1, 2. მუ სირთულეეფს შეხვად იესო ნავეშ სქუაქ მოსეშ ღურაშ უკულ?

იესო ნავეშ სქუას ირიათო გაშინედ იეჰოვაშ სიტყვეფ: „დოღურ ჩქიმ მსახურ მოსექ. გედირთჷ, გეგნოკვათ იორდანე სი დო არძო თე კათაქ დო გემნორთით დიხაშა, ნამუსით ისრაელიშ სქუალეფს ვარზენქ“ (იეს. 1:1, 2). იესო ნავეშ სქუაშო, ნამუთ 40 წანას ომსახურუდ მოსეს, თე დავალება მოულოდნელ რდუ.

² მოსე ბრელ ხანს რდუ ისრაელიშ ხემძღვანელ, ათეშენ შილებე იესო ნავეშ სქუა ფიქრენდკო, მუჭო მიღენდეს ისრაელეფ თიშ ხემძღვანელობას (კან. 34:8, 10—12). ართ ბიბლიურ ნაშრომ იესო ნავეშ სქუაშ 1:1, 2 მუხლეფშენ იჩიებ: „მუჭოთ ჯვეშონ თეშ თანამედროვე დროს ხოლო, სახელმწიფოშო არძაშ უმოს ოშქურანჯ დრო თიმწკუმა რე, მუჟამსით მართველ ითირუ“.

3, 4. სოვრეშე მიჩქნა, ნამდა ღორონც იესო ნავეშ სქუაშა იმენდ ვაგუმტყუნებ დო მუ კითხვაქ შილებე გომრჩქინდან?

³ მართალ რე, იესო ნავეშ სქუას უღუდ თიშ მიზეზ, ნამდა აშკურინკო, მარა თიქ ქიმიენდჷ იეჰოვას დო ქიმიაჸუნ თიშ მითითებას (იეს. 1:9—11). იეჰოვას თიშა იმენდ ვაგუმტყუნებ. მუჭოთ ბიბლიას ჭარუნ,  ღორონთ იესო ნავეშ სქუას დო მუშ ხალხის ანგელოზიშ საშვალებათ ხემძღვანელენდჷ. გონივრულ რე იფიფქრათ, ნამდა თე ანგელოზ ღორონთიშ ხვალეგუნაჭყეფ სქუა, იესო რდუ, ნამუსით ბიბლია „სიტყვას“ ხოლო უძახ (გამ. 23:20—23; იოან. 1:1).

⁴ იეჰოვაქ მეხვარ ისრაელეფს, ქიმიარჩქვანესკო ახალ წინამძღოლს, იესო ნავეშ სქუას. ამდღა თიცალ დროს ფცხოვრენთ, მუჟამსით ორგანიზაცია წოხოლე მეურს დო ისტორიულ ცვლილებეფ ხვადუ. თე დროს შილებე იფიფქრათ: „მუ მიზეზეფ მიღნა, მივენდათ იესოშ ხემძღვანელობას?“ (წეკითხით მათე 23:10). * თე კითხვას პასუხ ქიმეფჩათინ, მორთ ქიფჩუათ, მუჭო ხემძღვანელენდჷ ღორონთ ჯვეშო მუშ ხალხის ცვლილებეფიშ დროს.

5. მუ სიტუაციას შეხვად იესო ნავეშ სქუაქ იერიხონიშ ხოლოს? (ქოძირით სურათ 22-ა გვერდის).

⁵ მუჟამსით ისრაელეფქ იორდანე გეგნოკვათეს, იესო ნავეშ სქუაქ იერიხონიშ ხოლოს ყამა უკებუდუნ ფერ კოჩის ქეშეხვად. თის ვა უჩქუდ მი რდუ თე კოჩ და ქოკითხჷ: „ნტერ რექ დო ვარ მოჯგირე?“. იესო ნავეშ სქუას მანგარო გუკვირდჷ, მუჟამსით ქიგეგ, ნამდა თინა „იეჰოვაშ ლაშქარიშ მეთაურ“ რდუ დო მზათ რდუ დეცვუკო ღორონთიშ ხალხი (წეკითხით იესო ნავეს ძე 5:13—15). * მართალ რე, ბიბლიას ჭარ, ნამდა ღორონთიქ დურაგადუ იესო ნავეშ სქუას, მარა იეჰოვაქ თე დროს, მუჭოთ შხვა დროსინ თეშ, მუშ ანგელოზ გიმირინუ (გამ. 3:2—4; იეს. 4:1, 15; 5:2, 9; საქ. 7:38; გალ. 3:19).

