1, 2. ა) მუჭო უჯინედ იესო მოსეშ კანონს? ბ) მუჭო გიმირინუანდეს მწიგნობარეფ დო ფარისეველეფ მოსეშ კანონს?

იესოს უჸორდ მოსეშ კანონი. თენა ვა რდუ გასაკვირ, მუშენდა თინა მუშ საჸოროფო მუმაშე, იეჰოვაშე მიშ. ფსალმუნიშ 40:8-შე არგამათ იძირე, ნამდა თინა აფასენდ თე კანონს. თექ ჭარ: „სქან ნებაშ შესრულება მოხიოლ, ჩქიმ ღორონთ დო ჩქიმწკუმა რე სქან კანონი“. იესოქ სიტყვათ დო საქმეთ დამტკიც, ნამდა ღორონთიშ კანონ რდუ სრულყოფილ, სარგებელიშ მუმაღალარ დო ვა რდუ რთულ დაცვებელი (მათ. 5:17—19).

² მუჭო დოჭყორდუდ იესოს გური, მუჟამსით ქოძირუნდ, ნამდა მუშ მუმაშ კანონს მწიგნობარეფ დო ფარისეველეფ სწორაშე ვეგმირნუანდეს! მუჭოთ თაშინ, თინეფ იცვენდეს კანონს, მუშენდა იესოქ თქუ: „გინმიგანთ ჸვალმინთაშ, კამაშ დო ზირიშ მავითალს“. მუ რდუ პრობლემა? თიქ გეუძინ: „მარა გიჭყოლიდეთ კანონს მოჩამილ უმოს მნიშვნელოვან საკითხი: სამართალი, ჭყოლოფა დო ართგურობა“ (მათ. 23:23). ფარისეველეფ დო მწიგნობარეფ ხვალე წესეფს ეკოთხოზდეს, მარა იესოს ჯგირო არჩქილედ თი პრინციპეფ, მუდგაშათ გერსხილ რდუ თე კანონეფი.

3. მუს გუვარჩიენთ თე სტატიას?

³ ქრისტიანეფს ვა მოვალნა მოსეშ კანონიშ დაცვება (რომ. 7:6).  იეჰოვაქ თე კანონი ბიბლიას დომჩუეს, თიშენ, ნამდა უმოსო ქენვანჭათ თი პრინციპეფს, მუდგაშათ თე კანონეფ რე გერსხილი. მაგალთო, მუ პრინციპეფიშ ძირაფა შემლებნა დუდიშ გითაფორაფალ ქალაქეფშე? ულირ სტატიას გუვარჩით, მუ აფუდ ოკეთებელ კოჩიშ შემთხვევით მაჸვილარს დო მუშ გურაფა შემლებნა თავრეშე. თეს გეძინელ, დუდიშ გითაფორაფალ ქალაქეფშე ბრელ მუთუნ გებგით იეჰოვაშ გურშენ დო თინა ხოლო, ჩქი მუჭო შემლებნა მივაჸუნათ თიშ მაგალითის. თე სტატიას გუვარჩიენთ სუმ კითხვას: მუჭო იძირე დუდიშ გითაფორაფალ ქალაქეფშე იეჰოვაშ ჭყოლოფა? მუს ფიქრენს იეჰოვა სიცოცხლეშ გურშენ? მუჭო იძირე თე ქალაქეფშე ღორონთიშ სრულყოფილ სამართლიანობა? დეფიქრით, მუჭო შეილებნა მიაჸუნათ ჩქინ ზეციერ მუმაშ მაგალითის (წეკითხით ეფესოელები 5:1). *

4, 5. ა) სო აფდეს აშენებულ თე ქალაქეფ დო მუშენ ვა რდუ ძნელ თინეფშა მეულა? ბ) მუს ბგურაფლენთ თავრეშე იეჰოვაშ გურშენ?

