1, 2. მუქ მოუღ კაცობრიობას არძაშ უმოს გლახა შედეგ დო მი რე თეშ პასუხიშმგებელ?

ტელეფონ, ნათურა, მანქანა დო მაცივარქ ჩქინ ირდღაშიან ცხოვრება გაუჯგუშ. მარა ნამთინე გიმოგონებაქ, მუნერით რე ოჩხუპებელ იარაღი, ნაღმეფი, სიგარეტი დო ატომურ ბომბა, უმოს ოშკურანჯო გინაშკვჷ ჩქინ ცხოვრება. მარა რე ხოლო ართ მუდგარენ, ნამუსით თე ირფელშე უმოს გლახა შედეგეფ მოუღ კაცობრიობაშა. თენა რე ტყურაშ რაგად! ტყურა ნიშნენს შხვეფიშ შეცდომაშა მიშაჸუნაფალო თიცალ მუდგარენიშ რაგადის, მუთ გიჩქ, მართალ ვა რენ. მიქ თქუ პირველო ტყურა? იესოქ თქუ, ნამდა თენა რდუ ეშმაკი, ნამუთ ტყურაშ მუმა რე (წეკითხით იოანე 8:44). * მუჟამ თქუ თიქ პირველ ტყურა?

² სატანაქ პირველ ტყურა ანთასობით წანაშ წოხოლე ედემიშ ბაღის თქუ. პირველ ჩილ დო ქომონჯ, ადამ დო ევა, გუმაჭყაფალქ დედამიწას სამოთხეს ქუდახორუ. მარა თინეფიშ ბედნერ ცხოვრებას სატანაქ ქეცილ. თის უჩქუდ, ნამდა ღორონთიქ ადამ დო ევას „ჯგირ დო ფურიშ ჩინებაშ ჯაშე“ ხილიშ ჭკუმუა აუკრძალ. თე ბრძანებას ვედემორჩილებდეს-და, დოღურუდეს. მარა სატანაქ გვერიშ საშვალებათ ევას უწუ: „ვარ, ვა ღურუთ [თენა რდუ პირველ ტყურა]. უჩქჷ  ღორონც, ნამდა მუ დღას ოჭკუმუნთ თიშ მიკნაღელსინ, თოლ გუგანჯამუნა დო ღორონთცალო ჯგირ დო ფურ გარჩქვენუდან იჸი“ (დაბ. 2:15—17; 3:1—5).

3. მუშენ შილებე ფთქუათ, ნამდა სატანაქ შეგნებულო დაღორ ევა დო მუ შედეგიქ მაჸუნ თეს?

³ სატანაქ შეგნებულო დაღორ ევა, მუშენდა უჩქუდ, ხილიშ ჭკუმუაშ უკულ თინა დოღურუდ. პირველ წყვილქ ვედემორჩილ იეჰოვაშ მითითებას დო საბოლათ დოღურეს (დაბ. 3:6; 5:5). თეს გეძინელ, „ცოდაქ მთელ კაცობრიობას გეგნადვჷ“. შედეგო, „ღურა მეფენდჷ . . . თინეფწკუმა ხოლო, მიდგას ადამცალო ვეშუცოდებ“ (რომ. 5:12, 14). თაშ ნამდა, სრულყოფილ დო მარადიულ ცხოვრებაშ მანგიორო, ამდღა ხალხი 70 ვარდა 80 წანას ონდეთ მიოჭირიუანს, მუთ ღორონთიშ დუდშეიან განზრახვაშა ვემშეშ. თი დროშე მოჸუნაფილ, ცხოვრება „ეფშა რე გაჭირება დო ტანჯებათ“ (ფსალმ. 90:10). მუ გლახა რე, ნამდა თე ირფელ სატანაშ ტყურაშ შედეგ რე!

4. ა) მუ კითხვეფს გუვარჩიენთ? ბ) მუჭოთ ფსალმუნიშ 15:1, 2-შე იძირენ, მუ შემთხვევას იპჸუაფუთ იეჰოვაშ მეგობარი?

⁴ იესოქ სატანაშ გურშენ თქუ: „გეგნურთჷ ჭეშმარიტებას, მუშენდა ვა უჸორს ჭეშმარიტება“. თაშ ნამდა, სატანა ამდღა ხოლო აგრძელენს მთელ მსოფლიოშ ჩილათას (გამოცხ. 12:9). ჩქი ვა მოკონა მიმოჩილითუან სატანაქ. მორთ, გუვარჩუათ სუმ კითხვა: მუჭო ოჩილითუანს სატანა ამდღა ხალხის? მუშენ იჩიებ ხალხ ტყურას? მუჭო შემლებნა ვოძირათ, ნამდა ირიათო ჭეშმარიტებას იფჩიებუთ? (წეკითხით ფსალმუნი 15:1, 2). *

5. მუჭო მიშაჸუნს სატანას ამდღა ხალხ შეცთომაშა?

