1. მუ სირთულეეფს შითმოხვადუდეს პირველ საუკუნეშ ქრისტიანეფი?

მოციქულ პეტრექ ახ. წ 62—64 წანეფს მეჭარ „პონტოს, გალატიას, კაპადოკიას, აზიას დო ბითინიას მიკოცუმილ დროებით მახორუეფს“ (1 პეტ. 1:1). მცირე აზიაშ კრებეფს შხვადოშხვა ადგილშე მოულირ და დო ჯიმალეფ მსახურენდეს. თინეფს გურიშ ელაკინა დო ხემძღვანელობა ოსაჭირდეს, მუშენდა თინეფიშ გურშენ გლახას იჩიებდეს დო წინააღმდეგობეფს ხოლო შითმოხვადუდეს. თეს გეძინელ, რთულ პერიოდის ცხოვრენდეს, მუშენდა მუჭოთ პეტრექ თქუნ, „ხოლოს რდუ ირფელიშ დასასრული“. იერუსალიმიშ განადგურებაშახ სოდგარენ ვით წანაშე ნაკლებ რდუ დოსკილადირ. მუ მეხვარებუდ ქრისტიანეფს სოდგა ვარდესკო, ქუგურზესკო რთულ სიტუაციეფს? (1 პეტ. 4:4, 7, 12).

2, 3. მუშენ ელუჩ პეტრექ ქრისტიანეფს სტუმარიშ პატიცემაშ გიმორჩქინა? (ქოძირით სურათ თე გვერდის).

² თე ირფელწკუმა ართო პეტრე მოციქულქ თანაქრისტიანეფს ხოლო ართ მუდგარენ ელუჩ: „გეგმირჩქინით ართიანწკუმა სტუმარიშ პატიცემა“ (1 პეტ. 4:9). ბერძნულ სიტყვა „სტუმარიშ პატიცემა“ პირდაპირ გეგნოფთარგმნათინ, ნიშნენს „ჸოროფაშ გიმორჩქინას ვარდა ჯგირიშ კეთებას უცხოეფშა“. საინტერესო რე, ნამდა პეტრე მოციქულქ ქრისტიან და დო ჯიმალეფს ელუჩ, სტუმარიშ პატიცემა ართიანწკუმა გეგმურჩქინდესკო, თიშ უმკუჯინუო, ნამდა იჩინენდეს ართიანს. მუს მეხვარებუდ თეშ კეთება თინეფს?

 ³ სტუმარიშ პატიცემაშ გიმორჩქინათ თინეფს უმოს ხოლოშიან ურთიერთობა აღვენუდეს ართიანწკუმა. მუშ რაგად შილებე თქვანდე? მუჭო იგინით დუდ, მუჟამსით სტუმარო დუგაპეჯეს? ალბათ ირიათო ჯგირო გუგაშინენა თექ გატარებულ სასიამოვნო დრო. თქვან მეგობრობა უმოსო გემანგარებუდ, მუჟამსით კრებაშ წევრის ჸუდეშა ქუდაპეჯენდით. სტუმარიშ პატიცემაშ გიმორჩქინათ უმოსო იფჩინებაფუანთ და დო ჯიმალეფს ვინემ შხვა დროს. პეტრეშ დროს მახორუ ქრისტიანეფს ოსაჭირდეს ართიანწკუმა დაახლოება, თიშენ ნამდა ცხოვრება უმოსო იუფრაშებუდ. თეშ რაგად შილებე ჩქინდე ხოლო, მუშენდა „ბოლო დღალეფს“ ფცხოვრენთ (2 ტიმ. 3:1).

4. მუ კითხვეფს გუვარჩიენთ თე სტატიას?

⁴ მუჭო შემლებნა ართიანწკუმა სტუმარიშ პატიცემაშ გიმორჩქინა? მუქ შილებე მეცილან სტუმარიშ პატიცემაშ გიმორჩქინას დო მუ ოკო ვაკეთათ თე დროს? მუ მიმეხვარებნა ვორდათ ჯგირ სტუმარი?

