1, 2. ა) მუ საშვალებეფს გიმირინუანდჷ იეჰოვა ჯვეშო ხალხწკუმა ურთიერთობაშო დო მუჭო ორთჷ თეს ამდღა? ბ) მუს გუვარჩიენთ თე სტატიას?

იეჰოვას ოკო ჩქინწკუმა ურთიერთობა. ჯვეშო, თიქ წინასწარმეტყველეფ, ანგელოზეფ დო მუშ სქუა იესო ქრისტე გიმირინუ, ჩქინდა მუშ აზრეფიშ გინაჩამალო (ამოს. 3:7; გალ. 3:19; გამოცხ. 1:1). ამდღა, თინა მუშ სიტყვაშე — ბიბლიაშე მოგურუანა. თიშ საშვალებათ შემლებნა ქინვანჭათ იეჰოვაშ აზროვნებას დო ქიგებგათ, მუ რე თიშ ნება.

² მუჟამსით იესო დედამიწას რდუ, იეჰოვაქ ზეცაშე სუმშა დურაგადუ თის. მორთ, ქიგებგათ მუ უწუ იეჰოვაქ მუშ სქუას, მუს ბგურაფლენთ დო მუ სარგებელს ბღებულენთ თიშ სიტყვეფშე.

3. მუჭოთ მარკოზიშ 1:9—11-ის ბკითხულენთ, მუ უწუ იეჰოვაქ იესოს ნათუაშ დროს დო მუ მნიშვნელოვან მხარეეფს ბგებულენთ თე სიტყვეფშე?

³ მარკოზიშ 1:9—11-ის (წეკითხით) მოშინაფილ რე პირველ შემთხვევა, მუჟამსით იეჰოვაქ იესოს ზეცაშე დურაგადუ დო უწუ: „სი რექ ჩქიმ საჸოროფო სქუა. მა მოიწონე“. იესოშ გურს მანგარო შეხებუდ ზეციერ მუმაშ ხონარიშ მორჩქილაფა, სოვრეშეთ ჸოროფა დო ნდობა იძირედ. იეჰოვაშ სიტყვეფშე სუმ მნიშვნელოვან მუდგარენს ბგებულენთ იესოშ გურშენ. პირველ, იესო იეჰოვაშ სქუა რე. მაჟია, იეჰოვას თინა უჸორს დო მასმა, ღორონთიქ მიწონუ თინა. მორთ, უმოს დეტალურო გუვარჩუათ თითოულ შემთხვევა.

4. ნათუაშ უკულ ურთიერთობაშ მუ ახალ ეტაპ დიჭყჷ იესოქ იეჰოვაწკუმა?

⁴ „სი რექ ჩქიმ . . . სქუა“. თე სიტყვეფით იეჰოვაქ  ქაძირუ, ნამდა მუშ საჸოროფო სქუა ახალ ურთიერთობას იჭყანდჷ თიწკუმა. იესო დედამიწაშა მოულაშახ ხოლო ღორონთიშ სქუა რდუ. მარა, ნათუაშ უკულ თიქ წმინდა შურით ცხებულო გინირთჷ დო ქიმიაჩ იმენდიქ, ნამდა ზეცაშა დორთაშ უკულ ცხებულ მეფე დო მღვდელმთავარ იჸიდ (ლუკ. 1:31—33; ებრ. 1:8, 9; 2:17). თაშ ნამდა, იესოშ ნათუაშ დროს, იეჰოვას უღუდ მიზეზ, უთქუალუდკო: „სი რექ ჩქიმ . . . სქუა“ (ლუკ. 3:22).

5. მუჭო შემლებნა მივაჸუნათ იეჰოვაშ მაგალითის, ჸოროფაშ დო მოწონებაშ გიმორჩქინას?

