1. სოვრეშე მიჩქნა, ნამდა იეჰოვას ოკო, დევეახლოვათ თის?

 ᲘᲔᲰᲝᲕᲐ მირაგადნა, დევეახლოვათ თის (იაკ. 4:8). თის ოკო, რდას ჩქინ ღორონთ, მუმა დო მეგობარ. თინა პასუხენს ჩქინ ლოცვეფს დო მოხვარნა რთულ სიტუაციეფიშ დროს. თეწკუმა ართო, მუშ ორგანიზაციაშ საშვალებათ მოგურუანა დო ფთხილანა. მარა ჩქი მუ ოკო ვაკეთათ, ნამდა დევეახლოვათ იეჰოვას?

2. მუჭო შემლებნა დევეახლოვათ იეჰოვას?

² იეჰოვას შემლებნა დევეახლოვათ ლოცვაშ, თიშ სიტყვაშ კითხირიშ დო თიშე ფიქრიშ საშვალებათ. თეშ კეთებათ თიშ მიმართ ჸოროფა დო მარდულობათ მაფშაფნა გურ. თენა გინმოჭყვიდირაფუანა, ხოლო უმოსო დევემორჩილათ თის დო განვადიდათ, ნამდგას მართალო იმსახურენს (გამოცხ. 4:11). მუთ უმოსო იფჩინებაფუანთ იეჰოვას, თით უმოსო ვონდუთ თის დო თიშ ორგანიზაციას, ნამდგას ჩქინ მახვარებელო ირინუანს.

3. მუჭო ოცად ეშმაკ, გემკმოჸოთან იეჰოვას, მარა მუ მიმეხვარებნა, დღას ვა ურთინუათ ოჭიშ ღორონთის დო თიშ ორგანიზაციას? (ფსალმ. 31:13, 14).

³ თე ირფელიშ უმკუჯინუო, სატანა ოცად, გემკმოჸოთან იეჰოვას, განსაკუთრებულო თიმწკუმა, მუჟამსით სირთულეეფს ფხვადუთ. მუჭო ორთჷ თეს? თინა ოცად, ჭიე-ჭიეთ მემდინუან ნდობა იეჰოვაშ დო თიშ ორგანიზაციაშ მიმართ. მარა ჩქი შემლებნა ქივეწინააღმდეგათ თის. მუჟამსით ჩქინ რწმენა ძალიერ რე დო იეჰოვაშ მიმართ ჩქინ ნდობა მტკიცე, დღას ვა ურთინუანთ ოჭიშის იეჰოვას დო თიშ ორგანიზაციას (წეკითხით ფსალმუნიშ 31:13, 14).

4. მუს გუვარჩიენთ თე სტატიას?

⁴ თე სტატიას გუვარჩიენთ სუმ სირთულეს, ნამუთ კრებაშ  გალეშე მოურს. თითოულს შეულებ დასუსტას ჩქინ ნდობა იეჰოვაშ დო თიშ ორგანიზაციაშ მიმართ. მუჭო შეულებ თე სირთულეეფს გემკმოჸოთან იეჰოვას დო მუ ოკო ვაკეთათ, ნამდა სატანაქ მუშ მიზანს ვემიოჭირინუას?

5. მუჭო შეულებ პრობლემეფს დასუსტას ჩქინ რწმენა იეჰოვაშ დო თიშ ორგანიზაციაშ მიმართ?

