1-3. მუჭო შილებედ წიმიჭკირკო პრობლემაქ ევოდია დო სინტიქე შქას, დო მუჭო შილებე თეცალ პრობლემეფიშ დუდიშ არიდება? (ქოძირით სურათ თე გვერდის)

იეჰოვაშ მსახურეფ დიდო აფასენა ღორონთიშ სიტყვას, ბიბლიას. არასრულყოფილეფ ვორეთინ თიშენ, მინშა-მინშა რჩევა არძას მუმაჩამუნა. ჩქი მუჭო ბღებულენთ თე რჩევეფს? გუვარჩუათ პირველ საუკუნეშ ქრისტიანეფიშ ევოდია დო სინტიქეშ მაგალითი. თე შურითცხებულ ოსურკათა შქას სერიოზულ პრობლემეფქ ქიმწიჭკირ. პრობლემა მუ რდუნ, თეშ გურშენ ბიბლია მუთუნს ვეჩიებ. მარა შემლებუნა წერმიბდგინათ თეცალ მუდგარენ.

² ფთქუათ, ევოდიაქ ჸუდეშა ქუდაპეჯ მუსხირენ და დო ჯიმა დო ართო აკოდოხოდეს. მარა სინტიქე ვადუპეჯებ. თიქ ქიგეგ, ნამდა თინეფქ დრო გემუანაშე გატარეს. სინტიქექ შილებე იფიქრუკონ: „ვადმაჯერებე, ნამდა ევოდიაქ ვადმაპეჯუ! თიცალ ჯგირო ვორდით ართიანწკუმა“. თიქ თეშ იგინ დუდ, ითამ უღალატესკო დო ეჭვიშ თოლით ქუდუჭყუ თის ჯინა. თეშ უკულ, სინტიქე ევოდიაწკუმა რდესინ თი და დო ჯიმალეფს ქუდაპეჯენს, მარა ევოდიას — ვარ! პრობლემაქ, ნამუთ თე დალეფ შქას არსებენდუნ, შილებედ ხე შეუშალუკო კრებას მშვიდობას. ბიბლია ვამრაგადუნა  შედეგეფიშ გურშენ, მარა თე დალეფქ შილებე გეთვალისწინეს მოციქულ პავლეშ ჯიმალურ რჩევა (ფილ. 4:2, 3).

³ თეგვარ სიტუაციეფქ ამდღა ხოლო შილებე პრობლემეფიშ მიზეზიქ ქიჸუას იეჰოვაშ ხალხწკუმა კრებეფს. თეშ უმკუჯინუო, შილებე თეცალ პრობლემეფიშ გინოჭყვიდუა დო დუდიშ არიდება, ღორონთიშ სიტყვაშე, ბიბლიაშე რჩევეფს გეგმიბრინუანთ-და. იეჰოვაშ სიტყვას ქუვაფასენთ-და, ჩქი იფცხოვრენთ თიშ მითითებეფით (ფსალმ. 27:11).

4, 5. მუ რჩევას მარზენა ღორონთიშ სიტყვა ემოციეფიშ გაკონტროლებაშ გურშენ?

⁴ ეფი ვა რე ჩქინ ემოციეფიშ გაკონტროლება, მუჟამსით მირდენა ვარდა უსამართლოთ მოქცუნა. ჩქინ ეროვნებაშ, კანიშ ფერ ვარდა გარეგნობაშ გურშენ გლახათ ქუმოქცუნან-და, თექ შილებე ემოციურო გუმანადგურან. მუშმანწარაშე ქელმოჭუანა გურს, თეცალ საქციელ თანაქრისტიანშე ქუმოურს-და. ქეშულებუნო ღორონთიშ სიტყვას ჩქინ მოხვარა, თეცალ საქციელს ადგილ არასრულყოფილ კოჩშე ქოუღ-და?

