1, 2. ა) მუშ გურშენ ურაგადუდ იესო მოწაფეეფს სიცოცხლეშ ბოლო სერს? (ქოძირით სურათ თე გვერდის). ბ) მუშენ რე მნიშვნელოვან ირიათო ფშუდან თი მიზეზეფ, მუშ გურშენით ფქადაქენთ? გ) მუს გუვარჩიენთ თე სტატიას?

სიცოცხლეშ ბოლო სერს იესოქ მუშ მოწაფეეფ ჩიებაშ დროს დარწმუნ, ნამდა მანგარო უჸორდჷ. თეს გეძინელ, თიქ ბინეხიშ გურშენ მაგალით ხოლო მიჸონ, ნამუთ ულირ სტატიას გუვარჩით. თე მაგალითიშ საშვალებათ იესოქ გურშა ელუკინ მუშ მოწაფეეფს, ნამდა მოთვინებათ გუგრძელებდესკო მსახურება დო თეგვარო გემკუღალდესკო „ბრელ ნაყოფი“ (იოან. 15:8).

² მარა იესოს ხვალე თინა ვა უთქუალ მოწაფეეფშა მუ აფდეს ოკეთებელ, თიქ თინა ხოლო გეუნწყჷ, მუშენ ოკო უკეთებდესკო თენა. იესოქ თინეფს ქადაქებაშ გაგრძელებაშ მიზეზეფ ხოლო ქუმუჸონ. მუშენ რე მნიშვნელოვან ჩქინო თე მიზეზეფიშ რჩქინა? ირიათო ოკო ფშუდან, მუშენ რე საჭირო ქადაქებაშ გაგრძელება დო თენა მიმეხვარებნა მოთვინებათ ვუქადაქათ არძას (მათ. 24:13, 14). თაშ ნამდა, გუვარჩუათ ქადაქებაშ ოთხ მიზეზი. თეს გეძინელ, ქიფჩიებუთ ოთხ ძღვინიშ გურშენ, ნამუსით იეჰოვა მარზენა, ნამდა გუვაგრძელათ მოთვინებათ ნაყოფიშ მიკოღალა.

3. ა) ქადაქებაშ ნამ მიზეზის გურშენ მეურს ჩიება იოანეშ 15:8-ს? ბ) მუშ სიმბოლო რე ჸურძენ დო მუშენ რე თენა ჯგირ შედარება?

³ ქადაქებაშ მთავარ მიზეზ თინა რე, ნამდა თეშ კეთებათ შხვეფიშ თოლს განვადიდენთ იეჰოვას დო თიშ სახელიშ განწმენდას ბღებულენთ მონაწილებას (წეკითხით იოანე 15:1, 8). * ყურადღება ქიმიაქცით, ნამდა იესოქ მუამუშ მებინეხეს შეადარ. ქრისტექ მუშ დუდ შეადარ ბინეხის ვარდა ღერიას დო მუშ მოწაფეეფ ნოჸელეფს (იოან. 15:5). ჸურძენ რე სამეფოშ ნაყოფიშ სიმბოლო, ნამუსით ქრისტეშ მოწაფეეფ მიკიღანდეს. იესოქ მუშ მოწაფეეფს უწუ: „ჩქიმ მუმაშა თის მოუღჷ დიდება, ნამდა ბრელ ნაყოფი მიკმოიღუნა“. ბინეხის, ნამუთ ჯგირ ჸურძენს მიკმიღანსინ, პატი მოუღჷ მებინეხეშო. თეგვარო, ჩქი ხოლო პატი დო დიდება მომღუნა იეჰოვაშა, მუჟამსით მუთ შემლებნან, ირფელს ვორთუთ, ნამდა გუვაცხადათ სახიოლო ამბე (მათ. 25:20—23).

4. ა) მუჭო შემლებნა მონაწილება მიბღათ ღორონთიშ სახელიშ განწმენდას? ბ) მუს ფიქრენთ თი პატიშე, ნამდა შეილებნა მონაწილება მიბღათ ღორონთიშ სახელიშ განწმენდას?

