1. მუჭო შემლებნა მიბღათ ღორონთიშ სიბრძნე დო მუ სარგებელს მომღანა თენა?

სიბრძნე იეჰოვაშე მოურს დო თინა არძას გურხვეთ არძენს თის. იაკობიშ 1:5-ის ჭარ: „თქვანდე მითინს სიბრძნე ქარკუნ-და, ირიათო ქოთხუას ღორონც, ნამუთ არძას ხვეიანო დო უგურაგადებუო არზენს“. ჩქი შემლებნა მიბღათ ღორონთშე დარიგება დო თენა ართ-ართ საშვალება რე, სოვრეშეთ ბღებულენთ სიბრძნეს. თეს შეულებ ჩქინ თხილუა მორალურ დო სულიერ ზიანშე (იგავ. 2:10—12). შედეგო, ღორონთიშ ჸოროფას ქიდოფსკიდუთ დო გონებას მარადიულ სიცოცხლე მაღვენუნა (იუდ. 21).

2. მუჭო შემლებნა დუვაფასათ დარიგება, ნამუსით ღორონთშე ბღებულენთ?

² მინშა შილებე არასრულყოფილებაშ, რდუალაშ ვარდა შხვა მიზეზეფიშ გურშენ გამჭირდან ღორონთშე დარიგებაშ მეღებაქ ვარდა მიღდან სწორ თოლწონუა. ჩქი დუვაფასენთ დარიგებას, მუჟამსით ჩქინ დუდშა გეგმოფცადუნთ თიშ ჯგირ შედეგეფს დო დებრწმუნებუთ, ნამდა ღორონც ვუჸორთ. იგავეფიშ 3:11, 12-ის ჭარ: „სქუა, იეჰოვაშ დარიგებას ქუმურჩქილე . . . მუშენდა იეჰოვა თის არძენს დარიგებას, მიდგა უჸორს“. ღორონთ ჯგირო მიჩინენა დო ათეშენ თიშ დარიგება ირიათო დროულ დო საჭირო რე. მორთ, ირიათოქოფშუდან, ნამდა  იეჰოვას არძაშ უჯგუშ ოკო ჩქინო (წეკითხით ებრაელები 12:5—11). * თე სტატიას გუვარჩიენთ ოთხ საკითხის, ნამუთ დარიგებას ოხუ: 1) თვითდისციპლინა, 2) მშობლეფშე დარიგებაშ მეღება, 3) დარიგება, ნამუსით კრებაშ შეხვალამეფს ბღებულენთ დო 4) გურჭუა, ნამუთ დარიგებაშე ვარიაშ რაგადის მოჸუნს.

3. მუჭო ივითარენს ბაღანა თვითდისციპლინას? ქიმიჸონით მაგალითი.

³ თვითდისციპლინაშა მიშურს დუდიშ კონტროლ, ნამდა გუვაუჯგუშათ ჩქინ აზროვნება დო საქციელი. თვითდისციპლინა დაბადებაშე ვეთოპჸუნა, ათეშენ საჭირო რე გუვავითარათ თინა. ქიმიპჸუნათ მაგალით: მუჟამსით ბაღანა ველისპეტიშ ჸუნაფას გურაფლენსინ, ვა დანთხასინ თიშენ, მშობელს თიშა ხე მეუთხ. მარა მუჟამსით მშობელ ორწყე, ნამდა ბაღანა წონასწორობას იცვენსინ, მუსხირენ წუთით ხეს უტენს ველისპეტის. ბაღანა წონასწორობაშ დაცვებას ბოლოშა ქიდიგურუანსინ, მშობელ მუშ გემოშა მიაშქვანს თის. თეგვარო, მუჟამსით მშობლეფ მოთვინებათ ოგურუანა ბაღანეფს დო იეჰოვაშ მოსაწონო რდუნან, თეთ თვითდისციპლინაშ დო სიბრძნეშ გავითარებას ოხვარნა თინეფს (ეფეს. 6:4).

4, 5. ა) მუშენ რე მნიშვნელოვან თვითდისციპლინა, ნამდა გინიფრთათ „ახალ პიროვნებათ“? ბ) მუშენ ოკო გუვაგრძელათ წიმიულა, თიშ უმკუჯინუო, ნამდა შეცთომეფს ვუშვენთ?

