1. მუჭო რე ეჭარილ ბიბლიას აღმზრდელობით ზომეფი?

მუ გუგაშინენა, მუჟამსით გარჩქილენა სიტყვეფ „აღმზრდელობით ზომეფ“? შილებე უცბას დასაჯება გუგაშინედან, მარა თის უმოს მეტ მნიშვნელობა უღჷ. ბიბლიას აღმზრდელობით ზომეფ დაკავშირებულ რე რჩქინა, სიბრძნე, ჸოროფა დო სიცოცხლეწკუმა (იგავ. 1:2—7; 4:11—13). ღორონთიშ აღმზრდელობით ზომეფშე იძირე, ნამდა თის ვუჸორთ დო ოკო მარადიულო იფცხოვრათ (ებრ. 12:6). შილებე მინშა ღორონთიქ დაფსაჯან, მარა სასტიკას დღას ვემმექციებნა. თაშ ნამდა, აღმზრდელობით ზომეფს ძირითადო გურაფა იგულისხმებ, მაგალთო, მუჟამსით მშობელ ოგურუანს ბაღანას.

2, 3. მუ მიშურს აღმზრდელობით ზომეფშა? (ქოძირით სურათ თე გვერდის).

² ქიმიპჸონათ ართ მაგალით: ჭიჭე ბაღანა სახელო ჯონი, ჸუდეს დინახალე ბურთის ლაჸაფენს. დიამუშ ურაგად: „ჯონი, დინახალე ბურთი ველაჸაფა! შილებე მუდგაინ გოტახე“. მარა ბაღანა ვა ურჩქილე დიდას, აგრძელენს ლაჸაფის დო შემთხვევით ვაზას ტახუნს. მუნერ აღმზრდელობით ზომეფს გიმირინუანს დიდა? თიქ შილებე გეუნწყას ბაღანას, მუშენ რე თიშ საქციელ არასწორ დო მუშენ ოკო დეცვას მშობლეფიშ წესეფ. დიდას ოკო, ქუგაგებაფუას ბაღანას, ნამდა მშობლეფიშ მორჩილება ჯგირობუას მოუღანს. მუშ სიტყვეფ  განამტკიცასინ თიშენ, დიდაქ შილებე თიშ დასაჯება ხოლო გეგნოჭყვიდას. მაგალთო, ჭიჭე ხანით ვემეჩას ბურთით ლაჸაფიშ საშვალება. თეცალ მოქმედებათ, ბაღანა ქიმეხვადუ, მუ შედეგეფ მოჸუნს მშობლეფიშ დაუმორჩილებლობას.

³ ჩქი ღორონთიშ დიდ ოჯახიშ წევრეფ ვორეთ (1 ტიმ. 3:15). ათეშგურშენ, პატის ფცენთ იეჰოვაშ დოდგინელ ნორმეფს დო ვაფასენთ თი აღმზრდელობით ზომეფს, ნამუსით ღორონთ თიმწკუმა გიმირჩქინანს, მუჟამსით ვა ვომორჩილუთ თის. თეს გეძინელ, ჩქინ არასწორ საქციელს გლახა შედეგიქ ქუმაჸუნ-და, იეჰოვაშ აღმზრდელობით ზომეფ ქუგმოშინანა, მუჭომ მნიშვნელოვან რე ზეციერ მუმაშ მორჩილება (გალ. 6:7). ღორონთ ზრუნენს ჩქინდე დო თის ვაკო გურქ მაწყუნან (1 პეტ. 5:6, 7).

4. ა) მუნერ მონდომას აკურთხენს იეჰოვა? ბ) მუს გუვარჩიენთ თე სტატიას?

