1. მუს ოკო ველდათ დო მუშა ოკო ვორდათ დარწმუნებულ?

 ᲩᲥᲘ ვამკვენა, მუჟამსით ნამთინე მოწინააღმდეგნა მსახურებაშ დროს. მომავალს წინააღმდეგობა ხოლო უმოსო მიძინანს (დან. 11:44; 2 ტიმ. 3:12; გამოცხ. 16:21). მარა შემლებნა დარწმუნებულ ვორდათ, ნამდა იეჰოვა ქომჩანა საჭირო მოხვარას, მუშენდა თინა ირიათო ოხვარუდ მუშ მსახურეფს, მუდგანერ რთულ ვა რდუკონ, შეასრულესკო მუნეფიშ დავალება. თეშ ოძირაფალო მორთ გუვარჩუათ მუსხირენ შემთხვევა წინასწარმეტყველ ეზეკიელიშ ცხოვრებაშე, მით ბაბილონშა გინოხორაფილ ებრაელეფს უქადაგენდჷ.

2. მუჭო ეჭარ იეჰოვაქ თი ხალხ, მიდგაშა ეზეკიელს აფუდ ოქადაგებელ დო მუს გუვარჩიენთ თე სტატიას? (ეზეკ. 2:3—6)

² მუნერ რდჷ თი ხალხ, მიდგაშა ეზეკიელს აფუდ ოქადაგებელ? იეჰოვა თინეფს ეჭარუნდჷ „უტიფარ“, „აჯამ“ დო „ურჩ“ ხალხო. თინეფს თიცალ ჭუაშ მერინაფა შეულებდეს, მუნერით ძიგირს დო თიცალ ოშქურანჯეფ რდეს, მუნერით მორიალე. ათეშენ ვამკვენა, მუშენ უწუ იეჰოვაქ ეზეკიელს მუსხირენშა: „ვა გაშქურნას“ (წეკითხით ეზეკიელიშ 2:3—6). ეზეკიელს შეიალებუ, შეასრულკო მუშა დავალებურ საქმე, მუშენდა: 1) იეჰოვაშ დანიშნულ რდჷ; 2) ღორონთიშ წმინდა შურ არზენდჷ ძალას დო 3) თიშ რწმენა ღორონთიშ სიტყვათ რდჷ გამანგარებულ. მუჭო მეხვარ თე სუმ მხარექ ეზეკიელს დო მუჭო მოხვარნა ჩქი ამდღა?

3. მუ სიტყვეფ გამანგარენდჷ ეზეკიელს დო მუჭო დარწმუნ იეჰოვაქ, ნამდა ელურდჷ?

³ იეჰოვაქ უწუ ეზეკიელს: „მა გიტენქ ისრაელეფშა“  (ეზეკ. 2:3, 4). თე სიტყვეფ გამანგარენდჷ ეზეკიელს, მუშენდა, მუშო ოკო რაგად, შუდკონ იჸიდ, ნამდა იეჰოვაქ მოსე დო ესაიას ხოლო თეცალ სიტყვეფ უწუ, მუჟამსით წინასწარმეტყველო გიორინუ (გამ. 3:10; ეს. 6:8). ეზეკიელს თინა ხოლო ჯგირო უჩქუდ, მუჭო მეხვარ იეჰოვაქ თე ჟირ წინასწარმეტყველს, გიორჯგინესკო სირთულეეფს. თაშ ნამდა, მუჟამსით იეჰოვაქ ჟირშა უწუ თის: „მა გიტენქ“, თე წინასწარმეტყველს უღუდ მიზეზ, ჯერდკო, იეჰოვა ქელუდირთუდ. თეს გეძინელ, ეზეკიელიშ წიგნის ხშირას ფხვადუთ წინადადებას: „გეგმმეცხად იეჰოვაშ სიტყვაქ“ (ეზეკ. 3:16; 6:1). თაშ ნამდა, ეზეკიელქ დერწმუნ, იეჰოვაშე დანიშნულ რდუნ. თეწკუმა ართო, თის, მუჭოთ მღვდელიშ სქუას, მუამუშშე ჯგირო არჩქვენუდ, მუჭო არწმუნენდჷ იეჰოვა მუშ წინასწარმეტყველეფს, ნამდა ქიმეხვარებუდ. ისაკის, იაკობის დო იერემიას იეჰოვა ურაგადუდ: „სქანწკუმა ვორექ“ (დაბ. 26:24; 28:15; იერ. 1:8).