⁵ მოციქულ პავლეს უჩქუდ, ნამდა შემალებედეს გივორჯგინითკო სატანას, „მუშენდა ჩქინო უჩინებ ვა რე, მუდგა თის ულამ“ (2 კორ. 2:11). ჩქი მიჩქნა, ნამდა მთელ მსოფლიოს, ნამდგაშა ტყურა რელიგია, კორუმპირებულ მთავრობეფ დო ჰარამ კომერციულ სისტემა ხოლო მიშურს, სატანა აკონტროლენს (1 იოან. 5:19). ათეშენ ვამკვენა, ნამდა სატანა დო მუშ დემონეფი ძალაუფლება უღნან ფერ კათაწკუმა მოქმედენა დო ტყურას ორაგადაფუანა (1 ტიმ. 4:1, 2). თენა ოხუ თი კათას, მით ხალხის ოცილუნ ფერ მუდგარენეფს გიშაშკვანს დო ტყურა რეკლამეფიშ საშვალებათ თაღლითურ გეგმეფს ორსხუანს.

6, 7. ა) მუშენ მიშუძნა განსაკუთრებულ ბრალ ტყურეფიშ გავრცელებას რელიგიურ ლიდერეფს? ბ) მუნერ გურაფეფს ავრცელენა რელიგიურ ლიდერეფ?

⁶ რელიგიურ ლიდერეფს განსაკუთრებულო უღნა ბრალ, მუშენდა საფრთხეშ თუდო რე თი კათაშ სიცოცხლე, მიდგას თინეფიშ ტყურეფიშ ჯერს. მუჟამსით პიროვნება იჯერენს ტყურა გურაფას დო ორთჷ თიცალ მუდგარენს, მუთ ღორონც ჯოგჷ, თეთ მარადიულ სიცოცხლეს ოდინუანს (ოს. 4:9). იესოს უჩქუდ, ნამდა მუშ დროს მახორუ რელიგიურ ლიდერეფს ხოლო უღდეს ბრალ თეცალ ტყურეფიშ გავრცელებას. თიქ პირდაპირ უწუ თინეფს: „ვავა თქვა, მწიგნობარეფ დო ფარისეველეფ, აფერისტეფ! მილენთ ზღვას დო დიხას, ნამდა ართ იშენით მიოჩილითუათ დო მიდგას მიოჩილითუანთინ, თინა თქვანდე უმოსო დემსახურენს გეენაშ სასჯელს“ (მათ. 23:15). იესოქ გენჭირელო უწუ რელიგიურ ლიდერეფს. თინეფ ნამდვილო მუნეფიშ „მუმაშე, ეშმაკშე, კოჩიშ მაჸვილარშე“ რდეს (იოან. 8:44).

⁷ ამდღა მთელ მსოფლიო ეფშა რე რელიგიურ ლიდერეფით, მიდგას თიცალ ტიტულეფ უღნა, მუნერით რე: პასტორი, პაპა, რაბინ დო შხვა. პირველ საუკუნეშ რელიგიურ ლიდერეფცალო, თინეფ ხოლო ფულნა ჭეშმარიტებას დო ღორონთიშ ჭეშმარიტება ტყურაშა გოთირუეს (რომ. 1:18, 25). თინეფ ხალხის ოჯერუანა, ითამ ღორონთ  ართშა ქიწამეს-და, გინოსკილადირ რენა. თეს გეძინელ, ოგურუანა, ნამდა ღურაშ უკულ შურ აგრძელენს ცხოვრებას დო ოჯერუანა რეინკარნაციას. რელიგიურ ლიდერეფ თის ხოლო ურაგადნა ხალხის, ნამდა ღორონთი იწონუანს ჰომოსექსუალიზმის დო ართ სქესიანეფიშ ქორწინებას.

8. მუ ტყურას გუმაცხადენა მალას პოლიტიკოსეფ, მარა მუჭო ოკო მიფქცუათ ჩქი თე დროს?

