ორგანიზებულეფი ღორონთიშ სიტყვაშ ჭყოლოფუათ
„იეჰოვაქ სიბრძნეთ გაჭყ დედამიწა, გამჭრიახობათ გამანგარ ცა“ (იგავ. 3:19).
ობირეშეფი: 105, 107
1, 2. ა) მუს ფიქრენს ნამთინე ღორონთიშ ორგანიზაციაშ არსებობაშ გურშენ? ბ) მუს გუვარჩიენთ თე სტატიას?
უღუნო ღორონთის ორგანიზაცია? შილებე მითინქ თქუას: „ვამაფუნა საჭირო ორგანიზაცია, ნამუთ მითითებეფს მუჩანა. დასაბაღ რე, მიღუდან პირად ურთიერთობა ღორონთწკუმა“. სწორ ქო რენო თე აზრი? მუს ოძირანს ფაქტეფი?
2 თე სტატიაშე ჩქი ქობძირუნთ, ნამდა იეჰოვა, წესრიგიშ ღორონთი, უშუდარებ ორგანიზატორ რე. ჩქი თის ხოლო გუვარჩიენთ, მუ რეაქცია ოკო მიღუდან მითითებეფშე, ნამუსით იეჰოვაშ ორგანიზაციაშე ბღებულენთ (1 კორ. 14:33, 40). მუჭოთ პირველ საუკუნეს თეშ, ამდღა ხოლო წმინდა წერილეფ ოხვარ იეჰოვაშ ორგანიზაციაშ მიწიერ ნაწილს, შეასრულას სახიოლო ამბეშ ქადაქება ფართომაშტაბით. ჩქი კილ-კილშა მეპჸუნთ ბიბლიას დო ღორონთიშ ორგანიზაციაშ მითითებეფს; თეთ ხეს უნწყუნთ სიწმინდეს, მშვიდობას დო კრებაშ ართობას.
იეჰოვა, უშუდარებ ორგანიზატორი
3. მუ მარწმუნენა, ნამდა იეჰოვა რე უშუდარებ ორგანიზატორი?
3 გუნაჭყეფი ამტკიცენს, ღორონთი უშუდარებ ორგანიზატორ რე. ბიბლია იჩიებ, ნამდა „იეჰოვაქ სიბრძნეთ გაჭყ დედამიწა, გამჭრიახობათ გამანგარ ცა“ (იგავ. 3:19). ჩქი მიჩქუნა ხვალე „თიშ [ღორონთიშ] შარეფიშ ძგალეფი“ დო „თიშ გურშენ ფურცქინით მარჩქილენა“ (იობ. 26:14). ჭიჭე მუთუნ მიჩქუნა პლანეტეფიშ, ვარსკვლავეფიშ დო გალაქტიკეფიშ მოძრაობაშ გურშენ; მარა თე რჩქინა ხოლო დასაბაღ რე, ვაღიარათ, ნამდა ციურ სხეულეფ სარკოთ რე ორგანიზებული (ფსალმ. 8:3, 4). გალაქტიკეფი შეთმოდირთ მილიონობით ვარსკვლავეფშე; თინეფ ორგანიზებულო მოძრავენა მთელ სივრცეს. ბჟაშ სისტემას, პლანეტეფი მუნეფიშ ორბიტას გეჸუნა დო ბჟას თიშნერო გართუნა, ითამ შარაშ მოძრაობაშ წესეფს ომორჩილუდან! ნამდვილო, სამყაროშ თე შიშის მიტენან ფერ წესრიგი მოხვარუნა, ქობძირათ, ნამდა იეჰოვა, მიდგაქ „გონიერებათ შექმნუ ცა“ დო დედამიწა, იმსახურენს დიდებას, ართგურობას დო თაყვანიშცემას (ფსალმ. 136:1, 5—9).
4. მუშენ ვემიაჩინენა მეცნიერეფს პასუხი ბრელ კითხვაშა?
