1, 2. ა) მუს უკებუდ იესოშ ცხოვრებას მთავარ ადგილ დო მუშენ? ბ) მუ ოკო ვაკეთათ, ნამდა ვორდათ „ღორონთიშ თანამშრომელეფ“?

იესო ქრისტე ჯაშ მოხელე დო მასწავლებერ რდუ (მარ. 6:3; რომ. 15:8). თინა ჟირხოლო საქმეს სრულყოფილო ასრულენდჷ. ჯაშ ხელობას მუშობაშ დროს იესოქ ქიდიგურუ, მუჭო გიმირინუკო სამუშა იარაღეფ, ჯაშ მასალაშ დამუშებელო. თეს გეძინელ, თინა სახიოლო ამბეშ მასწავლებერ ხოლო რდუ დო წმინდა წერილეფიშ რჩქინას გიმირინუანდჷ, ნამდა უბრალო ხალხიქ ღორონთიშ სიტყვას მოჩამილ ჭეშმარიტებას ქინანჭუკო (მათ. 7:28; ლუკ. 24:32, 45). 30 წანერო გინირთუნ, ჯაშ ხელობას დუდ დანებ, მუშენდა უჩქუდ, მსახურება უმოს მნიშვნელოვან საქმე რდუ. მუჭოთ თიქ თქუნ, ღორონთიქ თიშ გურშენ მაშკვჷ, ნამდა სამეფოშ გურშენ სახიოლო ამბე გუცხადებუდკო (მათ. 20:28; ლუკ. 3:23; 4:43). იესოშ ცხოვრებას განსაკუთრებულ ადგილ მსახურებას უკებუდ დო თის ოკოდ, შხვეფს ხოლო მუწკუმა ართო უქადაქებდესკო (მათ. 9:35—38).

² შილებე ჯაშ ხელობაწკუმა მუთუნ საერთო ვამღუდან, მარა იესოცალო სახიოლო ამბეს ფქადაქენთ. თენა თიცალ მნიშვნელოვან საქმე რე, ნამდა ღორონთ ხოლო ღებულენს მონაწილებას დო ჩქი „ღორონთიშ თანამშრომელეფ“ ვორეთ (1 კორ. 3:9; 2 კორ. 6:4). ჯგირო მიჩქნა, ნამდა იეჰოვაშ „სიტყვაშ არსი ჭეშმარიტება რე“ (ფსალმ. 119:159, 160). ზუსტას ათეშენ დარწმუნებულ ოკო ვორდათ, მსახურებაშ დროს ღორონთიშ სიტყვას სწორას გინოფჩანთ (წეკითხით 2 ტიმოთე 2:15). * თაშ ნამდა, ჩქი ვოცადუთ უმოს დახელოვნებურო გიმიბრინუათ ღორონთიშ  სიტყვა — მთავარ იარაღ, ნამუშ საშვალებათ ხალხის ჭეშმარიტებას ვოგურუანთ იეჰოვა, იესო დო სამეფოშ გურშენ. თეშ კეთებას ქიმმეხვარანინ, იეჰოვაშ ორგანიზაციაქ გიშაშკვჷ მუსხირენ ძირითად საშვალება, ნამუთ ჯგირო ოკო გეფჩინებაფუათ. ჩქი თინეფს გურაფას მოხვარნან თი საშვალებეფს ვუძახუთ.

3. მუშა ოკო მაფდან მთელ ყურადღება გინოღალირ დო მუჭო მიმეხვარებნა თეშ კეთებას საქმეეფიშ 13:48?