⁵ მინშა პრობლემეფს შეფხვადუთ, მუნერით რე ოჯახიშ წევრეფშე წინააღმდეგობა ვარდა სამუშაშ დინაფა. მუჭო შეულებ თეცალ პრობლემეფს ჭიჭე-ჭიეთ მემდინუან ნდობა იეჰოვაშ ორგანიზაციაშ მიმართ დო გენკმოჸოთან ჩქინ ღორონთის? პრობლემეფს ვობრძოლუთუნ, ბრელ ხან ქორენ-და, შილებე დუდის უიმენდოთ დო გურგოტახილო ბგინაფლენდათ. სატანა ოცად, თეცალ სიტუაციეფ მუშ სამოგებოთ გეგმირინუას დო ეჭვ გენშმოღალაფუან თიშა, მართალო ქოუჸორთ დო ვარ იეჰოვას. თის ოკო, მოფიქრებაფუან, ნამდა ჩქინ პრობლემაშ მიზეზ იეჰოვა დო თიშ ორგანიზაცია რე. თეცალ მუდგარენქ მოხვად ეგვიპტეს მონობას რდუნ თი ნამთინე ისრაელიშ შემთხვევას. დუდშე თინეფს ჯერდეს, ნამდა მოსე დო აარონ იეჰოვაქ დანიშნჷ მუნეფიშ დარსხებელო (გამ. 4:29—31). მარა, მუჟამსით ფარაონქ თინეფს ცხოვრება გაურთულ, თინეფქ თე ირფელშე მოსე დო აარონს გედვეს ბრალ დო უწის: „მუშენ გოუჯოგეთ ჩქინ დუდ ფარაონს დო თიშ მსახურეფს? ეშაბჭყვიდანინ, გოკონანო?!“ (გამ. 5:19—21). თინეფქ ღორონთიშ ართგურ მსახურეფს გედვეს ბრალ. მუ სანარღო რე! პრობლემეფს ობრძოლუთინ ბრელ ხან ქორენ-და, მუჭო შეილებნა იეჰოვაშ დო თიშ ორგანიზაციაშ მიმართ ძალიერ ნდობა ვადინუათ?

6. მუს ბგურაფლენთ წინასწარმეტყველ აბაკუმშე თიშ გურშენ, მუჭო გაურზათ პრობლემეფს? (აბაკ. 3:17—19)

⁶ გურ გოუნწყით იეჰოვას დო ქუჯინით თიშე ელარნას. წინასწარმეტყველ აბაკუმქ ბრელ პრობლემას შეხვად. ართშა, მუჭოთ იძირენ, თის ეჭვიქ გოურჩქინდჷ, ქაწუხენდჷ დო ვარ იეჰოვას თიშ მდგომარეობა. ათეშენ ალალას ქეჩუ იეჰოვას მუშ გრძნობეფიშ გურშენ დო თქუ: „მუჟამშახ ოკო რთხინდე, იეჰოვა, მოხვარას . . . მუშენ უშვენქ ჩაგრებას?!“ (აბაკ. 1:2, 3). ღორონთიქ უპასუხ მუშ ართგურ მსახურიშ ალალ ლოცვას (აბაკ. 2:2, 3). იეჰოვაშ მარსხებელ საქმეეფშე ფიქრიშ უკულ აბაკუმს ხიოლქ დართჷ. თიქ დერწმუნ, ნამდა იეჰოვა ზრუნენდჷ თიშე დო ქიმეხვარებუდ ნებისმიერ განსაცდელიშ გარზებას (წეკითხით აბაკუმიშ 3:17—19). მუს ბგურაფლენთ თავრეშე? მუჟამსით პრობლემეფს შეფხვადუთ, ქიბლოცათ დო ქუწუათ იეჰოვას, მუს ბგინაფლენთ. უკულ ქუჯინათ თიშე ელარნას. თაშ გუვაკეთენთ-და, შემლებნა დარწმუნებულ ვორდათ, იეჰოვა მუჩანა გარზებელო საჭირო ძალას დო, მუჟამსით ქიბგინანთ თიშ ელარნას, ჩქინ რწმენა ხოლო უმოსო გემანგარებ.

7. მუს ოცადუდ შირლიშ ნათესე დო მუქ მეხვარ შირლის, ვადინუკო იეჰოვაშ რწმენა?