6—8. ა) მუშენ შილებე ღორონთიშ მითითება ისრაელეფიშ თოლს გონივრულ ვა რდუკო? ბ) მუშენ რდუ თე მითითებეფ გონივრულ დო დროულ? (ქოძირით სქოლიო).

⁶ ანგელოზიქ იესო ნავეშ სქუას მითითებეფ მეჩჷ, მუჭო ეჭოფკო ქალაქ იერიხონ. ართ მეჯინათ თეშ იძირედ, ნამდა თე მითითებეფ ვარდჷ გონივრულ. მაგალთო, იეჰოვაშ ბრძანებათ არძა ქომოლკოჩის წინადაცვეთა ოკო გუკეთებუდკო დო თეშ შედეგო, მუსხირენ დღას ვაჩხუპებედეს. ქორდუო ასე თეშ დრო? (დაბ. 34:24, 25; იეს. 5:2, 8).

⁷ შილებე ჯარიშკოჩეფ ფიქრენდესკო, მუჭო შეიალებედეს თინეფს მუნეფიშ ოჯახეფიშ დაცვება ჩხუპიშ დროს. მარა უცბას ისრაელეფქ ქიგეგეს, ნამდა „ინოკილერ რდუ იერიხონ ისრაელეფიშ შიშით“ (იეს. 6:1). თეცალ ველუდესინ ფერ სიახალე დასურო გუმანგარენდჷ ისრაელეფს ღორონთიშ მითითებეფიშ რწმენას.

⁸ თეს გეძინელ, ისრაელეფს უღდეს მითითება, ვეგენთხაფდესკო იერიხონს. თინეფს ამშვ დღაშ დინახალე, დღაშე ართშა გალავანიშ კრუგის ოკო გილურთუმდესკო, მარა მაშკვითა დღას თენა დღაშე შკვითშა აფდეს ოკეთებელ. ნამთინე ჯარიშკოჩიქ შილებე იფიქრუკო, ნამდა თენა დროშ დო ენერგიაშ ტყურათ დინაფა რდუ. მარა ღორონც, ნამუთ ისრაელს ხემძღვანელენდჷ, ჯგირო უჩქუდ მუს ორთუდ. თიშ მითითებეფიშ მეჸუნა თინეფს რწმენას გუმანგარენდჷ დო თეს გეძინელ, იერიხონიშ ჯარიშკოჩეფს ხოლო ადვილო გიორჯგინანდეს (იეს. 6:2—5; ებრ. 11:30). *

9. მუშენ ოკო მივაჸუნათ თი მითითებეფს, ნამუსით ღორონთიშ ორგანიზაციაშე ბღებულენთ? ქიმიჸონით მაგალით.

⁹ მუშ გურაფა შემლებნა თე შემთხვევაშე?  შილებე ბოლოშა ვა მარჩქილედან, მუ მიზეზით მოხვად ორგანიზაციას ცვლილებეფქ. მაგალთო, შილებე დუდშე ვა ბგებულენდით, მუშენ რდუ საჭირო ელექტრონულ მოწყობილობეფიშ გიმორნაფა, პირად გურაფაშ, მსახურებაშ დო კრებაშ შეხვალამეფიშ დროს. მარა ასე ვორწყეთ მუ ჯგირობუა მოუღ თეს. შილებე დუდშე ეჭვიშ თოლით ვუჯინედითკო თე ცვლილებეფს, მარა მუჟამსით თიშ ჯგირ შედეგეფს ვორწყეთინ, რწმენა მემანგარებნა დო და დო ჯიმალეფწკუმა ართობა მიღნა.

