1. მუშენ შილებე ნამთინეს გურაფაშ დუდ ვა უღდას?

ამდღა დუდიშ ეიოჯუმალარო დიდ მონდომა რე საჭირო. ჩქინ და დო ჯიმალეფიშ უმენტაშ საათობით მუშენს, ნამდა მუნეფიშ ოჯახეფს აუცილებერ ვემიარკან. ბრელქ სამუშა ადგილშა ქიმერთასინ, ირ დღას მუსხირენ საათის მგზავრენს. და დო ჯიმალეფ ფიზიკურო ხოლო მუშენა, ნამდა ქიზრუნან ოჯახეფშო. დღაშ ბოლოს თიცალ გინოშულადირ რენა, გურაფაშ დუდ ვა უღნა.

2. თქვანო მუ დროს რე გურაფა მოხუჯურ?

² ფაქტი რე, ჩქი ოკო დობგორათ დრო ღორონთიშ სიტყვაშ დო ქრისტიანულ პუბლიკაციეფიშ ოგურაფალო, მუშენდა თეშა რე გერსხილ იეჰოვაწკუმა ჩქინ ურთიერთობა დო მარადიულ სიცოცხლე (1 ტიმ. 4:15). ნამთინე ოჭმარეს ადრე ედირთუ დო გურაფლენს, მუჟამსით მოსვანჯილ რე დო ჸუდეს სიწყნარე რე; შხვეფ დღაშ ბოლოს, მუჟამსით მუთუნ ვაცილნა, მუსხირენ წუთის უთმენა გურაფას დო ნაგურეფშე ფიქრის.

3, 4. მუ ცვლილებეფქ მოხვად ბოლო დროს ორგანიზაციას დო მუშენ?

³ მუშო ოკო რაგად, ოთანხმუთ, ნამდა გურაფაშო დროშ გიმორთუალა მნიშვნელოვან რე. მარა მუ ოკო იბგურუათ? შილებე თქუათ: „ოგურაფალიშ მეტ მუ რე. ონდეთ ვოჭიშუანქ ირფელიშ კითხირს“. ნამთინე ახერხენს მთელ სულიერ საზრდოშ მეღებას, მარა ბრელ და დო ჯიმას უჭირს თეშ კეთება. ხემძღვანელ საბჭოშ წევრეფს ჯგირო არჩქილენა თე საკითხ. ათეშენ ჭიჭე ხანიშ წოხოლე თინეფქ გეგნოჭყვიდეს, ნაკლებ რაოდენობათ გეგშაშკვესკო მუჭოთ ბეშტელ, თეშ ინტერნეტ მასალა.

⁴ მაგალთო, ორგანიზაცია უკვე ვეგშაშკვანს წიგნის „იეჰოვაშ მოწმეეფიშ წელიწდეულ“, მუშენდა ბრელ გურიშ ემაკინალ შემთხვევეფ გიდვალუაფ ვებგვერდის jw.org^® ვარდა ირთუთიან  მაუწყებლობას. ოვრცელებერ ჟურნალეფ „გინაჯინალ კოშკი“ დო „გეგშაკურცხით!“ წანაშე ხვალე სუშმა გიშურს. მარა თე ცვლილებეფ თიშენ ვა უკეთებნა, ნამდა ჩქინ დრო შხვა საქმეეფშო გეგმიბრინუათ. ცვლილებეფიშ მიზან თინა რე, მეტ ყურადღება დუთმათ უმოს მნიშვნელოვან საქმეეფს (ფილ. 1:10). მორთ, ქობძირათ, მუჭო შემლებნა გინობჭყვიდათ, მუ რე მნიშვნელოვან დო სრულ სარგებელ მიბღათ პირად გურაფაშე.

5, 6. ნამ პუბლიკაციეფ ოკო იბგურუათ გურგედვალირო?

⁵ მუ ოკო იბგურუათ პირველ რიგის? მუშო ოკო რაგად, ჩქი ირდღას ოკო გეგმურთათ დრო ღორონთიშ სიტყვაშ გურაფას. ირმარიან კრებაშ შეხვალამას ოკითხე ბიბლიურ მუხლეფიშ რაოდენობა ნაკლებ რე, მუთ საშვალებას მარზენა უმოს დრო დუთმათ ნაკითხერს დო მეტ ინფორმაცია დობგორათ. ჩქინ მიზან ხვალე თინა ოკო ვა რდას, უბრალოთ წეპკითხათ თი მარაშ ოკითხე მუხლეფ; ჩქი საშვალება ოკო ქიმეფჩათ ბიბლიურ ცნობას, ქეშეხუას ჩქინ გურს დო უმოსო დუმაახლოვან იეჰოვას (ფსალმ. 19:14).