³ შილებე ფიქრენდათ, მუშენ უძახნა თე საშვალებეფს გურაფას მოხვარნან თი საშვალებეფს დო ვართ ხოლო ქადაქებას მოხვარნან თი საშვალებეფს. ქადაქება ნიშნენს ცნობაშ გინოჩამას, მარა გურაფა ნიშნენს პიროვნებაშ გურშა დო გონებაშა ცნობაშ მეღალას, ნამდა კოჩიქ ნაგურეფ გეგმირინუას. თე სისტემაშ მოსპუალაშახ ჭიჭე დრო რე დოსკილადირ, ათეშენ მთელ ყურადღება ბიბლიაშ გურაფეფიშ დოჭყაფაშა დო ხალხშა ჭეშმარიტებაშ გურაფაშა ოკო მაფდან გინოღალირ. თენა თის ნიშნენს, ნამდა გურგედვალირო დობგორათ არძა, მით „მარადიულ ცხოვრებაშო [რე] განწყობილ“ დო ქიმვეხვარათ თინეფს, ქიდიჭყან იეჰოვაშ მსახურება (წეკითხით საქმეები 13:44—48). *

4. მუჭო შემლებნა გებგათ, მი რე მარადიულ ცხოვრებაშო განწყობილ დო მუჭო ბგორათ თინეფ?

⁴ მუჭო შემლებნა გებგათ, მი რე მარადიულ ცხოვრებაშო განწყობილ? მუჭოთ პირველ საუკუნეს თეშ, ამდღა ხოლო თეშო ქადაგება რე საჭირო. თაშ ნამდა, ოკო მივაჸუნათ იესოშ თე მითითებას: „ნამ ქალაქშა ვარდა სოფელშა ვემშართათინ, დოგორით ღირსუანეფ“ (მათ. 10:11). ჩქი ვეველუთ, ნამდა თინეფ მით ამაყეფ რენა, ვა რენა გულწრფელ დო სულიერ ვაინტერესნან, ქიმირჩქილუანა სახიოლო ამბეს. ჩქი ბგორუნთ ალალ გურიშ, თანდაბალ დო სულიერს მოჸუმენაფილ კათას. თენა შემლებნა შევადარათ იესოშ საქმიანობას, მუჟამსით ჯაშ ხელობას მუშენდჷ. ავეჯიშ, კარეფიშ, უღუშ დო შხვა მუდგარენეფიშ კეთებაშახ, თინა დიო ჯას გიშაგორუნდჷ. თეშ უკულ ხეჭკუდეფიშ დო რჩქინაშ გიმორნაფათ შხვადოშხვა ნივთეფს აკეთენდჷ. თეგვარო, ჩქი ხოლო დიო ალალ გურიშ კათა ოკო დობგორათ დო უკულ ქიმვეხვარათ თინეფს გინირთან მოწაფეეფო (მათ. 28:19, 20).

5. მუ ოკო გებგათ თი საშვალებეფშე, ნამუთ გურაფას მოხვარნა? ქიმიჸონით მაგალით (ქოძირით სურათ მა-11 გვერდის)

⁵ არძა ხეჭკუდ მუშ საქმეს ორთჷ. მორთ, ქიფჩუათ თი ხეჭკუდეფშე, მუდგას შილებე იესო გიმირინუანდკო. * თის ოსაჭირუდ ხეჭკუდეფ, ნამუშ საშვალებათ ზიმუნდჷ, ხაზუნდჷ, ჭკირუნდჷ, რხუნდჷ დო თოლუნდჷ ჯაშ მასალას. თეს გეძინელ, თიცალ ხეჭკუდეფ ხოლო, ნამუთ სისწორეს ზიმუნდჷ დო ჯაშ ნაწილეფს ართიანს მიოჭაბანდჷ. თეგვარო, გურაფას მოხვარნან თი საშვალებეფს მუშ დანიშნულება უღჷ. მორთ, ქობძირათ, მუჭო შემლებნა თინეფიშ გიმორნაფა.

6, 7. ა) მუჭო გიმირინეთ საკონტქტო ბარათ? ბ) მუ ჟირ მიზანს ომსახურ კრებაშ შეხვალამაშა მაწვიებელ?

⁶ საკონტაქტო ბარათეფ. თე ჭიჭე ბარათეფ ჯგირ საშვალება რე, ხალხის გუვოჩინებაფუათ ჩქინ დუდ დო ვებ-გვერდი. თეს გეძინელ, თინეფს შეულებნა უმოს მეტ ქიგეგან ჩქინ ორგანიზაციაშე დო მითხუან ბიბლიაშ გურაფა. შედეგო ვებ-გვერდ jw.org-იშ საშვალებათ 400 000 კოჩიქ მითხუ ბიბლიაშ გურაფა დო ირ დღას ოშობით მოთხოვნა მიშმურს. თაშ ნამდა, ჯგირ იჸუაფ ირიათო გიღუდან საკონტაქტო ბარათ, ნამდა ხეშე ვაგუტუათ დამოწმებაშ საშვალება.

