1. მუშ სურვილ უღნა მშობლეფს?

 ᲛᲨᲝᲑᲚᲔᲤ, ბჯერა, ნამდა გოკონა, თქვან სქუალეფქ გეჩინებაფუან დო ქიჸოროფუან იეჰოვა. მართალ რე, ღორონთიშ ძირაფა მითინს ვეშულებ, მარა მუჭო შეილებნა თქვან სქუალეფს მეხვარათ ღორონთ რეალურ პიროვნებათ მირჩქინან დო დეახლოვან თის? (იაკ. 4:8).

2. მუჭო შეულებნა მშობლეფს, სქუალეფს ქუგაგებაფუან იეჰოვაშ თვისებეფიშ გურშენ?

² ართ-ართ მნიშვნელოვან საშვალება, მუდგათ შეილებნა სქუალეფს ქიმეხვარათ იეჰოვაწკუმა დაახლოებას, რე თინეფწკუმა ბიბლიაშ გურაფაშ ჩატარება (2 ტიმ. 3:14—17). ბიბლია მოგებაფუანა ხოლო ართ საშვალებაშენ, მუდგათ შეილებნა სქუალეფს უმოს გაგებაფუათ იეჰოვაშ გურშენ. წიგნ იგავეფს მუმა ურაგად მუშ სქუას, ნამდა დღას ვა გიჭყოლიდუას იეჰოვაშ თვისებეფ, ნამუთ ჯგირო იძირე თიშ გუნაჭყეფუეფს (იგავ. 3:19—21). თე სტატიას გუვარჩიენთ მუსხირენ მხარეს, მუჭო შეულებნა მშობლეფს გუნაჭყეფუეფიშ საშვალებათ მუნეფიშ სქუალეფს გაჩინებაფუან იეჰოვა.

3. მუს ოკო მეხვარან მშობლეფქ სქუალეფს?

³ ბიბლია იჩიებ, ნამდა ღორონთიშ „ვეძირენ ფერ თვისებეფ . . . არგამათ ირწყებე ქვეყნიერებაშ გოჭყაფაშე მოჸუნაფილ, მუშენდა თე ირფელ გუნაჭყეფუშ საშვალებათ იძირე“ (რომ. 1:20). მშობლეფ, ალბათ გოსიამოვნუნა თქვან სქუალეფწკუმა ართო ბუნებას დროშ გატარება. გეგმირინეთ თე დრო თქვან სქუალეფშა თიშ ოძირაფალო, მუ კავშირ რე იეჰოვაშ გუნაჭყეფუეფ დო თიშ დიდებულ თვისებეფ შქას. გუვარჩუათ, მუჭო მიგეხვარებნა იესოშ მაგალით.

4. მუჭო დაგურუ მუშ მოწაფეეფს იესოქ გუნაჭყეფუეფიშ საშვალებათ? (ლუკ. 12:24, 27—30)

 ⁴ ყურადღება ქიმიაქცით, მუჭო ირინუანდჷ იესო გუნაჭყეფუეფს შხვეფშა გურაფაშ დროს. ართშა თიქ მუშ მოწაფეეფს უწუ, ქიდეკვირესკო ყორანეფს დო შროშანეფს (წეკითხით ლუკაშ 12:24, 27—30). იესოს შეულებუდ შხვა ნებისმიერ გუნაჭყეფ მიშინუკო, მარა თიქ ყურადღება გამახვილ თი ფრინველშა დო ყვავილშა, ნამუთ მუშ მოწაფეეფშო ნაჩინებ რდჷ. მუჟამსით იესო მოწაფეეფს ეჩიებუდ, შილებე მუნეფიშ გოხოლუას გილაფურინუნდეს ყორანეფ დო ორწყედეს მინდორს გოფალირ შროშანეფს ხოლო. შეილებნანო წერმიდგინათ, მუჭო ოძირანდკონ იჸიდ ჟესტეფით იესო თის, მუდგაშ გურშენ იჩიებუდ? თე მაგალითით იესოქ მუშ მოწაფეეფს ოძირუ, მუნერ გურხვე დო კეთილ რე ზეციერ მუმა დო დაგურუ მნიშვნელოვან გაკვეთილ — იეჰოვა ქიზრუნენს დო აუცილებერს ვა მიარკენს მუშ ართგურ მსახურეფს, მუჭოთ თეს ყორანეფიშ დო შროშანეფიშ შემთხვევას ორთჷ.

