ᲝᲒᲣᲠᲐᲤᲐᲚ ᲡᲢᲐᲢᲘᲐ 22
ვემიოტუათ „სიწმინდეშ შარას“ გილულა
«გიკვალუ თექ შარა . . . „სიწმინდეშ შარა“» (ᲔᲡ. 35:8).
ᲝᲑᲘᲠᲔᲨᲘ 31 გილართ ღორონთწკუმა ართო!
ᲨᲘᲜᲐᲐᲠᲡ a
1, 2. მუ მნიშვნელოვან გადაწყვეტილებაშ წოხოლე ქიგედირთეს იუდეველეფქ? (ეზრ. 1:2—4).
ᲛᲔᲤᲔᲥ განცხადება აკეთ! თიქ თქუ, ნამდა იუდეველეფ, მით 70 წანას ბაბილონს ტყვეობას რდეს, გეთავისფალეს დო შეულებდეს, დირთესკო მუნეფიშ მშობლიურ ქიანაშა — ისრაელშა (წეკითხით ეზრაშ 1:2—4). არგამა რდჷ, თე ირფელს იეჰოვა მიკურდჷ დო ირფელქ თიშ ჭყოლოფათ მოხვად, მუშენდა, მუჭოთ წესინ, ბაბილონს ტყვეეფს ვათავისფალენდეს (ეს. 14:4, 17). მარა თიმ პერიოდის ბაბილონ დონთხაფილ რდჷ დო ახალ მეფექ უწუ იუდეველეფს, ნამდა შეულებდეს დირთესკო მუნეფიშ ქიანაშა. იუდეველეფქ, განსაკუთრებულო ოჯახიშ დუდეფქ, გადაწყვეტილებაშ წოხოლე ქიგედირთეს. თინეფქ ოკო გინოჭყვიდესკო, დიტენდესო ბაბილონს დოვარ დოსქიდუდეს თექ. თეშ გინოჭყვიდუაქ შილებე ადვილქ ვეჸუკო თინეფშო. მუშენ იფჩიებუთ თეს?
2 ნამთინე იუდეველ ხანშამიშულირ რდჷ. ათეშენ შილებე გუჭირდკო თეშმაშორა შარაშ ულა. უმენტაშიქ ხოლო ბაბილონს დებად, თექ ირდჷ დო შხვა ქიანას დღას ვა უცხოვრებ. თინეფშო ისრაელ მშობლიურ ქიანა ვარინ, მუნეფიშ ჯვეშეფიშ ნოხორ რდჷ. ნამთინე იუდეველს ბაბილონს ირფელ ჯგირო აფუდ ენწყილ. ათეშენ, თინეფშო ადვილ ვეჸუაფუდ, ქიდიტესკო კომფორტულ ჸუდეეფ, მუნეფიშ საქმე დო გეგნორთესკო თიცალ ქიანაშა, სოდეთ დღას ვა უცხოვრებნა.
3. მუ კურთხევა ელდეს თი ართგურ იუდეველეფს, მით ისრაელშა დირთუდეს?
3 მართალ რე, ართგურ იუდეველეფს ბაბილონიშ დატებელო მსხვერპლშა აჸიდეს ოულარ, მარა ჯგირო უჩქუდეს, ნამდა ისრაელშა დორთათ ბრელით უმოს კურთხევეფს მიღენდეს. არძაშ უმოს დიდ კურთხევა თინა რდჷ, ნამდა თექ შეიალებედეს, ღორონთის თავისფალო ცესკო თაყვან. მართალ რე, ბაბილონს 50-შე უმოს ტაძარ რდჷ, მარა თინეფ შქას ნამთინ ვა რდჷ იეჰოვაშ, მუშენდა არძას ტყურა ღორონთეფს ცენდეს თაყვანს. თი ქალაქის სამსხვერპლოეფ ხოლო ვა რდჷ, სოდეთ ისრაელეფს შეიალებედეს მსხვერპლიშ შეწირუა, მუდგას მოსეშ კანონ ითხინდჷ თინეფშე, დო ვართ მღვდელეფ რდეს, მით თე საქმეს შეასრულენდეს. თეს გეძინელ, ბაბილონს ღორონთიშ ხალხშე უმოს თინეფ რდეს, მიდგას იეჰოვა დო თიშ ნორმეფ მუთუნო ვემიორჩქუდეს. თაშ ნამდა, ვითანთასობით ღორონთიშმოშიშ იუდეველს შურ ოლუდ, მუჟამ დირთუდ მშობლიურ დიხაშა, სოდეთ შეიალებედეს, კინ აღადგინესკო ჭეშმარიტ თაყვანიშმცემლობა.