 ⁷ მაწვიებელეფ. კრებაშ შეხვალამაშა მაწვიებელ ჟირ მიზანს ომსახურ. თექ ჭარ: „გაპატიჟენთ ბიბლიაშ ოგურაფშა იეჰოვაშ მოწმეეფწკუმა“. თეს გეძინელ, თექ მოჩამილ რე, ნამდა თეშ კეთება შეიოლებერ რე „კრებაშ შეხვედრეფს“ „ვარდა ინდივიდუალურო“. თაშ ნამდა, თე საშვალება ხვალე ჩქინ დუც ვაჩინებაფუანს, თინა იჭანუანს „სულიერს მოჸუმენაფილეფს“ ქიდიჭყან ბიბლიაშ გურაფა ჩქინწკუმა ართო (მათ. 5:3). მუშო ოკო რაგად, არძას შეულებ დესწრას კრებაშ შეხვალამეფს, თიშ უმკუჯინუო დიჭყანა დო ვარ ბიბლიაშ გურაფას. მუჟამსით კრებაშ შეხვალამაშა ქუმულან, ქოძირნა მუსხი მუდგარენიშ გურაფა შეულებნა ბიბლიაშე.

8. მუშენ რე მნიშვნელოვან კრებაშ ართ შეხვალამაშ დასწრება ხოლო? ქიმიჸონით მაგალით.

⁸ მნიშვნელოვან რე გუვაგრძელათ ხალხიშ დაპეჯება, ნამდა ართშა ვარა ქიდესწრან კრებაშ შეხვალამეფს. მუჟამსით კრებაშ შეხვალამას ქიდესწრებნან, ქოძირნა, ნამდა ტყურა რელიგიეფიშ გინაწონს, იეჰოვაშ მოწმეეფ ჭეშმარიტებას ოგურუანა დო ოხვარნა ხალხის უმოს მეტ ქიგეგან იეჰოვა ღორონთშე (ეს. 65:13). ართ ამერიკელ ჩილ დო ქომონჯიქ თეს მუსხირენ წანაშ წოხლე მეხვად. რეი დო ლინდაქ გინოჭყვიდეს ეკლესიაშა გილულა, მუშენდა ჯერდეს ღორონთიშ დო უღდეს სულიერიშ მოთხოვნილება. თინეფს ნამთინ ეკლესია ვადუტებნა, მუთ მუნეფიშ ქალაქის ქორდჷ დო ონდო ნამდგაინ ეკლესიას დოსკილადას გინოჭყვიდუნდესკო, ჟირ მუდგარენს ოკვირდეს. პირველ, თინეფს ოკოდეს რელიგიურ შეხვალამეფშე რჩქინა ქიმუღებდესკო დო მაჟია, ეკლესიაშ წევრეფიშ გარეგნობა ოკო აკმაყოფილენდკო ღორონთიშ მოთხოვნეფს. თე ჩილ დო ქომონჯ მუსხირენ წანას ქიგლეშეს შხვადოშხვა ეკლესიეფშა, მარა საბოლათ გურქ გუტირხეს, მუშენდა მუთუნნერ რჩქინაქ ვემიაღებუეს დო ვართ თინეფიშ მიკოქუნა მოწონდეს, მით ეკლესიაშა გილეშ. ართშა, მუნეფიშ სიას მოჩამილ ბოლო ეკლესიაშე გიმულაშ უკულ, ლინდაქ სამუშაშა მიდართ დო რეიქ ჸუდეშა. შარას რეიქ სამეფო დარბაზის ელულუ დო იფიქრჷ: „მორთ, გემნურქჷ დო ქობძირუნქჷ, მუ ამბე რე თაქ“. მუშო ოკო რაგად, თის არძა ეკლესიეფიშ უმოსო თექიანობაქ მეწონ. თექ არძას სქვამას მიკაქუნდჷ დო თის ჯგირო შეხვადეს. რეიქ წოხლე ქუდოზოჯ დო შურდოგურით ურჩქილედ. თე შემთხვევა გუმოშინანა, პავლეშ ნარაგადის თი კათაშ გურშენ, მით პირველო მოურს შეხვალამაშა დო იჩიებ: „დასურო თქვან შქას რე ღორონთი“ (1 კორ. 14:23—25). თეშ უკულ რეი ირ ჟეშხა დღას ოსწრუდ შეხვალამეფს დო ჭიჭე ხანშა შქა მარაშ შეხვალამეფშა ხოლო ქიდიჭყჷ გილულა. ლინდაქ ხოლო ქიდიჭყჷ შეხვალამეფშა დასწრება დო 70 წანას გინოჩილათირ რდესინ თეშ ჟირხოლო ჩილ დო ქომონჯიქ ბიბლიაშ გურაფა ქიდიჭყეს.

