1. მუ მნიშვნელოვან აზრიშ ინონჭაფას მეხვარ იეჰოვაქ აბრაამს?

 ᲘᲔᲰᲝᲕᲐ აბრაამს ანგელოზიშ პიჯით ურაგად, ნამდა სოდომ დო გომორაშ განადგურება აფჷ გინოჭყვიდილ. მართალ რე, აბრაამ ბოლოშა ონდჷ ღორონთის, მარა თის იშენით ურჩქინდუ კითხვეფ თე საკითხიშ გურშენ. თინა იეჰოვას ოკითხ: „მართალეფს ხოლო განადგურენქო უბადოეფწკუმა ართო? . . . მთელ დედამიწაშ მოსამართლე უსამართლოთ მიქციებუნო?!“ (დაბ. 18:23—33). იეჰოვაქ მოთვინებათ გეუნწყჷ ძვირფას მეგობარს, მუშ კეთება ულამუდ დო ართ მნიშვნელოვან აზრიშ ინონჭაფას ქიმეხვარ: ღორონთ დღას ვა განადგურენს მართალ ადამიანეფს. თეშ რჩქინა ამდღა ჩქი ხოლო მანგარო ემქექუანა გურშა.

2. მუშენ შემლებუნა ვორდათ დარწმუნებულ, ნამდა იეჰოვა სამართლიან დო მოჭყოლოფე მოსამართლე რე?

² მუშენ შემლებუნა ვორდათ დარწმუნებულ, ნამდა იეჰოვა სამართლიან დო მოჭყოლოფე მოსამართლე რე? ბიბლიაშე ბგებულენთ, ნამდა „იეჰოვა [ადამიანიშ] გურს ორწყე“ (1 სამ. 16:7). თინა ჯგირო „იჩინენს კოჩიშ გურს“ (1 მეფ. 8:39; 1 მატ. 28:9). ჩქინ გონება დო იეჰოვაშ სიბრძნე შქას ზღვა დო გვალა რე. ათეშენ მინშა მიჭირა, ქინვანჭათ, მუშენ ორთჷ თინა მუდგარენს. მოციქულ პავლექ იეჰოვაშ გურშენ თქუ: „ბოლოშა ვენინჭინე თიშ სამართალშა“ (რომ. 11:33).

3, 4. მუ კითხვეფ შილებე მირჩქინდუდან დო მუს გუვარჩიენთ თე სტატიას? (იოან. 5:28, 29).

³ მინშა შილებე ჩქი ხოლო აბრაამცალო კითხვეფქ გომრჩქინდან. მაგალთო, შილებე მოინტერესუდან: ქოარსებენსო მუთუნნერ იმენდ თინეფშო, მიდგაქ იეჰოვაშ ხეშე გენადგურეს, მაგალთო, სოდომ დო გომორას? ქიჸუაფუნო თინეფშე ნამდგაინ გათელებურ „მართალ ვა რენან“ ფერეფ შქას? (საქ. 24:15).

⁴ ქიგიფშინათ, მუ მიჩქუნა თე მომენტშო გათელებაშ გურშენ. ამარდე ახალ გაგება მიბღით თიწკუმა დაკავშირებით, მუს ნიშნენს  გათელება „ულიებ სიცოცხლეშ მიოღებელო“ დო გათელება „გასასამართლებერო“ a (წეკითხით იოანეშ 5:28, 29). თე საკითხიშ უჯგუშო ინონჭაფაქ გემკარჩქინ, ნამდა ნამთინე შხვა საკითხიშ ენწყუმაქ ხოლო ოკო დითირუკო. თე დო უკულიან სტატიაშე ქიგებგენთ, მუქ ითირ. გუვარჩიენთ, მუ ვა მიჩქუნა დო მუ მიჩქუნა იეჰოვაშ სამართლიან განაჩენეფიშ გურშენ.

ᲛᲣ ᲕᲐ ᲛᲘᲩᲥᲣᲜᲐ

5. მუ ჭარუდ აიშახ ჩქინ პუბლიკაციეფს სოდომ დო გომორას განადგურებულეფიშ გურშენ?

