1. მუს ნიშნენს, კურცხას ვორდათ? (2 ტიმ. 4:5)

 ᲛᲣᲟᲐᲛᲡᲘᲗ პრობლემეფს ფხვადუთ, თექ შილებე გეგმოცადას იეჰოვაშ დო თიშ ორგანიზაციაშ მიმართ ჩქინ ართგურობა. მუჭო შემლებნა გივორჯგინათ თინეფს? საჭირო რე, ვორდათ კურცხას დო ვა ვოდინუათ ძალიერ რწმენა (წეკითხით 2 ტიმოთეშ 4:5). ჩქი კურცხას ვორეთ, მუჟამსით ვა ვოდინუანთ სიმშვიდეს, სწორას ვაზროვნენთ დო ვოცადუთ, საკითხეფს იეჰოვაშ თოლით უჯინათ. თაშ ქიმიფქციებუთ-და, ემოციეფს ვევაჸუნუთ.

2. მუს გუვარჩიენთ თე სტატიას?

² ულირ სტატიას გუვარჩით სუმ სირთულე, ნამდგას შილებე კრებაშ გალე შეფხვადათ. თე სტატიას ქიფჩიებუთ შხვა სუმ სირთულეშ გურშენ, ნამდგაქ შილებე კრებაშ დინახლე მოხვადას დო გეგმოცადას იეჰოვაშ მიმართ ჩქინ ართგურობა. თენა რე: 1) მუჟამსით თანაქრისტიანეფ გლახათ მოქცუნა, 2) მუჟამსით ჩქინ მიმართ აღმზრდელობით ზომეფს გიმირინუანა დო 3) მუჟამსით ძნელ მაფნა, მივაჸუნათ ორგანიზაციულ ცვლილებეფს. მუჭო შემლებნა ვორდათ კურცხას დო ვა ვოდინუათ იეჰოვაშ დო თიშ ორგანიზაციაშ ართგურობა თეცალ სირთულეეფიშ დროს?

3. მუ ოკო ვაკეთათ, მუჟამსით ფიფქრენთ, ნამდა თანაქრისტიანქ გლახათ მიმექცის?

³ დღას ხომ ვა უწყინუაფ თანაქრისტიანს თქვანდა? მაგალთო, პასუხიშმგებელ ჯიმას? შილებე თეშ კეთება სპეციალურო ვაკოდკო (რომ. 3:23; იაკ. 3:2). მარა თიშ თეცალ საქციელქ გურ მანგარო ქელგოჭვეს დო თეშე ფიქრიქ ლურ ხოლო გოიტახეს. შილებე გაიკვირდან დო თქუათ: „პასუხიშმგებელ ჯიმა თაშ იქციებუნ, ქორენო თენა სინამდვილეს ღორონთიშ ორგანიზაცია?“.  სატანას ხოლო ზუსტას თაშ ოკო, მოფიქრებაფუან (2 კორ. 2:11). თეცალ უარყოფით ფიქრეფქ შილებე გენკმოჸოთან იეჰოვას დო თიშ ორგანიზაციას. მუჟამსით ფიფქრენთ, ნამდა თანაქრისტიანქ გლახათ მიმექცის, მუჭო შემლებნა კურცხას ვორდათ დო დუდ ევუჩილითუათ საზიანო აზრეფს?

4. მუქ მეხვარ იოსების, კურცხას რდუკო, მუჟამსით გლახათ მექცის დო მუშ გურაფა შემლებნა თიშ მაგალითშე? (დაბ. 50:19—21)

