ კათას გიმირინუანს“.

ჩქი მიღუდეს ჯიმა ფრედერიკ ფრენციწკუმა ართო თანამშრომლობაშ პატი. თიშ სიბრძნე, წმინდა წერილეფიშ სარკო რჩქინა დო ყურადღებიანობა დადებითო მოქმედენდ ჩქინწკუმა. ჰარი პეტერსონ ოჭკუმალს მიკეთენდეს; ჩქი თე გვარ უმოს ეფ დაძახნალ მაფდეს, ვინემ თიშ ნამდვილ გვარ — პაპარიეროპულოსი. თინა ხოლო ართ-ართ ცხებულ ჯიმა რდუ, ნამუთ მონდომებულო მსახურენდ. ჯიმა პეტერსონ ბეთელს მუშ საქმეს ხოლო ორთუდ, მარა ქადაქება დღას ვემუტებუ დო თუთაშ დინახალე ოშობით ჟურნალს ავრცელენდუ. თის წმინდა წერილეფი ჯგირო უჩქუდ დო ბრელ ჩქინ კითხვას პასუხის არზენდუ.

ჩქი ირ წანას, მეურნეობას ზოთონჯშო სოდგარენ 42 600 კილო ხილ-ბოსტნეულს ბკილანდით დო ფჩუანდით. მა მიღუდ პატი თე საქმეს ეტა ჰათწკუმა ართო მიმუშებუდკო, ნამუთ მართალო ბრძენ და რდუ. თინა თე საქმეშო რეცეპტეფს ამზადენდუ. ჩქინ მახვარეფშა ადგილობრივ დალეფ მიშეს დო ეტა თინეფს ხემძღვანელენდუ. თიშ უმკუჯინუო, ნამდა დაკონსერვებაშ საქმეს მნიშვნელოვან ადგილ  უკინებუდუნ, თინა დიდ პატის ცენდ მეურნეობაშ ზედამხედველ ჯიმალეფს. ჩქიმ თოლს ეტა მაგალით რდუ თით, ნამდა თეოკრატიულ მეთაურობაშ პრინციპის ომორჩილუდ.

ენჯელა რომანო რდუ ართ-ართ ახალგაზრდა და, ნამუთ მოხვარდეს თე საქმეს. თის ეტა ოგურუანდ ჭეშმარიტებას. თაშ ნამდა, ბეთელს ვმსახურენდინ თიმწკუმა ხოლო ართ ბრძენ პიროვნებას შეფხვად, მიდგაწკუმა ართო 58 წანა რე ფცხოვრენქინ. მა დო ენჯიქ 1958 წანას დებოჯახით დო თიშ უკულ ბრელ ხიოლ გიმოფცადით მსახურებას. წანეფიშ დინახალე ენჯიშ ართგურობა იეჰოვაწკუმა, ამანგარენდ ჩქინ ქორწინებას. მუდგა გაჭირებას ვეშეფხვადათ, მა ირო შემლებ თიშ იმენდ მიღუდას.

მუჟამსით 1957 წანას სტატენიშ კუნძულს რადიოსადგურიშ შენობეფ (WBBR) გეგმოჩესინ, თეშ უკულ მა ჭიჭე ხანით ბრუკლინიშ ბეთელს ვმსახურენდი. მა დო ენჯიქ დებოჯახითინ, ბეთელშე მიდაფრთი დო სოდგარენ სუმ წანას სტატენიშ კუნძულს პიონერო ვმსახურენდით. მუსხირენ ხანს მა კინ თე რადიოსადგურს მუფშენდ, ნამუსით ასე ახალ უნჩაშეფ ჸუნდ დო შხვა სახელ (WPOW) ჯოხოდ.

მა დო ენჯიქ გეგნოპჭყვიდით უბრალო ცხოვრებათ მიცხოვრებდესკო თიშენ, ნამდა სოდეთ საჭირო იპჸიდითინ თექ მიმსახურებდესკო. თაშ ნამდა, 1961 წანაშ დაჭყაფუს ჩქი მზათ ვორდით, მემღებდესკო სპეციალურ პიონერო მსახურებაშ დანიშნულება ფოლს სიტის (ნებრასკა). თე დავალებაშ მეღებაშ უკულ ხეთეშე მემწვიეს სამეფო მსახურებაშ სკოლაშა, ნამუთ თი დროს ართ თუთიან რდუ დო საუთ-ლანსინგის (ნიუ-იორკი) იტარებუდ. ჩქი მოსიამოვნუდეს გურაფა დო ველუდით კინ ნებრასკაშა დორთას დო ნაგურეფუშ თექ გიმორნაფას. ათეშგურშენ მანგარო გამკვირდეს, მუჟამსით მისიონერეფო დებნიშნით კამბოჯას! სამხრეთ-აღმოსავლეთ აზიაშ თე ქიანას, თიშმასკვამა ბუნებაქ ქეწომდირთეს დო თექ თიცალ ხონარეფ დო არომატეფ რდუ, ნამუთ შხვადო სოთინ ვამძირნა დო ვამგინაფნა. ართ შურ მიღუდეს, მუჟამ დიპჭყანდით სახიოლო ამბეშ ქადაქებას.