⁴ თეშ რაგად შილებე დიდეფშე ხოლო, მიდგას იეჰოვაშ გაჩინებაფა ოკო. შილებე თინეფს გავითარებულ აფდან თვითდისციპლინა, მარა სულიერ გაგებათ მოწიფულეფ ვარდან. თინეფ ქრისტიანულ მოწიფულობას თიმწკუმა მიოჭირნუანა, მუჟამსით ქრისტეშ მოსაწონ „ახალ პიროვნებათ“ დითირუნა (ეფეს. 4:23, 24). თეცალ დროს დიდ მნიშვნელობა უღჷ თვითდისციპლინას, მუშენდა თენა მიმეხვარებნა, „ვარია ქოფთქუათ უღორონთობაშე დო ქვეყნიურ კორნებეფშე, ასეიან ქიანას აზრიანო, სიმართლეთ დო ღორონთიშ ართგურობათ იფცხოვრათ“ (ტიტ. 2:12).

⁵ ჩქი არძა ცოდაშა ვორეთ მიდრეკილი (ეკლ. 7:20). მუშო ოკო რაგად, შეცთომაშ დაშვება ვა ნიშნენს, ნამდა ვამღუნა დასაბაღ თვითდისციპლინა. იგავეფიშ 24:16-ის ჭარ: „მართალქ შკვითშა ქუდანთხასინ, გემწოდირთუ“. თეცალ დროს ჩქინ ძალეფით ვარინ, ღორონთიშ წმინდა შურიშ მოხვარათ შემლებნა გემწობდირთათ დო გუვაგრძელათ სულიერო წიმიულა (წეკითხით ფილიპელები 4:13). * წმინდა შურიშ ნაყოფ რე დუდშეკება, ნამუთ მანგარო გუ თვითდისციპლინას.

6. მუ ოკო ვაკეთათ, ნამდა ღორონთიშ სიტყვაშ უჯგუშ მაგურაფალეფქ ქიპჸუათ? (ქოძირით სურათ 28-ო გვერდის).

⁶ თვითდისციპლინა გუვავითარათინ, მნიშვნელოვან რე ლოცვა, ბიბლიაშ გურაფა დო თიშე დაფიქრება. მარა მუჭო ოკო მიქცუათ, ღორონთიშ სიტყვაშ გურაფა ქუგოძნელნან-და? გურ ვეგიტახათ, მუშენდა იეჰოვა მიგეხვარებნა, გავითარათ მუშ სიტყვაშ გურაფაშ სურვილ, მუჟამსით ქიმეჩანთ თეშ საშვალებას (1 პეტ. 2:2). პირველ რიგის, ქოთხით იეჰოვას, ქიმგეხვარან თვითდისციპლინაშ გიმორჩქინას ბიბლიაშ გურაფაშ დროს. თეშ უკულ გეგმურთით დრო ბიბლიაშ გურაფას, დუდშე შილებე თეს უმოს ჭიჭე დრო დუთმათ. დროხანიშ უკულ ბიბლიაშ გურაფა დო იეჰოვაშ ძვირფას  აზრეფშე დაფიქრება თქვანო უმოს ადვილ დო სასიამოვნო იჸუაფ (1 ტიმ. 4:15).

7. მუჭო მოხვარნა თვითდისციპლინა ქიმვოჭირინუათ სულიერ მიზნეფს?

⁷ თვითდისციპლინა მოხვარნა ქიმვოჭირინუათ სულიერ მიზნეფს. ქობძირათ ართ ჯიმაშ მაგალით, ნამუთ ფიქრენდ, ნამდა ჯვეშობურო ვარდ მსახურებას მონდომებულ. თიქ მიზანო პიონერო მსახურება ქიდეკინ. თინა კითხულენდჷ პუბლიკაციეფს პიონერობაშ გურშენ დო ბრელს ლოცულენდჷ. თექ უმოსო გაუმანგარ იეჰოვაწკუმა ურთიერთობა დო პიონერო მსახურებაშ სურვილ. თეს გეძინელ, მუჟამსით საშვალება მიაჩამუდუნ, დამხმარე პიონერო ხოლო მსახურენდჷ. შედეგო, თიქ მთელ ყურადღება მუშ მიზანშა გეგნიღ დო დროხანიშ უკულ პიონერო ქიდიჭყჷ მსახურება.