4. მუს დეპირ იეჰოვაქ თი იუდეველეფს, მით ისრაელშა ირთუდეს?
4 იუდეველეფს ბაბილონშე ისრაელშა რთულ შარა აჸიდეს ოულარ, მუდგაშოთ სოდგარენ ოთხ თუთა დესაჭირებდეს. მარა იეჰოვაქ დეპირ, ნამდა ჩაუთხინუანდჷ ნებისმიერ დაბრკოლებას, მუდგაქ შილებედ თინეფს ისრაელშა დორთას ეცილკო. ესაიაქ ჭარჷ: „მამზადით იეჰოვაშ შარა! მასწორით ჩქინ ღორონთშო ოულარ შარა, ნამუთ უდაბნოს მიკურს . . . ართმანგ ვარენ ფერ დიხაქ გემანგას დო ოღროჩოღრო ადგილეფქ გესწორას“ (ეს. 40:3, 4). წერმიდგინით სწორ შარა, ნამუთ უდაბნოს მეურს. მუშო ოკო რაგად, თეცალ შარას გილულა უმოს უჯგუშ იჸუაფუდ, ვინემ ოღროჩოღრო დო ართმანგ ვა რდუნ ფერ ადგილეფს გილულა. ათეშენ, იუდეველეფშო უმოს სასიამოვნო დო ადვილ იჸუაფუდ თე ოთხ თუთიან მგზავრობა დო უმოს მალას ხოლო გენიშეს ისრაელშა.
5. მუ სახელით რე ბიბლიას მოშინაფილ თი სიმბოლურ შარა, ნამუთ ბაბილონშე ისრაელშა მიშჷ?
5 ამდღა ნამთინე შარას უღჷ სახელ დო ნამთინეს — ნომერ. მუჭოთ წინასწარმეტყველ ესაიაქ ჭარჷ, თე სიმბოლურ შარას ხოლო უღუდ სახელ. ბიბლიას ბკითხულენთ: «გიკვალუ თექ შარა დო თის „სიწმინდეშ შარა“ ქიგიადვალუ; თექ უწმინდურს ვეგლართედას იჸი» (ეს. 35:8). მუს ნიშნენდჷ თე დუნაპირებ ისრაელეფშო დო მუს ნიშნენს ამდღა ჩქინო?
„ᲡᲘᲬᲛᲘᲜᲓᲔᲨ ᲨᲐᲠᲐ“ ᲣᲚᲘᲠᲡ ᲓᲝ ᲐᲛᲓᲦᲐ
6. მუშენ რდჷ თე შარა წმინდა?
6 „სიწმინდეშ შარა“ — მართალო მუ დიდებულ სახელ რე! მუშენ რდჷ თე შარა წმინდა? მუშენდა, აღდგენილ ისრაელ ერს ვეჸუაფუდ ადგილ „უწმინდურეფშო“ — თი იუდეველეფშო, მით უზნეო ცხოვრებას მეჸუნდეს, კერპთაყვანიშმცემელეფ რდეს ვარდა სერიოზულო ცოდენდეს. თეშ მიზეზ თინა რდჷ, ნამდა დორთელ იუდეველეფ „წმინდა ხალხ“ იჸუაფდეს ღორონთშო (კან. 7:6). მარა თენა ვა ნიშნენდჷ, ნამდა თი იუდეველეფს, მით ბაბილონშე დირთუდეს, მუთუნ ვაჸიდეს გიშასწორებელ, ნამდა იეჰოვაშ მოწონა მიღესკო.
7. მუ აფდეს ოთირალ იუდეველეფს? ქიმიჸონით მაგალით.
