1, 2. ა) მის ოხუ მათეშ 24:12-ს ინოჭარილ იესოშ სიტყვეფი? ბ) მუჭო იძირე საქმეეფიშ წიგნშე, ნამდა ბრელ ქრისტიანს ვა უდინუაფ ღორონთიშ ჸოროფა? (ქოძირით სურათ თე გვერდის).

იესოქ თქუ, ნამდა „ბრელს ჸოროფა მეუდინუდ“ დო თენა იჸუაფუდ „ქვეყნიერებაშ აღსასრულიშ“ ართ-ართ ნიშან (მათ. 24:3, 12). პირველ საუკუნეს, ებრაელეფს, მიდგას ღორონთიშ ხალხო მიორჩქუდ დუდი, მეუდინეს ღორონთიშ ჸოროფაქ.

² მარა თი დროს ქრისტიანეფიშ უმენტაშ აქტიურო ქადაქენდ „სახიოლო ამბეს ქრისტეშ გურშენ“ დო გიმირჩქინანდ ღორონთიშ, თანაქრისტიანეფიშ დო შხვეფიშ ჸოროფას (საქ. 2:44—47; 5:42). თინეფიშ გინაწონს, პირველ საუკუნეს, ნამთინე ქრისტიანს ჸოროფაქ მეუდინ.

3. მუ შილებე ჸოფედკო თიშ მიზეზ, ნამდა ნამთინე ქრისტიანს ჸოროფაქ მეუდინ?

³ იესო ქრისტექ ეფესოს მახორუ პირველ საუკუნეშ ქრისტიანეფშენ თეცალ სიტყვეფ თქუ: „სქან წინააღმდეგ თინა მიღუ, ნამდა მიოტე დუდშეიან ჸოროფა“ (გამოცხ. 2:4). მუ შილებე ჸოფედკო თეშ მიზეზი? თე ქრისტიანეფ შილებე თიშნერ ხალხიშ გავლენაშ  თუდო ჸოფედესკო, მით ხვალე მუნეფიშ სიამოვნებაშენ ფიქრენდ (ეფეს. 2:2, 3). მუჭოთ ამდღა ბრელ დიდ ქალაქინ თეშ, პირველ საუკუნეშ ეფესო უბადობათ რდუ ეფშა. თინა მდიდარ ქალაქ რდუ, სოდეთ ხალხ ხვალე ქონებაშ შაყარუაშენ, გართობა დო კომფრტულ ცხოვრებაშენ ფიქრენდ. თექ უზნეობა რდუ გავრცელებულ. თექიან მაცხოვრებელ ხალხის ვა უჸორდ ღორონთი დო ხვალე მუნეფიშ ეგოისტურ კორნებეფიშ დაკმაყიფილებაშა რდეს გინულირ.

4. ა) მუშენ უდინუ ამდღა ხალხის ჸოროფა? ბ) ნამ სუმ მხარეს გიმიცადებ ჩქინ ჸოროფა?

⁴ იესოშ წინასწარმეტყველება ჸოროფაშ დინაფაშენ, ჩქინ დროს ხოლო ოხუ. ხალხის ამდღა დროშ მიკულაწკუმა ართო ღორონთიშ ჸოროფა უმოსო უდინუ. მილიონობით ხალხიქ ოჭიშ ქურთინუ ღორონც დო იმენდ უღუ, ნამდა ხალხიშ შექმნილ ორგანიზაციეფი მაგვარენა თინეფიშ პრობლემეფს. ათეშგურშენ, იეჰოვა ღორონთის ვამსახურუნ თი ხალხის უმოსო უდინუ თიშ ჸოროფა. მუჭოთ პირველ საუკუნეშ ეფესოშ ქრისტიანეფიშ მაგალითშე იძირენ, შილებე ართგურ ქრისტიანეფქ ხოლო თვითკმაყოფილეფქ იჸუან დო ჭიჭე-ჭიჭეთ მეუდინან ჸოროფაქ. თე სტატიას გუვარჩიენთ სუმ მხარეს, სოდეთ გეგმიცადებუ ჩქინ ჸოროფა: 1) იეჰოვაშა, 2) ბიბლიურ ჭეშმარიტებაშა დო 3) და დო ჯიმალეფშა.

5. მუშენ ოკო მიღუდან ღორონთიშ ჸოროფა?