5. მუჭო შემლებნა სტუმარიშ პატიცემაშ გიმორჩქინა კრებაშ შეხვალამეფიშ დროს?

⁵ კრებაშ შეხვალამეფს. იეჰოვა დო თიშ ორგანიზაცია არძას მაპეჯენა კრებაშ შეხვალამეფშა. ჩქი მოკონა თექ არძაქ ჯგირო იგინას დუდ დო განსაკუთრებულო ახალ მოულირეფქ (რომ. 15:7). თინეფ იეჰოვაშ სტუმარეფ ხოლო რენა, ათეშენ ირნერო ოკო ვეცადათ ჯგირო ქიგინან დუდ, ვა უღჷ მნიშვნელობა მუ მიკაქუნა ვარდა მუნერ გარეგნობა უღნა (იაკ. 2:1—4). ხომ ვეშეთავაზენდით სტუმარს თქვან გვერდით დოხუნას? თინა მარდულ იჸუაფ, მუჟამსით გეუნწყუნთ, მუჭო იტარებ შეხვალამა დო ქიმეხვარებუთ ბიბლიურ მუხლეფიშ გორუას. თენა დასურო სტუმარიშ პატიცემაშ გიმორჩქინა იჸუაფ (რომ. 12:13).

6. მი ოკო დუვაპეჯათ ჸუდეშა?

⁶ ჸუდეშა დაპეჯება. ბიბლიურ დროს სტუმარიშ პატიცემაშა ოჭკუმალიშ მიკოღალა ხოლო მიშურდ (დაბ. 18:1—8; მსაჯ. 13:15; ლუკ. 24:28—30). თეშნერ საქციელით მენძელ ოძირანდჷ, ნამდა სტუმარწკუმა ხოლოშიან დო მშვიდობიან ურთიერთობა ოკოდ. პირველ რიგის ჩქინ კრებაშ წევრეფ ოკო დუვაპეჯათ ჸუდეშა. მუჟამსით თე ქიანას მგდომარეობა გეუფრაშებუნ, ჩქი ართიანშა მაჸინა ალარინალ, ათეშენ ართიანწკუმა ხოლოშიან ურთიერთობა ოკო მიღდან. საინტერესო რე, ნამდა 2011 წანას ხემძღვანელ საბჭოქ, შეერთებულ შტატეფიშ ბეთელს „გინაჯინალ კოშკიშ“ გარჩიებაშ დრო დოთირუ. თე შეხვალამა 18:45-ის იჭყაფუდ დო 18:15-შა გეგნიღეს. თეშ მიზან თინა რდუ, ნამდა ბეთელიშ ოჯახიშ წევრეფს მეტ დროქ ქუდასკიდესკო ართიანწკუმა ურთიერთობაშო. თინეფიშ მაგალითის შხვა ბეთელეფქ ხოლო ქიმიაჸუნეს დო თექ მანგარო შეუნწყუ ხე ბეთელიშ ოჯახიშ წევრეფს ართიანიშ უჯგუშო გაჩინებაფას.

7, 8. მუჭო გიმიფრჩქინათ სტუმარიშ პატიცემა მოწვიებულ მომხსენებელეფწკუმა?

⁷ მუჟამსით მოწვიეუბლ ჯიმალეფ, რაიონულ ზედამხედველეფ დო ფილიალიშ წარმომადგენელეფ ჩქინ კრებას ვარდა კონგრესის მოხსენებათ მოულან, საშვალება მიღნა, გეგმიფრჩქინათ სტუმარიშ პატიცემა (წეკითხით 3 იოანე 5—8). * შემლებნა თინეფ ჸუდეშა ქუდვაპეჯათ დო ოჭკუმალ ვარდა ყავა გემკუღათ.

