მუშენ თქუ კოჩიქ, „ნამდგაშ სახელ მოშინაფაშ ღირს ვა რე“, ნამდა რუთის ოსურო ქიმიჸონანდჷ-და, „დეზარალებუდ“? (რუთი 4:1, 6).

ბიბლიურ დროს დაქორწინებულ კოჩ, სქუა ვა ჸუნდუნ თეშ დოღურუდ-და, მუსხირენ კითხვა რჩქინდუდ: მის დასქიდუდ თიშ დიხა? სადღამუშოთ ხომ ვა მისპუდ თიშ გამნარყ? თე კითხვეფს მოსეშ კანონ არზენდჷ პასუხის.

მუ აღოლედ დიხას, თიშ მინჯე დოღურუდ ვარდა გეღარიბებუდ დო გიმაჩამალ ქაჸიდ-და? ჯიმას ვარდა ხოლოშიან ნათესეს, შეულებუდ დიხაშ გიშაჸიდირ. თეშნერო, თე დიხა კინ მინჯეშ საგვარეულოს ქუდასქიდუდ (ლევ. 25:23—28; რიცხ. 27:8—11).

ღურელ კოჩიშ სახელქ საგვარეულოშე ვეგშალკონ თიშენ, თიშ ოსურქ მუშ ოხოლასქირშა ოკო დექორწინკო. თენა რდჷ ლევირატიშ წეს, ნამდგაქ რუთიშ შემთხვევას ხოლო იჸუ გიმორნაფილქ. თაშ ნამდა, ღურელ კოჩიშ ჯიმაქ ოსურო ოკო მიჸონკო მუშ ნოსა. თინეფს სქუა გეურჩქინდუდეს-და, ბაღანა ღურელიშ სქუათ დო თიშ მემკვიდრეთ ითვალუდ. თე კანონ, სოვრეშეთ ჸოროფა იძირედ, ზრუნენდჷ ქომონჯღურელ ოსურეფშა (კან. 25:5—7; მათ. 22:23—28).

გუვარჩუათ ნაომიშ მაგალით. მუჟამსით თიშ ქომონჯიქ, ელიმელექიქ, დო თინეფიშ ჟირ სქუაქ დოღურ, ნაომიქ ხვალე ქუდოსქიდ დო მითინ ვა ჸუნდჷ, მით ეიჯუმუანდჷ (რუთ. 1:1—5). მუჟამსით ნაომიქ იუდაშა დირთჷ, მუშ ნოსა რუთ, ელიმელექიშ ართ-ართ ხოლოშიან ნათესეშა, ბოაზშა მიდაშქვჷ, ნამდა თის დიხაშ გიშაჸიდირ ქოთხუკო (რუთ. 2:1, 19, 20; 3:1—4). მარა ბოაზის უჩქუდ, ნამდა ელიმელექის ჸუნდჷ უმოს ხოლოშიან ნათესე, ნამდგაშ გურშენ ბიბლიას ჭარჷ, ნამდა თიშ „სახელ მოშინაფაშ ღირს ვა რე“. პირველ რიგის, თის შეულებუდ გეგმირინუკო გიშმაჸიდირალიშ უფლება (რუთ. 3:9, 12, 13).

დუდშე თე ნათესექ თქუ, ნამდა გეგშეჸიდენდჷ დიხას (რუთ. 4:1—4). თის უჩქუდ, ნამდა დიხაშ გიშაჸიდირალო ფარა აჸიდ ოგაფალ, მარა თინა ხოლო ჯგირო უჩქუდ, ნამდა ნაომი უკვე ხანშამიშულირ რდჷ დო ვეშიალებედ ბაღანა გეიორჩქინკო. ათეშენ ვეჸუაფუდ მითინ, მით თქუანდჷ, ნამდა ელიმელექიშ დიხა მემკვიდრეობათ ოკუთვნუდ. თეშნერო, თე გიშაჸიდირელ დიხა თე კოჩიშ დო თიშ გამნარყიშ იჸუაფუდ. თაშ ნამდა, თინა ელიმელექიშ დიხას გეგშეჸიდენდჷ-და, სარგებელს მიღენდჷ.

