1, 2. მუშენ რე გურიშელაკინა მნიშვნელოვანი?

„ჩქიმ მშობლეფ გურიშელაკინაშ მანგიორო ირო მაკრიტიკენდეს. თინეფიშ სიტყვეფ გურს ელმოჭუანდ“, — იჩიებ 18 წანერ ქრისტინა. ^[1] „თინეფ მირაგადუდეს, ნამდა მუთუნ ვამიჩქუდ, დღას მუთუნ ვადმაგურედ დო ნაბეტან შხუ ვორდ. ათეშგურშენ ხშირას იმგარდ დო მისხუნუდ შურო ვადომრაგადუაფუდკო თინეფშა. დუდ უღირსო მიმორჩქუდ“. ჯაქვაბორიას ჩქინ ცხოვრება, ართიანს გურშა ველუკინით-და.

² გურიშელაკინას დიდ ძალა უღუ. „ქიანახანს მაწუხენდ უღირსობა დო ვობრძოლუდ თე პრობლემას“, — იჩიებ რუბენ. „მარა ართშა უხუცესწკუმა ვმსახურენდ დო თიქ ქიმეხვად, ნამდა ვა ვორდ ჯგირ ხასიათის. თინა შურ დო გურით მირჩქილედ, მუჟამსით ურაგადუდ, მუს ბგინაფლენდინ. თიქ ქუგმოშინ თი ჯგირ საქმეეფი, ნამუთ ნაკეთებ მაფუდ. უკულ იესოშ სიტყვეფი ხოლო ქუგმოშინ, ნამდა ჩქი თითოულ ბაღირეშე უმოს ძვირფას ვორეთ“ (მათ. 10:31).

3. ა) მუ თქუ მოციქულ პავლექ გურიშელაკინაშ გურშენ? ბ) მუ საკითხეფს გენიფხილენთ თე სტატიას?

³ გასაკვირ ვა რე, მუშენ აქციენს დიდ ყურადღებას ბიბლია გურიშ ელაკინაშ აუცილებლობას. მოციქულ პავლექ ებრაელ ქრისტიანეფს მეჭარ: „გიჩქუდან ჯიმალეფი, ნამდა ვეჩეთხუათ  ცოცხალ ღორონთის დო თქვანდე ნამთინეს უბადო დო ურწმუნო გურქ ვაშუას, პირიქით ვემიოტუათ ართიანიშ გურიშელაკინა, ნამდა ცოდაშ მაჩილითაფარ ძალაქ ვაგგაჯიუტან“ (ებრ. 3:12, 13). დღას მითინს ქაფუ თქვანდა გურშა ელნაკინა-და, ალბეთ, ჯგირო გარჩქილედან იჸი, ნამდა აუცილებერ რე თე რჩევაშ მეჸუნა. მორთ, გუვარჩიათ სუმ საკითხი: მუშენ უღუ დიდ ძალა გურიშელაკინას? მუს ბგურაფლენთ იეჰოვაშ, იესოშ დო პავლეშ მაგალითეფშე გურიშელაკინაშ გურშენ? მუჭო შემლებუნა გურშა ელუკინათ შხვეფს თეშ, ნამდა ჯგირ შედეგიქ ქუმაჸუნას?

4. მის ოსაჭირ გურიშელაკინა, მარა მუშენ რე თიშ დეფიციტ ამდღა?

⁴ გურიშელაკინა არძას მოსაჭირუნა, მარა თენა არძაშ უმოსო ბაღანეფს ოსაჭირ. „მუჭოთ მცენარეს ოსაჭირ წყარინ თეშ, სქუალფს . . . ხოლო ოსაჭირუნა გურიშელაკინა, — იჩიებ პედაგოგი ტიმოთი ევანზ“. — გურიშელაკინა ღირსებაშ გრძნობას უმაღალენს დო არწმუნენს, ნამდა ძვირფასეფ რენა“. მარა ჩქი მანგარ ძნელო გინაღალარ დროს ფცხოვრენთ; ხალხი ეგოისტო რე გინორთელ; ნამთინე შურო ვეგმოხანტუნს ჸოროფას დო შხვეფს იშვიათო ელუკინანს გურშა (2 ტიმ. 3:1—5). მინ მშობელი ვაცქვანს მუშ სქუალეფს, მუშენდა თინეფშა ხოლო დღას ვაუთქუალნა ოცქვაფურ სიტყვეფ მუნეფიშ დიდა დო მუმას. ბრელს ოცქვაფურ სიტყვეფს დღას ვაუწინა სამუშას, ათეშგურშენ ირიათო გინაფულენა თიშ ნარკულობას.