⁵ აიშახ ჩქინ პუბლიკაციეფს ჭარუდ, ნამდა თინეფ, მიდგაქ ულირს იეჰოვაშ ხეშე გენადგურეს, მაგალთო, სოდომ დო გომორაშ მახორუეფ, ვეგეთელებუდეს. მარა თე საკითხშე ბრელ ლოცვაშ დო უმოს ტომბა გიმორკვიებაშ შედეგო, თი დასკვნაშა ქიმეფრთით, ნამდა თენა გინოჭკირილო ვა მარაგადენა. მუშენ იფჩიებუთ თეს?

6. უბადოეფიშ განადგურებაშ ნამ შემთხვევეფ რე მოჩამილ ბიბლიას დო მუ ვა მიჩქუნა თე შემთხვევეფიშ გურშენ ზუსტას?

⁶ ბიბლიას ბრელ შემთხვევა რე მოჩამილ, მუჟამსით იეჰოვაქ უბადო ადამიანეფს განადგურებაშ განაჩენ გიშუღ. მაგალთო, დიდწყარალაშ დროს თიქ ნოეშ დო თიშ ოჯახიშ მეტ არძა ადამიან მოსპჷ. ონდო ისრაელეფ დუნაპირებ დიხაშა მიშეშეს, ღორონთიქ თინეფს შქვით ერ განადგურებაფუ. ართშა ხოლო თიქ მუშ ანგელოზიშ ხეთ 185 000 ასურელ ჯარიშკოჩ გოჭყვიდ ართ სერიშ დინახალე (დაბ. 7:23; კან. 7:1—3; ეს. 37:36, 37). ქირზენსო ბიბლია დასაბაღ ინფორმაციას თიშ ორაგადეთ, ნამდა თე შემთხვევეფს ღურელ არძა ადამიანს იეჰოვაქ მარადიულ განადგურებაშ განაჩენ გიშუღ დო თინეფიშ გათელებაშ მუთუნნერ იმენდ ვა არსებენს? ვარ, თენა ვა მარაგადენა. მუშენ?

7. მუ ვა მარაგადენა ზუსტას დიდწყარალაშ დო ქანაანიშ დიხაშ ეჭოფუაშ დროს განადგურებულ ხალხიშ გურშენ? (ქოძირით სურათ).

⁷ მართალ რე, ჟიშე მოჩამილ შემთხვევეფს იეჰოვაქ განადგურ თე ხალხ, მუჭოთ ჯგუფ, მარა ვა მიჩქუნა, თითოულ ადამიანს მარადიულ განადგურებაშ განაჩენ გიშუღ დო ვარ. ვართ თინა მიჩქუნა, ქუღუდ დო ვარ არძას იეჰოვაშ გაჩინებაფაშ დო ღორონთჸურე მიკორთაშ საშვალება. მაგალთო, დიდწყარალაშ პერიოდიშ ეჭარუაშ დროს ბიბლია იჩიებ, ნამდა ნოე „სიმართლეშ მაქადაგებელ“ რდჷ (2 პეტ. 2:5). მარა სოთინ ვა ჭარჷ, ნამდა ქიანაშმადიდა კიდობანიშ შენებაწკუმა ართო, ნოე თითო-კაკალო მიშჷ მთელ დედამიწას მახორუ არძა ადამიანშა დო ურაგადუდ, დიდწყარალა მოურსია. ქანაანიშ დიხას მახორუ უბადო ხალხშე ხოლო ვა მარაგადენა, ნამდა არძას უღუდ საშვალება, გეჩინებაფუკო იეჰოვა დო გეგშესწორუკო.

8. მუ ვა მიჩქუნა სოდომ დო გომორას მახორუ ხალხიშ გურშენ?