10. სინამდვილეს მი ხემძღვანელენდჷ თი შეხვალამას, ნამუთ იერუსალიმს ხემძღვანელ საბჭოქ ჩატარ?

¹⁰ კორნელიუსიშ გაქრისტიანებაშე 13 წანაშ უკულ, ნამთინე ებრაელ დიო ხოლო იჩიებუდ, ნამდა წინადაცვეთა აუცილებერ რდუ (საქ. 15:1, 2). მუჟამსით თე საკითხშენ ანტიოქიას დაპირისპირებაქ გორჩქინდჷ, პავლექ გინოჭყვიდ, წინადაცვეთაშ გურშენ იერუსალიმს ხემძღვანელ საბჭოწკუმა ქუჩიებინუდკო. პავლე ენწყუნს მუშენ გინოჭყვიდ თეშ კეთება: „თიშენ იბდჷ, ნამდა გამოცხადება მიბღჷ“. მუშო ოკო რაგად, იესო ქრისტექ თეშ მიდეჸონ საქმე, ნამდა ხემძღვანელ საბჭოს გეგნუჭყვიდუდკო თე საკითხი (გალ. 2:1—3).

11. ა) მუნერ თვალსაზრის უღუდ იშენით ნათმინე ქრისტიანს წინადაცვეთაშ გურშენ? ბ) მუჭო გიმირჩქინ პავლექ თანდაბლობა იერუსალიმელ უხუცესეფწკუმა თანამშრომლობაშ დროს? (ქოძირით სქოლიო).

¹¹ ქრისტეშ ხემძღვანელობათ ხემძღვანელ საბჭოქ გინოჭყვიდ, ნამდა წინადაცვეთა ვასაჭირდეს თინეფს, მით ვა რდეს ებრაელეფ (საქ. 15:19, 20). მარა თე გადაწყვეტილებაშ მეღებაშე წანეფიშ უკულ, ბრელ ებრაელ იშენ აგრძელენდჷ მუნეფიშ ბაღანეფიშ წინადაცვეთას. იერუსალიმელ უხუცესეფიშ ჸუჯშა ქიმერთჷ ამბექ, ნამდა პავლეშ გურშენ იჩიებდეს, ითამ მოსეშ კანონს ვეცვენდჷ. თე დროს თინეფქ ველუდუნ ფერ მითითებეფ ქიმეჩეს პავლეს * (საქ. 21:20—26). უხუცესეფქ პავლეს უწუეს, ოთხ კოჩ მიდუჸუნაფუდკო ტაძარშა დო თეგვარო ხალხ ქოძირუნდჷ, ნამდა თინა კანონს იცვენდჷ. პავლეს შეულუბუდ ქიკითხუკო ქორდჷ დო ვარ თენა დასურო სწორ გადაწყვეტილება დო თქუკო, ნამდა პრობლემა თი ებრაელ ქრისტიანეფს  უღდეს, მიდგას წინადაცვეთაშ საკითხ ჯგირო ვარჩქილედ. მარა თიქ თანდაბლობა გეგმირჩქინ დო ქუდაჸუნ უხუცესეფიშ მითითებას, მუდგაქ ხე შეუნწყუ ქრისტიანეფიშ ართობას. შილებე იფიფქრათ: მუშენ ვეგნოჭკირ იესოქ თესხი ხანს თე საკითხ, მუჟამსით მუშ ღურაშ უკულ მოსეშ კანონქ გეუქმჷ? (კოლ. 2:13, 14).

12. მუშენ ვეგნოჭკირ იესოქ თესხი ხანს წინადაცვეთაშ საკითხ?

¹² ნამთინეს დრო ოსაჭირ, ნამდა ცვლილებეფს ქიმიარჩქვანას. ებრაელ ქრისტიანეფს ხოლო ოსაჭირდეს დრო, დუთირდესკო თვალსაზრის (იოან. 16:12). ნამთინე ქრიტიანს გუჭირდჷ თიშ დაჯერებაქ, ნამდა იეჰოვაწკუმა განსაკუთრებულ ურთიერთობაშო წინადაცვეთა ვარდჷ საჭირო (დაბ. 17:9—12). შხვეფს თიშა ოშკურდეს, ნამდა იუდეველეფშე თხოზინს ქეშეხვადუდეს (გალ. 6:12). მარა დრო ხანიშ უკულ მოციქულ პავლეშ ნაჭარა წერილიშ საშვალებათ ქრისტექ ხოლო უმოს მითითებეფ მეჩჷ მუშ მიმაჸუნალეფს (რომ. 2:28, 29; გალ. 3:23—25).