⁵ ღორონთი კათაშ ართაინწკუმა ურთიერთობეფს თინეფიშ გოჭყაფაშე ოკვირ. თინა ოკვირ ჩქინ ემოციეფს დო საქმეეფს. ფიქრიშ დროს ზედმეტ ემოციეფ ქომიღუნა-და, თეს შეულებ თიცალ სიტყვეფ ქუმორაგადაფუან ვარდა თიცალ მუთუნ გუმოკეთებაფუან, ნამუსით უკულ დემნანენდით. მუ ჭკვერულ რე, ბიბლიაშ რჩევეფიშ გიმორინაფა, ნამდა გეგმიფრჩქინათ დუდშეკება დო ვემჭუათ გურიშ მოჸუნაფა! (წეკითხით იგავეფიშ 16:32; ეკლესიასტეშ 7:9). მუშო ოკო რაგად, არძას მოსაჭირუნა ჩქინ დუდშა მუშობა, ნამდა ხეთეშე გურშა ვემიბღათ ირფელ დო უმოსო ვაპატუათ. იეჰოვა დო იესო პატიებას მანგარ სერიოზულო უჯინენა (მათ. 6:14, 15). ხომ ვაგოსაჭირუნა, მეტ ყურადღება ქიმიაქცუათ თის, ნამდა უმოსო ქაპატუათ ვარდა გაკონტროლათ თქვან ემოციეფი?

6. მუშენ ოკო ვემიპჸონათ გური?

⁶ მიდგას მუშ დუდიშ გაკონტროლება ვეშეულებუნ, თინა ხშირას მიჸონანს გურს. შედეგ თინა რე, ნამდა შხვეფქ შილებე ვეკორინუან თიწკუმა ურთიერთობა. ირო გურმოულირ კოჩის გლახა გავლენა უღუ კრებაშ წევრეფწკუმა. თიქ შილებე ქეცადას, დოფულას, გურმოულირ რენ დო მიდგარენ ჯოგუნ თინა, მარა გურს უღუნ თი უარყოფით აზრეფ ვეფულუ კრებას (იგავ. 26:24—26). უხუცესეფს შეულებუნა მეხვარან თის დო ქუგაგებაფუან, ნამდა გურიშ მოულას, გოჯოგაფას დო გურშა ღანჯიშ ელადვალას ადგილ ვა უღუდას ოკო ღორონთიშ ორგანიზაციას. იეჰოვაშ ძვირფას წიგნი თე ირფელს არგამათ ოძირანს (ლევ. 19:17, 18; რომ. 3:11—18). ქათანხმუქო თეს?

7, 8. ა) მუჭო ხემძღვანელენს იეჰოვა მუშ ორგანიზაციაშ მიწიერ ნაწილს? ბ) ნამ მითითებეფი რე მოჩამილ ღორონთიშ სიტყვას დო მუშენ ოკო მივაჸუნათ თინეფს?

⁷ იეჰოვა ხემძღვანელენს დო სულიერ საზრდოს არზენს მუშ ორგანიზაციაშ მიწიერ ნაწილს „ართგურ დო გონიერ მონაშ“ ჭყოლოფუათ, ნამუსით ხემძღვანელენს კრებაშ დუდ, ქრისტე (მათ. 24:45—47; ეფეს. 5:23). მუჭოთ პირველ საუკუნეს ხემძღვანელ საბჭონ თეშ, თე მონა ხოლო მეჸუნს ღორონთიშ შურით ნაკარნახა სიტყვას, ნამუსით აფასენს (წეკითხით 1 თესალონიკელეფიშ 2:13). მუ მითითებეფ რე მოჩამილ ბიბლიას ჩქინ საჯგირობუოთ?

⁸ ბიბლია მომწოდენა, დევესწრათ კრებაშ შეხვალამეფს ირიათო დო მოხვარუნა ართ აზრი მიღუდან დო ართნერო მარჩქილედან ბიბლიურ გურაფეფი (ებრ. 10:24, 25; 1 კორ. 1:10). ღორონთიშ სიტყვა მირაგადუნა, სამეფო პირველ ადგილს გივორინუათ ჩქინ ცხოვრებას (მათ. 6:33). წმინდა წერილეფი თის ხოლო უსვანს ხაზის, ნამდა ჩქინ  მოვალეობა რე დო დიდ პატი რე, იფქადაქათ ჸუდუ-ჸუდე, საზოგადო ადგილეფს დო შხვადო ხოლო (მათ. 28:19, 20; საქ. 5:42; 17:17; 20:20). ქრისტიან უხუცესეფქ ღორონთიშ სიტყვას ინოჭარილ მითითებეფიშ გიმორინაფათ ოკო დეცვან ორგანიზაციაშ სიწმინდე (1 კორ. 5:1—5, 13; 1 ტიმ. 5:19—21). იეჰოვა ხემძღვანელენს, ნამდა არძა, მით თიშ ორგანიზაციას რენა, რდან ფიზიკურო დო სულიერო სუფთეფი (2 კორ. 7:1).

