დებაბდჷ 1934 წანას ქრისტიანულ ოჯახის. ჩქიმ მშობლეფ, ფრედი დო ედნა მოლოჰანეფ თე დროშო უკვე 20 წანა რდუ მუთ ბიბლიაშ მარკვიებელეფ (იეჰოვაშ მოწმეეფ) რდეს. თინეფქ ღორონთ ქომიჸოროფეს, მუდგაშენ მანგარ მარდულ ვორექ. ჩქი ჭიჭე ქალაქ პარსონზის (სამხრეთაღმოსავლეთ კანზასი) ფცხოვრენდით დო თექიან კრებაშა გილეფშით, სოდეთ უმენტაშ ცხებულ ქრისტიანეფ რდეს. ჩქინ ოჯახ რეგულარულო ოსწრუდ კრებაშ შეხვალამეფს დო ქადაქენდჷ სახიოლო ამბეს. ირ საბატონს, ნაონდღერს ხალხმრავალ ადგილეფშა მიფშით ოქადაქეფშა. მინშა მანგარო ფშურდუდით, მარა მსახურებაშ უკულ მუაჩქიმს ირიათო მეპჸუნდით მაროჟნიშ ოჭკუმშა.

ჩქინ ჭიჭე კრებას დიდ ტერიტორია აფუდ დამუშებელ, ნამდგაშა მუსხირენ ჭიჭე ქალაქ დო სოფელ მიშეშ. მუჟამსით ფერმერეფს მივაკითხანდითინ, თინეფ ჩქინ ლიტერატურაშ მანგიორო ბოსტნეულს, ახალ კვერცხეფს (მინშა ოგვაჯეშე ენაჭოფა) ვარდა ცოცხალ წიწლეფს მარზენდეს. ლიტერატურაშო მუაჩქიმ წინასწარ დვანდჷ ფარას. ჩქი ბრელ ფარა ვამღუდეს, ათეშენ მობინადრეეფიშ მოჩამილ ოჭკუმალს ოჯახშო გიმიბრინუანდით.

ჩქიმ მშობლეფს პატეფონ უღდეს, ნამუსით ოქადაქებელო გიმირინუანდეს. მა ჭიჭე ვორდჷ დო ვამჩქუდ თიშ გიმორნაფა, მარა ხიოლით ვოხვარუდ თინეფს ჯიმა რუტერფორდიშ ლექციეფიშ ჩართებას კინ მეკითხირიშ დო ბიბლიაშ გურაფეფიშ დროს.

მუაჩქიმქ 1936 წანაშ გიშნაულა ფორდი გეგნაკეთ დო თის ხონარიშ გუმამანგარებელ ქიგმარინუ. თე მანქანაშ ჭყოლოფათ ეფექტურო ფქადაქენდით სახიოლო ამბეს. ხალხიშ ყურადღება ქიმიფქცითკონ თიშენ, დიო მუსიკას ჩუვართენდით დო უკულ ბიბლიურ მოხსენებეფშა ვორჩქილუანდით. ჩანაწერიშ  მორჩქილაფაშ უკულ დაინტერესებულეფს ლიტერატურას მივარზიენდით.

კანზასიშ შტატიშ ჭიჭე ქალაქ ჩერივეილს პოლიციაქ მუაჩქიმს უფლება ვემეჩ, ნამდა ქალაქიშ პარკშა მანქანათ მიშულებუდკო, მუშენდა ჟეშხა დღას თექ ბრელ კოჩ ისვანჯუდ. მარა პოლიციელქ ნება ქიმეჩ, პარკიშ გოხოლუას ქიგურინუაფუდკო მანქანა. მუაჩქიმქ ქუდაჸუნ თიშ მითითებას დო მანქანა პარკიშ მელე გაჩერ, სოვრეშეთ ხალხ ადვილო ქიგეგონენდჷ ხონარს. ჩქიმო ირიათო სახიოლო რდუ ჩქიმ მშობლეფ დო უნჩაშ ჯიმა, ჯერიწკუმა ართო მსახურება.