⁴ გურქ ვა მოირთან. მუჟამსით იოსებ ბაღანაბოშ რდჷ, უნჩაშ ჯიმალეფქ გლახათ მექცის თის. თინეფს ჯოგდეს იოსებ დო ნამთინეს თიშ ჸვილუა ხოლო ოკოდ (დაბ. 37:4, 18—22). საბოლათ თინეფქ მონათ გეგმოჩეს ჯიმა. შედეგო, 13 წანაშ დინახალე იოსებიქ ბრელ სირთულეს შეხვად. თინა შილებე ფიქრენდკო, მართალო ქოუჸორდჷ დო ვარ იეჰოვას დო შილებე მანგარო უკვენდკო, მუშენ მიოტუ იეჰოვაქ თიცალ დროს, მუჟამსით არძაშ უმოსო ოსაჭირუდ თიშ ელარნა. მარა იოსების გურ ვა მორთუმ. თეშ მანგიორო, სიმშვიდე ვა უდინუაფ დო თეშნერო კურცხას რდჷ. მუჟამსით საშვალებაქ ქიმიაჩ, მანგიორ გეგნუგკო ჯიმალეფს, თიქ თენა ვაკეთ, თეშ მანგიორო, ჸოროფა გეგმირჩქინ დო აპატუ თინეფს (დაბ. 45:4, 5). მუქ მეხვარ იოსების, თაშ მიქცუკო? თინა სწორას აზროვნენდჷ. მთელ ყურადღებაშ მუშ პრობლემეფშა გინოღალაშ მანგიორო, საკითხის იეჰოვაშ თოლით უჯინედ (წეკითხით დაბადებაშ 50:19—21). მუს ბგურაფლენთ თავრეშე? გლახათ ქიმმექცის-და, იეჰოვაშე ნაწყენქ ვა დოფსქიდათ დო ვეფიფქრათ, ნამდა თიქ მიმოტეს. თეშ მანგიორო, ქიფიფქრათ თიშე, მუჭო მიმეხვარეს იეჰოვაქ სირთულეეფიშ გერჯგინას. თეს გეძინელ, მუჟამსით შხვეფ გლახათ ქიმმექციებნა, ქივეცადათ, თინეფიშ არასრულყოფილება ჸოროფათ გეგნოფობრათ (1 პეტ. 4:8).

5. მუქ მეხვარ მიკეასის, კურცხას რდუკო, მუჟამსით ფიქრენდჷ, ნამდა გლახათ მექცის?

⁵ გუვარჩუათ სამხრეთ ამერიკას მახორუ ართ უხუცეს ჯიმაშ, მიკეასიშ, b შემთხვევა. თინა იშინანს, ნამდა ნამთინე უხუცესიქ, მუშ გინაჯინშე, უხეშო მექცუ დო იჩიებ: „თეცალ გლახათ დღას ვამგინაფ დუდ, მანგარ ნაწყენ ვორდჷ, სერით ვა ბლურდჷ დო იმნგარდჷ, მუშენდა მუთუნ ვა მათირედ“. მარა მიკეას იშენით კურცხას რდჷ დო ოცადუდ, გაკონტროლკო მუშ გრძნობეფ. თინა ხშირას ლოცულენდჷ, იეჰოვას თხინდჷ წმინდა შურს დო ძალას, ნამდა ქუგურზკო. თეს გეძინელ, ჩქინ პუბლიკაციეფს ხოლო გორუნდჷ ინფორმაციას, ნამდგას შეულებუდ თიშ მოხვარა. მუს ბგურაფლენთ თავრეშე? თანაქრისტიანეფქ გლახათ მიმექცისინ თეს ქოფიფქრენთ-და, ქივეცადათ, ვა ვოდინუათ შინაგან სიმშვიდე დო უარყოფით გრძნობეფქ გომრჩქინდეს-და, გუვაკონტროლათ თინეფ. შილებე ვამჩქუდან, მუ სიტუაცია უღუდ თის, მიდგაქ სიტყვათ ვარდა საქმეთ მოწყინებაფეს. ქუდურაგადუათ იეჰოვას ლოცვას დო ქოფთხუათ, ქიმმეხვარან, ნამდა სიტუაციას თი თანამორწმუნეშ თოლით ქუჯინათ. თეშნერ მოქციება მიმეხვარებნა, ვეფიფქრათ, ნამდა თანაქრისტიანს შეგნებულო ოკოდ ჩქინდა მუდგარენ გლახაშ კეთება დო შემალებენა ვაპატუათ თის (იგავ. 19:11). ფშუდან, იეჰოვას ჯგირო უჩქჷ ჩქინ სიტუაცია დო საჭირო ძალას ხოლო ქომჩანა, ნამდა ქუგურზათ (2 მატ. 16:9; ეკლ. 5:8).

