1, 2. გენწყით, მუშენ ვაქციენთ უმოს ყურადღებას ნამთინე ბიბლიურ პრინციპის, მუჟამსით ჩქინ მდგომარეობა ითირუ.

 ქორწინებაშ დღას სქვამას მონწყილ სინჯა დო მოჭყუდ ურჩქილე ბიბლიაშა გერსხილ საქორწინო მოხსენებას. თე მოხსენებას გარჩიებულ პრინციპეფ ახალ ვა რე თინეფშო, მარა თე დღაშ უკულ უმოს მეტ ყურადღებას მიაქციენა, მუშენდა უკვე, მუჭოთ დაქორწინებულ წყვილს, თე პრინციპეფ მუნეფს ხოლო ოხუ.

² თაშ რე თიმწკუმა ხოლო, მუჟამსით ქრისტიან წყვილს სქუა ქაში. წანეფიშ დინახალე თინეფს შილებე ბრელ მოხსენება აფდან მუნარჩქილეფ სქუალეფიშ რდუალაწკუმა დაკავშირებით, მარა ასე თეს განსაკუთრებულ ყურადღებას აქციენა. ბაღანაშ რდუალა მანგარ დიდ პასუხიშმგებლობა რე. მუჟამსით მდგომარეობა მათირუნა, ნამთინე ბიბლიურ პრინციპ, ნამუთ ჯგირო მიჩქნა, ჩქინო უმოს მნიშვნელოვანო გინირთუ. თენა რე მიზეზ, მუდგაშ გურშენ იეჰოვაშ თაყვანიშმცემელეფ „ირდღას“ კითხულენა წმინდა წერილეფს, მუჭოთ თენა ისრაელ მეფეეფშა რდჷ რაგადებულ; თეს გეძინელ, თინეფ ფიქრენა ნაკითხირშე (კან. 17:19).

3. მუს გუვარჩიენთ თე სტატიას?

³ მშობლეფ, თქვა ართ-ართ არძაშ უმოს დიდ პატი გერძნა, მუთ შილებე ქრისტიანს უღდას. თენა რე სქუალეფშა იეჰოვაშ გურშენ დოგურაფა. მარა თქვა თინეფს ხვალე ინფორმაცია გინოჩათინ თინა ვა გოკონან, გოკონა, სქუალეფს მანგარო ქუჸოროფუათ იეჰოვა. თე სტატიას ოთხ ბიბლიურ პრინციპის გუვარჩიენთ, მუთ თეშ კეთებას მიგეხვარებნა (2 ტიმ. 3:16). თის ხოლო ქობძირუნთ,  მუ ჯგირობუა მოუღ ნამთინე ქრისტიან მშობელს ბიბლიურ რჩევეფიშ გიმორნაფაქ.

4. მუ რე ართ-ართ პრინციპ, ნამუთ მეხვარებ მშობლეფს, სქუალეფს იეჰოვა ქუჸოროფუან?

⁴ პრინციპ 1: დოგორით იეჰოვაშ ხემძღვანელობა. ქოთხით იეჰოვას სიბრძნე, ნამდა ქიმეხვარათ სქუალეფს, ქიჸოროფუან თინა (წეკითხით იაკობიშ 1:5). თე საკითხის არძაშ უჯგუშ რჩევეფიშ მოჩამა იეჰოვას შეულებ. თეშ ორაგადეთ ბრელ მიზეზ მიღნა. გუვარჩუათ თინეფშე ჟირ: 1) თინა არძაშ უმოს გამოცდილ მშობელ რე (ფსალმ. 36:9). 2) თიშ ბრძნულ რჩევეფს ირო ჯგირობუა მოუღ (ეს. 48:17).

5. ა) მუჭო ოხვარ იეჰოვაშ ორგანიზაცია მშობლეფს? ბ) მუ დიგურეთ ვიდეოს მოჩამილ წყვილიშ მაგალითშე ბაღანეფიშ რდუალაწკუმა დაკავშირებით?

⁵ იეჰოვა მშობლეფს ხვეიანო არზენს ბიბლიაშა გერსხილ ინფორმაციას, მუთ ოხვარ თინეფს, ღორონთიშ ჸოროფათ მორდან სქუალეფ (მათ. 24:45). მაგალთო, პრაქტიკულ რჩევეფ შეილებნა ძირათ სტატიეფიშ სერიას „რჩევეფ ოჯახეფშო“, ნამუთ წანეფიშ დინახალე იბეშტუდ ჟურნალს „გეგშაკურცხით!“ დო ასე ხეშამალაფარ რე ჩქინ ვებგვერდის. თეს გეძინელ, ვებგვერდის jw.org შეილებნა ძირათ ბრელ ვიდეო, ნამუთ მიგეხვარებნა, ბაღანეფიშ რდუალაწკუმა დაკავშირებით იეჰოვაშ რჩევეფს მიაჸუნათ * (იგავ. 2:4—6).

