1, 2. მუ კითხვაქ შილებე გომრჩქინდან ლოცვაწკუმა დაკავშირებით?

 ᲓᲦᲐᲡ ქუნორღვენანო თიცალ სიტუაცია, მუჟამსით გიფიქრებნა, პასუხენს დო ვარ იეჰოვა თქვან ლოცვეფს? თაშ ქორენ-და, რშუდან, ხვალე ვა რეთ, მუშენდა ბრელ და დო ჯიმას ქოთ უფიქრებ დო ქოთ უთქუალ თენა, განსაკუთრებულო თიმწკუმა, მუჟამსით ცხოვრებას რთულ პერიოდ უღდეს. სირთულეეფ ქოიღნან-და, შილებე გაიჭირდან თიშ ძირაფაქ, მუჭო პასუხენს იეჰოვა თქვან ლოცვეფს.

² თე სტატიას ქობძირუნთ, მუშენ შემლებნა ბჯერდან, ნამდა იეჰოვა პასუხენს მუშ მსახურეფიშ ლოცვეფს (1 იოან. 5:15). თეს გეძინელ, ქუპასუხენთ თეცალ კითხვეფს: მუშენ შილებე მინშა თეშ იძირედას, ნამდა იეჰოვა ვა პასუხენს ჩქინ ლოცვეფს? მუჭო პასუხენს იეჰოვა ამდღა ჩქინ ლოცვეფს?

3. მუშენ ოკო იეჰოვას, იბლოცათ?

³ წმინდა წერილეფ მარწმუნენა, ნამდა იეჰოვაშო ძვირფასეფ ვორეთ დო მანგარო ვუჸორთ (ანგ. 2:7; 1 იოან. 4:10). ზუსტას ათეშენ, თინა ელამჩანა, ქიბლოცათ დო მოხვარა ქოფთხუათ (1 პეტ. 5:6, 7). იეჰოვას მანგარო ოკო, თის დევეახლოვათ დო გივორჯგინათ სირთულეეფს, ნამდგას ფხვადუთ.

4. მუ მარწმუნენა, ნამდა იეჰოვა პასუხენს მუშ მსახურეფიშ ლოცვეფს? (ქოძირით სურათ).

⁴ ბიბლიას ბრელ თიცალ შემთხვევა რე მოშინაფილ, მუჟამსით იეჰოვაქ უპასუხ მუშ ართგურ მსახურეფიშ ლოცვეფს. თქვა ნამ გუგაშინენა? მაგალთო, ართ-ართ თეცალ რე მეფე დავითიშ შემთხვევა. თიქ მუშ სიცოცხლეს ბრელ ოშქურანჯ სიტუაციას შეხვად დო ქიანაშ ნტერ ჸუნდჷ. ათეშენ, ღორონთის ლოცვას ხშირას თხულენდჷ მოხვარას. ართშა თიქ მანგარო ეხვეწ იეჰოვას დო თაშ ილოც: „იეჰოვა, ქიმირჩქილე ჩქიმ ლოცვა. ქუმომრჩქილე, მუჟამსით მოხვარას რთხინქ. ქომპასუხ, მუშენდა  ართგურ დო მართალ რექ“ (ფსალმ. 143:1). იეჰოვაქ უპასუხ დავითიშ ლოცვას, მუჟამსით მოხვარას თხინდჷ (1 სამ. 19:10, 18—20; 2 სამ. 5:17—25). ათეშენ, დავითის თამამას შეულებუდ თქუკო: „იეჰოვა ხოლოს რე არძაწკუმა, მით მოხვარას თხინს თის“. ჩქი ხოლო შემლებნა თეს ბოლოშა ვორდათ დარწმუნებულ (ფსალმ. 145:18).

5. ირო თეშ პასუხენდუო იეჰოვა მუშ ართგურ მსახურეფიშ ლოცვეფს, მუჭოთ თინეფ ელდეს?ქიმიჸონით მაგალით (ქოძირით სურათ).