⁶ ხოლო მუ ოკო იბგურუათ გურგედვალირო? ჩქი ოკო მუვამზადათ „გინაჯინალ კოშკიშ“ ოგურაფალ სტატია დო კრებაშ ბიბლიაშ გურაფაშ მასალა; თეს გეძინელ, წეპკითხათ შკამარაშ შეხვალამაშ მასალა. ჩქი ოვრცელებერ ჟურნალეფიშ „გინაჯინალ კოშკი“ დო „გეგშაკურცხით!“ ირ გიშაშკუმალა ხოლო ოკო წეპკითხათ.

7. მუშენ ოკო ვეგიბტახათ გურ, მუჟამსით ვეშმალებენა თი ირფელიშ კითხირ ვარდა ჯინა მუთ ჩქინ ვებგვერდის ვარდა JW მაუწყებლობას გიდვალუაფ?

⁷ შილებე თქუათ: „გვალო ჯგირ, მარა მუშ რაგად შილებე ჩქინ ვებგვერდის jw.org დო JW მაუწყებლობას მოჩამილ მასალაშე, ნამუთ ხვეიანო რე?“. ქიმიპჸონათ მაგალით: წერმიდგინით, ნამდა რესტორანს ხალხის ბრელ შხვადოშხვა გემუან ოჭკუმალს თავაზენა. მარა მუშო ოკო რაგად, არძა ოჭკუმალიშ გასინჯება მითინს ვეშიალებე. თეშნერო, თქვა ხოლო გურ ვეგიტახათ, მუჟამსით ვეშქალებენა თი ირფელიშ კითხირ დო ჯინა, მუთ ვებგვერდის გიდვალუაფ. წეკითხით ვარდა ქუჯინით თის, მუთ შეგალებენა. მორთ, ასე ქობძირათ, მუ მიშურს გურაფაშა დო მუ ოკო ვაკეთათ, ნამდა ჩქინ გურაფას შედეგიქ ქუმაჸუნას.

8. მუჭო ოკო მამზადათ „გინაჯინალ კოშკიშ“ ოგურაფალ სტატია დო მუ სარგებელს მოიღანა თეშნერ მომზადება?

⁸ გურაფაშ დროს მთელ ყურადღება გეგნიღით თიშა, მუდგას კითხულენთ, მუშენდა თე დროს მნიშვნელოვან საკითხის გურაფლენთ. ჯგირ ვეჸუაფ მოჩამილ მასალაშ უცბას გინოკითხირ დო პასუხეფიშ გოხაზუა. მაგალთო, „გინაჯინალ კოშკიშ“ მომზადებაშ დროს, წეკითხით სტატიაშ დაჭყაფუს მოჩამილ შინაარსი. უკულ დეფიქრით სტატიაშ სათაურშე, ქვესათაურეფშე დო გამეორებელ კითხვეფშე. წეკითხით სტატია ვეჩქარათინ თეშ დო გურგოჩამილო. აბზაცეფიშ კითხირიშ დროს ყურადღება ქიმიაქცით თი წინადადებას, ნამუთ ჩვეულებრივ აბზაციშ დაჭყაფუს რე მოჩამილ. თინა მიგეხვარებნა თიშ გაგებას, მუ საკითხშე მეურს ჩიება თე აბზაცის. სტატიაშ კითხირიშ დროს, დეფიქრით, მუჭო რე დაკავშირებულ ირ აბზაც ქვესათაურ დო მთავარ თემაწკუმა. ყურადღება ქიმიაქცით თი სიტყვეფს დო აზრეფს, ნამუთ თეიშახ ვაიჩქუდეს დო გოკონა მეტ ინფორმაციაშ გაგება.

9. ა) მუშენ ოკო მივაქცუათ განსაკუთრებულ ყურადღება ბიბლიურ მუხლეფს „გინაჯინალ კოშკიშ“ გურაფაშ დროს? ბ) მუჭოთ იესო ნავეშ სქუაშ 1:8-ს რე მოჩამილ, ხოლო მუ ოკო ვაკეთათ ბიბლიურ მუხლეფიშ კითხირწკუმა ართო?

