1. მუ მეჭარ პავლექ კოლოსელ ქრისტიანეფს? (ქოძირით სურათი თე გვერდის)

მოციქულ პავლექ სოდგარენ ახ.წ. 60—61 წანეფს, კოლოსელ ქრისტიანეფს წერილ მეჭარ. თე დროს თინა რომიშ ციხეს ხედ. თე წერილს პავლე თინეფს ეთმუნწყუნდ, მუშენ რდუ საჭირო საკითხეფს „სულიერ გაგებათ“, შხვანერო ქოფთქუათინ, იეჰოვაშ თოლით უჯინესკო (კოლ. 1:9). თიქ გეუძინ: „თეს თიშენ გირაგადუთ, ნამდა შეცთომაშა მითინქ ვემშაიჸონან, ქუდოიჸუნუანან ფერ რაგადით . . . კურცხას რდათ: შილებე ნამთინექ მიგოჩილითუან ფილოსოფიათ დო პოტიკ ცთუნებეფით, ნამუთ მეურე ხალხიშ ადათ-წესეფს, ქვეყნიერებაშ პრინციპეფს დო ვართ ხოლო ქრისტეს“ (კოლ. 2:4, 8). პავლექ ენწყ მუშენ რდუ ქვეყნიერებას გავრცელებურ ნამთინე აზროვნება არასწორ დო მუშენ შილებე არასრულყოფილ კოჩიქ გეიაჸუნას თეცალ აზროვნებას. მაგალთო, თეშ გურშენ ნამთინექ შილებე მუშ დუდ შხვეფშე უმოს ბრძენო ვარდა უჯგუშო მირჩქინას. თე წერილ პავლექ ქრისტიანეფს თიშენ მეჭარ, ნამდა დუდ ეუჩილითუაფდესკო ქვეყნიურ აზროვნებაშა დო საქმეეფშა (კოლ. 2:16, 17, 23).

2. მუშენ გუვარჩიენთ ქვეყნიურ აზროვნებაშ მაგალითეფს?

² პიროვნებას, ნამუთ ქვეყნიურო აზროვნენსინ, მუთუნო ვემიორჩქ  იეჰოვაშ კანონეფი. კურცხას ვეპჸუაფუთ-და, შილებე თეცალ კათაქ ჩქინწკუმა ხოლო იმოქმედან დო მოფიქრებაფუან, ნამდა ვა ღირ ღორონთიშ კანონეფით ცხოვრება. ქვეყნიურ აზროვნებას ამდღა ირდიხას შეფხვადუთ: ტელევიზიას, ინტერნეტის, სამუშას ვარდა სკოლას. თე სტატიას გუვარჩიენთ, მუჭო დეფცვათ დუდ თიშ გლახა გავლენაშე. ჩქი ქობძირუნთ ქვეყნიურ აზროვნებაშ ხუთ მაგალითის დო ქიგებგენთ, მუჭო ევუჩილითუათ თინეფს დუდი.

3. მუნერ აზროვნება შილებე მოწონდას ამდღა ბრელს დო მუშენ?

³ ჯგირ პიროვნება ქუვორდენ, ვა რე აუცილებერ ღორონთიშ ბწანდას. ამდღა ბრელ იჩიებ, ნამდა ვა წანს ღორონთიშ დო ვართ რელიგია ოინტერეს. შილებე თინეფ სერიოზულო დღას ვა დაფიქრებენა ღორონთიშ გურშენ დო ფიქრენა, ნამდა თავისუფალეფ თი დროს იჸუაფნა, მუჟამსით მუდგას ოკონან თის გაკეთენა (წეკითხით ფსალმუნი 10:4). * შხვეფს შილებე მუნეფიშ დუდ ბრძენეფო მიორჩქუდან დო იჩიებდან: „ზნეობრივ პრინციპეფით ქიფცხოვრენ, შუროთ ვა რე აუცილებერ ღორონთ ბწანდას“.