⁴ დუდიშ გითაფორაფალ ქალაქეფშა მეულა არძაშო მოხუჯურ რდუ, მუშენდა იეჰოვაქ ზოჯ, სუმ ქალაქ მალწყარ იორდანეშ მელე ჸოფედკო დო სუმ ქალაქი — მოლე (რიცხ. 35:11—14). თე ქალაქეფშა მიმაულარ შარა ჯგირ კეთებულ ოკო რდუკო (კან. 19:3). იუდეველეფს ტრადიციათ უღდეს, შარეფს ნიშანეფ ქიგურნუაფდესკო, ნამუთ ნტებულ კოც მეხვარებუდ ვეიოჩირთკო დუდიშ გითაფორაფალ ქალაქის. თე ქალაქეფ ირდიხას რდუ, ათეშენ კოჩიშ შემთხვევით მაჸვილარს ვასაჭირუდ შხვა ქიანაშა ნტება, სოდეთ შილებედ იეჰოვაშ თაყვანიშცემა მიოტუკო.

⁵ დეფიქრით: იეჰოვაშ მითითებათ, კოჩიშ გარძახ მაჸვილარ ღურათ ოკო დუსაჯებდესკო. მარა შემთხვევით მაჸვილარს ღორონთ საშვალებას არზენდ, მუშ ჭყოლოფა მიღუკო დო თხილერ ქოჸოფედკო. ბიბლიაშ ართ-ართ კომენტატორ იჩიებ: „თე ირფელ არძაშო გასაგებ დო ეფი ოკეთებელ რდუ. თეშნერო ღორონთ ჭყოლოფას გიმირჩქინანდ“. იეჰოვა ვა გუ გურ ველაძუნ ფერ მოსამართლეს, ნამდგას მუშ მსახურეფიშ დასაჯებაშა ოლ შური. ბიბლია იჩიებ, ნამდა თინა ჭყოლოფათ რე ეფშა (ეფეს. 2:4).

6. მუჭო უჯინედეს ფარისეველეფ ჭყოლოფაშ გიმორჩქინას?

⁶ ფარისეველეფს ვაკოდეს ჭყოლოფაშ გიმორჩქინა. მაგალთო, თინეფს ტრადიციათ უღდეს, კოც სუმიშ მეტშა ვაპატისკონ. იესოქ თინეფიშ საქციელ გეგმაარგამ ფარისეველიშ გურშენ მოჸუნაფილ ართ მაგალითით. თე კოჩ იჩიებუდ: „მადლობა ღორონთ, შხვა კათაცალ ვა ვორექ, მუნერით რენა მახირალეფი, უსამართლოეფი, უწესოეფ ვარდა თიცალეფ, მუჭომით თე გინაგაფალეფიშ ემაშაყარალ რე“. მუშენ ვაკოდეს ფარისეველეფს ჭყოლოფაშ გიმორჩქინა? ბიბლია იჩიებ, ნამდა თინეფს „მუთუნო ვემიორჩქუდეს შხვეფი“ (ლუკ. 18:9—14).

7, 8. ა) მუჭო შეილებნა მიაჸუნათ იეჰოვაშ მაგალითის, მუჟამსით მიდგარენ გოწყინებაფეს? ბ) მუჭო მიმეხვარებნა თანდაბლობა პატიებას?

 ⁷ ვაგურათ ფარისეველეფს, გეგმირჩქინით ჭყოლოფა დო თეგვარო მიაჸუნით იეჰოვაშ მაგალითის (წეკითხით კოლოსელები 3:13). * ჭყოლოფაშ გიმორჩქინაშ ართ-ართ საშვალება რე ქუვაპატუათ შხვეფს (ლუკ. 17:3, 4). ქოკითხით თქვან დუც: „ქუვაპატიენქო შხვეფს თიშ უმკუჯინუო, ნამდა შილებე ბრელშა მოწყინებაფეს? ქუვოცადუქო, ნამდა კინ ქუვორდე მშვიდობიანო თიწკუმა, მიდგაქ მოწყინებაფუ?“.

⁸ შხვეფიშ პატიებათ თანდაბლობას გიმიფრჩქინანთ. ფარისეველეფ ვართუდეს თეს, მუშენდა შხვეფშე უჯგუშო მიორჩქდეს მუნეფიშ დუდი. მარა ჩქი, ქრისტიანეფქ, შხვეფ ჩქინ დუდშე უმოსო ოკო მიფრჩქინათ დო ვა გამჭირდან თინეფიშ პატიებაქ (ფილ. 2:3). ქიმიაჸუნუთო იეჰოვაშ მაგალითის დო გეგმირჩქინანთო თანდაბლობას? ირიათო თაშ ქიმიქციებუთ-და, შხვეფს ადვილ აჸინა თქვანდა პატიებაშ თხუალა დო თქვა ხოლო ვა გაიჭირდუნა ჭყოლოფაშ გიმორჩქინა. თაშ ნამდა უცფას ვა მოირთან გურქ დო ხეთეშე ქაპატით შხვეფს (ეკლ. 7:8, 9).