5. მუჭო შეულებნა მშობლეფს გუნაჭყეფუეფიშ საშვალებათ სქუალეფს დაგურუან იეჰოვაშ გურშენ?

⁵ მშობლეფ, მუჭო შეილებნა მიაჸუნათ იესოშ მაგალითის, მუჟამსით სქუალეფს ოგურუანთ? შეილებნა თქვან სქუალეფს ეჩუათ თი ცხოველშე ვარდა მცენარეშე, ნამუთ პირადო თქვა მანგარო მორწონა. თეცალ ჩიებაშ დროს თქვან სქუალეფს ქაძირეთ, მუ იძირე თე გუნაჭყეფუეფშე იეჰოვაშ გურშენ. უკულ შეილებნა მუს ქოკითხათ, ნამ ცხოველ ვარდა მცენარე მოწონს. ბაღანა უმოს ყურადღებათ ქუმოირჩქილუანა, მუჟამსით მუშ საყვარელ ცხოველშე ვარდა მცენარეშე ქუდუჭყანთ ჩიებას დო ქუდაგურუანთ, მუჭო იძირე თევრეშე იეჰოვაშ თვისებეფ.

6. მუშ გურაფა შემლებნა ქრისტოფერიშ დიდაშ მაგალითშე?

⁶ ონდო მშობელ ბაღანას ნამდგაინ ცხოველიშ ვარდა მცენარეშ საშვალებათ იეჰოვას გაჩინებაფუანდას, საჭირო რენო არძა დეტალ გეგმირკუას თე გუნაჭყეფუეფშენ? მუშო ოკო რაგად, ვარ. მუჟამსით იესოქ მოციქულეფს ყორანეფიშ დო შროშანეფიშ გურშენ ეჩუ, ვა მუშინუაფ დეტალეფ თე გუნაჭყეფუეფიშ გურშენ, მაგალთო, მუჭო ჭკუმნა ყორანეფ ოჭკუმალს ვარდა მუჭო ირდუნა შროშანეფ. შილებე თქვან სქუალეფს უმოს დეტალეფ ოინტერესდან იეჰოვაშ გოჭყაფილ მუდგარენეფიშ გურშენ, მარა მინშა მარტივ კითხვაშ დასმებაქ დო უბრალოთ მუდგარენშა დაკვირებაქ შილებე მიგეხვარან, ქიმიოჭირინუათ თქვან მიზანს. ართ ჯიმა ქრისტოფერ მუშ ბაღანობაშე თეცალ მუდგარენს იშინანს: «დიაჩქინ ხშირას მიმოქციებაფუანდეს ყურადღებას გუნაჭყეფუეფშა დო მოხვარდეს, დუვაფასითკო ირფელ, მუთ იეჰოვაქ გაჭყჷ. მაგალთო, სოდგაინ გვალამ ადგილს ქუვორდით-და, თინა მირაგადდეს: „ქიდეკვირით, მუშმადიდა დო მუშმასქვამა რე თე გვალეფ, მართალო სასწაულ ვა რენო იეჰოვა?!“ ვარდა ზღვას ქუვორდით-და, თეცალ მუდგარენს ქოთქუანდჷ: „ქიდეკვირით ტალღეფს, ხომ ძალიერ რე იეჰოვა?!“». ქრისტოფერ გეუძინანს: „თე ართ მეჯინათ მარტივ ჩიებეფით დიაჩქინქ ბრელ მუდგარენშა დუმაფიქრეს“.

7. მუჭო შეილებნა თქვან სქუალეფ დაფიქრათ შემოქმედებაშენ?

⁷ მუჟამსით თქვან სქუა გამწირდუ, შეილებნა უმოსო დაფიქრათ ღორონთიშ გუნაჭყეფუეფიშ გურშენ დო ქიმეხვარათ, ქოძირას იეჰოვაშ თვისებეფ. მაგალთო, გეგშეგორით იეჰოვაშ ართ კონკრეტულ გუნაჭყეფ დო ქოკითხით თქვან სქუას: „მუს გოგურუანს თენა იეჰოვაშ გურშენ?“. შილებე მანგარო გუგაკვირან თიშ პასუხიშ მორჩქილაფაქ (მათ. 21:16).