⁸ მუშ რაგად შემლებუნა სოდომ დო გომორას განადგურებულ ადამიანეფშე? მიჩქუნა, ნამდა ღორონთიშ თოლს მართალ კოჩ, ლოტ, სოდომს ცხოვრენდჷ. მარა ქომჩქუნანო, ნამდა თინა თექ არძას უქადაგუდ? ვარ. გასაგებ რე, თექ უბადო ხალხ ოხორანდჷ, მარა ქუმარაგადენანო, ნამდა თინეფშე არძას უჩქუდ, მუ რდჷ სწორ დო არასწორ, მარა იშენით არასწორო იქციებუდეს? მუჭოთ იძირენ, ვარ. ქიგიშინით შემთხვევა, მუჟამსით თე ქალაქიშ მახორუეფქ ლოტიშ სტუმარეფიშ გაუპატიურებშა მერთეს. ბიბლიას ჭარჷ, ნამდა თე გლახა საქმეშა მეულირ კოჩეფ შქას „ქოთ ბაღანა ბოშეფ დო ქოთ მოხუცებულეფ“ რდესჷ (დაბ. 19:4; 2 პეტ. 2:7). თავრეშე იძირე, ნამდა ჭიჭე დო დიდ გლახა გარემოს რდჷ ნარდ დო ალბათ დღას ვა ნოღვენა საშვალება, ქიდიგურესკო ღორონთიშ ნორმეფ. ქირაგადენო, ნამდა მოჭყოლოფე ღორონთიქ არძა მარადიულო განადგურ დო ნამთინშო ვა არსებენს გათელებაშ იმენდ? მუჭოთ იეჰოვაქ აბრაამს უწუ, თე ქალაქის ვით მართალ კოჩ ხოლო ვა რდჷ (დაბ. 18:32). თაშ რე, თინეფ უმართლოეფ რდესჷ დო იეჰოვაქ სამართლიანო განადგურ მუნეფიშ საქმეეფიშ გურშენ, მარა გინოჭკირილო ქუმარაგადენანო, ნამდა მუჟამსით „მართალ ვა რენან“ ფერეფ გეთელებუნა, სოდომ დო გომორაშ მახორუეფშე ნამთინ ვეჸუაფ თინეფ შქას? ვარ, თენა ზუსტას ვერაგადე!

9. მუ ვა მიჩქუნა სოლომონიშ გურშენ?

 ⁹ ბიბლიას თიცალ შემთხვევეფ ხოლო რე მოჩამილ, მუჟამსით მართალ ადამიანქ უმართლოთ გინირთჷ. მაგალთო, ართ-ართ რე სოლომონ, ნამუთ იჩინენდჷ იეჰოვას დო გვალო ჯგირო უჩქუდ, მუჭო ოკო ემსახურუკო თის. თე მეფეს ღორონთშე ქიანაშ კურთხევა უღუდ, მარა უკულ ტყურა ღორონთეფიშ თაყვანიშცემა ქიდიჭყჷ. სოლომონიშ ცოდეფქ მანგარო გარისხჷ იეჰოვა დო მთელ ისრაელ საუკუნეეფიშ დინახალე ღებულენდჷ თიშ გლახა საქციელიშ შედეგეფს. მარა ბიბლიაშე ბგებულენთ, ნამდა სოლომონ „მუშ ჯვეშეფიშ ხასლას“ დასაფლეს, ღორონთიშ თიცალ ართგურ კათა შქას, მუნერით რდჷ მეფე დავით (1 მეფ. 11:5—9, 43; 2 მეფ. 23:13). ათეშენ თი დასკვნაშა მიფშით, ნამდა სოლომონ გეთელებუდ. მარა ართგურ კათა შქას დასაფლესინ თიშენ ქირაგადენო სოლომონშე, ნამდა გარანტირებულ აფჷ გათელება? ბიბლია თეს ვეჩიებ. მიდგაინქ შილებე თქუას, ნამდა, რახანს ბიბლიას ჭარჷ, მიდგაქ დოღურ, ცოდაშე გეთავისფალუა, სოლომონ ხოლო გეთელებ (რომ. 6:7). მარა თენა ვა ნიშნენს, ნამდა არძა, მიდგაქ დოღურ, აუცილებერო გეთელებ, ითამ სიცოცხლე დამსახურებულ აფუდასინ თეშ. გათელება ძღვინ რე მოჸოროფე ღორონთშე, ნამდგას თინეფს არზენს, მით მარადიულ ცხოვრებაშ ღირსო მიორჩქ (იობ. 14:13, 14; იოან. 6:44). მიღენსო სოლომონ იეჰოვაშე თე ძღვინს? თეშ პასუხ ჩქი ვა მიჩქუნა, იეჰოვას უჩქჷ. მარა თინა მიჩქუნა, ნამდა მუდგას გინოჭყვიდუნს, აუცილებერო სამართლიან იჸუაფ.

