1, 2. მუ ხვადუ, მუჟამსით პიროვნება ინათუ დო მუს გუვარჩიენთ თე სტატიას?

 ᲐᲠᲫᲐᲡ მომრჩქილუაფნა, მუჭო პასუხენა ხონარმაღალო ნათუაშ კანდიდატეფ მუნეფშა დოსუმალირ ჟირ კითხვას. მიძირნა თინეფიშ ოჯახიშ წევრეფიშ დო მეგობრეფიშ გახარებულ სახეეფ დო გამგონებნა, მუჭო მეუგანს აუდიტორია ტაშის წყარშე ეშულირ ახალნათილეფს, მიდგას თოლეფ ხიოლით ურწკინანა. ირ მარას, სოდგარენ ანთასობით პიროვნება გინოდგუნს თე ნაბიჯის, დუდის უძღვინენს იეჰოვას, ინათუ დო ართ-ართ იეჰოვაშ მოწმეთ გინირთუ.

² თქვანდე მუშ რაგად შილებე? ნათუას ქოფიქრენთ-და, სწორ შარას გერეთ, მუშენდა თი ადამიანეფ შქას რეთ, მით თე უბადო ქვეყნიერებას „გორუნს იეჰოვას“ (ფსალმ. 14:1, 2). ათეშენ, ვა უღჷ მნიშვნელობა ახალგაზრდა რეთ დოვარ ხანშამიშულირ, თე სტატია თქვანო რე. მარა თაქ გარჩიებულ აზრეფ თინეფს ხოლო მიმეხვარებნა, მით ნათილეფ ვორეთ, მუშენდა მოკონა, კინ მტკიცას მაფდან გინოჭყვიდილ, ირიათო ვემსახურათ იეჰოვას. თეშო ბრელ მიზეზ მიღნა. მორთ გუვარჩუათ თინეფშე სუმ.

3. მუშენ უჸორა ღორონთიშ მსახურეფს, ჭეშმარიტება დო სიმართლე? (ფსალმ. 119:128, 163)

³ იეჰოვაქ უწუ მუშ ხალხის, ნამდა უჸორდესკო ჭეშმარიტება (ზაქ. 8:19). იესოქ ხოლო ელუჩ მუშ მიმაჸუნალეფს, ინჭუესკო სიმართლეშა (მათ. 5:6). თენა ნიშნენს, ნამდა თიშ ძალიერ სურვილ ოკო მიღდან, ვაკეთათ თინა, მუთ სწორ, ჯგირ დო წმინდა რე ღორონთიშ თოლს. ქოიჸორანო სიმართლე დო ჭეშმარიტება? დარწმუნებულეფ ვორეთ, თენა თაშ რე. თქვა რჯოგნა ტყურეფ, ირნერ გლახა დო უბადო (წეკითხით ფსალმუნიშ 119:128, 163). ტყურა უჸორსინ თინა აგურუ თე ქვეყნიერებაშ მართველს, სატანას, მუშენდა ტყურა თიშ პიროვნებაშ ნაწილ რე (იოან. 8:44; 12:31). სატანაშ  ართ-ართ მიზან რე, შეურაცხყოფა მიორინუანს ღორონთიშ წმინდა სახელს. ედემიშ ბაღშე მოჸუნაფილ თინა ამტკიცენს, ნამდა ღორონთ ეგოისტ დო უპატიოსნო მართველ რე, მიდგას ჯგირ ვაკო ადამიანეფშო (დაბ. 3:1, 4, 5). თინა ამდღა ხოლო აგრძელენს თაშ მოქციებას დო ხალხის ღორონთიშ გურშენ ტყურეფს ოჯერუანს. სატანას შეულებ უბადო დო გლახა საქმეეფ გაკეთებაფუას თის, მიდგას ჭეშმარიტება ვა უჸორს (რომ. 1:25—31).

