1. მუშენ მოსაჭირნა ღორონთიშ სიბრძნე? (იგავ. 4:7)

 მუჟამსით მნიშვნელოვან გადაწყვეტილება გაფდეს მიოღებელ, თქვა ალბათ ლოცულენდით, ღორონთიქ სიბრძნე ქიმერჩესკო, მუშენდა გიჩქუდეს, ნამდა თენა გოსაჭირდეს (იაკ. 1:5). მეფე სოლომონქ ჭარჷ: „სიბრძნე არძაშ უმოს მთავარ რე“ (წეკითხით იგავეფიშ 4:7). მუშო ოკო რაგად, სოლომონ არძანერ სიბრძნეშ გურშენ ვეჩიებუდ. თიშ სიტყვეფ ოხუდ სიბრძნეს, ნამუთ იეჰოვა ღორონთშე მოურს (იგავ. 2:6). მარა ქეშულებნო თე სიბრძნეს, ქიმმეხვარან თი პრობლემეფიშ გერჯგინას, ნამდგას ამდღა ფხვადუთ? პასუხის თე სტატიაშე ქობძირუნთ.

2. მუ რე ართ-ართ საშვალება, მუდგათ შემლებნა ნამდვილ სიბრძნეშ გავითარება?

² ართ-ართ საშვალება, მუდგათ შემლებნა გუვავითარათ ნამდვილ სიბრძნე, თი ჟირ პიროვნებაშ ნარაგადშა დაკვირება რე, მით მანგარ ბრძენ რდჷ. დიო სოლომონიშ გურშენ ქიფჩიებუთ. ბიბლიას ჭარჷ: „ხვეიანო ქიმეჩ ღორონთიქ სოლომონს სიბრძნე დო ინონჭაფაშ უნარ“ (1 მეფ. 4:29). უკულ ქიფჩიებუთ იესოშ გურშენ, ნამდგაშ სიბრძნეშა დედამიწას მითინს ველაჸუნნე (მათ. 12:42). იესოშ გურშენ ნაწინასწარმეტყველებ რდჷ: „თიწკუმა იჸუაფ იეჰოვაშ შურ, სიბრძნეშ დო გონიერებაშ შურ“ (ეს. 11:2).

3. მუ იჸუაფ გარჩიებულ თე სტატიას?

³ ღორონთშე მეღებულ სიბრძნეშ ჭყოლოფათ სოლომონ დო იესოქ პრაქტიკულ რჩევეფ თქუეს თი საკითხეფწკუმა დაკავშირებით, ნამუთ ჩქინო ხოლო მნიშვნელოვან რე. თე სტატიას გარჩიებულ იჸუაფ სუმ საკითხ: გაწონასწორებულ დამოკიდებულება 1) ფარაშ მიმართ, 2) სამუშაშ მიმართ დო 3) ჩქინ დუდიშ მიმართ.

4. მუ განსხვავებულ ეკონომიკურ მდგომარეობა უღდეს სოლომონ დო იესოს?

⁴ სოლომონ მანგარ მდიდარ კოჩ რდჷ დო ფუფუნებას ცხოვრენდჷ (1 მეფ. 10:7, 14, 15). თეშ გინაწონს, იესოს ბრელ მუთუნ ვაპალუდ. თის მუშ ჸუდე ხოლო ვა უღუდ, მარა ჟირხოლოს გაწონასწორებულ თვალსაზრის უღუდ მატერიალურ ნივთეფიშ მიმართ, მუშენდა ჟირხოლოს იეჰოვა ღორონთშე უღუდ სიბრძნე.

5. მუ გაწონასწორებულ აზროვნება უღუდ სოლომონს ფარაშ მიმართ?

⁵ სოლომონქ თქუ, ნამდა ფარა კოჩის თხილანს (ეკლ. 7:12). ფარათ შემლებნა ქიმკვოჯინათ ჩქინ აუცილებერ საჭიროებეფს დო მინშა თის ხოლო, მუთ აუცილებერ ვა რე, მარა უბრალოთ მოკონა. მართალ რე, სოლომონ მანგარ მდიდარ რდჷ, მარა არჩქილედ, ფარაშე ბრელით უმოს მნიშვნელოვან მუდგარენეფ არსებენდჷ. მაგალთო, თიქ ჭარჷ: „ჯგირ სახელ უჯგჷ ბრელ ქონებას“ (იგავ. 22:1). სოლომონ თის ხოლო ორწყედ, ნამდა ფარამ ხალხ, მუთ უღუდუნ თით, ნაკლებო რდჷ ბედნერ (ეკლ. 5:10, 12). თიქ გუმაფრთხილეს, ნამდა ვეფიფქრათ, ითამ ფარა არძაშ უმოს მნიშვნელოვან რე. ფარა ართ წუთის რე დო მაჟია წუთის — ვარ (იგავ. 23:4, 5).