5. მუ მიშურს გურიშელაკინაშა?

⁵ გურიშელაკინა რე, მუჟამსით ოცქვანქ შხვას ჯგირ საქმეშ კეთებაშენ. შხვეფს გურშა ელუკინანთ, მუჟამსით ვოცქვანთ ჯგირ თვისებეფშენ ვარდა გურშა ევქექუანთ გურაკოჭირებულეფს (1 თეს. 5:14). ბერძნულ სიტყვა, ნამუთ უმენტაშო გურიშელაკინათ ითარგმნუ, სიტყვასიტყვათ „მუშჸურე დოძახებას“ ნიშნენს. მუჟამსით და დო ჯიმალეფწკუმა მსახურენთინ, ბრელ საშვალება მუმაჩამუნა, გურშა ელუკინათ თინეფს ჩქინ სიტყვეფით (წეკითხით ეკლესიასტეშ 4:9, 10). ქოურაგადუთო შხვეფს მოხუჯურ დროს, მუშენ გიჸორა დო მუშენ აფასენთ თინეფს? ონდო თე კითხვას უპასუხენდათინ, დეფიფქრათ ათე სიტყვეფშენ: „მუ ჯგირ რე მუშ დროს ნათქუელ სიტყვა!“ (იგავ. 15:23).

6. მუშენ ოკო ეშმაკის ჩქინ გურიშ გოტახუა? ქიმიჸონ მაგალით.

⁶ სატანას ოკო, გურ გომტახან, მუშენდა თის უჩქუ, გურიშგოტახუას შეულებ დუმასუსტან სულიერო დო შხვა მხარეთ ხოლო გლახათ იმოქმედას ჩქინწკუმა. იგავეფიშ 24:10-ის ჭარ: „გაჭირებაშ დროს გურქ გოიტირხ-და, ძალა ქეშქელიებუ“. სატანაქ იობშა გურ გუტახუდკონ თიშენ, ბრელ უბედრობა გიორაგუ დუც დო ბრელ მუთუნ ეკაწამ, მარა მუთუნქ ვაგშურთ (იობ. 2:3; 22:3; 27:5). ოჯახიშ დო კრებაშ წევრეფს გურშა ქელუკინანთ-და, თეთ ეშმაკიშ საქმეეფს ვოწინააღმდეგუთ. თეგვარო, ოჯახის დო კრებას არძა ბედნერო დო უშკურანჯუო იგინანს დუც.

7, 8. ა) ნამ ბიბლიურ მაგალითეფშე იძირე, ნამდა იეჰოვა საჭიროთ მირჩქინანს შხვეფშა გურიშ ელაკინას? ბ) მუჭო შეულებუნა მშობლეფს მიაჸუნან იეჰოვაშ მაგალითის? (ქოძირით სურათ მა-4 გვერდის)

⁷ იეჰოვა. ფსალმუნიშმაბირე ჭარუნდ: „იეჰოვა ხოლოს რე გურგოტახილეფწკუმა დო შურაკოჭირებულეფწკუმა“ (ფსალმ. 34:18). მუჟამსით იერემია შკურნაფილ დო გურგოტახილ რდუნ, იეჰოვაქ თე ართგურ წინასწარმეტყველს მუშ დუდიშ რწმენა ქიმეჩ (იერ. 1:6—10). წერმიდგინით, მუჭო ელუკინანდ გურშა მოხუცებულ წინასწარმეტყველ დანიელს, მუჟამსით იეჰოვაშე მეშკუმალირ ანგელოზ გამანგარენდ თის დო ქუწინდ, ნამდა „ძვირფას კოჩ“ რდუ  (დან. 10:8, 11, 18, 19). ქეშეილებუნანო თქვა ხოლო გურშა ელუკინათ მაუწყებელეფს, პიონერეფს დო ხანშა მიშულირ ძალადინაფილ და დო ჯიმალეფს?

