1, 2. ა) მუ ჯილდოს ელნა ღორონთიშ მსახურეფი? ბ) მუ მიმეხვარებნა ირიათო ფშუდან ჯილდო? (ქოძირით სურათი თე გვერდის).

ცხებულ ქრისტიანეფს დიდებულ იმენდ უღნა. მოციქულ პავლექ თე იმენდ „ღორონთშე ზეციურ მოწოდებაშ“ ჯილდოშ სახელით მიშინუ (ფილ. 3:14). თინეფ ელნა თი დროს, მუჟამსით იესოწკუმა ართო ზეციერ სამეფოს იმეფენა დო კაცობრიობას სრულყოფილებაშა ქიმიჸონანა (გამოცხ. 20:6). მუ დიდებულ იმენდ რე თენა! შხვა შხურეფ ხოლო ბედნერეფ რენა, მუშენდა თინეფ დედამიწას მარადიულო ცხოვრებას ელნა (2 პეტ. 3:13).

² პავლე მოციქულს ოკოდ ცხებულ ქრისტიანეფქ ართგურო ქუდოსკიდესკო დო ჯილდო მიღესკო. ათეშენ უწუ: „ზეციერშე იფიქრით დო ვართ ხოლო მიწიერშე“ (კოლ. 3:2). ცხებულ ქრისტიანეფქ ირიათო ოკო იფიქრესკო მუნეფიშ ზეციერ ჯილდოშ მეღებაშე (კოლ. 1:4, 5). მუშო ოკო რაგად, კურთხევეფშე ფიქრი მეხვარებ იეჰოვაშ მსახურეფს ირიათო შუდან ჯილდო, ვა უღუ მნიშვნელობა, ზეცას ცხოვრებაშ იმენდ უღნა დო ვარ დედამიწას (1 კორ. 9:24).

3. მუშ გურშენ აფრთხილენდ პავლე თანაქრისტიანეფს?

 ³ თეწკუმა ართო, პავლე აფრთხილენდ ქრისტიანეფს, ნამდა შილებედ ჯილდო მიოდინესკო. მაგალთო, თიქ კოლოსელეფს თინეფიშ გურშენ მეჭარ, მით ქრისტიანეფო ასაღენდეს დუც, მარა იესო ქრისტეშ რწმენას ვეგმირჩქინანდეს დო მოსეშ კანონიშ დაცვებათ ოცადუდეს ღორონთიშ მოწონაშ მეღებას (კოლ. 2:16—18). თეს გეძინელ, პავლექ შხვა მხარე ხოლო მიშინუ, ნამუთ ეცილებუდ თინეფს ჯილდოშ მეღებას. მაგალთო, თინა იჩიებუდ მუ ოკო აკეთესკო, ნამდა ვადაჸუნესკო უზნეო კორნებეფს, მუჭო მუგვარებდესკო პრობლემეფ თანაქრისტიანეფწკუმა დო მუჭო გინოჭკირესკო სირთულეფ ოჯახის. თე რჩევეფ ამდღა ხოლო გიმმოდირთუნა. თაშ ნამდა, გუვარჩუათ პავლეშ ნამთინე რჩევა, ნამუთ კოლოსელეფს მეჭარ.

4. მუშენ შილებე უზნეო კორნებეფქ მეცილან ჯილდოშ მეღებას?

⁴ პავლექ მუშ ჯიმალეფს დიდებულ მომავალ ქუგაშინ დო უკულ მეჭარ: „ქენაჸვილით თქვან სხეულიშ მიწიერ ნაწილეფ: სიძვა, უწუნდურობა, ვნება, გლახა კორნებეფ დო ჰარამობა, მუთ კერპიშ თაყვანიშცემა რე“ (კოლ. 3:5). უზნეო კორნებეფს დიდ ძალა უღუ დო შეულებ მიმოდინაფუან სულიერ განძი. ართ ჯიმა, ნამუთიქ უზნეობას გეიაჸუნ, მარა დრო ხანიშ უკულ კრებაშა დირთუნ, იშინანს: „უზნეო კორნებეფს თიშმანწარათ გევაჸუნ, ნამდა გვიანს მეფხვად, მუქ მაღოლუნ“.

5. ნამ სიტუაციეფიშ დროს მოსაჭირნა დუდიშ თხილუა დო მუჭო ვაკეთათ თენა?