⁴ ბიბლიურ პრინციპეფშა გერსხილ აღმზრდელობით ზომეფიშ გიმორჩქინათ ვოხვარუთ ჩქინ ბაღანას ვარდა ბიბლიაშ მაგურაფალს ქიმიაჸუნან იესოს. ღორონთიშ სიტყვა, რე ძირითად საშვალება, სიმართლეშა გიოწურაფალო. თეგვარო, ბაღანას ვარდა ბიბლიაშ მაგურაფალს ქიმვეხვარებუთ, ქინანჭან ირფელს, მუთ იესოქ დუმავალეს (2 ტიმ. 3:16; მათ. 28:19, 20). იეჰოვა აკურთხენს, ჩქინ თეცალ მონდომას მუთ მეხვარებ თინეფს, შხვეფ ხოლო მამზადან ქრისტეშ მიმაჸუნალეფო (წეკითხით ტიტე 2:11—14). * თე სტატიას გუვარჩიენთ სუმ მნიშვნელოვან კითხვაშ პასუხის: 1) მუჭო იძირე ღორონთიშ ჸოროფა აღმზრდელობით ზომეფშე? 2) მუშ გურაფა შემლებნა თინეფშე მიდგაწკუმა ღორონთ აღმზრდელობით ზომეფს გიმირინუანდჷ? 3) მუჭო მივაჸუნათ იეჰოვაშ დო იესოშ მაგალითის, მუჟამსით აღმზრდელობით ზომეფს გიმიბრინუანთ?

5. მუჭო იძირე აღმზრდელობით ზომეფშე იეჰოვაშ ჸოროფა?

⁵ ვუჸორთ დო ოკო მარადიულ სიცოცხლეშ შარას მივაჸუნათ, ათეშენ თინა გიმოწურუანა დო მოგურუანა (1 იოან. 4:16). ღორონთი დღას ვამამცირენა დო დუც თეშ ვამოგინაფუანა, ითამ მუთუნშა ვაბღირუთ (იგავ. 12:18). იეჰოვა ჩქინ ჯგირ თვისებეფს უჯინე დო საშვალებას მარზენა, გეგმიბრინუათ ნებაშ თავისუფლება. ქარწყეთო, მუჭო გიმირჩქინანს ღორონთ ჸოროფას ბიბლიაშ, პუბლიკაციეფიშ, ქრისტიან მშობლეფიშ დო უხუცესეფიშ საშვალებათ? უხუცესეფ იეჰოვაშ მაგალითის მეჸუნა დო ოცადნა ჸოროფათ ქიგმოწურუან, მუჟამსით სწორ ვარენ ფერ ნაბიჯის გინმობდგუნთ, შილებე მინშა თეს უდუფიქრებუო ხოლო ვორთუდათ (გალ. 6:1).

6. მუჭო იძირე ღორონთიშ ჸოროფა, მუჟამსით პიროვნება პასუხიშმგებლობეფს ოდინუანს?

⁶ მინშა აღმზრდელობით ზომეფშა რჩევაშ მეჩამაშე მეტ მიშურს. მუჟამსით საქმე სერიოზულ ცოდეფს ოხუნ, შილებე კრებას პასუხიშმგებლობეფ ხოლო მივოდინუათ. მარა თავრეშე ხოლო ღორონთიშ ჸოროფა იძირე. მაგალთო, პასუხიშმგებლობეფიშ დინაფაქ შილებე ქიმეხვარას პიროვნებას, ქოძირას, მუსხით მნიშვნელოვან რე, ყურადღება ქიმიაქცუას ბიბლიაშ პირად გურაფას, ნაგურეფშე ფიქრის დო ლოცვას. თენა მეხვარებ, გამანაგრას იეჰოვაწკუმა ურთიერთობა (ფსალმ. 19:7). დრო ხანიშ უკულ თის შილებე პასუხიშმგებლობეფქ დართას. თეს გეძინელ, გარიცხვაშე ხოლო იძირე იეჰოვაშ ჸოროფა, მუშენდა თეთ კრება გლახა გავლენაშე თხილერ იჸუაფ (1 კორ. 5:6, 7, 11). ღორონთ აღმზრდელობით ზომეფს ირიათო სწორას გიმირინუანს, ათეშენ მუჟამსით პიროვნება ირიცხებუნ, თინა ორწყე მუსხით სერიოზულო  აფჷ დაშებულ დო მონანიებაშ სურვილ ურჩქინდუ (საქ. 3:19).

7. მი რდუ შებნა დო მუ გლახა თვისება გიმირჩქინ თიქ?