ᲛᲣ ᲛᲘᲩᲥᲣᲜᲐ

10. მუს გინაფლენს იეჰოვა, მუჟამსით ადამიანეფშა განადგურებაშ განაჩენ გიშუღ? (ეზეკ. 33:11; ქოძირით სურათ).

¹⁰ წეკითხით ეზეკიელიშ 33:11. ბიბლიაშე ბგებულენთ, მუს გინაფლენს იეჰოვა, მუჟამსით ადამიანეფშა განაჩენ გიშუღ. ეზეკიელიშ წინასწარმეტყველებას ინოჭარილ სიტყვეფს მოგენს ღორონთიშ შთაგონებათ რაგადებულ პეტრეშ სიტყვეფ ხოლო, ნამუთ იეჰოვაშენ იჩიებ: „ვაკო, მითინქ დოღურას“ (2 პეტ. 3:9). თეშ რჩქინა მამშვიდენა დო მარწმუნენა, ნამდა იეჰოვა ახრებულო ვეგნოჭყვიდუნს მითინიშ მარადიულო განადგურებას, თეშ მანგარ სერიოზულ მიზეზ ვა უღუნ-და. თინა ჭყოლოფაშ ეფშა ღორონთ რე დო შურო საშველ ქორენ-და, აპატიენს კოჩის.

11. მი ვეგეთელებ დო სოვრეშე მიჩქუნა თენა?

¹¹ მიშენ მიჩქუნა ზუსტას, ნამდა ვეგეთელებ? ბიბლია ხვალე მუსხირენ თეცალს მიშინუანს. b მაგალთო, იესოშ ნარაგადშე ირწყებე, ნამდა იუდა ისკარიოტელ ვეგეთელებ (მარ. 14:21; ქოძირით იოანეშ 17:12). c იუდას გვალო ჯგირო უჩქუდ, მუს ორთუდ, მარა იშენით შეგნებულო მიდართჷ იეჰოვაშ დო თიშ სქუაშ წინააღმდეგ (ქოძირით მარკოზიშ 3:29). d იესოქ ნამთინე რელიგიურ ლიდერშე ხოლო, ნამუთ თის ოწინააღმდეგუდ, თქუ, ნამდა ვეგეთელებუდეს (მათ. 23:33; ქოძირით იოანეშ 19:11). e მოციქულ პავლექ ხოლო თქუ, ნამდა ვართ მოუნანიებელ განდგომილეფ გეთელებუდეს (ებრ. 6:4—8; 10:29).

12. მუ მიჩქუნა იეჰოვაშ ჭყოლოფაშ გურშენ? ქიმიჸუნით მაგალითეფ.

¹² ასე თიშე ქიფჩუათ, მუ მიჩქუნა იეჰოვაშ ჭყოლოფაშ გურშენ. მუჭო ოძირანს თინა, ნამდა მართალო „ვაკო, მითინქ დოღურას“? ქიგიფშინათ, მუნერ ჭყოლოფა გიმირჩქინ თიქ ნამთინე ადამიანიშ მიმართ, მიდგაქ სერიოზულო დაშუ. მაგალთო, მეფე დავითის თიცალ სერიოზულ ცოდეფ უღუდ ღორონთიშ წოხოლე, მუნერით რე უზნეობა დო კოჩიშ ჸვილუა, მარა თიქ ინარღჷ მუთ დაშუ, დო იეჰოვაქ ხოლო მთელ გურით ქაპატუ (2 სამ. 12:1—13). მეფე მენაშე ხოლო მუშ ცხოვრებაშ უმენტაშის მანგარ უბადოთ იქციებუდ. მარა იეჰოვაქ თეცალ კოჩწკუმა ხოლო ქოძირ ჭყოლოფაშ გიმორჩქინაშ დო პატიებაშ  მიზეზ, მუშენდა თიქ მიკირთჷ იეჰოვაჸურე (2 მატ. 33:9—16). თე მაგალითეფ გუმოშინანა, ნამდა იეჰოვას ჭყოლოფაშ გიმორჩქინაშ შურო აკაბცხა მიზეზ ვარა ქოუღუნ-და, მუთუნით ვა თქუანს თეშე ვარიას; თინა გათელენს თეცალ ადამიანეფს, მუშენდა ქუგოხვადეს, მუშმაშხვა აფუდეს დაშებულ ღორონთიშ წოხოლე დო მთელ გურით ინარღეს.