⁸ პოლიტიკოსეფს ხოლო მიშაჸუნა ხალხ შეცდომაშა. არძაშ უდიდაშ ტყურა თინა იჸუაფ, მუჟამსით გეგმაცხადენა, ნამდა ქიმიოჭირინეს „მშვიდობა დო უსაფრთხოებას“. მარა ზუსტას თე დროს, შურო ველუნან თეშ, დუც ქიგიოტირხუნა განადგურება. ჩქი დღას ოკო ვემეფჩირთათ დო ვედებჯერათ, ნამდა თინეფიშ მონდომას, გეგშასწორან ამდღარ მდგომარეობა, მუდგაინ შედეგ ქუმაჸუნუ. ჩქი ჯგირო მიჩქნა, „იეჰოვაშ დღა ზუსტას თეშ მოურს, მუჭოთ მახირალ სერით“ (1 თეს. 5:1—4).

9, 10. ა) მუშენ იჩიებ ხალხ ტყურას დო მუ შედეგ მოჸუნს თეს? ბ) მუქ ოკო ვაგმოჭყორდან იეჰოვაშ გურშენ?

⁹ მუჟამსით ახალ მუდგარენს გიმიგონენა დო თინა პოპულარულო გინირთუნ, დროხანიშ უკულ მასიურო იჭყაფუ თიშ გაშაშკუმალა. თეგვარო, ტყურა ხოლო ამდღარ საზოგადოებას მანგარო რე მოდვალირ დო თის ხვალე ძალაუფლება უღნან ფერ კათა ვეგმირინუანს შხვეფიშ ოღორებელო. ართ-ართ ჟურნალიშ სტატიაშ ავტორქ თეცალ სიტყვეფ ჭარჷ: „ტყურა პიროვნებაშ დამახასიათებელ ნიშანო რე გინორთელ“. ხალხი უმენტაშო ტყურას დუდიშ დაცვებელო ვარდა მუნეფიშ საჯგირობუოთ იჩიებ. თინეფ ტყურას იჩიებნა, ნამდა დოფორან მუნეფიშ შეცდომეფ, ქოძირან ფინანსურ მოგება ვარდა ქიმიოჭირნუან პირად მიზნეფს. მუჭოთ თე სტატიას ჭარუნ, რენა თიცალ კათა, მიდგას ადვილო გიშალე უჩინებუეფიშ, თანამშრომლეფიშ, მეგობრეფიშ დო საჸოროფო კათაშ ღორება.

¹⁰ მუ მოჸუნს შედეგო ტყურაშ რაგადის? პირველ რიგის, ნდობაშ დო ურთიერთობაშ დინაფა. წერმიდგინით, მუნერ გურიშ გატახალ რე, მუჟამსით ოსურ უზნეო საქციელ დოფორასინ თიშენ, აღორენს მუშ ართგურ ქომონჯის. ვარდა წერმიდგინით თიცალ კოჩ, ნამუთ გლახათ ოქცუ მუშ ოსურ დო ბაღანეფს, მუჟამსით ხვალე რენა, მარა ხალხწკუმა სამაგალითო პიროვნებათ მეუღ დუდ. მარა დღას ოკო ვაგმოჭყორდან, ნამდა თეცალ მეტყურე კათას მუთუნ ვემკახირე იეჰოვაშა, მუშენდა თიშ თოლს ირფელ არგამა რე (ებრ. 4:13).

11. მუს ბგურაფლენთ ანანია დო საფირაშ შემთხვევაშე? (ქოძირით სურათ მა-6 გვერდის).

¹¹ მაგალთო, ბიბლიას ჭარჷ, ნამდა სატანაქ პირველ საუკუნეს მახორუ ქრისტიან წყვილს, ანანიას დო საფირას, ღორონთშა ტყურაშ რაგად გაბედებაფუ. თინეფქ მოციქულეფიშ ღორება გეგნოჭყვიდეს. ანანია დო საფირაქ მუნეფიშ დიხა გეგმოჩეს, მარა მოციქულეფს ხვალე ფარაშ გვერდ ქიმუღეს. თე წყვილს კრებას მუნეფიშ დუდიშ გიმორჩქინა ოკოდ, ითამ თეცალ შესაწირით ხეგოფაჩილობა გიმირჩქინეს. მარა იეჰოვა ორწყედ სინამდვილეს, მუჭო მიქცუეს თინეფქ დო ათეშენ დასაჯ (საქ. 5:1—10).

12. მუ მელჷ ვენანიენან ფერ ტყურაშ მორაგადე კათას დო მუშენ?