⁹ ჟურნალ „გინაჯინალ კოშკიშ“ ოგურაფალ გიშაშკუმალა მოხვარნა, უმოსო  ქინვანჭათ ბიბლიას. ყურადღება ქიმიაქცით ბიბლიურ მუხლეფს, განსაკუთრებულო თინეფს, ნამუთ კრებაშ შეხვალამას სტატიაშ გარჩიებაშ დროს რე ოკითხე. დეფიქრით, მუჭო რე დაკავშირებულ თე მუხლის მოჩამილ მთავარ სიტყვეფ ვარდა ფრაზეფ აბზაციშ მთავარ აზრწკუმა. თეწკუმა ართო, დრო გეგმურთით თიშე ფიქრის, პირადო თქვა, მუჭო შეილებნა თე ბიბლიურ მუხლეფიშ გიმორნაფა (წეკითხით იესო ნავეს ძე 1:8).

10. მუჭოთ ებრაელეფიშ 5:14-შე იძირე, მუშენ ოკო გუმურთან მშობლეფქ დრო ოჯახურ თაყვანიშცემას, ნამდა ქუდაგურუან ბაღანეფს, კრებაშო მომზადება დო ბიბლიურ საკითხეფიშ გიმორკვიება?

¹⁰ მუშო ოკო რაგად, მშობლეფს ოკონა ირმარიან ოჯახურ თაყვანიშცემა სასიამოვნო რდას ბაღანეფშო. თინეფს წინასწარ ოკო აფდან მოფიქრებულ, მუ საკითხის გარჩიენა ოჯახურ თაყვანიშცემაშ დროს, მარა აუცილებერ ვა რე, ირ ოჯახურ თაყვანიშცემა განსაკუთრებულო ჩატარან. თე დროს ოჯახეფს შეულებნა უჯინან JW მაუწყებლობაშ ირთუთიან პროგრამას ვარდა მინშა მამზადან სპეციალურ პროგრამა მაგალთო, ნოეშ კიდობანიშ მაკეტი. თეს გეძინელ, მნიშვნელოვან რე ბაღანეფქ დიგურუან, მუჭო ჩეტარან პირად გურაფა. თეწკუმა ართო, აუცილებერ რე ბაღანეფქ თინა ხოლო დიგურუან, მუჭო მემზადან კრებაშ შეხვალამეფშო ვარდა მუჭო გიმირკუან თი საკითხ, ნამუთ მუნეფიშ სკოლას წიმიჭკირუ (წეკითხით ებრაელები 5:14). მუჟამსით ბაღანეფ დროს დუთმენა ჸუდეს გურაფას, თინეფშო უმოს ადვილ იჸუაფ კრებაშ შეხვალამეფს ვარდა კონგრესეფს ყურადღებით ურჩქილან პროგრამას, სოდეთ შილებე ირიათო ვეჸუას ვიდეოეფქ. მუშო ოკო რაგად, ბაღანეფიშ ასაკ დო ხასაითშე გამომდინარე, მშობლეფიშ გინაჭყვიდირალ რე მუსხი ხანს გეგრძელებ ოჯახურ თაყვანიშცემა.

11. მუჟამ შილებე დუვოგურუათ ბიბლიაშ მაგურაფალს საკითხეფიშ გიმორკვიება დო მუშენ?

¹¹ ბიბლიას გურაფლენან თინეფქ ხოლო საჭირო რე, გევითარან გურაფაშ ჩვევა. მოხიოლნა, მუჟამსით ახალ დაინტერესებულეფ კრებაშ შეხვალამაშო ვარდა ბიბლიაშ გურაფაშო ემზადებნა დო უბრალო პასუხეფს ირზენა. მარა ჩქი ოკო დუვოგურუათ თინეფს, მუჭო გიმირკუან საკითხეფ დო აზრიანო მემზადან მუნეფიშით. თენა მეხვარებ თინეფს, პრობლემეფიშ დროს მუნეფიშით გეგმირკუან პუბლიკაციეფ დო დოგორან საჭირო ინფორმაცია თიშ მანგიორო, ნამდა ხეთეშე კრებაშ წევრეფს ქოკითხან რჩევა.

12. მუ მიზნეფ ოკო მიღდან გურაფაშ დროს?