4. მუ შემლებნა ვუწუათ თინეფს, მისით ღორონთიშ ვა წანს?

⁴ ქორენო გონივრულ, ნამდა ვედებჯერათ ღორონთიშ არსებობა? ნამთინეს, მით თეშ პასუხის მეცნიერებას გორუნსინ, შურო ვაგაგინ მუთუნქ. მარა სინამდვილეს, თე კითხვას მარტივ პასუხ უღუ. შენობას მაშენებელ ქასაჭირუნ-და, ცოცხალ ორგანიზმეფს ვედესაჭირებუდუო გუმაჭყაფალი?! დასურო, ნამთინ ჸუდე ვეშიდარებე არძაშ უმოს მარტივ ცოცხალ ორგანიზმეფშა ხოლო, მუშენდა თინეფს თიცალ მუდგარენ შეულებნა, ნამუთ ნამთინ ჸუდეს ვეშულებ — გამრავლება! მიშ გოჭყაფილ რენა თინეფი? ბიბლია პასუხენს: „არძა ჸუდე მიდგარენიშ ნაშენებ რე, მარა ირფელიშ ემაშენებელ ღორონთ რე“ (ებრ. 3:4).

5. მუ შემლებნა ვუწუათ თინეფს მით იჩიებ, ნამდა შეიოლებერ რე ღორონთიშ უმშო ჯგირ დო ფურიშ გარჩიება?

⁵ მუშ რაგად შილებე თიმწკუმა, მუჟამსით იჩიებნა, ნამდა კოჩის შეულებ ღორონთიშ უმშო გარჩუას ჯგირ დო ფურ? ბიბლია იჩიებ, ნამდა თი ხალხი ხოლო, მიდგას ღორონთიშ ვა წანსინ, შილებე ზნეობრივ პრინციპეფით ცხოვრენდას (რომ. 2:14, 15). მაგალთო, თინეფს შილებე უჸორდან დო აფასენდან მუნეფიშ მშობლეფს. მარა იეჰოვაშ კანონეფს ვეცვენან თიშენ, შილებე საკითხეფ სწორას ვეგნოჭყვიდან (ეს. 33:22). ამდღა ბრელ არგამათ იჩიებ, ნამდა ღორონთიშ მოხვარაშ უმშო დედამიწას რენ თი პრობლემეფ ვემიგვარებე (წეკითხით იერემია 10:23). * ათეშენ, დღას ოკო ვეფიფქრათ, ნამდა ღორონთიშ დო თიშ კანონეფიშ უმშო, გუვარჩიენთ ჯგირ დო ფურს (ფსალმ. 146:3).

6. მუს ფიქრენს რელიგიაშ გურშენ ნამთინე?

⁶ შეილებნა რელიგიაშ უმშო ხოლო რდათ ბედნერეფი. თეცალ აზროვნება ბრელს მოწონს, მუშენდა ფიქრენა, ნამდა რელიგიას მუთუნნერ სარგებელ ვა მოუღ. თეს გეძინელ, ბრელ რელიგია გურს ეთმუჸოთანს ხალხის ღორონთშა თით, ნამდა ჯოჯოხეთიშ გურშენ ოგურუანს, გიწმუღანს ნავითალს ვარდა პოლიტიკაშა მიშმურს. ათეშენ ვა რე გასაკვირ ხალხი ფიქრენდას, ნამდა რელიგიაშ უმშო ბედნერეფ იჸუაფნა. თინეფ შილებე იჩიებდან: „სულიერ საკითხეფ მოინტერეს, მარა ნამთინ რელიგიას ვა ვაკათუქ“.

7. მუჭო უნწყუნს ხეს ბედნერობას ჭეშმარიტ რელიგია?