7 მუჭოთ ჟიშე მიფშინეთ, იუდეველეფიშ უმენტაშიქ ბაბილონს დებად დო თექ მირდჷ. ათეშენ თინეფშე ბრელს, საეგებიოთ გინოღალირ აჸიდ ბაბილონელეფიშ აზროვნება დო შხვადოშხვა საკითხეფიშ მიმართ თიცალ დამოკიდებულება, მუნერით თინეფს უღდეს. იუდეველეფიშ პირველ ჯგუფიშ ისრაელშა დორთაშე ვითობით წანაშ უკულ, ეზრაქ ქიგეგ, ნამდა ნამთინეს წარმართ ერეფშე აფუდ ოსურ მოჸუნაფილ (გამ. 34:15, 16; ეზრ. 9:1, 2). ხვალე თენა ვარინ, უმოს გვიანო, გამგებელ ნეემიაქ თინა ხოლო ქიგეგ, ნამდა თინეფიშ სქუალეფს ებრაულ ნინა ხოლო ვა უჩქუდეს (კან. 6:6, 7; ნეემ. 13:23, 24). მუჭო შეიალებედეს თე ბაღანეფს, ქიჸოროფესკო დო თაყვან ცესკო იეჰოვას, მუჟამსით ვა უჩქუდეს თი ნინა, ნამდგაშეთ ღორონთიშ სიტყვაქ იჭარ? (ეზრ. 10:3, 44). თაშ ნამდა, თე იუდეველეფს ბრელ მუდგარენ აფდეს ოთირალ. მარა თეშ კეთება ადვილ აჸიდეს, მუშენდა რდეს ისრაელს, სოდეთ ღორონთიშ წმინდა თაყვანიშმცემლობაშ აღდგენა მიშჷ (ნეემ. 8:8, 9).
1919 წანაშე მოჸუნაფილ, მილიონობით ადამიანქ გეგშართჷ „დიდ ბაბილონშე“ დო ქიგიოდირთჷ „სიწმინდეშ შარას“ (ქოძირით აბზაც 8)
8. მუშენ ოკო მოინტერესდან თი მოვლენეფ, ნამდგაქ საუკუნეეფიშ წოხოლე მოხვად? (ქოძირით სურათ გალენ გვერდის).
8 ნამთინექ შილებე იფიქრას: „თენა ირფელ ჯგირ, მარა ჩქინო მუშენ ოკო რდას საინტერესო იუდეველეფიშ შემთხვევა, ნამდგაქ საუკუნეეფიშ უკახალე მოხვად?“. თეშ პასუხ თინა რე, ნამდა, თინეფცალო, ჩქი ხოლო გეპჸუნთ „სიწმინდეშ შარას“. ვა უღჷ მნიშვნელობა, ცხებულეფ ვორეთ დო ვარ „შხვა შხურიშ“ წარმომადგენელეფ, ჩქი ოკო ვეგნურთათ თე შარას, ნამდგაქ სულიერ სამოთხეშა მომიჸონეს დო მეპჸუნთ ღორონთიშ სამეფოშ მომავალ კურთხევეფშა b (იოან. 10:16). 1919 წანაშე მოჸუნაფილ, მილიონობით ადამიანქ გეგშართჷ „დიდ ბაბილონშე“ — ტყურა რელიგიაშ მსოფლიო იმპერიაშე დო ქიგიოდირთჷ თე სიმბოლურ შარას. ალბათ თქვა ხოლო თე ხალხ შქას რეთ. მართალ რე, თე შარაქ 100 წანაშ წოხოლე გინწყჷ, მარა თიშ მომზადებაქ საუკუნეეფით ადრე დიჭყჷ.
ᲨᲐᲠᲐᲨ ᲛᲝᲛᲖᲐᲓᲔᲑᲐ
9. ესაიაშ 57:14-იშ თანახმას, მუჭო იჸუ თანამედროვე დროს მომზადებულქ „სიწმინდეშ შარაქ“?
9 მუჟამსით იუდეველეფქ ბაბილონ ქიდიტეს, იეჰოვაქ ირფელ თეშ გაკეთ, ნამდა შარას მუთუნნერ დაბრკოლებაქ ვეშეხვადკო თინეფს (წეკითხით ესაიაშ 57:14). მუშ რაგად შილებე თანამედროვე დროშე? 1919 წანაშახ საუკუნეეფით ადრე, იეჰოვაქ მუშ ართგურ ქომოლკათა გიმირინუ, ნამდა „დიდ ბაბილონშე“ გიშმაულარ შარა მასუფთესკო (ქეშუდარით ესაიაშ 40:3). თე ქომოლკათაქ ქიდიჭყჷ სულიერ შარაშ მომზადება, მუდგაშ ჭყოლოფათ, უმოს გვიანო, ალალ გურიშ კათაქ ქიდიტუ „დიდ ბაბილონ“ დო გემშართჷ სულიერ სამოთხეშა, სოდეთ ღორონთის თიშ მოსაწონო ცენა თაყვანს. მორთ ასე ქობძირათ, მუ მიშურდჷ შარაშ მომზადებაშა.