4. მუჭო ოძირუ იეჰოვაქ, ნამდა „ჭეშმარიტებაშ ღორონთ“ რე? (ქოძირით სურათ).

⁴ იეჰოვა „ჭეშმარიტებაშ ღორონთ“ რე დო ჭეშმარიტებას ოგურუანს თის, მიდგას თინა უჸორს (ფსალმ. 31:5). თეშნერო, თინა ათავისფალენს ხალხის სატანაშ ტყურეფშე. იეჰოვა მუშ მსახურეფს თის ხოლო ოგურუანს, ნამდა რდან პატიოსანეფ დო მართალეფ, მუთ ადამიანს დუდის დაფასებულო ოგინებაფუანს დო არზენს შინაგან სიმშვიდეს (იგავ. 13:5, 6). ალბათ ბიბლიაშ გურაფაშ დროს თქვან დუდშა გიმოცადით, ნამდა ღორონთიქ გუგათავისფალეს სატანაშ ტყურეფშე დო მერჩეს შინაგან სიმშვიდე. თეწკუმა ართო, თინა ხოლო ქიგეგით, ნამდა თის ხვალე ჯგირ ოკო, მუჭოთ მთელ კაცობრიობაშო, თეშ პირადო თქვანო ხოლო (ეს. 48:17). ათეშენ გოკონა, ქიგედირთათ ღორონთიშ მხარეს დო აკეთათ თინა, მუთ სწორ რე (მათ. 6:33). თინა ხოლო გოკონა, დეცვათ ჭეშმარიტება დო დამტკიცათ, ნამდა ირფელ, მუდგას სატანა ღორონთიშ გურშენ იჩიებ, ტყურა რე. მუჭო შეილებნა თენა აკეთათ?

5. მუჭო შეილებნა გედირთათ ჭეშმარიტებაშ დო სიმართლეშ მხარეს?

⁵ თქვან ცხოვრებათ შეილებნა ოძირუათ, ნამდა ვა ურჩქილეთ სატანაშ ტყურეფს დო ჭეშმარიტებაშ მხარეს გერეთ. თეს გეძინელ, გოკონა, იეჰოვა რდას თქვან მართველ დო აკეთათ თინა, მუთ თიშ თოლს რე სწორ. მუჭო შეილებნა თეშ კეთება? იეჰოვაშა ლოცვას დუდიშ მეძღვინუათ დო თეშ ნათუათ საჯაროთ დამტკიცებათ. ჭეშმარიტებაშ დო სიმართლეშ ჸოროფა რე თინა, მუთ პიროვნებას ნათუას გინაჭყვიდირაფუანს.

6. მუჭოთ ფსალმუნიშ 45:4-შე იძირე, მუ მიზეზეფ მიღნა, მიჸორდან იესო?

⁶ მუშენ მიჸორა იესო? თეშ ნამთინე მიზეზის ფსალმუნიშ 45:4-ის ბკითხულენთ (წეკითხით). იესო ჭეშმარიტებაშ, თანდაბლობაშ დო სიმართლეშ მხარეს გერე. ჭეშმარიტება დო სიმართლე ქოიჸორან-და, ბუნებრივ რე, იესო ხოლო გიჸორდან  იჸი. დედამიწას ცხოვრებაშ დროს, თინა გაბედულო იცვენდჷ ჭეშმარიტებას დო სიმართლეს (იოან. 18:37). მარა სოვრეშე იძირ თიშ თანდაბლობაქ?

7. მუს აღნიშნენდით იესოშ თანდაბლობაშ გურშენ?

