1, 2. ა) მუ კითხვეფს გუვარჩიენთ? ბ) სოვრეშე იძირე, ნამდა იეჰოვას მანგარო ოკო, მიმეხვარან?

 ᲘᲔᲰᲝᲕᲐᲡ შეულებ მიმეხვარან, გივორჯგინათ ცხოვრებისეულ სირთულეეფს დო ხიოლ ვა ვოდინუათ მსახურებას. მუჭო ორთჷ თინა თეს დო მუჭო შემლებნა თიშ მოხვარაშე სრულ სარგებელ მიბღათ? პასუხეფს თე სტატიაშე ქიგებგენთ. მარა თეიშახ ქუპასუხათ თე საკითხწკუმა დაკავშირებულ ხოლო ართ კითხვას. მართალო ქაკონო იეჰოვას ჩქინ მოხვარა?

² სიტყვა, ნამუთ მოციქულ პავლექ ებრაელ ქრისტიანეფს მეჭარ, მოხვარნა პასუხიშ გაგებას. პავლექ ჭარჷ: „იეჰოვა ელამრე, ვა მაშქურნე. მუ აღოლნე კოჩის ჩქიმდა?“ (ებრ. 13:6). ბიბლიაწკუმა დაკავშირებულ ნაშრომეფს მოჩამილ რე, ნამდა თე მუხლის გიმორნაფილ სიტყვა „ელამრე“ ოხუ პიროვნებას, მით მირულე თიშ მახვარებშა, მიდგა თეს თხულენს. წერმიდგინით, მუჭო ინჭუაფ იეჰოვა თიშ მახვარებშა, მიდგას უჭირს. თავრეშე ჯგირო იძირე, მუზმათ ოკო იეჰოვას ჩქინ მოხვარა. იეჰოვა ჩქინ მხარეს რე, ათეშენ შემლებნა ხიოლით გეგნიბღათ განსაცდელეფ.

3. მუ რე თი სუმ საშვალება, მუდგათ იეჰოვა მოხვარნა ხიოლით ქუგურზათ განსაცდელეფს?

³ მუ რე თი ნამთინე საშვალება, მუდგათ იეჰოვა მოხვარნა, ხიოლით გეგნიბღათ განსაცდელეფ? თე კითხვას პასუხ ქიმეფჩათინ, ყურადღება ქიმვაქცუათ ესაიაშ წიგნის, მუშენდა თი წინასწარმეტყველებეფშე ბრელ, ნამუთ იეჰოვაქ თის გუცხად, ღორონთიშ ამდღარ მსახურეფს ოხუ. თეს გეძინელ, უმენტაშო ესაია იეჰოვას ეჭარუნს თიშნერ სიტყვეფით, ნამდგაშ ინონჭაფა ადვილო შემლებნა. თეშ ნამთინე მაგალით ესაიაშ 30-ა დუდის რე მოჩამილ. თე დუდის ესაია სქვამ შედარებეფით ეჭარუნს, მუჭო მოხვარნა იეჰოვა მუშ ხალხის 1) ჩქინ ლოცვეფიშ მთელ გურით მორჩქილაფათ დო  თინეფშა პასუხით, 2) ხემძღვანელობაშ მოჩამათ დო 3) ამდღარ დო მომავალ კურთხევეფით. მორთ უმოს დეტალურო გუვარჩუათ თე სუმ საშვალება, მუდგათ იეჰოვა მოხვარნა.

4. ა) მუჭო ეჭარ იეჰოვაქ ესაიაშ დროს მახორუ იუდეველეფ დო მუქ გიოტირხეს თინეფს დუდის? ბ) მუ იმენდ მეჩჷ იეჰოვაქ ართგურეფს? (ეს. 30:18, 19)

