ნათუა აუცილებერ რე ქრისტიანეფშო
„ნათუა . . . ომსახურ თქვან რსხებას“ (1 პეტ. 3:21).
ობირეშეფი: 7, 56
1, 2. ა) მუს ფიქრენს ნამთინე მშობელ, მუჟამსით მუნეფიშ ბაღანას ნათუა ოკო? ბ) მუშენ ოკითხნა ნათუაშ მსურველეფს ქაფნან დო ვარ იეჰოვაშა დუდ მეძღვინელი? (ქოძირით სურათ თე გვერდის).
ქრისტიან მშობლეფ უჯინენა მუნეფიშ ძღაბის, ნამუთ ნათუაშ მსურველეფ შკას გერე. თიქ ხონარმაღალო დო გასაგებო ქუპასუხ მომხსენებელიშ ჟირ შეკითხვას დო თეშ უკულ დინათ.
2 თე ბაღანაშ მშობლეფ გახარებულეფ რენა, მუშენდა მუნეფიშ ძღაბიქ გეგნოჭყვიდ იეჰოვაშა დუდიშ მეძღვინუა დო ნათუა. მარა ბაღანაშ ნათუაშახ დიამუშის იშენით აწუხენდჷ თეცალ კითხვეფი: „ადრე ხომ ვა რე ჩქიმ ბაღანაშო ნათუა? ქაგინუნო, მუსხით სერიოზულ ნაბიჯის გინმოდგუნს? ხომ ვა უჯგუდ ჭიჭე ხანს ხოლო ქიჯინკო?“. თეცალ კითხვეფ ბრელ მშობელს ურჩქინდუ, მუჟამსით მუნეფიშ ბაღანას ნათუა ოკო (ეკლ. 5:5). მუშო ოკო რაგად, დუდიშ მეძღვინუა დო ნათუა ქრისტიანიშ ცხოვრებას არძაშ უმოს მნიშვნელოვან ნაბიჯ რე (ქოძირით ჩარჩო „ქუგაფნანო იეჰოვაშა დუდ მეძღვინელი?“).
3, 4. ა) მუ მაგალით მიჸონ პეტრექ თიშ ოძირაფალო, ნამდა ნათუა მნიშვნელოვან ნაბიჯ რე? ბ) მუშენ შეადარ პეტრექ კიდობანიშ შენება ნათუას?
3 მუჟამსით ნათუაშ გურშენ იჩიებუდუნ, მოციქულ პეტრექ ნოეშ კიდობანიშ შენება მიშინუ: „თეცალ რე ნათუა ხოლო, ნამუთ ომსახურ თქვან რსხებას“ (წეკითხით 1 პეტრე 3:20, 21). * ნოეს დუდ აფუდ მეძღვინელ იეჰოვაშ ნებაშ შესრულებაშა დო თენა ჯგირო იძირედ თიშ შენებულ კიდობანშე. ნოექ ართგურო შეასრულ თი დავალება, ნამუთ იეჰოვაქ მეჩჷ დო ათეშენ მუშ ოჯახწკუმა ართო დიდწყარალას გინასკიდ. მუშენ მიჸონ პეტრექ თე მაგალითი?
4 ნოეშ კიდობანშე ხალხ ორწყედ, ნამდა თის ღორონთიშ რწმენა უღუდ. თეგვარო, ნათუათ პიროვნება შხვეფს ოძირანს, ნამდა გათელებურ იესო ქრისტეშ რწმენაშ საფუძველშა დუდ აფჷ მეძღვინელ იეჰოვაშა. ნოეცალო, მეძღვინელ ქრისტიანეფ ართგურო ასრულენა თი დავალებას, ნამუთ იეჰოვას აფჷ თინეფშა მეჩამილი. ნოექ გინასკიდ დიდწყარალას, თეგვარო ართგურ ნათილ პიროვნებეფ ხოლო გინასკიდნა უბადო ქიანაშ მოსპუალას, ნამუთ მონჭაფილ რე (მარ. 13:10; გამოცხ. 7:9, 10). ათეშენ, დუდიშ მეძღვინუა დო ნათუა მნიშვნელოვან ნაბიჯეფ რე. პიროვნება, ნამუთ ნათუას უმიზეზოთ გინმოდვანსინ, მუშ სიცოცხლეს საფრთხეშ თუდო გიორინუანს.
