1, 2. ნათუაშო მზათ ვა რეთ-და, მუშენ ოკო ვეგიტახათ გურ? (ქოძირით სურათ გალენ გვერდის).

 ᲜᲐᲗᲣᲐ ქოილამნან-და, გვალო ჯგირ მიზან ნორღვენა. ქორეთო მზათ თეშო? მზათ ქორეთ დო უხუცესეფ ხოლო თაშ ქოფიქრენან-და, ვეგნოდვათ თე ნაბიჯიშ გინოდგუმა დო ხეშე ვა გუტუათ შესაძლებლობა, ნამდა დინათათ. დარწმუნებულ რდათ, თე ნაბიჯიშ გინოდგუმაშ უკულ, იეჰოვაშ მსახურებას კურთხევეფით ეფშა ცხოვრება გელნა.

² მარა ქოიწის, ნამდა ნათუაშახ დიო ხოლო მუდგარენ ნაბიჯეფიშ გინოდგუმა გოსაჭირნა დო თქვანით ხოლო ხვადუთ, ნამდა დიო ნათუაშო მზათ ვა რეთ-და, გურქ ვა გოიტირხან. მნიშვნელობა ვა უღჷ, მუ ასაკიშ რეთ, შეილებნა საჭირო ნაბიჯეფ გეგნოდგათ, ნამდა მზათ ქიჸუათ ნათუაშო.

3. მუ კითხჷ ეთიოპელ საჭურისიქ ფილიპეს დო მუ კითხვა რჩქინდუ? (საქ. 8:36, 38)

³ წეკითხით საქმეეფიშ 8:36, 38. ეთიოპელ საჭურისიქ ფილიპე მახარობელს კითხჷ: „მუ მოცილ დიბნათენ?“. თე კოჩის ნათუაშ სურვილ უღუდ, მარა მართალო ქორდუო მზათ თე მნიშვნელოვან ნაბიჯიშ გინადგუმალო?

4. მუჭო ოძირუ ეთიოპელ საჭურისიქ, ნამდა ოკოდ, უმოს რჩქინა მიღუკო?

⁴ ეთიოპელ საჭურის „იერუსალიმშა ღორონთიშ თაყვანიშ ოცემებელო რდჷ ულირ“ (საქ. 8:27). მუჭოთ იძირე, თე კოჩ იუდეველ პროზელიტ დო იუდაიზმიშ მიმაჸუნალ რდჷ. ათეშენ, თის ებრაულ წერილეფშე ბრელ მუდგარენ აჸიდ გაგებულ იეჰოვა ღორონთიშ გურშენ, მარა ოკოდ, ხოლო უმოს ქიგეგკო. თეს ჯგირო ოძირანს თი შემთხვევა, მუჟამსით ფილიპე მახარობელქ თის შარას ქეშეხვად დო ქოძირ, ნამდა მთელ ინტერესით კითხულენდჷ ესაიაშ წინასწარმეტყველებეფს  (საქ. 8:28). თე წინასწარმეტყველებეფ იშენდოიშენ ადვილ გასაგებ ვა რდჷ, თექ ტომბა აზრეფ ინოჭარუდ. თავრეშე იძირე, ნამდა ეთიოპელ საჭურის ვეგეჯერდუდ ძირითად საკითხეფიშ რჩქინას. თინა ოცადუდ, ქინანჭუკო წმინდა წერილეფს მოჩამილ სიტომბეეფს.

5. სოვრეშე იძირე, ნამდა ეთიოპელ კოჩ ნაგურეფუშ თანახმას მოქმედენდჷ?

⁵ თე ეთიოპელ კოჩ სახელმწიფო მოხელე რდჷ დო ეთიოპელეფიშ დედოფალიშ, კანდაკეშ, „მთელ განძ ობარუდ“ (საქ. 8:27). მუშო ოკო რაგად, თეშმადიდა თანამდებობაშ კოჩის ქიანაშ პასუხიშმგებლობა აღვენუდ, მარა იშენით გიმურთუნდჷ დროს იეჰოვაშ თაყვანიშცემას. თე კოჩ ხვალე ჭეშმარიტებაშ გურაფას ვეგეჯერდუდ, თინა ნაგურეფუშ თანახმას მოქმედენდჷ. ათეშენ, თიქ ეთიოპიაშე იერუსალიმშა მიდართჷ, ნამდა ტაძარს თაყვან ქოცუკო იეჰოვას. მუშო ოკო რაგად, თენა ბრელ დრო დო ხარჯის ითხინდკონ იჸიდ, მარა ეთიოპელ კოჩ მზათ რდჷ, ირფელ გაკეთკო, ნამდა იეჰოვას ქოცუკო თაყვან.