⁴ ესაიაშ 30-ა დუდიშ დაჭყაფუს იეჰოვა იუდეველეფს ეჭარუნს, მუჭოთ „აჯამ ქომოლსქუალეფს“, მით ცოდვას ცოდვას გეუძინანა. თინა აგრძელენს: „ურჩ ხალხ რე, . . . ვაკონა იეჰოვაშ კანონიშ მორჩქილაფა“ (ეს. 30:1, 9). თინეფქ მორჩქილაფაშე ვარია თქუესინ თიშენ, ესაიაქ იწინასწარმეტყველ, ნამდა იეჰოვა ვეჩერიებუდ დო ვერსხენდჷ თინეფს უბედრობაშე (ეს. 30:5, 17; იერ. 25:8—11). ქოთ თაშ ქუმოხვად დო თინეფქ ტყვეეფო იჸუეს ჸუნაფილქ. მარა თინეფ შქას ართგურ იუდეველეფ ხოლო რდეს, მიდგაშო ესაიაშ ცნობა იმენდიშ მუმაჩამალ რდჷ. ესაიაქ უწუ თე ხალხის, ნამდა იეჰოვა კინ დართინუანდჷ იერუსალიმშა (წეკითხით ესაიაშ 30:18, 19). თექ ზუსტას თაშ ქუმოხვად. იეჰოვაქ გათავისფალ თინეფ ტყვეობაშე, მარა წანეფიშ უკულ. სიტყვეფშე „იეჰოვა მოთვინებათ იჯინე, ნამდა ჭყოლოფა გეგმირჩქინას“ იძირედ, ნამდა დროშ მიკულა რდჷ საჭირო, სოიშახ იეჰოვა მუშ ართგურეფს ირსხენდჷ. მუჭოთ მიჩქნა, ბაბილონშა გინოხორაფილ ისრაელეფს 70 წანაშ უკულ მიაჩეს საშვალებაქ, დირთესკო იერუსალიმშა (ეს. 10:21; იერ. 29:10). ჸუდეშა დორთელეფს, ტყვეობაშ დროს დობუნილ გაჭირებაშ ჩილამურეფქ, ხიოლიშ ჩილამურეფით დათირეს.

5. მუშა მარწმუნენა ესაიაშ 30:19?

⁵ ამდღა ჩქი ხოლო გურშა ელამკინანა ესაიას მოჩამილ სიტყვეფ: „თინა აუცილებერო ქოიჭყოლოფუანს, მუჟამსით ქელარჩქილე სქან ხვეწინ“ (ეს. 30:19). ესაია მარწმუნენა, ნამდა იეჰოვა მთელ გურით ქუმომრჩქილუანა, მუჟამსით ვოხვეწუთ დო ხეთეშე ქუპასუხენს ჩქინ ოთხუალს. თინა გეუძინანს: „ქიგეგონენსინ, ხეთეშე ქოიპასუხენს“. თე გურიშემაკინალ სიტყვეფ გუმოშინანა, ნამდა ჩქინ მუმას სურვილ უღჷ, თის მანგარო ოკო, ქიმეხვარას თინეფს, მით მოხვარას თხინს. თეშ რჩქინა მოხვარნა, ხიოლით ქუგურზათ განსაცდელეფს.

6. მუჭო ოძირანს ესაიაშ სიტყვეფ, ნამდა იეჰოვა მუშ თითოულ მსახურიშ ლოცვას ირჩქილე?

⁶ ხოლო მუშა მარწმუნენა თე მუხლ ლოცვაწკუმა დაკავშირებით? იეჰოვა თითოულიშ ლოცვას ცალ-ცალკე ურჩქილე. მუშენ შემლებნა თეშ რაგად? ესაიაშ 30-ა დუდიშ პირველ ნაწილს გიმორნაფილ რე ნაცვალსახელ „თქვა“, ნამუთ მრავლობით რიცხვის რე, მუშენდა იეჰოვა მუშ ხალხის ურაგად, მუჭოთ ჯგუფის. მარა მა-19 მუხლის, მხოლობით რიცხვის რენ ფერ ნაცვალსახელ „სქან“ რე გიმორნაფილ, მუთ ნიშნენს, ნამდა იეჰოვა, მუჭოთ ჯგუფის ვარინ, თითოულ ადამიანს ცალ-ცალკე ურაგად. ესაია ჭარუნს: „მეტო ვენგარქ“. „თინა აუცილებერო ქოიჭყოლოფუანს“ დო „ქოიპასუხენს“. მუჭოთ მოჸოროფე მუმა, იეჰოვა ვა ურაგად მუშ სქუას: „თიცალ მანგარო ოკო რდე, მუნერით სქან ჯიმა ვარდა და რე“. თეშ მანგიორო, თინა თითოულშო ცალკე ზრუნენს დო თითოულიშ ლოცვას ყურადღებით ურჩქილე (ფსალმ. 116:1; ეს. 57:15).