5. მუს გუვარჩიენთ თე სტატიას?
5 მორთ, გუვარჩუათ სუმ საკითხ, სოვრეშეთ იძირე, ნამდა ნათუა სერიოზულ ნაბიჯ რე: მუს იჩიებ ბიბლია ნათუაშ გურშენ? მუ ნაბიჯებ ოკო გინოდგას პიროვნებაქ ნათუაშახ? მუშენ ოკო შუდას ირიათო ქრისტიანს, მუსხით სერიოზულ რე ნათუა, მუჟამსით ბიბლიას მუშ სქუას ვარდა შხვას ოგურუანს?
მუს იჩიებ ბიბლია ნათუაშე?
6, 7. ა) მუშენ ნათუნდჷ იოანე ხალხის? ბ) მიშ ნათუაშ პატი უღუდ იოანეს?
6 ბიბლია იჩიებ, ნამდა იოანე რდუ პირველ, მიდგაქ ხალხიშ ნათუა დიჭყჷ (მათ. 3:1—6). მუშენ ნათუნდჷ იოანე ხალხის? თინეფ მოსეშ კანონს არღვიენდეს დო ნათუათ ოძირანდეს, ნამდა ინანიენდეს თე საქციელს. იოანეს უღუდ თიშ პატი, ნამდა ღორონთიშ სრულყოფილ სქუა დუნათუდკო. მარა თიშ ნათუას მუთუნ საერთო ვა უღუდ მონანიებაწკუმა (მათ. 3:13—17). იესო ცოდამ ვა რდუ დო ვასაჭირუდ მონანიება (1 პეტ. 2:22). მუშ ნათუათ იესოქ ოძირუ, ნამდა მზათ რდუ ღორონთიშ ნება შეასრულკო (ებრ. 10:7).
7 დედამიწას მსახურებაშ დროს იესოშ მოწაფეეფ ხოლო ნათუნდეს ხალხის (იოან. 3:22; 4:1, 2). იოანეცალო თინეფ ხოლო თიშენ ნათუნდეს ხალხის, ნამდა მინანისკო თი საქმეეფ, ნამუთ მოსეშ კანონით ცოდათ ითვალუდ. მარა იესოშ ღურაშ დო გათელებაშ უკულ თიშ მიმაჸუნალეფშო ნათუას გვალო შხვა მნიშვნელობა მიაჩამუდ.
8. ა) მუ დავალება მეჩჷ იესოქ მუშ მიმაჸუნალეფს გათელებაშ უკულ? ბ) მუს ნიშნენს ნათუა ქრისტიანეფშო?
8 ახ. წ. 33 წანას გათელებურ იესოქ 500-შე მეტ კოჩის გეგმეცხად. თინეფ შკას მუჭოთ ქომოლეფინ თეშ, ოსურეფ დო ბაღანეფ ხოლო რდეს. შილებე თიქ ზუსტას თე დროს თქუკო თე სიტყვეფ: „ათეშენ მეუთ დო ოგურეთ არძანერ რჯულიშ ხალხის, ნამდა ჩქიმ მოწაფეეფქ იჸუან, დონათით თინეფ მუმაშ, სქუაშ დო წმინდა შურიშ სახელით, ქუდაგურეთ თინეფს ირფელიშ დაცვება, მუთ დუგავალით“ (მათ. 28:19, 20; 1 კორ. 15:6). იესოქ დავალება მეჩჷ მუშ მიმაჸუნალეფს, ნამდა მოწაფეეფო მამზადესკო ხალხი. თეგვარო იესოქ თქუ, ნამდა მიდგას ოკოდ თიშ მოწაფე ჸოფედკონ, აუცილებერო ოკო დონათედკო (მათ. 11:29, 30). პიროვნებაქ, მიდგას ოკო ღორონც თიშ მოსაწონო ემსახურასინ, არგამათ ოკო ქაძირუას, ნამდა არჩქილე იესოშ როლი იეჰოვაშ განზრახვაშ შესრულებას. თეშ უკულ პიროვნებას შეულებ დინათას. ხვალე თეცალ ნათუას იწონუანს ღორონთი. ბიბლიას თიშ ბრელ მტკიცებულება რე, ნამდა პირველ საუკუნეშ ქრისტიანეფს ჯგირო არჩქილედეს ნათუაშ მნიშვნელობა. თაშ ნამდა, თინეფ უმიზეზოთ ვეგნოდვანდეს ნათუას (საქ. 2:41; 9:18; 16:14, 15, 32, 33).