4 მეცნიერებაქ ბრელ მუთუნ გაგმაარგამ სამყაროშ დო დედამიწაშ გურშენ დო ცხოვრებაშ შხვადოშხვა სფეროს ბრელ მუთუნს შეუნწყუ ხე. მარა მეცნიერებას ვეშიალებუ ბრელ კითხვაშა პასუხიშ მეჩამაქ. მაგალთო, ასტრონომეფს ზუსტას ვარაგადინეს, სოვრეშე გორჩქინდ სამყაროქ ვარდა მუშენ ვორეთ თე პლანეტა დედამიწას, სოდეთ სიცოცხლეშ ბრელნერ ფორმა არსებენს. მითინს ვეშულებ, გენწყას, თეშმანწარათ მუშენ ოკო კოც ირიათო იცხოვრასინ (ეკლ. 3:11). მუშენ არსებენს თესხი მნიშვნელოვან კითხვეფ, ნამუშათ პასუხ ვა რე მეჩამილი? ართ-ართ მიზეზ თინა რე, ნამდა ბრელ მეცნიერ დო შხვეფი ავრცელენა თიცალ აზროვნებას, ითამ ვაარსებენს ღორონთი დო ევოლუციაშ თეორიას ამტკიცენა. მარა იეჰოვა მუშ წიგნიშე არზენს პასუხის თე კითხვეფს, ნამუთ მსოფლიოშ არძა კუნთხუს მახორუხალხიშ გურს ოხუ.
5. მუშნერო ვორეთ დამოკიდებულ ბუნებაშ კანონეფშა?
5 ჩქი დამოკიდებულ ვორეთ თი სანდო დო უთირუ ბუნებაშ კანონეფშა, ნამუთ ღორონთიქ დადგინ. ელექტრიკოსეფი, სანტექნიკეფი, ინჟინერეფი, პილოტეფი, ქირურგეფი — არძა დამოკიდებულ რენა თე კანონეფშა, ნამდა გაკეთან მუნეფიშ საქმე. მაგალთო, ქირურგეფი დარწმუნებულ რენა, ნამდა არძა კოჩის ძირითადო ართნერ ანატომია უღუ. თაშ ნამდა, ქირურგის ვაფუ ოგორალ პაციენტიშ გური. ჩქი არძა პატის ფცენთ ბუნებაშ კანონეფს. გრავიტაციაშ კანონს ყურადღება ვემუვაქცით-და, თექ შილებე სიცოცხლეშ ფასო ქუდომდოხოდან.
ღორონთშე ვორეთ ორგანიზებულეფი
6. მუშენ ვა რე გასაკვირ, იეჰოვას ოკოდას მუშ თაყვანიშმცემელეფ ორგანიზებულეფ რდან?
6 სამყარო სარკოთ რე ორგანიზებული დო გასაკვირ ვა რე, იეჰოვას ოკოდას მუშ თაყვანიშმცემელეფი ხოლო ორგანიზებულეფ რდან. ათეშგურშენ ღორონთიქ ბიბლია მუჩეს, ნამდა მივაჸუნათ თიშ ხემძღვანელობას. ღორონთიშ პრინციპეფიშ დო თიშ ორგანიზაციაშ უმშო ვეპჸიდით ბედნერეფი.
7. მუ ოძირანს, ნამდა ბიბლია ჯგირო აკონწყილ წიგნ რე?
7 ბიბლია ართიანწკუმა ვა რე დაკავშირებულინ ფერ იუდაურ დო ქრისტიანულ წიგნეფიშ კრებულ ვა რე. პირიქით, თინა რე ჯგირო აკონწყილ — ღორონთიშ შურიშ კარნახით ჭარილ წიგნი. ბიბლიაშ ირ წიგნი ართინწკუმა რე დაკავშირებული. დაბადებაშე დოჭყაფილ გამოცხადებაშა ბიბლიას ართ საერთო თემა გოჸუნს — ღორონთიშ უზენაესობაშ გამართლება დოდედამიწაწკუმა დაკავშირებულ განზრახვაშ შესრულება სამეფოშ საშვალებათ, ნამუშ მეფე დუნაპირებ „გამნარყ“ იესო რე (წეკითხით დაბადებაშ 3:15; მათეშ 6:10; გამოცხადებაშ 11:15).
8. მუშენ შემლებუნა ფთქუათ, ნამდა ისრაელეფ ჯგირო რდეს ორგანიზებული?