⁴ მუჭო უნწყუნს ხეს ღორონთიშ სახელიშ განწმენდას ქადაქებაშ საქმეს მონაწილებაშ მეღება? მუშო ოკო რაგად, ღორონთიშ სახელს ვასაჭირ განწმენდა, მუშენდა თინა წმინდა რე. მარა ყურადღება ქიმვაქცუათ, მუ თქუ ესაია წინასწარმეტყველქ: „ლაშქარიშ ღორონთ იეჰოვა ოკო მიგორჩქუდან წმინდათ“ (ეს. 8:13). ჩქი ღორონთიშ სახელიშ განწმენდას თიმწკუმა ხოლო ბღებულენთ მონაწილებას, მუჟამსით თიშ სახელს არძა შხვა სახელეფშე აღმატებულო მიფრჩქინანთ დო შხვეფს ხოლო ვოხვარუთ, წმინდათ მირჩქინან თინა (მათ. 6:9). ღორონთიშ სახელს იფცვენთ სატანაშ ტყურა ბრალდებეფშე, მუჟამსით იეჰოვაშ ძვირფას თვისებეფიშ დო დედამიწაწკუმა დაკავშირებულ თიშ განზრახვაშ გურშენ ჭეშმარიტებას გინოფჩანთ შხვეფს (დაბ. 3:1—5). ღორონთიშ სახელიშ განწმენდას თიმწკუმა ხოლო უნწყუნთ ხეს, მუჟამსით ვოცადუთ, ქიმვეხვარათ ჩქინ ტერიტორიას მახორუ ხალხის თიშ ძირაფას, ნამდა იეჰოვა ღირს რე, მიღას დიდება, პატი დო ძალიერება (გამოცხ. 4:11). რუნი, ნამუთ 16 წანა რე პიონერო მსახურენსინ, იჩიებ: „გურ მარდულობათ მაფ ეფშა, მუშენდა მიღჷ პატი, დუვამოწმე სამყაროშ გუმარჩქინალიშ გურშენ. თეშ რჩქინა მოხვარ, გუვაგრძელე ქადაქება“.

5. ა) ქადაქებაშ ნამ მიზეზის გურშენ მეურს ჩიება იოანეშ 15:9, 10-ის? ბ) მუჭო ოძირუ იესოქ, ნამდა მნიშვნელოვან რდუ მოთვინება?

⁵ წეკითხით იოანე 15:9, 10. * სახიოლო ამბეს თიშენ ხოლო ფქადაქენთ, ნამდა მიჸორა იეჰოვა დო იესო ქრისტე (მარ. 12:30; იოან. 14:15). იესოქ მუშ მოწაფეეფს უწუ, ნამდა დასაბაღ ვა რდუ ხვალე უჸორდესკო თინა; საჭირო რდუ ქუდოსკიდესკო თიშ ჸოროფას. მუშენ რდუ თეშ კეთება აუცილებერ? მუშენდა, დროშ მიკულაწკუმა ართო, უმოსო მოსაჭირნა მოთვინება, ნამდა ქუდოფსკიდათ იესოშ მოწაფეეფო. თიქ იოანეშ 15:4—10 მუხლეფს მუსხირენშა მიშინუ სიტყვა „ქუდოსკიდით“ თიშ ოძირაფალო, ნამდა მოთვინება აუცილებერ რდუ.

6. მუჭო ვოძირანთ, ნამდა ფსკიდუთ იესოშ ჸოროფას?

⁶ იესოშ მცნებეფიშ დაცვებათ ვოძირანთ, ნამდა ფსკიდუთ თიშ ჸოროფას დო მიღნა თიშ მოწონება. შხვანერო ქოფთქუათინ, იესო მირაგადნა, ნამდა თიშ მორჩილება გეგმიფრჩქინათ. თინა ზუსტას თიშ კეთებას ითხინს ჩქინდე, მუდგას მუ ხოლო ორთუდ, მუშენდა მუშ დუდშე თქუ: „მა იფცვენქ მუაჩქიმიშ მცნებეფს დო ფსკიდუქ თიშ ჸოროფას“. თაშ ნამდა, თინა ჩქი მაგალითის მარზენა (იოან. 13:15).

7. მუ კავშირ რე მორჩილება დო ჸოროფაშ შქას?