ვეგნოდვათ
9, 10. მუშ გურაფა შემლებნა ნათუაშ გურშენ ეთიოპ პროზელიტიშ დო მოციქულ პავლეშ მაგალითეფშე?
9 წეკითხით საქმეები 8:35, 36. * მორთ, გუვარჩუათ ეთიოპ პროზელიტიშ მაგალით, ნამუთ იერუსალიმს თაყვანიშცემაშ უკულ ჸუჩა ირთუდ. იეჰოვაშ ანგელოზიქ თიშა ფილიპე ქიმიჸონ, ნამუთიქ „იესოშ გურშენ სახიოლო ამბე გეგნოჩ“. მუჭო მიქცუ ეთიოპიელქ? მუშ საქციელით თიქ ქაძირუ, ნამდა მთელ გურით აფასენდჷ თი ჭეშმარიტებას, ნამუთ მირჩქილუ. ეთიოპიქ ქუდაჸუნ იეჰოვაშ ნებას დო ვეგნუდვალ ნათუა.
10 მაჟია რე ართ ებრაელ კოჩიშ, სავლეშ მაგალით, ნამუთ ქრისტიანეფს თხოზუდ. ებრაელეფ ღორონთიშ მეძღვინელ ერი რდუ, მარა იეჰოვაქ ვარია ქოთქუ თინეფშე, მუშენდა ვამორჩილდეს თის. სავლე დუდგინოდვალირო იცვენდ ებრაულ ტრადიციეფს, მარა თიქ უჯგუშ ამბე ქიგეგჷ. თის პირადო უქადაქ გათელებურ დო განდიდებულ იესო ქრისტექ. მუჭო მიქცუ სავლექ თეშ უკულ? თიქ მოწაფე ანანიაშე მიღჷ მოხვარა. ბიბლია თიშ გურშენ იჩიებ: „[თიქ] გედირთჷ დო დინათ“ (საქ. 9:17, 18; გალ. 1:14). უმოს გვიანო თის მოციქულ პავლეშ სახელით იჩინენდეს. ქიდვეკვირათ ართ მუდგარენს, თიქ ხეთეშე ქიმოქმედ დო ვეგნუდვალ ნათუა, მუჟამსით ქიგეგ, მუ როლი უღუდ იესოს იეჰოვაშ განზრახვაშ შესრულებას (წეკითხით საქმეები 22:12—16). *
11. ა) მუშენ ინათუნა ბიბლიაშ მაგურაფალეფ? ბ) მუჭო მოქმედენს ჩქინწკუმა ბიბლიაშ მაგურაფალეფიშ ნათუა?
