სოიშახ გეჩიებდათ, მუქ მოხვად უკულ, თეიშახ ქოიწინთ, მუჭო დიბჭყჷ სრულ დროთ მსახურება.

დებაბდჷ 1942 წანას კარიბიშ სქვამ კუნძულს, კიურასაოს. ჩქიმ მუმა სურინამშე რდჷ, მარა თიქ ომუშებშა გინორთჷ თე კუნძულშა. მუაჩქიმქ ჩქიმ დაბადებაშახ ჟირ წანათ ადრე ინათ. თინა ართ-ართ პირველ რდჷ კიურასაოს ნათილ იეჰოვაშ მოწმეეფშე. a მუაჩქიმ ირ მარას მოგურუანდეს სქუალეფს ბიბლიას. ჩქინ ხეს თიშო თეშ კეთება ირო ვა რდჷ ადვილ. 14 წანერ ვორდინ თეშ მუაჩქიმქ მთელ ოჯახ კინ სურინამშა მიდამიჸონეს, ნამდა ხანშამიშულირ დიდას ქიმკაჯინკო.

სურინამს კრებას თი ახალგაზრდა და დო ჯიმალეფწკუმა ქიდიბჭყჷ ურთიერთობა, მით მთელ გურით ომსახურუდ იეჰოვას. თინეფ მუსხირენ წანათ რდეს ჩქიმ უნჩაშ დო პიონერეფო მსახურენდეს. მუჟამსით თი შემთხვევეფიშ გურშენ იჩიებდეს, ნამუთ მსახურებას უღდეს, თოლეფ ხიოლით ურწკინუნდეს. შეხვალამეფიშ უკულ მა დო ჩქიმ მეგობრეფ ბიბლიურ თემეფშე იფჩიებუდით. მინშა თეცალ ჩიებაშ დროს გალე ვოხედით დო მურიცხეფით მოჭკადილ ცას ელვოჯინედით. თინეფქ ქიმმეხვარეს, ქიმეფხვადკო, მუ მოკოდ ცხოვრებას — მოკოდ, ვემსახურკო იეჰოვას. ათეშენ 16 წანერ ვორდინ თეშ დიბნათ. უმოს გვიანო, 18 წანა თებულ მაფუდ, მუჟამსით პიონერობა დიბჭყჷ.

ბრელ მუდგარენქ, მუთ პიონერობაშ დროს დიბგურე, მთელ სრულ დროთ მსახურებაშ დროს გიმმოდირთჷ. მაგალთო, ართ-ართ პირველ, მუთ დიბგურე, თინა რდჷ, მუსხით მნიშვნელოვან რე შხვეფიშ მომზადება. მუჟამსით პიონერო მსახურება დიბჭყჷ, ართ-ართ მისიონერქ, ვილემ ვან სელიქ, ჩქიმ მიმართ პირად ინტერეს გეგმირჩქინ. b თიქ  ბრელ მუდგარენ დუმოგურუ თიშ გურშენ, მუჭო შევასრულე თეოკრატიულ პასუხიშმგებლობეფ. თი დროს დიო ხოლო ვა მარჩქილედ, მუსხით მოსაჭირუდ თეცალ მომზადება. უკულიან წანას სპეციალურ პიონერო დებნიშნჷ დო ქიდიბჭყჷ თი ჯგუფეფიშ ხემძღვანელობა, ნამუთ სურინამიშ ტროპიკულ ტყალეფს, შხვა კრებეფშე შორს რდჷ. მანგარო ვაფასენქ თი მომზადებას, ნამუთ ჯიმალეფშე მიბღჷ. თევრეშე მოჸუნაფილ გინოჭყვიდილ მაფუდ, მივაჸუნკო თინეფიშ მაგალითის დო მუვამზადკო შხვეფ.