⁵ „სი რექ . . . საჸოროფო სქუა“. ჸოროფა დო მოწონა, ნამუთ იეჰოვაქ იესოწკუმა გიმირჩქინ, გუმოშინანა, ნამდა ირნერო ოკო ვეცადათ გურშა ელვუკინათ შხვეფს (იოან. 5:20). მანგარო მოხიოლნა, მუჟამსით თინეფ, მიდგას ვოხვარუთ, ჸოროფას გიმირჩქინანა ვარდა მოცქვანა. თეგვარო, კრებაშ ვარდა ოჯახიშ წევრეფს ოსაჭირნა ჩქინ ჸოროფა დო გურშა ელაკინა. მუჟამსით შხვეფს ვოცქვანთ, თეთ ვოხვარუთ გემანგარან რწმენა დო ემსახურან იეჰოვას ართგურო. განსაკუთრებულო მშობლეფქ ოკო ელუკინან გურშა მუნეფიშ სქუალეფს. მუჟამსით მშობლეფ შურ დო გურით ოცქვანა სქუალეფს დო ჸოროფას [გიმირჩქინანა, თეთ ოხვარნა მირდან სულიერო.

6. მუშენ შემლებნა მივენდათ იესოს?

⁶ „მა მოიწონე“. თე სიტყვეფით იეჰოვაქ ოძირუ, ნამდა დარწმუნებულ რდუ, იესო ართგურო შეასრულენდჷ მუშ მუმაშ ნებას. იეჰოვაცალო, ჩქი ხოლო შემლებნა დარწმუნებულ ვორდათ დო ბჯერდან, ნამდა იესო შეასრულენს ღორონთიშ არძა დუნაპირებუს (2 კორ. 1:20). მუჟამსით ფიფქრენთ იესოშ მაგალითშე, უმოს მტკიცაშე მაფნა გინოჭყვიდილ დიბგურუათ თიშე დო  მივაჸუნათ თის. იეჰოვა დარწმუნებულ რე, ნამდა მუშ მსახურეფ გაგრძელენა მუშ სქუაშ მაგალითიშ მეჸუნას (1 პეტ. 2:21).

7. მათეშ 17:1—5-იშ თანახმათ, ნამ შემთხვევაშ დროს დურაგადუ იეჰოვაქ ზეცაშე იესოს დო მუ თქუ თიქ?

⁷ წეკითხით მათე 17:1—5. მაჟიაშა იეჰოვაქ ზეცაშე თიმწკუმა დურაგადუ იესოს, მუჟამსით თიქ „ფერ დითირუ“. იესოქ მაღალ გვალაშა მიდეჸონ პეტრე, იაკობ დო იოანე. თე დროს თინეფქ სარკო ხილუა ძირეს. იესოს სახექ გენათ დო თიშ ბარგიქ დერჩიალ. თის მელე-მოლე მოსე დო ელია ელურედ დო მონჭაფილ ღურა დო გათელებაშე ეჩიებდეს. თე დროს სუმხოლო მოწაფეს ლურდჷ, მარა მუჟამსით თე სარკო ხილუა ქოძირეს, გეგშაკურცხეს (ლუკ. 9:29—32). თეშ უკულ მუნაფაქ დოფორ თინეფ დო მუნაფაშე გისიმ ღორონთიშ ხონარქ. მუჭოთ იესოშ ნათუაშ დროს, თეშ თე შემთხვევას ხოლო იეჰოვაქ თიშ მოწონა დო ჸოროფა გიმოხანტჷ დო თქუ: „თენა რე ჩქიმ საჸოროფო სქუა, ნამუთ მა მიბწონე“. უკულ გეუძინ: „თის ურჩქილით“.

8. მუჭო იმოქმედ ხილუაქ იესო დო თიშ მოწაფეეფწკუმა?

⁸ თე ხილუაშე ქიძირ, მუნერ დიდებულ დო ძალიერ იჸუაფუდ იესო მომავალს, მუჭოთ ღორონთიშ სამეფოშ მეფე. მუშო ოკო რაგად, თე ხილუაქ იესოს გურშა ელუკინ დო გამანგარ, მუთ ოსაჭირუდ, გაურზუკო ტანჯებას დო წამებულ ღურას. თე ხილუაქ მოციქულეფს ხოლო გუმანგარ რწმენა დო მამზად ართგურობაშ გამოცდეფშო დო თი ხანდაშო, ნამუთ წოხლე ელდეს. სოდგარენ 30 წანაშ უკულ, მოციქულ პეტრექ მიშინუ თე ხილუა, სოვრეშეთ იძირე, ნამდა ვა გოჭყოლად თე მოვლენა (2 პეტ. 1:16—18).