⁷ გაგრძელით სულიერ გრაფიკიშ მეჸუნა. გუვარჩუათ, მუჭო მეხვარ პაპუა-ახალ გვინეას მახორუ და შირლის b თე რჩევაშ მეჸუნაქ, მუჟამსით პრობლემეფქ ქაშუ. შირლიშ ოჯახ ღარიბ რდჷ დო მინშა დასაბაღ ოჭკუმალიშ შიბა ხოლო უჭირდჷ. ნათესე ოცადუდ, თის ჭიე-ჭიეთ იეჰოვაშ ნდობა მეუდინუკო. თინა ურაგადუთ: „სი იჩიებუქ, ნამდა ღორონთიშ წმინდა შურ მიგეხვარებ, მარა მუშენ ვა გოხვარ?! სქან ოჯახ კინ ღარიბ რე დო დროს  ქადაგებაშო ოდინუანქ“. შირლი აგრძელენს: «ჩქიმ დუდის ბკითხჷ: „ქოზრუნენს დო ვარ ღორონთ ჩქინდე?“. ათეშენ ხეთეშე ლოცვა ქიდიბჭყჷ დო იეჰოვას ირფელ ქუწი, მუდგაშეთ ფიფქრენდჷ. ვემემტებ ბიბლიაშ დო ჩქინ პუბლიკაციეფიშ კითხირ; ქოთ ფქადაგენდჷ დო ქოთ შეხვალამეფს ვოსწრუდ». თიქ ჭიჭე ხანშა ქოძირ, ნამდა იეჰოვა მართალო ზრუნენდჷ თიშ ოჯახშე. თინეფ შქირენულ ვა ჸოფენა დო ბედნერეფ რდეს. შირლი იჩიებ: „ქიბგინ, ნამდა იეჰოვა პასუხენდჷ ჩქიმ ლოცვეფს“ (1 ტიმ. 6:6—8). სულიერ გრაფიკის ირიათო ქიმიაჸუნუთ-და, პრობლემეფს ვარდა ეჭვეფს ვემეჩანთ უფლებას, გემგკოჸოთან იეჰოვას.

8. მუ სიტუაციას შილებე ენოლან პასუხიშმგებელ ჯიმალეფქ?

⁸ მედია საშვალებეფიშ დო სოციალურ ქსელეფიშ გიმორნაფათ ჩქინ ნტერეფ ოცადნა, ტყურა ქეკაწამან ვარდა არასწორ ინფორმაცია გავრცელან პასუხიშმგებელ ჯიმალეფიშ გურშენ (ფსალმ. 31:13). ნამთინე ჯიმა ოჭოფეს დო დამნაშავეთ გეგმაცხადეს. პირველ საუკუნეშ ქრისტიანეფს ხოლო თეცალ სიტუაცია უღდეს, მუჟამსით მოციქულ პავლეს ტყურა ქეკაწამეს დო ოჭოფეს. მუჭო მიქცის თე ქრისტიანეფქ?

9. მუჭო მიქცუ ნამთინე ქრისტიანქ, მუჟამსით პავლე ოჭოფეს?

⁹ პირველ საუკუნეს მახორუ ნამთინე ქრისტიანქ მიოტუ პავლეშ ელარნა, მუჟამსით თინა რომს ციხეს ქუდახუნეს (2 ტიმ. 1:8, 15). თეშ მიზეზ ონჯღორე ხომ ვა რდჷ თიშ გურშენ, ნამდა პავლე ხალხიშ თოლს დამნაშავეთ რდჷ მერჩქინელ? (2 ტიმ. 2:8, 9). ვარდა თიშა ხომ ვაშქურდეს, ნამდა მუნეფს ხოლო თხოზინს ქუდუჭყანდეს? მიზეზ მუდგა ვა რდუკონ, წერმიდგინით, მუჭო გინაფლენდკონ იჸიდ პავლე დუდის. თიქ თე თანაქრისტიანეფიშ გურშენ ბრელ სირთულე გინიღ დო მუშ სიცოცხლე ხოლო გიორინუ რისკიშ თუდო (საქ. 20:18—21; 2 კორ. 1:8). დღას ვა ვაგურათ თინეფს, მიდგაქ პავლე თიცალ დროს მიოტუ, მუჟამსით  არძაშ უმოსო ოსაჭირუდ ელარნა. მუ ოკო ფშუდან, მუჟამსით პასუხიშმგებელ ჯიმალეფს თხოზუნა?

10. მუ ოკო ფშუდან, მუჟამსით პასუხიშმგებელ ჯიმალეფს თხოზუნა დო მუშენ?