⁸ ართ და, ნამუთ შეერთებულ შტატეფს ცხოვრენსინ, იჩიებ: „წანეფიშ დინახალე მა დო ჩქიმ ქომონჯ მოწვიებულ მომხსენებელეფს დო თინეფიშ ოსურეფს ჸუდეშა ვაპეჯენდით. თეს ჩქინდა ირიათო ხიოლ მოუღუდ დო მუთ არძაშ უმოს მნიშვნელოვან რენ, რწმენას მიმანგარენდეს. სტუმარიშ პატიცმაშ გიმორჩქინა დღას ვამნარღებნა“.

9, 10. ა) მის შილებე დესაჭირას ჩქინწკუმა დიდ ხანით გაჩერებაქ? ბ) შეულებნანო სტუმარეფიშ მეღება თი და დო ჯიმალეფს, მიდგა ჭიჭე ჸუდეს ცხოვრენს?

⁹ სტუმარეფ, ნამუთ ჸუდეს დიდ ხანს ჩენდუნა. ბიბლიურ დროს მეღებულ რდუ,  სტუმარ ჸუდეს სერით ხოლო გაჩერესკო (იობ. 31:32; ფლმ. 22). შილებე ამდღა ხოლო ქიჸუას თექ საჭიროქ. მაგალთო, ხშირას რაიონულ ზედამხედველს კრებაშ მონახულებაშ დროს ოსაჭირ გასაჩერებელ ადგილ. შილებე შხვადოშხვა თეოკრატიულ სკოლეფს გურაფლენა ვარდა მშენებლობას მონაწილენან თი და დო ჯიმალეფს ოკოდან ადგილ, სოდეთ გისერუანა. მუშ რაგად შილებე თინეფშე, მისით სტიქიურ უბედრობაქ გიოტირხ დუც დო ჸუდე ვაუღ? ჸუდეშ შენებაშახ თე და დო ჯიმალეფს შილებე გიოსერაფალ ადგილქ დესაჭირან. თეცალ დროს ოკო ვეფიფქრათ, ნამდა თინეფიშ მეღება ხვალე თი და დო ჯიმალეფს შეულებნა, მიდგას დიდ ჸუდე უღჷ. თინეფს უკვე ბრელშა აჸინა ნაკეთებ თეცალ მუდგარენ. ათეშენ ჭიჭე ჸუდეს ცხოვრენთინ თიშ უმკუჯინუო, შეილებნა თქვა ხოლო გაჩერათ თინეფ თქვანწკუმა.

¹⁰ ართ სამხრეთ კორეელ ჯიმა იშინანს თი დროს, მუჟამსით შხვადოშხვა თეოკრატიულ სკოლეფს გურაფლენდესინ თი და დო ჯიმალეფ თიშ ჸუდეს სქიდუდეს. თინა ჭარუნს: „მა დო ჩქიმ ოსურ ახალ დაოჯახებულეფ ვორდით დო ჭიჭე ჸუდეს ფცხოვრენდით, ათეშენ ფთაკილენდით სტუმარეფიშ მეღებას. მარა მოხიოლდეს სკოლას გურაფლენდესინ თი და დო ჯიმალეფიშ მეღება. მუჭოთ ახალ დაოჯახებულეფქ, ქობძირით, მუნერ ბედნერობა მოუღჷ ჩილ დო ქომონჯშო, მუჟამსით ართო ომსახურნა იეჰოვას დო სულიერ მიზნეფს მიოჭირინუანა“.

11. მუშენ ოკო გიმიფრჩქინათ სტუმარიშ პატიცემა კრებაშ ახალ წევრეფწკუმა?

¹¹ კრებაშ ახალ წევრეფწკუმა. შილებე თქვან კრებაშა ნამთინე და დო ჯიმაქ ვარდა მთლიან ოჯახიქ გინილას. თინეფ შქას შილებე რდან თი მაუწყებელეფ, ნამუთ თექ გინმულა, სოდეთ მაქადაქებელეფიშ დიდ საჭიროება რე. შილებე ნამთინე პიონერ დანიშნან თქვან კრებას. თე ირფელ დიდ ცვლილება რე თე პიროვნებეფშო, მუშენდა ოკო მიარჩქვანან ახალ გარემოს, ახალ კრებას, ახალ კულტურას დო თეს გეძინელ, შილებე ახალ ნინაშ გურაფაქ ხოლო დესაჭირან. ჯგირ იჸუაფ ქუდვაპეჯათ თინეფ ყავაშა ვარდა ოჭკუმალშა. თეს გეძინელ, შემლებდეს თინეფწკუმა ართო სოდგარენ მიდამრთუმდესკო. თე ირფელ მეხვარებ თე და დო ჯიმალეფს დოგორან ახალ მეგობრეფ დო ქიმიარჩქვანან ცვლილებეფს.