1930-იან წანეფიშ ბოლოს ქადაქებაშ სპეციალურ კამპანიეფ დაგეგმეს თი ტერიტორიეფს, სოდეთ დიდ წინააღმდეგობეფ რდუ. შკა სერს ებდირთუდით (მუჭოთ თენა მისურიშ შტატის, ჯოპლინს ვაკეთით) დო არძა ჸუდეს, კარიშ თუდო ტყობაშე იპტენდით ტრაქტატეფს. თეშ უკულ ქალაქიშ გალე იფშაყარუდით, ნამდა ქიგებგითკო, პოლიციას მითინ ხომ ვაფუდ ჭოფილ.

თი წანეფს მიღდეს პატი, მსახურებაშ ხოლო ართ სფეროს, საინფორმაციო მსველობას მიბღითკო მონაწილება. სახიოლო ამბე გუვაცხადითკონ თიშენ, პლაკატეფ ქიგნიფქუნით დო ქალაქის ჯგუფეფო გილეფშით. ჯგირო ფშუ ართ-ართ თეცალ მსველობაშ დროს ჩქინ მეგობრეფს გინაქუნდეს პლაკატეფ, ნამუსით მიკოჭარუდ: „რელიგია ტყურა რე დო აფერისტობა“. თინეფ ქალაქის, სოდგარენ 1,6 კილომეტრის გილეშეს დო უკულ ჩქინ ჸუჩა ირთუდეს. საბედნეროთ, თეგვარ ქადაქებაშ დროს წინააღმდეგობეფ ვაშიბნა დო ბრელ დაინტერესებულეფს შეხვადეს.

კონგრესიშ დასწრებელო ხშირას კანზასშე ტეხასშა მიფშით. მუაჩქიმ მისური-კანზასი-ტეხასიშ რკინაშშარას მუშენდჷ, ათეშენ შემლებდეს უფასოთ გილაფრთითკო, მუთ საშვალებას მარზენდეს დევესწრითკო კონგრესეფს დო იბძირეთკო ნათესეფ. დიაჩქიმიშ ჯიმა, ფრედ ვიზმარი დო თიშ ოსურ ულელი, ტეხასიშ შტატის, ტემპლის ცხოვრენდეს. ბიძია ფრედიქ ჭეშმარიტება ახალგაზრდობას, 1900-იან წანეფიშ დაჭყაფუს გეგჷ. თიქ დინათ დო ნაგურეფუს მუშ და დო ჯიმალეფს, თინეფწკუმა ართო დიაჩქიმს ხოლო ურაგადუდ. ჩქიმ ბიძიას ცენტრალურ ტეხასიშ შტატის ჯიმალეფ ჯგირო იჩინენდეს. თინა თაქ ართ დროს სამხარეო მსახურ (ამდღანერ რაიონულ ზედამხედველ) რდუ. ბიძია ჯგირ გურიშ, ბედნერ დო მხიარულ კოჩ რდუ. თინა დუდ გინოდვალირო ქადაქენდჷ დო თიშ მაგალითიქ ჯგირო იმოქმედ ჩქიმ ცხოვრებას.

1941 წანას ოჯახით მისურიშა, სენტ-ლუისშა დიდ კონგრესიშ დასწრებშა მიდაფრთით. ბაღანეფ ცალკე გიშართილ ადგილს ქუდმოხუნეს, ნამდა ჯიმა რუტერფორდიშ მოხსენება ქიმიფრჩქილეთკო, სათაურით: „მეფეშ ბაღანეფ“. მოხსენებაშ ბოლოს არძას ქუმაჩუქეს წიგნი სათაურით „ბაღანეფ“, ნამუთ ჯიმა რუტერფორდიქ დო თიშ დამხმარეეფქ გინოფჩეს. თე კონგრესის სოდგარენ 15 000 ბაღანაქ მიღჷ თე სულიერ ძღვინ.