6. მუს ფიქრენს ართ მუმა თი ხემძღვანელობაშე, ნამდგას მუ დო მუშ ოსურ იეჰოვაშ ორგანიზაციაშე ღებულენა?

⁶ ბრელ მშობელ მარდულობას გიმოხანტუნს თი მოხვარაშე, მუდგას იეჰოვაშ ორგანიზაციაშე ღებულენს. ართ მუმა, სახელო ჯო, იჩიებ: „ადვილ საქმე ვა რე სუმ სქუაშ ჭეშმარიტებას რდუალა. მა დო ჩქიმ ოსურ ირიათო ვოხვეწუთ იეჰოვას მოხვარას. ხშირას სტატია ვარდა ვიდეო ზუსტას საჭირო დროს მიშჷ. ირიათო იეჰოვაშ ხემძღვანელობას ბგორუნთ“. ჯო დო მუშ ოსურ მუნეფიშ თოლით ორწყენა, მუჭო ოხვარ თე სტატიეფ დო ვიდეოეფ სქუალეფს იეჰოვაწკუმა დაახლოებას.

7. მუშენ რე მნიშვნელოვან, მშობლეფქ ირფელ გაკეთან სქუალეფშა ჯგირ მაგალითიშ მიოჩამალო? (რომ. 2:21)

 ⁷ პრინციპ 2: ქუდაგურეთ თქვან მაგალითით. სქუალეფ ოკვირნა მშობლეფს დო უმენტაშო თის ორთნა, მუდგას თინეფშე ორწყენა. მუშო ოკო რაგად, ნამთინ მშობელ ვა რე სრულყოფილ (რომ. 3:23). თეშ უმკუჯინუო, გონიერ მშობლეფ ნამ შეულებნა ირფელს ორთნა, ნამდა სქუალეფს ჯგირ მაგალით ქიმეჩან (წეკითხით რომაელეფიშ 2:21). ბაღანეფიშ გურშენ ართ მუმა იჩიებ: „თინეფ ირფელს მაგნიტცალო მიკიჭოფანა“. უკულ გეუძინანს: „მუჟამსით ჩქინ საქმეეფ ვემურე თის, მუდგას თინეფს ვოგურუანთ, თეს აუცილებერო ქოძირნა“. თაშ ნამდა, ჩქინ სქუალეფს იეჰოვა ქუჸორდანინ თინა ქუმოკონან-და, ჩქი ხოლო მანგარო ოკო მიჸორდან იეჰოვა.

8, 9. მუ დიგურეთ ენდრიუ დო ემაშ სიტყვეფშე?

⁸ მშობლეფს ბრელნერო შეულებნა, სქუალეფს იეჰოვაშ ჸოროფა გუვითარან. ყურადღება ქიმიაქცით, მუს იჩიებ ართ 17 წანერ ჯიმა ენდრიუ: «მშობლეფ ირიათო მირაგადდეს, მუზმათ მნიშვნელოვან რე ლოცვა. ირსერს ჩქინ მუმა ჩქიმწკუმა ართო ლოცულენდჷ, თიმწკუმა ხოლო, მუჟამსით მა უკვე ნალოცებ მაფუდ. თინეფ ირიათო გუმოშინანდეს: „მუზმაშა გოკონ თიზმაშა შეილებ იეჰოვაწკუმა დორაგადაფა“. მუთ მშობლეფშე ლოცვაშ გურშენ დიბგურე ჩქიმდა მანგარო იმოქმედ. ასე თავისფალო ვეჩიებუქ იეჰოვას დო მოჸოროფე მუმაცალო უჯინექ თის». მშობლეფ, დღას ვაგგოჭყორდან, ნამდა იეჰოვაშ მიმართ თქვან ჸოროფას შეულებ ქიმეხვარას თქვან სქუალეფს, მუნეფქ ხოლო ქიჸოროფუან თინა.