4. ნამ გურიშემაქექაფალ სიტყვეფ გამანგარენდჷ ეზეკიელს?

⁴ მუჭო ოკო მიღესკო ისრაელეფქ ეზეკიელიშ გინნაჩემ ცნობა? იეჰოვაქ თქუ: „ისრაელეფ ვა მოირჩქილუანა, მუშენდა ვაკონა ჩქიმ მორჩქილა“ (ეზეკ. 3:7). ეზეკიელს ვა მურჩქილუესინ თით, თინეფქ იეჰოვაშ მორჩქილაშენ თქუეს ვარია. თე სიტყვეფ ეზეკიელს დარწმუნენდჷ, ნამდა ხალხიშ უარყოფით დამოკიდებულება მუ გლახა წინასწარმეტყველ რდუნ თის ვა ნიშნენდჷ. იეჰოვაქ თიშა ხოლო დარწმუნ, ნამდა, მუჟამსით მუშ განაჩენ შისრულებუდ, ხალხ ქიმეხვადუდ, „წინასწარმეტყველ რდჷ თინეფ შქას“ (ეზეკ. 2:5; 33:33). მუშო ოკო რაგად, თეცალ გურიშემაქექაფალ სიტყვეფ ეზეკიელს ქიმეჩანდჷ ძალას, ბოლოშა ქიმიჸონკო მუშ მსახურება.

5. მუჭოთ ესაიაშ 44:8-შე იძირე, მუ მამანგარენა?

⁵ ჩქი ხოლო ძალას მარზენა თიშ რჩქინა, ნამდა იეჰოვაშე ვორეთ დანიშნულ. თიქ გებდვეს პატი, თიშ მოწმეეფ ბჯოხოდან (ეს. 43:10). თენა მართალო დიდებულ პატი რე. მუჭოთ ეზეკიელს უწუ იეჰოვაქ, „ვა გაშქურნას“, თეშ ჩქი ხოლო მირაგადნა: „ვა გაშქურნან“. მუშენ ოკო ვა მაშქურნან ჩქი მოწინააღმდეგეეფშა? ეზეკიელცალო, ჩქი ხოლო იეჰოვაქ გომტეს დო თინა ელამრენა (წეკითხით ესაიაშ 44:8).

6. ა) მუჭო მარწმუნენა იეჰოვა, ნამდა ელამდირთუნა? ბ) მუ მარზენა ძალას?

⁶ იეჰოვა მარწმუნენა, ნამდა ქელამდირთუნა. მაგალთო, სოიშახ იეჰოვა თქუანდჷ: „თქვა რეთ ჩქიმ მოწმეეფ“, თინა იჩიებ: „მუჟამსით წყარშა გენურქ, სქანწკუმა იპჸიქ, მალწყარეფს ვაღინექ. მუჟამსით დაჩხირშა გემშურქ, ვა დორჭუნს, დაჩხირიშ ალს ხოლო ვაცილებე სქანდა“ (ეს. 43:2). მსახურებაშ დროს მინშა შეფხვადუთ დაბრკოლებეფს, ნამუთ დიდწყარალას მოგენს დო სირთულეეფს, ნამუთ დაჩხირს მოგენს. მარა იეჰოვაშ მოხვარათ ვაგრძელენთ ქადაგებას (ეს. 41:13). მუჭოთ ეზეკიელიშ დროს, თეშ ამდღა ხოლო ხალხიშ უმენტაშ ველერჩქილუანს ცნობას, მარა ფშუნა, ხალხიშ თეცალ დამოკიდებულება ვა ნიშნენს, ნამდა ჩქინ საქმეს, მუჭოთ მოწმეეფ, გლახათ ვასრულენთ. ჩქი ძალას მარზენა თიშ რჩქინა, ნამდა იეჰოვას გურს უხარენთ, მუჟამსით ართგურო ვაცხადენთ თიშ ცნობას. მოციქულ პავლექ თქუ: „თითოულ მუშ ხანდაშ მიხედვით მიღენს საფასურს“ (1 კორ. 3:8; 4:1, 2). ართ ბრელ ხანიშ პიონერ და იჩიებ: „ხიოლს მარზენს თიშ რჩქინა, ნამდა იეჰოვა ჩქინ ხანდას აჯილდოენს“.