⁵ იეჰოვაქ შილებე თეშ ვა უპასუხას ჩქინ ლოცვეფს, მუჭოთ ჩქი ველუთ. ზუსტას თაშ მოხვად მოციქულ პავლეშ შემთხვევას ხოლო. თიქ მუსხირენშა თხუ ღორონთის, ჩაუთხინუკო „ძიგირ, ნამუთ სხეულს უღუდ“. პავლექ თე სირთულეწკუმა დაკავშირებით სუმშა ილოც დო მოხვარა თხუ იეჰოვას. ქუპასუხუო ღორონთიქ თიშ ლოცვეფს? მუშო ოკო რაგად, უპასუხ. მარა თეშ ვარ, მუჭოთ პავლე მოციქულ ელუდ. იეჰოვას თიშა პრობლემა ვა ჩუთხინუაფ, თიქ ძალა ქიმეჩ, ნამუთ ოსაჭირუდ, ნამდა გაგრძელკო ღორონთიშ ართგურო მსახურება (2 კორ. 12:7—10).

6. მუშენ შილებე მინშა თეშ იძირედას, ნამდა იეჰოვა ვა პასუხენს ჩქინ ლოცვეფს?

⁶ მუჭოთ თე ართგურ მსახურეფიშ შემთხვევეფშე იძირ, ჩქინ ლოცვაშ პასუხეფ ხოლო შილებე განსხვავებულ რდას თიშე, მუდგას ველდით. მარა შემლებნა დარწმუნებულ ვორდათ, იეჰოვას ზუსტას უჩქჷ, მუჭო მიმეხვარან დო მუ რე ჩქინო არძაშ უჯგუშ. თის „შეულებ თიშე ბრელით უმოს გაკეთას, ვინემ ჩქი ფთხინთ ვარდა აზრო მუმალენა“ (ეფეს. 3:20). ზუსტას ათეშენ, იეჰოვაქ შილებე თიცალ დროს მიპასუხან, მუჟამსით შურო ვეველუდით დო თიცალ პასუხ ქომჩან, ნამდგაშეთ ვეფიფქრენდით.

7. მუშენ შილებე საჭიროქ იჸუას, დოფთირუათ ჩქინ ოთხუალ? ქიმიჸონით მაგალით.

⁷ მუჟამსით უმოსო ინვანჭუთ, მუ რე იეჰოვაშ ნება, თე დროს შილებე საჭირო რდას, დოფთირუათ ჩქინ ოთხუალ, ნამდგაშეთ ბლოცულენთ. გუვარჩუათ ჯიმა მარტინ პოეტზინგერიშ მაგალით. დაქორწინებაშ უკულ ხეთეშე, ჯიმა მარტინ ნაცისტურ საკონცენტრაციო ბანაკშა მიდეჸონეს. დუდშე თინა იეჰოვას ლოცვას თხინდჷ, დერსხკო თე ბანაკშე, ნამდა შეიალებუკო მუშ ოსურს დართუკო დო გაგრძელკო ქადაგება. მარა ჟირ მარაშ უკულ, ჯიმა მარტინქ ქიმეხვად, ნამდა იეჰოვას შუროთ ვა ულამუდ თეშ კეთება. ათეშენ, თიქ ოთხუალ დოთირუ დო ასე უკვე თაშ ლოცულენდჷ: „იეჰოვა, ქიმმეხვარ, ქობძირე, მუ გოკო ვაკეთე“. თიქ ფიქრ ქიდიჭყჷ თი ჯიმალეფშე, მით თიწკუმა ართო საკონცენტრაციო ბანაკის რდეს დო ქოძირ, ნამდა თინეფშე უმენტაშ ხოლო წუხენდჷ მუშ ჩილ დო სქუაშე. თიქ იეჰოვას ლოცვას თეცალ მუდგარენ უწუ: „იეჰოვა, მადლობა ჩქიმ ახალ დანიშნულებაშენ. რთხინქ ქიმმეხვარ, ნამდა გუვამანგარე ჩქიმ ჯიმალეფ დო გურშა  ელვუკინე თინეფს.“ უკულიან ჩხორო წანას ჯიმა მარტინ პოეტზინგერ ზუსტას თე საქმეთ რდჷ დაკავებულ!

8. მუ ოკო ფშუდან, მუჟამსით ბლოცულენთ?