6. მუშენ რე მნიშვნელოვან, მარჩქილედან, ნამდა აღმზრდელობით ზომეფშე იეჰოვაშ ჸოროფა იძირე? (ებრ. 12:5, 6, 11)

⁶ აღმზრდელობით ზომეფიშ გიმორნაფას, შილებე ემოციურ ჭუაქ ქუმაჸუნას. მთელ ყურადღებას თე ჭუაშა გეგნიბღანთ-და, შილებე იფიფქრათ, ნამდა თე ირფელ უსამართლობა რდჷ ვარდა მანგარ მკაცრას მიმექცის. შედეგო, შილებე გენკმოჩირთან თიქ, მუთ არძაშ უმოს მნიშვნელოვან რე —  თე აღმზრდელობით ზომეფშე იეჰოვაშ ჸოროფა იძირე (წეკითხით ებრაელეფიშ 12:5, 6, 11). ემოციეფს გევაჸუნით-და, სატანას ქიმეფჩანთ საშვალებას, თინა მუშ სამოგებოთ გეგმირინუას. თის ოკო, ვედვემორჩილათ თე აღმზრდელობით ზომეფს დო, მუთ ხოლო უმოს უფრაშ რე, გენკმოჸოთან იეჰოვას დო კრებას. თქვან მიმართ აღმზრდელობით ზომეფს ქირინუანან-და, მუჭო შეილებნა რდათ კურცხას?

7. ა) მუჭო გიმირინუ იეჰოვაქ პეტრე თიშ უკულ, მუთ თიქ აღმზრდელობით ზომეფს მიაჸუნ, მუჭოთ თენა სურათის რე მოჩამილ? ბ) მუს ბგურაფლენთ პეტრეშ მაგალითშე?

⁷ მიაჸუნით აღმზრდელობით ზომეფს დო გაკეთით საჭირო ცვლილებეფ. მუსხირენშა რდჷ შემთხვევა, მუჟამსით იესოქ შხვა მოწაფეეფიშ წოხოლე მეჩჷ პეტრეს შენიშვნა (მარ. 8:33; ლუკ. 22:31—34). შილებე პეტრექ მანგარ უხერხულო იგინკო დუდ, მარა თიქ ქუდოსქიდ იესოშ ართგურქ, მიაჸუნ აღმზრდელობით ზომეფს დო ქიდიგურუ მუშ შეცდომეფშე. შედეგო, იეჰოვაქ აკურთხჷ თინა გიმორჩქინელ ართგურობაშენ დო მნიშვნელოვან პასუხიშმგებლობეფ ქიმეჩ კრებას (იოან. 21:15—17; საქ. 10:24—33; 1 პეტ. 1:1). მუშ გურაფა შემლებნა პეტრეშ მაგალითშე? ქოთ ჩქინდა დო ქოთ შხვეფშა ჯგირობუა მოუღ, მუჟამსით მთელ ყურადღებას წყენაშა ვარინ, აღმზრდელობით ზომეფშა გინიბღანთ, იფთვალისწინენთ შენიშვნეფს დო ვაკეთენთ საჭირო ცვლილებეფს. თაშ ქიმიფქციებუთ-და, იეჰოვას დო და დო ჯიმალეფს უმოსო გეგმვოდირთუთ.

8, 9. მუს გინაფლენდჷ ბერნარდო აღმზრდელობით ზომეფიშ გიმორნაფაშ უკულ, მარა მუქ მეხვარ, თის სწორას ქიდიჭყკო ფიქრ?