8. მუშ შესაძლებლობა უღდეს ისრაელ მშობლეფს, მუჟამსით შარას მიშეს?

⁸ ისრაელ მშობლეფშა იეჰოვას რაგადებულ აფუდ, ნამდა დაგურუესკო მუნეფიშ სქუალეფს „შარას გილულაშ დროს“ (კან. 11:19). შარეფ მთელ ისრაელიშ ტერიტორიას რდჷ დო თე გილულაშ დროს შეიოლებერ რდჷ შხვადოშხვა ცხოველიშ, ფრინველიშ დო ყვავილიშ ძირაფა. ათეშენ, მუჟამსით  ისრაელ მშობლეფ სქუალეფწკუმა ართო სოდგარენ მიშეს, უღდეს შესაძლებლობა, ეჩუესკო თი ირფელიშ გურშენ, მუთ იეჰოვაქ გაჭყჷ. მშობლეფ, თქვა ხოლო ისრაელეფცალო, შილებე გაშუან შესაძლებლობაქ, შემოქმედებაშ საშვალებათ დაგურუათ თქვან სქუალეფს იეჰოვაშ გურშენ. გუვარჩუათ, მუჭო ორთჷ თეს ნამთინე მშობელ.

9. მუშ გურაფა შემლებნა პუნიტა დო კატიაშე?

⁹ ართ და, სახელო პუნიტა, ნამუთ ინდოეთიშ დიდ ქალაქის ცხოვრენს, თეცალ მუდგარენს იჩიებ: „მუჟამსით სოფელს ოჯახიშ წევრეფს მივაკითხანთ, მა დო ჩქიმ მეუღლე თე შესაძლებლობას იბრინუანთ, ნამდა სქუალეფს იეჰოვაშ დიდებულ შემოქმედებაშ გურშენ დუვოგურუათ. ვორწყექ, ნამდა, მუჟამსით ჩქინ ბაღანეფ ხმაურიან ქალაქშე შორს რენა, უმოს ყურადღებათ ოკვირნა გუნაჭყეფუეფს“. მშობლეფ, რჯერდან, თქვან სქუალეფს დღას ვა გაჭყორდუნა თქვანწკუმა ართო ბუნებას სასიამოვნოთ გატარებულ დრო. ართ მოლდოველ და, კატია თეცალ სიტყვეფს იჩიებ: „ბაღანობაშე, მუთ ამდღარ დღაცალო ფშუ, რე თი დრო, ნამდგას მშობლეფწკუმა ართო სოფელს ვატარენდჷ. მანგარ მარდულ ვორექ, ნამდა მშობლეფქ ჭიჭანობაშე დუმოგურეს, დევეკვირკო თი ირფელს, მუთ იეჰოვაქ გაჭყჷ დო თეშნერო გეფჩინებაფეკო თინა“.

10. მუშ კეთება შეულებნა მშობლეფს ბუნებაშა ვალნენან-და? (ქოძირით ჩარჩო  „რჩევეფ მშობლეფშო“).

¹⁰ მარა მუ შილებე აკეთათ, მუჟამსით სოფელშა ულა ვეშეილებნა? ინდოეთის მახორუ ართ ჯიმა, ამოლ, იჩიებ: „ჩქინ ქიანას მშობლეფ დღაშ დო სერით მუშენა დო ვართ თიშ შესაძლებლობა უღნა, სქუალეფ სოდგაინ ბუნებაშა მიდეჸონან, მარა იეჰოვაშ გუნაჭყეფუეფშე დაკვირება დო თიშ თვისებეფშე ჩიება შილებე ჭიჭე პარკის ვარდა მაღალ შენობაშ ბალკონს ხოლო, სოვრეშეთ ირფელ ჯგირო იძირე“. მშობლეფ, ყურადღებათ ქიდეკვირებუთ-და, შილებე თქვან ჸუდეშ გოხოლუას ხოლო ძირათ იეჰოვაშ გოჭყაფილ შხვადოშხვა მუდგარენეფ, მუდგაშ გურშენ შეილებნა თქვან სქუალეფს ეჩუათ. მაგალთო,  თენეფ შილებე რდას ჩიტეფ, მწერეფ, მცენარეეფ დო შხვა (ფსალმ. 104:24). ართ გერმანელ და, კარინა იჩიებ: „დიაჩქიმს მანგარ უჸორს ყვავილეფ. ჯგირო ფშუ, მუჟამსით ჭიჭე ვორდჷ დო ართო ფსეირნენდით, თინა ხეშე ვა უტენდჷ შესაძლებლობას დო სქვამ-სქვამ ყვავილეფს მოძირანდჷ“. მშობლეფ, ჩქინ ორგანიზაციას ბრელ ვიდეო დო პუბლიკაცია აფჷ გიშაშქუმალირ გუნაჭყეფუეფიშ გურშენ. თქვა შეილებნა გეგმირინუათ თინეფ, ნამდა დაგურუათ სქუალეფს. ვა უღჷ მნიშვნელობა, სოფელს ცხოვრენთ დოვარ ქალაქის, ირნერო შეილებნა ქიმეხვარათ თქვან სქუალეფს, ქიდეკვირან გუნაჭყეფუეფს. ასე გუვარჩუათ იეჰოვაშ ნამთინე თვისება, ნამდგაშე შეილებნა თქვან სქუალეფს ეჩუათ.