⁵ მუჟამსით, იესოქ გაფრთხილ მოწაფეეფ, ნამდა ხალხის ჸოროფა მეუდინუდუნ, თიქ არძაშ უმოს მნიშვნელოვან ჸოროფაშენ ხოლო გამახვილ ჸურადღება დო თქუ: „გიჸორდას იეჰოვა, სქან ღორონთი, მთელ გურით, მთელ შურით დო მთელ გონებათ. თენა რე პირველ დო უდიდაშ მცნება“ (მათ. 22:37, 38). ნამდვილო, ღორონთიშ ჸოროფა მიმეხვარებნა, გეგმიფრჩქინათ მოთვინება, დეფცვათ იეჰოვაშ მითითებეფ დო ბჯოგუდან თინა, მუთ გლახა რე (წეკითხით ფსალმუნები 97:10). მარა სატანა დო თიშ ქიანა ოცადუნა, მემდინუან ღორონთიშ ჸოროფა.

6. მუ მოჸუნს ღორონთიშ ჸოროფაშ დინაფას?

⁶ თე ქიანას ხალხის დამახინჯებულ წარმოდგენა უღუ ჸოროფაშ გურშენ. კათას მუნეფიშ დუდ უმოსო უჸორს, ვინემ გუმაჭყაფალ (2 ტიმ. 3:2). ქიანას, ნამუშ მართველ სატანა რენ, პირველ ადგილს გერე „ხორციშ კორნება, თოლიშ კორნება დო ქონებათ ცქვაფა“ (1 იოან. 2:16). მოციქულ პეტრექ გაფრთხილ თანაქრისტიანეფ, მუ მოჸუნს ხორციშ კორნებეფიშ დაკმაყოფილებას დო უწუ: „ხორციელშენ ფიქრი ღურას ნიშნენს . . . მუშენდა ხორცი ვა მორჩილ ღორონთიშ კანონს დო ვართ დემორჩილებ“ (რომ. 8:6, 7). ნამდვილო, თინეფს, მით ხვალე ფარაშ კეთებაშენ დო სექსუალურ კორნებეფიშ დაკმაყოფილებაშენ ფიქრენდესინ, საბოლათ გურქ გუტირხეს (1 კორ. 6:18; 1 ტიმ. 6:9, 10).

7. მუ საფრთხეს შეთმოხვადუნა ქრისტიანეფ ამდღა?

⁷ ნამთინე ქიანას ათეისტეფი, აგნოსტიკოსეფი დო ევოლუციონისტეფი თიცალ იდეეფს ავრცელენა, ნამუთ ხვალე ღორონთიშ ჸოროფას ვარინ, თიშ რწმენას ხოლო უდინუნას ხალხის. თინეფ არწმუნენა ბრელს, ნამდა პიროვნება გურუგუჩამ ვარდა ურჩქინჯ ოკო რდას, ღორონთიშ არსებობა ქიდეჯერასინ. თეწკუმა ართო, ხალხი მეცნიერეფს მეტ პატის ცენს, ვინემ ღორონც (რომ. 1:25). თეცალ გურაფეფს ჸუჯის ქუვოთხინთ-და, შილებე მივოტუათ იეჰოვა დო მემდინან თიშ ჸოროფაქ (ებრ. 3:12).

8. ა) მუნერ გურიშ გუმატახალ სიტუაციეფს შეთმოხვადუ იეჰოვაშ ხალხი ამდღა? ბ) მუშა მარწმუნენა 136 ფსალმუნი?

⁸ გურიშგოტახუას შეულებ დასუსტას ჩქინ რწმენა დო საბოლათ გვალო მემდინან ღორონთიშ ჸოროფაქ. სატანაშ ქიანას,  მინშა არძა შეფხვადუთ თიცალ სიტუაციეფს, ნამუთ გურს მიტახნა (1 იოან. 5:19). შილებე ამდღა თიცალ პრობლემეფიშ წოხოლე გივორდათ, ნამუთ დაკავშირებულ რე ხანშამიშულაწკუმა, გლახა ჯანმრთელობაწკუმა დო უფარობაწკუმა. შილებე უღირსობაშ გრძნობა მიღუდან, მუდგას ველდით თიქ ვაგამმართლეს ვარდა მუდგარენშა ვემმანჭირნეს. მარა დღას ოკო ვემეფჩათ საშვალება თეცალ სიტუაციეფს, მოფიქრებაფუან, ნამდა იეჰოვაქ მიმოტუეს. თეშ მანგიორო, ჩქი ოკო იფიფქრათ თი სიტყვეფშენ, ნამუთ მარწმუნენა, ნამდა იეჰოვას ვუჸორთ. თეცალ სიტყვეფს შეფხვადუთ ფსალმუნებიშ 136:23, სოდეთ ჭარ: „თიქ, მიდგაქ ქუგომშინეს, მუჟამსით დამდაბლებულ ვორდით, მუშენდა მარადიულ რე თიშ სიკეთე“. ნამდვილო, იეჰოვა ირიათო გიმირჩქინანს სიკეთეს მუშ მსახურეფწკუმა. ათეშგურშენ, შემლებნა დარწმუნებულ ვორდათ, ნამდა იეჰოვა ირჩქილე ჩქინ „ხვეწინს“ დო პასუხენს თის (ფსალმ. 116:1; 136:24—26).