13. ა) მუშენ აპატუ იეჰოვაქ ნინეველეფს? ბ) მუ თქუ იესოქ ნინეველეფიშ გურშენ?

¹³ ნინეველეფიშ შემთხვევაშე ხოლო ჯგირო იძირე, მუნერ მოჭყოლოფე რე იეჰოვა. ღორონთიქ იონას თინეფიშ გურშენ უწუ: „ჩქიმ ჸუჯშა ქუმაჭირინუ თინეფიშ უბადობაქ“. იეჰოვას განაჩენ აფუდ გიშაღალირ თინეფშა, მარა მუჟამსით ინარღეს დაშებულ, ღორონთიქ მთელ გურით ქაპატუ. იონას თეშე გურქ მოურთჷ, მუდროსით იეჰოვაქ ქუგაშინ, ნამდა ნინეველეფს ჯგირ დო ფურ ვეგშაგორედეს ართიანშე (იონ. 1:1, 2; 3:10; 4:9—11). მართალო ზღვა დო გვალა რდჷ იეჰოვაშ გიმორჩქინელ ჭყოლოფაშ დო იონაშ გიმორჩქინელ ჭყოლოფაშ შქას. წანეფიშ უკულ იესოქ ნინეველეფიშ მაგალით იეჰოვაშ სამართლიანობაშე დო ჭყოლოფაშე ჩიებაშ დროს გიმირინუ. თიქ თქუ, ნამდა ნინეველეფ, მიდგაქ ინარღეს დაშებულ, გეთელებუდეს „გასამართლებაშ დღას“ (მათ. 12:41).

14. მუ გაგებათ გეთელებუნა ნინეველეფ „გასასამართლებერო“?

¹⁴ მუს ნიშნენს, ნამდა ნინეველეფ „გეთელებუნა . . . გასამართლებაშ დღას“? იესოქ თქუ, ნამდა მომავალს იჸუაფ გათელება „გასასამართლებერო“ (იოან. 5:29). თინა „მართალეფიშ“ დო „მართალ ვა რენან თინეფიშ“ გათელებაშ ამბეს რდჷ, ნამუთ მუშ ანთასწანიან მართველობაშ დროს მოხვადუ (საქ. 24:15). „მართალ ვა რენან“ ფერეფშო თენა იჸუაფ გათელება „გასასამართლებერო“. თენა ნიშნენს, ნამდა მუჟამსით გეთელებუნა, იეჰოვა დო იესო დეკვირებუნა, მუჭო მიღენა დო გიმირინუანა ახალ ქვეყნიერებას ნაგურეფუს. გათელებურ ნინეველეფქ იეჰოვაშ თაყვანიშცემაშე ვარია ქოთქუეს-და, ღორონთ თინეფს სადღამუშოთ განადგურებაშ განაჩენს გეგშუღანს (ეს. 65:20). მარა თინეფშო, მით გინოჭყვიდუნა ართგურო ემსახურან იეჰოვას, თაშ ქოფთქუათინ, ჯგირ განაჩენ იჸუაფ დო მიაჩამუნა მარადიულ ცხოვრებაშ საშვალება (დან. 12:2).

15. ა) მუშენ ოკო ვა ფთქუათ, ნამდა სოდომ დო გომორას განადგურებულეფშე ნამთინ ვეგეთელებ? ბ) მუჭო შილებე გებგათ იუდაშ მა-7 მუხლის ინოჭარილ სიტყვეფ? (ქოძირით ჩარჩო  „მუშ რაგად ოკოდ იუდას?“).