მაჟია გაკვეთილ, მუთ დიბგურე, თინა რდჷ, ნამდა იფცხოვრიკო უბრალო ცხოვრებათ დო ირფელ ჯგირო მაფუდკო დაგეგმილ. ირ თუთაშ დაჭყაფუს მა დო ჩქიმ პარტნიორქ ოკო გეგმობჭარითკო, მუ დემესაჭირებდეს უკულიან მარეფს. თეშ უკულ ართ-ართიქ ოკო მიდაფრთითკო დედაქალაქშა, ნამუთ მანგარ შორს რდჷ დო ქიპჸიდითკო საჭირო მუდგარენეფ. საჭირო რდჷ, ჩქინ ირთუთიან შემწეობა გონივრულო გუვანაწილითკო, ნამდა თიქ თუთაშ ბოლოშახ ქომბაღესკო. თე ტროპიკულ ტყალეფს მუთუნ ქეშმელიებდეს-და, მუსხირენ ადამიან ვარდა ართ-ართ იშენ ქიმმეხვარებდეს. დარწმუნებულ ვორექ, ნამდა ახალგაზრდობას ნაგურეფ უბრალო დო ჯგირო დაგეგმილ ცხოვრებაქ მიმეხვარ, მთელ ცხოვრებას მთავარ ყურადღება იეჰოვაშ მსახურებაშა მაფუდკო გინოღალირ.

მასმა გაკვეთილ, მუთ დიბგურე, თინა რდჷ, ნამდა ხალხშა მუნეფიშ მშობლიურ ნინაშა გურაფას ჯგირობუა მოუღ. მა იფჩიებუდ ჰოლანდიურ, ინგლისურ, პაპიამენტო დო სრანანტონგო (თე ნინას სრანანის ხოლო უძახნა)

ნინეფშა, ნამუთ სურინამს გავრცელებურ რდჷ. მარა ქობძირ, ნამდა შქა ტროპიკულ ტყალეფს ხალხ უმოს უჯგუშო ირჩქილუაფუდ სახიოლო ამბეს, მუჟამსით თინეფიშ მშობლიურ ნინაშა უქადაგენდით. თინეფიშ ნინეფშა ჩიება ვა რდჷ ადვილ, მაგალთო, სარამაკანი ნინაშა, ნამდგას მაღალ დო დაბალ ტონ ოკოდ. მარა თენა ღირუდ მონდომაშა. ართ წანაშ დინახალე შემალებუ ბრელ ადამიანს ქუდვოგურეკო ჭეშმარიტება, მუშენდა თინეფიშ მშობლიურ ნინაშა იფჩიებუდ.

მუშო ოკო რაგად, ბრელ უხერხულ შემთხვევა ხოლო მიღუდ. მაგალთო, ართშა სარამაკანი ნინაშა მორაგადე ოსურკოჩის, ნამუთ ბიბლიას გურაფლენდჷ, მოკოდ, ბკითხკო, მუჭო გინაფლენდჷ დუდის, მუშენდა თის ქვარას აჭუდ. მარა გიშართჷ, ნამდა მიკითხირ, ორსულო ხომ ვა რექია. მართალ ქოიწუათინ, თიქ ხოლო უხერხულს ქინოლ. თეცალ შეცდომეფიშ უმკუჯინუო, იშენით ვოცადუდ, ხალხის მუნეფიშ მშობლიურ ნინაშა ქუდურაგადეკო.

1970 წანას რაიონულ ზედამხედველო დებნიშნჷ. თიმ წანას ბრელ ჯგუფის, ნამუთ ტროპიკულ ტყალეფს რდჷ, ვოძირანდჷ სლაიდეფს სათაურით: „იეჰოვაშ მოწმეეფიშ მსოფლიო მთავარ სამართველოშ მონახულება“. ათეშენ მა დო ხოლო შხვა ჯიმალეფ ჯაშ ჭიფე ნავით გეპჸუნდით მალწყარეფს, ნამუთ შქა ტყას რდჷ. თე ნავშა გემძუდეს დვიჟოკ, ბენზინიშ ბაკ, ნავთიშ ლამპეფ დო სლაიდეფიშ ოძირაფალ მოწყობილობა. კუნძულშა ქიმიფშითინ, თე ირფელ უკვე შხვა საშვალებათ მაფდეს მიოღალარ დანიშნულებაშ ადგილშა. თე მოგზაურობეფშე არძაშე უმოსო თიქ დემემახსოვრჷ, მუჭო მოწონდჷ ხალხის თე პროგრამეფიშ ჯინა. ჩქიმდა ბედნერობა მოუღუდ ხალხშა იეჰოვაშ დო თიშ ორგანიზაციაშ მიწიერ ნაწილიშ გურშენ გურაფას.  იეჰოვაშ საქმეშ გურშენ კეთებულ ჩქიმ ფიზიკურ მსხვერპლშე ბრელით უმოს რდჷ თი სულიერ კურთხევეფ, ნამუთ მიბღჷ.