7. მუჭო იმოქმედენდჷ ეზეკიელშა თი ხილუაშე ფიქრ, ნამუთ მუქ ძირჷ? (ქოძირით სურათ გალენ გვერდის).

⁷ ეზეკიელქ ქოძირ, მუ ძალა უღჷ ღორონთიშ წმინდა შურს. ხილუას ეზეკიელ ორწყედ, მუჭო ოხვარუდ წმინდა შურ ძალიერ სულიერ ქმნილებეფს დო მუჭო არზენდჷ მიმართულებას ქვერსემ ზეციერ ეტლიშ ბარბალეფს (ეზეკ. 1:20, 21). მუ რეაქცია უღუდ ეზეკიელს? თიქ ჭარჷ: „[თენა] ქობძირინ, ბირგულს ქეშვანთხჷ დო დუდ დიხას ქიგებდვჷ“. შიშით ეზეკიელქ დიხას ქიგიანთხჷ (ეზეკ. 1:28). უკულ, მუჟამსით ეზეკიელ დეფიქრებუდ თე დიდებულ ხილუაშე, უმოსო დერწმუნებუდ, ნამდა ღორონთიშ წმინდა შურიშ მოხვარათ შეიალებედ ბოლოშა ქიმიჸონკო მუშ მსახურება.

8, 9. ა) მუქ მოხვად, მუჟამსით იეჰოვაქ ეზეკიელს უზოჯ, გამწოდირთკო? ბ) მუჭო გამანგარ იეჰოვაქ ეზეკიელ თექ ომსახურებელო, სოდეთ რთულ ოქადაგებელ აჸიდ?

⁸ იეჰოვაქ უზოჯ ეზეკიელს: „კოჩიშ სქუა, გამწოდირთ, ნამდა ქუდოირაგადუე“. თე სიტყვეფქ წმინდა შურწკუმა ართო ქიმეჩ ეზეკიელს ძალა, ნამუთ ედგინაშო ოსაჭირუდ. თიქ ჭარჷ: „თიშ შურქ ძალა ქომუჩ“ (ეზეკ. 2:1, 2). თეშ უკულ მთელ მსახურებაშ დინახალე ეზეკიელს ღორონთ ხემძღვანელენდჷ მუშ ხეშ, „წმინდა შურიშ“, საშვალებათ (ეზეკ. 3:22; 8:1; 33:22; 37:1; 40:1). ღორონთიშ წმინდა შურქ გამანგარ ეზეკიელ მუშ დავალებაშო, ნამდა ქუქადაგკო თიცალ ხალხის, მით რდეს „აჯამეფ დო მუთუნ ვაგინუნან ფერეფ“ (ეზეკ. 3:7). იეჰოვაქ უწუ ეზეკიელს, ნამდა მუს ხოლო თინეფცალ აჯამო გინაშქვანდჷ დო უკულ გეუძინ: „ვა გაშქურნას თინეფშა დო შიშ ვენოიჭკირას თინეფიშ სახეეფქ“ (ეზეკ. 3:8, 9). შხვა სიტყვეფით ქოფთქუათინ, იეჰოვაქ თეცალ მუდგარენ უწუ ეზეკიელს: „ვემეჩა  უფლება თე ხალხიშ აჯამობას, გურ გოიტახას, მა გუგამანგარენქ“.

⁹ თეშ უკულ ღორონთიშ წმინდა შურ ირიათო ეზეკიელწკუმა რდჷ თიშ „სამქადაგებლო უბანს“. ეზეკიელქ ჭარჷ, ნამდა იეჰოვაშ წმინდა შურქ იმოქმედ თიშა. თე წინასწარმეტყველს ართ მარაქ დესაჭირ, ქინანჭუკო თი ცნობას, ნამუთ გაცხადებელ აჸიდ დო ქოთ შეიალებუ თექ (ეზეკ. 3:14, 15). უკულ იეჰოვაქ უზოჯ, მინდორშა მიდართკო, სოდეთ წმინდა შურქ კინ ქიმეჩ თის ძალა (ეზეკ. 3:23, 24). ეზეკიელ მზათ რდჷ მსახურებაშ დაჭყაფალო.