13. მუჭო შემლებნა დუვაფასათ ქრისტეშ ხემძღვანელობა ამდღა?

¹³ მუჟამსით ბოლოშა ვა მარჩქილენა, მუშენ მოხვად ორგანიზაციას ნამთინე ცვლილებაქ, ოკო დეფიფქრათ, მუჭო ხემძღვანელენდჷ იესო მუშ მიმაჸუნალეფს ჯვეშო. მუჭოთ იესო ნავეშ სქუაშ დღალეფს თეშ, პირველ საუკუნეს ხოლო, იესო ქრისტე ირიათო არზენდჷ გონივრულ მითითებეფს ღორონთიშ ხალხის, გემანგარესკო რწმენა დო ართიანწკუმა ართობა უღდესკო (ებრ. 13:8).

14—16. მუჭო იძირე იესოშ მზრუნველობა დო ჸოროფა თი მითითებეფშე, ნამუსით „ართგურ დო გონიერ მონაშ“ საშვალებათ მარზენა?

¹⁴ იესოს ვუჸორთ დო ზრუნენს ჩქინდე, მუთ ჯგირო იძირე თი დროულ მითითებეფშე, ნამუსით „ართგურ დო გონიერ მონაშ“ საშვალებათ მარზენა (მათ. 24:45). მარკი, ნამუსით ოთხ სქუა ჸუნს, იჩიებ: „სატანა ოცად დასუსტას ოჯახეფ სულიერო დო თეგვარო კრებეფს ქეცილას. ჩქი მიბღით მითითება, ნამდა ირ მარას ჩუვატარათ ოჯახურ თაყვანიშცემა დო თე მითითებაშე ვორწყეთ, ნამდა ოჯახიშ თხილუა აუცილებელ რე“.

¹⁵ მუჟამსით იესოშ ხემძღვანელობას ვორწყეთ, ბგინაფლენთ, ნამდა იესო ჩქინ სულიერ წიმი ულათ რე დაინტერესებულ. პატრიკი, ნამუთ უხუცესო მსახურენს, იჩიებ: „დუდშე ნამთინეშო რთულ რდუ ირ საბატონ დო ჟეშხას მსახურებაშ შეხვალამაშა დასწრება, ნამუსით ჭიჭე-ჭიჭე ჯგუფებ ატარენდეს. მარა თე ცვლილებაშე ჯგირო იძირე, მუჭო ზრუნენს იესო კრებაშ თითოულ წევრშო. მაგალთო, ნამთინე მორდებუან დო აქტიურ ვა რენ ფერ და დო ჯიმა, უმოს დაფასებულო გინაფლენს დუც დო შედეგო სულიერო ირდუ“.

¹⁶ თეს გეძინელ, ჩქინ სულიერ საჭიროებეფშე ზრუნვათ, იესო მოხვარნა ყურადღება არძაშ უმოს მნიშვნელოვან საქმეშა გეგნიბღათ, ნამუთ ამდღა დედამიწას ისრულებუაფ (წეკითხით მარკოზი 13:10). * ახალ დანიშნულ უხუცეს ანდრე, ნამუთ ირიათო მეჸუნს ორგანიზაციაშე მეღებულ მითითებეფს, იჩიებ: „მთელ მსოფლიოშ ფილიალეფს შეამცირეს ბეთელეფიშ რიცხვი. თე ირფელშე ვორწყეთ, მუსხით მნიშვნელოვან რე მთელ დრო დო ენერგია დუთმათ ქადაქებაშ საქმეს“.

17, 18. მუშენ რე ჯგირ დეფიფქრათ თი შედეგეფშე, ნამუთ ბოლო დროს მიშაღალირ ცვლილებეფს ოხუ?