9. მუ პრაქტიკულ რჩევეფ მეჩჷ იესოქ მუშ მოწაფეეფს?

⁹ „თის ურჩქილით“. იეჰოვაქ არგამათ ქუმოძირეს, ნამდა თიშ ნება რე, ვურჩქილათ დო დევემორჩილათ იესოშ სიტყვეფს. მუჟამსით დედამიწას რდუ, იესო ბრელ მნიშვნელოვან მუდგარენს ოგურუანდჷ ხალხის. მაგალთო, თინა მუშ მიმაჸუნალეფს ოგურუანდჷ, მუჭო იქადაგესკო სახიოლო ამბე დო ირიათო გაშინანდჷ, ჸოფედესკო კურცხას (მათ. 24:42; 28:19, 20). თეს გეძინელ, მოუწოდენდჷ უმოს მონდომებულეფ ჸოფედესკო დო ვემუტებდესკო მსახურება (ლუკ. 13:24). იესოქ თიშე ხოლო გამახვილ ყურადღება, ნამდა თიშ მიმაჸუნალეფს უჸორდესკო ართიან, ვადინუესკო ართობა დო დუცვებდესკო მუშ მითითებეფ (იოან. 15:10, 12, 13). ნამდვილო, მუ პრაქტიკულ რჩევეფ მეჩჷ იესოქ მუშ მოწაფეეფს. თე რჩევეფ ამდღა ხოლო ძალას რე.

10, 11. მუჭო შემლებნა ვოძირათ, ნამდა ვურჩქილეთ იესოს?

¹⁰ იესოქ თქუ: „არძა, მით ჭეშმარიტებაშ მხარეს რე, მირჩქილე“ (იოან. 18:37). ჩქი თიშ ხონარს ვურჩქილეთ, მუჟამსით ვუთვინენთ დო მთელ გურით ვაპატიენთ ართიანს (კოლ. 3:13; ლუკ. 17:3, 4). იესოს თიმწკუმა ხოლო ვურჩქილეთ, მუჟამსით შურ დო გურით ფქადაგენთ სახიოლო ამბეს „ჯგირ დროსით დო გლახა დროსით“ (2 ტიმ. 4:2).

¹¹ იესოქ თქუ: „ჩქიმ შხურეფ ირჩქილენა ჩქიმ ხონარს“ (იოან. 10:27). იესოშ მიმაჸუნალეფ ხვალე მორჩქილაფათ ვარინ, თიშ სიტყვეფიშ მორჩილებათ ხოლო ოძირანა, ნამდა ურჩქილენა თის. თინეფ უფლებას ვარზენა ცხოვრებისეულ პრობლემეფს, ქეცილან ღორონთიშ მსახურებას (ლუკ. 21:34). თიმწკუმა ხოლო, მუჟამსით სირთულეეფს შეხვადუნა, თინეფშო არძაშ უმოს მთავარ იესოშ მითითებეფიშ მორჩილება  რე. ბრელ ჩქინ და დო ჯიმას უხვადუ შხვადოშხვა სირთულეეფწკუმა ბრძოლა, მაგალთო წინააღმდეგობეფ, უღონობა დო სტიქიურ უბედრობეფ. მარა მუდგაქ ვა მოხვადასინ, თინეფ იეჰოვაშ ართგურ სკიდუნა. იესო ღორონთიშ ართგურ მსახურეფს თეცალ დაპირებას არზენს: „მით ჩქიმ მცნებეფს ღებულენს დო იცვენს, თის ვუჸორქ. მიდგას მა ვუჸორქ, თის ჩქიმ მუმა ხოლო ქიჸოროფუანს“ (იოან. 14:21).

12. ხოლო მუჭო შემლებნა ვოძირათ, ნამდა ვურჩქილეთ იესოს?