⁸ ღორონთი მუშ საჸოროფო სქუაწკუმა ართო გვალო ბრელ ხანს ხანდენდ, მარა თის ვა უფიქრებ, ნამდა იესოს დედამიწას ვასაჭირუდ გურიშელაკინა დო ცქვაფა. პირიქით, იესოშ გასაგონეთ ღორონთიქ ჟირშა თქუ ზეცაშე: „თენა რე ჩქიმ საჸოროფო სქუა, ნამუთ მა მიბწონე“ (მათ. 3:17; 17:5). თეგვარო, თიქ ქაცქუ იესოს დო დარწმუნ, ნამდა მოწონდ თინა. მუშო ოკო რაგად, იესოს მანგარო ელუკინანდ გურშა თე სიტყვეფიშ ჟირშა მორჩქილაფა — პირველაშო მსახურებაშ დაჭყაფუს დო მაჟიაშა მსახურებაშ გიშალიებუს. იეჰოვაქ ანგელოზ ხოლო ქუმაშკუ იესოშა, მუჟამს ღურაშ წოხოლენ სერს მანგარო იტანჯებუდ დო გამანგარ თინა (ლუკ. 22:43). მშობლეფი, მიაჸუნით იეჰოვაშ მაგალითის, გურშა ელუკინით დო ქაცქვეთ თქვან სქუალეფს ჯგირ საქმეეფიშ გურშენ! არძაშ უმოსო თიმწკუმა ქელუდირთით, მუჟამსით სკოლას რწმენაშ გომოცდეფიშ წოხოლე გერენა.

9. მუს ბგურაფლენთ თევრეშე, მუჭო ოქცუდ იესო მუშ მოციქულეფს?

⁹ იესო. თიმ ონჯუას, მუჟამსით იესოქ მუშ ღურაშ გოშინაშ ონჯუა დაწესუნ, მუშ მოციქულეფს სიამაყე ქახვილუ. იესოქ თანდაბლობა გეგმირჩქინ დო კუჩხეფ გოუბონ მუშ მოციქულეფს, მარა თინეფ იშენით აგრძელენდეს თიშე ნირზის, მი რდუ თინეფშქას უდიდაშ (ლუკ. 22:24, 33, 34). მარა თეშ უმკუჯინუო, იესოქ იშენით ქაცქუ მოციქულეფს, მუშენდა გაჭირებაშ დროს ვემუტებუნა თინა. იესოქ იწინასწარმეტყველ, ნამდა თინეფ მუშე უმოს საქმეს გაკეთენდეს დო ღორონთიშ ჸოროფაშა დარწმუნ (ლუკ. 22:28; იოან. 14:12; 16:27).ქოპკითხათ ოკო ჩქინ დუც: შეცდომეფშა ყურადღებაშ მექციებაშ მანგიორო, ხომ ვა უჯგუ ქუვოცქუე სქუალეფს ვარდა შხვეფს თი საქმეეფშენ, ნამუთ ჯგირო გიშალენა?

10, 11. სოვრეშე იძირე, ნამდა პავლეს საჭიროთ მიორჩქუდ შხვეფშა გურიშელაკინა?