11. მუჭო შეულებნა მშობლეფს ქიმეხვარან სქუალეფს, ქოძირან იეჰოვაშ ჸოროფა?

¹¹ თქვან ბაღანეფს იეჰოვაშ ართ-ართ თვისება, ჸოროფა ქაძირათინ, შეილებნა ყურადღება მიოქციებაფუათ, მუჭო ზრუნენა ცხოველეფ მუნეფიშ სქუალეფშა (მათ. 23:37). თეს გეძინელ, შეილებნა ყურადღება გუმახვილათ ბუნებას რენ თი სქვამ მუდგარენეფშა. ჟიშე მოშინაფილ კარინა გეუძინანს: „მუჟამსით ფსეირნენდით, დიაჩქიმ ელამჩანდჷ, გუვარჩერდკო დო ქიდვეკვირკო მუშმასქვამა რდჷ დო მუჭო გენესხვავებუდ ართიანშე თითოულ ყვავილ დო მუჭო იძირედ თევრეშე იეჰოვაშ ჸოროფა. წანეფიშ უკულ ხოლო ვოკვირუქ ყვავილეფს, მუნერ განსხვავებულეფ რენა თინეფ ართიანშე, მუნერ ფერეფ დო ფორმა უღნა. თენა მოხვარ, ირიათო ფშუდას, მუჭო ვუჸორთ იეჰოვას“.

12. მუჭო შეულებნა მშობლეფს მეხვარან სქუალეფს, ქინანჭან იეჰოვაშ სიბრძნეს? (ფსალმ. 139:14; ქოძირით სურათ).

¹² ქიმეხვარით თქვან სქუალეფს, ქოძირან იეჰოვაშ სიბრძნე. იეჰოვა ჩქინდე ბრელით უმოს ბრძენ რე (რომ. 11:33). მაგალთო, შეილებნა ეუნწყათ სქუალეფს, მუჭო იორთქლებ წყარ დო გინმირთუ მუნაფათ, დო მუჭო შეულებ მუნაფას მარტივო გეგნორთას ართ ადგილშე მაჟიაშა (იობ. 38:36, 37). თეს გეძინელ, შეილებნა ყურადღება გუმახვილათ, მუ სარკოთ რე გოჭყაფილ ადამიანიშ სხეულ (წეკითხით ფსალმუნიშ 139:14). ართ ჯიმა ვლადიმირ ხოლო თაშ ორთუდ, თინა იჩიებ: „ართშა ჩქინ ბოშიქ ველისპეტშე გეგთანთხჷ დო ბირგულ გეგნიტყაბარუ, მარა მუსხირენ დღაშა ჭრილობაქ დუსქიდ. მა დო ჩქიმ მეუღლექ თის გევუნწყით, მუ სარკოთ აფჷ იეჰოვას გოჭყაფილ ჩქინ სხეულ, მუშენდა თის უღჷ თვითაღდგენაშ უნარ. ჩქი თინა ხოლო ევუნწყით, ნამდა თე უნარ ნამთინ ადამიანიშ  გამოგონებას ვა უღჷ. მაგალთო, მანქანაქ ავარიას ქუმოხვად-და, მუშით ვეშიალებე დართას ჯვეშობურ მდგომარეობას. თეშე დაფიქრებაქ ჩქინ სქუას მეხვარ, ქინანჭუკო იეჰოვაშ სიბრძნეს“.