9. მუჭო ოძირუ იეჰოვაქ ისრაელეფს, ნამდა სიცოცხლე წმინდა რდუ?

⁹ დუდიშ გითაფორაფალ ქალაქეფიშ არსებობაშ ართ-ართ მიზან თინა რდუ, ნამდა ისრაელეფს ბრალ ვეგედვალდესკო ზისხირიშ დობუნას (კან. 19:10). იეჰოვას უჸორს სიცოცხლე დო ჯოგ კოჩიშ გარძახ ჸვილუა (იგავ. 6:16, 17). სამართლიან დო წმინდა ღორონთ კოჩიშ შემთხვევით ჸვილუას ხოლო ვეყურენდ. მართალ რე თე შემთხვევას თინა მაჸვილარწკუმა ჭყოლოფას გიმირჩქინანდ, მარა კოჩიშ შემთხვევით მაჸვილარქ უხუცესეფს ირფელ ოკო გეუნწყუკო. მართალ ქიჸუაფუდ-და, ნებას ქიმეჩანდეს მღვდელმთავარიშ ღურაშახ თე ქალაქის ქიცხოვრუკო დო შილებედ თექ მთელ ცხოვრებას აჸუკო გაჩერებელქ. თე ირფელ ისრაელეფს გაშინანდ, ნამდა კოჩიშ სიცოცხლეშ დაფასება სერიოზულ საკითხ რდუ. თინეფ სიცოცხლეშ მუმაჩამალიშ პატიცემას ოძირანდეს, მუჟამსით ირნერო ეცადებდეს შხვეფიშ სიცოცხლე საფრთხეს ვენაჸათესკო.

10. მუჭო ოძირეს მწიგნობარეფქ დო ფარისეველეფქ, ნამდა შურო ვაფასენდეს სიცოცხლეს?

¹⁰ იეჰოვა მანგარო აფასენს სიცოცხლეს, მარა მწიგნობარეფს დო ფარისეველეფს შურო ვანარღუდეს თენა. იესოქ თინეფს უწუ: „[თქვა] მიდეღით რჩქინაშ კილა. ვართ თქვა მინორთით დო მინმაულარეფს ხოლო ეცილით!“ (ლუკ. 11:52). მუს ნიშნენდ თენა? მწიგნობარეფს დო ფარისეველეფს ოვალდეს ღორონთიშ სიტყვა გეუნწყუმდესკო ხალხშა დო მარადიულ სიცოცხლეშ შარაშა ქიგურნუაფდესკო თინეფი. მარა თეშ მანგიორო, ხალხი გემკუჩილითეს იესოს დო მარადიულ განადგურებაშ შარას ქიგიორინეს (საქ. 3:15). თინეფს სიამაყე ორუდეს დო მუნეფიშ დუდიშ მეტ მუთუნ ვანარღდეს, ათეშენ ხალხიშ სიცოცხლე დო ჯგირობუა ნაკლებო აწუხენდეს. მუ უბადო დო უდუნდებელ კათა რდეს!

11. ა) მუჭო ოძირუ მოციქულ პავლექ, ნამდა აფასენდ სიცოცხლეს? ბ) მუჭო მივაჸუნათ ქადაქებაშ დროს პავლეშ მაგალითის?

