1. მუ რე არძაშ უჯგუშ გადაწყვეტილება, ნამუშ მეღება თითოულს შემლებნა?

ხშირას მშობლეფიშ გადაწყვეტილებეფ ბრელ ხანს მოქმედენს სქუალეფიშ ცხოვრებაშა. მშობლეფ გლახა გადაწყვეტილებეფს ქოღებულენან-და, შილებე თექ მუნეფიშ სქუალეფს პრობლემეფ გურჩქინას. მარა ბრძნულ გადაწყვეტილებეფიშ მეღებათ მუნეფიშ სქუალეფს საშვალებას არზენა, ბედნერობათ დო კმაყოფილებათ ეფშა ცხოვრება უღდან. მუშო ოკო რაგად, მუნეფიშ მხარეშე, სქუალეფქ ხოლო ოკო მიღან ჯგირ გადაწყვეტილებეფ. არძაშ უჯგუშ გადაწყვეტილება, ნამუშ მეღება თითოულს შემლებნა, თენა რე ვემსახურათ ჩქინ მოჸოროფე ზეციერ მუმა იეჰოვას (ფსალმ. 73:28).

2. მუ ჯგირ გადაწყვეტილებეფ მიღეს იესოქ დო თიშ მშობლეფქ?

² იესოშ მშობლეფს გინოჭყვიდილ აფდეს, მუნეფიშ სქუალეფს იეჰოვაშ მსახურებას ქიმეხვარესკო. თინეფიშ გადაწყვეტილებეფშე იძირედ, ნამდა თენა რდუ მუნეფიშ მთავარ მიზან (ლუკ. 2:40, 41, 52). მუშ მხარეშე, იესო ხოლო ჯგირ გადაწყვეტილებეფს ღებულენდჷ, მუდგაქ მეხვარ, იეჰოვაშ განზრახვას მუშ როლ შეასრულკო (მათ. 4:1—10). მუჟამსით იესოქ მირდჷ, თინა კეთილ, ართგურ დო გაბედულ რდუ. არძა ღორონთიშმოშიშ მშობელიშ გურს სიამაყეთ დო ხიოლით ეიოფშანდჷ თეცალ სქუა.

3. ნამ კითხვეფს ვუპასუხენთ თე სტატიას?

³ თე სტატიას ქუპასუხენთ კითხვეფს: მუ ჯგირ გადაწყვეტილებეფ მიღჷ იეჰოვაქ იესოწკუმა დაკავშირებით? მუშ გურაფა შეულებნა ქრისტიან მშობლეფს იესოშ მიწიერ მშობლეფიშ მეღებულ გადაწყვეტილებეფშე? დო მუშ გურაფა შეულებნა ქრისტიან ახალგაზრდეფს იესოშ გადაწყვეტილებეფშე?

4. მუ ჯგირ გადაწყვეტილება მიღჷ იეჰოვაქ იესოწკუმა დაკავშირებით?

⁴ იეჰოვაქ იესოშო მანგარ ჯგირ მშობლეფ გიშაგორ (მათ. 1:18—23; ლუკ. 1:26—38). მარიამიშ ალალას ნარაგად სიტყვეფშე, ნამუთ ბიბლიას ინოჭარ, იძირე, მუჭო უჸორდჷ თის იეჰოვა დო თიშ სიტყვა (ლუკ. 1:46—55). იოსებ ომორჩილუდ იეჰოვაშ ხემძღვანელობას, სოვრეშეთ იძირე, ნამდა თის ღორონთიშ შიშ უღუდ დო ოკოდ გურ გუხარკო თის (მათ. 1:24).

5, 6. მუ სირთულეეფშე ვა დუცვებ იეჰოვას იესო?

⁵ ქიდეკვირით, ნამდა იეჰოვას მდიდარ მშობლეფ ვეგშუგორ იესოშა. თი შესაწირავშე, ნამუთ იოსებ დო მარიამქ იესოშ დაბადებაშ უკულ აკეთეს, იძირე, ნამდა თინეფ ღარიბეფ რდეს (ლუკ. 2:24). შილებე იოსების ნაზარეთის, ჸუდეწკუმა ხოლოს, ნოღვედკო ჭიჭე სახელოსნო, სოდეთ ჯაშ მოხელეთ მუშენდჷ. მუჭოთ იძირენ, თინეფ უბრალო ცხოვრებათ ცხოვრენდეს, განსაკუთრებულო თიშ უკულ, მუთ შქვით ვარდა მეტ სქუაქ ქაშის (მათ. 13:55, 56).