7. მუჭო ოძირეს ესაიაქ დო იესოქ, ნამდა საჭირო რე, ვემვოტუათ ართდოიგივე საკითხშენ ლოცვა?

⁷ მუჟამსით იეჰოვას ვეჩიებუთ თიშ გურშენ, მუთ მაწუხენა, თიშ ხეთეშე პასუხ შილებე რდას ძალა, ნამუთ მოხვარნა გარზებას. ჩქინ ოწუხებელქ, ველუდითინ თიშმამალას ვეჩმეთხუეს-და, საჭირო რე, კინ გუვაგრძელათ იეჰოვაშა გარზებელ ძალაშ თხუალა. თინა ელამჩანა, თაშ ვაკეთათ, მუთ ჯგირო იძირე ესაიაშ სიტყვეფშე:  „ვართ თინა [იეჰოვა] მასვანჯუათ“ (ეს. 62:7). თენა ნიშნენს, ნამდა თიცალ დაჩემებულო იბლოცათ, ითამ იეჰოვას მოსვანჯაშ საშვალებას ვა ვარზენდათ. ესაიაშ თე სიტყვეფ გუმოშინანა იესოშ მაგალითეფს ლოცვაწკუმა დაკავშირებით, ნამუთ ლუკაშ 11:8—10, 13-ს ენოჭარ. თაქ იესო ელამჩანა, ქიბლოცათ „დაჩემებულო“ დო ქიფთხუათ წმინდა შურ. თეს გეძინელ, შემლებნა ქოფთხუათ იეჰოვას, ქომხემძღვანელან სწორ გადაწყვეტილებეფიშ მეღებას.

8. მუჭო შისრულ ესაიაშ 30:20, 21-ის მოჩამილ სიტყვეფქ ჯვეშ დროს?

⁸ წეკითხით ესაიაშ 30:20, 21. მუჟამსით ბაბილონიშ ჯარს იერუსალიმ წარმოწანა დო გვერდის ალყას ჸუნდჷ, თექ მახორუ ხალხშო გაჭირება დო დაჩაგრებაქ ქობალ დო წყარცალ ჩვეულებრივ მუდგარენო გინირთჷ. მარა, მუჭოთ მა-20 დო 21-ა მუხლეფშე იძირე, იეჰოვა ოკვირუდ იუდეველეფს, ნამდა მინანიენდეს დო მუნეფიშ საქმეეფს დოთირანდეს-და, ირსხენდჷ თინეფს. იეჰოვაშ „დიდებულ მოძღვარო“ მოშინაფათ, ესაიაქ დეპირ ხალხის, ნამდა ღორონთ ქუდაგურუანდჷ თინეფს, მუჭო ცესკო თაყვან თიშო მოსაწონ ფორმათ. თე სიტყვეფქ თიმწკუმა შისრულ, მუჟამსით იუდეველეფქ ტყვეობაშე გეთავისფალეს. იეჰოვაქ დამტკიც, ნამდა დიდებულ მოძღვარ რდჷ თინეფშო დო თიშ ხემძღვანელობათ, ხალხის შეიალებუ წმინდა თაყვანიშმცემლობაშ აღდგენაქ. ჩქინო კურთხევა რე, ნამდა ამდღა იეჰოვა ჩქინ დიდებულ მოძღვარ რე.

9. მუ რე თი ართ-ართ საშვალება, ნამდგათ იეჰოვა ფხემძღვანელენა?