6. მუნერ გაწონასწორებულ დამოკიდებულება უღუდ იესოს მატერიალურ ნივთეფიშ მიმართ? (მათ. 6:31—33)

⁶ იესოს გაწონასწორებულ დამოკიდებულება უღუდ მატერიალურ ნივთეფიშ მიმართ. თინა სიამოვნებას ღებულენდჷ ჭკუმუა დო შუმაშე (ლუკ. 19:2, 6, 7). მუშ პირველ სასწაულით თიქ წყარ მაღალ ხარისხიშ ღვინო გინაშქვჷ (იოან. 2:10, 11). თეს გეძინელ, ღურაშ დღას ძვირიან ბარგ მიკაქუნდჷ (იოან. 19:23, 24). მარა იესოს მატერიალურ ნივთეფშა ვემუჩამ საშვალება, მუშ ცხოვრებას მთავარ ადგილ ქიდეკინკო. თიქ მოწაფეეფს უწუ: „მითინს ვეშულებ რდას ჟირ ბატონიშ მონა . . . ვეშქალებენა ქოთ ღორონთიშ მონა რდათ დო ქოთ — ქონებაშ“ (მათ. 6:24). იესო ოგურუანდჷ, ნამდა ღორონთიშ სამეფოს პირველ ადგილს ქიგვორინუანთ-და, იეჰოვა იზრუნენს ჩქინ საჭიროებეფშენ (წეკითხით მათეშ 6:31—33).

7. მუჭო იჸუ ართ ჯიმაქ კურთხეულქ ფარაშ მიმართ გაწონასწორებულ დამოკიდებულებაშ გურშენ?

 ⁷ ბრელ ჩქინ და დო ჯიმაშა ჯგირობუა მოუღ ღორონთიშ სიბრძნეშ მეჸუნას, მუჟამსით საქმე ოხუ ფარას. გუვარჩუათ ართ დაუქორწინებელ ჯიმაშ, დანიელიშ, მაგალით. თინა იჩიებ: „ახალგაზრდობას გინობჭყვიდ, სულიერ საქმეეფ ჩქიმ ცხოვრებას არძაშ უმოს მნიშვნელოვან ადგილშა ქიგემრინუაფუდკო“. დანიელქ გემარტივ ცხოვრება, მუდგაქ საშვალება ქიმეჩ, მუშ დრო დო უნარეფ თეოკრატიულ საქმეეფშო გეგმურინუაფუდკო. თინა აგრძელენს: „ალალას შემლებ ფთქუე, ნამდა დღას ვამნარღებ ჩქიმ გადაწყვეტილება. მუშო ოკო რაგად, ბრელ ფარაშ შიბა შემალებედ თინა ჩქიმ ცხოვრებას მთავარ ადგილს ქიგერდუკონ. მარა ქეშიალებედუო თის ამდღა პჸუნსუნ თი მეგობრეფიშ მანგიორობა ვარდა ქეშიალებედუო, ქუმომიღკო თიცალ ბედნერობა, მუთ ჩქიმ ცხოვრებას ღორონთიშ სამეფოშ პირველ ადგილშა გერნაფას მოუღ?! მუთუნნერ ფარას ვათირე თი კურთხევეფ, ნამუთ იეჰოვაქ მუჩჷ“. არგამა რე, კურთხეულ თიმწკუმა ვორეთ, მუჟამსით მთავარ ყურადღება ფარაშა ვარინ, სულიერ საკითხეფშა მაფნა გინოღალირ.