¹² მუჭო უჯინე ღორონთ ტყურას? სატანა დო თიწკუმა ართო არძა, მით ვენანიენს დო ტყურაშ რაგადით თიშ მაგალითის მეჸუნს, გენადგურებ (გამოცხ. 20:10; 21:8; ფსალმ. 5:6). მუშენ შილებე თეშ რაგად? იეჰოვას ტყურაშ მორაგადე კათა ხოლო თიცალო ჯოგჷ, მუჭოთ თიცალ საქმეეფ, ნამუთ მოშინაფილ რე გამოცხადებაშ 22:15-ის.

13. მუს იჩიებ ბიბლია ღორონთშე დო მუჭო შემლებნა მივაჸუნათ თიშ მაგალითის?

¹³ ჩქი მიჩქნა, ნამდა „ღორონთ კოჩ ვა რე ტყურა თქუას“, ათეშენ „დღას ვა მოხვადუ  ღორონთიქ ტყურა ქოთქუას“ (რიცხ. 23:19; ებრ. 6:18). იეჰოვას ჯოგჷ „ტყურაშ მორაგადე ნინა“ (იგავ. 6:16, 17). ღორონთიშ მოწონა მიბღათინ, თიშ ნორმეფით ოკო იფცხოვრათ დო ვა ვაღორათ ართიან, თეშ გინაწონს ჭეშმარიტება ოკო ვეჩუათ ართიანს (კოლ. 3:9).

14. ა) მუთ გენესხვავებნა ჭეშმარიტ ქრისტიანეფ ტყურა რელიგიაშ მიმაჸუნალეფშე? ბ) გენწყით ლუკაშ 6:45-ის მოჩამილ ბიბლიურ პრინციპ.

¹⁴ მუთ გენესხვავებნა ჭეშმარიტ ქრისტიანეფ ტყურა რელიგიაშ მიმაჸუნალეფშე? ჩქი ჭეშმარიტებას ვეჩიებუთ ართიანს (წეკითხით ზაქარია 8:16, 17). * პავლე მოციქულ იჩიებ: „ირნერო ვარზენთ რეკომენდაციას ჩქინ დუც, ნამდა ღორონთიშ მსახურეფ ვორდათ . . . ჭეშმარიტებაშ რაგადით“ (2 კორ. 6:4, 7). იესოქ თქუ: „გურს ინოშაყარელს პიჯ იჩიებ“ (ლუკ. 6:45). თაშ ნამდა, მუჟამსით პიროვნებას ჭეშმარიტება გურს უღუნ, პიჯით ხოლო ჭეშმარიტებას იჩიებ. თეცალ კოჩ ირნერ სიტუაციას ირო სიმართლეს თქუანს უჩინებუეფ, თანამშრომლეფ, მეგობრეფ დო საჸოროფო კათაწკუმა ხოლო. მორთ, გუვარჩუათ, მუჭო შემლებნა პატიოსანეფ ვორდათ არძანერ სიტუაციას.

15. ა) მუშენ ვა რე გონივრულ იფცხოვრათ ჟირმაგ ცხოვრებათ? ბ) მუ მეხვარებ ახალგაზრდეფს ვეიაჸუნან მუნეფიშ მახანეფს? (ქოძირით სქოლიო).

¹⁵ მუჭო ოკო მიქცუას ახალგაზრდაქ, მიდგას ვაკო მუშ მახანეფშე განსხვავებულ რდას? გინოჭყვიდილ გაფდან, ნამდა შხვეფცალო ჟირმაგ ცხოვრებას ვემიაჸუნუთ. ნამთინე ახალგაზრდა ჸუდეს ვარდა კრებას ჯგირო იქციებ, მარა ქვეყნიურ ახალგაზრდეფწკუმა დო სოციალურ ქსელეფს გვალო შხვანერეფ რენა. თინეფ შილებე გლახა სიტყვეფს იჩიებდან, გამომწვევო მიკაქუნდან, გლახა შინაარსიშ მუსიკას ურჩქილენდან, ალკოჰოლს დო ნარკოტიკეფს ღებულენდან, ტყობაშე გილეშან პაემნეფშა ვარდა ხოლო უფრაშო იქციებდან. თეცალ საქციელით თინეფ ოცადნა დაღორან მშობლეფ, თანამორწმუნეეფ დო ღორონთ ხოლო (ფსალმ. 26:4, 5). თე დროს იეჰოვა ორწყე, ნამდა თინეფ ნინათ ცენა თაყვანს, მარა გურით შორს რენა თიშე (მარ. 7:6). ათეშენ უჯგუშ იჸუაფ, მივაჸუნათ იგავეფს ინოჭარილ სიტყვეფს: „ვენჯარას სქან გურს ცოდამეფიშ; იეჰოვაშა გოშკურდას დღაშ დო სერით“ (იგავ. 23:17). *

16. მუ ოკო აკეთათ, მუჟამსით სპეციალურ სრულ დროთ მსახურება გოკონა?