10. ჩქი მუნერ მოხვარა მოსაჭირნა ქადაგებაშ საქმეშ შესრულებას დო მუშენ?

¹⁰ ჩქი მუნერ მოხვარა მოსაჭირნა ქადაგებაშ საქმეშ შესრულებას? თე კითხვას ქუპასუხათინ, დუვართათ ეზეკიელიშ შემთხვევას. ქადაგებაშ დოჭყაფაშახ ღორონთიშ წმინდა შურქ თის ქიმეჩ ძალა, ნამუთ ოსაჭირუდ. მუჭოთ ეზეკიელიშ შემთხვევას რდჷ, ჩქი ხოლო ქადაგებაშ საქმეშ შესრულება ხვალე ღორონთიშ წმინდა შურიშ მოხვარათ შემალებენა. მუშენდა სატანა მობრძოლნა, ნამდა მიმოტებაფუან თე საქმე (გამოცხ. 12:17). ადამიანიშ გინაჯინუშე სატანა თიცალ ძალიერ რე, ნამდა ვეშმალებენა გივორჯგინათ თის. მარა დამოწმებაშ საქმეშე იძირე, ნამდა სატანაშ გერჯგინა შეიოლებერ რე! თე პროცეს ასე ხოლო მეურს (გამოცხ. 12:9—11). მუჟამსით მონაწილებას ბღებულენთ მსახურებას, ვოძირანთ, ნამდა ვა მოშქურნა თიშა. ჩქინ ირ ქადაგებათ სატანას გეგმეფს წყარშა ინურღვანთ. თაშ ნამდა, მუ გიმიარგამებ თით, ნამდა შემალებუეს, წინააღმდეგობეფიშ უმკუჯინუო ვემვოტეთკო ქადაგება? თინა, ნამდა წმინდა შურ მარზენა ძალას დო მიღნა იეჰოვაშ მოწონა (მათ. 5:10—12; 1 პეტ. 4:14).

11. მუს აკეთენს წმინდა შურ ჩქინო დო მუ ოკო ფქიმნათ, ნამდა ირიათო ბღებულენდათ თის?

¹¹ ხოლო მუს ბგურაფლენთ, მუჟამსით ფიფქრენთ, მუჭო გამანგარ იეჰოვაქ ეზეკიელ ქადაგებაშო? ღორონთიშ წმინდა შურს შეულებ გიმორჯგინაფუან  ნებისმიერ სირთულეშა, ნამდგას შილებე მსახურებას შეფხვადათ (2 კორ. 4:7—9). მუ ოკო ვაკეთათ, ნამდა ირიათო ბღებულენდათ წმინდა შურს? საჭირო რე, ვემვოტუათ ლოცვა თიშა დარწმუნებულეფქ, ნამდა იეჰოვა მირჩქილენა. იესოქ მუშ მოწაფეეფს დაგურუ: „ითხით, . . . გორით, . . . უხაკეთ“. თეშ პასუხო იეჰოვა „ქიმეჩანს წმინდა შურს თინეფს, მიდგა თხინს“ (ლუკ. 11:9, 13; საქ. 1:14; 2:4).

12. მუჭოთ ეზეკიელიშ 2:9—3:3-ს ჭარჷ, სოვრეშე მორთჷ გრაგნილქ დო მუ რდჷ თის მოჩამილ?

¹² მართალ რე, ეზეკიელს ძალას წმინდა შურ არზენდჷ, მარა, თეწკუმა ართო, თიშ რწმენა ღორონთიშ სიტყვათ რდჷ გამანგარებულ. ხილუას თიქ ძირჷ ხე, ნამდგას გრაგნილ უკებუდ (წეკითხით ეზეკიელიშ 2:9—3:3). სოვრეშე მორთჷ თე გრაგნილქ? მუ ინოჭარუდ თის? მუჭო გამანგარენდჷ თინა ეზეკიელიშ რწმენას? მორთ ქობძირათ. თე გრაგნილქ იეჰოვაშ ტახტშე მორთჷ. მუჭოთ იძირენ, თიშა გრაგნილიშ გინაჩამალო იეჰოვაქ თი ოთხ ანგელოზშე ართ-ართ გიმირინუ, ნამუთ ეზეკიელქ თეიშახ ძირჷ (ეზეკ. 1:8; 10:7, 20). გრაგნილს მოჩამილ რდჷ ღორონთიშ სიტყვეფ — განაჩენიშ ცნობა — ნამუთ დიდ პერიოდის ოხუდ. თე ცნობა ეზეკიელს აფუდ გინაჩამალ უდუჯერებელ გინოხორაფილეფშა (ეზეკ. 2:7). ცნობა გრაგნილიშ ჟირხოლო მხარეს გეჭარუდ.