⁹ ესაია აგრძელენს შედარებეფიშ გიმორნაფას. თინა მადარენა მოსწავლეეფს, მით იეჰოვაშე გურაფლენა ჟირნერ საშვალებათ. პირველ, ესაია იჩიებ: „სქან თოლით ქოძირუნქ სქან დიდებულ მოძღვარს“. თაქ ჩიება მეურს, მოძღვარშენ, შხვა სიტყვეფით ქოფთქუათინ, მასწავლებერშე, ნამუთ წოხოლე აწურე მუშ მოსწავლეეფს. ჩქინო დიდ პატი რე, ნამდა მიღნა საშვალება, დიბგურუათ ღორონთშე. მუჭო მოგურუანა იეჰოვა? თინა თეშო მუშ ორგანიზაციას ირინუანს. მანგარ მარდულ ვორეთ თი არგამა მითითებეფშე, ნამდგას თიშ ორგანიზაციაშე ბღებულენთ. თე ხემძღვანელობეფს ბღებულენთ კრებაშ შეხვალამეფშე, კონგრესეფშე, პუბლიკაციეფშე, მაუწყებლობაშ პროგრამეფშე დო ხოლო ბრელ შხვა საშვალებაშე, მუთ მოხვარნა, რთულ სიტუაციეფს ხიოლით გივორჯგინათ.

10. მუს ნიშნენს სიტყვეფ „სქან ჸუჯის უკახლეშე ქელარჩქილე“?

¹⁰ მაჟია საშვალებაშ გურშენ, მუდგათ იეჰოვა  ფხემძღვანელენა, ესაია იჩიებ: „სქან ჸუჯის უკახლეშე ქელარჩქილე“. თაქ წინასწარმეტყველ იეჰოვას ეჭარუნს, მუჭოთ ყურადღებიან მასწავლებერს, ნამუთ უკახლე ეკოჸუნს მოსწავლეეფს, ნამდა ქუწუას თინეფს, ნამ შარათ იდან დო ქიმეჩას მითითებეფ. ამდღა ჩქი ხოლო იფრჩქილეთ ღორონთიშ ხონარს ჩქინ უკახლეშე. მუჭო? ღორონთიშ შთაგონებულ სიტყვეფქ ბიბლიას ბრელ ხანით ადრე, ჩქინშახ, იჭარ. თე გაგებათ რე თინა ჩქინ უკახლე. თაშ ნამდა, მუჟამსით ბიბლიას ბკითხულენთ, თენა თიცალ რე, ითამ ღორონთიშ ხონარ უკახლეშე მარჩქილედან (ეს. 51:4).

11. მუ ჟირ ნაბიჯიშ გინოდგუმა რე საჭირო, ხიოლ ვა ვოდინუათინ დო მუშენ?

¹¹ მუჭო შემლებნა სრულ სარგებელ მიბღათ თი ხემძღვანელობაშე, ნამდგას იეჰოვა მუშ ორგანიზაციაშ დო მუშ სიტყვაშ საშვალებათ მარზენა? ყურადღება ქიმიაქცით, ნამდა ესაია ჟირ მუდგარენს იჩიებ: პირველ, „თენა რე შარა“, მაჟია, „გილართით თით“ (ეს. 30:21). შარაშ რჩქინა დასაბაღ ვა რე, საჭირო რე, თით გილაფრთათ. იეჰოვაშ სიტყვაშე დო თიშე, მუჭო ენწყუნს თის ღორონთიშ ორგანიზაცია, ბგურაფლენთ, მუს ითხინს თინა ჩქინდე. თეწკუმა ართო, თის ხოლო ბგურაფლენთ, მუჭო ოკო მივაჸუნათ ნაგურეფუს. იეჰოვაშ მსახურება ხიოლით გუვაგრძელათინ, თე ჟირხოლო ნაბიჯ ოკო გეგნობდგათ. ხვალე თეშ უკულ შემლებნა ბჯერდან, ნამდა იეჰოვა მაკურთხენა.

12. მუჭოთ ესაიაშ 30:23—26-ის ჭარჷ, მუჭო აკურთხენდჷ იეჰოვა მუშ ხალხის?

¹² წეკითხით ესაიაშ 30:23—26. მუჭო შისრულ თე წინასწარმეტყველებაქ თი იუდეველეფშა, მიდგაქ ბაბილონიშ ტყვეობაშე ისრაელშა დირთეს? თინეფქ ქიანაშ კურთხევა მიღეს მუჭოთ სულიერო, თეშ ფიზიკურო. იეჰოვაქ მუშ ხალხ ხვეიან ფიზიკურ ოჭკუმალით აკურთხჷ დო, მუთ უმოს მნიშვნელოვან რე, თინა არზენდჷ სულიერ საზრდოს, ნამდა შეიალებესკო მუწკუმა დაახლოებაქ დო წმინდა თაყვანიშმცემლობაშ აღდგენაქ. თეზმა სულიერ კურთხევა, ნამდგათ თი დროს თე ხალხ ხარენდჷ, თეიშახ დღას ვა ნოღვენა. მუჭოთ 26-ა მუხლის რდჷ მოჩამილ, იეჰოვაქ ბრელით უმოსო გოსინთუ სულიერ სინთე (ეს. 60:2). იეჰოვაშ კურთხევეფქ მეხვარ თიშ ხალხის, ვემიოტესკო თიშ მსახურება ხიოლით დო გაბედულებათ, მუშენდა „გურგახარებულეფ“ რდეს (ეს. 65:14).