⁸ გუვარჩუათ მოზამბიკის მახორუ ართ ჯიმაშ, ბერნარდოშ, შემთხვევა. თის უხუცესობაქ მანწყჷ. მუჭო გინაფლენდჷ თინა დუდის? ბერნარდო იჩიებ: „მანგარ ნაწყენ ვორდჷ, მუშენდა შურო ვა მობწონდჷ თი აღმზრდელობით ზომეფ, ნამუთ ჩქიმ მიმართ გიმირინეს“. თის თინა ხოლო აწუხენდჷ, მუნერ დამოკიდებულება აღვენუდეს შხვეფს კრებას მუშ მიმართ. ბერნარდო გეუძინანს: „თუთეფქ დემესაჭირ, ნამდა სიტუაცია იეჰოვაშ თოლით შევაფასკო დო კინ დიფრთინეკო თიშ დო ორგანიზაციაშ მიმართ ნდობა“. მუქ მეხვარ ბერნარდოს, დითირუკო დამოკიდებულება?

⁹ თიქ სწორას ქიდიჭყჷ ფიქრ. თინა იჩიებ: «უხუცესო მსახურებაშ დროს ებრაელეფიშ 12:7-ის შხვეფშა თიშ ოძირაფალო იბრინუანდჷ, ნამდა იეჰოვაშ აღმზრდელობით ზომეფიშ მიმართ სწორ დამოკიდებულება უღდესკო. ასე ჩქიმ დუდის ვოკითხუდ: „მიქ ოკო მიაჸუნას თე მუხლის მოჩამილ  სიტყვეფს?“. იეჰოვაშ არძა მსახურქ, თინეფ შქას მა ხოლო». უკულ ბერნარდოქ გეგნოდგჷ ნაბიჯეფ, ნამდა დირთინუკო იეჰოვაშ დო თიშ ორგანიზაციაშ მიმართ ნდობა. თიქ უმოს დრო გეგმურთჷ ბიბლიაშ კითხირს დო ნაკითხირშე ტომბაშე ფიქრის. მართალ რე, დიო ხოლო აწუხენდჷ, მუნერ დამოკიდებულება უღდეს და დო ჯიმალეფს თიშ მიმართ, მარა იშენ თინეფწკუმა ართო მსახურენდჷ დო შეხვალამეფს მონაწილებას ღებულენდჷ. დროშ მიკულაშ უკულ თიქ კინ დენიშნჷ უხუცესო. ბერნარდოცალო, თქვან მიმართ ხოლო აღმზრდელობით ზომეფ გეგმირინეს-და, ქეცადით, წყენა გურშა ველედვათ, მიაჸუნათ რჩევას დო გაკეთათ საჭირო ცვლილებეფ c (იგავ. 8:33; 22:4). თაშ ქიმიქციებუთ-და, დარწმუნებულ რდათ, იეჰოვა აკურთხენს თქვან ართგურობას, ნამუთ ორგანიზაციაშ დო თიშ მიმართ გიმირჩქინით.

10. ნამ ორგანიზაციულ ცვლილებაქ შილებე გიმოცადკო ნამთინე ისრაელ ქომოლკოჩიშ ართგურობა?