⁸ ჩქი ოკო ფშუდან, ნამდა იეჰოვა ღორონთის უღჷ განზრახვა დო თიშ შეიოსრულებერო დრო აფჷ მერჩქინელ. თიშ განზრახვა რე, ბოლო მუღას არძა პრობლემას, ნამდგას ამდღა კაცობრიობაშა ტანჯება მოუღ, მაგალთო, მუნერით რე: სტიქიურ უბედრობეფ, ლახალა დო ღურა. იეჰოვა თე ირფელს ბოლოს მუღენს მუშ სამეფოშ საშვალებათ (დან. 2:44; გამოცხ. 21:3, 4). მარა, ონდო თეს გაკეთენდას, უფლებას არზენს, იმართველას თე ქვეყნიერებაშა b (იოან. 12:31; გამოცხ. 12:9). კაცობრიობას აწუხენსინ თი არძა პრობლემა იეჰოვაქ ამდღა მაგვარასინ, თეშ იძირედას იჸი, ნამდა სატანა ჯგირ მართველ რე დო გლახას მუთუნს ვართ. თაშ ნამდა, მართალ რე, ველუთ თი დროს, მუჟამ შეასრულენს იეჰოვა მუშ დუნაპირებუეფს, მარა თენა ვა ნიშნენს, ნამდა ღორონთის მეტებულ ვაფუთ დო ვა მოხვარნა. მორთ გუვარჩუათ, მუსხირენ საშვალება, მუდგათ იეჰოვა მოხვარნა.

9. მუჭო მოხვარნა იეჰოვა, მუჟამსით სერიოზულ გადაწყვეტილება მაფნა მიოღებელ? ქიმიჸონით მაგალით.

⁹ მარზენა სიბრძნეს. იეჰოვა მოპირნა, ნამდა მუჩანა სიბრძნეს, ნამუთ სწორ გადაწყვეტილებეფიშ მიოღებელო მოსაჭირნა. ღორონთიშ სიბრძნე განსაკუთრებულო თიმწკუმა მოსაჭირნა, მუჟამსით ბღებულენთ თიცალ გადაწყვეტილებას, ნამუთ მთელ ჩქინ ცხოვრებაშა იმოქმედენს. მაგალთო, მუნერით რე, დეფქორწინათ დოვარ დაუქორწინებელქ ქუდოფსკიდათ (იაკ. 1:5). გუვარჩუათ ართ დაუქორწინებელ დაშ, მარიაშ მაგალით. c მუჟამსით თინა სრულ დროთ პიონერო მსახურენდჷ, ართ ჯიმა გეჩინებაფუ. მარია იჩიებ: „ჩქი ხოლოშიან მეგობრეფო გინიფრთით დო ართიანიშ მიმართ გრძნობეფქ გომრჩქინდეს. სერიოზულ გადაწყვეტილებაშ წოხოლე ქიგებდირთჷ. თე საკითხწკუმა დაკავშირებით ბრელს ბლოცულენდჷ. იეჰოვაშ ხემძღვანელობა მოსაჭირუდ, მარა თინა ხოლო ჯგირო მარჩქილედ, ნამდა თე გადაწყვეტილებას ჩქიმ მანგიორო იეჰოვა ვემიღენდჷ“. მარია დარწმუნებულ რე, ნამდა იეჰოვაქ უპასუხ თიშ ლოცვეფს დო მეჩჷ სიბრძნე, ნამდგას თხინდჷ. თიქ პუბლიკაციეფს გეგმირკუ თე საკითხ დო დოგორ კონკრეტულ სტატიეფ, ნამდგაქ მეხვარ, ქიმიღკო თი კითხვეფშე პასუხ, ნამუთ ოინტერესუდ. თეს გეძინელ, თიქ რჩევა ქელაკითხუ დიამუშის, ნამუთ იეჰოვაშ ართგურ მსახურ რე. თე რჩევაქ მეხვარ მარიას, ჯგირო ქინანჭკო მუშ გრძნობეფს დო ქიგეგკო, სინამდვილეს მუ ოკოდ. საბოლათ, მარიაქ ბრძნულ გადაწყვეტილება მიღჷ.

10. მუჭოთ ფილიპელეფიშ 4:13-შე იძირე, მუს გაკეთენს იეჰოვა მუშ მსახურეფიშ მახვარებელო? ქიმიჸონით მაგალით (ქოძირით სურათ).