 ¹⁶ შილებე პიონერო ვარდა სპეციალურ სრულ დროთ მსახურება, მაგალთო ბეთელს მსახურება გოკოდან. ანკეტაშ შევსებაშ დროს აუცილებერ რე არძა კითხვას, ნამუთ ოხუ ჯამრთელობას, გართობას დო ზნეობრივ საკითხეფს, სწორაშო ქუპასუხათ (ებრ. 13:18). მუ ოკო აკეთათ, მუჟამსით არასწორო მიქცით, მარა თეშ გურშენ ვაიჩიებინნა უხუცესეფწკუმა? აუცილებერო ქოთხით თინეფს მოხვარა, ნამდა სუფთა სინდისით ქეშქალებუან თექ მსახურებაქ (რომ. 9:1; გალ. 6:1).

17. მუჭო ოკო მიფქცუათ, მუჟამსით ჩქინ ჯიმალეფიშ გურშენ ინფორმაციას ფთხინა?

¹⁷ მაგალთო მუჭო ოკო მიქცუათ, მუჟამსით სამეფოშ საქმე თქვან ქიანას ვარიებულ რე დო ხელისუფლებაშ წარმომადგენლეფ ჯიმალეფიშ გურშენ ინფორმაციას რთხინა? ოკო უწუათო ირფელ, მუთ გიჩქნა? მუჭო მიქცუ იესოქ, მუჟამსით რომიშ გამგებელქ თის დაკითხვა მოუნწყუ? იესოქ საერთოდ მუთუნ ვა უპასუხ, მუშენდა იხემძღვანელ ბიბლიურ პრინციპით: „რე ჩიებაშ დრო დო ჩიებაშე დუდიშ შეკებაშ დრო“ (ეკლ. 3:1, 7; მათ. 27:11—14). თაშ ნამდა, თეცალ სიტუაციეფიშ დროს ჯგირ იჸუაფ გონიერება გეგმიფრჩქინათ დო ჩქინ ჯიმალეფ საფრეთხეშ თუდო ვეგვორინუათ (იგავ. 10:19; 11:12).

18. მუ პასუხიშმგებლობა მიღნა, მუჟამსით უხუცესეფს შემცოდველეფიშ გურშენ ოკო დურაგადუათ?

¹⁸ მუ შილებე ფთქუათ, მუჟამსით თქვან კრებაშ წევრის სერიოზულო აფჷ დაშებულ დო თქვა ხოლო გიჩქუნა მუქ მოხვად? უხუცესეფს კრებაშ ზნეობრივო დაცვა ოვალნა, ათეშენ შილებე ქორკითხან, მუ გიჩქუნა მოხვალამირიშ გურშენ. მუჭო მიქციებუთ, მუჟამსით თენა თქვან ხოლოშიან მეგობარს ვარდა ნათესეს ოხუ? ბიბლია იჩიებ: „ართგურ კოჩ სიმართლეს თქუანს“ (იგავ. 12:17; 21:28). თაშ ნამდა, უხუცესეფს მუთუნ ვა უფულათინ თეშ, სრულ სიმართლე ოკო ქუწუათ. თინეფს არძა ფაქტი ოკო უჩქუდან, ნამდა ქიმეხვარან შემცოდველს იეჰოვაწკუმა ურთიერთობა აღადგინას (იაკ. 5:14, 15).

19. მუს გუვარჩიენთ თეშ უკულიან სტატიას?

¹⁹ ფსალმუნიშ მაბირე დავით იეჰოვას თხულენდ: „სი გოსიამოვნ ჭეშმარიტებაშ ძირაფა კოჩიშ გურს“ (ფსალმ. 51:6). დავითის უჩქუდ, ნამდა მნიშვნელოვან თინა რე, მუნერეფ ვორეთ შინაგანო. ცხოვრებაშ არძა სფეროს ჭეშმარიტ ქრისტიანეფ ართიანს ხვალე სიმართლეს ეჩიებნა. ხოლო ართ საშვალება, ნამდგათ შხვეფშე გიშებგორუთ, თინა რე ნამდა, ჭეშმარიტება ვოგურუათ შხვეფს. თე საკითხის უკულიან სტატიას გუვარჩიენთ.