 1943 წანაშ აპრილს მიღდეს თიშ პატი, კანზასის, კოფივეილს დევესწრითკო ჭიჭე, მარა მნიშვნელოვან კონგრესის, ნამუშ დევიზ რდუ „მოქმედებაშ დრო რე“. თექ გიმაცხადეს, ნამდა კრებეფს თეორკატიულ მსახურებაშ სკოლაშ შეხვალამეფ ჩეტარებუდ. თეს გეძინელ, ჩქი მიბღით ბროშურა, ნამუთ თე სკოლას ოკო გიმიბრინეთკო. თინა 52 გაკვეთილშე შითმოდირთუდ. თი წანაშ ბოლოს პირველ დავალება გუვაკეთ. თე კონგრეს ჩქიმო ხოლო თიშენ რდუ განსაკუთრებულ, ნამდა მუსხირენ კოჩწკუმა ართო რგილ ჭიჭე აუზის დიბნათ.

1951 წანას სკოლა გუვათე დო მნიშვნელოვან გადაწყვეტილებეფ მაფუდ მიოღებელ. მანგარო მოკოდ ბეთელს მსახურება, სოდეთ ადრე ჯერი მსახურენდჷ, ათეშენ ბრუკლინიშ ფილიალშა ანკეტა მიდვოჯღონ. თე გადაწყვეტილებას კურთხევეფქ მაჸუნ. განცხადებაშ ჯღონუაშე ჭიჭე ხანშა, 1952 წანაშ 10 მარტის ბეთელშა მემწვიეს.

მა სტამბას მოკოდ მუშობა, სოდეთ შემალებედ ჟურნალეფიშ დო ლიტერატურაშ ბეშტუას მიბღიკო მონაწილება. მარა მიმტანო დაბნიშნეს დო ჭიჭე ხანშა კუხნაშა გეგნომჸონეს, სოდეთ დიდ გამოცდილება მიბღჷ. თაშ ნამდა, დღას ვაფშიბ თიშ პატი, სტამბას მიმუშებუდკო. ჩქი მორიგეობათ მუფშენდით დო თავისფალ დრო მოსკიდუდ. თე დროს ბეთელიშ ბიბლიოთეკაშა მიფშჷ დო პირად გურაფას ვატარენდჷ. თე ირფელქ მიმეხვარ სულიერო წიმი ულას დო რწმენაშ გამანგარებას. თეს გეძინელ, უმოს მტკიცაშე გეგნოპჭყვიდ, მუთ შილებე, მეტ ხანს ვიმსახურკო ბეთელს. ჯერიქ 1949 წანას ბეთელშე მიდართჷ დო პატრიცია ქიმიჸონ ოსურო. თინეფქ ბრუკლინიშ ხოლოშა გინილეს ოცხოვრეფშა. ჯერი დო პატრიცია ირიათო გურშა ელამკინანდეს დო მოხვარდეს, მუჟამსით ბეთელს ახალ დოჭყაფილ მაფუდ მსახურება.

ბეთელშა ახალ მეულირ ვორდჷ, მუჟამსით ჯიმალეფ გორუნდეს თი ბეთელელეფს, მიდგას შეიალებედ საჯარო მოხსენებეფით გიშულა. თე ბეთელელეფქ ართ წანაშ დინახალე ბრუკლინიშ გოხოლუას 322 კილომეტრიშ რადიუსის კრებეფიშ მონახულება ქიდიჭყეს. თინეფ საჯარო მოხსენებეფს კითხულენდეს დო კრებაწკუმა ართო მსახურენდეს. მა ხოლო მიღუდ თიშ პატი, თე მომხსენებელეფ შკას პჸოფედკო. მანგარო მნერვიანენდჷ, მუჟამსით მოხსენებათ გიშეფშჷ. თი დროს მოხსენებეფ ართ სათის იგრძელებუდ. კრებაშ შეხვალამეფშა ირიათო მატარებელით გილეფშჷ. ჯგირო ფშუ 1954 წანაშ ზოთონჯიშ ჟეშხა დღა, მუჟამსით ნაონდღერს მატარებელშა გეშაფრთჷ. თიმ ონჯუას ნიუ-იორკის ოკო ვორდიკო. მარა შარას ბორიაქ გელჷ დო თეს თირქ ხოლო ქუმაჸუნ. მატარებელიშ მატორქ მუშობა მიოტუ დო ნიუ-იორკშა თუთაშხას, ოჭმარეშ 5 საათის მერთჷ. მატარებელიშ სადგურშე მეტროთ მიდაფრთჷ ბრუკლინშა. ჭიჭექ დემეგვიან დო მანგარ შულადირ ხოლო ვორდჷ, მუშენდა მთელ სერს ვა დომრულუაფ, მარა მეულა დო ხეთეშე ქიდიპჭყჷ კუხნას მუშობა. თე სირთულეეფს თი ხიოლ გინოფორუნდჷ, ნამუთ კრებას დო შხვადოშხვა და დო ჯიმალეფწკუმა მსახურებას მოჸუნდჷ.