12. ნამ შემთხვევაშე იძირე, ნამდა სტუმარიშ პატიცემა გეგმიფრჩქინათინ, ვა რე საჭირო ბრელ შეწუხება?

¹² სტუმარიშ პატიცემა გეგმიფრჩქინათინ, ვა რე საჭირო ბრელ შეწუხება (წეკითხით ლუკა 10:41, 42). * ართ ჯიმა იშინანს თი დროს, მუჟამსით მისიონერობა ახალ დოჭყაფილ აფუდ: „ჩქი ახალგაზრდეფ ვორდით დო გამოცდილება ხოლო ვამღდეს. თეს გეძინელ, ჸუდე მონატრუდეს. ართ დღას ჩქიმ ოსურ მანგარ მოწყინაფილ რდუ, მუშენდა ჸუდე ონატრუდ. ვოცადუდ გურშა ელამკინუდკო, მარა მუთუნქ ვეგშამირთ. ონჯუაშ ბრუოშ გვერდის ჩქინ კარს მიდგარენქ ქუდუხაკუ. კარს ართ ძღაბ გერდჷ, ნამუთ ბიბლიას გურაფლენდჷ დო სუმცალ ფორთოხალ უკინებუდ. თინა ახალ გინულირ მისიონერეფიშ გაჩინებაფშა რდუ მოულირ. ჩქი დინახალე გემნიპჸონით დო ართ ჭირქა წყარ ქოფჩით. უკულ ჩაი დო ჩხე შოკოლად დუვოფუნეთ. ვართ ჩქი მიჩქდეს სუაჰილიშ ნინა დო ვართ თის უჩქუდ ინგლისური. მარა თე შემთხვევაქ, ქიმმეხვარეს ქუდომჭყაფდესკო მეგობრეფიშ გორუა ადგილობრივ და დო ჯიმალეფ შქას დო თექ მუშო ოკო რაგად, დიდ ხიოლ მომღეს“.

13. მუ ჯგირობუა მოუღჷ სტუმარიშ მეღებას?

¹³ დღას ქოითქუალნანო ვარია სტუმარიშ პატიცემაშ გიმორჩქინაშე? თაშ ქორდუ-და, ხეშე გოიტებნა თიშ საშვალება, ჯგირ დრო გატარითკო, ნამუთ ხეს შეუნწყუნდჷ მეგობრულ ურთიერთობეფიშ გავითარებას. მუჟამსით დუც ხვალახეთ ბგინაფლენთინ, სტუმარიშ პატიცემაშ გიმორჩქინა ჯგირ საშვალება რე, გივორჯგინათ თე გრძნობას. მარა შილებე იფიქრათ, მუშენ იჩიებ ნამთინე ვარიას სტუმარიშ მეღებაშე? თეშ შხვადოშხვა მიზეზ არსებენს.

14. მუშ კეთება შემლებნა, მუჟამსით საჭირო დრო დო ენერგია ვამღუნა სტუმარიშ მიოღებელო?

 ¹⁴ დრო დო ენერგია. იეჰოვაშ მსახურეფ დაკავებულეფ რენა დო ხშირას ბრელ პასუხიშმგებლობეფ უღნა. ათეშენ შილებე ნამთინე ფიქრენდას, ნამდა ვა უღჷ სტუმარიშ მეღებაშ დრო დო ენერგია. თქვა ხოლო თაშ ქორეთ-და, ქიგნაჯინით თქვან განრიგის. ხომ ვეშეილებნა გეგმეფიშ თირუა, ნამდა შეგალებუან სტუმარიშ მეღებაქ? ბიბლია ელუჩანს ქრისტიანეფს, ხოლო უმოსო გეგმირჩქინან სტუმარიშ პატიცემა (ებრ. 13:2). სტუმარიშ პატიცემაშ გიმორჩქინა ჯგირ საქციელ რე, ათეშენ ნაკლებო მნიშვნელოვან საქმეეფს ჭიჭე დრო დუთმით.