11 თეშ რაგად შილებე ბიბლიაშ მაგურაფალეფშე ხოლო, თიშ უმკუჯინუო, ახალგაზრდეფ რენა დო ვარ ხანშა მიშულირეფ. თინეფს რწმენა უღნა დო აფასენა ბიბლიურ ჭეშმარიტებას, ათეშენ დუც უძღვინენა იეჰოვას დო ინათუნა. ირ კონგრესის თინეფშო სპეციალურ მოხსენება იკითხირუაფ. იეჰოვაშ მოწმეეფს ოხიოლნა, მუჟამსით ბიბლიაშ მაგურაფალეფ სულიერო ირდუნა დო მზათ რენა ონათალო. ქრისტიან მშობლეფ ხოლო ბედნერეფ რენა, მუჟამსით მუნეფიშ სქუალეფ ინათუნა. 2017 სამსახურებრივ წანას, 84 000-შე მეტ პიროვნებაქ ნათუათ ქაძირუ, ნამდა იეჰოვაშა აფდეს დუდ მეძღვინელ (საქ. 13:48). მუშო ოკო რაგად, ბიბლიაშ მაგურაფალეფს არჩქილენა, ნამდა ნათუა აუცილებერ მოთხოვნა რე ქრისტიანეფშო. მუ ნაბიჯეფ ოკო გინოდგან თინეფქ ნათუაშახ?
12. მუ ნაბიჯეფ ოკო გინოდგას ნათუაშახ ბიბლიაშ მაგურაფალქ?
12 ნათუაშახ ბიბლიაშ მაგურაფალქ ოკო გეჩინებაფუას ღორონთი, ქიგეგას მუ განზრახვა უღჷ დო მუ აკეთ ჩქინ ორსხებელო. ზუსტ რჩქინაშ მეღება მეხვარებ თის რწმენაშ გავითარებას (1 ტიმ. 2:3—6). მუჟამსით თეცალ რწმენა ქაღვენუნ, თინა ეცადებ იცხოვრას იეჰოვაშ სამართლიან ნორმეფით დო ვაკეთას ღორონც ვამოწონსინ ფერ საქმეეფი (საქ. 3:19). თენა მნიშვნელოვან რე, მუშენდა იეჰოვაშო მიუღებელ რე თი პიროვნებაშ დუდიშ მეძღვინუა, ნამუთ აგრძელენს თის ჯოგუნ ფერ საქმეეფიშ კეთებას (1 კორ. 6:9, 10). მარა ხვალე ზნეობრივ ნორმეფიშ დაცვება ვა რე დასაბაღი. თინეფ, მიდგას ოკო იეჰოვას დუდ მეუძღვინან, გილულა კრებაშ შეხვალამეფშა, ქადაქენა დო ოგურუანა შხვეფს. თეშ კეთება არძაშო აუცილებერ რე, მიდგას ოკო მიაჸუნას იესოს (საქ. 1:8). პიროვნებას ხვალე თიმწკუმა შეულებ იეჰოვაშა ლოცვას დუდიშ მეძღვინუა, მუჟამსით გეგნოდგუნს თე ნაბიჯეფს. წყარს ნათუათ თინა ირკოჩიშ წოხოლე ოძირანს, ნამდა იეჰოვაშა აფჷ დუდ მეძღვინელი.
ქიმეხვარით მიზანო უღდან ნათუა
ქაცადუთო ქუგაგებაფუათ ბიბლიაშ მაგურაფალეფს, მუსხით მნიშვნელოვან რე ნათუა? (ქოძირით აბზაცი 13)
13. შხვეფიშ გურაფაშ დროს, მუშენ ოკო ფშუდან, ნამდა ნათუა აუცილებერ რე ქრისტიანშო?
13 მუჟამსით ჩქინ სქუალეფს ვარდა ბიბლიაშ მაგურაფალეფს საჭირო ნაბიჯეფიშ გინოდგუმას ვოხვარუთინ, ოკო ფშუდან, ნამდა ქრისტეშ მიმაჸუნალეფქ ქიჸუანინ, აუცილებერ რე ნათუა. თენა მიმეხვარებნა საჭირო დროს დუდ ვეშებკინათ თიშ რაგადშე, მუსხით მნიშვნელოვან რე მეძღვინუა დო ნათუა. ჩქინ მიზან რე სქუალეფქ დო ბიბლიაშ მაგურაფალეფქ გეგნოდგან ნაბიჯეფ დო დინათან!