¹² ხოლო ართ საშვალება, მუდგათ შემლებნა ვოძირათ, ნამდა ვურჩქილეთ იესოს, თინეფწკუმა თანამშრომლობა რე, მიდგას ხემძღვანელობა ოვალ (ებრ. 13:7, 17). ბოლო წანეფს ღორონთიშ ორგანიზაციას ბრელ მუდგარენქ ითირ, მაგალთო ქადაგებაშ მეთოდეფქ, შკამარაშ პროგრამაქ დო სამეფო დარბაზეფიშ შენებაშ დო გინოკეთებაშ მეთოდეფქ. ჩქი მარდულ ვორეთ თეცალ ჸოროფათ დო მზრუნველობათ მოჩამილ ხემძღვანელობაშე. შემლებნა დარწმუნებულ ვორდათ, ნამდა იეჰოვა აკურთხენს ჩქინ მონდომას, მივაჸუნათ ღორონთიშ ორგანიზაციაშე მეღებულ დროულ მითითებეფს.

13. მუ ჯგირობუას მომღანა იესოშ რჩქილა?

¹³ ჩქინო ჯგირობუა მოუღ თი ირფელიშ მორჩქილაფას, მუდგას იესოშე ბგურაფლენთ. იესოქ დარწმუნ მუშ მოწაფეეფ, ნამდა თიშ გურაფეფ სულიერო გეგშაკურცხინუანდჷ თინეფს. თიქ თქუ: „ჭყანა ქუმგაკათუნა. ჩქიმ უღუ ეფ ოღალარ რე დო ჩქიმ ოღალ ქექე“ (მათ. 11:28—30). ღორონთიშ სიტყვას, ნამდგაშა ოთხ სახარება ხოლო მიშურს, მოჩამილ რე იესოშ ცხოვრება დო მსახურება. თიშ კითხირ სულიერო გუშმოკურცხინუანა, მარზენა ძალეფს დო სიბრძნეს (ფსალმ. 19:7; 23:3). იესოქ თქუ: „ბედნერ თინა რე, მით ირჩქილუაფ ღორონთიშ სიტყვას დო იცვენს თის!“ (ლუკ. 11:28).

14, 15. ა) ნამ შემთხვევა რე მოშინაფილ იოანეშ 12:27, 28-ს? ბ) მუშენ ელუკინანდჷ გურშა იესოს იეჰოვაშ სიტყვეფ?

¹⁴ წეკითხით იოანე 12:27, 28. იოანეშ სახარებას მოჩამილ რე მასმა შემთხვევა, მუჟამსით იეჰოვაქ იესოს ზეცაშე დურაგადუ. ღურაშახ მუსხირენ დღათ ადრე, იესო იერუსალიმს რდუ, ნამდა აღნიშნუკო პასექიშ ბოლო დღახუ. „აფორიაქებულ ვორექ“, — თქუ იესოქ დო თეშ უკულ ქილოც: „მუმა  განადიდ სქან სახელი“. პასუხო, მუშ ზეციერ მუმაქ ზეცაშე თეცალ სიტყვეფ უწუ: „განვადიდ დო ხოლო განვადიდენქ“.

¹⁵ იესო აფორიაქებულ რდუ, მუშენდა ბოლოშა ართგურქ ოკო ქუდოსკიდკო, მუთ დიდ პასუხიშმგებლობა რდუ. თის უჩქუდ, ნამდა საშინელ წამება დო ღურა ელუდ (მათ. 26:38). მარა არძაშ უმოს მნიშვნელოვან თიშო მუშ ზეციერ მუმაშ სახელიშ განდიდება რდუ. იესოს ტყურა ბრალდებეფ ქიმწურინუეს დო თინა ნერვიანენდჷ, ნამდა თიშ ღურაქ ღორონთიშ სახელს შეურაცხყოფა ვემიორინუკო. ნამდვილო, იეჰოვაშ სიტყვეფ თის მანგარო ელუკინანდჷ გურშა! თინა დერწმუნებუდ, ნამდა იეჰოვაშ სახელ გენდიდებუდ. მუშ მუმაშ სიტყვეფ გამანგარენდჷ თის, გაურზუკო განსაცდელეფს, ნამუთ წოხოლე ელუდ. შილებე ზეციერ მუმაშ სიტყვეფ ხვალე იესოქ გეგკო თიმ დროს, მარა იეჰოვაქ ქიზრუნ, თიშ სიტყვეფქ ქენიჭარკო წმინდა წერილეფს დო ქინვანჭითკო თის (იოან. 12:29, 30).