9. მუ ოხვარუდ პავლეს, ვადინუკო ღორონთიშ ჸოროფა?

⁹ ფსალმუნმაბირეცალო, პავლეს ძალას არზენდ თიშე დაფიქრება, მუჭო ელურდ იეჰოვა თის ირიათო. პავლექ ჭარ: „იეჰოვა რე ჩქიმ მოხვარე, ვამაშკურნე. მუს ბღოლანს კოჩ?“ (ებრ. 13:6). თინა დარწმუნებულ რდუ, ნამდა იეჰოვას უჸორდ დო თენა ოხვარუდ, გურზუკო პრობლემეფს. რთულ სიტუაციეფიშ დროს პავლე დუც ვადვანდ დო ვადინუანდ ღორონთიშ რწმენას. თიქ ციხეს რდუნ თეშ მუსხირენ გურიშემაკინალ წერილ ჭარ (ეფეს. 4:1; ფილ. 1:7; ფლმ. 1). არძაშ უმოს რთულ სიტუაციას ხოლო პავლე ვადინუანდ ღორონთიშ ჸოროფას. მუ არზენდ თის ძალას? პავლეს იმენდ უღუდ, ნამდა „ირნერ გურიშ ექექაფაშ მუმა, ნამუთ ირნერ გასაჭირს ემქექუანა“, ქიმეხვარებუდ (2 კორ. 1:3, 4). მუჭო შემლებნა მივაჸუნათ პავლეშ მაგალითის დო ვა ვოდინუათ იეჰოვაშ ჸოროფა?

10. მუ მიმეხვარებნა, ვა ვოდინუათ იეჰოვაშ ჸოროფა?

¹⁰ პავლექ მიშინუ ართ-ართ ძირითად საშვალება, ნამუთ მიმეხვარებნა ვა ვოდინუათ იეჰოვაშ ჸოროფა. თიქ თანაქრისტიანეფს მეჭარ: „ვემიოტუათ ლოცვა“. უმოს გვიანო ხოლო თიქ ჭარ: „ირიათო ილოცით“ (1 თეს. 5:17; რომ. 12:12). ღორონთწკუმა ხოლოშიან ურთიერთობაშო აუცილებერ რე ლოცვა (ფსალმ. 86:3). მუჟამსით დროს გიმურთუნთ თის, ნამდა იეჰოვას ლოცვათ გურ გეგნუფაფჩათ დო ქუწუათ მუს ბგინაფლენთინ, შილებე სიტუაციაქ ვამათირუან, მარა თეთ უმოსო დევეახლოებუთ „ლოცვეფიშ მუმარჩქილაფარ“ ჩქინ ზეციერ მუმას (ფსალმ. 65:2). თეშ გარდა, მუჟამსით ვორწყეთ, იეჰოვა ჩქინ ლოცვეფს პასუხენსინ, თინა უმოსო მეჸოროფებნა. თე დროს ჩქი უმოსო მეფხვადუთ, ნამდა „იეჰოვა ხოლოს რე არძაწკუმა, მიდგა თხულენს თის“ (ფსალმ. 145:18). თიშ იმენდი, ნამდა იეჰოვა ქელამდირთუნა, მიმეხვარებნა გურზათ რწმენაშ გამოცდეფს, ნამუთ წოხლე მელნა.

11, 12. მუჭო შემლებნა ქიპჸოროფუათ ბიბლიურ ჭეშმარიტება?

¹¹ მუჭოთ იეჰოვაშ მსახურეფ, ჩქი ვაფასენთ დო მიჸორა ჭეშმარიტება, ნამუთ ღორონთიშ სიტყვაშე მოურს. ზეციურ მუმაწკუმა ლოცვაშ დროს იესოქ თქუ: „სქან სიტყვა ჭეშმარიტება რე“ (იოან. 17:17). ჭეშმარიტება ქიპჸოროფუათინ თიშენ, ღორონთიშ სიტყვაშ ზუსტი რჩქინა ოკო მიბღათ (კოლ. 1:10). მარა თეშო ხვალე ზერელე რჩქინაშ მეღება ვარე დასაბაღ. დეფიფქრათ, მუჭო მოხვარნა ღორონთიშ შურით ნაჭარა 119 ფსალმუნი დო ქიგებგათ, მუს ნიშნენს, მიჸორდან ბიბლიურ ჭეშმარიტება (წეკითხით ფსალმუნები 119:97—100). დღაშ დინახალე, დრო ოკო გეგმურთათ თიშე ფიქრის, მუდგას ბიბლიას პკითხულენთ. ბიბლიურ ჭეშმარიტება უმოსო ქიმეჸოროფებნა,  მუჟამსით დეფიფქრებუთ, მუჭო მოხვარნა თიშ გიმორნაფა ჩქინ ცხოვრებას.