1919 წანაშახ საუკუნეეფით ადრე, ღორონთიშმოშიშ ართგურ ქომოლკათაქ, ბრელ მუდგარენ აკეთეს, ნამდა მამზადესკო თე შარა დო ხალხის შეიალებუკო დიდ ბაბილონშე გიშულაქ (ქოძირით აბზაცეფ 10—11)
10, 11. მუჭო შეუნწყუ ხე ბეშტუაშ დო თარგმნუაშ საქმექ, ბიბლიურ რჩქინაშ გავრცელებას? (ქოძირით სურათ).
10 ბიბლიაშ ბეშტუა. სოდგარენ 1450 წანაშახ ბიბლიაშ ასლეფს ხეთ ორთუდეს. თე საქმეს ბრელ დრო ოსაჭირუდ, ათეშენ თიშ რაოდენობა შეზღუდულ რდჷ დო ძვირ ხოლო ღირუდ. მარა ობეშტალ მანქანაშ გიმოგონებაქ ხე შეუნწყუ ბიბლიაშ ასლეფიშ უმოს დიდ რაოდენობათ გიშაშქუმალას დო თიშ გავრცელებას.
11 ბიბლიაშ თარგმნუა. საუკუნეეფიშ დინახალე ბიბლია ძირითადო ხეშამალაფარ რდჷ ლათინურ ნინაშა, ნამუთ ხვალე განათლებურ კათას უჩქუდ. მარა თიშ უკულ, მუთ ბეშტუაშ საქმექ უმოსო გევრცელ, ღორონთიშმოშიშ კათაქ გინოჭყვიდ, ბიბლია თი ნინეფშა თარგმნესკო, ნამუთ ხალხშო გასაგებ იჸუაფუდ. თეშ ჭყოლოფათ, თინეფს, მით ბიბლიას წეკითხენდჷ, შეიალებედეს ბიბლიურ გურაფეფ შეადარესკო თის, მუდგას სამღვდელოება ოგურუანდჷ.
ღორონთიშმოშიშ ართგურ ქომოლკათაქ, ბრელ მუდგარენ აკეთეს, ნამდა ხალხის შეიალებუკო დიდ ბაბილონშე გიშულაქ (ქოძირით აბზაცეფ 10—14) c
12, 13. ქიმიჸონით მაგალითეფ, მუჭო გიმაარგამენდეს მა-19 საუკუნეს ბიბლიაშ გურგედვალირ მარკვიებელეფ ტყურარელიგიურ გურაფეფს.
12 ბიბლიაშ ოგურაფალ საშვალებეფ. ბიბლიაშ გურგედვალირ მარკვიებელეფ, ბრელ მუდგარენს გებულენდეს ღორონთიშ სიტყვაშე დო თის შხვეფს ხოლო გინოჩანდეს, მუდგაშ გურშენ სამღვდელოება ირისხებუდ. მაგალთო, მა-19 საუკუნეს მუსხირენ ალალ გურიშ ქომოლკოჩიქ გეგშაშქვჷ ტრაქტატეფ, სოდეთ აარგამენდეს ტყურა რელიგიაშ გურაფეფს.
13 1835 წანას ჰენრი გრუქ გიშაშქვჷ ტრაქტატ, სოდეთ გარჩიებულ რდჷ, მუ მდგომარეობას რენა ღურელეფ. თე ტრაქტატის გრუ წმინდა წერილეფშე ამტკიცენდჷ, ნამდა უკვდავება ღორონთშე ძღვინ რე დო დაბადებაშე მითინს ვა მიღნა უკვდავ შურ, მუჭოთ თეს რელიგიეფიშ უმენტაშ ოგურუანდჷ. 1837 წანას ჯორჯ სტორზიქ თე ტრაქტატ ქოძირ მატარებელს. თიშ კითხირიშ უკულ თიქ დერწმუნ, ნამდა, მუთ თექ ჭარუდ სიმართლე რდჷ დო გეგნოჭყვიდ, თე ირფელ შხვეფს ხოლო ქუგაგებაფუკო. ათეშენ, 1842 წანას თიქ წეკითხჷ მუსხირენ ლექცია თემაშე: „გიმორკვიება საკითხშე — ქუღნანო უბადოეფს უკვდავ შურ?“. ჯორჯ სტორზიშ ნაშრომეფქ მანგარო მეხვარ ახალგაზრდა ჩარლზ ტეიზ რასელს.