მართალ რე, დაუქორწინებლობა მსახურებას ბრელიშ კეთებაშ საშვალებას მარზენდჷ, მარა იშენით ბგინაფლენდჷ, ნამდა დამხმარე მოსაჭირუდ. ათეშენ კონკრეტულო ქიდიბჭყჷ ლოცვა, ნამდა ქობძირკო თიცალ პიროვნება, მით ხიოლით ქუგურზუდ თი სირთულეეფს, ნამუთ შქა ტროპიკულ ტყალეფს მსახურებას მოჸუნდჷ. სოდგარენ ართ წანაშა ურთიერთობა ქიდიბჭყჷ ართ სპეციალურ პიონერ დაწკუმა, ეთელწკუმა, მით დუდის ვა ზოგენდჷ იეჰოვაშ საქმეშო. ბაღანობაშე ეთელს მანგარო მოწონდჷ პავლე მოციქულიშ მაგალით დო ოკოდ, მუთ შეულებუდუნ ირფელ გაკეთკო მსახურებას. ჩქი 1971 წანაშ სექტემბერს დეფქორწინით დო ქეშუდირთით რაიონულ მსახურებას, მუჭოთ წყვილქ.

ეთელქ თიცალ ოჯახის ირდჷ, სოდეთ მატერიალურო ბრელ მუთუნ ვა უღდეს. ათეშენ, თის ვა გაჭირებ ტროპიკულ ტყალეფს გილმალ მსახურება. მაგალთო, ტროპიკულ ტყალეფშა მონახულებაშა მიფშითინ, ბრელ მუთუნ ვა მემღუდეს. ჩქი ბარგის მალწყარს ბნახუნდით დო თექ იბომნდით. თეს გეძინელ, ბჭკუმუნდით თი ირფელს, მუდგას ჯიმალეფ მარზენდეს — იგუანეფს, პირანიეფს ვარდა შხვა მუდგარენეფს, მუთ შქა ჯუნგლეფს ვარდა მალწყარეფს იშიდ. მინშა სენ ვამღუდესინ თიშენ, ბანანიშ ფურცელს გივოჭკუმანდით დო ხამ დო ვილკა ვამღუდესინ თიშ გურშენ, ხეთ ბჭკუმუნდით. მა დო ეთელ ვორწყედით, ნამდა თი მსხვერპლ, ნამდგას იეჰოვაშ გურშენ ვორთუდით, მოხვარდეს, უმოს გაერთიანებულ ვორდითკო „სუმფა ძაფის“ (ეკლ. 4:12). მუთუნშა ვა გოფთირანდით თე გამოცდილებას.

ართ დღას, მუჟამსით კინ თე ტერიტორიაშა დიფრთით, ნამდა და დო ჯიმალეფ ქიბძირეთკო, თი შემთხვევაქ შეფხვადეს, ნამუთ ბიოგრაფიაშ დაჭყაფუს მიფშინე. მუჭოთ ნავიშ პიჯიქ გიმე მიდართჷ დო ნწყუალა ქიდიჭყჷ, წყარქ ხეთეშე ჟი გემოჸოთეს. საბედნეროთ სამაშველო ჟილეტეფ მიკმოქუნდეს დო ვართ  ნავშე გინომნთხაფეთ. მარა ნავ წყარით იფშაფუდ. ოჭკუმალეფ, ნამუთ ნავს მიღდეს, წყარს ქინუვორღვით დო თი ჭურჭელით, ნამდგაშა ოჭკუმალეფ ინომძუდეს, ნავშე წყარიშ ეშაბუნა ქიდიბჭყით.