პოლიტიკურ სიტუაციაქ დითირუნ თიშ გურშენ, სამხრეთ ვიეტნამშა მაჸის გინაულარქ. ჩქინ სანარღოთ, ჟირ წანაშ დინახალე ჯამრთელობაშ სერიოზულ პრობლემეფქ ქუმაშუ დო ათეშგურშენ სასწრაფოთ კინ ჸუჩა მაჸუეს დართალქ. ჩქიმ გიშაჯგირაფას ჭიჭე ხანქ დესაჭირ, მარა მუჭოთ უჯგუშო გინიფრთინ, კინ გუვაგრძელ სრულ დროთ მსახურება.

1965 წანაშ მარტიშ თუთაშე ჩქი თიშ პატი მიღუდეს, გილმალ ზედამხედველო მიმსახურებდესკო დო კრებეფიშ მონახულება ქიდიპჭყითკო. 33 წანაშ დინახალე რაიონულ დო საოლქო მსახურებას დო კონგრესეფიშ მომზადებას ჩქიმო დო ენჯიშო დიდ ხიოლ მოუღუდ. ჩქიმო კონგრესეფ ირო მნიშვნელოვან მოვლენა რდუ დო ათეშგურშენ მოსიამოვნუდ თე ღონისძიებეფიშ ორგანიზებას მონაწილებაშ მეღება. ნიუ-იორკიშ გოხოლუას მუსხირენ წანეფს ვმსახურენდით დო იანკიშ სტადიონს კონგრესეფს ვატარენდით.

მა დო ენჯის შხვა სპეციალურ სრულ დროთ მსახურეფცალო რთულ დო არაჩვეულებრივ დანიშნულებეფ მელუდეს. მაგალთო, 1995 წანას ქოფთხის, ნამდა მსახურებაშო დახელოვნებაშ სკოლა ჩამტარებუდკო. სუმ წანაშ უკულ ბეთელშა მემწვიეს. ჩქიმო მართალო სახიოლო რდუ, კინ თექ დორთა, სოდეთ  40 წანაშ წოხოლე სპეციალურ სრულ დროთ მსახურება დიპჭყი. მუსხირენ ხანს სამსახურებრივ განყოფილებას ვმსახურენდ დო შხვადოშხვა სკოლეფს ვოგურუანდი. 2007 წანას ხემძღვანელ საბჭოქ გინოჭყვიდ თეოკრატიულ სკოლეფიშ განყოფილებაშ გონწყუმა, ნამუთ ბეთელს იტარებუდუნ თი სკოლეფს ხემძღვანელენდ დო ჩქიმო დიდ პატი რდუ მუსხირენ წანას თე განყოფილებაშ ზედამხედველო მსახურება.

ჩქი ქუმვოჭიშეთ ნამთინე მნიშვნელოვან თირუეფს, ნამუქით მოხვად თეოკრატიულ განათლებაშ მეღებაშ საქმეს. 2008 წანას პირველო ჩეტარ უხუცესეფიშ სკოლაქ, ნამუთ ჟირ წანაშ დინახალე 12 000-შე უმოს უხუცესიქ მიკორთ პატერსონს დო ბრუკლინიშ ბეთელს. ასე თე სკოლა იტარებ შხვადოშხვა ადგილეფს ხოლო, ნამუსით მომზადებულ მასწავლებელეფ ატარენა. 2010 წანას მსახურებაშო დახელოვნებაშ სკოლას სახელო ქიგიადვუ ბიბლიურ სკოლაქ დაუქორწინებელ ჯიმალეფშო დო გინწყ ახალ სკოლაქ — ბიბლიურ სკოლა ქრისტიან წყვილეფშო.

2015 სამსახურებრივ წანაშ დაჭყაფუს თე ჟირ სკოლაქ გეერთიან დო გინწყ სამეფოშ მახარობელეფიშ სკოლაქ, სოდეთ გურაფა შეულებდეს წყვილეფს დო დაუქორწინებელ და დო ჯიმალეფს ხოლო. ბრელს მანგარო ახიოლ თიშ გაგებაქ, ნამდა თე სკოლა შხვა ქიანეფს ხოლო ჩეტარებუდ. სახიოლო რე თიშ ძირაფა, ნამდა თეოკრატიულ განათლებაშ მეღებაშ საშვალებეფქ უმოსო ქიმიძინ. მა გახარებულ ვორექ თიშენ, ნამდა ბრელ თიცალ და დო ჯიმას შეფხვად, მიდგაქ თეოკრატიულ განათლება მიღუკონ თიშენ მუშ ცხოვრება დოთირუ.

ჩქიმ ცხოვრებას ნათუაშე თე დღაშახ იფშინანქინ, იეჰოვაშ მარდულ ვორექ თი ბრელ ბრძენ პიროვნებაშ გურშენ, მით ელამირდ ჭეშმარიტებაშ შარას. თინეფშე არძა ვა რდუ ჩქიმ ხანიშ დო ვართ ხოლო ჩქიმცალო ნარდი, მარა გურით სულიერ კათა რდეს. იეჰოვა მანგარო უჸორდესინ თის, მუნეფიშ საქციელით დო საქმეშ მერინათ ოძირანდეს. იეჰოვაშ ორგანიზაციას ჩქი ბრელ ბრძენ პიროვნება პჸუნა, მიდგაწკუმა შემლებნა ურთიერთობა მიღუდან. მა ხოლო თაშ მიფქცი დო მართალო ბრელ მუთუნ დიბგურე.