¹⁰ მარზენა მოთვენაშ ძალას. იეჰოვა ირიათო ქომჩანა ძალას, გაურზათ სირთულეეფს, მუჭოთ თენა მოციქულ პავლეშ შემთხვევას აკეთ (წეკითხით ფილიპელეფიშ 4:13). გუვარჩუათ ჯიმა ბენჟამინიშ მაგალით დო ქობძირათ,  მუჭო მეხვარ თის იეჰოვაქ, გაურზუკო რთულ სიტუაციას. ბენჟამინ მუშ ახალგაზრდობაშ უმენტაშ წანეფს, ოჯახწკუმა ართო, აფრიკას ლტოლვილეფიშ ბანაკის ცხოვრენდჷ. თინა იჩიებ: „ირიათო ბლოცულენდჷ დო იეჰოვას ფთხინდჷ, ქომუჩკო ძალეფ, გუვაკეთკო თინა, მუთ თიშ თოლს სწორ რდჷ. იეჰოვაქ უპასუხ ჩქიმ ლოცვეფს. თიქ ქომუჩ შინაგან სიმშვიდე დო გაბედულება, ნამდა გუვაგრძელკო ქადაგება დო პუბლიკაციეფიშ საშვალებათ სულიერო მამანგარენდჷ. თეს გეძინელ, და დო ჯიმალეფიშ შემთხვევეფიშ კითხირქ დო თიშ ძირაფაქ, მუჭო მეხვარ იეჰოვაქ, გაურზესკო სირთულეეფს, უმოსო გამანგარ ჩქიმ გადაწყვეტილება, ნამდა ქუდოფსქიდკო ღორონთიშ ართგურქ“.

11, 12. მუჭო შილებე იეჰოვაქ თანაქრისტიანეფიშ საშვალებათ უპასუხას ჩქინ ლოცვეფს? (ქოძირით სურათ).

¹¹ მოხვარნა თანაქრისტიანეფიშ საშვალებათ. ღურაშ წოხოლენ სერს იესოქ მთელ გურით ილოც დო იეჰოვას ოხვეწუდ, ვა ჸვილესკო თეშ, მუჭოთ ღორონთიშ სახელიშ მალანძღარ. მართალ რე, იეჰოვას იესოშა თეცალ ღურა ვეუჩილითუაფ, მარა მოხვარაშ უმშო ვა დუტებ. თიქ იესოშ ართ-ართ სულიერ ჯიმა, ანგელოზ მიდაშქვჷ თიშა დო თიშ საშვალებათ გამანგარ (ლუკ. 22:42, 43). ჩქინ შემთხვევას ხოლო, შილებე იეჰოვაქ ჩქინ თანაქრისტიან აღძრას, ნამდა დომრეკან ვარდა ქომძირუან დო თეშნერო გურშა ელამკინან. მორთ ხეშე ვა გუტუათ ნამთინ შესაძლებლობა, ნამდა გემუან სიტყვეფით გურშა ელვუკინათ თანაქრისტიანეფს (იგავ. 12:25).

¹² გუვარჩუათ ართ დაშ, მირიამიშ შემთხვევა. ქომონჯიქ უღურუნ თიშ უკულ მუსხირენ მარაშა, მუჟამსით ჸუდეს ხვალე რდჷ, მირიამს გურშა ქეთაკათ დო ემოციურო მანგარ გლახათ რდჷ. თინა ირიათო ინგარდჷ დო მიდგაინწკუმა დორაგადაფა დო გურიშელაკინა ოსაჭირუდ. მირიამ იჩიებ: „ძალა თეშ მაფუდ გიშალიებურ, ნამდა მითინშა რეკუაშ დუდ ხოლო ვამღუდ. ათეშენ, ლოცვა ქიდიბჭყჷ დო იეჰოვას ქუდურაგადე. დიო ხოლო იმნგარდჷ დო ბლოცულენდჷ, მუჟამსით ძვირფას მეგობარქ, ართ-ართ უხუცესიქ დომრეკ“. თე უხუცესიქ დო მუშ ოსურქ მირიამს გურშა ეუქექუეს. თიქ ქიგინ იეჰოვაშ ხე დო დერწმუნ, ნამდა თე ჯიმა ზუსტას იეჰოვაქ აღძრჷ, ნამდა დურეკკო თის.

13. მუჭო შილებე იეჰოვაქ ჩქინ ლოცვეფს თინეფიშ საშვალებათ უპასუხას, მით ვამსახურ თის? ქიმიჸონით მაგალით.