⁷ იესოქ თანდაბლობა მუშ მაგალითით მოძირეს. თინა მუშ დუდიშ მანგიორო ირიათო ზეციერ მუმას განადიდენდჷ (მარ. 10:17, 18; იოან. 5:19). თქვანდა მუჭო მოქმედენს იესოშ თანდაბლობაშ ძირაფა? ვეგნგოჭყვიდირაფუანანო თენა, ქიჸოროფუათ ღორონთიშ სქუა დო მიაჸუნათ თიშ მაგალითის? მუშო ოკო რაგად, თაშ იჸუაფ. მუშენ რდჷ იესო თანდაბალ? მუშენდა მეჸუნდჷ მუშ თანდაბალ მუმაშ მაგალითის დო უჸორდჷ თინა (ფსალმ. 18:35; ებრ. 1:3). თენა ვაირჩქინანანო თიშ სურვილს, ნამდა დეახლოვათ იესოს, მით სრულყოფილო გიმირჩქინანდჷ იეჰოვაშ თვისებეფს?!

8. მუშენ მიჸორა იესო, ჩქინ მეფე?

⁸ ჩქი მიჸორა იესო, ჩქინ მეფე, მუშენდა თინა სრულყოფილ მართველ რე. იეჰოვაქ პირადო მამზად მუშ სქუა დო მართველო გიორინუ (ეს. 50:4, 5). დეფიქრით თიშე ხოლო, მუნერ დუდგინოდვალირ ჸოროფა გიმირჩქინ იესოქ (იოან. 13:1). მუჭოთ მეფე, თინა იმსახურენს ჩქინ ჸოროფას. თიქ ენწყჷ, ნამდა მეგობრეფო მირჩქინანს თინეფს, მიდგას მთელ გურით უჸორს იესო დო ჸოროფას გიმირჩქინანა თით, ნამდა მთელ გურით მეჸუნა თიშ მითითებეფს (იოან. 14:15; 15:14, 15). მართალო დიდებულ პატი რე, ვორდათ იეჰოვაშ სქუაშ მეგობარ!

9. მუთ გჷ ქრისტიანეფიშ ნათუა იესოშ ნათუას?

⁹ ართ-ართ მითითება, ნამუთ იესოქ მუშ მიმაჸუნალეფს მეჩჷ თინა რე, ნამდა დინათესკო (მათ. 28:19, 20). თეშ მაგალით კინ იესოქ მუჩეს. მართალ რე, თიშ ნათუა ჭიჭეთ განსხვავებულ რე მუშ მიმაჸუნალეფიშ ნათუაშე, მარა მუდგარენ საერთო ხოლო უღჷ (ქოძირით ჩარჩო  „მუ განსხვავება რე იესოშ ნათუაშ დო თიშ მიმაჸუნალეფიშ ნათუაშ შქას?“). მაგალთო, მუჟამსით იესოქ ინათ, ოძირუ, ნამდა მზათ რდჷ მუშ მუმაშ ნებაშ შეიოსრულებერო (ებრ. 10:7). თეშნერო, მუჟამსით იესოშ მიმაჸუნალეფ ინათუნა, სახალხოთ ოძირანა, ნამდა დუდ მეუძღვინეს იეჰოვას დო ცხოვრებას უკვე თინეფშო მთავარ ღორონთიშ ნებაშ შესრულება რე დო ვართ ხოლო მუნეფიშ. თეშნერო, თინეფ მეჸუნა მუნეფიშ მოძღვარიშ მაგალითის.

10. მუშენ გინგოჭყვიდირაფუანა იესოშ ჸოროფა ნათუას?

¹⁰ თქვა რჯერა, ნამდა იესო იეჰოვაშ ხვალეგუნაჭყეფ სქუა დო ჩქინ მეფე რე, ნამუთ ღორონთიქ ჩქინ მართველო გიორინუ. იესო თანდაბალ რე დო სრულყოფილო მეჸუნს მუმაშ მაგალითის. თინა ხოლო გიჩქნა, ნამდა, მუჟამსით დედამიწას რდჷ, შქირენულეფს ოდიარუანდჷ, გურგოტახილეფს გურშა ელუკინანდჷ დო ლახალაშე ოსქილიდუანდჷ ხალხის (მათ. 23:10). თქვა თის ხოლო ორწყეთ, მუჭო ხემძღვანელენს ამდღა კრებეფს (მათ. 14:14—21). თინა ხოლო გიჩქნა, ნამდა მომავალს, მუჭოთ ღორონთიშ სამეფოშ მეფე, ბრელით უმოსის გაკეთენს. მუჟამსით ქიმიაჸუნუთ იესოშ მაგალითის, თეთ ოძირანთ, ნამდა გიჸორა თინა (იოან. 14:21). ართ-ართ, მუდგათ შეილებნა მიაჸუნათ თიშ მაგალითის თინა რე, ნამდა დუდ მეუძღვინათ იეჰოვას დო დინათათ.