8^—10. მუ მეხვარებ ქრისტიან მშობლეფს, იეჰოვაშ მსახურეფო მორდან სქუალეფ? ქიმიჸონით მაგალით.

⁸ ქრისტიან მშობლეფს დიდ პატი უღნა, სქუალეფ იეჰოვაშ მოსაწონო მორდან დო ქიგიოწურუან (ეფეს. 6:4). თენა ადვილ ვა რე ამდღარ ქიანას (2 ტიმ. 3:1—5). მუშო ოკო რაგად, ბაღანეფ ჯგირ დო ფურიშ გარჩიებაშ უნარით ვებადებნა დო თინეფიშ სინდის ვა რე გაწაფულ. ათეშენ დარიგება დო გეწურაფა ოსაჭირნა (რომ. 2:14, 15). ართ ბიბლიურ ნაშრომს ჭარ, ნამდა ბერძნულ სიტყვა „დარიგება“ შილებე „ბაღანაშ განვითარებას“ ნიშნენდას.

⁹ ბაღანეფ უმოს თხილერო გინაფლენა დუც, მუჟამსით მშობლეფი რდუალაშ დროს ჸოროფას გიმირჩქინანა. სქუალეფ გურაფლენა, ნამდა თავისუფლებას საზღვრეფ უღჷ დო მუნეფიშ საქციელს ირიათო მაჸუნუ შედეგეფ. თაშ ნამდა, მნიშვნელოვან რე ქრისტიან მშობლეფქ იეჰოვაშ ხემძღვანელობას მიაჸუნან. ამდღა შხვადოშხვა კულტურას ბაღანაშ რდუალაშ შხვადოშხვანერ მოსაზრება დო მეთოდი არსებენს, ნამუთ დროხანიშ უკულ ითირუ. მარა, ქრისტიან მშობლეფ ბაღანეფიშ რდუალაშ დროს ღორონთიშ სიბრძნეთ ხემძღვანელენა დო ვართ ხოლო მუნეფიშ გამოცდილებათ.

¹⁰ დეფიფქრათ ნოეშ მაგალითშე. მუჟამსით იეჰოვაქ კიდობანიშ აშენება ქუდავალუნ, ნოეს ვა უღუდ თეშ გამოცდილება, მუშენდა აიშახ დღას ვაფუდ თეცალ მუდგარენ ნაკეთებ. თაშ ნამდა, თიქ იეჰოვას ოკო მიენდკო დო ზუსტას თეშ გაკეთკო ირეფელ, მუჭოთ იეჰოვაქ უწუ (დაბ. 6:22). მუ რდუ თეშ შედეგი? კიდობანქ ნოე დო მუშ ოჯახი გინასკილიდუ, მუშენდა თიქ ღორონთიშ სიბრძნეს მიენდჷ. ნოე მუშ სქუალეფს ღორონთიშ ჸოროფას ოგურუანდ დო ჯგირ მაგალითის არზენდჷ, მუდგაშ კეთება ადვილ ვა რდუ თი უბადო ქიანას (დაბ. 6:5).

11. მუშენ რე მნიშვნელოვან მშობლეფიშ მონდომა ბაღანეფიშ რდუალაშ დროს?