⁵ მანგარ ფრთხილას ოკო ვორდათ, თიშნერ სიტუაციეფიშ დროს, მუჟამსით შილებე იეჰოვაშ ზნეობრივ ნორმეფს გეგნურთათ. მაგალთო, წყვილქ, ნამუთ ართიანს შითმოხვადუნ, ზღვარს ოკო ვეგნორთან, მუჟამსით ხვალე სქიდუნა, ვარდა საქმე ოხუ შეხებას დო ჯუნას (იგავ. 22:3). დიდ სიფრთხილე რე საჭირო თიმწკუმა ხოლო, მუჟამსით ქრისტიან სამუშაშ გურშენ შხვადო მეურს ვარდა საპირისპირო სქესიშ პიროვნებაწკუმა მუშენს (იგავ. 2:10—12, 16). თეშნერ სიტუაციას ქეშეხვადით-და, გაცხადით, ნამდა იეჰოვაშ მოწმე რეთ, მიქცით ღირსუანო დო ვაგგოჭყორდან, ნამდა ფლირტის მუთუნ ჯგირ ვა მაჸუნუ. საფრთხეშ წოხოლე თიმწკუმა ხოლო გებდირთუთ, მუჟამსით დეპრესიას ვორეთ ვარდა დუც ხვალახეთ ბგინაფლენთ. თე დროს შილებე თიცალ პიროვნებაწკუმა მოკოდან ურთიერთობა, ნამდგაწკუმა ართო დუც ჯგირო იბგინანთ. მინშა შილებე მანგარ გლახათ ვორდათ დო მიდგა ვა რდასინ, არძაშე მიბღათ ემოციურ ელარნა. თეცალო დუდ დღას ქიგინით-და, იეჰოვას დო თიშ ხალხის ქოთხით მოხვარა დო ვემეჩათ თქვან დუც თიშ ნება, მიოდინუათ ჯილდო (წეკითხით ფსალმუნი 34:18; იგავები 13:20). *

6. მუ ოკო ფშუდან, მუჟამსით საქმე გართობას ოხუ?

⁶ უზნეობას ვევაჸუნათინ, ვარია ქოფთქუათ ოკო უზნეო გართობაშე. გართობაშ ინდუსტრია ეფშა რე თიცალ უზნეობათ, მუნერით სოდომ დო გომორას რდუ მოდვალირი (იუდ. 7). თეცალ გართობას მიკურენ თი კათა, ოცად სექსუალურ უზნეობა თეშ მუმოძირუან, ნამდა თენა ჩვეულებრივ მუდგარენ რე დო მუთუნ გლახა ვა მაჸუნუ. მარა ჩქი ირიათო კურცხას ოკო ვორდათ დო ვადვაჸუნათ ირფელს, მუდგას თე ქვეყნიერება მუმარზიენა. თიცალ გართობა ოკო გიშებგორათ, ნამუთ ვემეცილებნა ჯილდოშ მეღებას (იგავ. 4:23).

7. მუ პრობლემეფს შილებე შეფხვადათ კრებას?

⁷ არძას მიჩქუნა, ნამდა ქრისტიანულ კრებაშ წევრობა დიდ კურთხევა რე. კრებაშ  შეხვალამეფს ღორონთიშ სიტყვაშ გურაფა, ართიანშა ჯგირიშ კეთება დო ჸოროფაშ გიმორჩქინა მიმეხვარებნა ირიათო ფშუდან ჯილდო. მინშა კრებას შილებე ართმაჟიას ვაგუგათ დო თეს პრობლემეფქ ქუმაჸუნას. თე სიტუაციას დუდ ხეთეშე ვეგებდგით-და, შილებე ართიანს ხოლო დევენდურათ (წეკითხით 1 პეტრე 3:8, 9). *

8, 9. ა) ნამ თვისებეფიშ გიმორჩქინა მიმეხვარებნა ჯილდოშ მეღებას? ბ) მუ მიმეხვარებნა მიღდან მშვიდობა, მუჟამსით თანაქრისტიან გურს ალმოჭუანა?