6, 7. მუჭო იმანგარენდჷ ეთიოპელ საჭურის იეჰოვა ღორონთიშ მიმართ ჸოროფას?

⁶ თე ეთიოპელ სახელმწიფო მოხელექ, ბრელ მნიშვნელოვან ჭეშმარიტება გეგჷ ფილიპე მახარობელშე. მაგალთო თიქ გეგჷ, მი რდჷ მესია (საქ. 8:34, 35). თე კოჩიშ გურს მანგარო შეხუ თიქ, მუთ იესოქ პირადო მუშო აკეთ. მუჭო მიქცუ თე ირფელიშ გაგებაშ უკულ? თის შეულებუდ ჸუჯშა ველეშქვუკო თე ირფელ დო კინ თეშ გაგრძელკო ცხოვრება, მუჭოთ იუდეველ პროზელიტ, მიდგას მანგარო აფასენდეს. მარა თეშ გინაწონს, ეთიოპელ საჭურისიქ გემანგარ იეჰოვაშ დო თიშ სქუაშ ჸოროფა. თექ გინაჭყვიდირაფუ, მიღუკო ნათუაშ გადაწყვეტილება დო გინირთუკო იესოშ მიმაჸუნალო, მუთ თიშ ცხოვრებას მანგარო დოთირანდჷ. ფილიპექ ქოძირ, ნამდა თე კოჩ მზათ რდჷ ნათუაშო დო ქოთ დონათ თინა.

⁷ ეთიოპელ საჭურისიშ მაგალით მიგეხვარებნა, მემზადათ ნათუშო. თე კოჩცალო, თქვა ხოლო გარაგადენა: „მუ მოცილ დიბნათენ?“. მორთ გუვარჩუათ, მუ ნაბიჯეფიშ გინოდგუმათ შეილებნა მიაჸუნათ თიშ მაგალითის. ეთიოპელ კოჩ ოცადუდ, უმოს რჩქინა მიღკო წმინდა წერილეფშე. თინა მოქმედენდჷ ნაგურეფუშ თანახმას დო იმანგარენდჷ იეჰოვა ღორონთიშ მიმართ ჸოროფას.

8. მუშ კეთებას ელამჩანა იოანეშ 17:3-ს მოჩამილ სიტყვეფ?

⁸ წეკითხით იოანეშ 17:3. შილებე იესოშ თე სიტყვეფქ გინგოჭყვიდირაფუეს, დიჭყითკო ბიბლიაშ გურაფა, მუჭოთ თექ ბრელიშ შემთხვევას მოხვად. მარა თე სიტყვეფით იესო თის ხოლო ელამჩანა, ნამდა მიბღათ უმოს რჩქინა, მუშენდა  დღას ვეშმალებენა, ბოლოშა გეფჩინებაფუათ ჭეშმარიტ ღორონთ (ეკლ. 3:11). მთელ მარადიულობაშ დინახალე დიბგურუანთ იეჰოვაშ გურშენ დო მუთ უმოსის გებგენთ თიშენ, თით უმოსო დევეახლოებუთ (ფსალმ. 73:28).

9. მუ ოკო ვაკეთათ ძირითად ბიბლიურ გურაფეფიშ გაგებაშ უკულ?