¹⁵ იესოქ სოდომ დო გომორას მახორუეფშე ჩიებაშ დროს თქუ, ნამდა თექიანეფს უმოს ეფ გინაღალარ აჸიდეს სასამართლოშ დღა, ვინემ  თინეფს, მით ვა ღებულენდეს თის დო ველერჩქილუანდეს თიშ გურაფას (მათ. 10:14, 15; 11:23, 24; ლუკ. 10:12). მუშ რაგად ოკოდ იესოს თეთ? შილებე იფიფქრათ, ნამდა იესო თაქ ჰიპერბოლას f ირინუანს თიშ ორაგადეთ, ნამდა მუშ დროს მახორუ ხალხ სოდომ დო გომორელეფშე უფრაშეფ რდესჷ. მარა ქიგიფშინათ, ნამდა, მუჟამსით იესოქ ნინეველეფიშ გურშენ თქუ, გასამართლებაშ დღას გეთელებუნანია, თინა პირდაპირ გაგებათ იჩიებუდ. გიშურს, ნამდა იესო სოდომ დო გომორელეფიშ გურშენ ხოლო პირდაპირ გაგებათ ნორაგადუე. ნინეველეფიშ გურშენ რაგადებულ „გასამართლებაშ დღა“ დო სოდომ დო გომორას მახორუეფიშ გურშენ რაგადებულ „სასამართლოშ დღა“ ართ დო იგივე მუდგარენ რე. ნინეველეფცალო სოდომ დო გომორას მახორუ ხალხ ხოლო უბადოთ იქციებუდ, მარა თინეფიშ გინაწონს, ნინეველეფს ღორონთჸურე მიკორთაშ საშვალება უღუდეს. თეწკუმა ართო, იესოქ თინა ხოლო თქუ, ნამდა „გასასამართლებერო“ გათელებურეფ შქას „გლახა საქმეეფიშ მაკეთებელეფ“ ხოლო იჸუაფუდეს (იოან. 5:29). გიშურს, ნამდა შილებე სოდომ დო გომორას მახორუეფშო არსებენდას გათელებაშ იმენდ; შილებე თე ხალხშე ნამთინექ გეთელას დო ჩქი ქუმმაჩან თინეფშა გურაფაშ დო იეჰოვა დო იესოშ გაჩინებაფაშ საშვალებაქ!

16. მუ მიჩქუნა თიშ გურშენ, მუჭო გინოჭყვიდუნს იეჰოვა, მი გათელას დო მი ვარ? (იერ. 17:10).

¹⁶ წეკითხით იერემიაშ 17:10. თე მუხლ, თაშ ქოფთქუათინ, აკოძინუნს თის, მუთ მიჩქუნა იეჰოვაშ, ჩქინ სამართლიან მოსამართლეშ გურშენ. თინა „ირკვიენს გურს დო ამოწმენს ფიქრეფს“. მუჭოთ ირონ თეშ, მომავალს ხოლო, თიშ გინოჭყვიდუაშ დროს, მი გათელას დო მი ვარ, იეჰოვა არძას „მუშ შარათ“ გინუგანს; სოდეთ საჭირო რენ თექ, თინა მკაცრ იჸუაფ დო მუთუნით ვეგნურთანს მუშ სამართლიან ნორმეფს, მარა შურო საშველ ქიჸინ-და, აუცილებერო გეგმირჩქინანს ჭყოლოფას. თაშ ნამდა, ბიბლია მუთუნს ვეჩიებუნ-და, ჩქინით მითინიშ გურშენ ოკო ვა ფთქუათ, ნამდა ვეგეთელებ!

„ᲛᲗᲔᲚ ᲓᲔᲓᲐᲛᲘᲬᲐᲨ ᲛᲝᲡᲐᲛᲐᲠᲗᲚᲔ“ ᲛᲣᲗᲣᲜᲘᲗ ᲕᲔᲛᲘᲥᲪᲘᲔᲑ ᲣᲡᲐᲛᲐᲠᲗᲚᲝᲗ

17. მუ ელჷ მილიარდობით ღურელს?