⁸ მუჭო ოკო მიფქცუათ, მუჟამსით მიდგარენშე გურ ალაჭვილ ვორეთ? პავლექ კოლოსელ ქრისტიანეფს მეჭარ: „ათეშენ გეგმირჩქინით სათუთ გრძნობეფი — გაჭირებაშ გურშა მეღალა, სიჯგირა, თანდაბლობა, ლიბ ხასიათ დო მოთვინება, მუჭოთ ღორონთიშ გიშნაგორა, წმინდა დო საჸოროფო კათა. მუთვინით დო მთელ გურით ქაპატით ართიანს, მითინშა ჩიულიშ მიზეზ ქოიღუნან-და. მუჭოთ იეჰოვაქ გაპატის მთელ გურითინ, თეშ თქვა ხოლო ქაპატით ართიანს. თეს გეძინელ, ეიფშით გურ ჸოროფათ, მუშენდა თინა გუმაართიანებელ სრულყოფილ კავშირ რე“ (კოლ. 3:12—14).

⁹ ჸოროფაშ გიმორჩქინა დო ჯგირიშ კეთება მიმეხვარებნა ქუვაპატუათ ართმაჟიას. მაგალთო, თანაქრისტიანქ მუშ სიტყვათ ვარდა საქციელით გურ ქალმოჭუეს-და, შემლებნა ქიგიფშინათ ჩქინ დუდ, მუჟამსით ვოწყინებაფეთ შხვეფს. ხომ ქუვორეთ მარდულეფ თი და დო ჯიმალეფიშ, მიდგაქ ჸოროფა გიმირჩქინეს დო თოლ დოწკურეს ჩქინ შეცთომეფშე? (წეკითხით ეკლესიასტე 7:21, 22). * არძაშ უმოსო მარდულეფ ვორეთ, მუშენდა ქრისტექ აკოფშაყარეს ჭეშმარიტ თაყვანიშმცემლობას (კოლ. 3:15). ჩქი ართ ღორონც ვომსახურუთ, ართ სახიოლო ამბეს ფქადაქენთ დო ბრელ ართნერ პრობლემას შითმოფხვადუთ. მუჟამსით ჸოროფას გიმიფრჩქინანთ დო ართიანს ვაპატიენთინ, ქრისტიანულ ართობას ვუნწყუნთ ხეს დო ვებჭყოლიდუანთ სიცოცხლეშ ჯილდოს.

10, 11. ა) მუშენ რე მენჯარიშობა გლახა? ბ) მუშ კეთება შემლებნა, ნამდა მენჯარიშობაშ გურშენ ჯილდოქ ვამდინან?

¹⁰ ბიბლიას მოჩამილ მაგალითეფ გუმოშინანა, ნამდა მენჯარიშობას შეულებ მეცილან ჯილდოშ მეღებას. მაგალთო, კაენს ონჯარუდ მუშ ჯიმა აბელიშ დო დოჸვილ თინა. კორახის, დათანს დო აბირამს ხოლო ონჯარდეს მოსეშ დო თიშ წინააღმდეგ მიდართეს. მეფე საულს ხოლო ენჯარ დავითიშ დო თიშ ჸვილუა მინდომ. ათეშენ, ვა რე გასაკვირ მუდგას ღორონთიშ სიტყვა მეჩიებნა: „სოდეთ მენჯარიშობა რენ თექ, უწესრიგობა დო ირნერ უბადობა რე“ (იაკ. 3:16).

¹¹ ჩქინ გურს ჸოროფას გუვავითარენთ-და, ვემენჯარებნა შხვაშ. ღორონთიშ სიტყვა იჩიებ: „ჸოროფა ითვინენს დო ჯგირს აკეთენს. ჸოროფას ვანჯარ“ (1 კორ. 13:4). მენჯარიშეფო ვეგნიფრთათინ, საჭირო რე ჩქინ და დო ჯიმალეფს ღორონთიშ თოლით ვუჯინათ დო თინეფ ართ სხეულიშ, ქრისტიანულ კრებაშ ნაწილო მიფრჩქინათ. თენა მიმეხვარებნა მივაჸუნათ ღორონთიშ შთაგონებათ ნაჭარა სიტყვეფს: „სხეულიშ ართ ნაწილს დიდება ქაშინ-და, თიწკუმა ართო ხარენს არძა“ (1 კორ. 12:16—18, 26). თიშ მანგიორო, ნამდა ართიანიშ მენჯარანინ, მოხიოლდან ოკო, მუჟამსით შხვეფ კურთხევეფს ღებულენა. დეფიფქრათ მეფე საულიშ სქუაშ, იონათანიშ გურშენ. თის ვანჯარებ, მუჟამსით ღორონთიქ დავით ისრაელიშ მეფეთ აკურთხ. იონათანქ ხუჯ ქუდუკინ დავითის (1 სამ. 23:16—18). შემლებნანო მივაჸუნათ იონათანიშ მაგალითის?

