მართალ ქოფთქუათინ, ამდღა მითინს ვა უჩქჷ, ზუსტას მუნერ გარეგნობა უღუდ პავლე მოციქულს. პუბლიკაციეფს მოჩამილ ნახანტეფს დო სურათეფს თინა ჩქინ წარმოსახვათ რე ეჭარილ დო არქეოლოგიურ ფაქტეფშა ვა რე გერსხილ.

მარა არსებენს ჭიჭე მინიშნებეფი. მაგალთო, 1902 წანაშ 1 მარტიშ „სიონიშ გინაჯინალ კოშკის“ მოშინაფილ რდუ ართ კოჩიშ სიტყვეფ: «პავლეშ გარეგნობა ეჭარილ რე ართ ნაშრომს „პავლეშ საქმეეფი დო თეკლა“, ნამუთიქ სოდგარენ ახ. წ. 150 წანას იჭარ. თექ პავლეშენ ჭარ, ნამდა თინა ჭიჭე, მელოტ, კაჭა, კუნტა კუჩხამ, წარბეფ ართიანს მეჭაბილ დო გინძე ჩხვინდამ რდუ“».

ქრისტიანულ ეკლესიაშ ოქსფორდიშ ლექსიკონ (1997 წანაშ გიშაშკუმალა) თე ნაშრომიშ გურშენ იჩიებ: „ვა რე გამორიცხულ, ნამდა თე ნაშრომს ისტორიულ ფაქტეფ რდას მოშინაფილ“. თი დროს თე ნაშრომს დიდ ავტორიტეტ უღუდ, მუდგას ამტკიცენს თი ფაქტი ნამდა, თიშ 80 ბერძნულ ხეშნაჭარა არსებენდ დო თეს გეძინელ, თინა შხვადოშხვა ნინაშა ხოლო რდუ ნათარგმნა. თაშ ნამდა, ჩქინ პუბლიკაციეფს ეჭარილ პავლეშ გარეგნობა მეურე ჯვეშ წყაროეფს მოჩამილ ინფორმაციას.

მარა არსებენს უმოს მნიშვნელოვან საკითხეფ, ვინემ პავლეშ გარეგნობა. მუჟამსით პავლე მსახურენდუნ, მუსხირენ კრიტიკოსიქ თიშ გურშენ თქუ: „პირადო თაქ რენ თიმწკუმა სუსტ რე დო თიშ სიტყვა მუთუნშა ვაღირ“ (2 კორ. 10:10). დღას ოკო ვოგმოჭყორდან, ნამდა პავლექ ქრისტიანო თიშ უკულ გინირთ, მუჟამსით იესოქ თის სასწაულებრივო გეგმეცხად. ჩქი თიშე ხოლო ოკო დეფიფქრათ, მუ დავალება აფუდ პავლეს შეიოსრულებელ. იესოქ თიშ გურშენ თქუ: „თე კოჩი ჩქიმ გიშნაგორა ჭურჭელ რე, ნამდა ჩქიმ სახელ გუცხადას შხვაშთურეფს“ (საქ. 9:3—5, 15; 22:6—8).

პავლე დღას ვეჩიებუდ მუშ მიღწევეფიშ გურშენ, მუდგას ქრისტიანობაშახ მიოჭირინუ. თინა მუშ გარეგნობაშ გურშენ ხოლო ვეჩიებ სოთინ (საქ. 26:4, 5; ფილ. 3:4—6). პავლექ თქუ: „მოციქულეფ შკას არძაშ უნაკლებაშ ვორექ დო ღირს ხოლო ვა ვორექ, მოციქულ ბჯოხოდას“ (1 კორ. 15:9). უმოს გვიანო თიქ ჭარ: „ჩქიმდა, არძაშ უმოს უნაკლებაშ წმინდაშა იჸუ თე ჭყოლოფაქ გიმორჩქინელქ, ნამდა შხვაშთურეფშა გეგნომჩამუდკო სახიოლო ამბე ქრისტეშ აუარებელ ქონებაშ გურშენ“ (ეფეს. 3:8). თე ცნობა დასურო უმოს მნიშვნელოვან რე, ვინემ თიშე წუხება, მუნერ გარეგნობა უღუდ პავლეს.