¹³ შილებე ჩქინ მახვარებელო თინეფ გიმირინუას, მით ვამსახურ თის (იგავ. 21:1). მინშა, იეჰოვა მუშ ხალხიშ ლოცვეფს თი კათაშ  საშვალებათ პასუხენს, მით ვა მსახურ თის დო თინეფს მუშ მსახურეფიშ მახვარებელო ირინუანს. მაგალთო, ბიბლიურ დროს იეჰოვაქ მეფე არტაქსერქსე აღძრჷ, ნამდა ნეემიას უფლება ქიმეჩკო, დირთკო იერუსალიმშა დო აღადგინკო ქალაქ (ნეემ. 2:3—6). ამდღა ხოლო, ჩქინ მახვარებელო შილებე იეჰოვაქ თი კათა აღძრას, მით ვამსახურნა თის.

14. მუს აღნიშნენდით სუ-ჰინიშ შემთხვევაშე, მუდგაქ გურშა ელაიკინეს? (ქოძირით სურათ).

¹⁴ გუვარჩუათ ართ დაშ, სუ-ჰინიშ შემთხვევა, მიდგას იეჰოვაქ ექიმიშ საშვალებათ მეხვარ. თიშ ბოშის ბაღანობაშე ფსიქიკურ პრობლემეფ უღჷ დო თიშ მდგომარეობაქ ხოლო უმოსო გეუფრაშ, მუჟამსით მაღალ ადგილშე გექთანთხჷ. სუ-ჰინს დო თიშ ქომონჯის, სქუას ქიმკაჯინესკო თიშენ, სამუშაქ აჸუეს მიოტებელქ, მუდგაშ გურშენ ფინანსურო მანგარო გუჭირდეს. თე ირფელიშ მიმაჯინუ, სუ-ჰინ ფიქრენდჷ, ნამდა მეტიშ გარზებაშ ძალა ვა უღუდ. ათეშენ, თიქ ლოცვას გურ გეგნუფაჩ იეჰოვას დო მოხვარა ქოთხუ. სუ-ჰინიშ ბოშის მკურნალენდუნ თი ექიმქ დეინტერეს თინეფიშ მდგომარეობათ დო გეგნოჭყვიდ, მეხვარკო თინეფს. თე ექიმიშ მონდომაშ ჭყოლოფათ, სუ-ჰინქ დო თიშ ოჯახიქ სახელმწიფოშე მოხვარა მიღჷ დო თიცალ ოცხოვრებელ ხოლო დექირეს, მუდგაშ გაფას განჭუდეს. თე ირფელიშ უკულ სუ-ჰინქ თეცალ მუდგარენ თქუ: «ჯგირო ქობძირით, მუჭო მიმეხვარეს იეჰოვაქ. თამამას შემლებ ფთქუე, ნამდა თინა მართალო „ლოცვეფიშ მარჩქილე“ ღორონთ რე» (ფსალმ. 65:2).

15. მუქ მეხვარ იოკოს თიშ ძირაფას, ნამდა იეჰოვა პასუხენდჷ თიშ ლოცვეფს?

¹⁵ ჩქინ ლოცვეფიშ პასუხეფ შილებე ირიათო არგამათ ვეძირედას, მარა პასუხეფ, ნამდგას იეჰოვაშე ბღებულენთ რე თინა, მუთ მოსაჭირნა, ქუდოფსქიდათ თიშ ართგურეფქ. ათეშენ საჭირო რე, ირიათო ქიდვეკვირათ, მუჭო პასუხენს ღორონთ ჩქინ ლოცვეფს. ართ და, სახელო იოკო ფიქრენდჷ, ნამდა იეჰოვა ვა პასუხენდჷ თიშ ლოცვეფს. ათეშენ, გეგნოჭყვიდ, ბლოკნოტის გეგმოჭარკო თი ირფელ, მუდგას იეჰოვას თხინდჷ. მუსხირენ ხანიშ უკულ, თიქ გეგნაჯინ მუშ ჩანაწერეფს დო ქოძირ, ნამდა იეჰოვას თიშ ლოცვეფიშ უმენტაშშა პასუხეფ მეჩამილ აფუდ. თიცალეფშე ხოლო, ნამუთ შურო ვა შუდჷ. იოკოცალო, კანკალეშა ჩქი ხოლო ოკო დეფიფქრათ, მუჭო პასუხენს იეჰოვა ჩქინ ლოცვეფს (ფსალმ. 66:19, 20).