¹⁰ მოციქულ პავლე. პავლე მუშ წერილეფს დადებითო მიშინუანს თანაქრისტიანეფს. ნამთინეწკუმა ართო წანეფს მსახურენდ, ათეშგურშენ, მუშო ოკო რაგად, ჯგირო არჩქვენუდ თინეფიშ სისუსტეეფი, მარა ირიათო ჯგირს იჩიებუდ თინეფშენ. მაგალთო, თიქ ტიმოთეშენ თქუ, ნამდა თინა რდუ „საჸოროფო დო ართგურ სქუა უფალს“, ნამუთ შხვა ქრისტიანეფს ყურადღებას ვარკენდ (1 კორ. 4:17; ფილ. 2:19, 20). მოციქულქ კორინთიშ კრებას უწუ, ნამდა ტიტე „ჩქიმ თანამსახურ დო თანამშრომელ რე, თქვან სასაგრებლოთ“ (2 კორ. 8:23). ტომოთეს დო ტიტეს მანგარო ელუკინანდ გურშა თიშ გაგება, ნამდა პავლე დადებითო ფიქრენდ თინეფშენ!

¹¹ პავლექ დო ბარნაბაქ მანგარ რისკშა იდეს, მუჟამსით დირთეს თი ქალაქშა, სოდეთ დახე დოჸვილეს. მაგალთო, თინეფქ თხოზინიშ უმკუჯინუო იშენით დირთეს ლისტრაშა, ახალ მოწაფეეფშა გურშა ელუკინუდესკო დო რწმენა გუმანგარებუდესკონ თიშენ (საქ. 14:19—22). ეფესოს პავლეს აგრესიულ ხალხიქ გამათხოზ. საქმეეფიშ 20:1, 2-ს ჭარ: „ბუძოლიაქ მეჭყორდუნ, პავლექ მოციქულეფ ქიჭანუ, გურშა ელუკინ, ჯგირობუა ქუდუჩინ დო მაკედონიაშა მიდართ. მილუ თექიან ადგილეფ, გურშა ელუკინ თექიანეფს დო საბერძნეთშა მიდართ“. თავრეშე ჯგირო იძირე, ნამდა პავლეს საჭიროთ მიორჩქუდ შხვეფშა გურიშელაკინა.

12. მუჭო უნწყუნს ხეს კრებეფ ართიანიშ გურიშელაკინას?

¹² ართიანშა გურიშელაკინა რე თიშ ართ-ართ მიზეზი, ნამუშ გურშენ ჩქინ  ზეციურ მუმას ოკო ვემუვოტუათ კრებეფშა გილულა (წეკითხით ებრაელეფიშ 10:24, 25). იესოშ ადრეიან მოწაფეეფცალო, ჩქი ხოლო ართო იფშაყარუთ, ნამდა ქიდიბგურუათ დო გურშა ელუკინათ ართიანს (1 კორ. 14:31). სტატიაშ დაჭყაფუს მოშინაფილ ქრისტინა იჩიებ: „არძაშ უმოსო კრებეფ თიშენ მიჸორს, თექ ჸოროფას ბგინაფლენქ დო გურშა ელამკინანა. მინშა გურ აკოჭირებულ მეურქ სამეფო დარბაზშა, მარა მუჟამსით დალეფ გურშა ქომხუტოლუანა დო ქომწინა, მუ სქვამ რექ, ჯგირ ხასიათის გებდირთუქ; თინეფ ჸოროფას გიმირჩქინანა დო მირაგადუნა, ნამდა ოხიოლუნა ჩქიმ სულიერ წიმიულა. თეშ უკულ უმოს უჯგუშო ბგინაფლენქ დუც“. მუშმაჯგირა რე, მუჟამსით კრებას არძა ოცად ართიანიშ გურიშელაკინას (რომ. 1:11, 12).

13. მუშენ ოსაჭირუნა გურიშელაკინა თინეფს ხოლო, მით ბრელ ხან რე ღორონთის ომსახურუნა?