¹⁰ ორგანიზაციულ ცვლილებეფქ შილებე გეგმოცადას ჩქინ ართგურობა. კურცხას ვეპჸით-და, შილებე თიქ იეჰოვას ხოლო გენკმოჸოთან. მაგალთო, დეფიქრით, მუჭო იმოქმედ მოსეშ კანონით მუდგარენეფიშ თირუაქ ნამთინე ისრაელშა. სოიშახ თე კანონ იჸუაფუდ, მღვდელეფიშ საქმეს ოჯახიშ დუდეფ ასრულენდეს. თინეფ აშენენდეს სამსხვერპლოეფს დო მუნეფიშ ოჯახიშ სახელით მსხვერპლის წირენდეს იეჰოვას (დაბ. 8:20, 21; 12:7; 26:25; 35:1, 6, 7; იობ. 1:5). მარა კანონიშ მიშულაშ უკულ თინეფს უკვე ვა უღდეს თეშ კეთებაშ უფლება. იეჰოვაქ მღვდელეფ დანიშნჷ აარონიშ ოჯახშე, ნამდა მსხვერპლ შეწირესკო თის. თე ორგანიზაციულ ცვლილებაშ მიშაღალაშ უკულ ოჯახიშ დუდ, ნამუთ აარონიშ გამნარყშე ვა რდჷ, მღვდელიშ საქმეს იშენით შეასრულენდ-და, თიქ ოკო დოღურკო d (ლევ. 17:3—6, 8, 9). თენა ხომ ვა რდჷ ართ-ართ მიზეზ, მუდგაშ გურშენ კორახიქ, დათანქ, აბირამქ დო 250 დუდკოჩიქ მოსე დო აარონიშ წინააღმდეგ იდეს? (რიცხ. 16:1—3). ზუსტას ვა მარაგადენა. მიზეზ მუდგა ვა რდუკონ, კორახიქ დო თიშ მხარეს რდესინ თინეფქ ოჭიშ ქურთინეს იეჰოვას. ორგანიზაციულ ცვლილებეფ სქან ართგურობას ქიგმოცადუნს-და, მუ ოკო ქიმნე?

11. მუშ გურაფა შემლებნა ნამთინე კეჰათელ ლევიანიშ მაგალითშე?

¹¹ სრულას დუკინით ხუჯ ორგანიზაციულ ცვლილებეფს. მუჟამსით ისრაელეფ უდაბნოს რდეს, კეჰათელეფს უღდეს განსაკუთრებულ დავალება. ირო, მუჟამსით ისრაელეფს კარავ აფდეს გინაღალარ, ნამთინე კეჰათელს შეთანხმებაშ კიდობან ხალხიშ წოხოლე მეუღუდ (რიცხ. 3:29, 31; 10:33; იეს. 3:2—4). თენა მართალო დიდ პატი რდჷ, მარა თე ირფელქ დითირ, მუჟამსით ისრაელეფქ დუნაპირებ ქიანაშა გენორთეს. კიდობანიშ გინოღალა რეგულარულო უკვე საჭირო ვა რდჷ. მეფე სოლომონიშ მართველობაშ დროს კეჰათელეფს შხვა დანიშნულება უღდეს. თინეფშე ნამთინე რდჷ მაბირე, ნამთინე — კარმინოლიშ მცველ დო შხვეფს საწყობიშ მიკოჯინა ოვალუდ (1 მატ. 6:31—33; 26:1, 24). სოთინ ვა რე მოჩამილ, ნამდა კეჰათელეფქ, ულირს დიდ პატი უღდესინ თიშ გურშენ, მითხის ვარდა ჩიულ დიჭყეს, ნამდა უმოს მნიშვნელოვან საქმე დავალესკო. მუს ბგურაფლენთ თავრეშე? მთელ გურით ქუდუკინით ხუჯ იეჰოვაშ ორგანიზაციას ხვადუნ თი  ცვლილებეფს, თინეფ შქას თი არძა ცვლილებას, ნამუთ თქვან დანიშნულებას ოხუ. ხიოლით მიღით ნებისმიერ დანიშნულება, ნამდგას მერჩანა. რშუდან, დანიშნულებაშ თირუა ვა ნიშნენს თის, ნამდა იეჰოვაშ თოლს ფას გაფნა დინაფილ. იეჰოვა თქვან მორჩილებას უმოსო აფასენს, ვინემ ნებისმიერ დანიშნულებას (1 სამ. 15:22).

12. მუჭო გინაფლენდჷ ზაინა დუდის, მუჟამსით დანიშნულებაქ დათირ?