¹¹ მშობლეფ, თქვა ხოლო შეილებნა ქურჩქილათ იეჰოვას დო ქიმეჩათ თის საშვალება, გიმგეხვარან ბაღანეფიშ რდუალას. გეგმირინეთ ბიბლიას მოჩამილ რჩევეფი დო ქიმიაჸუნით ღორონთიშ ორგანიზაციაშ ხემძღვანელობას, ნამუთ ბაღანეფიშ რდუალას ოხუ. დროხანიშ უკულ სქუალეფ მარდულეფ იჸუაფნა თქვან თეცალ საქციელიშ გურშენ. ართ ჯიმა იჩიებ: „მარდულ ვორექ ჩქიმ მშობლეფიშ. თინეფქ ირფელ გაკეთეს, ნამდა ჩქიმ გურს ქინანჭესკო. მშობლეფიშ დიდ დამსახურება რე ჩქიმ სულიერ წიმიულა“. მარა მინშა მშობლეფიშ დიდ მონდომაშ უმკუჯინუო, ბაღანეფ  იშენით მიოტალენა იეჰოვაშ მსახურებას. თეცალ მშობლეფს სუფთა სინდის უღნა, მუშენდა ირფელ გაკეთეს, ბაღანეფ იეჰოვაშ შარას ქიგიორინუესკო. თეს გეძინელ, თინეფ იმენდის ვადინუნანა, ნამდა ართ მშვენიერ დღას ბაღანა კინ დართუ იეჰოვაშ მსახურებას.

12, 13. ა) მუჭო ოძირანა ქრისტიან მშობლეფ, ნამდა ომორჩილნა ღორონც, მუჟამსით საქმე გარიცხულ სქუაწკუმა ურთიერთობას ოხუ? ბ) მუ ჯგირობუა მოუღჷ ართ ოჯახის იეჰოვაშ მორჩილებაქ?

¹² მშობლეფ დიდ გამოცთაშ წოხოლე გედირთუნა, მუჟამსით საქმე გარიცხულ სქუაწკუმა ურთიერთობას ოხუ. ქობძირათ ართ ქრისტიან დიდაშ მაგალით, ნამუშ გარიცხულ ოსურსქუაქ შხვადო გეგნორთ ოცხოვრეფშა. თე და აღიარენს: „მანგარო მოკოდ ძღაბ დო მოთაწკუმა ურთიერთობა, ათეშენ ვოცადუდ ჩქინ პუბლიკაციეფს თიცალ მუდგაინ დომგორუდკო, მუდგათ დუც გემაფრთლენდ. მარა ჩქიმ ქომონჯიქ ქიმმეხვარ თიშ ძირაფას, ნამდა ჩქინ სქუა უკვე ჩქინ ხეს ვა რდუ დო ვამღუდეს უფლება, ჩევერითკო“.

¹³ მუსხირენ წანაშ უკულ თე ძღაბიქ დირთ ორგანიზაციაშა. „ჩქიმ სქუა ირ დღას მირეკუნს ვარდა ბჭარუნს. თინა დიდ პატის ბცენა მა დო ჩქიმ ქომონჯის, მუშენდა უჩქჷ, ნამდა დევემორჩილით ღორონც. ჩქი არაჩვეულებრივ ურთიერთობა მიღნა“,— იჩიებ თიშ დიდა. გარიცხულ სქუა თქვა ხოლო ქორჸუნან-და, ქიმიენდებუთო იეჰოვას მთელ გურით? (იგავ. 3:5, 6). რშუდან, იეჰოვაშ დარიგებაშე იძირე, ნამდა თინა ბრძენ რე დო მანგარო ვუჸორთ. დღას ვაგგოჭყორდან, ნამდა ღორონთიქ მუშ სქუაშ სიცოცხლე არძაშო, თეწკუმა ართო თქვან ბაღანაშო ხოლო დათმჷ. ღორონც ვაკო მითინქ გენადგურას (წეკითხით 2 პეტრე 3:9). * თაშ ნამდა, მშობლეფ მიენდით იეჰოვას, თიმწკუმა ხოლო, მუჟამსით მორჩილება ვა რე გვალო ადვილ, მუშენდა თიშ დარიგება დო ხემძღვანელობა ირიათო სწორ რე. მიაჸუნით ღორონთიშ დარიგებას დო დღას ვეშეწინააღმდეგათ თის.

14. მუ ჯგირობუა მოუღჷ ჩქინდა იეჰოვაშ მითითებეფს, ნამუსით „ართგურ დო გონიერ მონაშე“ ბღებულენთ?