11. მუ ოკო რდას არძაშ უმოს მნიშვნელოვან მიზეზ ნათუაშო დო მუშენ?

¹¹ მუ რე არძაშ უმოს მნიშვნელოვან მიზეზ, მუდგაშ გურშენ იბნათუთ? იესოქ თენა გამცხადეს, მუჟამსით თქუ: „გიჸორდას იეჰოვა, სქან ღორონთ, მთელ გურით, მთელ შურით, მთელ გონებათ დო მთელ ძალათ“ (მარ. 12:30). გეიჭარენო იეჰოვაშ მიმართ თქვან ჸოროფა თე სიტყვეფით?

12. მუშენ მიჸორა იეჰოვა? (ქოძირით სურათ).

¹² ჩქი ბრელ მიზეზიშ გურშენ მიჸორა იეჰოვა.  მაგალთო ართ-ართ მიზეზ თინა რე, ნამდა თიშე „მოურს სიცოცხლე“ დო „არძანერ ჯგირ დო სრულყოფილ ძღვინ“ (ფსალმ. 36:9; იაკ. 1:17). ირფელ, მუდგას ჩქინდა ხიოლ მოუღ ჩქინ მოჸოროფე დო გურხვე ღორონთშე რე.

13. მუშენ რე გიშაჸიდირალ ძვირფას ძღვინ?

¹³ გიშაჸიდირალ რე ძვირფას ძღვინ, მუთ იეჰოვაქ ჩქინო აკეთ. მუშენ შემლებნა თეშ რაგად? დეფიფქრათ, მუნერ ხოლოშიან ურთიერთობა უღნა იეჰოვა დო იესოს ართიან შქას. დედამიწას რდუნ თიმწკუმა იესოქ თქუ, ნამდა მუს დო მუამუშის მანგარო უჸორა ართიან (იოან. 10:17; 14:31). თინეფიშ ურთიერთობა უმოსო დო უმოსო იმანგარებუდკონ იჸიდ მილიარდობით წანაშ დინახალე (იგავ. 8:22, 23, 30). წერმიდგინით, მუშმანწარა ჭუას იგინანდჷ იეჰოვა, მუჟამსით მუშ სქუაშ ტანჯება დო ღურას ქოძირუნდჷ. იეჰოვას არძა ადამიან უჸორს, პირადო თქვა ხოლო უჸორთ, ათეშენ თიქ მუშ საჸოროფო სქუა გაწირ თქვანო, ნამდა ქოიღდესკო მარადიულო ცხოვრებაშ შესაძლებლობა (იოან. 3:16; გალ. 2:20). თენა მართალო არძაშ უმოს მთავარ მიზეზ რე, მუდგაშ გურშენ მიჸორა იეჰოვა.

14. მუ რე ცხოვრებას არძაშ უჯგუშ მიზან?

¹⁴ მუთ უმოსო გეჩინებაფუანთ იეჰოვას, თით უმოსო ქიჸოროფუანთ თის. მუშო ოკო რაგად, გოკონა, გიღდან ხოლოშიან ურთიერთობა თიწკუმა მუჭოთ ასე, თეშ მარადიულო ხოლო. თენა შეიოლებერ რე. ღორონთ ჸოროფათ ელაიჩანა, გურ გუხარათ თის (იგავ. 23:15, 16). თეშ კეთება ხვალე  სიტყვეფით ვარინ, საქმეეფით ხოლო შეილებნა. მართალო თაშ რე, თქვან ცხოვრებათ შეილებნა ოძირუათ, ნამდა გიჸორა იეჰოვა (1 იოან. 5:3). იეჰოვაშ მსახურება ცხოვრებას არძაშ უჯგუშ მიზან რე, მუთ შილებე გიღდან.