8. სოვრეშე მიჩქნა, ნამდა სოლომონს სამუშაწკუმა დაკავშირებით გაწონასწორებულ დამოკიდებულება უღუდ? (ეკლ. 5:18, 19)

⁸ სოლომონქ თქუ, ნამდა ხანდას შეულებ ხიოლ მომღან, მუდგას თიქ „ღორონთშე მეღებულ ძღვინ“ გიოდვჷ (წეკითხით ეკლესიასტეშ 5:18, 19). თიქ ჭარჷ: „ირნერ ხანდა საჯგირობუო რე“ (იგავ. 14:23). სოლომონს ჯგირო არჩქილედ თე საკითხ; თინა ბრელს ხანდენდჷ. მაგალთო, თიქ გედგჷ ჸუდეეფ, გაშენ ობინეხეეფ, მანწყუ ბაღეფ დო ოწყარალ აუზეფ დო ქალაქეფ ხოლო გაშენ (1 მეფ. 9:19; ეკლ. 2:4—6). თეს ბრელ ხანდა ოსაჭირუდ დო, მუშო ოკო რაგად, სოლომონშა დიდ ხიოლ მოუღუდ. მარა ნამდვილ ბედნერობაშ მიოღებელო თიქ ხვალე თეს ვეგეჯერდჷ. თიქ ბრელ მუდგარენ აკეთ იეჰოვაშო. მაგალთო, იდუდ იეჰოვაშ ოთაყვანებელო დიდებულ ტაძარიშ აშენება, ნამუთ შქვით წანას მიშჷ (1 მეფ. 6:38; 9:1). ბრელ საქმეშ კეთებაშ უკულ სოლომონქ დერწმუნ, არძაშ უმოს მნიშვნელოვან, მუთ შეულებ ადამიანს აკეთას, იეჰოვაშ მსახურება რე. თიქ თქუ: „თე ირფელიშ მორჩქილაფაშ უკულ დასკვნა თეცალ რე: ღორონთშა გოშქურდას დო მიაჸუნ თიშ მცნებეფს“ (ეკლ. 12:13).

9. მუჭო მეურჩქინ იესოქ სამუშას მუშ ადგილ?

⁹ დედამიწას რდუნ იესო ბრელს ხანდენდჷ. თინა დუდშე ჯაშ მოხელე რდჷ (მარ. 6:3). მუშო ოკო რაგად, მშობლეფ დაფასენდეს თიშ ხანდას, მუდგას მუნეფიშ დიდ ოჯახშო ორთუდ. თინა სრულყოფილ რდჷ, ათეშენ ბრელს ოკოდკონ იჸიდ თიშ ნახელუან, მუშენდა მაღალ ხარისხიშ იჸუაფუდ. თის მანგარო მოწონდჷ თე საქმეშ კეთება, მარა სულიერ საქმეეფშო გიშართილ დროს თეს ვა უთმენდჷ (იოან. 7:15). უკულ, მუჭოთ სრულ დროთ მსახურქ, მუშ მარჩქილეეფს ელუჩ: „თიცალ საზრდოშო ვეხანდათ, ნამუთ გილელებ, თიშო იხანდით, ნამუთ მარადიულ სიცოცხლეს მოიღანა“ (იოან. 6:27). თეს გეძინელ, გვალას ქადაგებაშ დროს თქუ: „დოშაყარეთ ქონება ზეცას“ (მათ. 6:20).

10. მუ პრობლემაქ შილებე მიკორჩქინდას სამუშაწკუმა დაკავშირებით?

¹⁰ სიბრძნე, ნამუთ ღორონთშე მოურს, მოხვარნა, გაწონასწორებულ დამოკიდებულება მიღდან სამუშაშ მიმართ. მუჭოთ ქრისტიანეფ, ბგურაფლენთ, ნამდა „გურგედვალირო დო პატიოსანო იფხანდათ“ (ეფეს. 4:28). დამსაქმებელეფ ხშირას ორწყენა  ჩქინ პატიოსნებას დო გურგედვალირობას დო შილებე მიწუან, ნამდა აფასენა თეს. დამსაქმებელს იეჰოვაშ მოწმეეფიშ გურშენ ჯგირ წარმოდგენაქ ქაშუასინ, შილებე სამუშა დროს ქიგნუძინათ, მარა თექ ოჯახშო დო სულიერ საქმეეფშო გიშართილ დრო მიდამღან. თაშ ნამდა, ქივეცადათ უმოს მნიშვნელოვანშო მეტ დრო მაფდან გიშართილ, მუდგაშო საჭირო რე, არძა საქმე სწორაშე ქუდვონწყუათ.