13. მუ უწუ იეჰოვაქ ეზეკიელს გრაგნილიშ გურშენ დო მუშენ რდჷ თინა გემუან?

¹³ იეჰოვაქ უწუ წინასწარმეტყველს, უჭკუმუდკო თე გრაგნილ დო „ქვარა გეუფშაფუდკო“ თით. ეზეკიელქ დემორჩილ დო გრაგნილ მთლიანო ოჭკუმ. მუს ნიშნენდჷ ხილუაშ თე ნაწილ? საჭირო რდჷ, ეზეკიელქ ბოლოშა ქინანჭუკო ცნობას, ნამუთ გაცხადებელ აჸიდ. თე ცნობაქ თიშ ნაწილო ოკო გინირთკო, ნამდა ქიმოქმედკო თიშ გრძნობეფშა. გასაკვირ თინა რდჷ, ნამდა თე გრაგნილქ ეზეკიელს „თოფურცალ გემუანქ“ აჸუ (ეზეკ. 3:3). მუშენდა ეზეკიელშო იეჰოვაშ წარმომადგენელო რინაშ პატი რდჷ, თაშ ქოფთქუათინ, გემუან, სასიამოვნო გრძნობა (ფსალმ. 19:8—11). თინა მარდულ რდჷ თიშ, ნამდა იეჰოვაქ უძღვინ პატი, იმსახურკო მუშ წინასწარმეტყველო.

14. მუქ მეხვარ ეზეკიელს, მზათ ქოჸოფედკო მუშ დანიშნულებაშ შეიოსრულებერო?

¹⁴ ჭიჭე ხანიშ უკულ იეჰოვაქ უწუ ეზეკიელს: „ქუმომრჩქილე დო გურიშ ხოლოშა ქიმიღ არძა ჩქიმ სიტყვა, ნამდგას გირაგადუქ“ (ეზეკ. 3:10). თე მითითებათ იეჰოვაქ ეზეკიელს უწუ, მუშ მეხსიერებას დოჩუკო გრაგნილს ენოჭარილ სიტყვეფ დო იფიქრუკო თინეფშე. თეშნერო ეზეკიელიშ რწმენა გემანგარებუდ. თეს გეძინელ, თენა ქიმეხვარებუდ, ძალიერ ცნობა ხალხის გეგნოჩკო (ეზეკ. 3:11). მუჟამსით ეზეკიელ ჯგირო ქინანჭუდ დო ქირწმუნენდჷ ღორონთიშ ცნობას, მზათ იჸუაფუდ, ქიდიჭყუკო მუშ დანიშნულებაშ შესრულება დო ბოლოშა ქიმიჸონკო თინა (ქეშუდარით ფსალმუნიშ 19:14).

15. მუ ოკო მიბღათ გურიშ ხოლოშა, ჩქინ მსახურება ბოლოშა ქიმიპჸუნათინ?

¹⁵ მსახურება ბოლოშა ქიმიპჸუნათინ, ღორონთიშ სიტყვას ჩქი ხოლო ოკო ქიმეფჩათ საშვალება, ვემიოტუას ჩქინ რწმენაშ გამანგარება. თეწკუმა ართო, გურიშ ხოლოშა ოკო ქიმიბღათ „არძა სიტყვა“, ნამდგას იეჰოვა მირაგადნა. იეჰოვა ამდღა მუშ ჭარილ სიტყვათ, ბიბლიათ, მეჩიებნა. მუჭო შემლებნა დებრწმუნათ, ნამდა ღორონთიშ სიტყვა მოქმედენს ჩქინ ფიქრეფშა, გრძნობეფშა დო მოტივეფშა?