 ⁷ იესოქ მუშ მოწაფეეფს უწუ, მუ კავშირ რდუ მორჩილება დო ჸოროფაშ შქას: „მიდგა ჩქიმ მცნებეფს ღებულენს დო იცვენსინ, თის ვუჸორქ მა“ (იოან. 14:21). თეს გეძინელ, იესოშ მცნებაშ დაცვებათ, ნამუთ ქადაქებას ოხუნ, ჩქი ღორონთიშ ჸოროფას ხოლო გიმიფრჩქინანთ, მუშენდა თიშ მცნებეფშე იეჰოვაშ აზროვნება იძირე (მათ. 17:5; იოან. 8:28). თეგვარო, მუჟამსით იეჰოვა დო იესოშ ჸოროფას გიმიფრჩქინანთინ, თინეფ ხოლო გიმირჩქინანა ჩქინწკუმა თე თვისებას.

8, 9. ა) ქადაქებაშ ხოლო მუ მიზეზ მიღნა? ბ) მუჭო მოხვარნა ეზეკიელიშ 3:18, 19 დო 18:23 გუვაგრძელათ ქადაქება?

⁸ ქადაქებაშ ხოლო ართ მიზეზ თინა რე, ნამდა თეთ ვაფრთხილენთ ხალხის. ბიბლიას ნოეშ გურშენ ჭარ, ნამდა თინა „მაქადაქებელი“ რდუ (წეკითხით 2 პეტრე 2:5). * ნოე დიდწყარალაშახ ქადაქენდჷ დო განადგურებაშ გურშენ ხოლო აფრთხილენდ თინეფს. მუშენ შემლებნა თეშ რაგადი? ყურადღება ქიმიაქცით, მუ თქუ იესოქ: „მუჭოთ დიდწყარალაშ მულაშა ჭკომუნდეს, შუნდეს, ოსურ მოჸუნდეს დო ითხუაფდეს თი დღაშა, სოიშა ნოე კიდობანშა მინიშ დო მუთუნ ვანარღუდეს, სოიშა დიდწყარალაქ ვა მორთ დო არძა ვეღჷ, თაშ იჸუაფუ თიმწკუმა ხოლო, მუჟამსით კოჩიშ სქუა მოურს“ (მათ. 24:38, 39). ხალხ ვა ურჩქილედ ნოეს, მარა თინა იშენით აგრძელენდჷ თინეფიშ გაფრთხილებას.

⁹ ამდღა ჩქი სამეფოშ გურშენ სახიოლო ამბეშ ქადაქებათ ხალხის თიშ საშვალებას ვარზენთ, ქიგეგან, მუ რე ღორონთიშ ნება. მუჭოთ იეჰოვან თეშ, ჩქი ხოლო სურვილ მიღნა, ხალხიქ ქიმირჩქილუას თე ცნობა დო იცხოვრას მარადიულო (ეზეკ. 18:23). თეწკუმა ართო, მუჟამსით კარდოკარ ვარდა ქუჩას ფქადაქენთინ, მუთ შილებენ მეტ ხალხის ვაფრთხილენთ, ნამდა ღორონთიშ სამეფო ქუმურს დო უბადო ქიანას ბოლოს მუღენს (ეზეკ. 3:18, 19; დან. 2:44; გამოცხ. 14:6, 7).

10. ა) ქადაქებაშ ნამ მიზეზის გურშენ მეურს ჩიება მათეშ 22:39-ს? ბ) მუჭო მეხვარეს პავლექ დო სილაქ ციხეშ ზედამხედველს ქალაქ ფილიპეს?

¹⁰ ქადაქებაშ ხოლო ართ მნიშვნელოვან მიზეზ თინა რე, ნამდა მიჸორა ჩქინ მოყვასი (მათ. 22:39). თეცალ ჸოროფა მოხვარა გუვაგრძელათ ქადაქება დო თინა ხოლო მიჩქნა, ნამდა მუჟამსით ხალხიშ მდგომარეობა ითირუნ, შილებე თინეფიშ გურიშ მდგომარეობაქ ხოლო დითირას. მორთ, გუვარჩუათ მოციქულ პავლეშ დო სილაშ მაგალითი. ქალაქ ფილიპეს თინეფ მოწინააღმდეგეეფქ ოჭოფეს დო ციხეს ქუდახუნეს. შკა სერს უცფას მიწისძვრაქ ქუმოხვად დო ციხეშ არძა კარქ გინჯჷ. ციხეშ ზედამხედველქ იფიქრჷ, ნამდა არძა პატიმარქ ინტ დო დუდიშ ჸვილუა გეგნოჭყვიდ. მარა პავლექ ხონარმაღალო ქუდუძახ: „დუდშა მუთუნ ვემიკინდუა!“. შკურნაფილ ზედამხედველქ იკითხჷ: „მუ ვაკეთა, ნამდა გინოფსკიდე?“. თინეფქ უწის: „ირწმუნ უფალ იესო დო გინასკიდუქ“ (საქ. 16:25—34).