11. მუჭო დიგურუ ართ ჯიმაქ, სამუშაშ მიმართ გაწონასწორებულ დამოკიდებულება უღუდკო?

¹¹ ჯიმა უილიამქ უხუცესწკუმა ართო მუშობაშ დროს ქოძირ, მუ ჯგირ რე, სამუშას მუშ დრო ქიმურჩქინე. უილიამ იჩიებ: „[თე ჯიმა] ჯგირ მაგალით რე თიშ, მუჭო შილებე სამუშაშ მიმართ გაწონასწორებულ დამოკიდებულება მიღდან. თინა ბრელს ხანდენს დო კლიენტეფწკუმა ხოლო ჯგირ ურთიერთობა უღჷ, მუშენდა ხარისხიანო ორთჷ საქმეს. მარა სამუშა დღა გეთებუნ, თის მთელ ყურადღება ხვალე ოჯახშა დო იეჰოვაშ თაყვანიშცემაშა აფჷ გინოღალირ. ვაიფულუნთ დო თიცალ ბედნერ კოჩ შურო ვა მაფჷ შენახვამლეფ“. *

12. მუჭო ოძირუ სოლომონქ, ნამდა მუშ დუდიშ მიმართ გაწონასწორებულ დამოკიდებულება უღუდ დო მუჭო ოდინუ თენა?

¹² იეჰოვაშ ართგურ მსახურ რდუნ თიმწკუმა სოლომონს გაწონასწორებულ დამოკიდებულება უღუდ მუშ დუდიშ მიმართ. ახალგაზრდობას თის არჩქილედ, ნამდა ბრელ მუთუნ ვეშულებუდ დო იეჰოვას თხინდჷ ხემძღვანელობას (1 მეფ. 3:7—9). მეფობა ახალ დოჭყაფილ აფუდუნ, თის არჩქილედ, მუზმათ ოშქურანჯ რდჷ სიამაყე. თიქ ჭარჷ: „სიამაყეს დონთხაფა მოჸუნს დო მიდგას შხვეფიშ უმოსო მეუღ დუდ, ქეკახაბარკუ“ (იგავ. 16:18). სანარღოთ, ჭიჭე ხანშა კინ სოლომონქ ქინიჭკირ თე საქმეს. თიქ გეამაყ დო ღორონთიშ მოთხოვნეფს გინურთჷ.  მაგალთო, თიქ გინურთჷ კანონს, ნამუთ ისრაელ მეფეეფშა რდჷ მეჩამილ. თე კანონს ჭარუდ: „ვართ ბრელ ოსურ მიჸონას, ნამდა ვეგნურთას სწორ შარაშე“ (კან. 17:17). სოლომონს 700 ოსურ დო 300 ხარჭა ჸუნდჷ, ნამდგაშე ბრელ ტყურა ღორონთეფიშ თაყვანიშმცემელ რდჷ (1 მეფ. 11:1—3). სოლომონ ალბათ მუთუნნერ პრობლემას ვარწყედ, მარა უკულ დაუმორჩილებლობაშ გლახა შედეგეფ გეგმოცად (1 მეფ. 11:9—13).

13. მუშ გურაფა შემლებნა იესოშ თანდაბლობაშე?

¹³ იესოს გაწონასწორებულ დო თანდაბლურ დამოკიდებულება ვა უდინუაფ მუშ დუდიშ მიმართ. დედამიწაშა მოულაშახ თიქ ბრელ დიდებულ საქმე აკეთ ზეცას იეჰოვაშ მსახურებაშო. „თიშ მონაწილებათ გორჩქინდჷ შხვა ირფელქ ზეცას დო დედამიწას“ (კოლ. 1:16). მუჭოთ იძირენ, ნათუაშ დროს იესოს ირფელქ ქუგაშინ, მუთ მუშ მუმაწკუმა ართო აფუდ ნაკეთებ (მათ. 3:16; იოან. 17:5). მარა თეს თინა ვა გუამაყებ. პირიქით, მითინშე უმოსო ვეგურინუაფ მუშ დუდ. თიქ მოწაფეეფს უწუ: „ვართ კოჩიშ სქუას მოურთუმ თიშენ, ნამდა მუს მემსახურან. თიქ თიშენ მორთჷ, ნამდა იშო მემსახურას შხვეფს დო შეწირას მუშ სიცოცხლე ბრელიშ გიშაჸიდირალო“ (მათ. 20:28). თინა მოკრძალებურო აღიარენდჷ, ნამდა მუშით მუთუნიშ კეთება ვეშულებუდ (იოან. 5:19). იესოს მართალო ვარკუდ თანდაბლობა. თიქ ჯგირ მაგალით დომტუეს.