8 ჯვეშ ისრაელეფქ ორგანიზებულობაშ ჯგირ მაგალით დომტუეს. მაგალთო, მოსეშ კანონით შეხვალამაშ კარავიშ მინაულარწკუმა ოსურკათა მოწესრიგებულო მსახურენდეს (გამ. 38:8). ისრაელეფიშ ბანაკიშ შხვა ადგილშა გინულა დო კიდობანიშ გილაღალა ხოლო ორგანიზებულ რდუ. უმოს გვიანო, დავითიქ ორგანიზება უკეთ ლევიანეფიშ დო მღვდელეფიშ ჯგუფ-ჯგუფო გორთუალას (1 მატ. 23:1—6; 24:1—3). მუჟამსით იეჰოვას ომორჩილუდესინ, ისრაელეფ კურთხეულ რდეს; თინეფს წესრიგ, მშვიდობა დო ართობა უღუდეს (კან. 11:26, 27; 28:1—14).
9. მუ ოძირანს თის, ნამდა პირველ საუკუნეს ქრისტიანულ კრებეფი ორგანიზებულ რდეს?
9 პირველ საუკუნეს ქრისტიანულ კრება ორგანიზებულ რდუ. თინა მითითებეფს ხემძღვანელ საბჭოშე ღებულენდ, ნამუშა მოციქულეფ მიშეშეს (საქ. 6:1—6). უმოს გვიანო, ხემძღვანელ საბჭოს შხვა ჯიმალეფქ ხოლო ქიმიაძინ (საქ. 15:6). კრებეფს რჩევეფ დო მითითებეფ წერილეფით ხოლო მიაჩამუდეს, ნამუსით ჭარუნდეს ღორონთიშ შურიშ კარნახით ხემძღვანელ საბჭოშ წევრეფი ვარდა თინეფიშ ნდობა უღუდუნ ფერ კათა (1 ტიმ. 3:1—13; ტიტ. 1:5—9). მუს არზენდ კრებეფს ხემძღვანელ საბჭოშ მითითებეფიშ მეჸუნა?
10. მუ რდუ თიშ შედეგი, ნამდა პირველ საუკუნეს კრებეფ მეჸუნდეს ხემძღვანელ საბჭოშ დუნადგინა მითითებეფს? (ქოძირით სურათ მა-9 გვერდის)
10 წეკითხით საქმეეფიშ 16:4, 5. ჯიმალეფი მიშეს დო კრებეფს გინმოჩანდეს ხემძღვანელ საბჭოშ სახელით „იერუსალიმს მოციქულეფ დო უხუცესეფიშ დოდგინელ მითითებეფს“. კრებეფი ასრულენდეს თე მითითებეფს, ათეშგურშენ თინეფს რწმენა ემანგარებუდეს დო ირ დღას ბრელ აძინუდეს“. ამდღა თე ბიბლიურ მაგალით თის მოგურუანა, ნამდა მივაჸუნათ ოკო ღორონთიშ ორგანიზაციაშ მითითებეფს!
ქიმეჸუნთო ხემძღვანელობას?
11. მუჭო ოკო მიქცუან დანიშნულ ჯიმალეფქ, მუჟამსით ღორონთიშ ორგანიზაციაშე ღებულენა მითითებებს?
11 მუჭო ოკო მიქცუან ფილიალიშ ვარდა ქიანაშ კომიტეტიშ წევრეფქ, რაიონულ ზედამხედველეფქ დო უხუცესეფქ, მუჟამსით ღორონთიშ ორგანიზაციაშე ღებულენა ხემძღვანელობას? იეჰოვაშ სიტყვა მოგურუანა, ნამდა არძა ვორდათ ოკო მორჩილეფი (კან. 30:16; ებრ. 13:7, 17). ღორონთიშ ორგანიზაციას მითინ ოკო ვარდას კრიტიკულ დო ბუნტიშ ემატახალ, მუშენდა თენა ოცილ ღორონთიშ ხალხ შქას ჸოროფას, მშვიდობას დო ართობას. მუშო ოკო რაგადი, ართგურ ქრისტიანეფს ვაკონა დიოტრიფეცალო მიქცუან, ნამუთ ვარდ ართგურ დო უპატიცემობას გიმოხანტუნდ (წეკითხით 3 იოანეშ 9, 10). ჩქინ დუც ოკო ქოპკითხათ: ქოუნწყუნქო ხეს შხვეფიშ სულიერობას? ხეთეშე ქობღებულენქო დო ქუვომორჩილუქო ხემძღვანელ ჯიმალეფიშ მითითებეფს?