¹⁰ ფშუდან, მუშენ ფთხოზნა დო მი ორთჷ თეს. 2 ტიმოთეშ 3:12-ს ჭარჷ: „არძას, მიდგას ოკო, ქრისტეს მოწაფე დო ღორონთიშ ართგურ რდას, თხოზუდან იჸი“. ათეშენ, ოკო ვა გამკვირდან, ნამდა სატანა განსაკუთრებულო პასუხიშმგებელ ჯიმალეფს თხოზ. თეშნერო თინა ოცად, ართგურობა მიოდინაფუას ჯიმალეფს დო დუმოშქურნუან (1 პეტ. 5:8).

11. მუშ გურაფა შემლებნა ონისიფორეშ მაგალითშე? (2 ტიმ. 1:16—18)

¹¹ გაგრძელით ჯიმალეფშა ხუჯიშ დაკინება დო ართგურო ქელუდირთით თინეფს (წეკითხით 2 ტიმოთეშ 1:16—18). პირველ საუკუნეს მახორუ ართ ქრისტიანქ, ონისიფორექ, გვალო შხვანერო მიქცუ, მუჟამსით პავლე ჭოფილ რდჷ. „თის [პავლეშ] ბორკილეფშა ონჯღორექ ვა დაგურ“. თეშ მანგიორო ონისიფორე გორუნდჷ პავლეს დო ქიმიოგორუნ, ოცადუთ, პრაქტიკულო ქელუდირთკო თის. თეშნერო თიქ სიცოცხლე ქინიჸოთ საფრთხეშა. მუს ბგურაფლენთ თავრეშე? ადამიანიშ შიშის საშვალება ოკო ვემეფჩათ, მიმოტებაფუან თი ჯიმალეფიშ ელარნა, მიდგას თხოზუნა. თეშ მანგიორო, დეფცვათ თინეფ დო თინეფშო ვორდათ თიშნერ პიროვნებეფ, მიდგაშ იმენდ ირო შეულებნა უღდან (იგავ. 17:17). თინეფს ოსაჭირნა ჩქინ ჸოროფა დო ელარნა.

12. მუს ბგურაფლენთ რუსეთის მახორუ და დო ჯიმალეფშე?

¹² დეფიქრით, მუჭო ელუდირთეს რუსეთის ჩქინ და დო ჯიმალეფქ თანამორწმუნეეფს, მუჟამსით თინეფ ოჭოფეს. თინეფშე ნამთინეშ სასამართლო პროცესშა ბრელ და დო ჯიმაქ მერთჷ, ნამდა ხუჯ ქუდუკინესკო. მუს ბგურაფლენთ თავრეშე? მუჟამსით პასუხიშმგებელ ჯიმალეფს ტყურას ეკაწამენა, ჭოფნა ვარდა თხოზუნა, შიშიქ ვენგაჭკირან, ქილოცით თინეფშო, ქიზრუნით თინეფიშ ოჯახიშ წევრეფშო დო გორით შხვა პრაქტიკულ საშვალებეფ, მუდგათ ოძირანთ თინეფს თქვან ელარნას (საქ. 12:5; 2 კორ. 1:10, 11).

13. მუჭო გითუნთხორუნს ჩხვიჩხვის კრიტიკა იეჰოვაშ დო თიშ ორგანიზაციაშ მიმართ ჩქინ ნდობას?

¹³ იეჰოვაშ მოწმე ვა რენ ფერ ნათესეეფ, თანამშრომელეფ ვარდა სკოლაშ ამხანაგეფ შილებე მაკრიტიკენდან ქადაგებაშ ვარდა თიშ გურშენ, ნამდა იეჰოვაშ მაღალზნეობრივ ნორმეფით ფცხოვრენთ (1 პეტ. 4:4). თინეფ შილებე მირაგადუდან: „ჯგირ პიროვნება რექ, მარა სქან რელიგია ნაბეტან მკაცრ რე დო რეალობას რე მოჩილათირ“. ნამთინექ შილებე გარიცხულწკუმა დამოკიდებულებაშ გურშენ გუმაკრიტიკან დო მიწუან: „თეშ უკულ მუჭო იჩიებუქ სქან დუდშე, ნამდა მოჸოროფე ადამიან რექ?!“. თეცალ ჩიებეფქ სოდგარენ გურს შილებე ეჭვეფ გომრჩქინან დო იფიფქრათ: „ბრელს ხომ ვეთხინს იეჰოვა ჩქინდე? ნაბეტან შეზღუდულ ხომ ვა ვაფუთ თიშ ორგანიზაციას?“. თეცალ სიტუაცია ქოიღნან-და, მუ შეილებნა გაკეთათ, ნამდა ვადინუათ იეჰოვაწკუმა დო თიშ ორგანიზაციაწკუმა ხოლოშიან ურთიერთობა?