9, 10. ა) მუშენ რე ჯგირ თე ბუკლეტეფ ჩიებაშ დაჭყაფალო? ბ) გენწყით, მუჭო შილებე გიმიბრინუათ ბუკლეტი „მუ რე ღორონთიშ სამეფო?“.

⁹ ბუკლეტეფ. ჩქი მიღნა ბრუო ბუკლეტ, ნამუთ მოხვარნა ადვილო ქიდიპჭყათ ჩიება. თინეფიშ გიშაშკუმალაქ 2013 წანაშე დიჭყჷ დო სოდგარენ ხუთ მილიარდ ეგზემპლიარ რე ბეშტელ. არძა ბუკლეტის ართნერ ფორმატ უღჷ, ათეშენ მუჟამსით ართ-ართიშ გიმორნაფას ქიდიგურუანთინ, არძაშ გიმორნაფა შეგალებენა. მუჭო შეილებნა თე ბუკლეტეფიშ გიმორნაფა, ნამდა პიროვნებაწკუმა ჩიება ქიდიჭყათ?

¹⁰ მაგალთო, გეგნოჭყვიდით ბუკლეტიშ, „მუ რე ღორონთიშ სამეფო?“ გიმორნაფა-და, ქაძირეთ პიროვნებას თე ბულკეტის მოჩამილ კითხვა დო ქეშეკითხით: „დღას ქოიფიქრებნანო, მუ რე ღორონთიშ სამეფო? მუჭო ფიქრენთ თინა . . .“. თეშ უკულ ქოკითხით, ბუკლეტის მოჩამილ სუმ პასუხშე ნამუს გიშაგორუნდჷ. მუდგა პასუხ ვეგშაგორასინ, ვა უწუათ სწორ რენ დო ვარ არასწორ. გეგნოფაჩით ბუკლეტ დო ქაძირეთ პირველ გვერდის მოჩამილ ნაჭარა „ბიბლიას ჭარუ“, ნამუსით თუდო ეთუჭარ ბიბლიურ მუხლეფ, დანიელიშ 2:44 დო ესაიაშ 9:6. შეიოლებერ ქორენ-და, გაგრძელით ჩიება. ბოლოს, ქაძირეთ ბუკლეტიშ ბოლოს მოჩამილ ნაჭარა „დეფიქრით“, ნამუსით ეთუჭარ კითხვა: „მუნერ იჸუაფუ ცხოვრება დედამიწას ღორონთიშ მართველობაშ დროს?“. თე კითხვა საშვალებას ქიმერჩანა შარა ქიდიტუათ კინ მიოკითხირალო. მაჟია მეკითხირიშ დროს შეილებნა ყურადღება  გუმახვილათ ბროშურაშა „სახიოლო ამბე ღორონთიშე“ მა-7 გაკვეთილშა. თე ბროშურა ბიბლიაშ ოგურაფალ ართ-ართ საშვალება რე.

11. მუ მიზან უღჷ ჩქინ ჟურნალეფს, მარა ხოლო მუ ოკო მიჩქუდან?