15. მუჭო შეილებნა ოძირათ, ნამდა გიჸორა იეჰოვა?

¹⁵ მუჭო შეილებნა ოძირუათ, ნამდა გიჸორა იეჰოვა? პირველ რიგის, ქილოცით დო ქუწით იეჰოვას, ნამდა დუდის უძღვინენთ თის, ხვალე ართ ჭეშმარიტ ღორონთის (ფსალმ. 40:8). უკულ დინათით დო თეშნერო სახალხოთ ქაძირეთ, ნამდა დუდ მეუძღვინით ღორონთის. მუჭოთ თე სტატიას გუვარჩით, თენა მნიშვნელოვან გადაწყვეტილება რე დო ბედნერობა მოუღ, მუშენდა იჭყანთ ახალ ცხოვრებას თქვან დუდშო ვარინ, იეჰოვაშო (რომ. 14:8; 1 პეტ. 4:1, 2). მართალ რე, თენა სერიოზულ გადაწყვეტილება რე, მარა თე ნაბიჯიშ გინოდგუმა მიგეხვარებნა, გიღდან ბედნერ ცხოვრება. მუჭო რე თენა შეიოლებერ?

16. მუჭოთ 1 იოანეშ 2:25-ის ჭარჷ, მუჭო აკურთხენს იეჰოვა თინეფს, მით ემსახურებ თის?

¹⁶ იეჰოვა არძაშ უმოს გურხვე პიროვნება რე მთელ სამყაროს. ვა უღჷ მნიშვნელობა, მუსხის ვორთუთ თიშო, თინა ირიათო ბრელით უმოსის მირთინუანა (მარ. 10:29, 30). თინა ამდღა, თე უბადო ქვეყნიერებას ხოლო ქიმერჩანა, მანგარ საინტერესო დო კმაყოფილებაშ მუმაღალარ ცხოვრებას. მარა თენა ხვალე დაჭყაფ რე, წიმი უმოს გელნა. ნათუათ გერზიებნა საშვალება, გიღდან ულიებ სიცოცხლე დო მარადიულო ემსახურათ თქვან ზეციერ მუმას. შედეგო, თქვან დო იეჰოვაშ შქას ჸოროფა უმოსო მიძინანს დო ხვალე თენა ვარინ, იეჰოვაცალო თქვა ხოლო მარადიულო იცხოვრენთ (წეკითხით 1 იოანეშ 2:25).

17. ჩქინ მხარეშე მუშ კეთება შემლებნა იეჰოვაშო?

¹⁷ მუჟამსით დუდის უძღვინენთ იეჰოვას დო ინათუთ, თქვა ხოლო გერზიებნა პატი, ძვირფას მუდგარენ აკეთათ ზეციერ მუმაშო. თი ირფელ ჯგირ, მუთ ირდღას მიღნა დო თი ბედნერ წუთეფ, ნამდგათ ცხოვრებას ფხარენთ, ღორონთშე რე. თეშ პასუხო ჩქი ხოლო შემლებნა ზეცა დო დედამიწაშ გუმაჭყაფალს მეფჩათ თინა, მუთ ხვალე ჩქი მიღნა — ჩქინ მზადყოფნა დო ართგურობა (იობ. 1:8; 41:11; იგავ. 27:11). თეშ უჯგუშ  მუ ოკო აკეთათ ცხოვრებას?! მუშო ოკო რაგად, იეჰოვაშ ჸოროფა რე არძაშ უჯგუშ მიზეზ, ნამდა დინათათ.