ოჭკუმალქ წყარშა მაჸუეს გინარღვაფალქინ თიშენ, ნავით კინ გუვაგრძელით ულა დო ჩხომუა ხოლო ქიდიბჭყით. მარა მუთუნქ ვა მაჭოფეს. ათეშენ ლოცვა ქიდიბჭყით დო იეჰოვას ფთხინდით, თიმ დღაშ დასაბაღ ოჭკუმალ ქუმუჩამუდკო ჩქინდა. ლოცვაშ უკულ ხეთეშე ართ ჯიმაქ თიშმადიდა ჩხომ ოჭოფ, ნამუთ ოთხხოლოს მიბაღდეს, თიმ სერს ობჭკუმითკო დო კმაყოფილეფ ქუვორდითკო.

ართოიან 5 წანას გილმალ მსახურებაშ უკულ მა დო ეთელქ ვეველუდითინ ფერ კურთხევა მიბღით — მშობლეფო გინმიფრთუდით. მანგარ ბედნერ ვორდჷ, მუჟამსით თენა გებგჷ, მარა ვამჩქუდ, მუ მელდეს წიმი. ჩქი მანგარო მოკოდეს, მუჭო შემალებედესინ, სრულ დროთ ქიმსახურითკო. 1976 წანას ქიდებად ჩქინ ქომოლსქუაქ, ეთნიელქ, დო ჟირ წანა დო გვერდიშ უკულ ქიდებად ჩქინ მაჟია სქუაქ, ჯოვანიქ.

სურინამს საჭიროება რდუნ თიშ გურშენ, ფილიალქ გეგნოჭყვიდ, კინ გუვაგრძელკო რაიონულ მსახურება, თიშ უმკუჯინუო, ნამდა ბაღანეფს ბრდუნდით. მუჟამსით ჩქინ სქუალეფ დიო ხოლო ბაღანეფ რდეს, დუმანიშნეს თიცალ რაიონს, ნამდგაშა ხვალე მუსხირენ კრება მიშეშ. თექ საშვალება ქომუჩ თუთაშე ჟირ მარას რაიონულ ზედამხედველო იმსახურკო დო დოსქილადირ დროს თი კრებას იმსახურკო პიონერო, სოდეთ დანიშნულ ვორდჷ. ეთელ დო ჩქიმ სქუალეფწკუმა ართო იბძირუანდჷ თი კრებეფს, ნამუთ ჩქიმ ჸუდეწკუმა ხოლოს რდჷ. მარა ტროპიკულ ტყალეფს რდუნ თი კრებეფშა დო კონგრესეფშა ხვალე მიფშჷ.

გეგმეფ ყურადღებათ ოკო გუვანაწილკო, ნამდა შემალებუკო არძა ჩქიმ პასუხიშმგებლობაშ შესრულებაქ. ყურადღებას ვაქციენდჷ, ნამდა ოჯახურ თაყვანიშცემაქ ირ მარას ჩეტარკო. მუჟამსით კრებაშ ოძირაფშა ტროპიკულ ტყალეფშა ვორდჷ ულირ, ოჯახურ თაყვანიშცემას სქუალეფწკუმა ართო ეთელ ატარენდჷ. მუზმათ შეიოლებერ რდჷ, საქმეეფს ართო ვორთუდით, მუჭოთ ოჯახ. ეთელ დო მა რეგულარულო გიმურთუნდით დროს სქუალეფწკუმა ართო ჯანსაღ გართობას — თინეფწკუმა ართო ბლაჸაფენდით დო იბძირუანდით ჸუდეშ გოხოლუას რდუნ თი სქვამ ადგილეფს. ხშირას სერით მანგარ გვიანშახ ვემზადებუდ თეოკრატიულ დავალებეფშო. ეთელ გუდჷ იგავეფიშ 31:15-ის მოშინაფილ ჯგირ ოსურს. თინა გოთანაშახ  ედირთუდ, ნამდა შემალებესკო, ართო გუვარჩითკო ირდღაშიან მუხლ, მუჭოთ ოჯახიქ, დო ართო ობჭკუმითკო ოჭკუმალ, ონდო ჩქინ სქუალეფ სკოლაშა იშეს. მუშმადიდა მარდულ ვორექ, ნამდა პჸუნს თეცალ მოხანდე ოსურ, მით ირიათო მოხვარუდ, ართგურო შევასრულკო ჩქიმ პასუხიშმგებლობეფ.