¹² ფსალმუნმაბირექ ჭარ: „მუ ჰამო რე სქან სიტყვა ჩქიმო, თოფურშე უმოს ჰამო რე თინა ჩქიმ პიჯშო!“ (ფსალმ. 119:103). თეგვარო, ჩქი ხოლო შემლებნა იბსიამოვნათ ბიბლიაშა გერსხილ სულიერ საკვებიშ მეღებათ, ნამუსით ღორონთიშ ორგანიზაცია მარზენა. დროს გეგმურთუნთ თე ირფელიშ კითხირს დო დაფიქრებას-და, ვაგმოჭყორდუნა ბიბლიურ ჭეშმარიტებაშ „სასიამოვნო სიტყვეფი“ დო გეგმიბრინუანთ თის, ნამდა შხვეფს ქიმვეხვარათ (ეკლ. 12:10).

13. მუქ მეხვარ იერემიას ქიჸოროფუკო ბიბლიურ ჭეშმარიტება დო მუჭო იმოქმედ თექ თიშ გურს?

¹³ წინასწარმეტყველ იერემიას უჸორდ ბიბლიურ ჭეშმარიტება. ქიმვაქცუათ ყურადღება, მუჭო იმოქმედ თიშ გურს ღორონთიშ სიტყვაქ. „მიბღი სქან სიტყვეფი დო ოპჭკუმ თინეფი; სქან სიტყვა ჩქიმ ხიოლ რე, გურიშ ხიოლ, მუშენდა სქან სახელ გებძუ, იეჰოვა, ლაშქართა ღორონთი“ (იერ. 15:16). იერემია ფიქრენდ ღორონთიშ ძვირფას სიტყვეფშენ დო თე გაგებათ ჭკუმუნდ თიშ სიტყვეფს. თინა მარდულ რდუ თიშ, ნამდა უღუდ პატი ღორონთიშ სახელ გეძუდკო. ბიბლიურ ჭეშმარიტებაშ ჸოროფა მიმეხვარებნა, ჩქინო ხოლო პატი რდას ღორონთიშ სახელი გებძუნან თინა დო თე ბოლო დღალეფს იფქადაქათ თიშ სამეფოშ გურშენ.

14. მუჭო შემლებნა უმოსო ქიპჸოროფუათ ბიბლიურ ჭეშმარიტება?

¹⁴ ბიბლიაშ დო თიშა გერსხილ პუბლიკაციეფიშ კითხირიშ მეტ, ხოლო მუ მიმეხვარებნა უმოსო ქიპჸოროფუათ ბიბლიურ ჭეშმარიტება? თეს კრებაშ შეხვალამეფშა დასწრება მიმეხვარებნა. ჩქი რჩქინას ბღებულენთ, მუჟამსით „გინაჯინალ კოშკიშ“ მოხვარათ, ირ მარას გენიფხილენთ ბიბლიას. ათეშგურშენ ჯგირო ოკო მუვამზადათ „გინაჯინალ კოშკიშ“ ირ სტატია, ნამუსით კრებაშ შეხვალამას გენიფხილენთ, ნამდა ქენვანჭათ თექ მოჩამილ თემას. თეშო საჭირო რე თექ მოჸუნაფილ არძა ბიბლიურ მუხლიშ ძირაფა დო კითხირ. შეილებნა გეგნოჭარათ „გინაჯინალ კოშკი“ ვებ-გვერდშე jw.org ვარდა აპლიკაცია JW ბიბლიოთეკა შხვადოშხვა ნინაშა. ნამთინე ელექტრონულ ფორმატ საშვალებას  მარზენა ხეთეშე დობგორათ ციტირებულ მუხლეფი თითოულ ოგურაფალ სტატიას. ვა უღუ მნიშვნელობა, ნამ მეთოდის გიმიბრინუანთ, მარა თე მუხლეფიშ კითხირ დო თიშე დაფიქრება უმოსო ქომჸოროფუანა ბიბლიურ ჭეშმარიტებას (წეკითხით ფსალმუნები 1:2).