14. მუჭო ოკო მიფქცუათ, მუჟამსით იეჰოვაშ ნორმეფით ფცხოვრენთინ თიშენ მაკრიტიკენა? (ფსალმ. 119:50—52)

¹⁴ გინოჭყვიდილ გაფდან, მიაჸუნათ იეჰოვაშ ნორმეფს. იობ იცვენდჷ იეჰოვაშ ნორმეფს, თიშ უმკუჯინუო, ნამდა თეშ გურშენ აკრიტიკენდეს. თიშ ართ-ართ ითამ მეგობარ ოცადუდ, დარწმუნკო, ნამდა ღორონთშო მნიშვნელობა ვა უღუდ,  მიაჸუნუდ დო ვარ იობ თიშ ნორმეფს (იობ. 4:17, 18; 22:3). მარა იობ ვეჯერდჷ თეცალ ტყურეფს. თის უჩქუდ, ნამდა სწორ დო არასწორწკუმა დაკავშირებით იეჰოვაშ დოდგინელ ნორმეფ სწორ რდჷ დო გინოჭყვიდილ აფუდ, მიაჸუნკო თინეფს. თინა უფლებას ვარზენდჷ შხვეფს, მიოდინაფუესკო ართგურობა (იობ. 27:5, 6). მუს ბგურაფლენთ თავრეშე? უფლება ვემეჩათ კრიტიკას, ნამდა ეჭვეფ გოირჩქინან იეჰოვაშ ნორმეფწკუმა დაკავშირებით. დეფიქრით თქვან პირად გამოცდილებაშე. ალბათ ბრელშა გიმოიცადებნა, ნამდა იეჰოვაშ ნორმეფით ცხოვრება სწორ რე დო თიქ ჯგირობუა მოიღეს. გინოჭყვიდილ გაფდან, ხუჯ დუკინათ ორგანიზაციას, ნამუთ მეჸუნს თე ნორმეფს. ათეშენ მუთუნ მნიშვნელობა ვა უღჷ, მუსხი ადამიან გაკრიტიკენა, თქვა მუთუნს ვემკაჸათინეთ იეჰოვაშე (წეკითხით ფსალმუნიშ 119:50—52).

15. მუშენ აკრიტიკენდეს ბრიჯიტის?

¹⁵ გუვარჩუათ ინდოეთის მახორუ ბრიჯიტიშ შემთხვევა. თის ოჯახიშ წევრეფ მუშ რწმენაშ გურშენ აკრიტიკენდეს. 1997 წანას, ნათუაშ უკულ ხეთეშე, თიშ ქომონჯიქ, ნამუთ იეჰოვაშ მოწმე ვა რე, სამუშა მიოდინუ. ათეშენ მუშ ჩილ დო სქუაწკუმა ართო გინოჭყვიდ, შხვა ქალაქშა, მშობლეფშა, გინილკო ოცხოვრებშა. მარა ბრიჯიტის უმოს დიდ სირთულეეფ ელუდ. რახანს ქომონჯ ვა მუშენდჷ, ოჯახიშ ეიოჯუმალარო მუს აჸიდ სრულ განაკვეთის ომუშებელ. თეს გეძინელ, არძაშ უხოლაშ კრება 350 კილომეტრიშ მაშორას რდჷ. სანარღოთ, თის მუშ ქომონჯიშიანეფ ოწინააღმდეგდეს რწმენაშ გურშენ. სიტუაციაქ თეშ გერთულ, ნამდა ბრიჯიტიშ ოჯახის კინ შხვადო აჸუ გინაულარქ. უკულ ველუდუნ თეშ ქომონჯიქ დუღურ. უმოს გვიანო მუშ ართ-ართ ძღაბიქ, ნამუთ 12 წანერ რდჷ, კიბოშ გურშენ დოღურ, თიშ ემოციურ მდგომარეობაქ ხოლო უმოსო გეუფრაშ, მუჟამსით ნათესეეფ თე ირფელს ბრიჯიტის აბრალუაფდეს. თინეფ იჩიებდეს, ნამდა ბრიჯიტ იეჰოვაშ მოწმე ვა ჸოფედკონ, ნამთინ თე უბედრობა ვა მოხვადუდ. მარა თინა იშენით ონდუდ იეჰოვას დო ორგანიზაციაწკუმა ხოლოს რდჷ.