¹² კითხირ ვაიჸორან-და, შილებე ფიქრენდათ, ნამდა გურაფა დღას ვეჸუაფ თქვანო სასიამოვნო პროცეს, მარა თენა თაშ ვა რე. დუდშე შეილებნა გურაფას ჭიჭე დრო დუთმათ, მარა ჭიჭე ხანშა ქუმუძინათ დროს. დეფიქრით, მუშენ გურაფლენთ დო მუშ მეჭირნაფას ოცადუთ. მუშო ოკო რაგად, ჩქინ მთავარ მიზან რე უმოსო დევეახლოვათ იეჰოვას. მარა, ჩქინ მიზან თინა ხოლო რე, ნამდა ქუპასუხათ შხვეფიშ კითხვეფს ვარდა პუბლიკაციეფს დობგორათ საჭირო ინფორმაცია თი პრობლემაშე, ნამუთ მაწუხენა.

13. ა) მუშ კეთება შეულებნა ახალგაზრდეფს, ნამდა გეუნწყან შხვეფს მუნეფიშ რწმენაშ გურშენ? ბ) მუჭო შეილებნა კოლოსელეფიშ 4:6-ის მოჩამილ რჩევაშ გიმორნაფა?

¹³ მაგალთო, სკოლას ქოგურაფლენქ-და, შილებე სქან კლასელეფს ევოლუციაშ წანა. მუშო ოკო რაგად, ალბათ გოკო გეუნწყე თინეფს სქან რწმენაშ გურშენ, მარა ფიქრენქ, ნამდა თეშ ოკეთებელო დასაბაღ რჩქინა ვაიღ. თე დროს ბიბლიურ საკითხეფიშ გიმორკვიება მიგეხვარებ. თენა შილებე 2 მიზანს ომსახურდას: 1) გეგემანგარებ თიშ რწმენა, ნამდა ირფელ იეჰოვაქ გაჭყჷ დო 2) ქიდიგურუანქ, მუჭო ეუნწყე სქან რწმენაშ გურშენ შხვეფს (რომ. 1:20; 1 პეტ. 3:15). შეილებ პირველ რიგის სქან დუც ქოკითხე: „მუშენ წანა ჩქიმ კლასელეფს ევოლუციაშ?“. გურგედვალირო გეგმირკვი თე საკითხი ჩქინ პუბლიკაციეფს. თეშ უკულ, შილებე სქან რწმენაშ გურშენ შხვეფწკუმა ჩიებაქ უმოს ადვილქ გაჸუას. ხალხიშ უმენტაშის ევოლუციაშ თიშენ წანს, ნამდა თენა თიცალ პიროვნებაშე გეგეს, მიდგას დიდ პატის ცენა. მუჟამსით დოგორუნქ ართ ვარდა ჟირ მოსაზრებას დო შხვეფს გუზიარენქ, თეთ შეილებ ქიმეხვარე თიცალ პიროვნებას, მიდგას შურდოგურით ოინტერეს ჭეშმარიტება (წეკითხით კოლოსელები 4:6).

14—16. ა) მუჭო შეილებნა უჯგუშო გეჩინებაფუათ თი ბიბლიურ წიგნი, ნამუთ ჯგირო ვა რე ნაჩინებ თქვანო? ბ) მოშინაფილ მუხლეფიშ საშვალებათ გენწყით, მუჭო შილებე მეტ ინფორმაციაშ მეღება წიგნი ამოსიშ გურშენ (ქოძირით ჩარჩო „გაცოცხლით ბიბლიურ ისტორია“).

¹⁴ წერმიდგინით, ნამდა კრებაშ შეხვალამას წეპკითხენთ დო გენიფხილენთ 12 წინასწარმეტყველურ წიგნიშე ართ-ართის, ნამუთ იშენ დო იშენ ჯგირო ვაიჩქუნა. შეილებნა დეინტერესათ დო უმოს მეტ ქიგეგათ თე წინასწარმეტყველებაშ გურშენ. მუჭო შეილებნა თეშ კეთება?