⁷ მორთ, ქობძირათ ჟირ პიროვნებაშ მაგალით, მიდგაწკუმა ღორონთიქ აღმზრდელობით ზომეფ გიმირჩქინ. დიო გუვარჩუათ შებნაშ მაგალით, ნამუთ მეფე ხიზკიაშ დროს ცხოვრენდჷ დო უკულ ქიფჩუათ ჯიმა გრეჰემიშ გურშენ. საეგებიოთ, შებნა იუდაშ მეფე ხიზკიაშ ჸუდეშ გამგებელ რდუ დო მაღალ თანამდებობა უღუდ (ეს. 22:15). მარა სანარღოთ თიქ გეამაყ, მუშენდა მუშ დუდიშ განდიდება ოკოდ. თიქ მუშო მდიდრულ ონთხორუ გეგმანწყუ დო დიდებულ ეტლეფით გილეშ (ეს. 22:16—18).

8. მუჭო გიმირჩქინ იეჰოვაქ აღმზრდელობით ზომეფ შებნაწკუმა დო მუქ მაჸუნ თეს?

⁸ მუჭოთ ჟიშე მიფშინეთინ, შებნას მუშ დუდიშ განდიდება ოკოდ, ათეშენ ღორონთიქ მიდუღჷ თანამდებოდა დო თიშ მანგიორო ელიაკიმ ქიდარინუ (ეს. 22:19—21). თექ თიმ დროს მოხვად, მუჟამსით ასურეთიშ მეფე სინახერიბი იერუსალიმიშ გენთხაფას აპირნედჷ. ჭიჭე ხანშა თიქ დიდ ჯარწკუმა ართო მუშ წარმომადგენელეფ მიდაშკვჷ, ნამდა დუშკურინუაფუდკო იუდეველეფ დო ხიზკია (2 მეფ. 18:17—25). მეფეშ წარმომადგენელეფს ელიაკიმქ შეხვად, მარა თის ხოლო ჟირ კოჩ ოხოლუდ. თინეფშე ართ-ართ მაჭარალ შებნა რდუ. თავრეშე ვორწყეთ, ნამდა შილებე შებნაქ თანდაბლობა ქიდიგურუ დო გურშა ჟღამ ველუდვალ. თინა მზათ რდუ უმოს ნაკლებ თანამდებობა უღუდკო. მორთ ქობძირათ, მუ სუმ საკითხიშ გურაფა შემლებნა თავრეშე.

9^—11. ა) მუ მნიშვნელოვან გაკვეთილს ბგურაფლენთ შებნაშ მაგალითშე? ბ) მუჭო ელამკინანა გურშა იეჰოვაშ აღმზრდელობით ზომეფ, ნამუთ შებნაწკუმა გიმირჩქინ?

⁹ პირველ, შებნაქ მიოდინუ მაღალ თანამდებობა, მუთ გიმოშინანა თის, ნამდა „სიამაყეს დონთხაფა მოჸუნს“ (იგავ. 16:18). შილებე კრებას პასუხიშმგებლობეფ გიღდან დო შხვეფს მნიშვნელოვან პიროვნებათ მიორჩქუდათ, მარა თანდაბლობა ოკო გეგმირჩქინათ დო თქვან დუდშე დიდ წარმოდგენაქ ვაგაშუან. დღას ვაგმოჭყორდან, ნამდა წარმატებეფი ხვალე იეჰოვაშ ჭყოლოფათ მიღნა (1 კორ. 4:7). მოციქულ პავლექ ჭარ: „გირაგადუთ არძას: თქვან დუდშე თიშე მეტ ვეფიქრათ, ვინემ ოკო ფიქრენდათ; თეშ იფიქრით, ნამდა საღ აზროვნება გიღდან, თითოულქ თისხით, მუსხით ღორონთიქ მერჩეს რწმენა“ (რომ. 12:3).