14. მუჭო ეწადირთეს ჯიმა რასელს დო თიშ თანამოაზრეეფს, თი საქმეეფქ, ნამდგაქ ულირს იჸუ კეთებულქ, სულიერ შარაშ მამზადებელო? (ქოძირით სურათ).
14 ჯიმა რასელს დო თიშ თანამოაზრეეფს მანგარო ეწადირთეს თი საქმეეფქ, ნამდგაქ სულიერ შარაშ მამზადებელო ულირს იჸუ კეთებულქ. თინეფშო უკვე ხეშამალაფარ რდჷ ლექსიკონეფ, ბიბლიურ სიტყვეფიშ საძიებელეფ დო ბიბლიაშ შხვადოშხვა თარგმანეფ, ნამდგას ასე გიმორკვიებაშ დროს ირინუანდეს. თეს გეძინელ, თინეფს მანგარო მეხვარ თი ირფელქ, მუთ ჰენრი გრუქ, ჯორჯ სტორზიქ დო შხვეფქ ბიბლიაშე გიმირკვის. ჯიმა რასელქ დო თიშ თანამოაზრეეფქ, წიგნეფიშ დო ბუკლეტეფიშ გიშაშქუმალათ, სოდეთ ბიბლიურ საკითხეფ რდჷ გარჩიებულ, მუნეფიშ წვლილ მიშეღეს სულიერ შარაშ მომზადებას.
15. მუ მნიშვნელოვან მოვლენეფქ მოხვად 1919 წანას?
15 1919 წანას ღორონთიშ ხალხიქ გეთავისფალ „დიდ ბაბილონშე“. თე წანას იესოქ დანიშნჷ „ართგურ დო გონიერ მონა“, ნამდა ალალ გურიშ კათას ქიმეხვარესკო, ახალას გონწყუმილ „სიწმინდეშ შარას“ გილულას (მათ. 24:45—47). თი ართგურ კათაშ ჭყოლოფათ, მიდგაქ ულირს მიღეს მონაწილება „სიწმინდეშ შარაშ“ მომზადებას, თინეფს, მით თე შარას დიჭყანდჷ გილულას შეიალებედ, უმოსო გეჩინებაფესკო იეჰოვა დო ქიგეგესკო თიშ განზრახვეფიშ გურშენ (იგავ. 4:18). თეს გეძინელ, თიშ საშვალება ხოლო ქიმიაჩამდეს, ნამდა იცხოვრესკო იეჰოვაშ ნორმეფიშ თანახმას. მუშო ოკო რაგად, იეჰოვა თინეფშე ველუდ, ნამდა ხეთეშე დითირუდეს დო ირფელს ართუცფას გეგშასწორენდეს. თეშ მანგიორო, თინა დროს არზენდჷ დო ჭიე-ჭიეთ ოგურუანდჷ მუშ ხალხის, მუდგას ამდღა ხოლო ორთჷ (ქოძირით ჩარჩო „იეჰოვა ჭიე-ჭიეთ ოგურუანს მუშ ხალხის“). წერმიდგინით, მუნერ ბედნერეფ იპჸუაფუთ, მუჟამსით ირნერო შემალებენა ღორონთიშ მოსაწონო იფცხოვრათ (კოლ. 1:10).
„ᲡᲘᲬᲛᲘᲜᲓᲔᲨ ᲨᲐᲠᲐᲡ“ ᲒᲘᲚᲣᲚᲐ ᲓᲘᲝ ᲮᲝᲚᲝ ᲨᲔᲘᲝᲚᲔᲑᲔᲠ ᲠᲔ
16. მუქ იჸუ კეთებულქ „სიწმინდეშ შარაშო“ 1919 წანაშე მოჸუნაფილ? (ეს. 48:17; 60:17).