11, 12. ა)  მუშ გურაფა შემლებნა ციხეშ ზედამხედველიშ მაგალითშე? ბ) მუშ საშვალება მუმაჩამნა ართგურო მსახურებას გუვაგრძელენთ-და?

¹¹ მუშ გურაფა შემლებნა ციხეშ ზედამხედველიშ მაგალითშე? ყურადღება ქიმიაქცით ართ მუდგარენს: ზედამხედველიშ გურიშ მდგომარეობაქ მიწისძვრაშ უკულ დითირ.  თეგვარო, ამდღა ხოლო ნამთინექ დუდშე შილებე ვემირჩქილუას სახიოლო ამბე, მარა დათირას გურიშ მდგომარეობაქ დო მოხვარა ქითხუას, მუჟამსით მუნეფიშ ცხოვრებას მუდგარენ გლახა მოხვადუ. მაგალთო, ნამთინეს შილებე ველუდუნ თეშ სამუშაქ მეუდინკო. შხვეფს შილებე თიშენ აფდან გურ გოტახილ, ნამდა ოჯახიქ ეკუცუეს. ნამთინეს შილებე სერიოზულ ლახალა უღდას დო ათეშენ რდას შეწუხებულ, ვარდა საჸოროფო პიროვნება აფდას ღურელ დო გურ აკოჭირებულ რდას. მუჟამსით თეცალ მოვლენეფ მუთმოხვადუნ, თინეფქ შილებე დეინტერესან ცხოვრებაშ აზრით დო თიცალ კითხვეფ ქუდასვან, ნამუთ აიშახ ვაინტერესდეს. შილებე ფიქრენდან: „მუ ვაკეთა, ნამდა გინოფსკიდე?“. თეცალ კათაქ შილებე ქიმიკორინუას იმენდიშ მუმაჩამალ ცნობაშ მორჩქილაფა.

¹² ართგურო მსახურებას გუვაგრძელენთ-და, შემალებენა ხალხის გურშა ელუკინათ თი დროს, მუჟამსით თინეფ მზათ იჸუაფნა ქუმომრჩქილუან (ეს. 61:1). შარლოტა, ნამუთ 38 წანა რე სრულ დროთ მსახურენსინ, იჩიებ: „ამდღა ხალხ გურ გოტახილ რე. თინეფს ოსაჭირნა სახიოლო ამბეშ მორჩქილაფა“. ევორი, ნამუთ 34 წანა რე სრულ დროთ მსახურენსინ, იჩიებ: „ამდღა, ბრელ ემოციურო გლახათ გინაფლენს დუც. მა დასურო მოკო მივეხვარე თინეფს, ათეშენ სურვილ მიღჷ იფქადაქე“. მოყვასიშ ჸოროფა დასურო ჯგირ მიზეზ რე, გუვაგრძელათ მსახურება!

13, 14. ა) მუ ძღვინ რე მოშინაფილ იოანეშ 15:11-ის? ბ) მუჭო შემლებნა მიღდან თიცალ ხიოლ, მუნერით იესოს უღუდ? გ) მუჭო მოქმედენს ხიოლ ჩქინ მსახურებაწკუმა?

¹³ სიცოცხლეშ ბოლო სერს იესოქ მუშ მოწაფეეფს მუსხირენ ძღვინიშ გურშენ ეჩუ, ნამუთ მეხვარებუდ თინეფს, გუგრძელებდესკო ნაყოფიშ მიკოღალა. მუ რე თი ნამთინე ძღვინ დო მუჭო მოხვარნა თინა?