მარა, მუჟამსით თე კოჩიქ ქიგეგ, ნამდა ოსურო რუთ ოკო მიჸუნკო, გადაწყვეტილება დოთირუ დო თქუ: „ვეგშმაჸიდირე, მუშენდა შილებე იბზარალე“ (რუთ. 4:5, 6). მუშენ თირუ თე კოჩიქ გადაწყვეტილება?

თე კოჩ ვარდა მიდგაინ შხვა, რუთშა დექორწინებუდ დო ქომოლსქუა გეურჩქინდუდეს-და, ელიმელექიშ დიხა მემკვიდრეობათ ბაღანას გინაჩამუდ. მუჭო „დაზარალენდჷ“ თენა გიშმაჸიდირალს დო თიშ გამნარყის? მართალ რე, ბიბლია კონკრეტულ პასუხის ვერზენს, მარა არსებენს მუსხირენ საეგებიო მიზეზ.

• პირველ: ფარა, ნამდგას ელიმელექიშ დიხაშ გიშაჸიდირალო გინიგანდჷ, მუშო დინაფილ იჸუაფუდ, მუშენდა ბოლოს თე დიხა მემკვიდრეობათ რუთიშ ქომოლსქუას დასქიდუდ.

• მაჟია: გიშმაჸიდირალ ვალდებულ იჸუაფუდ, ირნერო ქიზრუნკო რუთ დო ნაომიშე.

• მასმა: რუთის გიშმაჸიდირალშე ხოლო მუსხირენ სქუა გეურჩქინდუდ-და, თე ბაღანეფ თი კოჩიშ სქუალეფიშ მემკვიდრეობაშ მეწილეეფ იჸუაფდეს.

• მანთხა: თე კოჩის, ნამდგაშ „სახელ მოშინაფაშ ღირს ვა რე“, შხვა სქუალეფ ვა ჸუნდჷ-და, ქომოლსქუა, ნამდგას რუთ გეიორჩქინანდჷ, იჸუაფუდ, მუჭოთ ელიმელექიშ, თეშ თე კოჩიშ დიხაშ მემკვიდრე. თაშ ნამდა, მუჟამსით თე კოჩ დოღურუდ თიშ დიხა დასქიდუდ ბაღანას, ნამუთ ელიმელექიშ გვარიშ გუმაგრძელებერ იჸუაფუდ დო ვართ ხოლო მუშ. ათეშენ თე კოჩის ვაკოდ, ნაომის მეხვარკონ თიშენ, მუშ მემკვიდრეობა რისკიშ თუდო ქიგიორინუკო, მუდგაშ გურშენ ისხუნუ, ნამდა გიშმაჸიდირალიშ უფლება, მუშ მანგიორო ბოაზიქ გეგმირინუკო. ბოაზიქ ქოთ მიქცუ თაშ, მუშენდა ოკოდ, ღურელიშ მემკვიდრეობას კინ თიშ სახელ გეძუდკო (რუთ. 4:10).

არგამა რე, თე კოჩ, ნამდგაშ „სახელ მოშინაფაშ ღირს ვა რე“, ხვალე მუშ სახელშე დო მემკვიდრეობაშე ფიქრენდჷ. თინა ეგოისტ რდჷ დო ათეშენ მიქცუ თაშ. მართალ რე, ბრელს ხანდენდჷ, მუშ სახელქ ვა დინკონ, მარა ამდღა თინა ხოლო ვა მიჩქნა, მუ ჯოხოდ თე კოჩის. ხვალე თენა ვარინ, თიქ მიოდინუ განსაკუთრებულ პატი, ნამუთ თიშ მანგიორო ბოაზიქ მიღჷ. ბოაზიქ მესიაშ, იესო ქრისტეშ წინაპარო გინირთჷ. მუ გლახა შედეგეფ მოუღ თე კოჩის მუშ ეგოისტობაშ გურშენ, შხვაშა მოხვარაშე ვარიაშ რაგადიქ! (მათ. 1:5; ლუკ. 3:23, 32).