⁶ იეჰოვა იესოს კონკრეტულ საფრთხეეფშე თხილანდჷ, მარა გვალო ირფელშე ხოლო ვა დუცვებ (მათ. 2:13—15). მაგალთო, იესოს ურწმუნო ნათესეეფ ჸუნდჷ. წერმიდგინით, მუნერ გურიშგუმატახალ იჸუაფუდ იესოშო, მუჟამსით დუდშე მუშ ოჯახიშ წევრეფქ ვედიჯერეს, ნამდა თინა მესია რდუ (მარ. 3:21; იოან. 7:5). მუჭოთ იძირენ, იესო დიო ხოლო ახალგაზრდა რდუ, მუჟამსით მუშ მუმაჸონერ იოსებიქ ღურჷ. თენა მანგარ გურსაჭუო იჸუაფუდ თიშო. იოსებიშ ღურაშ უკულ, იესოქ, მუჭოთ უნჩაშ ქომოლსქუაქ, ოკო უხემძღვანელკო ოჯახიშ საქმეეფს (მარ. 6:3). მუჟამსით მირდჷ, იესოს უჩქუდ, მუჭო იზრუნკო ოჯახიშ საჭიროებეფშე. ათეშენ თიქ ბრელ ოკო იხანდუკო. თაშ ნამდა, თის გვალო ჯგირო არჩქილედ, მუს ნიშნენს დღაშ ბოლოს ფიზიკურ შულადა.

7. ა) ნამ კითხვეფ მეხვარებ დაქორწინებულ წყვილს, ჯგირ მშობლეფ რდან? ბ) მუჭო მეხვარებ მშობლეფს იგავეფიშ 2:1—6 სქუალეფშა გურაფას?

⁷ დაქორწინებულ წყვილ ქორეთ დო ქუგოკონა სქუალეფ რჸუნდან-და, ქოკითხით თქვან დუდის: „ქუვორეთო თიცალ თანდაბალ დო სულიერო მოაზროვნე ადამიანეფ, მიდგას იეჰოვა ახალ, ძვირფას სიცოცხლეშე ზრუნვას მიანდენს?“ (ფსალმ. 127:3, 4). უკვე მშობელ ქორეთ-და, ქოკითხით თქვან დუდის: „ქუვოგურუანქო სქუალეფს ხანდას?“ (ეკლ. 3:12, 13). „მუთ შემლებუნ  ირფელს ქუვორთუქო, ნამდა ჩქიმ სქუალეფ დეფცვე თი ფიზიკურ დო ზნეობრივ საფრთხეეფშე, ნამდგას შილებე სატანაშ ქვეყნიერებას ბრელშა შეხვადან?“ (იგავ. 22:3). მუშო ოკო რაგად, სქუალეფ გვალო ირფელშე ვადგაცვებენა, მუშენდა თენა ვა რე შეიოლებერ. მარა შეილებნა, ოგურუათ თინეფს, მუჭო გორან რჩევეფ ღორონთიშ სიტყვას დო თეშნერო ჭიე-ჭიეთ, ჸოროფათ მამზადათ თინეფ ცხოვრებისეულ სირთულეეფშო (წეკითხით იგავეფიშ 2:1—6). მაგალთო, თქვან ნათესე ჭეშმარიტ თაყვანიშმცემლობას მიოტენს-და, ქიმეხვარით თქვან სქუალეფს, ღორონთიშ სიტყვაშე ქიგეგან, მუშენ რე მნიშვნელოვან, ღორონთიშ ართგურეფ ქუდოსქიდან (ფსალმ. 31:23). ვარდა საჸოროფო პიროვნებაქ დოიღურეს-და, ქაძირეთ თქვან სქუალეფს, მუჭო გიმირინუან ღორონთიშ სიტყვა, ნამდა თე გურჭუა გეგნიღან დო შინაგან სიმშვიდე უღდან (2 კორ. 1:3, 4; 2 ტიმ. 3:16).

8. კანონიშ 6:6, 7-იშ თანახმას, მუ ოკო აკეთესკო იოსებ დო მარიამქ?

⁸ იესოს მიწიერ მშობლეფ ოხვარდეს, ნამდა ღორონთიშ მოწონა მიღკო; თინეფ მეჸუნდეს მშობლეფშა მეჩამილ იეჰოვაშ ხემძღვანელობას (წეკითხით კანონიშ 6:6, 7). იოსებ დო მარიამს მანგარო უჸორდეს იეჰოვა დო თინეფშო მთავარ რდუ, მუნეფიშ სქუალეფს ხოლო თაშ ქუჸოროფესკო თინა.