13. მუჭო ისრულებ აღდგენაშ გურშენ წინასწარმეტყველება ამდღა?

¹³ ჭეშმარიტ თაყვანიშმცემლობაშ აღდგენაშ გურშენ წინასწარმეტყველება ამდღა ჩქი ხოლო მოხუნანო? ქო. მუშენ იფჩიებუთ თეს? ახ. წ. 1919 წანაშე მოჸუნაფილ  მილიონობით ადამიანქ გეთავისფალ დიდ ბაბილონიშ ტყვეობაშე, ნამუთ ტყურა რელიგიაშ მსოფლიო იმპერია რე. თინეფქ ბრელით უჯგუშ ადგილშა იჸუეს ჸუნაფილქ, ვინემ ისრაელიშ დუნაპირებ დიხა რდჷ. თენა რდჷ სულიერ სამოთხე (ეს. 51:3; 66:8). მუ რე სულიერ სამოთხე?

14. მუ რე სულიერ სამოთხე დო მი კვიდრენს თექ? (ქოძირით განმარტება).

¹⁴ ახ. წ. 1919 წანაშე მოჸუნაფილ ცხებულეფ ხარენა სულიერ სამოთხეს b ცხოვრებათ. დროშ მიკულაწკუმა ართო თე სულიერ დიხას ცხებულეფს ქაკათ „შხვა შხურქ“, მიდგას დედამიწას მარადიულ ცხოვრებაშ იმენდ უღნა. თინეფ ხარენა იეჰოვაშ კურთხევეფით (იოან. 10:16; ეს. 25:6; 65:13).

15. სო რე სულიერ სამოთხე?

¹⁵ სო რე ამდღა თე სულიერ სამოთხე? იეჰოვაშ მსახურეფს თიშ ძირაფა დედამიწაშ არძა კუნთხუს შეულებნა. ათეშენ სულიერ სამოთხე, სოდეთ თინეფ კვიდრენა, მთელ მსოფლიოს რე. თაშ ნამდა, ამდღა, სოდგა ვა ფცხოვრენდათინ, მუჟამსით აქტიურო ქუდუკინენთ ხუჯის ჭეშმარიტ თაყვანიშმცემლობას, შემლებნა ვორდათ სულიერ სამოთხეს.

16. მუჭო შემლებნა გუვაგრძელათ ჯინა სულიერ სამოთხეშ სისქვამეშა?

¹⁶ სულიერ სამოთხეს ქუდოფსქიდათინ, შხვა მუდგარენეფწკუმა ართო, საჭირო რე, ვა ვოდინუათ მარდულობა მსოფლიო ქრისტიანულ კრებაშ მიმართ. მუჭო შემლებნა თეშ კეთება? ყურადღება სისქვამეშა ოკო გეგნიბღათ დო ვართ ხოლო თექ კვიდრენსინ თი ხალხიშ არასრულყოფილებაშა (იოან. 17:20, 21). მუშენ რე თენა მანგარ მნიშვნელოვან? დეფიქრით თეცალ მაგალითშე: მუჟამსით სქვამ ბაღშა მინურთჷ, ჩქი ველუთ, ნამდა თექ შხვადოშხვანერ ჯას ქობძირუნთ. თეშნერო სულიერ სამოთხე, ნამდგას ამდღა ჩქინ კრებეფს ვორწყეთ, მონწყილ რე ბრელნერ ადამიანით, მით ჯალეფშა რენა შედარებულ (ეს. 44:4; 61:3). საჭირო რე, ყურადღება ირიათო გინოღალირ მაფდან, „ბუნებაშ სისქვამეშა“ დო ვართ ხოლო ჩქინ ხოლოს რენ თი „ჯალეფიშ“ კილშა. ჩქი ვემმაჩინენა  უფლება ჩქინ დო შხვეფიშ არასრულყოფილებაშა, მიმოტებაფუან ჯინა თი სისქვამეშა, ნამუთ გაერთიანებულ მსოფლიო ქრისტიანულ კრებას უღჷ.