15. მუშენ შილებე ნამთინექ ვეგმირჩქინას სტუმარიშ პატიცემა?

¹⁵ მუს ფიქრენთ თქვან დუდშე. შილებე გოკოდან სტუმარიშ მეღება, მარა ფიქრენდათ, ვეშკალებენა თეშ კეთება. ნამთინე მორდებუან რე დო ფიქრენს, ნამდა სტუმარეფ მუშ ჸუდეს მოწყინდუნა. შხვეფს შილებე ისხი ფარა ვა უღდან დო იფიქრან, კრებაშ შხვა წევრეფცალო ვაცინენა პატი სტუმარშა. მარა რშუდან, მთავარ ვა რე მდიდრულ ჸუდე მიღდან. სტუმარეფქ დუდ ჯგირო ქიგინანინ, საჭირო რე სისუფთავე დო მეგობრულ გარემო.

16, 17. მუჭო მიფქცუათ, მუჟამსით ზედმეტო მნერვიანენთ სტუმარეფიშ მეღებაშე?

¹⁶ შილებე ნერვიანენდათ სტუმარეფიშ მეღებაშ გურშენ, მარა ხვალე თქვა ვა რეთ თეცალ მდგომარეობას. ართ უხუცეს, ნამუთ ბრიტანეთის ცხოვრენსინ, იჩიებ: „მუჟამსით საქმე სტუმარეფიშ დოხვამლაფას ოხუნ, შილებე ბრელ მუთუნს ნერვიანენდათ. მარა არძანერ ონერვიანებელს გინმოწონუნს ირფელ, მუთ იეჰოვაშ მსახურებას ოხუ, მუშენდა თის დიდ კმაყოფილება მოუღჷ. მანგარო მოსიამოვნჷ სტუმარეფწკუმა ართო ყავაშ შუმა დო ჩიება“. მუშო ოკო რაგად, ჯგირ რე, მუჟამსით სტუმარეფს ყურადღებას ვაქციენთ (ფილ. 2:4). არძას ოსიამოვნჷ მუნეფიშ ცხოვრებაშ გურშენ ჩიება. მუჟამსით ართო ეკიფშაყარუთინ, მიღნა საშვალება, ქიმიფრჩქილუათ ართიანიშ შემთხვევეფი. შხვა უხუცეს ჭარუნს: „კრებაშ წევრეფიშ ჸუდეშა დაპეჯება მოხვარ უმოს ხოლოშე გეფჩინებაფუე თინეფ დო ქიმიფრჩქილუე, მუჭო გეგეს ჭეშმარიტება“. სტუმარეფს ახიოლენა, მუჟამსით დროს გეგმურთუნთ თინეფწკუმა ურთიერთობას.

¹⁷ ართ პიონერ დას სტუმარო ჸუნდჷ თი და დო ჯიმალეფ, ნამუთ შხვადოშხვა თეოკრატიულ სკოლეფს გურაფლენდეს. თინა იჩიებ: «დუდშე მნერვიანენდჷ, მუშენდა უბრალო ჸუდეს ფცხოვრენქ დო მეორად ავეჯი მილამიძ. ართ-ართ ინსტრუქტორიშ ოსურიშ სიტყვეფქ დასურო დუმამშვიდ. თიქ მიწუ, ნამდა მუჟამსით ქომონჯწკუმა ართო გილმალ ზედამხედველო მსახურენდესინ, არძაშ უმოს კომფორტულო თიცალ პიროვნებაშ ჸუდეს გინაფლენდჷ დუც, ნამუსით სულიერ აზროვნება უღუდ. თე და დო ჯიმალეფს შილებე მატერიალურო ბრელ ვა უღდესკო, მარა თინეფს პირველ ადგილშა იეჰოვაშ მსახურება გეურდეს დო უბრალოთ ცხოვრენდეს. თე ირფელქ დიაჩქიმიშ სიტყვეფ ქუგმოშინ, ნამუთ ბაღანობას მირაგადუდ: „ბოსტნეულშე კეთებულ ოჭკუმალ დო ჸოროფა უჯგჷ“» (იგავ. 15:17). მორთ, ზედმეტო ვეპწუხათ დო გეგმიფრჩქინათ სტუმარიშ პატიცემა.