⁹ იეჰოვაშ გაჩინებაფა მარტივ ბიბლიურ გურაფეფიშ გაგებათ იჭყაფუ, მუთ პავლე მოციქულქ ებრაელეფშა მეჭარილ წერილს მიშინუ, მუჭოთ „ღორონთიშ წმინდა სიტყვაშ საფუძველეფ“. მუშო ოკო რაგად, თის უმნიშვნელოთ ვემურჩქინუ ძირითად გურაფეფ, უბრალოთ შეადარ ბჟას, ნამდგას ახალ დაბადებულ ბაღანას ჩანა (ებრ. 5:12; 6:1). თეს გეძინელ, თიქ არძა ქრისტიანს ელუჩ, ვეგეჯერდესკო თი რჩქინას, მუთ დუდშე მიღეს დო გაგრძელესკო ღორონთიშ სიტყვაშ სიტომბეეფშა ინონჭაფა. ვეგეჯერდათ ძირითად ბიბლიურ გურაფეფიშ რჩქინას. საჭირო რე, გიღდან თიშ ძალიერ სურვილ, ნამდა უმოს გეგათ იეჰოვაშ დო თიშ განზრახვეფიშ გურშენ.

10. მუშენ ვა რე ნამთინეშო გურაფა ადვილ?

¹⁰ ბრელშო გურაფა ვა რე ადვილ საქმე. მუშ რაგად შილებე თქვანდე? ქოიჸორდესო სკოლას წიგნეფიშ კითხირ დო გურაფა? ამდღა ქორენო გურაფა თქვანო სასიამოვნო პროცეს დოვარ პირიქით, გურ ვემგალენა თიშა? თაშ ქორენ-და, თქვა ხვალე ვა რეთ. იეჰოვას შეულებ თქვან მოხვარა. თინა სრულყოფილ დო არძაშე უჯგუშ მასწავლებერ რე.

11. მუ ოძირანს, ნამდა იეჰოვა დიდებულ მოძღვარ რე?

¹¹ იეჰოვა მუშ დუდის მიშინუანს, მუჭოთ „დიდებულ მოძღვარს“ (ეს. 30:20, 21). თინა მუშ მოსწავლეეფიშ ჯგირს ოკვირ. იეჰოვა გაგებიერ მასწავლებერ რე, გიმირჩქინას მოთვინებას დო სიკეთეს (ფსალმ. 130:3). თინა დღას ვეთხინს ჩქინდე თიშე უმოსის, ვინემ შემლებნა. იეჰოვაქ გაჭყჷ ჩქინ ტვინ დო ინომდვეს სურვილ, ნამდა დიბგურუათ (ფსალმ. 139:14). ჩქინ დიდებულ გუმაჭყაფალს ოკო, მთელ მარადიულობაშ დინახალე ბგურაფლენდათ დო სიამოვნებას ბღებულენდათ თე პროცესშე. ათეშენ, გონივრულ იჸუაფ, ამდღარშე ქიპჸოროფუათ ბიბლიურ ჭეშმარიტება (1 პეტ. 2:2). გიღდან თიცალ მიზნეფ, ნამდგაშ მენჭირნაფა შეგალებენა დო რეგულარულო იკითხით დო გეგმირკვით ბიბლია (იეს. 1:8). იეჰოვა მიგეხვარებნა, დროშ მიკულაწკუმა ართო კითხირქ დო გურაფაქ უმოს სიამოვნება მოიღან.

12. მუშენ ოკო გიმიბრკუათ იესოშ ცხოვრება დო მსახურება?

¹² რეგულარულო გეგმურთით დრო იესოშ ცხოვრება დო მსახურებაშე ფიქრის, მუშენდა იესოშ მაგალითიშ მეჸუნა მიგეხვარებნა, ართგურო ემსახურათ იეჰოვას თე განსაკუთრებულო რთულ პერიოდის (1 პეტ. 2:21). იესოქ მუშ მოწაფეეფს უწუ, მუ სირთულეეფს შეხვადუდეს (ლუკ. 14:27, 28). მარა თინა დარწმუნებულ რდჷ, ნამდა მუშ ჭეშმარიტ მიმაჸუნალეფს შეიალებედეს გიორჯგინესკო თე სირთულეეფს, მუჭოთ თენა მუქ აკეთ (იოან. 16:33). თაშ ნამდა, უმოს მეტ გეგმირკვით იესოშ ცხოვრებაშ გურშენ დო მიზანო გიღდან, თქვან ირდღაშიან ცხოვრებას მიაჸუნათ თიშ მაგალითის.

13. მუ ოკო თხუათ იეჰოვას დო მუშენ?