9. მუ მნიშვნელოვან ნაბიჯეფს გინოდგუნდეს იოსებ დო მარიამ?

⁹ იოსებ დო მარიამს ოჯახის ჯგირ სულიერ განრიგ უღდეს. თინეფ ირ მარას გილეშეს ნაზარეთიშ სინაგოგაშა დო ირწანიან პასექიშ დღახუშ დროს — იერუსალიმშა (ლუკ. 2:41; 4:16). იოსებ დო მარიამ, მუჟამსით იერუსალიმშა მიშეს, შარას ალბათ ოგურუანდეს იესო დო თიშ და დო ჯიმალეფს იეჰოვაშ ხალხიშ ისტორიას დო შილებე თი ადგილეფს ხოლო მიკუშარუანდესკო, ნამუთ წმინდა წერილეფს რდუ მოშინაფილ. მუთ უმოსო ირდუდ თინეფიშ ოჯახ, ალბათ იოსებ დო მარიამშო ადვილ ვეჸუაფუდ, ვადინუესკო ჯგირ სულიერ განრიგ. მარა იეჰოვაქ თინეფიშ მონდომა აკურთხჷ! თინეფს სულიერო მტკიცე ოჯახ უღდეს, მუშენდა იეჰოვაშ თაყვანიშცემას პირველ ადგილს გიორინუანდეს.

10. მუშ გურაფა შეულებნა ქრისტიან მშობლეფს იოსებ დო მარიამიშ მაგალითშე?

¹⁰ მუშ გურაფა შეულებნა ღორონთიშმოშიშ მშობლეფს იოსებ დო მარიამიშ მაგალითშე?  მუთ არძაშ უმოს მნიშვნელოვან რე, თქვან სქუალეფს სიტყვათ დო საქმეთ ქაძირეთ, ნამდა მანგარო გიჸორა იეჰოვა. რშუდან, არძაშ უმოს ჯგირ ძღვინ, ნამდგაშ მეჩამა სქუალეფშა შეილებნა, თინა რე, ნამდა იეჰოვა ქუჸოროფუათ. ხოლო ართ მნიშვნელოვან გაკვეთილ რე, ქუდაგურუათ თქვან სქუალეფს, უღდან ბიბლიაშ გურაფაშ, ლოცვაშ, შეხვალამეფშა დასწრებაშ დო მსახურებას მონაწილებაშ ჯგირ განრიგ (1 ტიმ. 6:6). მუშო ოკო რაგად, თქვა სქუალეფიშ მატერიალურ საჭიროებეფშო ხოლო ოკო იზრუნათ (1 ტიმ. 5:8). მარა რშუდან, ნამდა თე ქვეყნიერებაშ განადგურებაშ დროს გინოსქილადას დო ღორონთიშ დუნაპირებ ახალ ქვეყნიერებას ცხოვრებას მატერიალურ ქონება ვარინ, იეჰოვაწკუმა ხოლოშიან ურთიერთობა მეხვარებნა (ეზეკ. 7:19; 1 ტიმ. 4:8). *

11. ა) მუჭო მეხვარებ მშობლეფს 1 ტიმოთეშ 6:17—19-ს ინოჭარილ რჩევა, ნამდა სქუალეფიშ რდუალაშ დროს მიღან ჯგირ გადაწყვეტილებეფ? ბ) მუ მიზნეფ შეულებ თქვან ოჯახის უღდას დო მუ კურთხევეფქ შილებე მაჸუნას თეს შედეგო? (ქოძირით ჩარჩო „მუ მიზნეფ გაღვენუნა?“).

¹¹ სასიამოვნო რე, თი ქრისტიან მშობლეფიშ ძირაფა, მით ჯგირ სულიერ გადაწყვეტილებეფს ღებულენა, მუთ მუნეფიშ სქუალეფს ოხვარ! თინეფ ართო ომსახურნა იეჰოვას. ოსწრუნა კრებაშ შეხვალამეფს დო კონგრესეფს დო მონაწილებას ღებულენა მსახურებას. ნამთინე ოჯახ თიცალ ტერიტორიეფშა ხოლო მეურს, სოდეთ იშვიათო ქადაგენა. შხვეფ ბეთელშა მეულა ვარდა თეოკრატიულ სამშენებლო პროექტეფს უკინენა ხუჯის. მუშო ოკო რაგად, თე ირფელ ხარჯეფწკუმა რე დაკავშირებულ დო ალბათ, თე ოჯახეფ სირთულეეფს შეხვადდან იჸი. მარა თი კურთხევეფ, ნამდგას ღებულენა, სულიერო ამდიდრენს თინეფს (წეკითხით 1 ტიმოთეშ 6:17—19). ხშირას თეცალ ოჯახის ნარდჷ სქუალეფ აგრძელენა ჯგირ ჩვევეფიშ გავითარებას დო თეს დიდ კმაყოფილება მოუღ თინეფშა! (იგავ. 10:22). *

12. მუ ოკო აკეთკო იესოქ, მუჟამსით მირდუდ?