მუჭოთ მშობლეფ, ირფელს ვორთუდით, ნამდა ჩქინ სქუალეფქ ქიჸოროფესკო იეჰოვა დო ქრისტიანულ შეხვალამეფ. ჩქი მოკოდეს, თინეფქ სრულ დროთ ემსახურესკო იეჰოვას. მარა თიშენ ვარ, ნამდა თენა ჩქი მოკოდეს, თე გადაწყვეტილება, მუნეფიშით ოკო მიღესკო. ჩქი ხშირას იფჩიებუდით თინეფწკუმა, მუშმადიდა ხიოლ მოუღ სრულ დროთ მსახურებას. თი სირთულეეფს ხოლო მიფშინუანდით, ნამდგას მსახურებას შეფხვადუდით, მარა უმოს ყურადღება თიშა გინომღუდეს, მუჭო მოხვარდეს იეჰოვა დო მუჭო ვარკენდჷ თინა კურთხევეფს ჩქინ ოჯახის. თეს გეძინელ, ყურადღებას ვაქციენდით, ნამდა ჩქინ სქუალეფს თიცალ თანაქრისტიანეფწკუმა უღდესკო ურთიერთობა, მიდგაშო იეჰოვაშ მსახურება ცხოვრებას მნიშვნელოვან რდჷ.

ბაღანეფიშ რდუალაშ დროს იეჰოვა აუცილებერს მუთუნს ვა მარკენდეს. მუშო ოკო რაგად, ირო ვოცადუდ, ჩქიმ ოკეთებელ გუვაკეთკო. მუჟამსით დაუქორწინებელ ვორდჷ დო ტროპიკულ ტყალეფს სპეციალურ პიონერო მსახურენდჷ, ქიდიბგურე, აუცილებერ საჭიროებეფშო წინასწარ გეგნობდვიკო ფარა. მინშა თიცალ სიტუაციას ხოლო ვორდით, მუჟამსით ვამღუდეს თინა, მუთ მოსაჭირდეს. თეცალ დროს დარწმუნებულ ვორდჷ, ნამდა იეჰოვა მუდგაინს გაკეთენდჷ ჩქიმ მახვარებელო. მაგალთო, 1980-იან წანეფიშ ბოლოს დო 1990-იან წანეფიშ დაჭყაფუს სურინამს სამოქალაქო ომი რდჷ. თე წანეფს მანგარ რთულ დროქ ქუდოდირთჷ, მუშენდა აუცილებერიშ შიბა ხოლო ჭირდჷ. მარა იეჰოვა თე დროს ხოლო ზრუნენდჷ ჩქინდე (მათ. 6:32).

მთელ ცხოვრებას იეჰოვაშ ხე ვემებრკებნა. თინა მარზენდეს ნამდვილ ბედნერობას დო კმაყოფილებას. ღორონთშე დიდ კურთხევა რდჷ, ნამდა პჸუნდეს სქუალეფ დო თინეფიშ იეჰოვაშ მსახურეფო რდუალა დიდ პატი რდჷ. მანგარო მახიოლეს, მუჟამსით თინეფქ გინოჭყვიდეს, ცხოვრება სრულ დროთ მსახურებას მეუძღვინესკო. ჩქინ ჟირხოლო სქუაქ „მახარობელეფიშ სკოლა“ გემკორთჷ დო ასე სურინამიშ ბეთელს მუნეფიშ მეუღლეეფწკუმა ართო მსახურენა.