⁹ გუვარჩუათ ემაშ მაგალით. თიშ მუმაქ ჸუდეშე მიდართჷ დო ოჯახის დიდ ვალ ქუდუტუ. ემა იჩიებ: „ბრელშა ჸოფე შემთხვევა, მუჟამსით ჩქიმ დიდას ფინანსურო უჭირდჷ; მარა ირიათო იჩიებუდ, მუჭო ზრუნენდჷ იეჰოვა მუშ მსახურეფშე. თიშ მაგალითშე ვორწყედ, ნამდა დასურო წანდჷ თეშ. ჩქიმ დიდა მუდგას მოგურუანდუნ, თეშ ცხოვრენდჷ“. თავრეშე ვორწყეთ, ნამდა მშობლეფს რთულ სიტუაციეფიშ დროს ხოლო შეულებნა მუნეფიშ მაგალითით დოგურაფა (გალ. 6:9).

10. მუ საშვალებეფ უღდეს ისრაელ მშობლეფს სქუალეფწკუმა ოჩიებელო? (კან. 6:6, 7)

¹⁰ პრინციპ 3: რეგულარულო ქეჩით თქვან სქუალეფს. იეჰოვაქ ჯვეშ ისრაელეფს მეჩჷ მითითება, ნამდა რეგულარულო ქუდუგურუაფდესკო სქუალეფშა მუშ გურშენ (წეკითხით კანონიშ 6:6, 7). ისრაელეფს ბრელნერ საშვალება უღდეს დღაშ დინახალე, სქუალეფწკუმა ოჩიებელო დო თინეფიშ გურს იეჰოვაშ ჸოროფაშ გამანგარებელო. მაგალთო, ბაღანაბოშ მუმაწკუმა ართო თასუნდჷ დო ეჭოფუნდჷ მოსავალს, თიშ და დიდას ელურდჷ ჭალას, შუალას დო ოჯახიშ შხვა საქმეეფს. მშობლეფ დო სქუალეფ ართო მუშობაშ დროს ბრელ მნიშვნელოვან საკითხიშ გურშენ ქიჩიებდეს. მაგალთო, იეჰოვაშ სიჯგირაშ დო თიშ გურშენ, მუჭო ოხვარუდ თინა მუნეფიშ ოჯახის.

11. მუ რე ართ-ართ ჯგირ საშვალება ქრისტიან მშობლეფშო სქუალეფწკუმა ოჩიებელო?

¹¹ ცხოვრებაქ დითირ. ბრელ ქიანას მშობლეფ დო სქუალეფ მთელ დღას ართო ვა რენა. მშობლეფ შილებე სამუშას რდან დო სქუალეფ — სკოლას, ათეშენ მშობლეფს მონდომა ოსაჭირნა, ნამდა დრო დუთმან თინეფს (ეფეს. 5:15, 16; ფილ. 1:10). თეშო ართ-ართ ჯგირ საშვალება, ოჯახურ თაყვანიშცემა რე. ართ ახალგაზრდა ჯიმა ალექსანდრე იჩიებ: „ჩქიმ მუმა ირიათო ატარენს ოჯახურ თაყვანიშცემას დო ირფელს ორთჷ, ნამდა თე დროს არძა ართო ვორდათ. ჩქი  ოჯახურ თაყვანიშცემაშ თებაშ უკულ ხოლო ვაგრძელენთ ჩიებას“.

12. მუშ მეჭირნაფას ოკო ოცადდას ოჯახიშ დუდ ოჯახურ თაყვანიშცემაშ დროს?

¹² ოჯახიშ დუდ ქორეთ-და, მუჭო შეილებნა ოჯახურ თაყვანიშცემა სასიამოვნოთ გინაშქვათ თქვან სქუალეფშო? გეგმირინეთ სქუალეფშა ოგურაფალო ახალ პუბლიკაცია „მარადიულო გეხარით ცხოვრებათ!“. თენა სქუაწკუმა ჯგირ ჩიებაშ საშვალებას მერჩანა. თქვა გოკონა, ქიგეგათ სქუალეფიშ აზრეფ დო გრძნობეფ, ათეშენ ოჯახურ თაყვანიშცემა ვეგმირინუათ თინეფშა შენიშვნაშ მიოჩამალო ვარდა ჭკუაშ ოგურაფალო. ქეცადით, გურქ ვა მოირთან, მუჟამსით სქუალეფ თიცალ მუდგარენს ქოთქუანა, მუთ ოწინააღმდეგ ბიბლიურ პრინციპეფს. გოხიოლდან, ნამდა თქვანწკუმა გულწრფელო იჩიებნა დო ქიმეჩით საშვალება, თავისფალო გეგმოხანტან მუნეფიშ აზრეფ. არძაშ უჯგუშო თიმწკუმა მუგახვარნენა სქუალეფშა, მუჟამსით გარჩქვენუნა, სინამდვილეს მუ უღნა გურს.