12. ნამ ბიბლიურ რჩევაშ მეჸუნა მეხვარებ ოჯახეფს ჯილდოშ მეღებას?

¹² ბიბლიურ პრინციპეფიშ გიმორნაფა ოჯახეფს მშვიდობას დო ბედნერობას მოუღანს, თეს გეძინელ, მეხვარებ ჯილდოშ მეღებას. პავლექ კოლოსელ ქრისტიანეფს მეჩ რჩევა, ნამუთ ოჯახეფს ოხუდ: „ოსურეფ, დემორჩილით ქომონჯეფს, მუჭოთ უფალს რე მეღებული. ქომონჯეფ, გიჸორდან თქვან ოსურეფ დო უდუნდებუო ვემექცუათ თინეფს. ბაღანეფ, ქუდაჸუნით მშობლეფს ირფელს, მუშენდა თენა მოსაწონ რე უფალშო. მუმალეფ, ვა გაღიზიანათ სქუალეფ, ნამდა გურქ ვა გუტირხან“ (კოლ. 3:18—21). მუშო ოკო რაგად ბჯერა, ნამდა პავლეშ რჩევაშ მეჸუნას, ნამუთ ღორონთიშ შთაგონებათ თქუ, ჯგირ მოუღ, მუჭოთ ქომონჯეფშო დო ოსურეფშონ თეშ, ბაღანეფშო ხოლო.

13. მუჭო შეულებ ქრისტიან დას მუშ ქომონჯ ჭეშმარიტებათ დაინტერესას?

¹³ მუჭო შეილებნა მიქცუათ, მუჟამსით თქვან ქომონჯი, ნამუთ ვა რე იეჰოვაშ მოწმე, ჯგირო ვა გოქცუნა? შილებე გურ გაფდან ალაჭვილ დო ქენირზათ თის, მარა გეგშანწყუნსო თენა მდგომარეობას? ნირზის გიორჯგინათინ ხოლო, თეცალ საქციელიშ უკულ თინა ჭეშმარიტებათ დღას ვედეინტერესებუ. ქომონჯიშ პატიცემაშ გიმორჩქინათ ხეს შეუნწყუნთ ოჯახის მშვიდობას დო განადიდენთ იეჰოვას; თეს გეძინელ, შილებე თქვან მეუღლექ ხოლო დეინტერესას  ჭეშმარიტებათ დო თეგვარო ჟირხოლოქ მიღათ ჯილდო (წეკითხით 1 პეტრე 3:1, 2). *

14. მუჭო ოკო მიქცუას ქრისტიან ქომონჯიქ, მუჟამსით იეჰოვაშ მოწმე ვა რენ ფერ ოსურ თის პატის ვა ცენს?

¹⁴ მუჭო შეილებნა მიქცუათ, მუჟამსით თქვან ოსურ, ნამუთ ვა რე იეჰოვაშ მოწმე, თქვან პატიცემას ვეგმირჩქინანს? გეგშენწყუაფნო სიტუაცია, მუჟამსით ღვარაფით ოცადუთ ქაძირათ, მი რე ოჯახიშ უნჩაშ? მუშო ოკო რაგად, ვარ! ღორონთ მელ თქვანდე, ნამდა ქიმიაჸუნუთ იესოშ მაგალითის დო ჸოროფას გეგმირჩქინანთ (ეფეს. 5:23). იესო, მუჭოთ კრებაშ დუდი, ირიათო მოთვინებას დო ჸოროფას გიმირჩქინანს (ლუკ. 9:46—48). თიშ მაგალითიშ მეჸუნათ ქომონჯეფქ შილებე მუნეფიშ ოსურეფ ჭეშმარიტებათ დაინტერესან.

15. მუჭო ოკო გიმოხანტას ქრისტიან ქომოლკოჩიქ მუშ ოსურიშ ჸოროფა?