18, 19. მუჭო მიმეხვარებნა სტუმარიშ პატიცემაშ გიმორჩქინა, გივორჯგინათ გლახა ფიქრეფს?

¹⁸ მუს ფიქრენთ შხვეფიშ გურშენ. ხომ ვა რე კრებას თიშნერ მითინ, მიდგაშ საქციელ ვა მორწონა? შილებე თე პიროვნებაშე გლახა წარმოდგენა გიღდან დო ურთიერთობაშ გიშანწყუალა ვემინდომით-და, სიტუაციაქ თაშ გეგრძელას. შილებე ნამთინე ვადაპეჯათ ჸუდეშა თიშ გურშენ, ნამდა ვამორწონა თიშ ხასიათი ვარდა ადრე გოწყინებაფეს დო დიო ხოლო ვაგორჭყოლადნა თენა.

¹⁹ ბიბლია იჩიებ, ნამდა სტუმარიშ პატიცემა მიმეხვარებნა გუვაუჯგუშათ ურთიერთობეფ შხვეფწკუმა, თეს გეძინელ, ნტერეფწკუმა ხოლო (წეკითხით იგავები 25:21, 22). * მუჟამსით ჸუდეშა ქუდაპეჯენთ თი ქრისტიანს, მიდგაშე ნაწყენ რეთ, თენა მიგეხვარებნა გიორჯგინათ გლახა ფიქრეფს დო მაგვარათ უთანხმოება. შედეგო, თი ჯგირ თვისებეფს ქოძირუნთ, ნამუშ გურშენ იეჰოვაქ თე პიროვნება  ჭეშმარიტებაშა მიჸონ (იოან. 6:44). ურთიერთობაქ შილებე უჯგუშობაშე დითირას, მუჟამსით ჸოროფას გეგმიფრჩქინანთ დო თიცალ პიროვნებას ქუდვაპეჯენთ ჸუდეშა, ნამუთ შუროთ ველ თეს ჩქინდე. მუჭო შემლებნა თიშ გაგება, თეს დასურო ჸოროფათ ვორთუთ დო ვარ? ართ-ართ საშვალება რე ფილიპელეფიშ 2:3-ს მოჩამილ რჩევაშ გიმორნაფა: „რდათ თანდაბლეფ დო შხვეფ თქვან დუდშე უმოსო მირჩქინით“. ჩქი ოკო იფიფქრათ, მუ საკითხის რენა და დო ჯიმალეფ ჩქინდე უჯგუშეფი. შემლებნა თინეფშე იბგურუათ მუჭო გიმიფრჩქინათ რწმენა, მოთვინება, გაბედულება დო შხვა ქრისტიანულ თვისებეფი. თეშნერ საქციელით უმოსო ქიპჸოროფუანთ ჩქინ და დო ჯიმალეფს დო ადვილ მაჸინა სტუმარიშ პატიცემაშ გიმორჩქინა.

20. მუშენ ოკო დუვაფასათ, მუჟამსით თანაქრისტიან ჸუდეშა მაპეჯენა დო მუჭო ვოძირათ თენა?