¹³ უბრალოთ რჩქინაშ მეღება დღას ვა რე დასაბაღ. რჩქინა თიშენ მოსაჭირნა, ნამდა უმოს ქიგებგათ იეჰოვაშ გურშენ დო გუვავითარათ თიშ მიმართ ჸოროფა დო რწმენა (1 კორ. 8:1—3). გურაფაშ დროს ქოთხით იეჰოვას, ქიმგეხვარან, გიღდან უმოს რწმენა (ლუკ. 17:5). თინა ირიათო პასუხენს თეცალ ლოცვეფს. ნამდვილ რწმენა გერსხილ რე ჩქინ ღორონთიშ გურშენ ზუსტ რჩქინაშა, მუთ მიგეხვარებნა, გეგნოდგათ საჭირო ნაბიჯეფ (იაკ. 2:26).

14. მუჭო ოძირუ მოციქულ პეტრექ, მუსხით მნიშვნელოვან რე ნაგურეფუშ თანახმას მოქმედება? (ქოძირით სურათ).

¹⁴ თიშ ოძირაფალო, მუსხით მნიშვნელოვან რე ქრისტეშ მიმაჸუნალეფშო ნაგურეფუშ თანახმას მოქციება, მოციქულ პეტრექ ბიბლიაშე ნოეშ შემთხვევა მიშინუ. იეჰოვაქ ნოეს უწუ, ნამდა წარღვნათ განადგურენდჷ თიმ დროს მახორუ უბადო ხალხის. მარა უბრალოთ თიშ რჩქინა, ნამდა წარღვნა ქუმოხვადუდ, განადგურებაშე ვერსხენდჷ ნოეს დო თიშ ოჯახის. საჭირო რდჷ მოქმედება. ყურადღება ქიმიაქცით, პეტრე იჩიებუდ თი პერიოდშე, ონდო წარღვნა მოხვადუდ დო „სოიშახ კიდობან იშენებუდ“ (1 პეტ. 3:20). არგამა რე, ნოე დო მუშ ოჯახიქ მიქცუ თიშ თანახმას, მუთ იეჰოვაშე აფდეს გაგებულ დო აშენეს ქიანაშმადიდა კიდობან (ებრ. 11:7). უკულ პეტრექ კიდობანიშ შენება შეადარ ნათუას დო თეცალ სიტყვეფ თქუ: „თეცალ რე ნათუა ხოლო, ნამუთ თქვან რსხებას ომსახურ“ (1 პეტ. 3:21). შილებე ფთქუათ, ნამდა ნათუაშო მომზადება მოგენს თი სამშენებლო პროცესის, ნამდგას ნოე დო მუშ ოჯახ წანეფიშ დინახალე ღებულენდეს მონაწილებას. მუ ოკო აკეთათ, ნამდა მემზადათ ნათუაშო?

15. მუს ნიშნენს მთელ გურით მონანიება?

¹⁵ ნათუაშო მზათ ვორდათინ, ართ-ართ მუთ ოკო ვაკეთათ თინა რე, ნამდა ალალას მიმნანუათ ჩქინ ცოდვეფ. მუჟამსით მთელ გურით მიმნანიენთ დაშებულს, თენა მიმეხვარებნა, გუვაკეთათ საჭირო ცვლილებეფ. ქუგაფნანო ჩათხინაფილ თი ირფელ, მუდგას იეჰოვა ვეწონუანს? მაგალთო, მუნერით რე: უზნეო ცხოვრება, სიგარეტიშ შუმა ვარდა გლახა სიტყვეფიშ რაგად (1 კორ. 6:9, 10; 2 კორ. 7:1; ეფეს. 4:29). თე ირფელშა დუდიქ დიო ხოლო ვადგარსხებეს-და, ვემიოტუათ ბრძოლა თინეფიშ ჩათხინაფალო. ქუდურაგადეთ ბიბლიაშ მასწავლებერს ვარდა ქოთხით კრებაშ უხუცესეფს, ქიმგეხვარან დო რჩევეფ ქიმერჩან. ახალგაზრდა ქორეთ დო მშობლეფწკუმა ართო ქოცხოვრენთ-და, ქოთხით თინეფს, ქიმგეხვარან გლახა ჩვევეფიშ ჩათხინაფას, ნამდგაქ შილებე გეცილან ნათუას.