⁷ შილებენო კოჩ დასურო ბედნერ რდას რელიგიაშ უმშო? მუშო ოკო რაგად, ვარ. მართალ რე, ტყურა რელიგიას ბედნერობა ვა მოუღ, მარა იეჰოვაწკუმა, „ბედნერ ღორონთწკუმა“ ურთიერთობაშ უმშო კოჩ ბედნერ ვეჸუაფ (1 ტიმ. 1:11). ღორონთ ირფელს ხალხიშ საჯგირობუოთ ორთ. თიშ მსახურეფ ბედნერეფ რენა, მუშენდა შხვეფს ოხვარნა (საქ.  20:35). თეს გეძინელ, ჭეშმარიტ თაყვანიშმცემლობა ხეს უნწყუნს ოჯახიშ ბედნერობას. ჩქი ბგურაფლენთ მეუღლეშ პატიცემას, ათგურობას, სქუალეფიშ ჯგირო რდუალას დო ნამდვილ ჸოროფაშ გიმორჩქინას. თეგვარო, ჭეშმარიტ თაყვანიშცემა ოხვარ იეჰოვაშ ხალხის ბედნერეფ რდან დო ართიან უჸორდან (წეკითხით ესაია 65:13, 14). *

8. მუჭო შემლებნა გიმიბრინუათ მათეშ 5:3 მუხლი, მუჟამსით ნამდვილ ბედნერობაშე ვეჩიებუთ ხალხის?

⁸ შილებენო ღორონთიშ უმშო კოჩ დასურო ბედნერ რდას? დეფიქრით: მუს მოუღ ამდღა ნამდვილ ბედნერობა? ნამთინეშო თენა რე კარიერა, სპორტი ვარდა უჸორს ფერ საქმეშ კეთება. შხვეფ ბედნერეფ თიმწკუმა რენა, მუჟამსით ოჯახიშ წევრეფშო ვარდა მეგობრეფშო ხანდენა. თე ირფელიშ კეთება სასიამოვნო რე, მარა არსებენს თეშე უმოს მნიშვნელოვან მუდგარენ, ნამუსით მარადიულ ბედნერობა მოუღ. თენა რე ჩქინ გუმაჭყაფალიშ გაჩინებაფა დო თიშ ართგურ მსახურება, ნამუშ კეთება ცხოველეფს ვეშულებნა. ღორონთიქ თეშ გუმოჭყეს, ნამდა ბედნერეფ ხვალე თიმწკუმა იპჸუაფუთ, მუჟამსით თეს გუვაკეთენთ (წეკითხით მათე 5:3). * მაგალთო, ჭეშმარიტ თაყვანიშმცემლეფს დიდ ხიოლ უღნა დო ართიანს გურშა ელუკინანა, მუჟამსით ღორონთიშ ოდიდებელო ართო იშაყარნა (ფსალმ. 133:1). თეს გეძინელ, თინეფშო სახიოლო რე, ნამდა მსოფლიო საჯიმალოშ წევრეფ რენა, აზრიანო ცხოვრენა დო ბედნერ მომავალიშ იმენდ უღნა.

9. ა) მუჭო უჯინენა ქვეყნიერებას სქესობრივ კავშირს? ბ) მუშენ რე ღორონთშო მიუღებელ ქორწინებაშ უმშო სქესობრივ კავშირი?

⁹ მუშენ რე მიუღებელ ქორწინებაშ უმშო სქესობრივ კავშირი? შილებე ნამთინექ მიწუან: „ცხოვრება სასიამოვნო რე. მუშენ ვეშილებე ქორწინებაშ უმშო სქესობრივ კავშირი?“ ქრისტიანეფ უზნეობას ქექას ვა უჯინედან ოკო. ღორონთიშ სიტყვა არგამათ იჩიებ, ნამდა იეჰოვას ვა მოწონს თენა  * (წეკითხით 1 თესალონიკელები 4:3—8). * იეჰოვას უფლება უღუ დამდგინან კანონეფი, მუშენდა თიშ გოჭყაფილეფ ვორეთ. ღორონთიშ თოლს, სქესობრივ ურთიერთობა ხვალე ჩილ დო ქომონჯ შქას რე დაშვებული. იეჰოვას ვუჸორთ დო ათეშენ მარზენა კანონეფს. თინეფიშ დაცვებას ჩქინო ჯგირობუა მოუღ. თე კანონეფს იცვენან თი ოჯახეფს, ართიანიშ მეტ ჸოროფა დო პატიცემა უღნა. თეს გეძინელ, ხოლო უმოს თხილერო გინაფლენა დუც. ღორონთ დასაჯენს არძას, მით თიშ კანონეფს გარძახ ვასრულენს (ებრ. 13:4).