16. მუ კურთხევეფ მიღჷ ბრიჯიტიქ თიშენ, ნამდა იეჰოვაშ ორგანიზაციაწკუმა ხოლოს რდჷ?

 ¹⁶ ბრიჯიტ კრებაშე შორს ცხოვრენდჷ, ათეშენ რაიონულ ზედამხედველქ ელუჩ, მუშ ტერიტორიას იქადაგკო დო შეხვალამეფ ხოლო ჸუდეს ჩატარკო. დუდშე თიშო თეშ კეთება ვა რდჷ ადვილ, მარა თიქ მიაჸუნ მითითებეფს. თინა შხვეფს უქადაგუდ სახიოლო ამბეს, ჸუდეს ატარენდჷ შეხვალამეფს დო დროს გიმურთუნდჷ მუშ ძღაბეფწკუმა ართო ოჯახურ თაყვანიშცემას. მუ რდჷ თე ირფელიშ შედეგ? თიქ ბრელ პიროვნებაწკუმა დიჭყჷ ბიბლიაშ გურაფა დო უმენტაშიქ დინათ. 2005 წანას თიქ სრულ დროთ პიონერო ქიდიჭყჷ მსახურება. იეჰოვაშ მიმართ ნდობას დო ორგანიზაციაშ მიმართ ართგურობას კურთხევეფქ ქუმაჸუნ. თიშ ძღაბეფ ართგურო ომსახურნა იეჰოვას. თი ტერიტორიას, სოდეთ ქადაგენდჷ, ასე ჟირ კრება რე. ბრიჯიტ დარწმუნებულ რე, ნამდა იეჰოვაქ მეჩჷ ძალა, ქუგურზკო პრობლემეფს დო კრიტიკას ოჯახიშ წევრეფშე.

17. მუ ოკო მაფდან გინოჭყვიდილ?

¹⁷ სატანას ოკო, დუმოჯერუან, ნამდა იეჰოვა გაჭირებაშ დროს მიმოტენა დო თიშ ორგანიზაციაშა ხუჯიშ დაკინება პრობლემეფიშ მეტის მუთუნს ვა მომღანა. სატანას ოკო, შიშიქ ქინმაჭკირან, მუჟამსით პასუხიშმგებელ ჯიმალეფს ტყურას ეკაბრალენა, თხოზუნა ვარდა ჭოფნა. თეს გეძინელ, თის ოკო, ჭიე-ჭიეთ მემდინუან იეჰოვაშ ნორმეფიშ დო თიშ ორგანიზაციაშ მიმართ ნდობა, მარა ჩქი ჯგირო მიჩქნა სატანაშ მეთოდეფ დო ვებღორებუთ (2 კორ. 2:11). გინოჭყვიდილ გაფდან, ვედეჯერათ სატანაშ ტყურეფ დო ქუდოსქიდათ იეჰოვაშ დო თიშ ორგანიზაციაშ ართგურეფქ. რშუდან, იეჰოვა დღას ვემგოტენა (ფსალმ. 28:7). ათეშენ მუთუნს ვემეჩათ უფლება, გემგკოჸოთან იეჰოვას (რომ. 8:35—39).

18. მუს გუვარჩიენთ უკულიან სტატიას?

¹⁸ თე სტატიას გუვარჩით თი სირთულეეფ, ნამდგას შილებე კრებაშ გალე შეფხვადათ. მარა იეჰოვაშ დო ორგანიზაციაშ მიმართ ჩქინ ნდობა, შილებე თი სირთულეეფქ ხოლო გეგმოცადას, ნამუთ მინშა კრებაშ დინახლე ირჩქინანს დუდის. მუჭო შემლებნა გივორჯგინათ თეცალ სირთულეეფს? თეს უკულიან სტატიას გუვარჩიენთ.