¹⁰ მაჟია, მუჟამსით იეჰოვაქ შებნას მკაცრ რჩევა მეჩუნ, თის ჯერდ, ნამდა შებნა გეგმისწორებუდ (იგავ. 3:11, 12). დასურო, მუ ჯგირ გაკვეთილ რე თინეფშო, მიდგას კრებას პასუხიშმგებლობეფ აფნა დინაფილ! თიშ მანგიორო, ნამდა გურშა ჟღამ ინიდვანინ, ირფელ ოკო გაკეთან მსახურებას დო აღმზრდელობით ზომეფ იეჰოვაშ ჸოროფათ მირჩქინან. ფშუდან, მუჟამსით თანდაბლობას გეგმიფრჩქინანთინ, ჩქინ ზეციერ მუმა კურთხევეფს  ვამმარკენა (წეკითხით 1 პეტრე 5:6, 7). * იეჰოვაშ აღმზრდელობით ზომეფს შეულებ ჩქინ გიმოსწორება, მუჟამსით ქუდვაჸუნუთ თიშ მითითებეფს.

¹¹ შებნაწკუმა გიმორჩქინელ აღმზრდელობით ზომეფშე მნიშვნელოვან გაკვეთილიშ გურაფა შეულებნა თინეფს, მისით ოვალნა შხვეფშა მითითებეფიშ მეჩამა დო გეწურაფა, მაგალთო მშობლეფს დო ქრისტიან ზედამხედველეფს. იეჰოვაშ აღმზრდელობით ზომეფშე იძირე, ნამდა თის მუშ მსახურ უჸორს, მარა ჯოგ თიშ გლახა საქციელი. ქრისტიან მშობელი ვარდა უხუცეს ქორეთ-და, ქიმიაჸუნით იეჰოვაშ მაგალითის დო ბაღანეფიშ ვარდა თანამორწმუნეეფიშ ჯგირ მხარეეფს ქიმიაქცით ყურადღება. თეწკუმა ართო, ღორონთცალო, თქვა ხოლო რჯოგდან თი გლახა საქციელი დო ცოდა, ნამუთ შილებე თინეფქ ჩედინან (იუდ. 22, 23).

12^—14. ა) მუჭო მოქმედენს ნამთინეწკუმა აღმზრდელობით ზომეფი? ბ) მუჭო მეხვარ ართ ჯიმას ღორონთიშ სიტყვაქ, დუთირუდკო აზროვნება დო მუ შედეგეფქ მაჸუნ თეს?

¹² სანარღოთ, ნამთინე აღმზრდელობით ზომეფიშ მეღებას მანგარო გენიცადენს. თეცალ დროს შილებე გვალო დეშორან ღორონც დო თიშ ხალხის (ებრ. 3:12, 13). მარა ნიშნენსო თენა თის, ნამდა თეცალ ხალხშა ვემიხვარებე? მორთ გუვარჩუათ გრეჰემიშ მაგალით, ნამუთიქ გერიცხჷ, მარა დრო ხანიშ უკულ კინ დირთ კრებაშა. თეშ უმკუჯინუო, თინა სულიერო ვარდ აქტიური. მუსხირენ წანაშ უკულ თიქ ბიბლიაშ გურაფა ქოთხუ ართ უხუცესის, ნამუთ ოცადუდ თიწკუმა დამეგობრებას.

¹³ უხუცესი იშინანს: „გრეჰემს სიამაყეშ პრობლემა უღუდ. თინა აკრიტიკენდ თი უხუცესეფს, მით თიშ გარიცხვას მონაწილენდჷ. მუსხირენ შეხვალამა დავუთმით თი ბიბლიურ მუხლეფიშ გარჩიებას, ნამუთ სიამაყეს დო თიშ შედეგეფს ოხუდ. ღორონთიშ სიტყვაქ თის სარკეცალო ქაძირუ მუშ დუდ დო გრეჰემს ვემეწონ მუშ თვისებეფქ. თეს ჯგირ შედეგიქ მაჸუნ! თიქ ხეთეშე ქიდიჭყჷ უჯგუშობაშე თირუა, მუჟამსით ქიმეხვად, ნამდა მუშ პრობლემა სიამაყე დო კრიტიკულ განწყობა რდუ. გრეჰემ ვაჩილითუანდ კრებაშ შეხვალამეფს, გურგედვალირო გურაფლენდ ღორონთიშ სიტყვას დო ირ დღას ლოცულენდჷ. თიქ ოჯახიშ სულიერო მიკოჯინა ხოლო ქიდიჭყჷ, მუდგაქ ჯგირ შედეგეფ მოუღჷ მუშ ჩილ დო სქუას“ (ლუკ. 6:41, 42; იაკ. 1:23—25).