13. ხოლო მუ საშვალებეფ უღნა მშობლეფს, ნამდა სქუალეფს იეჰოვაწკუმა დაახლოებას ქიმეხვარან?

¹³ მშობლეფ, დღაშ დინახალე დოგორით საშვალებეფ, ნამდა ქიმეხვარათ სქუალეფს იეჰოვაწკუმა დაახლოებას. თეშო იშენ-იშენ ბიბლიაშ გურაფაშ ჩატარებაშ დროს ვა უჯინათ. ყურადღება ქიმიაქცით, მუს იჩიებ ართ დიდა, სახელო ლიზა: „სქუალეფს ვოხვარუდით, გუნაჭყეფუეფშე დაკვირებათ იეჰოვაშ გურშენ ქუდუგურუაფდესკო. მაგალთო, მუჟამსით ჩქინ ჯოღორეფიშ ლაჸაფ ბაღანეფს მანგარო ოძიცინუანდჷ, თინეფს ეუნწყუნდით, ნამდა თავრეშე იძირედ, მუნერ იუმორიშ გრძნობა უღჷ ჩქინ გუმაჭყაფალს, ნამდგაქ მუჩეს საშვალება, ცხოვრებათ გეფხარათ“.

14. მუშენ რე მნიშვნელოვან, მშობლეფქ ქიმეხვარან სქუალეფს, ნამდა ჸუნდან ჯგირ მეგობრეფ? (იგავ. 13:20)

¹⁴ პრინციპ 4: ქიმეხვარით სქუალეფს, ჸუნდან ჯგირ მეგობრეფ. ბიბლია არგამათ იჩიებ, ნამდა ჩქინ მეგობრეფს შეულებნა მუჭოთ ჯგირონ, თეშ გლახათ იმოქმედან ჩქინდა (წეკითხით იგავეფიშ 13:20).  მშობლეფ, ქიჩინენთო თქვან სქუალეფიშ მეგობრეფს? ქორეთო შენახვამლეფ დო ქორშიბნანო თინეფწკუმა ურთიერთობაშ საშვალება? მუ ოკო აკეთათ, ნამდა თქვან სქუალეფს მეგობრეფ იეჰოვაშ მოჸოროფეეფ შქას ჸუნდან? (1 კორ. 15:33). ქუდაპატიჟით ჸუდეშა თინეფ, მიდგას ჯგირ ურთიერთობა უღნა იეჰოვაწკუმა, ნამდა მუდგარენ საქმეეფ ართო გაკეთათ. თეშნერო შეგალებენა, ქიმეხვარათ თქვან სქუალეფს, ჯგირ მეგობრეფ ჸუნდან (ფსალმ. 119:63).

15. მუჭო შეულებნა მშობლეფს, ქიმეხვარან სქუალეფს, ჸუნდან ჯგირ მეგობრეფ?

¹⁵ გუვარჩუათ ართ მუმაშ, ტონიშ, შემთხვევა. თიქ დო თიშ მეუღლექ ირფელ გაკეთეს, ნამდა ქუმუხვარებდესკო სქუალეფშა, ჸუნდესკო ჯგირ მეგობრეფ. თინა იჩიებ: „მა დო ჩქიმ ოსურ წანეფიშ დინახალე ვაპატიჟენდით ჸუდეშა ბრელ და დო ჯიმას. თინეფ შხვადოშხვა ასაკიშ დო ართიანშე განსხვავებულეფ რდეს. თე და დო ჯიმალეფ ჩქინწკუმა ართო სადილენდეს დო ოსწრუდეს ჩქინ ოჯახურ თაყვანიშცემას. თენა არძაშ უჯგუშ საშვალება რე, გეჩინებაფუე თინეფ, მიდგას უჸორა იეჰოვა დო ხიოლით ომსახურნა თის. მიღდეს დიდ პატი, ჸუდეს პჸუნდესკო რაიონულ ზედამხედველეფ, მისიონერეფ დო შხვეფ. თინეფიშ გამოცდილებაქ, მონდომაქ დო დუდგინოდვალირობაქ მანგარო იმოქმედ ჩქინ სქუალეფშა დო მეხვარ იეჰოვაწკუმა დაახლოებას“. მშობლეფ, დერწმუნით, ნამდა თქვან სქუალეფს ჯგირ სამეგობრო ჸუნა.