16. მუჭო შემლებნა ღორონთიშ სიტყვათ გემამნგარათ ჩქინ სიმბოლურ გურ?

 ¹⁶ მუჭოთ ოჭკუმალიშ ჭკუმუა დო თევრეშე საჭირო ნივთიერებეფიშ ორგანიზმშა მეღება მამანგარენა ფიზიკურო, თეშ ღორონთიშ სიტყვაშ გურაფა დო თიშე ფიქრ მამანგარენა სულიერო. ირიათო ფშუდან, მუშ გურაფა ოკო იეჰოვას ჩქინდა გრაგნილიშ მაგალითით. იეჰოვას ოკო, თაშ ქოფთქუათინ „ქვარა გევოფშათ“ თიშ სიტყვეფით — ჯგირო ქინვანჭათ თის. თეშ კეთება შილებე ლოცვათ, კითხირით დო ფიქრით. პირველ რიგის, ოკო ქიბლოცათ, ნამდა გურ მუვამზადათ ღორონთიშ აზრეფიშ მიოღებელო. უკულ წებკითხათ ბიბლიურ მონაკვეთ, ბოლოს გუვაჩენდათ დო ტომბაშე დეფიფქრათ თიშე, მუთ იბკითხით. მუთ უმოსო ფიფქრენთ, ჩქინ სიმბოლურ გურ თით უმოსო გემანგარებ ღორონთიშ სიტყვაშე მეღებულ რჩქინათ.

17. მუშენ რე მნიშვნელოვან, დეფიფქრათ თიშე, მუდგას ბიბლიაშე ბკითხულენთ?

¹⁷ მუშენ რე ბიბლიაშ კითხირ დო თიშე ფიქრ მნიშვნელოვან? თეშნერ მოქმედება მარზენა შინაგან ძალას, ნამუთ მოსაჭირნა ამდღა სამეფოშ ცნობაშ ოქადაგებელო დო დემესაჭირებნა განაჩენიშ გაცხადებელო, ნამდგაქ შილებე გვალო მალას მაჸუან ოკეთებელქ. თეს გეძინელ, მუჟამსით ფიფქრენთ იეჰოვაშ დიდებულ თვისებეფშენ, თიწკუმა უმოს ძალიერ ურთიერთობას ვავითარენთ. შედეგო, ფხარენთ შინაგან სიმშვიდეთ დო კმაყოფილებათ, მუთ მართალო გემუან დო სასიამოვნო რე (ფსალმ. 119:103).

18. მუს მეხვადუ ჩქინ ტერიტორიას მახორუ ხალხ დო მუშენ?

¹⁸ მართალ რე, ეზეკიელცალო წინასწარმეტყველეფ ვა ვორეთ, მარა გინოჭყვიდილ მაფნა, სოიშახ იეჰოვა მირჩქინანს საჭიროთ, თეიშახ გუვაცხადათ, თიშ სიტყვას, ბიბლიას, ენოჭარილ ცნობა. მუჟამსით გასამართლებაშ დრო ქუდოდირთუ, ჩქინ ტერიტორიას მახორუ ხალხის ვაღვენუ მიზეზ, თქუას, ნამდა ვემუღებ გაფრთხილება ვარდა ღორონთიქ თინეფ გეგშეტუ (ეზეკ. 3:19; 18:23). თინეფ ქიმეხვადნა, ნამდა ცნობა, ნამდგას ჩქი ფქადაგენდით, ღორონთშე მიშჷ.

19. მუ მუჩანა ძალას მსახურებაშ გაგრძელებერო?

¹⁹ მუ მუჩანა ძალას, შევასრულათ ჩქინ მსახურება? თი სუმ მხარე, ნამუთ ეზეკიელს ოხვარუდ. მაგალთო, მიჩქნა, ნამდა იეჰოვაშ დანიშნულ ვორეთ, თიშ წმინდა შურ მარზენა ძალას დო თიშ სიტყვა ამანგარენს ჩქინ რწმენას. თე ირფელიშ ჭყოლოფათ ვაგრძელენთ ქადაგებას. იეჰოვაშ მოხვარათ გინოჭყვიდილ მაფნა, ვემვოტუათ ჩქინ მსახურება დო მიფთვინათ „ბოლოშახ“ (მათ. 24:13).