14. მუშენ ოკო ვადვანძალათ შხვეფს ნათუა?
14 მუშო ოკო რაგად, მითინქ ოკო ვადანძალას ნათუა ბაღანას ვარდა ბიბლიაშ მაგურაფალეფს. იეჰოვა მითინს ვამანძალენა ვემსახურათ თის (1 იოან. 4:8). შხვეფიშ გურაფაშ დროს ჩქინ მიზან ოკო რდას, ქიმვეხვარათ თიშ გაგებას, მუსხით მნიშვნელოვან რე ღორონთწკუმა პირად ურთიერთობაშ გავითარება. ბიბლიაშ მაგურაფალეფ გეგნოჭყვიდნა ნათუას, მუჟამსით დაფასენა ჭეშმარიტებას დო მზათ იჸუაფნა გაკეთან ირფელ, მუთ ქრისტიანს ოვალ (2 კორ. 5:14, 15).
15, 16. ა) ქორენო დოდგინელ კონკრეტულ ასაკ ნათუაშო? ბ) მუშენ ოკო ინათას ბიბლიაშ მაგურაფალქ, თიშ უმკუჯინუო, ადრე შილებე შხვა რელიგიას რდუკო ნათილ?
15 ბიბლიას ვა რე დოდგინელ კონკრეტულ ასაკ ნათუაშო. ბიბლიაშ თითოულ მაგურაფალ შხვადოშხვანერო ივითარებ სულიერო. ნამთინე ახალგაზრდობას ინათუ დო იეჰოვას ართგურო ომსახურ. შხვეფ ასაკის რენან თეშ გებულენა ჭეშმარიტებას დო ინათუნა. ნამთინე შილებე 100 წანას ხოლო რდას გინოჩილათირ!
16 ართ ოსურქ, ნამუთ იეჰოვაშ მოწმეეფწკუმა ბიბლიას გურაფლენდუნ, ადრე შხვადოშხვა რელიგიაშ წევრ რდუ დო მუსხირენშა ინათ. ათეშენ თიქ კითხჷ მუშ მასწავლებერს, ქორდ დო ვარ აუცილებერ კინ ნათუა. თინეფქ ართო გარჩუეს მუსხირენ ბიბლიურ მუხლი, სოვრეშეთ იძირედ, მუს იჩიებუდ ბიბლია თე საკითხიშ გურშენ დო თეშ უკულ დინათ. მართალ რე, თინა 70 წანას რდუ გინოჩილათირ, მარა ვა უფიქრებ, ნამდა ნათუა ვარდ საჭირო. იეჰოვა ხვალე თი შემთხვევას იწონუანს ნათუას, მუჟამსით პიროვნებას ჯგირო არჩქილე თიშ ნება. თაშ ნამდა, ბიბლიაშ მაგურაფალეფქ იშენით ოკო ინათან, თიშ უმკუჯინუო, ნამდა შილებე შხვა რელიგიას რდესკო ნათილ (წეკითხით საქმეები 19:3—5). *
17. მუშ გურშენ ოკო იფიქრას პიროვნებაქ ნათუაშ დღას?
17 მუშო ოკო რაგად, ნათუაშ დღა არძაშო სახიოლო რე. თენა თიშ დრო ხოლო რე, დეფიფქრათ, მუს ნიშნენს მეძღვინუა დო ნათუა. ადვილ ვა რე თი ირფელიშ შესრულება, მუდგას ბიბლია ითხინს ქრისტიანშე. ზუსტას ათეშენ იესო ქრისტიანულ ცხოვრებას უღუს ადარენს. იესოშ მოწაფეეფიშ გურშენ ბიბლია იჩიებ: „თიშო იცოცხლან, მიდგაქ მუნეფიშ გურშენ ღურჷ დო გეთელ, დო ვართ ხოლო მუნეფიშ დუდშო“ (2 კორ. 5:15; მათ. 16:24).
18. მუ კითხვეფს გუვარჩიენთ თეშ უკულიან სტატიას?
