ᲘᲣᲓᲔᲕᲔᲚ, სახელო მორდოქაი, მნიშვნელოვან როლს ლაჸაფენს ბიბლიაშ წიგნის, ესთერს, მოშინაფილ მოვლენეფს. თინა რდჷ გინოხორაფილ იუდეველ, მით სპარსეთიშ სამეფო სასახლეს მსახურენდჷ. თენა რდჷ ჯვ. წ. მახუთა საუკუნეშ დაჭყაფუს, მეფე ახაშვეროშიშ დროს (თე მეფეს ამდღა უმოსო მიშინუანა მუჭოთ ქსერქსე I). მორდოქაიქ აკარღვჷ თინეფიშ გეგმეფ, მიდგას მეფეშ ჸვილუა ულამუდ. მარდულობა გეგმოხანტკონ, მეფექ ზოჯჷ, თინა არძაშ წოხოლე განადიდესკო. უმოს გვიანო, მორდოქაიშ დო შხვა იუდეველეფიშ ნტერიშ, ჰამანიშ, ღურაშ უკულ, მეფექ თინა პრემიერ მინისტრო გიორინუ. თე თანამდებობაქ საშვალება ქიმეჩ მორდოქაის, გეგშაშქუკო ბრძანება, ნამუთ ეშაჭყვიდუაშე ირსხენდჷ იუდეველეფს სპარსეთიშ იმპერიას (ესთერი 1:1; 2:5, 21—23; 8:1, 2; 9:16).

მა-20 საუკუნეშ დაჭყაფუს ნამთინე ისტორიკოს აცხადენდჷ, ნამდა ესთერიშ წიგნ მოგონილ რდჷ დო თექ მოშინაფილ მორდოქაი დღას ვა არსებენდჷ. მარა 1941 წანას არქეოლოგეფქ ქოძირეს მტკიცებულება, ნამუთ შილებე ხუჯის უკინენდას ბიბლიას მოშინაფილ ინფორმაციას მორდოქაიშ გურშენ. მუ ძირეს თინეფქ?

მარკვიებელეფქ ქიმიოგორეს სპარსეთიშ ლურსმულ ნაჭარას, სოდეთ მოშინაფილ რე კოჩ, სახელო „მარდუკა“ (მარგალურო მორდოქაი). თინა მსახურენდჷ ხემძღვანელო ქალაქ შუშანს. შილებე ბუღალტერ ჸოფედკო. აღმოსავლურ ისტორიაშ ექსპერტ არტურ უნგნადი იჩიებ, ნამდა თენა რე პირველ არაბიბლიურ წყარო, სოდეთ მოშინაფილ რე მორდოქაი.

უნგნადიშ განცხადებაშ უკულ მეცნიერეფქ ანთასობით შხვა სპარსეთიშ ლურსმულ ნაჭარა თარგმნეს. თინეფ შქას რდჷ თიხაშ ჭიჭე ფილეფ, ნამუთ ქალაქ პერსეპოლისიშ კიდალეფიშ აკნარღვეფუეფიშ გოხოლუას ძირეს. თე ფილეფ დათარიღებულ რე ქსერქსე I-იშ მართველობაშ დროთ. თინა რე ჭარილ ელამურ ნინაშა დო მოშინაფილ რე მუსხირენ სახელ, ნამდგაშ ძირაფა წიგნ ესთერს ხოლო შემლებნა. a

პერსეპოლისიშ მუსხირენ ფილას მოშინაფილ „მარდუკა“, მით მსახურენდჷ მეფეშ მდივანო შუშანიშ სასახლეს ქსერქსე I-იშ მართველობაშ დროს. ართ ფილა თის მიშინუანს, მუჭოთ მათარგმნალს. თე დეტალ მეურე ბიბლიას ეჭარილ მორდოქაის. თინა მეფე ახაშვეროშიშ (ქსერქსე I-იშ) კარს მსახურენდჷ დო, არძაშ ნაკლებ, ჟირ ნინაშა იჩიებუდ. მორდოქაი ხშირას გეხედ შუშანიშ სასახლეშ კარმინოლწკუმა (ესთერი 2:19, 21; 3:3). თე კარმინოლ რდჷ დიდ ნაგებობა, სოდეთ მსახურენდეს თინეფ, მიდგას სასახლეს მაღალ თანამდებობა უკინებდეს.

საინტერესო დეტალეფით გჷ ართიანს ფილეფს მოშინაფილ „მარდუკა“ დო ბიბლიას მოშინაფილ მორდოქაი. თინეფ ართდოიგივე დიხას ართდოიგივე დროს ცხოვრენდეს დო ართდოიგივე ადგილს ართდოიგივე თანამდებობა უკებდეს. ართო აკოშაყარელო თე არძა დეტალს მეპჸუნთ თი აზრშა, ნამდა არქეოლოგიურ აღმოჩენეფ შილებე მეჩიებდან ზუსტას თი მორდოქაიშ გურშენ, ნამუთ წიგნ ესთერს რე მოშინაფილ.