12. მუქ ითირ უხუცესეფიშ დო მომსახურეეფიშ დანიშნებაწკუმა დაკავშირებით?
12 ყურადღება ქიმვაქცუათ ართ საკითხის, ნამუთ ხემძღვანელ საბჭოქ ამარდე გინოჭყვიდ. 2014 წანაშ 15 ნოემბერიშ ჟურნალს „გინაჯინალ კოშკი“ რუბრიკას „კითხვა დო პასუხი“ მოჩამილ რდუ სიახალე, ნამუთ უხუცესეფიშ დო მომსახურეეფიშ დანიშნებას ოხუდ. სტატიას მოშინაფილ რდუ, ნამდა პირველ საუკუნეს ხემძღვანელ საბჭო გილმალ ზედამხედველეფს ავალენდ უხუცესეფიშ დო მომსახურეფიშ დანიშვნას. ათეშგურშენ, 2014 წანაშ 1 სექტემბერშე უხუცესეფს დო მომსახურეეფს რაიონულ ზედამხედველეფ ნიშნენა. რაიონულ ზედამხედველეფ ოცადუნა უჯგუშო გეჩინებაფუან თი ჯიმალეფ, მიდგას რეკომენდაციას არზენა დო ქორე შეიოლებერ-და, მსახურენა თინეფწკუმა ართო. რაიონულ ზედამხედველ ჯიმაშ ოჯახის ხოლო ოკვირ (1 ტიმ. 3:4, 5). უხუცესეფიშ საბჭო დო რაიონულ ზედამხედველ გენიხილენა, ქასადაგ დო ვარ ჯიმა უხუცესეფშო დო მომსახურეეფშო ბიბლიას მოჩამილმოთხოვნეფს (1 ტიმ. 3:1—10, 12, 13; 1 პეტ. 5:1—3).
13. მუჭო შემლებუნა ვოძირათ, ნამდა მეპჸუნთ უხუცესეფიშ ხემძღვანელობას?
13 ჩქი ოკო მივაჸუნათ ბიბლიაშა გერსხილ ხემძღვანელობას, ნამუსით ჯიმალეფშე ბღებულენთ. თე ართგურ ჭყიშეფი მეჸუნა ღორონთიშ სიტყვაშ ხემძღვანელობას, ნამუთ რე „ჯანსაღ“ დო სასარგებლო (1 ტიმ. 6:3). დეფიფქრათ პავლეშ რჩევაშენ, ნამუთ კრებას წესრიგის ვამორჩილუნან თინეფს ოხუ. ნამთინე „საერთოთ ვამუშენდ დო თიცალ საქმეშა მიშმურდ, ნამუთ მუს ვახუდ“. უხუცესეფქ გაფრთხილეს თინეფ, მარა იშენით ვეთვალისწინენდეს რჩევას. მუჭო ოკო მექცუკო კრებაქ თეცალ პიროვნებეფს? პავლექ თქუ: „შემჩნეულ გაფუდან დო მერიდით თინეფწკუმა ურთიერთობას“. მარა პავლექ თინა ხოლო თქუ, ნამდა ნტერო ვემირჩქინესკო თეცალ პიროვნებეფ (2 თეს. 3:11—15). უხუცესეფქ შილებე წეკითხან გამაფრთხილებელ თემა თიცალ საქციელშენ, ნამუთ გლახათ მოქმედენს კრებაშ წევრეფწკუმა, მაგალთო პაემანშა გილულა იეჰოვაშ მოწმე ვარენ ფერ პიროვნებაწკუმა (1 კორ. 7:39). მუნერ რეაქცია გაღვენუნა თქვა, მუჟამსით უხუცესეფ წეკითხენა თეცალ თემას თქვან კრებას? ქიმეხვადით ნამ პიროვნებაშენ რე რაგად-და, ალბათ არიდენთ დუც თიწკუმა ხოლოშიან ურთიერთობას. თეცალ მტკიცე მერინაქ შილებე ქიმოქმედას თი პიროვნებაწკუმა დო მიოტუას თეცალ ურთიერთობა. [1]
შინარჩუნით სიწმინდე, მშვიდობა დო ართობა
14. მუჭო უნწყუნთ ხეს კრებაშ სიწმინდეშ შენარჩუნებას?