¹⁵ ქოკითხით თქვან დუც: მუ მიჩქ თე წიგნიშ მაჭარალიშ გურშენ? მი რდუ თინა, სო ცხოვრენდჷ დო მუს საქმიანენდჷ? წიგნიშ მაჭარალიშ გურშენ მეტ ინფორმაციაშ მეღება მიმეხვარებნა უჯგუშო ქიგებგათ წინასწარმეტყველებას გიმორნაფილ სიტყვეფიშ დო მაგალითეფიშ მნიშვნელობა. ბიბლიაშ კითხირიშ დროს ქიდეკვირით თი ფრაზეფს, ნამუთ მიგეხვარებნა უჯგუშო გეჩინებაფუათ წიგნიშ მაჭარალ.

¹⁶ თეშ უკულ შილებე თქვანო საინტერესოქ იჸუას თიშ გაგებაქ, მუჟამ იჭარ თე ბიბლიურ წიგნეფქ. თენა შეილებნა ქოძირათ ბიბლიაშ „ახალ ქიანაშ თარგმანს“ 1644, 1645 გვერდეფს, სოდეთ გიმოკოროცხილ რე ბიბლიურ წიგნეფ. თეს გეძინელ, შეილებნა ქოძირათ ინფორმაცია წინასწარმეტყველებეფშე დო მეფეეფშე ბროშურას „ბიბლიაშ ორკვიებელ“ (ბიბლიის გზამკვლევი, გვ. 16, 17). წინასწარმეტყველურ წიგნიშ გურაფაშ დროს, ჯგირ იჸუაფ გეგმირკვიათ, მუნერ მდგომარეობა რდუ თი პერიოდის, მუჟამსით თე წიგნიქ იჭარ. ნამ გლახა ჩვევეფიშ დო დამოკიდებულებაშ გიმოსწორებას ოკო მეხვარკო წინასწარმეტყველქ ხალხის? მი რდუ თიშ თანამედროვეეფ? სიტუაციაშ უჯგუშო გაგებელო შილებე ართშე მეტ წყაროქ დეგესაჭირან. მაგალთო, მოკონა ქიგებგათ მუ მდგომარეობა  რდუ წინასწარმეტყველ ამოსიშ დროს. თეშ გაგებას მიმეხვარებნა ჟირ ბიბლიურ წიგნიშ, 2 მეფეეფიშ დო 2 მატიანეშ ართიანწკუმა შედარება, ნამუთ მარგინალურ მუხლეფო რე მითითებულ ამოსიშ 1:1-ის. თეს გეძინელ, შეილებნა წეკითხათ ოსიაშ ნაჭარა წიგნი, ნამუთ ამოსიშ დროს ცხოვრენდჷ. თე ირფელ მიგეხვარებნა უჯგუშო წერმიდგინათ, მუ პერიოდის ცხოვრენდჷ ამოსი (2 მეფ. 14:25—28; 2 მატ. 26:1—15; ოს. 1:1—11; ამოს. 1:1).

17, 18. აბზაცეფს მოშინაფილ ვარდა თქვან მაგალითეფით გენწყით, მუშენ რე უმოს სასიამოვნო ბიბლიაშ გურაფა, მუჟამსით ჭიჭე დეტალეფს ვაქციენთ ყურადღებას.

¹⁷ ბიბლიაშ კითხირიშ დროს ჯგირ იჸუაფ მიღუდან თიშ სურვილ, უმოს დიბგურუათ. წერმიდგინით, კითხულენთ ზაქარიაშ მა-12 დუც, ნამუთ წინასწარმეტყველენს მესიაშ ღურას (ზაქ. 12:10). მა-12 მუხლის კითხულენთ, ნამდა „ნათანიშ საგვარეულო“ იგლოვენდჷ მესიაშ ღურას. კითხირიშ დროს უმნიშვნელოთ ვედიტუათ თე დეტალ, გაჩენდით დო ქოკითხით თქვან დუც: მუ საერთო უღჷ ნათანიშ საგვარეულოს მესიაწკუმა? სო შემლებ თეშ გურშენ მეტიშ გაგება?. გეგმირკვით თე საკითხ უმოს დეტალურო. მარგინალურ მუხლეფ მეითითენა 2 სამუელიშ 5:13 დო 14-შა, სოვრეშეთ ქიგეგენთ, ნამდა ნათანი მეფე დავითიშ ართ-ართ სქუა რდუ. მაჟია მარგინალურ მუხლი რე ლუკაშ 3:23, 31, სოვრეშეთ იძირე, ნამდა იესო ნათანიშ პირდაპირ შთამომავალ რე მარიამიშ მხარეშე (ქოძირით 2017 წანაშ არგუსოშ „გინაჯინალ კოშკი“, კითხვა დო პასუხი). თენა უმოს ინტერესის გოირჩქინანა, მუშენდა გიჩქუნა, იესოშე ნაწინასწარმეტყველებურ რდუ, ნამდა დავითიშ საგვარეულო ხაზშე ოკო მორთუკო (მათ. 22:42). მარა დავითის 20-შე მეტ ქომოლსქუა ჸუნდჷ. ნამდვილო გასაოცარ რე, ზაქარია ნათანიშ  საგვარეულოს მიშინუანს დო იჩიებ, ნამდა იგლოვენდჷ იესოშ ღურას.