18 მუჭოთ თე სტატიაშე იძირენ, მეძღვინუა დო ნათუა სერიოზულ საკითხ რე. ზუსტას ათეშენ აწუხენდჷ მარიაშ დიდას თი კითხვეფ, ნამუთ ჟიშე მიფშინეთ. მშობელ ქორეთ-და, ალბათ თქვა ხოლო გაწუხენდან იჸი თეცალ კითხვეფი: დასურო ქორენო ჩქიმ ბაღანა მზათ ნათუაშო? ქოუღუნო დასაბაღ რჩქინა, დუდ მეუძღვინას იეჰოვას? ხომ ვა უჯგჷ ნათუაშახ ქიგურუას დო სამუშა დოგორას? მუშ რაგად შილებე ნათუაშ უკულ სერიოზულო ქუდაშუ-და? თეშ უკულიან სტატიას გუვარჩიენთ თე კითხვეფს დო ქობძირუნთ, მუჭო შეულებნა ქრისტიან მშობლეფს უღდან სწორ თვალსაზრის ნათუაშე.
^ აბზ. 3 1 პეტ. 3:20, 21: 20 ნამუთ უდუჯერებელეფ რდეს თიწკუმა, მუჟამსით ღორონთ მოთვინებათ იჯინედ ნოეშ დროს, სოიშახ კიდობან ეშენებუდ, სოდეთ მუსხირენ კოჩი, გვალო ბრუო შურქ გინასკიდ დიდწყარალას. 21 თეცალ რე ნათუა ხოლო, (სხეულშე წინდაშ ჩათხინაფა ვარინ, ღორონთშა სუფთა სინდისიშ თხუალა) ნამუთ ომსახურ თქვან რსხებას იესო ქრისტეშ გათელებაშ საშვალებათ.
^ აბზ. 9 საქ. 8:35, 36: 35 ფილიპექ წმინდა წერილიშ თე მონაკვეთშე ქიდიჭყჷ კითხირ დო თის იესოშ გურშენ სახიოლო ამბე გეგნოჩ. 36 წყარ პიც ქიმიოდირთეს დო საჭურისიქ თქუ: „ამარ რე წყარი. მუ მოცილ დიმნათენ?“.
^ აბზ. 10 საქ. 22:12—16: 12 უკულ ართ ღორონთიშ მოშიშ დო კანონიშ დუმაცვებელ კოჩიქ, ანანიაქ, ნამუსით თექ მახორუ იუდეველეფ შქას ჯგირ სახელ უღუდუნ, 13 ჩქიმდა ქუმორთ, გვერდით ქელამდირთ დო მიწუ: „სავლე, ჯიმა, დუგართას თოლიშ სინთექ!“, მა ხეთეშე ქობძირ თინა. 14 თიქ მიწუ: „ჩქინ ჯვეშეფიშ ღორონთიქ გიშარგორ, ნამდა თიშ ნება ქუგაიგებუდკო დო ქოიძირუდკო თინა, მით მართალ რე დო ქიორჩქილუდკო თიშ ხონარშა, 15 მუშენდა თიშ მოწმექ ოკო იჸუე დო არძაშ წოხოლე დამოწმე თინა, მუთ ძირჷ დო მირჩქილე. 16 დრო მუშენ მეიღჷ? გედირთ, დინათ, მიშორ ცოდეფ დო ქოშინე თიშ სახელი“.
^ აბზ. 16 საქ. 19:3—5: 3 თიქ კინ ქოკითხ: „აბა, მუთ ინათით?“ თინეფქ უპასუხეს: „იოანეშ ნათუათ“. 4 პავლექ უწუ: „იოანე ხალხის მინანისკო თიშენ ნათუნდჷ დო ურაგადუდ, ნამდა გეგმურჩქინდესკო იესოშ რწმენა, ნამუთ მუშ უკულ მიშჷ“. 5 თენა ქიმირჩქილუესინ, უფალ იესოშ სახელით დინათეს.