10. მუჭო შეულებნა ქრისტიანეფს დუდ ეუჩილითუან უზნეობას?

¹⁰ ღორონთიშ სიტყვა მარზენა რჩევეფს, მუჭო ევუჩილითუათ დუდ უზნეობას. მაგალთო, ოკო დეფიფქრათ, მუს ვუჯინეთ. იესოქ თქუ: „მით ოსურს უჯინე დო უწესო კორნებეფ გურჩქინდუნ, თიქ უკვე ქიმრუშ თიწკუმა მუშ გურს. ათეშენ, სქან მარძგვან თოლ ქუგოჩილითუანს-და, გელენთხორ დო გეგნაჸათი“ (მათ. 5:28, 29). თაშ ნამდა, ქრისტიანეფ ვა უჯინედან ოკო პორნოგრაფიას დო ვა ურჩქილედან  უზნეო შინაარსიშ ბირეფს. მოციქულ პავლექ ქრისტიანეფს მეჭარ: „ქენაჸვილით თქვან სხეულიშ მიწიერ ნაწილეფი: სიძვა“ (კოლ. 3:5). თეს გეძინელ, ყურადღება თის ხოლო ოკო მივაქცუათ, მუს ფიფქრენთ დო მუს იფჩიებუთ (ეფეს. 5:3—5).

11. მუშენ შილებე ქრისტიანეფქ ხოლო ქიდიჭყან კარიერაშ მონწყუალაშე ფიქრი?

¹¹ კარიერაშ მონწყუალას ბედნერობა მოუღ. ბრელშო ცხოვრებაშ მთავარ მიზან თენა რე. თინეფიშ აზრით, კარიერაშ მონწყუალათ შეულებნა მიოჭირინუან მაღალ მდგომარეობას, თანამდებობას დო ქონება ხოლო ქიშუან. ბრელქ დასურო ქიმიოჭირინუ თე მიზანს, ათეშენ შილებე ქრისტიანქ ხოლო ქიდიჭყას თე საკითხშე ფიქრი.

12. მოუღუნო ბედნერობა კარიერაშ მონწყუალას?

¹² დასურო შეულებნო კარიერაშ მონწყუალას ძალაუფლება დო სახელწკუმა ართო, მარადიულ ბედნერობაშ მოღალა? მუშო ოკო რაგად, ვარ. დეფიქრით, სატანას ხოლო ოკოდ ძალაუფლება დო სახელ უღუდკო, მუდგას ქოთ ქიმიოჭირნუ, მარა თე ირფელიშ უმკუჯინუო, თინა მანგარ გარისხებულ რე დო ბედნერ შუროთ ვა რე (მათ. 4:8, 9; გამოცხ. 12:12). კარიერაშ მონწყუალას ბედნერობა ხვალე ჭიჭე ხანით მოუღ, მარა მარადიულ ბედნერობა მოუღ, მუჟამსით ხალხის ვოხვარუთ სარგებელ მიღან ღორონთიშ სიბრძნეშე. თეს გეძინელ, თე ქვეყნიერებას ონჯარნა ართიანიშ დო კარიერაშ მიოჭირნაფალო ართმაჟიას ვენდენა. მარა, მუჭოთ ბიბლია იჩიებუნ საბოლათ „თე ირფელ პოტიკ რე“ (ეკლ. 4:4).