16. მუ მიშურს სულიერ განრიგიშ მეჸუნაშა?

¹⁶ მნიშვნელოვან რე, გიღდან ჯგირ სულიერ განრიგ, მუდგაშა მიშურს კრებაშ შეხვალამეფიშ დასწრება დო თინეფს  მონაწილებაშ მეღება (ებრ. 10:24, 25). მუჟამსით მოუნათლავ მაუწყებელო გინირთუთ, ირნერო ეცადით, რეგულარულო იმსახურათ. მუთ უმოს ხშირას მიღენთ მონაწილებას სამქადაგებლო საქმეს, თით უმოს ხიოლ გაღვენუნა (2 ტიმ. 4:5). ახალგაზრდეფ, ქოკითხით თქვან დუდის: „მშობლეფ გუმოშინანანო კრებაშ შეხვალამეფშა დასწრებას დო მსახურებას მონაწილებაშ მეღებას, დოვარ ჩქიმით ვორთუქ თეს?“. თე ირფელს თქვანით ქართუთ-და, ოძირანთ, ნამდა გიღნა იეჰოვაშ რწმენა, გიჸორა თინა დო მარდულ რეთ თიშ. თენა რე ღორონთშო მოსაწონ საქმე, ნამდგას თიშო ორთუთ (2 პეტ. 3:11; ებრ. 13:15). ირფელ, მუდგას იეჰოვაშო დანძალებაშ უმშო დო ხიოლით ვორთუთ, გურს უხარენს ჩქინ ღორონთის (ქეშუდარით 2 კორინთელეფიშ 9:7). თე ირფელიშ კეთებას ხიოლ მოუღ ჩქინდა ხოლო.

17, 18. მუ მიგეხვარებნა, ვემიოტუათ წიმი ულა ნათუაშო დო მუჭო? (იგავ. 3:3—6)

¹⁷ ნათუაშო მომზადებაშ დროს სირთულეეფს ხოლო ქეშეხვადუთ. მაგალთო, ნამთინექ შილებე ქიგგაძიცუან, ქიგეწინააღმდეგან ვარდა თხოზინ ქუდოიჭყან თქვან ახალ რწმენაშ გურშენ (2 ტიმ. 3:12). ხოლო ართ სირთულე შილებე თინა რდას, ნამდა გიჭირდან გლახა ჩვევეფიშ ჩათხინაფა. თეს გეძინელ, შილებე გურგოტახილ რდათ, მუშენდა მიგორჩქუდან, ნამდა ნათუაშა დიო ხოლო ბრელ მეიძნა. მუ მიგეხვარებნა, მერუათ თე ირფელს? არძაშ უმოს მთავარ — იეჰოვაშ ჸოროფა.

¹⁸ იეჰოაშ მიმართ ჸოროფა, არძაშ უჯგუშ მუდგარენ რე, მუთ გიღნა (წეკითხით იგავეფიშ 3:3—6). ღორონთიშ ძალიერ ჸოროფა მიგეხვარებნა, გიორჯგინათ ნებისმიერ სირთულეს. ბიბლიას ბრელშა რე მოშინაფილ თი ართგურ ჸოროფა, ნამდგას იეჰოვა მუშ მსახურეფიშ მიმართ გიმირჩქინას. თე ძალიერ გრძნობა ოხვარ თის, დღას ვა ურთინუანს ოჭიშ მუშ მსახურეფს დო ირიათო უჸორდას თინეფ (ფსალმ. 100:5). ჩქი ღორონთიშ ამნახანტო ვორეთ გოჭყაფილ (დაბ. 1:26). მუჭო შემლებნა გიმიფრჩქინათ თიცალ ჸოროფა, მუნერსით იეჰოვა გიმირჩქინანს?