¹⁷ მითითებეფ, ნამდგას ჩქინ მეფე იესო ქრისტეშე ბღებულენთ, მიმეხვარებნა, მუჭოთ ამდღა თეშ მომავალს ხოლო. დეფიქრით თი კურთხევეფშე, ნამუთიქ ბოლო დროს მოხვალამირ ცვლილებეფს მაჸუნ. შეილებნა ოჯახურ თაყვანიშცემაშ დროს გარჩუათ, მუ ჯგირობუა მოიღეს შქა მარაშ შეხვალამეფშა  ვარდა მსახურებაშა მიშაღალირ ცვლილებეფქ.

¹⁸ ხემძღვანელობაშ მეჸუნა ვა გამჭირდუნა დო ირიათო ხიოლ მაღვენუნა, მუჟამსით ვეგიბჭყოლიდუანთ, ნამდა იეჰოვაშ ორგანიზაციაშ მითითებეფიშ შესრულებას ირიათო ჯგირ შედეგეფ მოჸუნს. მაგალთო, ამდღა ლიტერატურაშ ბეშტუაშო ბრელ ფარა ვეხარჯებ, მუშენდა ახალ ტექნოლოგიეფს გიმიბრინუანთ დო თეთ ხეს ვუნწყუნთ მთელ მსოფლიოს სამეფოშ საქმეშ შესრულებას. თაშ ნამდა, ჯგირ იჸუაფ მუთ შილებენ, უმოსო გეგმიბრინუათ ელექტრონულ პუბლიკაციეფ დო ვიდეოეფ. თენა რე ართ-ართ საშვალება, ხუჯ ქუდვუკინათ იესოს, ნამუსით ოკო გონივრულო გეგმიბრინუათ ორგანიზაციაშ რესურსეფ.

19. მუშენ ოკო მივაჸუნათ ქრისტეშ მითითებას?

¹⁹ ქრისტეშ მითითებეფიშ მეჸუნათ, ჩქინ და დო ჯიმალეფს ვოხვარუთ გემანგარან რწმენა დო ხე შეუნწყუან ართობას. მთელ მსოფლიოშ ბეთელეფს მოხვალამირ ცვლილებეფიშ გურშენ ანდრე იჩიებ: „მა ნდობა დო პატიცემა გამმანგარ თი ბეთელელეფიშ სწორ დამოკიდებულებაქ, მიდგაქ ადვილო შეხვად თეცალ ცვლილებეფს. თინეფ ხიოლით ასრულენა ირნერ დავალებას, ნამდგას იეჰოვაშ ორგანიზაციაშე ღებულენა“.

20, 21. ა) მუშენ შემლებნა ვენდათ ჩქინ ხემძღვანელს, ქრისტეს? ბ) მუ კითხვას გუვარჩიენთ უკულიან სტატიას?

²⁰ მალას ჩქინ ხემძღვანელ იესო ქრისტე მოსპუნს არძანერ უბადობას დო არძა ქოძირუნს თიშ „სარკო საქმეეფს“ (გამოცხ. 6:2; ფსალმ. 45:4). ეშობას, თინა ღორონთიშ ხალხის ამზადენს ახალ ქიანაშ მაცხოვრებელო, სოდეთ თინეფ გათელებურეფს ქუდაგურუანა დო ქიმეხვარებნა დედამიწა სამოთხეთ გინართინუან.

²¹ ჩქი ბჯერა, ნამდა, მუდგაქ ვა მოხვადასინ, ჩქინ მეფე ბოლოშა ქომხემძღვანელენა დო გენომიჸონანა ახალ ქვეყნიერებაშა (წეკითხით ფსალმუნი 46:1—3). * მინშა შილებე გამჭირდან ახალ ცვლილებეფწკუმა მერჩქვანაქ, განსაკუთრებულო თიმწკუმა, მუჟამსით ჩქინ ცხოვრებას თენა ვეველუთინ თეშ მოხვადუ. მუჭო შემლებნა თეცალ დროს ვა ვოდინუათ მშვიდობა დო ბოლოშა მივენდათ იეჰოვას? თე კითხვაშ პასუხის უკულიან სტატიას მიბღენთ.