¹⁴ იეჰოვაქ პირობა დოდვჷ, ნამდა იზრუნენდჷ, დეცვენდჷ დო მითეთებეფს ქიმეჩანდჷ ქრისტიანულ კრებას. ღორონთ თეს შხვადოშხვა საშვალებათ ორთჷ. მაგალთო, თიქ მუშ სქუას ჩაბარ კრებაშ ხემძღვანელობა, ნამუთიქ „ართგურ დო გონიერ მონას“ ქუდავალ კრებაშო სულიერ საზრდოშ მომზადება“ (ლუკ. 12:42). თინეფ შხვადოშხვა საშვალებათ მარზენა მითითებეფს დო დარიგებას. ქოკითხით თქვან დუც: მუსხიშა მიღუდ თიცალ შემთხვევა, მუჟამსით მოხსენებაქ ვარდა ჩქინ პუბლიკაციეფს მოჩამილ სტატიაქ დოთირუ ჩქიმ აზროვნება დო საქციელი? თე კითხვაშ პასუხ დადებით ქორენ-და, ხიოლიშ მიზეზი გიღნა, მუშენდა იეჰოვას საშვალებას არზენთ, ქუდგოგურუან დო ქიგგოწურუან თქვან საჯგირობუოთ (იგავ. 2:1—5).

15, 16. ა) მუ ჯგირობუა მოუღჷ ჩქინო უხუცესეფიშ საქმეს? ბ) მუჭო შეილებნა გუადვილათ რჩევაშ მოჩამა თქვან კრებაშ უხუცესეფს?

¹⁵ ქრისტექ უხუცესეფს ხოლო დავალ ღორონთიშ შხურიშ ჭყიშუა (ეფეს. 4:8, 11—13). მუჭო შემლებნა სარგებელ მიბღათ თი საქმეშე, მუდგას უხუცესეფ ორთნა? შემლებნა მივაჸუნათ თინეფიშ ჯგირ მაგალითის, თეს გეძინელ მიბღათ რჩევეფ, ნამუსით ბიბლიაშე მარზენა (წეკითხით ებრაელები 13:7, 17). * რშუდან, უხუცესეფს ვუჸორთ დო ოკონა მიბრდათ სულიერო. მაგალთო, მუჟამსით ორწყენა, ნამდა კრება მიჩირთუნა ვარდა მსახურებას ისხი მონდომება ვამღუნან, თინეფ ხეთეშე მოულა ჩქინ მახვარეფშა, მირჩქილენა დო ოცადნა გურშა ელამკინან ბიბლიურ რჩევეფით. უხუცესეფიშ თეცალ ელარნა იეჰოვაშ ჸოროფას ოძირანს.

 ¹⁶ ვაგგოჭყორდან, ნამდა უხუცესეფშო ადვილ ვა რე ჩქინდა რჩევაშ მოჩამა. წერმიდგინით, მუჭომ რთულ იჸუაფუდ წინასწარმეტყველ ნათანშო დავით მეფეშა მეულა, მუჟამსით თიქ სერიოზულო დაშუ დო ქეშეცად თიშ ფულუას (2 სამ. 12:1—14). მოციქულ პავლეს ხოლო დიდ გამბედაობა დესაჭირებუდ, ნამდა რჩევა ქიმეჩკო პეტრე მოციქულს, ნამუთ შხვეფშე უჯგუშო იუდეველ ქრისტიანეფს ოქცუდ (გალ. 2:11—14). მუჭო შეილებნა გუადვილათ რჩევაშ მოჩამა თქვან კრებაშ უხუცესეფს? თანდაბალ დო მარდულეფ ქიჸუაფუთ-და, უხუცესეფს ვა გუჭირდუნა თქვანდა რჩევაშ მეჩამა. თინეფიშ მოხვარა იეჰოვაშ ჸოროფაშ გიმოხანტუათ მირჩქინით. თენა თქვა ჯგირობუას მოიღანა დო უხუცესეფს ხოლო მეხვარებ ხიოლით შეასრულან მუნეფიშ საქმე.

17. მუჭო მეხვარეს უხუცესეფქ ართ დას?