16. მუნერ ოკო რდას ჩქინ რეაქცია, მუჟამსით სქუა მიწინა, ნამდა ვაკო, იეჰოვას ემსახურას?

¹⁶ მინშა, ჩქინ დიდ მონდომაშ უმკუჯინუო, სქუაქ შილებე მიწუან, ნამდა ვაკო იეჰოვაშ მსახურება. თეცალ დროს ვეფიქრათ, ნამდა თენა თქვან ბრალ რე. იეჰოვაქ არძას, თინეფ შქას ჩქინ სქუალეფს, მეჩჷ ნებაშ თავისუფლება. თენა ნიშნენს, ნამდა მუნეფიშით შეულებნა გიშეგორან, ემსახურებნა დო ვარ ღორონთის. თქვან სქუაქ იეჰოვა ქიდიტუ-და, ვადინუათ იმენდ, ნამდა თინა აკა დღას დირთუ. ქიგიშინით შარასეჩილათირ სქუაშ მაგალით (ლუკ. 15:11—19, 22—24). თე ახალგაზრდა კოჩიქ მანგარო ეჩირთჷ ჭეშმარიტებაშ შარას, მარა ბოლოს იშენით  დირთჷ. ნამთინექ შილებე თქუას: „თენა ხომ უბრალოთ მაგალით რე. ქიშილებენო რეალურო თაშ ქუმოხვადას?“ ქო, თენა შეიოლებერ რე. თაშ მოხვად ართ ახალგაზრდაშ, ილიშ, შემთხვევას.

17. მუჭო ელაიკინანა გურშა ილიშ შემთხვევა?

¹⁷ მშობლეფიშ გურშენ ილი იჩიებ: „თინეფქ ირფელ გაკეთეს, ნამდა იეჰოვა დო თიშ სიტყვა ქიპჸოროფეკო. სოდგარენ 15 წანერო გინიფრთინ, მითინს ვა უჯერდჷ“. ილიქ ტყობაშე თიცალ მუდგარენეფიშ კეთება ქიდიჭყჷ, მუთ არასწორ რდჷ დო ვა ურჩქილედ მშობლეფს, მით თიშ მოხვარას ოცადდეს. ჸუდეშე მიდართუნ, გლახა საქმეეფს ქიმეკიდ ხე. თეშ უმკუჯინუო, მინშა მუშ ართ მეგობარწკუმა ბიბლიურ თემეფიშ გურშენ იჩიებუდ. ილი იშინანს: „მუთ უმოსო ვეჩიებუდ მეგობარს იეჰოვაშ გურშენ, თით უმოსო ფიფქრენდჷ თიშე. ჩქიმ გურს ჭეშმარიტებაშ თას ალაძუდ, ნამდგაშ ინათასალო ჩქიმ მშობლეფქ ბრელ იხანდეს დო ასე თე თასიქ რდუალა ქიდიჭყჷ“. დროშ მიკულაშ უკულ ილიქ დირთჷ ჭეშმარიტებაშა. * წერმიდგინით, მუ ბედნერეფ იჸუაფდეს თიშ მშობლეფ, ნამდა ბაღანობას თის იეჰოვა ქუჸოროფუეს (2 ტიმ. 3:14, 15).

18. მუს გინაფლენთ თი მშობლეფიშ მიმართ, მით ირფელს ორთნა, ნამდა სქუალეფს იეჰოვა ქუჸოროფუან?

¹⁸ მშობლეფ, თქვა მუგაჩეს დიდ პატიქ, მორდათ იეჰოვაშ თაყვანიშმცემელეფიშ ახალ თაობა (ფსალმ. 78:4—6). თენა ვა რე ადვილ საქმე დო მოკონა, მთელ გურით გოცქუათ თქვან სქუალეფიშ მახვარებელო გიმორჩქინელ უშულად ხანდაშენ. მუჟამსით ირფელს გაკეთენთ, ნამდა თქვან სქუალეფს ქუჸოროფუათ იეჰოვა დო ქიმეხვარათ თიშ მცნებეფიშ მეჸუნას, შეილებნა დარწმუნებულ რდათ, ნამდა მოჸოროფე ზეციერ მუმას გურს გუხარენთ (ეფეს. 6:4).