9. ნამ რე თი არხი, ნამუთ გერინაფილ რე თიშო, ნამდა ქუგმოგებაფუან ღორონთიშ სიტყვა?

⁹ ნამთინე შილებე ფიქრენდას, ნამდა შეულებ მუშობურო გენწყას ბიბლია. მარა იესოქ თეშო დანიშნ „გონიერ მონა“, ნამდა ჸოფედუკო არხი, ნამუთ სულიერ საზრდოს განაწილენდ. 1919 წანაშე განდიდებულ იესო ქრისტე გიმირინუანს თე მონას, ნამდა მუშ მიმაჸუნალეფქ ქიგეგან ღორონთიშ სიტყვა დო ქიმიაჸუნან თის. ბიბლიას მოჩამილ მითითებეფიშ მეჸუნათ, ჩქი ხეს ვუნწყუნთ სიწმინდეს, მშვიდობას დო ართობას კრებას. ჩქინდე თითეულს შეულებ მუშ დუც ქოკითხას: „ქუვორექ დო ვარ თი არხიშ ართგურ, ნამუთ იესოშე რე ამდღა გერინაფილ?

10. მუჭო რე ეჭარილ იეჰოვაშ ორგანიზაციაშ ზეციერ ნაწილ ეზეკიელიშ წიგნის?

¹⁰ იეჰოვაშ სიტყვაშე ბგებულენთ, მუნერ რე თიშ ორგანიზაციაშ ზეციერ ნაწილ. მაგალთო, წინასწარმეტყველ ეზეკიელქ ხილუას ძირ ზეციერ ეტლი, ნამუთ ღორონთიშ ორგანიზაციაშ ზეციერ ნაწილიშ სიმბოლო რე (ეზეკ. 1:4—28). იეჰოვა მართუნს ზეციერ ეტლის დო მუშ შურით თის მოძრაობაშ მიმართულებას არზენს. ღორონთიშ ორგანიზაციაშ ზეციერ ნაწილ ხემძღვანელენს მიწიერ ნაწილს. ზეციერ ეტლი ირიათო მოძრავენს! დეფიქრით მუსხი მუდგარენქ ითირ ორგანიზაციას ბოლო ვით წანაშ დინახალე დო ვაგგოჭყორდან, ნამდა თე ირფელიშ უკახალე იეჰოვა გერე. იესო ქრისტე დო ანგელოზეფი ამარ-ამარ განადგურენა თე უბადო ქიანას, ათეშგურშენ იეჰოვაშ ეტლი ჩქარას მოძრავენს, ნამდა გამართლას ღორონთიშ უზენაესობა დო განწმინდას თიშ წმინდა სახელ!

11, 12. მუს მიოჭირინუ იეჰოვაშ ორგანიზაციაქ?

¹¹ დეფიქრით, მუს მიოჭირინუ ბოლო ვით წანაშ დინახალე ღორონთიშ ორგანიზაციაშ მიწიერ ნაწილქ. მშენებლობა. ოშობით და დო ჯიმა დუდ უდუზოგებუო მუშენდ უორიკის (ნიუ-იორკი) იეჰოვაშ მოწმეეფიშ ახალ სამმართველოშ აშენებაშ დროს. მსოფლიო საპროექტო-სამშენებლო განყოფილება ანთასობით და დო ჯიმას ხემძღვანელენს; თინეფ მთელ მსოფლიოს აშენენა სამეფო დარბაზეფს დო აფართოენა ფილიალეფს. ჩქი მარდულეფ ვორეთ თი მოხალისე და დო ჯიმალეფიშ, ნამუთ დუდ უდუზოგებუო მუშენა თეცალ პროექტეფს! რშუდან, ნამდა იეჰოვა ხვამას ვემიარკენს მთელ მსოფლიოს სამეფოშ მაუწყებელეფს, მით თანდაბალო დო ართგურო უნწყუნა ხეს თეცალ პროექტეფიშ დაფინანსებას (ლუკ. 21:1—4).