¹⁴ ხიოლიშ ძღვინი. ტვირთი ხომ ვარდ მოწაფეეფშო იესოშ მცნებაშ დაცვება? მუშო ოკო რაგად ვარ. მუჟამსით, იესოქ ბინეხიშ გურშენ მაგალით მიჸონუნ, თიქ თინა ხოლო თქუ, ნამდა ქადაქება ხიოლს მომღანდეს (წეკითხით იოანე 15:11). * ქრისტექ დუმარწმუნეს, ნამდა ჩქი ხოლო მაღვენდეს თიცალ ხიოლ, მუნერით მუს უღუდ. მუჭო იჸუაფუდ თენა შეიოლებერ? მუჭოთ ჟიშე მიფშინეთინ, იესოქ მუშ დუდ ბინეხის შეადარ დო მუშ მოწაფეეფ ნოჸელეფს. ონდო ნოჸელა ბინეხის ელაჩანსინ, თევრეშე ღებულენს წყარს დო აუცილებერ ნივთიერებეფს. თეგვარო, ონდო იესოწკუმა ართობას ვორეთ დო თიშ მაგალითის მეპჸუნთინ, ჩქი ხოლო მაღვენუნა თიცალ ხიოლ, ნამუთ თიშა მუამუშიშ ნებაშ შესრულებას მოუღუდ (იოან. 4:34; 17:13; 1 პეტ. 2:21). ჰანი, ნამუთ 40 წანაშ მეტ რე პიონერო მსახურენსინ, იჩიებ: „მსახურებაშ უკულ ირიათო ხიოლს ბგინაფლენქ დო თენა მარზენს ძალეფს, გუვაგრძელე იეჰოვას მსახურება“. დასურო, ხიოლ მარზენა თიშ ძალას, გუვაგრძელათ მსახურება თიცალ ტერიტორიას, სოდეთ ქადაქება ვა რე ადვილ (მათ. 5:10—12).

15. ა) მუ ძღვინ რე მოშინაფილ იოანეშ 14:27-ის? ბ) მუჭო მოხვარნა მშვიდობა, გუვაგრძელათ ნაყოფიშ მიკოღალა?

¹⁵ მშვიდობაშ ძღვინი (წეკითხით იოანე 14:27). * ღურაშ წოხოლენ სერს იესოქ მუშ მოწაფეეფს უწუ: „ჩქიმ მშვიდობას გარზენთ“. მუჭო მოხვარნა თე ძღვინ გუვაგრძელათ ნაყოფიშ მიკოღალა? მუჟამსით ქადაქებას ვაგრძელენთინ, მშვიდობას ბგინაფლენთ, მუშენდა მიჩქნა, ნამდა თეშნერ საქციელს იეჰოვა დო იესო იწონუანა (ფსალმ. 149:4; რომ. 5:3, 4; კოლ. 3:15). ულფი, ნამუთ 45 წანა რე სრულ დროთ მსახურენსინ, იჩიებ: „მართალ რე ქადაქებაშ დროს ფშურდუქ, მარა თეს კმაყოფილება მოუღჷ ჩქიმდა დო ცხოვრებას ნამდვილო უღჷ აზრი“. მუნერ მარდულეფ ვორეთ თიშენ, ნამდა შინაგან მშვიდობა მიღნა!

16. ა) მუ ძღვინ რე მოშინაფილ იოანეშ 15:15-ის? ბ) მუჭო შეულებდეს მოწააფეეფს ქუდოსკიდესკო იესოშ მეგობრეფო?

 ¹⁶ მეგობრობაშ ძღვინი. იესოქ თქუ, ნამდა ოკოდ მუშ მოწაფეეფს სრულაშე უღდესკო ხიოლ დო გენწყჷ, მუსხით მნიშვნელოვან რდუ დუდ გინოდვალირ ჸოროფაშ გიმორჩქინა (იოან. 15:11—13). თეშ უკულ იესოქ თქუ: „მეგობარეფ გუგოდვით“. იესოწკუმა მეგობრობა ძვირფას ძღვინ რე! მუ ოკო აკეთესკო მოწაფეეფქ, ნამდა ქუდოსკიდესკო თიშ მეგობრეფო? იესოქ თინეფს უწუ: „ვა გაჩენდათ, ნაყოფ მიკმოიღდან“ (წეკითხით იოანე 15:14—16). * თეშ რაგადშახ ჟირ წანათ ადრე, იესოქ თეცალ მითითება მეჩ თინეფს: „გილართით დო იქადაქით, მონჭაფილ რე ზეციერ სამეფო“ (მათ. 10:7). თაშ ნამდა, სიცოცხლეშ ბოლო სერს იესოქ გურშა ელუკინ თინეფს, ნამდა გუგრძელებდესკო დოჭყაფილ საქმე (მათ. 24:13; მარ. 3:14). თე დავალებაშ შესრულება ვა რდუ ადვილ, მარა იესოშ მეგობრეფო ქუდოსკიდუდეს-და, შეიალებედეს თეშ კეთება. თინეფს ხოლო ართ ძღვინ მეხვარებუდ, ქუდოსკიდესკო ქრისტეშ მეგობრეფო.