¹¹ მუჭო შემლებნა იეჰოვაშ მაგალითის მივაჸუნათ დო ვართ ხოლო მწიგნობარეფიშ დო  ფარისეველეფიშ? ჩქი ოკო დუვაფასათ სიცოცხლეშ ძღვინ დო საქმეთ ვოძირათ თენა. მოციქულ პავლე ქადაქებათ ოძირანდ, ნამდა აფასენდ სიცოცხლეს. საბოლათ თიქ თქუ: „სუფთა ვორექ არძაშ ზისხირშე“ (წეკითხით საქმეები 20:26, 27). * პავლე მოციქულ ხვალე თიშენ ვა ქადაქენდ, ნამდა თენა ღორონთიქ დავალ დო უკულ სინდისიქ ვეშიაწუხკონ. თის უჸორდ ხალხ დო თინეფიშ სიცოცხლე თიშო ძვირფას რდუ (1 კორ. 9:19—23). თეგვარო, ჩქი ხოლო ოკო ვეცადათ, ნამდა თე საკითხის თეშნერ თოლით ვუჯინათ. იეჰოვას „ოკო, არძაქ მინანუას“ (2 პეტ. 3:9). ქუმოკონა იეჰოვაშ მაგალითის მივაჸუნათ-და, ხალხ ოკო მიჸორდან. თინეფიშ სიცოდილ ქომღუნან-და, უმოს გურგედვალირო იფქადაქენთ დო მეტ ხიოლ მაღვენუნა.

12. მუშენ რე უსაფრთხოება მნიშვნელოვან ღორონთიშ ხალხშო?

¹² იეჰოვა აფასენს სიცოცხლეს. შხვეფიშ სიცოცხლეს საფრთხეს ვენვოჸოთანთ-და, ათეშნერო მივაჸუნუთ იეჰოვაშ მაგალითის. სიფრთხილე რე საჭირო, მაგალთო, მუჟამსით მანქანას გივოხეთ, მუფშენთ, მშენებლობას ბღებულენთ მონაწილებას ვარდა ჩქინ თაყვანიშმცემლობაშ ადგილშა მეურთ. ხალხიშ სიცოცხლე დო ჯამრთელობა უმოს მნიშვნელოვან რე, ვინემ ფარაშ ვარდა დროშ დაზოგება. ჩქინ ღორონთ ირიათო თაშ იქციებ დო თის ოკო ჩქი ხოლო მუშ მაგალითის მივაჸუნათ. უხუცესეფ განსაკუთრებულო აქცენა ჸურადღებას, მუჭო მუნეფიშ უსაფრთხოებასინ თეშ, მიდგა მუშენსინ თინეფიშ უსაფრთხოებას ხოლო (იგავ. 22:3). უხუცესიქ უსაფრთხოებაშ გურშენ რჩევა ქიმერჩეს-და, ქუმურჩქილეთ თის (გალ. 6:1). სიცოცხლეს თეშ უჯინით, მუჭოთ იეჰოვა უჯინე დო ბრალ ვეგგადვალნა ზისხირიშ დობუნას.

13, 14. მუჭო შეულებდეს უხუცესეფს იეჰოვაშ სამართლიანობაშ მაგალითის ქიმიაჸუნესკო?

¹³ იეჰოვაქ მითითება მეჩ ისრაელ უხუცესეფს, ნამდა მუშ სამართლიანობაშ მაგალითის მიაჸუნესკო. პირველ, თინეფს ჯგირო ოკო ქუგუგებდესკო სიტუაცია. მაჟია, გურგედვალირო გეგმურკვიებდესკო მაჸვილარიშ მოტივეფი, თიშ ულირ ცხოვრება დო მუს ფიქრენდ მუშ საქციელშენ. თეშ უკულ საბოლათ გეგნოჭყვიდუნდეს, გეგმირჩქინანდეს დო ვარ ჭყოლოფას. უხუცესეფ გეგმირჩქინანდეს ღორონც მოწონსინ ფერ სამართლიანობას, მუჟამსით ზუსტას ქიგეგენდეს ჯოგუდ დო ვარ მაჸვილარს თი პიროვნება დო გარძახ ჸვილ დო ვარ თინა (წეკითხით რიცხვები 35:20—24). * მოწმეეფს ქიმიჸონანდეს-და, არძაშ უმოს ჭიჭე, ჟირ კოჩ რდუ საჭირო, ნამდა მაჸვილარს განაჩენ გეგშუღესკო (რიცხ. 35:30).