¹² გურაფა. დეფიქრით შხვადოშხვა სკოლეფშენ, ნამუთ ხეს უნწყუნს ღორონთიშ  გურშენ რჩქინაშ მეღებას (ეს. 2:2, 3). ჩქი მიღუნა პიონერულ მსახურებაშ სკოლა, სამეფოშ მახარებელეფიშ სკოლა, გალაადიშ სკოლა, სკოლა ახალ ბეთელელეფშო, სკოლა რაიონულ ზედამხედველეფშო დო თინეფიშ მეუღლეეფშო, უხუცესეფიშ სკოლა, სამეფო მსახურებაშ სკოლა, სკოლა ფილიალიშ კომიტეტიშ წევრეფშო დო თინეფიშ მეუღლეეფშო. იეჰოვას ოხიოლ, ოგურუას მუშ ხალხის. ბიბლიურ გურაფაშ მეღება jw.org ვებ-გვერდშე ხოლო შილებე, სოდეთ ხეშა მალაფარ რე ლიტერატურა ოშობით ნინაშა. ვებ-გვერდის მოჩამილ რე სპეციალურ განყოფილებეფ ბაღანეფშო დო ოჯახეფშო, თეშ გარდა რე ახალ ამბეფიშ განყოფილება. ქიგმირინუანთო ვებ-გვერდის jw.org მსახურებას დო ოჯახურ თაყვანიშცემას?

13. მუ პასუხიშმგებლობა მიღუნა, მუჭოთ იეჰოვაშ ართგურ თაყვანიშმცემლეფს?

¹³ მუშმადიდა პატი რე, ვორდათ იეჰოვაშ ორგანიზაციაშ ნაწილი! ღორონთიშ მოთხოვნეფიშ დო მითითებეფიშ გურშენ რჩქინა პასუხიშმგებლობაშ წოხოლე გიმორინუანა, ნამდა ვაკეთათ მუთ სწორ რე დო ირო თიშ უზენაესობაშ მხარეს გებდირთათ. მუჭო დრო მიკურსინ თეშ, უმოსო იფუჭებ თე ქიანა ზნეობრივო, ათეშგურშენ იეჰოვაცალო ჩქი ხოლო ოკო ბჯოგუდან, მუთ გლახა რენ თინა (ფსალმ. 97:10). ჩქი ვა ვოთანხმუთ თინეფს, მით იჩიებუნა, ნამდა „ჯგირ გლახა რე დო გლახა ჯგირ რე“ (ეს. 5:20). ჩქი მოკონა ვასიამოვნათ ღორონთის, ათეშგურშენ ვოცადუთ ქუდოფსკიდათ ფიზიკურო, ზნეობრივო დო სულიერო სუფთეფი (1 კორ. 6:9—11). ჩქი მიჸორა იეჰოვა დო ვონდუთ თის; მოკონა ვორდათ თიშ ართგურეფ დო თეს ვოძირანთ თით, ნამდა ფცხოვრენთ თიშ ძვირფას წიგნის მოჩამილ მითითებეფით. ჩქი ვოცადუთ, გეგმიბრინუათ თე მითითებეფ ირდიხას — ჸუდეს, კრებას, სამუშას დო სკოლას (იგავ. 15:3). ქობძირათ, ხოლო მუჭო შემლებუნა დუმტკიცათ ღორონთის ართგურობა.

14. მუჭო შეულებუნა ქრისტიან მშობლეფს იეჰოვაშ ართგურობაშ გიმორჩქინა?

¹⁴ ბაღანეფიშ რდუალა. ქრისტიან მშობლეფ იეჰოვაშ ართგურობას გიმირჩქინანა თით, ნამდა თიშ სიტყვაშ მეჸუნათ რდუნა ბაღანეფს. ღორონთიშ მოშიშ მშობლეფი თოლწკურილო ვემეჸუნა მუნეფიშ კულტურას მეღებულ თი წესეფს, ნამუთ ბაღანეფიშ რდუალას ოხუ. ქრისტიანულ ოჯახის ადგილ ვა უღუდას ოკო ქვეყნიერებას გავრცელებულ შურს (ეფეს. 2:2). ნათილ ქრისტიან მუმა ვაფიქრენდას ოკო: „ჩქიმ ქიანას ბაღანეფიშ რდუალა დიდალეფიშ საქმე რე“. ბიბლია არგამათ იჩიებ თე საკითხიშ გურშენ: „მუმალეფი . . . მუკულეთ [თქვან სქუალეფს] — იეჰოვაშ მოსაწონო მორდით დო დუზუკოლით“ (ეფეს. 6:4). ღორონთიშ მოშიშ მშობლეფს ოკონა, მუნეფიშ სქუალეფ სამუელცალ რდან, მუშენდა თიშ ბაღანობას იეჰოვა რდუ თიწკუმა (1 სამ. 3:19).