14 ღორონთიშ სიტყვას მოჩამილ ხემძღვანელობაშ მეჸუნათ შემლებუნა ხე შეუნწყუათ კრებაშ სულიერ სიწმინდეს. დეფიფქრათ თი სიტუაციაშენ, ნამუთ ჯვეშ კორინთის რდუ. პავლე დუდ უდუზოგებუო ქადაქენდ თე ქალაქის; თის უჸორდ თექიან და დო ჯიმალეფი (1 კორ. 1:1, 2). მარა მუ რთულ იჸუაფუდ პავლეშო პრობლემაშ გინოჭყვიდუა, მუჟამსით ქიგეგენდ, ნამდა ნამთინე უზნეო ცხოვრებათ ცხოვრენდ დო კრებას თენა პრობლემათ ვემიორჩქუდ! პავლექ თე პრობლემაშ გინაჭყვიდირალო უხუცესეფს დავალ, უზნეო კოჩი „სატანაშა გეგნუჩამდესკო“ ანუ გურიცხებდესკო კრებაშე. კრებაშ სიწმინდეშ შეიონარჩუნებელო, საჭირო რდუ „დროჟიშ“ დოთხინაფა (1 კორ. 5:1, 5, 7, 12). მუჟამსით უხუცესეფი გინოჭყვიდუნა კრებაშე გარიცხან ვენანიენსფერ პიროვნება, ჩქი ხუჯი ოკო დუკინათ თინეფს, მუშენდა თეთ, ხეს უნწყუნთ კრებაშ სიწმინდეშ შენარჩუნებას დო თის ხოლო, ნამდა გარიცხულ პიროვნებაქ მინანუას დო ქოთხუას ღორონთის პატიება.
15. მუჭო ოკო შემნარჩუნათ კრებას მშვიდობა?
15 კორინთის შხვა პრობლემა ხოლო რდუ გინაჭყვიდირალ. ნამთინე ჯიმა სასამართლოს უჩიულუდ მუშ თანამორწმუნეს. პავლექ თინეფს გუშმაკურცხინაფალ კითხვა დუსვუ: „მუშენ ვაისხუნუნა უსამართლობაშ მოთვენა?“ (1 კორ. 6:1—8). თეცალ სიტუაციეფ ამდღა ხოლო რე კრებეფს. და დო ჯიმალეფ შკას მშვიდობა დინუ, მუჟამსით ბიზნეს ქენუჸოლუნა დო ფარა მეუდინუნა; თე დროს შილებე ართიანს თაღლითობა ხოლო ქეკაბრალან. ნამთინე სასამართლოს უჩიულენს ჯიმას, მარა ღორონთიშ სიტყვა ბიბლია მირაგადუნა, ნამდა უჯგუშ რე დებზარალათ, ვინემ ღორონთიშ სახელს ონჯღორე ვოძირათ დო კრებას მშვიდობა მივოდინუათ. [2] სერიოზულ პრობლემეფიშ გინაჭყვიდირალო ქრისტიანეფქ იესოშ რჩევა ოკო გიმიბრინუათ (წეკითხით მათეშ 5:23, 24; 18:15—17). თეგვარო, ხეს უნწყუნთ იეჰოვაშ თაყვანიშმცემლეფ შქას ართობას.
16. მუშენ ოკო მიველუდათ, ნამდა ღორონთიშ ხალხის ართობა აღვენუ?