13. ა) მუნერო ოკო ვუჯინედათ სამუშას? ბ) მუს მოუღუდ პავლეშო დიდ ხიოლ, მუჭოთ თენა თესალონიკელეფშა მეჭარილ წერილშე იძირენ?

¹³ მუშო ოკო რაგად, დუდიშ ეიოჯუმაფალო სამუშა მოსაჭირნა. მარა თენა ჩქინ ცხოვრებას პირველ ადგილს ოკო ვეგერდას. იესო იჩიებ: „მითინს ვეშიალებე რდას ჟირ ბატონიშ მონა, მუშენდა, ვარდა ართის გიჯოგუანს დო მაჟიას ქიჸოროფუანს, ვარდა ართის გვალო გეგნაჸუნუ დო მაჟიას მუთუნო ვემირჩქინანს. ვეშქალებენა ღორონთიშ მონათ რდათ დო ქონებაშ ხოლო“ (მათ. 6:24). დიდ ხიოლ მაღვენნა, მუჟამსით პირველ ადგილს ქიგვორინუანთ იეჰოვაშ მსახურებას დო თიშ სიტყვას შხვეფს ქუდვოგურუანთ. მოციქულ პავლექ თენა მუშ დუდშა გიმოცად. ქრისტიანობაშახ პავლე კარიერას მეთხოზუდ, მარა თიქ ნამდვილ ბედნერობა თიმ დროს იგინ, მუჟამსით ქიდიჭყ ღორონთიშ ცნობაშ შხვეფშა გურაფა დო ორწყედ, მუჭო თირანდ თინა ხალხიშ ცხოვრებას  (წეკითხით 1 თესალონიკელები 2:13, 19, 20). * თეცალ ბედნერობა მუთუნს ვა მაღინე.

14. მუშენ შილებე ფიქრენდას ბრელ, ნამდა ხალხის შეულებ გეგნოჭკირას მსოფლიო პრობლემეფი?

¹⁴ ხალხის შეულებ გეგნოჭკირას მუნეფიშ პრობლემეფი. თე აზრი შილებე ბრელს მოწონდას, მარა თენა თაშ ქორდასინ, ხალხის ვედესაჭირებუდ ღორონთიშ ხემძღვანელობა დო მუდგა მაკორინედესინ თის აკეთენდეს. თეს გეძინელ, ბრელ ფიქრენს, ნამდა ჩხუპი, უბადობა, ლახალა დო სიღარიბე ირკენს. ართ კვლევას მოშინაფილ რდუ: „მსოფლიოს მდგომარეობა იუჯგუშებ. თეშ ართ-ართ მიზეზ თინა რე, ნამდა ხალხი ოცად მსოფლიოქ უჯგუშიქ ქიჸუას“. მართალო შეულებუნო ხალხის მაგვარას მსოფლიო პრობლემეფი? მორთ, გუვარჩუათ მუსხირენ ფაქტი.

15. სოვრეშე იძირე, ნამდა ამდღა მსოფლიო სერიოზულ პრობლემეფიშ წოხოლე გერე?