13. მუჭო შეულებნა მშობლეფს მუნეფიშ სქუალეფ დაფიქრან ღორონთიშ ძალაშენ? (ეს. 40:26)

¹³ იეჰოვა ელამჩანა, ცაშა გეიბჯინათ დო დეფიფქრათ, მუჭო მართუნს მუშ ძალათ თი ირფელს, მუთ სამყაროს რე (წეკითხით ესაიაშ 40:26). თქვა ხოლო ქელუჩით სქუალეფს, გეიჯინან ცაშა დო ქიფიქრან თიშე, მუდგას ორწყენა. ართ ტაივანელ და მუშ ბაღანობას იშინანს დო თეცალ მუდგარენს იჩიებ: „ართშა დიაჩქიმქ ბუნებაშა მიდამიჸონ, სოდეთ სერ კარავს გუვოთანეთ. გივოხედით დო ელვოჯინედით მურიცხეფით მოჭკადილ ცას, მუდგაშ ძირაფა ქალაქის ბრელ განათებაშ გურშენ ვეშემლებდეს. თიმ პერიოდის კლასელეფშე ზეწოლას ფხვადუდ დო ფიფქრენდჷ, შემალებედ დო ვარ იეჰოვაშ ართგურო მსახურება. დიაჩქიმქ ელამიჩ, დეფიფქრიკო, მუჭო გაჭყჷ იეჰოვაქ მუშ დიდებულ ძალათ მურიცხეფ დო თინა ხოლო მიწუ, ირიათო ფშუდკო, ნამდა თეცალ ძალაშ მენდულს შეიალებედ ჩქიმ მოხვარა ნებისმიერ სირთულეშ დროს. თიმ დღაშ უკულ, უმოსო გომრჩქინდჷ სურვილქ, უჯგუშო გეფჩინებაფეკო იეჰოვა დო მტკიცას გეგნობჭყვიდ, ვემსახურკო თის“.

14. მუჭო შეულებნა მშობლეფს გუნაჭყეფუეფიშ საშვალებათ მუნეფიშ სქუალეფს ქაძირან, ნამდა იეჰოვა ბედნერ ღორონთ რე?

¹⁴ იეჰოვაშ გუნაჭყეფუეფშე იძირე, ნამდა თინა ბედნერ ღორონთ რე დო იუმორიშ გრძნობა უღჷ. მეცნიერეფქ დაკვირებაშ უკულ თი დასკვნაშა მერთეს, ნამდა ცხოველეფიშ უმენტაშ ლაჸაფენს, თინეფ შქას ჩიტეფ დო ჩხომეფ ხოლო (იობ. 40:20). გუძიცინნანო თქვა სქუალეფს ცხოველეფიშ ლაჸაფშენ? მაგალთო, თიშ ჯინაშ დროს, მუჭო მეთხოზ კატ გვარგვაზელ ძაფის ვარდა მუჭო გალაჸაფნა ლაკვეფ ართიანს. ანწიანშო, მუჟამსით ქოძირუნთ, ნამდა თქვან სქუა ცხოველეფიშ თეცალ ლაჸაფშე იძიცანს, გეგმირინეთ თე შესაძლებლობა დო ქეჩით, ნამდა იეჰოვა ბედნერ ღორონთ რე (1 ტიმ. 1:11).

15. მუ მეხვარებ მშობლეფს, ქიგეგან მუ უღნა მუნეფიშ სქუალეფს გურს? (იგავ. 20:5; ქოძირით სურათ).