ბეთელს მსახურებაშ პირველ წანეფს მონაწილებას ბღებულენდჷ ბიბლიაშ გურაფაშ პროგრამას, ნამუსით ირ მარას გინმოჩანდეს ჩქინ რადიოსადგურით WBBR. თიმ დროს სტუდიეფ კოლუმბია ჰაიტსიშ 124 ნომერს, მაჟია სართულს რდუ. ჯიმა ალექსადრე მაკმილან, ნამუთ ბეთელს დიდ ხანს მსახურენდჷ, რეგულარულო ღებულენდჷ მონაწილებას თე პროგრამას. თინა ბეთელიშ ოჯახიშ ახალგაზრდა წევრეფს იეჰოვაშ მსახურებაშ ჯგირ მაგალითის მარზენდეს.

1958 წანას შხვა დანიშნულება ქომჩეს — გალაადიშ სკოლაშ სტუდენტეფშა მაფუდ ყურადღება მიოქციებელ. მა მოვალუდ ქიმვეხვარკო თე ართგურ და დო ჯიმალეფს ვიზეფიშ ეჭოფუას დო მგზავრობას. თიმ დროს თვითმფრინავიშ ბილეთეფ ძვირ რდუ, ათეშენ ხვალე მუსხირენ სტუდენტის შეულებუდ თით მგზავრობა. ბრელ, მიდგას აფრიკაშა ვარდა აზიაშა აფუდ ოულარ, სატვირთო გემეფით მიშჷ. მარა ფასეფიშ დარკებაშ უკულ, მისიონერეფს შეულებდეს თვითმფრინავით იმგზავრესკო.

1960 წანას შხვა საქმექ ხოლო ქიგმაძინ. ქუდმავალეს თვითმფრინავიშ ბილეთეფიშ ორგანიზება  თინეფშო, მით 1961 წანას ამერიკაშ შეერთებულ შტატეფშე ევროპაშა საერთაშორისო კონგრესეფიშ დასწრეფშა მიშჷ. ართ-ართ კონგრესის მა ხოლო დევესწრჷ ჰამბურგის (გერმანია). კონგრესიშ უკულ სუმ შხვა ბეთელელ ჯიმაწკუმა ართო მანქანა დეფქირით დო გერმანიაშე იტალიაშა, რომიშ ბეთელიშ ოძირაფშა მიდაფრთით. თევრეშე პირინეეფიშ გვალეფს მიკულეთ დო საფრანგეთშა გეგნოფრთით. უკულ ესპანეთშა გუვაგრძელით მოგზაურობა, სოდეთ იეჰოვაშ მოწმეეფს თხოზუდეს. ჩქი ბარსელონელ ჯიმალეფს ლიტერატურა მევუღით, ნამუთ საჩუქარცალო მაფდეს გოკირილ. თე შეხვალამაქ მანგარ გურიშ ემაკინალქ იჸუ არძაშო! თევრეშე ამსტერდამშა გუვარგძელით შარა დო უკულ თვითმფრინავით — ნიუ-იორკშა.