16. მუჭო შემლებნა რწმენაშ გიმორჩქინა, მუჟამსით ლოცვაშ პასუხის მიბღენთ? (ებრ. 11:6).

¹⁶ რწმენას ხვალე თიმწკუმა ვეგმიფრჩქინანთ, მუჟამსით ბლოცულენთ დო იეჰოვას მუდგაინს ფთხინთ, რწმენას გიმიფრჩქინანთ თიმწკუმა ხოლო, მუჟამსით დოპჸუნთ იეჰოვაშე  მეღებულ პასუხის (წეკითხით ებრაელეფიშ 11:6). გუვარჩუათ ართ ჩილ დო ქომონჯიშ, მაიკიშ დო კრისიშ შემთხვევა, მიდგას მანგარო ოკოდეს ბეთელს მსახურება დო თენა მიზანო უღდეს. მაიკ იჩიებ: „წანეფიშ დინახალე მა დო კრის ბეთელიშ ბლანკის ვავსენდით დო ირ შევსებაშ დროს იეჰოვას ფთხინდით, ქიმმეხვარესკო თე მიზანიშ მენჭირნაფას, მარა ბეთელშა ვემუწვიებუთ“. თეშ უმკუჯინუო, მაიკ დო კრის დარწმუნებულეფ რდეს, ნამდა იეჰოვას არძაშ უჯგუშო უჩქუდ, მსახურებაშ ნამ სფეროს შეულებუდ თინეფიშ გიმორნაფა. ათეშენ, თინეფ იეჰოვაშო ორთუდეს ირფელს, მუთ შეულებდეს — მსახურენდეს სრულ დროთ პიონერეფო თექ, სოდეთ მაქადაგებელეფიშ საჭიროება რდჷ დო მონაწილებას ღებულენდეს თეოკრატიულ სამშენებლო პროექტეფს. ამდღა თინეფ გილმალ მსახურებას რენა. მაიკ იჩიებ: „იეჰოვა ირიათო თეშ ვა პასუხენდჷ ჩქინ ლოცვეფს, მუჭოთ ჩქი მოკოდეს, მარა მუთ მთავარ რე, ჩქინ ლოცვეფ პასუხიშ უმშო დღას ვა დუტებ დო მინშა თე პასუხეფ თიშე ბრელით უჯგუშ რდჷ, ვინემ ჩქი წერმიბდგინენდით“.

17, 18. ფსალმუნიშ 86:6, 7-იშ თანახმას, მუშა შემლებნა ვორდათ დარწმუნებულ?

¹⁷ წეკითხით ფსალმუნიშ 86:6, 7. ფსალმუნმაბირე დავით დარწმუნებულ რდჷ, ნამდა იეჰოვა ირჩქილედ დო პასუხენდჷ თიშ ლოცვეფს. თქვა ხოლო შეილებნა რჯერდან თეშ. მუჭოთ თე სტატიას გარჩიებულ მაგალითეფშე ბძირით, იეჰოვა ირიათო ქომჩანა სიბრძნეს დო ძალას, ნამუთ სირთულეეფიშ გარზებელო მოსაჭირნა. თეს გეძინელ, ჩქინ მახვარებელო, იეჰოვაქ შილებე ჩქინ და დო ჯიმალეფ ვარდა თინეფ გეგმირინუას, მით ვამსახურ თის.

¹⁸ მართალ რე, იეჰოვაქ შილებე ჩქინ ლოცვეფშა თეშ ვამპასუხან, მუჭოთ ჩქი ველუთ, მარა ბჯერა, ნამდა თინა პასუხიშ უმშო დღას ვა დომტენა. ღორონთ ქომჩანა თის, მუთ მოსაჭირნა დო თეს ზუსტას საჭირო დროს გაკეთენს. ათეშენ, ვემიოტუათ ლოცვა დო რჯერდან, ნამდა იეჰოვა აუცილებერო იზრუნენს თქვანდე ამდღა დო ახალ ქვეყნიერებას „არძა ცოცხალ არსებაშ სურვილს დაკმაყოფილენს“ (ფსალმ. 145:16).