¹² გუვარჩუათ ართ დაშ ზაინაშ მაგალით, ნამდგას დათირ დანიშნულებაქ, მუთ მანგარ ძვირფას რდჷ თიშო. თინა 23 წანაშე მეტ ხანს ბეთელს მსახურენდჷ, მარა ასე მსახურებაშ შხვა სფეროშა იჸუ გოტებულქ. ზაინა იჩიებ: «დანიშნულებაშ თირუაქ ჩქიმდა მანგარო იმოქმედ, დუდის თეშ ბგინაფლენდჷ, ითამ მუთუნ საქმეშო ვაგმობდირთუდ დო ჩქიმ დუდის ვოკითხუდ: „მუ დუვაშე?“». სანარღოთ, კრებას და დო ჯიმალეფ თიშ ჭუას ხოლო ჭუას გეუძინანდეს, მუჟამსით ურაგადდეს: „საქმეს ოსაჭირუნ თიცალ ჯგირ ქორდკონ, ბეთელშე ვა გიოტენდეს“. მინშა ზაინას გურ აფუდ გოტახილ დო ირ სერს ინგარდჷ, მარა თინა იჩიებ: „დღას ვემემჩამ ჩქიმ დუდშა თიშ უფლება, ნამდა ეჭვ გემშებღკო ორგანიზაციაშა დო იეჰოვაშ ჸოროფაშა“. მუჭო შეიალებუ ზაინას ჸოფედკო კურცხას?

13. მუ აკეთ ზაინაქ, ნამდა გიორჯგინკო უარყოფით გრძნობეფს?

¹³ ზაინას შეიალებუ გიორჯგინკო უარყოფით ფიქრეფს. თიქ ჩქინ პუბლიკაციეფს წეკითხჷ სტატიეფ, ნამუთ დაკავშირებულ რდჷ მუშ სირთულეწკუმა. თის მანგარო მეხვარ 2001 წანაშ 1 ფრევალიშ „გინაჯინალ კოშკიშ“ სტატიაქ: „სი შეილებ გიორჯგინე გურიშგოტახუას!“ [ქორთ.]. თე სტატიას ენწყუმილ რე, ნამდა ბიბლიაშ ართ-ართ მაჭარალს, მარკოზის, ხოლო შილებე უღუდკო თეცალ გრძნობეფ, მუჟამსით დანიშნულებაქ დათირ. ზაინა იშინანს: „მარკოზიშ მაგალითიქ წამალცალო იჸუ ჩქიმო“. თეს გეძინელ, ზაინას ვემუტებ მეგობრეფწკუმა ხოლოშიან ურთიერთობა დო ვაცადუდ, ხვალე ქუდოსქიდკო. თინა ვეცოდილუანდჷ მუშ დუდის. თიქ ჯგირო ქიმეხვად, ნამდა იეჰოვაშ წმინდა შურ ხემძღვანელენდჷ თიშ ორგანიზაციას დო პასუხიშმგებელ ჯიმალეფ ხოლო მზრუნველობას ვარკენდეს. თეს გეძინელ, თის ხოლო ქიმეხვად, ნამდა იეჰოვაშ ორგანიზაციაშო არძაშ უმოს მნიშვნელოვან რე, ირფელ გაკეთას თიშ საქმეშ შეიოსრულებერო.

14. ნამ ორგანიზაციულ ცვლილებაშ მეჸუნაქ გუჭირდჷ ვლადოს დო მუქ მეხვარ თის?