¹⁵ ჩხუპეფი: პირველ დო მაჟია მსოფლიო ჩხუპიშ დროს 60 მილიონშე მეტ კოჩიქ ღურ. მაჟია მსოფლიო ჩხუპიშ თებაშ უკულ ხოლო ხალხის იშენით ვა დაგურუ, მუჭო ეიჩილითუან ჩხუპეფ დო თევრეშე მოჸუნაფილ 2015 წანაშახ, სოდგარენ 65 მილიონ კოც აყუ ჸუდექ დატებელქ. თეს გეძინელ, ხვალე 2015 წანას სოდგარენ 12,4 მილიონ კოჩის ქუდატებაფეს ოცხოვრებელ ადგილი. უბადობა: მინდიხას უბადობაშ ნამთინე ფორმა დარკებულ რე, მარა მანგარო იძინანს კიბერდანაშაული, ტერორიზმი დო ძალაშ გიმორნაფა ოჯახის. თეს გეძინელ, ბრელ ფიქრენს, ნამდა კორუფცია მსოფლიო პრობლემა რე. თაშ ნამდა, ხალხის ვეშიალებუ უბადობაშ მოსპუალაქ. ლახალა: მართალ რე, ნამთინე ლახალაშ სქილადა უკვე შეიოლებერ რე, მარა 2013 წანაშ ანგარიშის მოშინაფილ რდუ, ნამდა ირ წანას გურიშ ლახალათ, ინსულტით, კიბოთ, რესპირატორულ ლახალათ დო დიაბეტით 60 წანას მეჭირნაფილ 9 მილიონ კოჩ ღურუ. სიღარიბე: მსოფლიო ბანკიშ მონაცემეფით აფრიკას ხალხი მანგარ გაჭირებულო ცხოვრენს. მაგალთო, 1990 წანას თექ 280 მილიონ ღარიბ რდუ, მარა 2012 წანას თინეფიშ რიცხვიქ 330 მილიონს ქიმიოჭირნუ.

16. ა) მუშენ შეულებ ხვალე ღორონთიშ სამეფოს არძა პრობლემაშ მოსპუალა? ბ) მუ კურთხევეფ იწინასწარმეტყველეს ესაიაქ დო ფსალმუნმაბირექ?

¹⁶ ამდღა ეკონომიკა დო პოლიტიკურ ორგანიზაციეფი ეგოისტ ხალხიშ ხეს რე. მუშო ოკო რაგად, თეცალ კათას ბოლო ვა მაღებე ჩხუპეფშა, უბადობაშა, ლახალაშა დო სიღარიბეშა. თეშ კეთება ხვალე ღორონთიშ სამეფოს შეულებ. დეფიქრით მუშ კეთებას აპირენს იეჰოვა ხალხშო. ჩხუპეფი: ღორონთიშ სამეფო მოსპუნს ირფელს, მუდგაშენ ჩხუპეფ მუთმოხვადუ — კორუფციას, პატრიოტიზმის, ტყურა რელიგიას დო სატანას (ფსალმ. 46:8, 9). უბადობა: ღორონთიშ სამეფო ამდღა უკვე ოგურუანს ხალხის ართიანიშ ჸოროფას დო ნდობას, მუდგაქ ნამთინ მთავრობას ვეშიალებუ (ეს. 11:9). ლახალა: იეჰოვა ქიმეჩანს მუშ ხალხის სრულყოფილ ჯამრთელობას (ეს. 35:5, 6). სიღარიბე: იეჰოვა მოსპუნს სიღარიბეს დო ხალხი ბედნერო იცხოვრენს. თეს გეძინელ, თინეფ გეხარებნა ღორონთწკუმა ხოლოშიან ურთიერთობათ. თეცალ ცხოვრება უმოს ძვირფას რე ვინემ ქონება (ფსალმ. 72:12, 13).

17. მუჭო შემლებნა დუდ დეფცვათ ქვეყნიურ აზროვნებაშე?

¹⁷ ქოფიქრენთ, თეცალ გავრცელებულ აზრეფ თქვან რწმენას დასუსტენს-და, გეგმირკვით მუს იჩიებ ღორონთიშ სიტყვა თეშ გურშენ დო ქიმსჯელით თე საკითხეფშე გამოცდილ თანაქრისტიანეფწკუმა. დეფიქრით, მუშენ შილებე ხალხის მოწონდას თეცალ აზრეფი, მუშენ ვა რე თენა სწორ დო მუჭო შეილებ ვეიაჸუნე თის. არძას შემლებნა დუდ დეფცვათ თეცალ აზროვნებაშე პავლეშ მოჩამილ რჩევაშ გიმორნაფათ: „შხვაშთურეფს ბრძნულო მექცით დო გეგშეჸიდით თქვანო დრო . . . გიჩქუდან, მის მუნერ პასუხ მეჩათ“ (კოლ. 4:5, 6).