¹⁷ ადამ დო ევაქ სატანას ალუდირთეს დო იეჰოვაშ წინააღმდეგ იდესინ თევრეშე მოჸუნაფილ, მილიარდობით ადამიან რე ღურელ. ღურა მართალო უდუნდებელ „ნტერ“ რე!  (1 კორ. 15:26). მუ ელჷ თე ხალხის? ქრისტეშ ართგურ მიმაჸუნალეფიშ ჭიჭე ნაწილ, 144 000 ცხებულ, გეთელებ ზეცას დო მიღენს უკვდავებას (გამოცხ. 14:1). ღორონთიშ ართგურ მსახურეფიშ უმენტაშ, მიდგას უჸორდეს იეჰოვა, გეთელებუნა მუჭოთ „მართალეფ“. ქრისტეშ ანთასწანიან მართველობაშ დო საბოლა გამოცდაშ დროს თინეფ ღორონთიშ ართგურეფ ქიჸუაფუნან-და, მარადიულო იცხოვრენა დედამიწას (დან. 12:13; ებრ. 12:1). ქრისტეშ მართველობაშ დროს „მართალ ვა რენან“ ფერეფ ხოლო — თი კათა მით ვამსახურუდ იეჰოვას ვარდა შილებე გვალო გლახა საქმეეფიშ მაკეთებელ რდუკო — გეთელებუნა დო აღვენუნა საშვალება, დითირან დო გინირთან იეჰოვაშ ართგურ მსახურეფო (ლუკ. 23:42, 43). მარა ნამთინე ადამიან თიცალ უბადო რდჷ, ნამდა შეგნებულო მიდართჷ იეჰოვაშ დო თიშ განზრახვეფიშ წინააღმდეგ, ათეშენ ღორონთის თინეფშა მარადიულ განადგურებაშ განაჩენ აფჷ გიშაღალირ დო დღას ვეგეთელებუნა (ლუკ. 12:4, 5).

18, 19. ა) მუშენ შემლებუნა ბჯერდან, ნამდა ღურელეფშა გიშაღალირ იეჰოვაშ არძა განაჩენ სამართლიან იჸუაფ? (ეს. 55:8, 9). ბ) მუს გუვარჩიენთ უკულიან სტატიას?

¹⁸ შემლებუნა ბოლოშა ვორდათ დარწმუნებულ, ნამდა იეჰოვაქ მუდგანერ განაჩენ ვეგშეღასინ, გამართლება იჸინო დოვარ გამტყუნება, არძა სამართლიან რე. აბრაამცალო ჩქი ხოლო შემლებუნა ბჯერდან, ნამდა „მთელ დედამიწაშ მოსამართლე“, იეჰოვა, სრულყოფილ, არძაშ უმოს ბრძენ დო მოჭყოლოფე რე. თიქ მუშ სქუას ქუდაგურუ, მუჭო გასამართლას ადამიანეფ დო თიშა აფჷ ჩაბარებულ თე საქმე (იოან. 5:22). მუმა დო სქუას, ჟირხოლოს შეულებუნა ძირან, მუ ხვადუ კოჩიშ გურს (მათ. 9:4). თაშ ნამდა, თინეფიშ გიშაღალირ არძა განაჩენ ირო სამართლიან რე!

¹⁹ მორთ თოლწკურილო ვენდათ იეჰოვაშ არძა გადაწყვეტილებას. მარჩქილენა, ნამდა გასამართლება საჩქინო საქმე ვა რე; თენა იეჰოვაშ საქმე რე (წეკითხით ესაიაშ 55:8, 9). ათეშენ გასამართლებას იეჰოვას დო ჩქინ მეფე იესოს ვონდუთ, ნამუთ მუამუშცალო სასწაულ მოჭყოლოფე დო სამართლიან რე (ეს. 11:3, 4). მარა საინტერესო რე, მუჭო გასამართლენა იეჰოვა დო იესო ადამიანეფს „დიდ გაჭირებაშ“ დროს? უკულიან სტატიას გუვარჩიენთ, მუ მიჩქუნა დო მუ ვა მიჩქუნა თე საკითხიშ გურშენ.