¹⁸ ქიმიპჸონათ ხოლო ართ მაგალით. ლუკაშ პირველ დუდის პკითხულენთ, ნამდა ანგელოზ გაბრიელქ გეგმეცხად მარიამს დო უწუ, ქომოლსქუა ქაშიდ. ლუკაშ 1:32, 33-ს ჭარჷ: „დიდ იჸუაფ თინა დო უზენაესიშ სქუა გიადვალუაფ. იეჰოვა ღორონთ თის დავითიშ, მუამუშიშ ტახტის ქიმეჩანს დო თინა მარადიულო იმეფენს იაკობიშ ჸუდეს. თიშ სამეფოს ბოლო ვაღვენუ“. თე მუხლეფიშ კითხირიშ დროს შილებე ყურადღებას აქციენდათ გაბრიელიშ სიტყვეფიშ ხვალე პირველ ნაწილს, სოდეთ ჭარჷ: „უზენაესიშ სქუა გიადვალუაფ“. მარა გაბრიელქ თინა ხოლო იწინასწარმეტყველ, ნამდა იესო იმეფენდჷ. ალბათ გოინტერესნა, მუს ფიქრენდჷ მარიამ გაბრიელიშ სიტყვეფშე. ხომ ვეფიქრენდჷ, ნამდა იესო მეფე ჰეროდეშ ვარდა თიშ ართ-ართ მემკვიდრეშ ადგილს ქიდეკინენდჷ? იესო მეფეთ გინირთუდ-და, მარიამ დედოფალ იჸუაფუდ დო თიშ ოჯახ მეფეშ სასახლეს იცხოვრენდჷ. მარა ბიბლიას სოთინ ვა რე მოშინაფილ, ნამდა თაშ ფიქრენდკო მარიამ; ვართ თიცალ აზრის შეფხვადუთ სოთინ, ნამდა მარიამქ მუთუნნერ მდგომარეობა მითხუკო ზეციერ სამეფოს, მუჭოთ თენა იესოშ ჟირ მოციქულქ აკეთ (მათ. 20:20—23). თე დეტალიშ გაგება უმოსო მარწმუნენა, ნამდა მარიამი ნამდვილო თანდაბალ რდუ!

19, 20. მუჭოთ იაკობიშ 1:22—25 დო 4:8-ს რე ეჭარილ, მუ რე ჩქინ მიზან გურაფაშ დროს?

¹⁹ ვაგგოჭყორდან, ღორონთიშ სიტყვაშ დო ქრისტიანულ პუბლიკაციეფიშ გურაფაშ მთავარ მიზან რე, უმოსო დევეახლოვათ იეჰოვას. თეს გეძინელ, მოკონა უჯგუშო ქიგებგათ, მუნერ პიროვნება ვორეთ დო მუშ თირუა მოსაჭირნა, ნამდა ღორონთიშ მოსაწონო იფცხოვრათ (წეკითხით იაკობი 1:22—25; 4:8). ირ გურაფაშ დოჭყაფაშახ, იეჰოვას ოკო ქოფთხუათ წმინდა შურ. ჩქი ქივეხვეწათ ოკო თის, ჯგირო ქუგმოგებაფუან მოჩამილ მასალა დო ქუმოძირუან, მუ მაფნა ცხოვრებას ოთირალ.

²⁰ მორთ, მივაჸუნათ ღორონთიშ ართგურ კოჩიშ მაგალითის, ნამუშ გურშენ ფსალმუნმაბირე იჩიებ: „იეჰოვაშ კანონ ოჰამ დო კითხულენს თიშ კანონს დღაშ დო სერით . . . ირფელს, მუდგას ორთუნ, ხეგომორძგვილ იჸუაფ“ (ფსალმ. 1:2, 3).