15. მუჭო ვოძირანთ იეჰოვას ართგურობას, მნიშვნელოვან საკითხეფიშ გინოჭყვიდუაშ დროს?

¹⁵ მუდგაინიშ გინოჭყვიდირუა. ცხოვრებას მნიშვნელოვან მუთუნიშ გინოჭყვიდუაშ დროს ღორონთიშ ართგურობას ვოძირანთ თით, ნამდა ღორონთიშ სიტყვას დო თიშ ორგანიზაციას ბგორუნთ ხემძღვანელობას. მაგალთო, დეფიფქრათ თიცალ საკითხშენ, ნამუთ ბრელ მშობელს ოხუ. ამდღა ბრელ რე შემთხვევა, მუჟამსით შხვა ქიანაშა ულირ მშობლეფს ახალ დაბადებულ ბაღანეფ მუკალუაფარო მუნეფიშ ნათესეფშა მეჸუნა, ნამდა მუნეფქ გაგრძელან მუშობა დო ფარა გაკეთან. მართალ რე თენა პირად საქმე რე, მარა ვაგმოჭყორდან, ნამდა ჩქინ გინოჭყვიდილ საქმეშენ ჩქი ვაგენთ პასუხის ღორონთიშ წოხოლე (წეკითხით რომაელეფიშ 14:12). ქიჸიდუო ჭკვერულ ოჯახის ვარდა ოჯახიშ ეჯუმალას ოხუნ ფერ მნიშვნელოვან საკითხეფიშ გინოჭყვიდუა,  ვეგებგათ ბიბლია მუს იჩიებუნ თეშ? მუშო ოკო რაგად, ვარ! მოსაჭირუნა ჩქინ ზეციერ მუმაშ მოხვარა, მუშენდა ვაშმალებენა სწორ მიმართულება ქიმეფჩათ ჩქინ ნაბიჯეფს (იერ. 10:23).

16. მუ მნიშვნელოვან საკითხიშ წოხოლე გედირთ ართ ახალგაზრდა ოსურქ, მუჟამსით სქუაქ ქეშეძინ დო მუქ მეხვარ, სწორას გეგნოჭყვიდუკო თე საკითხი?

¹⁶ ართ ოსურს ბაღანაქ შხვა ქიანას შეძინ. თის ბაღანაშ გოტება მუშ ქიანაშა ოკოდ ბებ დო ბაბუშა, ნამდა მუკულუაფდესკო თიშა. თე დროს ართ იეჰოვაშ მოწმექ თე ოსურს ბიბლიაშ გურაფა ქუდუჭყ. თინა სულიერო წიმი მიშ დო ქიგეგ, ნამდა ღორონთიქ მშობლეფს დავალ ბაღანა იეჰოვაშ თაყვანიშმცემელო მორდან (ფსალმ. 127:3; იგავ. 22:6). ახალგაზრდა ოსურქ ლოცვას გურ გეგნუფაჩ იეჰოვას, მუჭოთ ბიბლია მოგურუანან თეშ (ფსალმ. 62:7, 8). თე ამბეშ გურშენ, მიდგა ბიბლიას ოგურუანდუნ თის ქეჩუ; თეშ გარდა შხვეფს ხოლო ქუდურაგადუ კრებას. ნათესეფ დო მეგობრეფ ურაგადუდეს, ბაღანა ბებ დო ბაბუშა ქუდუტებუდუკონ, მარა თიქ გეგნოჭყვიდ, ნამდა თეშ კეთება სწორ ვეჸიდ. ქომონჯწკუმა იმოქმედ თიქ, ნამდა კრებაქ მანგარო ელუდირთ დო მეხვარ მუშ ოსურს დო ბაღანას; მალას თიქ ხოლო ქიდიჭყ ბიბლიაშ გურაფა დო კრებაშა გილულა მუშ ჩილ დო სქუაწკუმა ართო. მუშო ოკო რაგად, თე ახალგაზრდა დიდა ქიგინანდ, მუჭო უპასუხ თიშ ლოცვას იეჰოვაქ.