¹¹ ჟურნალეფ. „გინაჯინალ კოშკი“ დო „გეგშაკურცხით!“ რე ჟურნალეფ, ნამუთ მთელ მსოფლიოს არძაშ უმოს დიდ რაოდენობათ იბეშტუ დო ითარგმნუ. თინეფს შხვადოშხვა ქიანას მახორუ ხალხ კითხულენს, ათეშენ თე ჟურნალეფიშ მთავარ თემეფ თეშ რე შედგენილ, ნამდა არძანერ კოჩ დაინტერესას. თე საშვალებეფიშ გიმორნაფათ ოკო მივეხვარათ ხალხის, ნამდა ყურადღება ქიმიაქცუან თის, მუთ არძაშ უმოს მნიშვნელოვან რე ცხოვრებას. მარა თეშ კეთებაშახ, ოკო მიჩქუდან, მუნერ პიროვნებეფშო რე გათვალისწინებურ თე ჟურნალეფ.

12. ა) მიშო გიშმურს ჟურნალ „გეგშაკურცხით!“ დო მუ რე თიშ მთავარ მიზან? ბ) ქიმიჸონით შემთხვევა, მუჟამსით თე ჟურნალიშ გიმორნაფაქ ჯგირ შედეგ მოიღეს.

¹² ჟურნალ „გეგშაკურცხით!“ თიცალ კათაშო გიშმურს, მიდგას ჭიჭე მუდგარენ ვარა შურო მუთუნ ვა უჩქჷ ბიბლიაშე. თეს გეძინელ, თიცალ კათაშო, ნამუსით მუთუნ ვა უჩქჷ ქრისტიანულ გურაფეფიშ გურშენ, ვანდუნა რელიგიებს ვარდა ვა უჩქნა, ნამდა ბიბლია პრაქტიკულ წიგნი რე. ჟურნალიშ „გეგშაკურცხით!“ მთავარ მიზან რე, ხალხ ღორონთიშ არსებობაშა ქუდაჯერუას (რომ. 1:20; ებრ. 11:6). თეს გეძინელ, ჟურნალიშ მიზან რე ხალხის ქუგაგებაფუას, ნამდა ბიბლია დასურო ღორონთიშ სიტყვა რე (1 თეს. 2:13). 2018 წანაშ ჟურნალეფიშ მთავარ თემეფ ოხუ ბედნერობას, ოჯახის დო თინეფიშ მოხვარას, მიდგას საჸოროფო კათა აფჷ ღურელ.

13. ა) მიშო გიშმურს ოვრცელებელ „გინაჯინალ კოშკი“? ბ) მუ შედეგეფ გიღდეს თე ჟურნალიშ გავრცელებაშ დროს?

¹³ ოვრცელებერო გიშაშკუმალირ „გინაჯინალ კოშკიშ“ მთავარ მიზან რე, გეუნწყას ძირითად ბიბლიურ გურაფეფ თინეფს, მით აფასენს ღორონც დო თიშ სიტყვას. თინეფს უღნა გარკვეულ რჩქინა ბიბლიაშე, მარა ბოლოშა ვა რენა ინონჭაფილ ბიბლიურ გურაფეფს (რომ. 10:2; 1 ტიმ. 2:3, 4). 2018 წანაშ გინაჯილ კოშკიშ სუმ გიშაშკუმალა პასუხენს თიცალ კითხვეფს, მუნერით რე: ამდღა ხოლო პრაქტიკულ რენო ბიბლია, მუ მომავალ მელნა დო ზრუნენსო ღორონთ ჩქინო?

14. ა) მუ მიზან უღჷ ოთხ ვიდეოს, ნამუთ ოგურაფალ საშვალებეფშა მიშურს? ბ) მუ შედეგეფ გიღდეს თე ვიდეოეფიშ გიმორნაფაშ დროს?