15, 16. ა) მუჭოთ იოანეშ 13:34, 35 მუხლეფშე იძირენ, მუ მეთხიებუ ღორონთიშ ხალხის? ბ) მუჭო რე დაკავშირებულ და დო ჯიმალეფიშ ჸოროფა ღორონთიშ დო ბიბლიაშ ჸოროფაწკუმა?

¹⁵ იესოქ ღურაშ წოხოლენ სერს მუშ მოწაფეეფს უწუ: „ახალ მცნებას გარზენთ: გიჸორდან ართიან. მუჭო მა გიჸოროფეთ თეშ გიჸორდან თქვა ხოლო ართიან. ჩქიმ მოწაფეეფ რეთინ თის, თით გეგენა, ნამდა ართიანიშ ჸოროფა გაღვენუნა“ (იოან. 13:34, 35).

¹⁶ და დო ჯიმალეფიშ დო იეჰოვაშ ჸოროფა ართმაჟიაწკუმა რე დაკავშირებულ. ნამდვილო, და დო ჯიმალეფ ვამიჸორან-და, იეჰოვაშ ჸოროფა ხოლო ვამაღვენუნა. მოციქულ იოანექ ჭარ: „მიდგას მუშ ჯიმა ვა უჸორს, ნამუსით ორწყე, ვეშიალებე უჸორდას ღორონთი, ნამუსით ვარწყე“ (1 იოან. 4:20). ხოლო უმოს, იეჰოვაშ დო და დო ჯიმალეფიშ ჸოროფა ბიბლიაშ ჸოროფაწკუმა რე დაკავშირებულ. თენა მნიშვნელოვან რე, მუშენდა ბიბლიურ ჭეშმარიტებაშ ჸოროფა მოხვარნა დეფცვათ ღორონთიშ სიტყვას მოჩამილ მითითება, ნამდა მთელ გურით მიჸორდან ღორონთი დო და დო ჯიმალეფი (1 პეტ. 1:22; 1 იოან. 4:21).

17. მუჭო შემლებნა და დო ჯიმალეფიშ ჸოროფაშ გიმორჩქინა?

¹⁷ წეკითხით 1 თესალონიკელები 4:9, 10. მუჭო გიმიფრჩქინათ ჸოროფა კრებაშ წევრეფშა? შემლებნა შხვადოშხვა საშვალებათ ქიმვეხვართ ჩქინ და დო ჯიმალეფს. მაგალთო, შილებე ხანშამიშულირ დას ვარდა ჯიმას ოსაჭირუდას მანქანათ ჸუნაფა კრებაშა, ვარდა ხვალახე დას მუდგარენ აფუდას ოკეთებელ მუშ ჸუდეს (იაკ. 1:27). და დო ჯიმალეფს, ახალგაზრდა იჸი დო ვარ ხანშამიშულირ, მიდგას გურ აფუნა გოტახილ, დეპრესიას რენა ვარდა შხვა პრობლემაშ წოხოლე გერენან, ჩქინ ყურადღება დო გურიშ ექექაფა ოსაჭირნა (იგავ. 12:25; კოლ. 4:11). შემლებნა სიტყვეფით დო საქმეეფით ვოძირათ, ნამდა მიჸორა და დო ჯიმალეფი დო ფიფქრენთ თინეფშე, „მით რწმენათ ჩქინიან რე“ (გალ. 6:10).

18. მუ მიმეხვარებნა მუვაგვარათ ართიანწკუმა პრობლემეფი?

¹⁸ ბიბლიას ნაწინასწარმეტყველებ რდუ, ნამდა თე უბადო ქიანაშ „ბოლო დღალეფს“ ხალხი ეგოისტი დო ჰარამ იჸუაფუდ (2 ტიმ. 3:1, 2). ქრისტიანეფქ, ირნერო ოკო ვეცადათ, უმოსო ქიპჸოროფუათ ღორონთი, ბიბლიურ ჭეშმარიტება დო ართმაჟია. მართალ რე, მინშა შილებე ვაგუგათ ართიანს, მარა დიდ კურთხევა რე კრებეფშო თინა, ნამდა ჸოროფათ შემლებნა მუვაგვარათ ირნერ პრობლემა ართიანწკუმა (ეფეს. 4:32; კოლ. 3:14). მორთ დღას ვადუშვათ, ნამდა მემდინან ჸოროფაქ! პირიქით, უმოსო ქიპჸოროფუათ ღორონთი, ბიბლიურ ჭეშმარიტება დო ჩქინ და დო ჯიმალეფი.