16 იეჰოვაშ სიტყვაშე იძირე, მუშენ ოკო მიველუდათ, ნამდა ღორონთიშ ხალხის ართობა აღვენუ. ფსალმუნიშმაბირე იჩიებ: „მუ ჯგირ დო მუ გემუან რე, მუჟამსით ჯიმალეფს ართობა უღუნა“ (ფსალმ. 133:1). მუჟამსით ისრაელეფ ღორონთის ომორჩილუდესინ, თინეფ ორგანიზებულ რდეს დო ართობა უღუდეს. ღორონთიქ მუშ ხალხიშ მომავალიშ გურშენ იწინასწარმეტყველ: „აკოფშაყარანქ თინეფს დო იჸუაფუნა, მუჭოთ შხურეფ ოშხურეს“ (მიქ. 2:12). იეჰოვაქ წინასწარმეტყველ სოფონიაშ პიჯით ხოლო იწინასწარმეტყველ: „თიმწკუმა ქიმეფჩანქ ხალხეფს სუფთა ნინას [ბიბლიურ ჟეშმარიტება], ნამდა ქიმიშინუან იეჰოვაშ სახელ დო ართიანიშ ელარინელო ემსახურან თის“ (სოფ. 3:9). მუშმადიდა უპირატესობა მიღუნა ართიანიშ ელარინელო თაყვან ფცათ იეჰოვას!
უხუცესეფ გიმირჩქინანა ჸოროფას, მუჟამსით სულიერო ოხვარუნა თის, მიდგაქ გლახა ნაბიჯ გინოდგ (ქოძირით აბზაცი 17)
17. მუჭო ოკო გინოჭყვიდან უხუცესეფქ სამართლებრივ საკითხეფ, ნამდა კრებას ართობაქ დო სიწმინდექ შინარჩუნას?
17 კრებას ართობაქ დო სიწმინდექ ქიჸუას თიშენ, უხუცესეფქ ჸოროფათ, მუთ შილებენ მალას ოკო გეგნოჭყვიდან სამართლებრივ საკითხეფ. პავლეს უჩქუდ, ნამდა ღორონთიშ ჸოროფა ხვალე გრძნობეფშა ვარდ გერსხილ დო თოლს ვაწკურუნდ გლახა საქციელშენ (იგავ. 15:3). თაშ ნამდა, პავლეს დუდ ვეშუკებ ქიმუჭარუდკო კორინთელეფშა პირველ წერილ, ნამუთ ჸოროფათ რდუ ჭარილ, მარა პირდაპირ ნარაგადა ხოლო რდუ. მაჟია წერილშე, ნამუთ პავლექ მუსხირენ თუთაშ უკულ კორინთელეფს მეჭარუნ, იძირე, ნამდა სიტუაცია თირელ რდუ, მუშენდა უხუცესეფქ გეთვალისწინეს მოციქულიშ მითითება. ქრისტიან გლახა ნაბიჯის ვაგინუნ თეშ გეგნოდგუნს-და, სულიერო გამოცდილ ჯიმალეფქ ქეცადან ოკო ლიბას ქიმუდირთან თის დო გაგმასწორან (გალ. 6:1).
18. ა) მუჭო მეხვარ ღორონთიშ სიტყვას მოჩამილ მითითებაქ პირველ საუკუნეშ კრებეფს? ბ) მუშ გურშენ იჸუაფ რაგად ანწიან სტატიას?
18 არგამა რე, ნამდა ღორონთიშ სიტყვას მოჩამილ მითითებეფქ მეხვარ პირველ საუკუნეშ ქრისტიანეფს კორინთის დო შხვადო ხოლო, შეუნარჩუნებდესკო სიწმინდე, მშვიდობა დო ართობა მუნეფიშ კრებეფს (1 კორ. 1:10; ეფეს. 4:11—13; 1 პეტ. 3:8). შედეგო, თი დროს ჩქინ და დო ჯიმალეფქ ბრელ მუთუნს მიოჭირინუეს მსახურებას. თაშ ნამდა, პავლეს თამამას შეულებუდ თქუკო, ნამდა სახიოლო ამბექ ირკოჩშა იჸუ ქადაგებულქ (კოლ. 1:23). ამდღა ღორონთიშ დიდებულ განზრახვეფიშ გურშენ მთელ მსოფლიოს მეურს რაგად; თენა თიშ შედეგ რე, ნამდა ღორონთიშ ხალხი ორგანიზებულო აკეთენს თე საქმეს. ანწიან სტატიას რაგად იჸუაფ თიშე, ნამდა თე ხალხი მანგარო აფასენს ბიბლიას დო გინოჭყვიდილ აფუნა განადიდან უზენაეს ღორონთ იეჰოვა (ფსალმ. 71:15, 16).