¹⁴ ვიდეოეფი. იესოშ დროს ცხოვრენდუნ თი ჯაშ მოხელეეფიშ გინაწონს, ამდღარ მოხელეფ თიცალ ელექტრო ხე ჭკუდეფს გიმირინუანა, მუნერით რე: ხორხი, ბურღი, შალაშინ დო ლისმარეფიშ ეშაღალარ. თეგვარო, ბეშტელ პუბლიკაციეფიშ გარდა, ამდღა მიღნა ვიდეოფ, ნამდგაშა შემლებნა ვოჯინუათ ხალხი. ოგურაფალ საშვალებეფშა მიშურს ოთხი ვიდეო, ნამდგაშ სათაურუფ რე: „მუშენ ბგურაფლენთ ბიბლიას?“, „მუჭო ატარენა ბიბლიაშ გურაფას?“, „მუს ომსახურ იეჰოვაშ მოწმეეფიშ სამეფო დარბაზი?“ დო „მი რენა იეჰოვაშ მოწმეეფი?“. თე ვიდეოეფ ჟირ წუთშე ნაკლების იგრძელებ დო თინეფიშ გიმორნაფა შემლებნა პირველ მეკითხირიშ დროს. უმოს დიდ ვიდეოეფ შემლებნა გიმიბრინუათ მაჟია მეკითხირიშ დროს თინეფწკუმა, მიდგას მეტ დრო უღჷ. თე არაჩვეულებრივ ოგურაფალ საშვალებეფქ შილებე თიშ სურვილ გურჩქინას ხალხის, ნამდა ქიდიჭყან ბიბლიაშ გურაფა დო კრებაშ შეხვალამეფშა გილულა.

15. ქიმიჸონით მაგალითეფ, სოვრეშეთ იძირე, მუ შედეგეფ მოჸუნს, მუჟამსით ხალხი მუშ ნინაშა უჯინე ვიდეოეფს.

¹⁵ ართ ჩქინ დაქ ქეშეხვად ართ ოსურს, ნამუთ მიკრონეზიაშე რდუ. დაქ თის მუშ მშობლიურ, იაპისიშ ნინაშა ქაჯინუ ვიდეოშა „მუშენ ბგურაფლენთ ბიბლიას?“. ვიდეოქ ჩერთუნ, თე ოსურქ თქუ: „ვა ბჯერს! თენა ჩქიმ ნინაშა რე. თიშ აქცენტშე შემლებ ფთქუე, ნამდა თინა ჩქიმ კუნძულშე რე. თინა ჩქიმ ნინაშა რაგადანს!“. თეშ უკულ თქუ, ნამდა წეკითხენდჷ დო ქუჯინედ ირფელს,  მუთ მუშ ნინაშა იჸუაფუდ ვებ-გვერდის jw.org (შეადარით საქმეები 2:8, 11). გუვარჩუათ ხოლო ართ მაგალით. ართ ამერიკელ დაქ მუშ ჯიმასქუას ქიმუჯღონ ჟიშე მოშინაფილ ვიდეოშ ლინკი მუშ ნინაშა. თიქ ქუჯინ ვიდეოს დო თეცალ პასუხ მოჭარ: „არძაშ უმოსო თი ადგილქ დუმაინტერეს, სოდეთ იჩიებნა, ნამდა მთელ მსოფლიოს სატანა მართუნს. მა ბიბლიაშ გურაფა მიფთხი“. თინა თიცალ ქიანას ცხოვრენს, სოდეთ იეჰოვაშ მოწმეეფს თხოზნა.

16. გენწყით თითოულ ბროშურაშ მიზან: ა) „ურჩქილით ღორონთის დო იცხოვრით მარადიულო“. ბ) „სახიოლო ამბე ღორონთიშე!“. გ) „მი ასრულენს იეჰოვაშ ნებას ამდღა?“.