¹⁴ უხუცეს გეუძინანს: «ართ დღას გრეჰემქ თიშნერ მუდგარენ მიწუ, მუდგაქ ჩქიმ გურს მანგარო შეხუ. თიქ მიწუ: „ჭეშმარიტება წანეფ რე მიჩქჷ დო პიონერო ხოლო ვმსახურენდ. მარა ხვალე ასე შემლებ ალალას ფთქუე, ნამდა მიჸორს იეჰოვა“. ჭიჭე ხანშა თის მიკროფონიშ გილაღალაშ პასუხიშმგებლობა ქიმეჩეს. თინა მანგარო აფასენდ თე უპირატესობას. თიშ მაგალით მოგურუანს, ნამდა მუჟამსით პიროვნება თანდაბლობას გიმირჩქინანს დო ღორონთიშ აღმზრდელობით ზომეფს ღებულენსინ, კურთხევეფ ვემიოკორდუ!».

15. მუჭო ოკო მიქცუან თინეფქ, მიდგას აღმზრდელობით ზომეფიშ გიმორჩქინა ოვალ?

¹⁵ ჯგირ მასწავლებერეფქ ქიპჸუათინ, ჯგირ მოსწავლეეფი ოკო ვორდათ (1 ტიმ. 4:15, 16). თინეფ, მიდგას ოვალნა აღმზრდელობით ზომეფიშ გიმორჩქინან, თანდაბლეფი ოკო რდან დო მიაჸუნან იეჰოვაშ ხემძღვანელობას. თენა მეხვარებ შხვეფს გეგმირჩქინან ხემძღვანელ ჯიმალეფიშ პატიცემა დო უმოს ადვილო მიღან რჩევა. მორთ, გუვარჩუათ იესოშ მაგალით.

16. მუშ გურაფა შემლებნა იესოშე, მუჟამსით საქმე ოხუ აღმზრდელობით ზომეფიშ გიმორჩქინას დო ეფექტურ გურაფას?

¹⁶ იესო ირიათო ომორჩილუდ მუშ ზეციერ მუმას, თიმწკუმა ხოლო მუჟამსით თეშ კეთება მანგარ რთულ რდუ (მათ. 26:39). თინა ურაგადუდ მუშ მიმაჸუნალეფს, ნამდა თიშ გურაფეფ დო სიბრძნე ზეციერ მუმაშე მიშჷ (იოან. 5:19, 30). იესო თანდაბლობას დო  მორჩილებას გიმირჩქინანდჷ, ათეშენ მიშჷ ალალ გურიშ კათა თიშ ორჩქილშა. თე თვისებეფქ მეხვარ თის, ჸოფედკო დიდებულ მასწავლებერ, ნამუსით გურშა მეუღუდ შხვეფიშ გაჭირება (წეკითხით ლუკა 4:22). * იესოშ გემუან სიტყვეფ გურშა ელუკინანდ გურ გოტახილ ხალხის (მათ. 12:20). იესო თიმწკუმა ხოლო გიმირჩქინანდ ჸოროფას, მუჟამსით თიშ მოთვინება გიმიცადებუდ. მაგალთო, თის მოთვინება ვა უდინუაფ, მუჟამსით მოციქულეფ ნირზენდეს, მი რდუ თინეფ შკას არძაშ უმოს. თიქ ჸოროფა გეგმირჩქინ დო ქიმეხვარ თინეფს აზროვნებაშ თირუას (მარ. 9:33—37; ლუკ. 22:24—27).

17. ნამ თვისებეფ მეხვარებ უხუცესეფს დოჭყიშან ღორონთიშ ოჭყიშალ?