ართ წანაშ უკულ ახალ დავალება ქომჩეს; მა ოკო დაბგეგმიკო თი და დო ჯიმალეფიშ მგზავრობა, მით მთელ მსოფლიოს საერთაშორისო კონგრესეფს დესწრებდეს. თე კონგრესეფქ ჩეტარ 1963 წანას, ნამუშ დევიზ რდუ „მარადიულ სახიოლო ამბე“. მა 583 დელეგატის მივეხვარ დესწრესკო კონგრესეფს ევროპას, აზიას, წყნარ ოკეანეშ კუნძულეფს, ჰონოლულუს, ჰავაის დო პასადინას (კალიფორნია). თეს გეძინელ, მოგზაურობაშა მიშეშ საგანმანათლებლო ტურეფ ლიბანი დო იორდანიას, სოდეთ დელეგატეფ ბიბლიურ ადგილეფს ძირუნდეს. ბილეთეფ დო სასტუმროეფწკუმა ართო, ჩქინ განყოფილება ვიზეფიშ ეჭოფუაშო ხოლო ზრუნენდჷ.

1963 წანას ჩქიმ ცხოვრებას მნიშვნელოვან მოვლენაქ მოხვად. 29 ივანობას ლილა როჯერს ქიმიპჸონ ოსურო, ნამუთ მისურიშე რდუ. თე დროშო თინა სუმ წანა რდუ, მუთ ბეთელს მსახურენდჷ. კამპანიაშე ართ მარაშ უკულ მა დო ლილაქ მოგზაურობა ქიდიპჭყით დო საბერძნეთი, ეგვიპტე დო ლიბანი ქობძირით. თეშ უკულ ბეირუთშე იორდანიაშ ჭიჭე აეროპორტშა გეგნოფუბრინით. თი ქიანას ჩქინ საქმიანობა ვარიებულ რდუ. გაგებულ მაფდეს, ნამდა იეჰოვაშ მოწმეეფს იორდანიაშ ვიზას ვარზენდეს, ათეშენ მოინტერესდეს, მუ სიტუაცია დოფხვადუდეს თექ. ჩქი გამკვირდეს, მუჟამსით აეროპორტიშ ტერმინალს თოლშა მალაფარ ადგილს ხალხიქ ქუდოფხვადეს, მიდგას დიდ პლაკატ უკებუდ წარწერათ: „მიგესალმებუთ იეჰოვაშ მოწმეეფ!“. ჩქინო სახიოლო რდუ თი ბიბლიურ ადგილეფიშ ძირაფა, სოდეთ ჯვეშო პატრიარქეფ ცხოვრენდეს, იესო დო მუშ მოწაფეეფ ქადაქენდეს დო სოვრეშეთ ქრისტიანობაქ მთელ მსოფლიოს გევრცელ (საქ. 13:47).

ლილა 55 წანას ართგურო ელამირდჷ არძანერ თეოკრატიულ დანიშნულებაშ შესრულებას. ჩქი მუსხირენშა იბდით ესპანეთი დო პორტუგალიაშა, სოდეთ ჩქინეფს თხოზდეს. ჩქი გურშა ელვუკინანდით ჩქინ მეგობრეფს დო თინეფშა ლიტერატურაწკუმა ართო შხვა აუცილებერ ნივთეფ ხოლო მემღუდეს. თეს გეძინელ, თი ჯიმალეფ ხოლო ქიბძირეთ, მით ესპანეთიშ ჯვეშ ციხეს, კარდისის ხედეს. მოხიოლუდ, მუჟამსით ჩქიმ მოხსენებეფით თინეფს გურშა ელვუკინანდჷ.

 1963 წანაშე მოჸუნაფილ მიღუდ თიშ პატი, საერთაშორისო კონგრესეფიშ ტურეფიშ ორგანიზებაშა მემღებუდკო მონაწილება. თე კონგრესეფ იტარებუდ აფრიკას, ავსტრალიას, ცენტრალურ დო სამხრეთ ამერიკას, ევროპას, შორეულ აღმოსავლეთის, ჰავაის, ახალ ზელანდიას დო პუერტო-რიკოს. მა დო ლილას მანგარო მოხიოლდეს კონგრესეფიშ დასწრება. ართ-ართ თეცალ კონგრესიქ ჩეტარ ვარშავას (პოლონეთი) 1989 წანას. რუსეთშე ბრელ და დო ჯიმაქ პირველო დესწრჷ თეშმადიდა კონგრესის. შეფხვადით ნამთინე და დო ჯიმას, მით საბჭოთა კავშირიშ დროს რწმენაშ გურშენ მუსხირენ წანას ციხეს ხედჷ.