¹² იესოშ ზეციერ მუმა ირიათო ჯგირ გადაწყვეტილებეფს ღებულენს დო თიშ მიწიერ მშობლეფ ხოლო ბრძნულ გადაწყვეტილებეფს ღებულენდეს. მარა, მუჟამსით იესოქ მირდჷ, მუშით ოკო მიღკო გადაწყვეტილებეფ (გალ. 6:5). ჩქინცალო, იესოს ხოლო უღუდ ნებაშ თავისუფლებაშ ძღვინ. თის შეულებუდ, პირად ინტერესეფ პირველ ადგილს გიორინუკო, მარა იეჰოვაწკუმა ჯგირ ურთიერთობა ისხუნუ (იოან. 8:29). მუჭო შილებე იესოშ მაგალითიქ მეხვარას ახალგაზრდეფს?

13. მუს ორთუდ იესო ახალგაზრდობას?

¹³ ახალგაზრდა იესო ომორჩილუდ მუშ მშობლეფს. თინა ირიათო მეჸუნდჷ მშობლეფიშ ხემძღვანელობას, მუშენდა ვა ფიქრენდჷ, ნამდა თინეფშე უმოს უჩქუდ. თეშ  გინაწონს, „კინ ომორჩილუდ თინეფს“ (ლუკ. 2:51). მუშო ოკო რაგად, იესო სერიოზულო უჯინედ მუშ, მუჭოთ უნჩაშ ქომოლსქუაშ, პასუხიშმგებლობას. თინა ირფელს ორთუდ, ნამდა იოსებშე ქიდიგურუკო ხელობა, მუთ მეხვარებუდ, ქიზრუნკო ოჯახიშ საჭიროებეფშო.

14. სოვრეშე მიჩქნა, ნამდა იესო გურგედვალირო გურაფლენდჷ ღორონთიშ სიტყვას?

¹⁴ ალბათ, იოსებ დო მარიამ იესოს ქუწინდეს თიშ სასწაულებრივო დაბადებაშ ამბეს დო თის, მუთ ღორონთიშ მაცნეეფქ თქუეს იესოშ გურშენ (ლუკ. 2:8—19, 25—38). მარა იესო ხვალე თე რჩქინათ ვა დაკმაყოფილებე. მუჭოთ იძირენ, თინა ირკვიენდჷ წმინდა წერილეფს. სოვრეშე მიჩქნა, ნამდა იესო გურგედვალირო გურაფლენდჷ ღორონთიშ სიტყვას? მუჟამსით დიო ხოლო ბაღანა რდუ, იერუსალიმს რდესინ თი მასწავლებერეფს „თიშ გაგება დო პასუხეფ  . . . აკვირენდჷ“ (ლუკ. 2:46, 47). ხვალე თენა ვარინ, დიო ხოლო 12 წანერ იესოს თიშმაჯგირათ უჩქუდ ღორონთიშ სიტყვა, ნამდა მტკიცას წანდჷ იეჰოვა თიშ მუმა რდუნ (ლუკ. 2:42, 43, 49).

15. მუჭო ოძირუ იესოქ, ნამდა გინოჭყვიდილ აფუდ, იეჰოვას დემორჩილკო?

¹⁵ მუჟამსით იესოქ ქიგეგ, მუ როლ უღუდ იეჰოვაშ განზრახვას, თიქ გინოჭყვიდ, მუშ დანიშნულება შეასრულკო (იოან. 6:38). თის უჩქუდ, ნამდა ბრელ გიჯოგუანდჷ დო თეშე ფიქრენდკონ იჸიდ. მარა იესოს გინოჭყვიდილ აფუდ, იეჰოვას დემორჩილკო. ახ. წ. 29 წანას, მუჟამსით იესოქ ინათ, თის მთელ ყურადღება გინოღალირ აფუდ თი საქმეშა, მუდგაშ კეთებას იეჰოვა ითხინდჷ თიშე (ებრ. 10:5—7). თიმწკუმა ხოლო, მუჟამსით წამებაშ ბოძის ღურუდ, იესო კინ იეჰოვაშ ნებაშ შესრულებაშე ფიქრენდჷ (იოან. 19:30).