¹⁵ კანკალეშა შილებე მშობლეფშო რთულქ იჸუას თიშ გაგებაქ, მუ სირთულეეფს ხვადუნა მუნეფიშ სქუალეფ. თქვა ხოლო თეცალ სიტუაციას  ქორეთ-და, შილებე უმოს ხანდაქ დეგესაჭირან თიშ გაგებელო, მუშე წუხენა თქვან სქუალეფ დო მუ უღნა გურს (წეკითხით იგავეფიშ 20:5). ნამთინე მშობელქ ქოძირ, ნამდა თეშ ოკეთებელო ჯგირქ იჸუ მუნეფიშ სქუალეფწკუმა ართო ბუნებაშა ულაქ. მუშენ? მუშენდა, თეცალ გარემოს ნაკლებო რე თიცალ მუდგარენეფ, მუთ მუჭოთ მშობლეფს, თეშ სქუალეფს ხოლო ეცილებდეს ჩიებას. ართ ტაივანელ ჯიმა, მასაჰიკო მიშინუანს ხოლო ართ მიზეზის. თინა იჩიებ: „მუჟამსით მა დო ჩქიმ მეუღლე ჩქინ სქუალეფწკუმა ართო გვალამ ადგილს ვორეთ ვარდა წყარპიჯის ელაპჸუნთ, თინეფ უმოს თავისფალო გინაფლენა დუდის. თე დროს უმოს ადვილ რე ქიგებგათ, მუშე ფიქრენა დო მუ აწუხენა თინეფს“. ჟიშე მოშინაფილ კატია იჩიებ: „სკოლაშ უკულ ხშირას დიაჩქიმს სქვამ პარკშა მეპჸუნდჷ. თექ მანგარ თავისფალ გარემო რდჷ. ათეშენ, უმოს ადვილ მაფუდ, თიწკუმა ჩქიმ გრძნობეფიშ გურშენ ქიფჩიკო დო თინა ხოლო ქუწიკო, მუ ხვადუდ სკოლას“.

16. მუჭო შეულებნა ოჯახეფს, ისიამოვნან იეჰოვაშ გუნაჭყეფუეფით?

¹⁶ თი ირფელ, მუთ იეჰოვაქ გაჭყჷ, ოჯახეფს საშვალებას არზენს, მისვანჯან დო სასიამოვნოთ გატარან დრო, მუთ მეხვარებ თინეფს უმოსო ქიჸოროფუან დო დეახლოვან ართიანს. ბიბლია იჩიებ, ნამდა რე „ძიცაშ დრო“ დო რე „ძიცა-ლაჸაფიშ დრო“ (ეკლ. 3:1, 4). იეჰოვაშ გოჭყაფილ დედამიწას ბრელ თიცალ სქვამ ადგილ რე, სოდეთ შემლებნა დრო სასიამოვნოთ გუვატარათ. ბრელ ოჯახ სასიამოვნოთ ატარენს დროს ბუნებას, სოფელს, გვალამ ადგილეფს ვარდა ზღვას. ნამთინე ბაღანას უჸორს პარკის ლაჸაფ დო გილარულა, ცხოველეფშა დაკვირება დო მალწყარს ვარდა ზღვას ნჩურუა. სოდგა ვემკიბჯინათინ, ვორწყეთ, ნამდა მიღნა ქიანაშ შესაძლებლობა, იფსიამოვნათ თი ირფელით, მუთ იეჰოვაქ ჩქინო გაჭყჷ.

17. მუშენ ოკო მეხვარან მშობლეფქ სქუალეფს, ისიამოვნან ღორონთიშ გუნაჭყეფუეფით?

¹⁷ ახალ ქვეყნიერებას ქოთ მშობლეფ დო ქოთ სქუალეფ სრულაშე იფსიამოვნენთ იეჰოვაშ გუნაჭყეფუეფით, მუშენდა ამდღარ გინაწონს, მუთუნნერ მიზეზ ვა მაღვენუნა, მოშქურდან ცხოველეფიშ დო ვართ თინეფს ოშქურდან იჸი ჩქინდა (ეს. 11:6—9). იეჰოვაშ გუნაჭყეფუეფით სიამოვნებაშ მეღება მთელ მარადიულობას შემალებნა (ფსალმ. 22:26). მარა, მშობლეფ, ამდღარშე ქიმეხვარით თქვან სქუალეფს, სიამოვნება მიღან გუნაჭყეფუეფშე. მუჟამსით თქვან სქუალეფს გუნაჭყეფუეფიშ საშვალებათ გაჩინებაფუანთ იეჰოვას, თინეფ ხოლო მეფე დავითცალო ფიქრენდან იჸი, მიდგაქ თქუ: „[იეჰოვა,] მითინს ვაქიმნე სქანცალ საქმეეფ!“ (ფსალმ. 86:8).