¹⁵ ბიბლია ქომონჯეფს ურაგად: „ქომონჯეფ, გიჸორდან თქვან ოსურეფ დო უდუნდებუო ვემექცუათ თინეფს“ (კოლ. 3:19). მოჸოროფე ქომონჯ პატის ცენს მუშ ოსურს, მუჟამსით ურჩქილე თიშ აზრეფს დო ოძირანს, ნამდა აფასენს თიშ ნარაგადის (1 პეტ. 3:7). მართალ რე, თის ირო ვაკეთინე, მუდგას ოსურ თხულენსინ, მარა უჯგუშო გინოჭყვიდუნს საკითხეფს, მუჟამსით თის ხოლო ქელაკითხანს აზრის (იგავ. 15:22). მოჸოროფე ქომონჯ ვეთხინს ოსურშე პატიცემას, თინა ოცად თიშ დამსახურებას. მიდგას მუშ ჩილ დო სქუა დასურო უჸორსინ, უმოს ბედნერ ოჯახ აღვენუ დო ვა გუჭირდუ სიცოცხლეშ ჯილდოშ მეღება.

16, 17. მუ ოკო აკეთან ახალგაზრდეფქ, ნამდა გურქ ვამურთან მშობლეფშე?

¹⁶ მუჭო ოკო მიქცუათ, მუჟამსით ახალგაზრდა რეთ დო ფიქრენთ, ნამდა ქრისტიან მშობლეფ ვაიგენა დო მკაცრას გოქცუნა? თეცალ დროს შილებე ეჭვიშ თუდო ქიგიორინუათ, დასურო ქორენ დო ვარ იეჰოვაშ მსახურება არძაშ უჯგუშ შარა ცხოვრებას. მარა ვემეჩათ თე ირფელს თიშ უფლება, მიგოტებაფუან იეჰოვაშ მსახურება, მუშენდა მითინ ვა ფიქრენს თქვან ჯგირობუაშე თეშ, მუჭოთ ქრისტიან მშობლეფ დო და დო ჯიმალეფი.

¹⁷ თქვან მშობლეფ შენიშვნას დღას ვა გარზენდანინ, ვეეჭვენდითო, დასურო ქოფიქრენან დო ვარ თინეფ თქვანდე? (ებრ. 12:8). შილებე ვა მორწონდან თი მეთოდეფ, ნამდგას მშობლეფ თქვან ორდალო გიმირინუანა. თიშ მანგიორო, თინეფშე გურქ მოირთანინ, ქეცადით ქუგუგათ, მუშენ იქციებნა თაშ. მშვიდას რდათ დო ვა გაკრიტიკათ თინეფ. ღორონთის სიტყვას ჭარ: „მიდგას რჩქინა უღუნ, მუშ სიტყვეფს ოკვირ; გურგოჩამილ კოჩ მშვიდ ხასიათიშ რე“ (იგავ. 17:27). მიზანო გიღუდან, ქიჸუათ მოწიფულ პიროვნებაქ, მიდგას მშვიდას მიაღებე დო გიმარინე რჩევა. თეწკუმა ართო, ზედმეტო ვეგნაჸუნუ თიშე ფიქრის, ნამდა რჩევა უტაქტოთ მეჩეს (იგავ. 1:8). იეჰოვაშ მოჸოროფე მშობლეფ დასურო კურთხევა რე. თინეფს ოკონა ქიმგეხვარან, მიღათ სიცოცხლეშ ჯილდო.

18. მუშენ გაფნა გინოჭყვიდილ, ვემიოდინუათ სიცოცხლეშ ჯილდო?

¹⁸ ჩქი მელნა ჯილდო — თენა იჸუაფ ზეციურ ცხოვრება დო ვარ დედამიწას სამოთხეს მარადიულ სიცოცხლე. არძას შემლებნა მიღდან თეშ იმენდი, მუშენდა თეს ჩქინ გუმაჭყაფალ მოპირნა. დედამიწას სამოთხეშ გურშენ ღორონთ იჩიებ: „დედამიწა იეჰოვაშ რჩქინათ ეიფშაფუ“ (ეს. 11:9). არძა, მით თექ იცხოვრენსინ, იეჰოვაშე მიღენს რჩქინას. თენა თიცალ ჯილდო რე, ნამუთ ღირ ირნერ ხანდაშა. თაშ ნამდა, ირიათო რშუდან იეჰოვაშ დაპირება დო მუთუნნერო ვა დათმათ სიცოცხლეშ ჯილდო!