18. მუ ოკო ბკითხათ ჩქინ დუდის?

¹⁸ თე ირფელიშ გარჩიებაშ უკულ, დინათუთო? თე კითხვაშა ხვალე თქვა გაპასუხებენა. შილებე მიგეხვარან თიშე დაფიქრებაქ: „მუშენ იბჯინექ?“ (საქ. 8:36). ქიგიშინით თი სუმ მიზეზ, მუდგაშ გურშენ იფჩით. პირველ, თქვა გიჸორა ჭეშმარიტება დო სიმართლე. ქოკითხით თქვან დუდის: „ქუმოკონო იფცხოვრე თიცალ დროს, მუჟამსით არძა სიმართლეს იჩიებდას იჸი დო სწორას მიქციებ?“. მაჟია, თქვა გიჸორა იესო ქრისტე. ქოკითხით თქვან დუდის: „ქუმოკონო ღორონთიშ სქუა რდას ჩქიმ მეფე დო მივაჸუნე თიშ მაგალითის?“. მასმა, მუთ არძაშ უმოს მნიშვნელოვან რე, თქვა გიჸორა იეჰოვა. ქოკითხით თქვან დუდის: „ქუმოკონო გურ გუხარე იეჰოვას დო ვემსახურე თის?“. თე კითხვეფშე თქვან პასუხ დადებით ქორენ-და, იმწკუმა მუშენ ვენათუთ? მუს უჯინეთ? (საქ. 16:33).

19. მუშენ ოკო ვეგნოდვათ ნათუა? ქიმიჸონით მაგალით (იოან. 4:34).

¹⁹ ნათუაქ დიო ხოლო ვეგნგაჭყვიდირეს-და, დეფიქრით იესოშ მოჸუნაფილ მაგალითშე (წეკითხით იოანეშ 4:34). ქიდეკვირით, ნამდა იესოქ მუმაშ ნებაშ შესრულება ოჭკუმალს შეადარ. მუშენ? მუშენდა ოჭკუმალ სასარგებლო რე ჩქინო. იესოს ჯგირო უჩქუდ, ნამდა ირფელს, მუდგაშ კეთებას იეჰოვა ჩქინდე ითხინს, კინ ჩქინდა მოუღ ჯგირობუა. იეჰოვას ვაკო დღას თიცალ მუთუნ გუვაკეთათ, მუთ მეცილებნა. ქორენო იეჰოვაშ ნება, დინათათ? მუშო ოკო რაგად, ქო! (საქ. 2:38). ათეშენ, შეილებნა დარწმუნებულ რდათ, თიშ მითითებაშ მეჸუნა, ნამდა დინათათ, ჯგირობუას მოიღანა. ჯგირ ოჭკუმალიშ ჭკუმუას ვეგნოდვანდით-და, ნათუა მუშენ ოკო გინოდვათ?!

20. მუს გუვარჩიენთ უკულიან სტატიას?

²⁰ „მუშენ ვენათუქ?“. ნამთინექ შილებე თე კითხვას, თაშ უპასუხას: „დიო მზათ ვა ვორექ“. არგამა რე, იეჰოვაშა დუდიშ მეძღვინუა დო ნათუა, არძაშ უმოს მნიშვნელოვან გადაწყვეტილება რე, მუთ შილებე ადამიანქ ცხოვრებას მიღას. ათეშენ, ონდო თე გადაწყვეტილებას მიღენთ, მნიშვნელოვან რე, ჯგირო დეფიქრათ. თეწკუმა ართო, დრო დო მონდომა ხოლო რე საჭირო, ნამდა მზათ რდათ ნათუაშო. მარა თე ნაბიჯიშ გინოდგუმა მართალო მთელ გურით ქუგოკონან-და, მუჭო შეილებნა მემზადათ? თე კითხვაშ პასუხ უკულიან სტატიას იჸუაფ გარჩიებულ.