ჩქიმო დიდ პატი რდუ მთელ მსოფლიო მაშტაბით ბეთელიშ ოჯახიშ წევრეფიშ დო მისიონერეფიშ მონახულება. ბოლო მონახულება სამხრეთ კორეას მიღდეს, სოდეთ სუვონიშ ციხეს 50 ჯიმა იბძირეთ. თინეფ არძა ჯგირ განწყობათ რდეს დო ელდეს თი დროს, მუჟამსით კინ შეიალებედეს მსახურება. თე ჯიმალეფიშ ძირაფაქ გურიშ ემაკინალქ იჸუ ჩქინო (რომ. 1:11, 12).

ჩქიმ თოლით ბძირჷ, მუჭო აკურთხჷ იეჰოვაქ მუშ ხალხ წანეფიშ დინახალე. 1943 წანას, მუჟამსით იბნათინ, ხვალე 100 000 მაქადაქებელ რდუ, მარა ამდღა 8 000 000 უმოს კოჩ ომსახურ იეჰოვას 240 ქიანას. თეცალ წიმოძინას მანგარო შეუნწყუ ხე გალაად თებულ და დო ჯიმალეფიშ შრომაქ. მანგარ სახიოლო რდუ თე მისიონერეფწკუმა ართო წანეფიშ დინახალე მსახურება დო თინეფიშ მოხვარა, ნამდა შეასრულესკო მუნეფიშ დანიშნულება.

მოხიოლ, ახალგაზრდობას სწორ გადაწყვეტილება მიბღჷ დო ბეთელს მსახურება დიპჭყინ. იეჰოვაქ ცხოვრებას ხვეიანო მაკურთხჷ. ბეთელს მსახურებაწკუმა ართო, მა დო ლილას მიღდეს თიშ პატი, წანეფიშ დინახალე ბრუკლინიშ კრებაწკუმა მიმსახურებდესკო, სოდეთ ბრელ მეგობარ გიფრჩქინით.

ლილაშ მოხვარათ შემლებ ბეთელს მსახურებაშ გაგრძელება. 84 წანას ვორექ გინოჩილათირ, მარა იშენით მნიშვნელოვან საქმეს ვორთუქ — ბეთელს კორესპოდენციაშ საქმეს ვორხვარუქ.

მანგარ სახიოლო რე იეჰოვაშ ორგანიზაციაშ წევრობა დო თიშ ძირაფა, მუნერ სხვაობა რე ღორონთიშ მსახურეფ დო თინეფ შქას, მით ვამსახურ თის. თენა უმოსო მოძირანა მალაქიაშ 3:18-ს ინოჭარილ სიტყვეფიშ მნიშვნელობას: „კინ ქოძირუნთ სხვაობას მართალ დო უბადო შქას, ღორონც ომსახურ დო ვამსახურუნ თიშ შკას“. ირ დღას ვორწყეთ, მუჭო გილმელებ სატანაშ სისტემა დო მუჭო იძინანს თი ხალხიშ რიცხვ, მიდგას მუთუნიშ იმენდ ვა უღჷ დო ცხოვრებას მუთუნ ვახიოლ. მარა თინეფს, მით იეჰოვას ომსახურნან, თე კრიტიკულ დროს ხოლო ბედნერ ცხოვრება დო მომავალიშ იმენდ უღნა. მუშმადიდა პატი რე, ნამდა შემლებნა სახიოლო ამბე გუვავრცელათ! (მათ. 24:14). ჩქი არძას ართ შურ მოლნა თი დროშა, მუჟამსით ღორონთიშ სამეფო თე ქიანას ბოლოს მუღენს დო შეასრულენს დაპირებულ კურთხევეფს, მუდგაშა მარადიულ სიცოცხლე დო ჯგირ ჯამრთელობა მიშურს. თეშ უკულ იეჰოვაშ ართგურ მსახურეფ დედამიწას მარადიულ ცხოვრებათ გეხარებნა.