¹³ გურიშელაკინა თინეფს ხოლო ოსაჭირ, მით ბრელ ხან რე ღორონთის ომსახურ. გუვარჩუათ იესო ნავეშ სქუაშ შემთხვევა. თინა წანეფ ომსახურუდ ღორონთის ართგურო, მარა იეჰოვაქ მოსეს დავალ გურშა ელუკინუდკო თიშა: „ქუდანიშნი იესო ნავეშ სქუა, გურშა ელუკინ დო გამანგარ, მუშენდა თინა იჸი თე ხალხიშ მანჯღვერე დო თინა მიოღებაფუანს თინეფს თი დიხას, ნამუსით ძირუნქ“ (კან. 3:27, 28). ჭიჭე ხანშა იესო ნავეშ სქუას დიდ პასუხიშმგებლობა ქაშიდ; თინა ქაწაჸუნუდ ისრაელს დო ხეშა ქეშიჸოთანდ დუნაპირებ დიხას. თინა ბრელ წინააღმდეგობას შეხვადუდ დო არძაშ უნაკლებაშ ართშა იშენით წაგენდ ჩხუპის (იეს. 7:1—9). გასაკვირ ვა რე, ნამდა იესო ნავეშ სქუას ხოლო ოსაჭირუდ გურიშელაკინა დო გამანგარება! მორთ, ჩქი ხოლო ელუკინათ გურშა უხუცესეფს დო რაიონულ ზედამხედველეფს, მით ბრელს ხანდენა ღორონთიშ ოჭყიშალშო (წეკითხით 1 თესალონიკელეფიშ 5:12, 13). ართ რაიონულ ზედამხედველ იჩიებ: „მინშა ჯიმალეფ წერილეფს მიჯღონანა, სოდეთ სიმარდულს გიმოხანტუნა დო ჭარუნა, ნამდა მანგარო მეწონეს მონახულებაქ. ჩქი ფჩუანთ თე წერილეფს დო თიმწკუმა პკითხულენთ, მუჟამს გლახათ ბგინაფლენთ დუც. თე წერილეფ მანგარო ელამკინანა გურშა“.

14. სოვრეშე იძირე, ნამდა ოცქვაფალ სიტყვეფიშ რაგადის დო გურიშ ელაკინას ჯგირ შედეგ მოუღ ბიბლიურ რჩევეფიშ მეჩამაშ დროს?

¹⁴ უხუცესეფქ დო მშობლეფქ ქოძირეს, ნამდა ცქვაფა დო გურიშელაკინაშ დროს უმოს ადვილ რე ბიბლიურ რჩევაშ მეღება. პავლექ კორინთელ ქრისტიანეფს ოცქუ რჩევა მიღესინ თიშენ; მუშო ოკო რაგად, თეშ უკულ თინეფ უმოსო მინდომენდეს, გუგრძელებდესკო სწორაშო მოქციება (2 კორ. 7:8—11). ანდრეასი, ნამუსით ჟირ სქუა ჸუნს, იჩიებ: „გურიშელაკინა ოხვარ სქუალეფს, მირდან სულიერო დო  ემოციურო. გურიშელაკინაშ დროს რჩევას ხოლო ჯგირ შედეგ მოჸუნს. სქუალეფს უჩქუნა, მუ რე სწორ, მარა თინეფ თიმწკუმა იქციებუნა სწორას, მუჟამსით ირო გურშა ელუკინანთ“.

15. მუ რე შხვეფიშ გურიშელაკინაშ ართ-ართ საშვალება?

¹⁵ ქოუწით თანამორწმუნეფს, ნამდა აფასენთ თინეფიშ მონდომას დო ჯგირ თვისებეფს (2 მატ. 16:9; იობ. 1:8). იეჰოვა დო იესო მანგარო აფასენა ირფელს, მუდგას ვორთუთ თიშო, ნამდა სამეფოშ საქმექ წიმი მიდართას, თიშ უმკუჯინუო, ნამდა ჩქინ მდგომარეობაშ გურშენ, ჭიჭე შესაწირს ვორთუთ, ვარდა ბრელ ვამამსახურებენა (წეკითხით ლუკაშ 21:1—4; 2 კორინთელეფიშ 8:12). მაგალთო, ნამთინე ჩქინ ძვირფას, ხანშა მიშულირ თანაქრისტიანს დიდ მონდომა ოსაჭირ, რეგულარულო ქიქადაქას, ქიგლართას კრებაშა დო მიღას მონაწილება. დასურო, თეცალეფს ვამვუარკათ ოკო ოცქვაფურ სიტყვეფი დო გურიშ ელაკინა!