¹⁴ სლოვენიას მახორუ 73 წანერ უხუცესშო, ვლადოშო, მანგარ ძნელქ იჸუ, მუჟამსით  თიშ კრებაქ შხვა კრებაწკუმა გეერთიან დო დარბაზ, სოდეთ თიშ კრება იშაყარუდ, დოკილეს. თინა იჩიებ: „ვა მარჩქილედ, თეცალ სქვამ დარბაზ მუშენ ოკო კილესკო. გურს მანგარო მაჭუდ, მუშენდა თიშ რემონტუა ამარდე ვათეთ. ჯაშ მოხელე ვორექ დო თექ მუდგარენეფ ჩქიმ ხეთ მაფუდ ნაკეთებ. თეწკუმა ართო, თეს ბრელ ცვლილებაქ ქუმაჸუნ, მუთ ჩქინო, ხანშამიშულირეფშო, ვა რდჷ ადვილ“. მუქ მეხვარ ვლადოს, ხუჯ დუკინკო მითითებეფს? თინა იჩიებ: „იეჰოვაშ ორგანიზაციაშე მეღებულ ცვლილებეფიშ დოჸუნას ირო კურთხევეფ მოჸუნს. თენა მამზადენა უმოს დიდ ცვლილებეფშო, ნამუთ მომავალს მელნა“. ხომ ვა გოძნელნა თიცალ ცვლილებეფიშ მეჸუნა, მუნერით რე კრებეფიშ გაერთიანება ვარდა დანიშნულებაშ თირუა? დარწმუნებულ რდათ, იეჰოვას არჩქილე თქვან გრძნობეფ. მუჟამსით ხუჯის დუკინენთ თეცალ ცვლილებეფს დო ვადინუანთ იეჰოვაშ დო თიშ ორგანიზაციაშ მიმართ ართგურობას, აუცილებერო მიღენთ კურთხევეფს (ფსალმ. 18:25).

15. მუჭო შემლებნა კურცხას ვორდათ, მუჟამსით კრებაშ დინახლე ფხვადუთ სირთულეეფს?

¹⁵ მუთ უმოს ხოლოს ვორეთ თე ქვეყნიერებაშ აღსასრულწკუმა, თით უმოსო ველუთ სირთულეეფს კრებაშ დინახლე. თე სირთულეეფქ შილებე იეჰოვაშ მიმართ ჩქინ ართგურობა გეგმოცადას. ათეშენ საჭირო რე, კურცხას ვორდათ. თანაქრისტიანქ გლახათ ქიმგექცის-და, გურშა წყენა ველედვათ; თქვან მიმართ აღმზრდელობით ზომეფ გეგმირინეს-და, მთელ ყურადღება წყენაშა ვარინ, თიშა გეგნიღით, ნამდა მიაჸუნათ მითითებეფს დო გაკეთათ საჭირო ცვლილებეფ. დო, მუჟამსით იეჰოვაშ ორგანიზაციაშე ღებულენთ ცვლილებეფს, ნამუთ პირადო გოხუნა, მთელ გურით მიაჸუნით თის დო დემორჩილით მითითებეფს.

16. მუჭო შეილებ ვადინუე იეჰოვაშ დო თიშ ორგანიზაციაშ მიმართ ნდობა?

¹⁶ თქვა შეილებნა ვადინუათ იეჰოვაშ დო თიშ ორგანიზაციაშ მიმართ ნდობა, მუჟამსით თქვან ართგურობა გიმიცადებ. მარა თაშ თიმწკუმა მიქციებუთ, მუჟამსით იჸუაფუთ კურცხას, მუთ ნიშნენს, ვადინუათ სიმშვიდე, გიღდან სწორ აზროვნება დო საკითხეფს იეჰოვაშ თოლით უჯინათ. გინოჭყვიდილ გაფდან, გეგმირკვიათ ბიბლიას მოჩამილ პიროვნებეფიშ შემთხვევეფ, მიდგაქ გიორჯგინეს თეცალ სიტუაციეფს დო ქიფიქრათ თინეფიშ მაგალითეფშე. ლოცვას მოხვარა ქოთხით იეჰოვას, ვენიკილათ თქვან დუდ დო გიღდან და დო ჯიმალეფწკუმა ურთიერთობა. შედეგო, მუდგაქ ვა მოხვადასინ, სატანას ვეშიალებე განგკოჸოთან იეჰოვას დო თიშ ორგანიზაციას (იაკ. 4:7).