²⁰ ფსალმუნმაბირე დავითიქ იკითხ: „იეჰოვა, მი მოურს სტუმარო სქან კარავშა?“ (ფსალმ. 15:1). თეშ უკულ მიშინუ თი საკითხეფ, ნამუთ ღორონც ოკო, მუშ სტუმარეფქ გეთვალისწინან. ართ-ართ რე, მეჩამილ პირობაშ შესრულება. ბიბლიას ჭარ: „მით უკახალე ვერთინუანს მუშ დოდვალირ სიტყვას; თიწკუმა ხოლო, მუჟამსით თეს გლახა მოუღჷ თიშა“ (ფსალმ. 15:4). შხვეფს სტუმარო მოულაშ პირობა ქიმეფჩით-და, უმნიშვნელო მიზეზიშ გურშენ ოკო ვეგნობდვათ თინა. მენძელ შილებე იხაზირებდას ჩქინ დახვამლაფარო დო ვემეფრთით-და, ხანდას წყარშა ქინურღვანთ (მათ. 5:37). ნამთინექ შილებე სტუმარო მეულა გეგნოდვას, მუშენდა უჯგუშ ადგილშა ქუდაპეჯეს. ქიძირენო თეცალ საქციელშე ჸოროფა დო მენძელიშ პატიცემა? ჩქი მარდულეფ ოკო ვორდათ თი ირფელშენ, მუდგას მენძელ მიმზადენა (ლუკ. 10:7). მარა მუჟამსით გინოდვალა აუცილებერ რენ, გეგმიფრჩქინათ ჸოროფა დო მენძელს მუთ შილებენ მალას ქუგვოგებაფუათ თეშ გურშენ.

21. მუჭო მიმეხვარებნა ადგილობრივ კულტურაშ პატიცემაშ გიმორჩქინა, ვორდათ ჯგირ სტუმარი?

²¹ მნიშვნელოვან რე, პატი ქოფცათ ადგილობრივ კულტურას. ნამთინე ქიანას ველუნან ფერ სტუმარიშ მოულა ოხიოლნა. მარა შხვა ქიანეფს, უჯგუშ იჸუაფ სტუმარქ წინასწარ გაფრთხილას მენძელ, მუჟამ უპირებ მეულა. ნამთინე ქიანას მენძელს დიო სტუმარშა მუკუღ არძაშ უჯგუშ ოჭკუმალ დო უკულ ოჯახიშ წევრეფშა. რე ქიანეფ, სოდეთ ჟირხოლო ართნერ ოჭკუმალს ჭკუმუნს. ნამთინე ქიანას სტუმარეფს მუდგარენ მოუღნა მენძელშა, მარა შხვა ქიანეფს მენძელს უსხუნ სტუმარქ მუთუნშე ვეწუხას. თიცალ ქიანეფ ხოლო რე, სოდეთ სტუმარ წესიშ გურშენ ვარიას იჩიებ, მუჟამსით ართშა ვარდა ჟირშა აპეჯენა ჸუდეშა. მარა შხვა ქიანეფს თეშნერ საქციელ ვა რე მიღებული. მორთ, ირფელ გუვაკეთათ, ნამდა მენძელს ოხიოლდას ჩქინ დაპეჯება.

22. მუშენ რე მნიშვნელოვან სტუმარიშ პატიცემაშ გიმორჩქინა?

²² მოციქულ პეტრექ ჭარ: „ხოლოს რე ირფელიშ მოსპუალაშ დღა“ (1 პეტ. 4:7). წოხოლე მელნა დიდ გასაჭირ, მუნერით დიო მითინს ვა უძირ. მუთ უმოს ხოლოს რე, თე სისტემაშ მოსპუალან, თით უმოსო მოკონა გემამგარათ ჩქინ და დო ჯიმალეფიშ ჸოროფა. ამდღანერ დროს განსაკუთრებულო ოკო გეფთვალისწინათ მოციქულ პეტრეშ რჩევა: „გეგმირჩქინით ართიანწკუმა სტუმარიშ პატიცემა“ (1 პეტ. 4:9). თაშ ნამდა, სტუმარიშ პატიცემას ხიოლ მოუღჷ დო თეშ გიმორჩქინა საჭირო რე მუჭოთ ამდღა, თეშ მარადიულო.