17, 18. ა) მუ ძღვინ რე მოშინაფილ იოანეშ 15:16-ის? ბ) მუჭო მეხვარებ თე ძღვინ იესოშ მოწაფეეფს? გ) ნამ რე თი ნამთინე ძღვინ, ნამუთ ჩქი ამდღა მამანგარენა?

¹⁷ ლოცვაშა პასუხიშ მეღებაშ ძღვინი. იესოქ თქუ: „მუდგას თხინთ მუმას ჩქიმ სახელითინ, ქიმერჩან“ (იოან. 15:16). მუჭო გამანგარენდჷ თე სიტყვეფ მოწაფეეფს! * თინეფს ბოლოშა დიო ხოლო ვა ჯერდეს, ნამდა იესო მალას დასრულენდჷ სიცოცხლეს დედამიწას, მარა მოწაფეეფ მოხვარაშ უმშო იშენით ვადოსკიდუდეს. იეჰოვა მზათ რდუ ქუპასუხკო თინეფიშ ლოცვას დო ქიმეხვარკო სამეფოშ გურშენ ქადაქებაშ საქმეშ შესრულებას. დასურო, თე სიტყვეფიშ რაგადშე ჭიჭე ხანიშ უკულ თინეფქ მუშ თოლით ქოძირეს, მუჭო უპასუხ იეჰოვაქ თინეფიშ ლოცვეფს, მუჟამსით მოხვარას თხულენდეს (საქ. 4:29, 31).

¹⁸ ამდღა ხოლო თეცალ სიტუაცია რე. მუჟამსით ნაყოფიშ მიკოღალას ვაგრძელენთინ, იესოშ მეგობარეფო ფსკიდუთ. თეს გეძინელ, შემლებნა ბჯერდან, ნამდა იეჰოვა ქუპასუხენს ჩქინ ლოცვეფს, მუჟამსით ფთხულენთ, ქიმმეხვარან გივორჯგინათ თი დაბრკოლებეფს, ნამუსით სახიოლო ამბეშ ქადაქებაშ დროს შეფხვადუთ (ფილ. 4:13). მუჭომ მარდულეფ ვორეთ თიშენ, ნამდა ღორონთ პასუხენს ჩქინ ლოცვეფს დო შემლებნა იესოშ მეგობარეფ ვორდათ! ჩქი მამანაგარენა იეჰოვაშე მოჩამილ მუსხირენ ძღვინ დო მოხვარნა გუვაგრძელათ ნაყოფიშ მიკოღალა (იაკ. 1:17).

19. ა) მუ მიზეზეფიშ გურშენ ფქადაქენთ? ბ) მუ მიმეხვარებნა დუვასრულათ ღორონთიშ საქმე?

¹⁹ მუჭოთ თე სტატიაშე ბძირითინ, ჩქი თიშენ ფქადაქენთ, ნამდა განვადიდათ იეჰოვა დო თიშ სახელიშ განწმენდას მიბღათ მონაწილება, მიჸორა იეჰოვა დო იესო ქრისტე, მოკონა გუვაფრთხილათ ხალხი დო გეგმიფრჩქინათ მოყვასიშ ჸოროფა. თეს გეძინელ, ღორონთ მარზენა შხვადოშხვა ძღვინს, ხიოლს, მშვიდობას, მეგობრობას დო ლოცვაშა პასუხიშ მეღებაშ ძღვინს, ნამუთ მოხვარნა დუვასრულათ ღორონთიშ საქმე. მუჭო ახიოლე იეჰოვას, მუჟამსით ქოძირუნს, ნამდა შურ დო გურით ვოცადუთ მიკიბღათ „ბრელ ნაყოფი“!