16. მუშენ ოკო ვაგუტუათ ხეშე შხვეფიშ გურიშელაკინაშ საშვალება?

¹⁶ ხეშე ვაგუტუათ შხვეფიშ გურიშელაკინაშ საშვალება. დუდ ვეშეკავათ, მუჟამს ორწყეთ, ნამდა შხვეფ იმსახურენა ცქვაფას. პისიდიაშ ანტიოქიას პავლეს დო ბარნაბას სინაგოგაშ აწმანჯღვერეფქ უწუეს: „ჯიმალეფ, მუთუნ გურიშელაკინალ ქოიღუნა ორაგადე-და, ქოთქვით“. პავლექ გეგმირინუ თე შემთხვევა, სიტყვათ გეგშართ დო გურშა ელუკინ თექ შაყარელ ხალხის (საქ. 13:13—16, 42—44). მუჟამსით მიღუნა საშვალება, მითინს ჩქინ სიტყვათ გურშა ელუკინათინ, მუშენ ოკო ვავაკეთათ თენა?! ქუვორეთ მერჩქვანელ შხვეფშა გურიშელაკინას-და, ჩქი ხოლო გურშაელამკინანა (ლუკ. 6:38).

17. მუნერ ოკო რდას ოცქვაფურ სიტყვეფი?

¹⁷ რდათ ალალ გურიშ დო კონკრეტულ. ზოგად სიტყვეფით გურიშელაკინა დო ცქვაფა გლახა ვა რე, მარა იესოშ სიტყვეფშე, ნამუთ თიატირას ცხოვრენდეს ფერ ქრისტიანეფს მეჭარუნ, იძირე, ნამდა უჯგუშ რე ვორდათ კონკრეტულეფ (წეკითხით გამოცხადებაშ 2:18, 19). მაგალთო, ჯგირ იჸუაფ მშობლებქ ქაცქუან სქუალეფს, სულიერო წიმი მეულან თიშენ. შემლებუნა ქუვოცქუათ ხვალახე დიდას, ნამუთ მუშ მდგომარეობაშ უმკუჯინუო, სქუალეფიშ რდუალას მონდომას ვარკენს. თეცალ გურიშელაკინას დო ცქვაფას დიდ ძალა უღუ!

18, 19. მუჭო შემლებუნა გურშა ელუკინათ თინეფს, მიდგას ოსაჭირ თენა?

¹⁸ იეჰოვა ვა მავალენა კონკრეტულო მითინიშ გურიშ ელაკინას, მუჭოთ მოსეს დავალ იესო ნავეშ სქუაშ გურიშ ელაკინა დო გამანგარებან თეშ. მარა ღორონთის მოწონს, მუჟამსით ჩქი გურშა ელუკინანთ თანამორწმუნეეფს დო შხვეფს (იგავ. 19:17; ებრ. 12:12). მაგალთო, შემლებუნა თემათ გიშმაულარს ქუწუათ, ნამ რჩევას გიმიბრინუანთ თიშ მოხსენებაშე ვარდა ნამ ბიბლიურ მუხლი გებგით უჯგუშო. ართ დაქ მოწვიებულ მომხსენებელს მეჭარ: „მართალ რე, გვალო მუსხირენ წუთის ბრაგადეთ, მარა ქუგოხვად, ნამდა გურ მაფუდ აკოჭირებულ. მანგარო ელამკინ გურშა. სიტყვეფ, ნამუთ სცენაშე მიფრჩქილე დო პირადო ხოლო მიწინ, იეჰოვაშ საჩუქარ რე ჩქიმო“.

¹⁹ შხვეფს სულიერო გურშა ელუკინანთ, მუჟამსით ქიმვაჸუნუთ პავლეშ რჩევას, ნამდა ირიათო გურშა ელუკინათ ართიანს (1 თეს. 5:11). შემლებუნა დარწმუნებულ ვორდათ, ნამდა იეჰოვას მოწონს, მუჟამსით გურშაელუკინანთ ართიანს.