¹⁴ ირფელიშ გაგებაშ უკულ უხუცესეფქ ყურადღება თი პიროვნებაშა ოკო გინიღესკო დო ვართ ხოლო თიშ კეთებულ საქმეშა. თინეფქ გონიერება ოკო გიმირჩქინესკო დო ქოძირესკო თიშნერ დეტალეფი, მუთ ართ უცფას ვეძირედ. თეს გეძინელ, თი მიზეზეფ ხოლო აფდეს გიმარკვიებელ, მუშ გურშენით მოხვად თექ. არძაშ უმოსო უხუცესეფს იეჰოვაშ წმინდა შურ ოსაჭირდეს, ნამუთ მეხვარებუდ თინეფს, ღორონთიშ მაგალითის ქიმიაჸუნესკო დო გონიერება, ჭყოლოფა დო სამართლიანობა გეგმირჩქინესკო (გამ. 34:6, 7).

15. მუჭო უჯინედ იესო დო მუჭო უჯინედეს ფარისეველეფ ცოდამ ხალხის?

¹⁵ ფარისეველეფ ხვალე საქციელს უჯინედეს დო ვართ ხოლო კოჩიშ გურს. მუჟამსით იესო მათეშ ჸუდეს გონწყილ სუფრას მიკოხედუნ, თინეფქ თქვის: „მუშენ ჭკომუნს თქვან მოძღვარ გინაგაფალეფიშ ემაშაყარალეფწკუმა დო ცოდამეფწკუმა ართო?“. იესოქ თეცალ პასუხ მეჩ თინეფს: «ექიმ ჯამრთელეფს  ვარინ, ლეხეფს ოსაჭირ. თაშ ნამდა, მეუთ დო ქიდიგურეთ მუს ნიშნენს: „ჭყოლოფა მოჰამ დო ვართ ხოლო მსხვერპლი“» (მათ. 9:9—13). ხეს გინმუფორუანდუო იესო ცოდამეფს? მუშო ოკო რაგად, ვარ. თის ოკოდ არძაქ გეგმისწორკო დო თეს ქადაქებაშ დროს ხოლო ხშირას იჩიებუდ (მათ. 4:17). იესოქ ქოძირ, ნამდა „გინაგაფალეფიშ ემაშაყარალეფ დო ცოდამეფ“ ოცადუდეს გაუჯგუშებას. თინეფს მათეშ ჸუდეშა ხვალე ოჭკუმალიშ ოჭკომშა ვემურთუმნა. თექ რდესინ თინეფშე ბრელქ თიშ მოწაფეთ გინირთ (მარ. 2:15). სანარღოთ, ბრელ ფარისეველ ვა უჯინედ ხალხის თეშ, მუჭოთ იესო. თინეფს მიორჩქუდეს, ნამდა ცოდამეფიშ თირუაშ მუთუნნერ იმენდ ვა არსებენდ. მუჭო გენესხვავებდეს ფარისეველეფ იეჰოვაშე, ნამუთ ხალხწკუმა სამართლიანობას დო ჭყოლოფას გიმირჩქინანდ!

16. მუშ კეთება ოვალნა სამართლებრივ კომიტეტის მსახურენან თი ჯიმალეფს?

¹⁶ უხუცესეფქ ამდღა ხოლო ოკო მიაჸუნან იეჰოვაშ მაგალითის, ნამუთ „სამართლიანობაშ მოჸოროფე რე“ (ფსალმ. 37:28). თინეფქ დიო ირფელ ოკო გეგმირკვიან დო გეგთიკითხან, მართალო ქაფუნ დო ვარ დაშებულ თე კოც. დასურო თაშ ქორენ-და, ბიბლიას მოჩამილ ხემძღვანელობას ოკო მიაჸუნან (კან. 13:12—14). ჯიმალეფქ, ნამუთ სამართლებრივ კომიტეტის მსახურენან, ოკო ქოძირან დასურო ქონარღენს დო ვარ თე პიროვნება. მარა თენა ადვილ ამბე ვა რე. ნამდვილ დანარღება თევრეშე იძირე, მუჭო უჯინე კოჩ მუშ საქციელს დო მუ უღუ გურს (გამოცხ. 3:3). ჭყოლოფაშ მეღება ქაკონ-და, თიქ ოკო მინანუას მუშ ცოდამ საცქიელი. *