17. მუშ კეთება შემლებნა თითოულს, ნამდა კრებას მშვიდობას შეუნწყუათ ხე?

¹⁷ მუშ კეთება შემლებნა თითოულს თე ართობაშა ხუჯიშ დაკინებელო? ხე შეუნწყუათ მშვიდობას (მათ. 5:9; რომ. 12:18). ირო, მუჟამსით ვოცადუთ, კრებას შხვეფწკუმა მშვიდობიან ურთიერთობა მიღდან, სულიერ სამოთხეს ხოლო უმოსო ვასქვამენთ. ვაგმოჭყორდან, ნამდა სულიერ სამოთხეს წმინდა თაყვანიშმცემლობაშა თითოულ იეჰოვას მოჸუნს (იოან. 6:44). წერმიდგინით, მუ ბედნერ რე იეჰოვა, მუჟამსით ორწყე, მუჭო ფხანდენთ, ნამდა გემანგარას ჩქინ მშვიდობა დო ართობაქ თინეფწკუმა, მით თიშო ძვირფასეფ რენა — თიშ მსახურეფწკუმა (ეს. 26:3; ანგ. 2:7).

18. მუშ გურშენ ოკო დეფიფქრათ ხშირას დო მუშენ?

¹⁸ მუჭო შემლებნა სრულ სარგებელ მიბღათ თი კურთხევეფშე, ნამდგას ბღებულენთ, მუჭოთ ღორონთიშ მსახურეფ? შემლებნა ტომბაშე დეფიფქრათ თიშე, მუდგას ღორონთიშ სიტყვაშე დო თიშა გერსხილ პუბლიკაციეფშე ბგურაფლენთ. თეცალ გურაფა დო ფიქრ მიმეხვარებნა, გუვავითარათ ქრისტიანულ თვისებეფ, მუთ გინმოჭყვიდირაფუანა კრებას გეგმიფრჩქინათ „ჯიმალურ ჸოროფა დო სათუთ გრძნობეფ . . . ართიან შქას“ (რომ. 12:10). ამდღარ კურთხევეფშე ფიქრით იეჰოვაწკუმა ურთიერთობას იმამნგარენთ დო მომავალ კურთხევეფშე ფიქრით — იმენდის, ნამდა შემლებნა მარადიულო ვემსახურათ თის. თე ირფელ მოხვარნა, უმოს ხიოლით ვემსახურათ ღორონთის ამდღა.

19. ა) მუჭოთ ესაიაშ 30:18-ს ჭარჷ, მუშა შემლებნა ვორდათ დარწმუნებულ? ბ) მუ მიმეხვარებნა ხიოლით მიბთვინათ?

¹⁹ იეჰოვა „გემწოდირთუ“ ჩქინ მახვარებელო, მუჟამსით თინა განადგურენს თე უბადო ქვეყნიერებას (ეს. 30:18). დარწმუნებულ ვორეთ, ნამდა იეჰოვა, „სამართლიან ღორონთ“, ვემეჩანს უფლებას სატანაშ ქვეყნიერებას, თიშე ართ დღათ მეტ ხანს ხოლო იარსებას, ვინემ სამართლიანობა ითხინს (ეს. 25:9). იეჰოვაწკუმა ართო მოთვინებათ ველუთ თი დღას, მუჟამსით გათავისფალება იჸუაფ. თე დროშ დინახალე გინოჭყვიდილ მაფნა, დიბგურუათ ღორონთიშ სიტყვაშე დო მივაჸუნათ თის, ირიათო დუვაფასათ ლოცვაშ პატი დო იფიფქრათ კურთხევეფშე. თაშ ქიმიფქციებუთ-და, იეჰოვა ქიმმეხვარებნა, ხიოლით მიფთვინათ დო ვემსახურათ თის.