14. მუ შემლებნა დიბგურუათ იესოშე ჩქინ დუდიშ მიმართ სწორ დამოკიდებულებაშ გურშენ?

¹⁴ იესო მუშ მიმაჸუნალეფს ოგურუანდჷ, სწორ დამოკიდებულება უღდესკო მუნეფიშ დუდიშ მიმართ. ართშა თინეფს უწუ: „თქვან დუდის თუმაშ ღერეფ ხოლო კოროცხილ რე“ (მათ. 10:30). თე სიტყვეფ მანგარ გურიშემაქექაფალ რე ჩქინო, განსაკუთრებულო თიმწკუმა, მუჟამსით ჩქინ დუდიშ მიმართ უარყოფით დამოკიდებულება მირჩქინდუნა. თავრეშე ვორწყეთ, ნამდა ზეციერ მუმაშ თოლს მანგარ ძვირფასეფ ვორეთ. იეჰოვაქ მუშ თაყვანიშმცემელეფ ვორდათინ თიშ უფლება ქომჩეს დო თის ახალ ქვეყნიერებას მაცხოვრებელეფო ქიმვორჩქუთ-და, მუშენ ოკო  იფიფქრათ, ნამდა თინა ვა რე მართალ დო ჩქი თეშ ღირსეფ ვა ვორეთ?!

15. ა) მუნერ გაწონასწორებულ დამოკიდებულებაშ გავითარებას ელამჩანა „გინაჯინალ კოშკი“? ბ) მუჭოთ 24-ა გვერდის მოჩამილ სურათშე იძირე, მთელ ყურადღებას ჩქინ დუდშა გეგნიბღანთ-და, მუ კურთხევეფს მივოდინუანთ?

¹⁵ სოდგარენ 15 წანაშ წოხოლე „გინაჯინალ კოშკი“ ელამჩანდეს, ნამდა ჩქინ დუდიშ მიმართ გაწონასწორებულ დამოკიდებულება მიღდესკო. თე ჟურნალს ჭარუდ: «საჭირო რე, დუდ შხვეფშე უმოსო ვემემღუდან დო ვა ვორდათ ამაყეფ. მარა, თეწკუმა ართო, თინა ხოლო ვეჸუაფ ჯგირ, ნამდა შურო მუთუნო ვემიფრჩქინათ დუდ. ჩქი მოკონა, მარჩქილედან, მუ რე ჩქინ ძალიერ დო სუსტ მხარეეფ. ართ ქრისტიან ოსურკოჩ თეს თეშნერო ენწყუნს: „მანგარ გლახა პიროვნება ვა ვორექ, მარა თიშ რაგად ხოლო ვეშემლებ, ნამდა არძაშ უჯგუშ ვორექ. მა ქოთ ჯგირ მხარეეფ მიღჷ დო ქოთ გლახა, მუჭოთ არძას“». * არგამათ ვორწყეთ, მუშენ რე ჯგირ, გაწონასწორებულ დამოკიდებულება მიღდან ჩქინ დუდიშ მიმართ.

16. მუშენ მარზენა იეჰოვა ბრძნულ რჩევას?

¹⁶ მუშ სიტყვაშ საშვალებათ იეჰოვა ბრძნულ ხემძღვანელობას მარზენა. თის ჩქი უჸორთ დო ოკო, ნამდა ბედნერეფ ვორდათ (ეს. 48:17, 18). ჭკვერულ გადაწყვეტილება, ნამდგას ჩქინდა დიდ ბედნერობა მოუღ, ცხოვრებას იეჰოვაშ პირველ ადგილშა გერნაფა რე. თეშნერო ჩქი ეიფჩილითუანთ ბრელ პრობლემას, ნამდგას ხვადუნა თინეფ, მიდგას ყურადღება ფარაშა, სამუშაშა დო მუნეფიშ დუდშა აფნა გინოღალირ. მორთ გინოჭყვიდილ მაფდან, მიფქცუათ ბრძნულო დო გურ გუხარათ იეჰოვას (იგავ. 23:15).