16. მუშენ შილებე მინშა მაწუხენდან თინა, ნამდა ღორონთიშ სახელს შეურაცხყოფას მიორინუანა?

¹⁶ იესოცალო, თქვა ხოლო შილებე გოწუხდან თინა, ნამდა იეჰოვაშ სახელს შეურაცხყოფას მიორინუანა. ვარდა შილებე იესოცალო, თქვა ხოლო უსამართლობაშ მსხვერპლი რდათ. შილებე თიშენ ხოლო წუხენდათ, ნამდა მოწინააღმდეგეეფ ტყურა ინფორმაციას ავრცელენა ჩქინ გურშენ.  ალბათ ფიქრენთ, ნამდა თე ირფელ შეურაცხყოფას მიორინუანს ღორონთიშ სახელს დო თიშ ორგანიზაციას. თეცალ დროს იეჰოვაშ სიტყვეფ მანგარო ელამკინანა გურშა. ჩქი ზედმეტო ოკო ვებწუხათ თე საკითხშენ. შეილებნა დარწმუნებულ რდათ, ნამდა „ღორონთიშ მშვიდობა, ნამუთ ირნერ აზრიშე უმოს რენ, დოთხილანს თქვან გურეფს დო გონებას ქრისტე იესოთ (ფილ. 4:6, 7). იეჰოვა ირიათო განადიდენს მუშ სახელს. ზეციერ სამეფოშ საშვალებათ, თინა აუნაზღაურენს მუშ ართგურ მსახურეფს ირნერ ზიანს, მუთ სატანა დო თიშ ქვეყნიერებაქ მიორინუ თინეფს (ფსალმ. 94:22, 23; ეს. 65:17).

17. მუჭოთ ესაიაშ 30:21-შე იძირე, მუჭო მირაგადნა იეჰოვა ამდღა?

¹⁷ იეჰოვა ამდღა ხოლო მირაგადნა (წეკითხით ესაია 30:21). მართალ რე, თინა ზეცაშე ვამრაგადნა, მარა მარზენა მითითებეფს მუშ სიტყვა ბიბლიაშ საშვალებათ. თეს გეძინელ, იეჰოვაშ შურ ოხვარ ართგურ მონას, ქიზრუნას მუშ მსახურეფიშ სულიერ საზრდოშენ (ლუკ. 12:42). ნამდვილო, სულიერ საზრდო ხვეიანო მიღნა, მუჭოთ ბეშტელ, თეშ ონლაინ მასალეფი დო აუდიო-ვიდეო ჩანაწერეფ, ნამუთ რწმენას მიმანგარენა.

18. მუჭო მიმანგარენა იეჰოვაშ სიტყვა რწმენას დო გაბედულებას?

¹⁸ მორთ, ირიათო ფშუდან თი სიტყვეფ, ნამუთ იეჰოვაქ მუშ სქუას უწუ, მუჟამსით თინა დედამიწას რდუ. ბიბლიას ინოჭარილ იეჰოვაშ სიტყვეფ მარწმუნენა, ნამდა თინა ირფელს აკონტროლენს დო ანაზღაურენს ირნერ ზარალს, მუთ ეშმაკიქ დო თიშ უბადო ქვეყნიერებაქ მომღეს. გინოჭყვიდილ მაფდან, ირიათო ვურჩქილათ იეჰოვაშ ხონარს. თაშ ქიმიფქციებუთ-და, ადვილო გეგნიბღანთ ირნერ სირთულეს, ნამუთ მიღნა ვარდა მომავალს შეფხვადუთ. ბიბლია მირაგადნა: „მოთვინება გოსაჭირნა, ნამდა შეასრულათ ღორონთიშ ნება დო მიღათ დუნაპირებ“ (ებრ. 10:36).