¹⁶ ბროშურეფ. მუჭო შეილებნა ოგურუათ თინეფს, მიდგას კითხირ უჭირს ვარდა თიშ ნინაშა ჩქინ ლიტერატურა ვებეშტუ? თეცალ დროს შემლებნა გიმიბრინუათ ბროშურა „ურჩქილით ღორონთის დო იცხოვრით მარადიულო“. * ბიბლიაშ გურაფაშ დაჭყაფალო ჯგირ საშვალება რე ბროშურა „სახიოლო ამბე ღორონთიშე“. შეილებნა ქაძირუათ ბოლო გვერდის მოჩამილ 14 თემა დო ქოკითხათ, ნამ საკითხ ოინტერეს არძაშ უმოსო. თეშ უკულ ქიდიჭყით ბიბლიაშ გურაფა თი თემათ, ნამუთ მობინადრექ გიშეგორ. გეგმოირინუაფნანო თეცალ მეთოდ კინ მეხითხირიშ დროს? ხოლო ართ ბროშურა, „მი ასრულენს იეჰოვაშ ნებას ამდღა?“ მიშურს გურაფას მოხვარნან თი საშვალებეფშა. თინა ოხვარ ბიბლიაშ მაგურაფალეფს გეჩინებაფუან იეჰოვაშ ორგანიზაცია. ქოძირით 2017 წანაშ მარტიშ „ჩქინ ქრისტიანულ ცხოვრება დო მსახურება“ (ქორთ.), სოდეთ ძირაფილ რე, მუჭო გიმიბრინუათ თე ბროშურა ბიბლიაშ გურაფაშ დროს.

17. ა) მუ მიზან უღჷ თითოულ ოგურაფალ წიგნის? ბ) მუ მეთხიებ თინეფს, მიდგა ნათუაშო ემზადებ დო მუშენ?

¹⁷ წიგნეფი. ბიბლიაშ გურაფა ბროშურათ ქუგაფნა დოჭყაფილ-და, შეილებნა ნებისმიერ დროს გაგრძელათ თინა წიგნით „მუს მოგურუანა ბიბლია სინამდვილეს?“. თენა მეხვარებ ბიბლიაშ მაგურაფალეფს უჯგუშო ქინანჭან ბიბლიურ გურაფეფს. თე წიგნიშ თებაშ უკულ, ბიბლიაშ მაგურაფალ სულიერო წიმი ქიმურს-და, შეილებნა გაგრძელათ ბიბლიაშ გურაფა წიგნით „ქუდოსკიდით ღორონთიშ ჸოროფას“. თე წიგნი ქიმეხვარებ თის, ბიბლიურ პრინციპეფიშ გიმორნაფას ირდღაშიან ცხოვრებას. ვაგგოჭყორდან, ნათუაშ უკულ ხოლო ოკო გუგრძელათ გურაფა, ონდო ბოლოშა ვათენა ჟირხოლო წიგნის. თენა მეხვარებ თინეფს, საფუძვლიანო ქიდიგურუან ჭეშმარიტება (წეკითხით კოლოსელები 2:6, 7). *

18. ა) მუშ კეთებაშა მომწოდენა 1 ტიმოთეშ 4:16 დო მუ შედეგ მოჸუნს თეს? ბ) მუ ოკო რდას ჩქინ მიზან ოგურაფალ საშვალებეფიშ გიმორნაფაშ დროს?

¹⁸ იეჰოვაშ მოწმეეფს მოვალნა, ვოგურუათ ხალხის „სახიოლო ამბე ჭეშმარიტებაშ გურშენ“, ნამუთ მარადიულ სიცოცხლეშა რე მიმაჸუნაფალ (კოლ. 1:5; წეკითხით 1 ტიმოთე 4:16). * თე დავალება შევასრულათინ, მიღნა გურაფას მოხვარნან თი საშვალებეფ (ქოძირით ჩარჩო „ოგურაფალ საშვალებეფ“). მორთ, ირნერო ქივეცადათ, გეგმიბრინუათ თე საშვალებეფ. თითოულ მაუწყებელს შეულებ გინოჭყვიდას ნამ საშვალება გიმირინუას დო მუჟამ. ჩქინ მიზან ხვალე თინა ვა რე, ნამდა გუვავრცელათ ლიტერატურა. ჩქი პუბლიკაციეფს ვა ვარზენთ თიცალ კათას, მიდგას ვა ინტერეს ჭეშმარიტება. ჩქინ მიზან რე, ქიმვეხვარათ ალალგურიშ, თანდაბალ დო სულიერს მოჸუმენაფილ კათას გინირთან ქრისტეშ მოწაფეეფო, მუშენდა თეცალ კათა „მარადიულ სიცოცხლეშო რენა განწყობილ“ (საქ. 13:48; მათ. 28:19, 20).