17. მუ მითითებეფს ბღებულენთ, ნამუთ ოხუ თინეფს, მიდგას ბიბლიას ვოგურუანთ?

¹⁷ მითითებეფიშ მეჸუნა. ხოლო ართ მნიშვნელოვან საშვალება, დუმტკიცათ იეჰოვას ართგურობა, რე თიშ ორგანიზაციაშე მეღებულ მითითებეფიშ მეჸუნა. მაგალთო, დეფიფქრათ თი რჩევეფშენ, ნამუთ ოხუ თინეფს, მიდგას ბიბლიას ვოგურუანთ. მუჟამსით ბიბლიას ვოგურუანთ დაინტერესებულს წიგნით „მუს მოგურუანა ბიბლია სინამდვილეს?“, ირ გურაფაშ უკულ მუსხირენ წუთი დუთმათ ოკო, ნამდა გუვოჩინებაფუათ იეჰოვაშ ორგანიზაცია. შემლებუნა ქუვოჯინუათ ვიდეოშა „მუს ომსახურ სამეფო დარბაზი“ დო გეგმიბრინუათ ბროშურა „მი ასრულენს იეჰოვაშ ნებას ამდღა?“. მუჟამსით გუვათენთ წიგნის „მუს მოგურუანა ბიბლია სინამდვილეს?“ სულიერო წიმი მეურსინ ფერ დაინტერესებულწკუმან, თეშ უკულ გუგრძელათ ოკო გურაფა წიგნით „ქუდოსკიდით ღორონთიშ ჸოროფას“ ნათუაშ უკულ ხოლო. ორგანიზაციაქ თე მითითება თიშენ მუჩეს, ნამდა ახალ მოწაფეეფს რწმენაქ გემანგარან (კოლ. 2:7). ქიმეჸუნთო თქვა თეცალ მითითებეფს, ნამუთ იეჰოვაშ ორგანიზაციაშე მოურს?

18, 19. ნამ მიზეზეფიშ გურშენ ოკო ვორდათ იეჰოვაშ მარდულ?

¹⁸ ბრელ მიზეზ მიღუნა, ნამდა ვორდათ იეჰოვაშ მარდულ. ჩქი ვალდებულ ვორეთ მთელ ჩქინ ცხოვრება ღორონთის ვემსახურათ, მუშენდა უღორონთეთ ვეშმალებედეს მოძრაობა დო ვამაღვენუდეს სიცოცხლე (საქ. 17:27, 28). ღორონთიქ მუჩეს ძვირფას საჩუქარ, მუშ სიტყვა ბიბლია. თესალონიკელ ქრისტიანეფცალო, ჩქი ხოლო მარდულ ვორეთ ღორონთიშ სიტყვას მოჩამილ ცნობაშენ დო ბღებულენთ თის (1 თეს. 2:13).

¹⁹ მუჟამს ღორონთის მუშ სიტყვაშ, ბიბლიაშ საშვალებათ ვეახლოვებუთინ, თინა აშო ხოლო მეახლოებუნა (იაკ. 4:8). ჩქინ ზეციერ მუმაქ მუჩეს თიშ დიდ პატი, ნამდა ვორდათ თიშ ორგანიზაციაშ წევრი. მუშმადიდა ხვამა რე თენა ჩქინო! ფსალმუნიშ მაბირე თეს ათეცალ სიტყვეფით გიმოხანტუნს: „მარდულ რდათ იეჰოვაშ, მუშენდა ჯგირ რე თინა, მუშენდა ირიათო ჯგირობუა მოურს თიშე“ (ფსალმ. 136:1). 136-მა ფსალმუნს 26-შა რე მოშინაფილ ფრაზა „ირიათო ჯგირობუა მოურს თიშე“. იეჰოვაშ დო თიშ ორგანიზაციაშ ართგურეფ ქიპჸით-და, თე ძვირფას სიტყვეფი ჩქი ხოლო ქეშმეხებუნა, მუშენდა მომავალს მარადიულო იფცხოვრენთ!