16. მუ რე ართ-ართ მხარე, მუდგაშ გურაფა სქუალეფს შეულებნა იესოშე?

¹⁶ დემორჩილით მშობლეფს. იოსებ დო მარიამცალო, ვართ თქვან მშობლეფ რენა სრულყოფილეფ. მარა იეჰოვაქ თინეფს დავალ თქვან დაცვება, გურაფა დო ხემძღვანელობა. თინეფიშ რჩევას ქაფასენთ დო თინეფიშ ძალაუფლებას პატის ქოცენთ-და, წარმატებულეფ იჸუაფუთ (ეფეს. 6:1—4).

17. მუჭოთ იესო ნავეშ ძეშ 24:15-შე იძირე, მუ გადაწყვეტილება ოკო მიღან ახალგაზრდეფქ?

¹⁷ გეგნოჭყვიდით, მის ემსახურებუთ. თქვა ოკო ქიგეგათ, მი რე იეჰოვა, მუ მიშურს თიშ განზრახვაშა დო მუჭო ოკავშირ თიშ ნება თქვან ცხოვრებას (რომ. 12:2). თეშნერო შეგალებენა, მიღათ არძაშ უმოს მნიშვნელოვან გადაწყვეტილება — ემსახურათ იეჰოვას (წეკითხით  იესო ნავეშ ძეშ 24:15; ეკლ. 12:1). ბიბლიას რეგურალურო ქოკითხულენთ დო ქოგურაფლენთ-და, უმოსო გეჸოროფებნა იეჰოვა დო თიშ მიმართ რწმენა უმოსო გეგემანგარებნა.

18. მუ ოკო აკეთან ახალგაზრდეფქ დო მუ მაჸუნუ თეს შედეგო?

¹⁸ იეჰოვაშ ნებაშ შესრულება ცხოვრებას პირველ ადგილს ქიგიორინეთ. სატანაშ ქვეყნიერება ამტკიცენს, ნამდა თქვან ნიჭ დო უნარეფს კინ თქვან საჯგირობუოთ გეგმირინუანთ-და, ბედნერ იჸუაფუთ. მარა, სინამდვილეს თინეფ, მიდგას მატერიალურ მიზნეფ უღჷ, საბოლათ ბრელ ჭუას მიორინუანა მუნეფიშ დუდის (1 ტიმ. 6:9, 10). თეშ გინაწონს, იეჰოვას ქუმურჩქილუანთ დო თიშ ნებაშ შესრულებას ცხოვრებას პირველ ადგილს ქიგიორინუანთ-და, ჭკვერულო მიქციებუთ დო ცხოვრებას წარმატებულ იჸუაფუთ (იეს. 1:8).

19. მუ ოკო შუდან მშობლეფს?

¹⁹ მშობლეფ, მუთ შეილებნა ირფელ გაკეთით, ნამდა ქიმეხვარათ თქვან სქუალეფს, ემსახურან იეჰოვას. მიენდით ღორონთის დო თინა ბრძნულ გადაწყვეტილებეფიშ მეღებას მიგეხვარებნა (იგავ. 3:5, 6). რშუდან, თქვან სქუალეფშა უმოსო თქვან საქმეეფ იმოქმედენს, ვინემ თქვან სიტყვეფ. თაშ ნამდა, თიცალ გადაწყვეტილებეფ მიღით, ნამუთ მეხვარებ თინეფს, იეჰოვაშე მოწონა უღდან.

20. მუ კურთხევეფს მიღენა ახალგაზრდეფ, იეჰოვაშ მსახურებას გეგნოჭყვიდნან-და?

²⁰ ახალგაზრდეფ, მშობლეფს შეულებნა ბრძნულ გადაწყვეტილებეფიშ მეღებას მიგეხვარან. მარა თქვანდა რე დამოკიდებულ, მიღენთ დო ვარ ღორონთშე მოწონას. ათეშენ მიაჸუნით იესოშ მაგალითის დო გინოჭყვიდილ გაფდან, ემსახურათ თქვან მოჸოროფე ზეციერ მუმას. თეს გაკეთენთ-და, ამდღარშე იჸუაფუთ ბედნერეფ დო კმაყოფილეფ (1 ტიმ. 4:16). დო მომავალს გეხარენთ არძაშ უმოს ბედნერ ცხოვრებათ!