19. მუჭო შეილებნა მარდულ რდათ თი ირფელშო, მუდგას იეჰოვა პირადო თქვანო ორთჷ? (გალ. 2:20)

¹⁹ გეგმირჩქინით მარდულობა (1 თეს. 5:18). ირდღას ქოკითხით თქვან დუდის: „მუჭო მოძირუ იეჰოვაქ, ნამდა ვუჸორქ?“. უკულ ლოცვას კონკრეტულო ქიმიშინეთ თი ირფელ, მუთ იეჰოვაქ თქვანო აკეთ დო მუდგაშ გურშენ მარდულ რეთ. ქეცადით,  იეჰოვაშ კეთებულ საქმეეფს, ქოძირათ პირადო თქვანო გიმორჩქინელ ჸოროფა, მუჭოთ თენა მოციქულ პავლექ აკეთ (წეკითხით გალატელეფიშ 2:20). დეფიქრით, მუჭო შეილებნა იშო ხოლო გიმირჩქინათ იეჰოვაშ მიმართ ჸოროფა. ღორონთიშ ჸოროფა მიგეხვარებნა, გიორჯგინათ ცდუნებეფს დო სირთულეეფს. თეს გეძინელ, გოირჩქინანა სურვილს, მიაჸუნათ სულიერ განრიგის დო თეშნერო ირდღას ქაძირუათ თქვან ზეციერ მუმას, ნამდა მანგარო გიჸორა თინა.

20. მუ მიშურს დუდიშ მეძღვინუაშა დო მუშენ რე თენა მნიშვნელოვან გადაწყვეტილება?

²⁰ დროშ მიკულაწკუმა ართო, იეჰოვაშ ჸოროფა გოირჩქინანა სურვილს, ლოცვას დუდ მეუძღვინათ თის. დღას ვაგგოჭყორდან, მუჟამსით დუდის უძღვინენთ იეჰოვას, გერზიებნა დიდებულ შესაძლებლობა — მარადიულო ოკუთვნუდათ თის. დუდიშ მეძღვინუათ იეჰოვას პირობას არზენთ, ნამდა თქვან ცხოვრებას მუდგაქ ვა მოხვადასინ, ირიათო თიშ ართგურ იჸით. იეჰოვაშა დუდის მეძღვინუა ცხოვრებას ხვალე ართშა ხვადუ. ათეშენ, თენა მანგარ სერიოზულ ნაბიჯ რე. დეფიქრით ართ მუდგარენშე: ცხოვრებას ბრელ გადაწყვეტილებას ღებულენთ, მარა იეჰოვაშა დუდიშ მეძღვინუაშ უჯგუშ გადაწყვეტილება ვა არსებენს! (ფსალმ. 50:14). თქვან ძალიერ ნტერ, სატანა, ირფელს გაკეთენს, ნამდა მიგოდინაფუან ზეციერ მუმაშ მიმართ ჸოროფა დო ართგურობა. დღას ვემეჩათ თის თეშ უფლება! (იობ. 27:5). იეჰოვაშ მიმართ ძალიერ ჸოროფა მიგეხვარებნა, შეასრულათ მეძღვინუაშ დროს თიშა მეჩამილ პირობა დო უმოსო დეახლოვათ თქვან ზეციერ მუმას.

21. მუშენ შემლებნა ფთქუათ, ნამდა ნათუათ მუთუნ ვეთებ?

²¹ მუჟამსით დუდის მეუძღვინენთ იეჰოვას, ქუდურაგადეთ თქვან კრებაშ უხუცესეფს დო ქუწით, ნამდა გოკონა, გეგნოდგათ უკულიან მნიშვნელოვან ნაბიჯ დო დინათათ. ირიათო რშუდან, ნათუათ მუთუნ ვეთებ, პირიქით ახალ ცხოვრება იჭყაფუ. თქვა იჭყანთ თიცალ ცხოვრებას, ნამუთ მერჩანა საშვალებას, მარადიულო ემსახურათ იეჰოვას. თაშ ნამდა, ამდღარშე გემანგარით თქვან ზეციერ მუმაშ მიმართ ჸოროფა დო გიღდან თიცალ მიზნეფ, მუთ მიგეხვარებნა ირდღას უმოსო დო უმოსო ქიჸოროფუათ იეჰოვა. თე ირფელ მიგეხვარებნა, დინათათ. ნათლობაშ დღა არძაშ უმოს მნიშვნელოვან დღა იჸუაფ, მუშენდა ახალ ცხოვრებას იჭყანთ. მთელ მარადიულობას გამანგარებედას თქვან ჸოროფა იესო დო იეჰოვაშ მიმართ!