¹⁷ აღმზრდელობით ზომეფიშ გიმორჩქინა ოვალნა თინეფ, გონივრულო იქციებნა, მუჟამსით იესოშ მაგალითის მეჸუნა. თეგვარო თინეფ ოძირანა, ნამდა ოკონა მიაჸუნან ღორონთიშ დო თიშ სქუაშ ხემძღვანელობას. მოციქულ პეტრექ ჭარ: „დოჭყიშეთ თქვანდა მებარებულ ღორონთიშ ოჭყიშალ, მარა ნანძალუო ვარინ, ხიოლით, უპატიოსნო შემოსავალიშ ჸოროფათ ვარინ, გურგედვალირო. ვეუნჩაშათ თინეფშე, მით ღორონთიშ საკუთრება რე, მაგალით რდათ ოჭყიშალშო“ (1 პეტ. 5:2—4). მუჟამსით ზედამხედველეფ ღორონც დო კრებაშ დუც, ქრისტეს, ხიოლით ომსახურნან, თეს ჯგირობუა მოუღჷ მუჭოთ მუნეფშონ, თეშ შხვეფშო ხოლო (ეს. 32:1, 2, 17, 18).

18. ა) მუს ითხინს იეჰოვა მშობლეფშე? ბ) მუჭო ოხვარ იეჰოვა მშობლეფს მუნეფიშ პასუხიშმგებლობაშ შესრულებას?

¹⁸ მუშ რაგად შილებე ოჯახის აღმზრდელობით ზომეფიშ გიმორჩქინაშ გურშენ? ბიბლია ოჯახიშ დუდეფს ურაგად: „ვაგაღიზიანათ თქვან სქუალეფი, მიკულეთ თინეფს — იეჰოვაშ მოსაწონო მორდით დო ქიგიოწურეთ“ (ეფეს. 6:4). მუსხით სერიოზულ საკითხ რე თენა? იგავეფიშ 19:18-ს პკითხულენთ: „დასაჯ სქან სქუა სოიშახ ხეშე ურდას, მუშენდა თიშ ღურაქ სი ვეგგადვას ცოდათ“. იეჰოვა მშობლეფს ავალენს ბაღანაშ რდუალას დო თინეფქ თე პასუხიშმგებლობა ვეშიასრულეს-და, ღორონთშა აჸინა პასუხ მიოჩამალ! (1 სამ. 3:12—14). იეჰოვა მშობლეფს სიბრძნეს დო ძალას ქიმეჩანს, მუჟამსით თანდაბლურო ქოთხინა თეს ლოცვათ, ქიმიაჸუნუნა ღორონთიშ სიტყვაშ დო წმინდა შურიშ ხემძღვანელობას (წეკითხით იაკობი 1:5). *

19, 20. ა) მუ კურთხევეფ მოჸუნს ღორონთშე აღმზრდელობით ზომეფიშ მეღებას? ბ) მუს გუვარჩიენთ თეშ უკულიან სტატიას?

¹⁹ ბრელ კურთხევეფ მაღვენუნა, მუჟამსით მიბღენთ აღმზრდელობით ზომეფს დო ქიმვაჸუნუთ იეჰოვაშ დო იესო ქრისტეშ მაგალითის აღმზრდელობით ზომეფიშ შხვეფწკუმა გიმორჩქინაშ დროს. შედეგო, კრებას დო ოჯახის ხოლო მშვიდობა იჸუაფ, არძა დაფასებულო დო უსაფრთხოთ იგინანს დუც. თე ირფელ მოძირანა მუნერ მშვიდობა დო ბედნერობა მელუნა მომავალს (ფსალმ. 72:7). იეჰოვაშ გიმორჩქინელ აღმზრდელობით ზომეფ მამზადენა მომავალს მარადიულო ქიფცხოვრათ მუჭოთ ართ ოჯახიქ, ნამუშ მუმა იეჰოვა იჸუაფ (წეკითხით ესაია 11:9). * ირიათო ქოფშუდან თენა დო უმოსო დუვაფასენთ აღმზრდელობით ზომეფს, სოვრეშეთ იძირე, ნამდა ღორონც დასურო ვუჸორთ.

²⁰ თეშ უკულიან სტატიას უმოს დეტალურო გუვარჩიენთ აღმზრდელობით ზომეფიშ გიმორჩქინას ოჯახის დო კრებას. თეს გეძინელ, ქობძირუნთ, მუჭო გიმიფრჩქინათ თვითდისციპლინა. თის ხოლო ქიგებგენთ, ნამდა აღმზრდელობით ზომეფს მინშა გურჭუა მოჸუნს, მარა უმოს გურსაჭუო რე თი შედეგეფ, ნამუთ ღორონთიშ დარიგებაშე ვარიაშ რაგადის მოჸუნს.