16 მუჭოთ წეს, არძა შარას ოსაჭირ რეგულარულ მიკოჯინა. 1919 წანაშე მოჸუნაფილ „ართგურ დო გონიერ მონა“ აგრძელენს „სიწმინდეშ შარაშ“ მომზადებას, ნამდა უმოს მეტ ადამიანს შეიალებუას ქიდიტუას „დიდ ბაბილონ“. მაგალთო, 1921 წანას თინეფქ გიშაშქვეს სახემძღვანელო „ღორონთიშ ქნარ“, ნამდგაქ ბრელს მეხვარ ბიბლიურ ჭეშმარიტებაშ გაგებას. თე პუბლიკაციაქ გიშაშქუმალირქ იჸუ ამშვ მილიონიან ტირაჟით 36 ნინაშა. ამარდე ხოლო გიშართჷ დიდებულ სახემძღვანელოქ „მარადიულო გეხარით ცხოვრებათ!“, ნამდგას ბიბლიაშ გურაფეფიშ ჩატარებელო იბრინუანთ. არგამა რე, იეჰოვა თე ბოლო დღალეფს მუშ ორგანიზაციაშ საშვალებათ მარზენა სულიერ საზრდოს, მუთ მოხვარნა, გილაფრთათ „სიწმინდეშ შარას“ (წეკითხით ესაიაშ 48:17; 60:17).
17, 18. სოიშაᲮ მეპჸუნთ „სიწმინდეშ შარას“?
17 მუჟამსით მიდგაინ ბიბლიაშ გურაფას იჭყანს, ერზიებ შესაძლებლობა, გიოდირთას „სიწმინდეშ შარას“. თინეფ შქას ნამთინე ჭიჭე ხანს გეჸუნს თე შარას დო უკულ გინურთანს თევრეშე. მარა რენა თიცალეფ ხოლო, მიდგას მტკიცას აფნა გინოჭყვიდილ, გიაჸუნან „სიწმინდეშ შარას“ დო ქიმერთან ბოლო დანიშნულებაშ ადგილშა. სოიშა მეურს თე შარა?
18 თინეფს, მიდგას ზეციერ ცხოვრებაშ იმენდ უღნა „სიწმინდეშ შარა“ ქიმიჸონანს „ღორონთიშ სამოთხეშა“, ნამუთ ზეცას რე (გამოცხ. 2:7) დო თინეფს, მიდგას დედამიწას ცხოვრებაშ იმენდ უღნა, თე შარა ქიმიჸონანს გასრულყოფილებაშა, ნამდგას ქრისტეშ 1 000 წანიან მართველობაშ ბოლოს ქიმიოჭირინუანა. თე შარას ქიგეჸუნთ-და, უკახალე ვეკნიჯინათ. ირო წიმი იდით დო ირფელ გაკეთით, ნამდა ვეგნურთათ თის, ონდო ვემურთ ბოლო დანიშნულებაშ ადგილშა — ახალ ქვეყნიერებაშა. „ჯგირ შარა!“.
ᲝᲑᲘᲠᲔᲨᲘ 24 გეკოფრთათ იეჰოვაშ გვალაშა
a შარას, ნამუთ ბაბილონშე ისრაელშა მიშჷ, იეჰოვაქ სიმბოლურო „სიწმინდეშ შარა“ გიოდვჷ. თიქ, თე შარა თანამედროვე დროს ხოლო მასწორ მუშ ხალხშო, მუჭოთ თენა ჯვეშ დროს აკეთ. 1919 წანაშე მოჸუნაფილ, მილიონობით ადამიანქ ქიდიტუ „დიდ ბაბილონ“ დო ქიგიოდირთჷ „სიწმინდეშ შარას“. ჩქი დიო ხოლო ვემემრთუმნა ბოლო დანიშნულებაშ ადგილშა. ათეშენ საჭირო რე, ვეგნურთათ თე შარას დო გუვაგრძელათ ულა.
c ᲡᲣᲠᲐᲗᲘᲨ ᲔᲭᲐᲠᲣᲐ: ჯიმა რასელ დო თიშ თანამოაზრეეფ, ირინუანა ბიბლიაშ ოგურაფალ საშვალებეფს, ნამდგაქ მუნეფშახ იჸუ მომზადებულქ.