¹⁷ ართ დას მუშ ჯვეშ ცხოვრება ირიათო გიოშინანდჷ დუც, ათეშენ მანგარო უჭირდ იეჰოვაშ ჸოროფაშ გიმორჩქინა. თინა იჩიებ: „მანგარ გლახათ ბგინაფლნედჷ დუც, მუჟამსით ჩქიმ ულირ ცხოვრება გუმაშინედ. თეცალ დროს მიჩქუდ, ნამდა უხუცესეფს ოკო დურაგადეკო. თინეფ ვამაკრიტიკენდეს, პირიქით გურშა ელამკინანდეს დო სულიერო მამანგარენდეს. მუდგა საქმე ვა უღდესკონ, ირ კრებაშ უკულ, ნამდგაინ ართ იშენით მიშჷ დო მოკითხუდ, მუჭო ვორდჷ. ჩქიმ ულირ ცხოვრებაშ გურშენ ღორონთიშ ჸოროფაშ ღირსო ვაბთვალუნდჷ დუც. მარა იეჰოვა ირიათო მიმტკიცენდჷ მუშ ჸოროფას კრებაშ დო უხუცესეფიშ საშვალებათ. ბლოცულენქ, ნამდა დღას ვემვოტუე თინა“.

18, 19. მუ შედეგეფ მოჸუნს დარიგებაშე ვარიაშ რაგადის? ქიმიჸონით მაგალითეფ.

¹⁸ შილებე დარიგებაშ მეღებაქ გურჭუა მომღან, მარა უმოს გურსაჭუო იჸუაფ თი შედეგეფ, ნამუთ დარიგებაშე ვარიაშ რაგადის მოჸუნს (ებრ. 12:11). მორთ, ქობძირათ კაენიშ დო მეფე ციდკიაშ მაგალითეფ. კაენს ჯოგუდ მუშ ჯიმა დო თიშ ჸვილუა ოკოდ, ათეშენ ღორონთიქ გაფრთხილ თინა: „მუშენ რექ გარისხებულ დო მუშენ ეკოიცუ სახექ? ჯგირს გაკეთენქ-და, ვემეიღენქო?! მარა ჯგირს ვაკეთენქ-და, გიჩქუდას, ცოდა ალატყობ კარს დო სქანდა მინჭუაფ. ქიბატონენქო თიშა?“ (დაბ. 4:6, 7). კაენქ ვემირჩქილუ ღორონთიშ დარიგება დო ცოდაქ დარჯგინ თის. მუშმანწარა გურჭუა მოუღჷ თიქ მუშ დუც (დაბ. 4:11, 12). თეშ გინაწონს, ღორონთიშ დარიგებაშე მეღებულ გურჭუა უმოს ეფი გინაღალარ აჸიდ.

¹⁹ სუსტ დო ბოროტ მართველ ციდკიაშ დროს იერუსალიმს მანგარ გლახა მდგომარეობა რდუ. წინასწარმეტყველ იერემია ირიათო აფრთხილენდჷ ციდკიას, მეუტებუდკო გლახა შარა, მარა თიქ ვემირჩქილუ თიშ სიტყვეფ. მეფე ციდკიაშ თეცალ საქციელს ხოლო გლახა შედეგეფქ მაჸუნ (იერ. 52:8—11). დასურო, იეჰოვას მანგარო ოკო დამცვან თი გურჭუაშე, მუთ თიშ დარიგებაშე ვარიაშ რაგადის მოჸუნს (წეკითხით ესაია 48:17, 18). *

20. მუ მომავალ ელუ თინეფს, მით ურჩქილენა ღორონთიშ დარიგებას დო თინეფს ხოლო, მით ვარიას იჩიებნა თიშე?

²⁰ ამდღარ ქიანას ოძიცეთ ვა უბაღნა დარიგებაშ მეღება დო თვითდისციპლინა. მარა მალას ღორონთი ბოლოს მოუღენს არძას, მით ვარიას იჩიებ თიშ დარიგებეფშე (იგავ. 1:24—31). თაშ ნამდა, მორთ ქიმვაჸუნათ ღორონთიშ სიტყვეფს, ნამუთ მირაგადნა: „ქიმირჩქილეთ დარიგება დო დებრძენით“. თეს გეძინელ ირიათო ფშუდან იგავეფიშ 4:13-ს ინოჭარილ სიტყვეფ: „მანგარო ქიმეთხ ხე დარიგებას დო ვაგუტუა თინა; ქიმირჩქილე, მუშენდა თინა გაცოცხლენს“.