17, 18. მუჭო შეულებნა უხუცესეფს ქიგეგან დასურო ნარღენს დო ვარ პიროვნება? (ქოძირით სურათ მა-13 გვერდის)

¹⁷ გურეფიშ კითხირ ხვალე იეჰოვას დო იესოს შეულებ დო ვართ ხოლო უხუცესეფს. უხუცესო ქომსახურენთ-და, მუჭო შეილებნა გეგათ დასურო ნარღენს დო ვარ კოჩ მუშ საქციელს? პირველ, ქილოცით, ნამდა ღორონთიქ სიბრძნე ქიმერჩან თეშ გაგებელო (1 მეფ. 3:9). მაჟია, ბიბლიაშ დო თიშა გერსხილ პუბლიკაციეფიშ საშვალებათ ქოძირით, „ქვეყნიურ დანარღებაწკუმა“ გიღნანო საქმე დო ვარ „ღორონც მოწონსინ ფერ დანარღებაწკუმა“. თავრეშე გიმორჩქინდუ, დასურო ქონარღენს დო ვარ კოჩ მუშ საქციელს (2 კორ. 7:10, 11). ქოძირით, მუჭო ეთმოჭარუნს ბიბლია თი კათას, მით ნარღენდ დო მით ვა ნარღენდ, მუჭო გინაფლენდეს დუც თინეფ დო მუჭო უჯინედეს მუნეფიშ საქციელს.

¹⁸ საბოლათ, ქეშეცადით სრულაშე ქოძირათ, მუ უღუ თე პიროვნებას გურს. გეთვალისწინით თიშ ულირ ცხოვრება, მოტივეფ დო სუსტ მხარეეფი. იესოშ გურშენ, ნამუთ კრებაშ დუდ რენ, ბიბლია წინასწარმეტყველენს: „მეჯინათ ვა გასამართლენს დო ვართ ჸუჯიშ გუნაგონებუთ გიმაარგამენს. სამართლიანო გასამართლენს საწყალეფს დო სიმართლეთ გიმაარგამენს ხალხის დედამიწას რენან თი ბაჩაჩია კათაშ გურშენ“ (ეს. 11:3, 4). უხუცეფ, თქვა იესოშ გერნაფილ ჭყიშეფ რეთ დო თინა ქიმგეხვარებნა სამართლიანო გასამართლათ დო ჭყოლოფა გეგმირჩქინათ (მათ. 18:18—20). უხუცესეფ ჩქი ხოლო მოხვარნა, ნამდა ართიანს სამართლიანო მივექცუათ დო ჭყოლოფა გეგმიფრჩქინათ. მარდულეფ ოკო ვორდათ თი უხუცესეფიშ, ნამუთ თე ირფელს ორთნა ჩქინ საჯგირობუოთ!

19. მუ დიგურეთ დუდიშ გითაფორაფალ ქალაქეფშე?

¹⁹ მოსეშ კანონს მოჩამილ რდუ „ჭეშმარტებაშ დო რჩქინაშ მონახაზი“, სოვრეშეთ ბრელ მუთუნს ბგებულენთ იეჰოვაშ დო თიშ პრინციპეფიშ გურშენ (რომ. 2:20). მაგალთო, დუდიშ გითაფორაფალ ქალაქეფშე უხუცესეფ გურაფლენა, მუჭო „გასამართლან ჭეშმარიტ სიმართლეთ“, თეს გეძინელ ჩქი ხოლო ბგურაფლენთ, მუჭო ვაპატუათ დო მივექცუათ ართიანს ჯგირო (ზაქ. 7:9). ჩქი ვა მოვალნა კანონიშ დაცვება. მარა, იეჰოვა ვეთირუ დო თიშო ამდღა ხოლო მნიშვნელოვან რე სამართლიანობაშ დო ჭყოლოფაშ გიმორჩქინა. მუშმადიდა პატი რე ვემსახურათ ღორონც, ნამუშ ამნახანტო ვორეთ გოჭყაფილი. მორთ, ირიათო მივაჸუნათ თიშ ჯგირ მაგალითის, გეგმიფრჩქინათ თიშნერ თვისებეფი, მუნერით თის უღუ დო თეგვარო, ღორონთ იჸუაფ ჩქინ დუდიშ გითაფორაფალი!