1. სოვრეშე მიჩქნა, ნამდა მოწაფეეფიშ მომზადება სიცოცხლეშ მარსხებელ საქმე რე?

მოწაფეეფიშ მომზადება სიცოცხლეშ მარსხებელ საქმე რე! სოვრეშე მიჩქნა თენა? მათეშ 28:19, 20-ის იესოქ თეშნერ მითითება მუჩეს: „მეუთ . . . მოწაფეეფო მამზადით . . . დონათით თინეფ“. მუსხით მნიშვნელოვან რე ნათუა? ნათუა აუცილებერ მოთხოვნა რე თინეფშო, მიდგას გინოსქილადა ოკო. ნათუაშ კანდიდატის ოკო ჯერდას, ნამდა რსხება ხვალე იესოშ ღურა დო გათელებაშ ჭყოლოფათ რე შეიოლებერ. ათეშ გურშენ უწუ მოციქულ პეტრექ თანაქრისტიანეფს: „ნათუა . . . ომსახურ თქვან რსხებას . . . ქრისტეშ გათელებაშ საშვალებათ“ (1 პეტ. 3:21). თაშ ნამდა, მუჟამსით ახალ მოწაფე ინათუ, თინა რსხებაშ შარას გიოდირთუ.

2. მუშა მომწოდენა 2 ტიმოთეშ 4:1, 2 ბიბლიაშ მასწავლებერეფს?

² მოწაფეეფ მუვამზადათინ, „გურაფაშ ხელოვნება“ ოკო გეგმიბრინუათ (წეკითხით 2 ტიმოთეშ 4:1, 2). მუშენ რე თენა საჭირო? იესოქ თეცალ მითითება მუჩეს: „მეუთ . . . მოწაფეეფო მამზადით . . . ქუდაგურეთ თინეფს“. მოციქულ პავლექ თქუ, ნამდა თე საქმე „ირიათო“ ოკო ვაკეთათ დო თიქ გეუძინ: „სქან დუდის ხოლო ირსხენქ დო მარჩქილეეფს ხოლო“. ზუსტას თე მიზეზიშ გურშენ თქუ პავლექ: „ირიათო ქიდეკვირ . . . მუს დო მუჭო ოგურუანქ“ (1 ტიმ. 4:16). თაშ ნამდა, მოკონა ჯგირო ვოგურუათ, მუშენდა გურაფა მოწაფეეფიშ მომზადებაწკუმა რე დაკავშირებულ.

3. მუს გუვარჩიენთ თე სტატიას?

³ ჩქი რეგულარულო ვოგურუანთ მილიონობით ადამიანს ბიბლიურ ჭეშმარიტებას. მარა, მუჭოთ წოხლენ სტატიას რდუ გარჩიებულ, მოკონა მიჩქუდან, მუჭო მივეხვარათ თინეფს, იესო ქრისტეშ ნათილ მოწაფეეფო გინირთან. თე სტატიას გუვარჩიენთ  ხოლო ხუთ მხარეს, მუთ ბიბლიაშ მასწავლებერეფქ ოკო აკეთან, ნამდა ბიბლიაშ მაგურაფალ ნათუაშა ქიმიჸონან.

4. მუშენ ოკო გიმირჩქინას დუდშეკება მასწავლებერქ, მუჟამსით ბიბლიაშ გურაფას ატარენს? (ქოძირით სქოლიო.)

⁴ ჩქი მიჸორა თინა, მუდგას ღორონთიშ სიტყვაშე ვოგურუანთ. ათეშენ მინშა შილებე მოკოდან, ბრელ იფჩუათ თიშე, მუთ მიჸორა. მარა „გინაჯინალ კოშკიშ“ შეხვალამას ვატარენთ, „კრებაშ ბიბლიაშ გურაფას“ დოვარ კონკრეტულ პიროვნებას ვოგურუანთ ბიბლიას, ბრელ ოკო ვეფჩუათ. მასწავლებერქ ბიბლიაშე ოგურუასინ, თიქ დუდშეკება ოკო გეგმირჩქინას დო ვეცადას ირფელიშ ენწყუმას, მუთ ბიბლიურ მუხლშე ვარდა კონკრეტულ საკითხშე უჩქჷ (იოან. 16:12). * ქიგიშინ, მუსხი გიჩქუდ ბიბლიაშე ნათუაშახ დო დეფიქრ, ასე მუსხი გიჩქჷ. ალბათ, თიმწკუმა ხვალე ძირითად ბიბლიურ გურაფეფს ინანჭუდ (ებრ. 6:1). რშუდას, ნამდა წანეფქ დეგესაჭირ, ქიდიგურეკო თინა, მუთ ამდღა გიჩქჷ, ათეშენ ვეცადა, ბიბლიაშ ახალ მაგურაფალს ირფელ ართათ ქუდაგურუე.

5. ა) პირველ თესალონიკელეფიშ 2:13-იშ თანახმას, მუ მოკონა ბიბლიაშ მაგურაფალქ გეგას? ბ) მუჭო შემლებნა ბიბლიაშ მაგურაფალს ელვუჩათ, შხვეფს ქეჩუას თინა, მუდგას გურაფლენს?

⁵ ჩქი მოკონა, ბიბლიაშ მაგურაფალქ ქიგეგას, ნამდა მუდგას გურაფლენს, ბიბლიაშა რე გერსხილ (წეკითხით 1 თესალონიკელეფიშ 2:13). მუჭო შემლებნა თეშ კეთება? ქელუჩ მაგურაფალს, მუდგას გურაფლენსინ თინა, შხვეფს ქეჩუას. თიშ მანგიორო, ნამდა ირო სი ენწყე ბიბლიურ მუხლეფ, ქოთხი ბიბლიაშ მაგურაფალს, ნამთინე მუხლ მუქ გენწყას. ქიმეხვარ თის, ქოძირას, პირადო მუს მუჭო ოხუ ღორონთიშ სიტყვა. ქუდუსვ თიცალ კითხვეფ, სოვრეშეთ გეგენქ, მუს ფიქრენს თი ბიბლიურ მუხლშე, ნამდგას კითხულენს (ლუკ. 10:25—28). მაგალთო, ქოკითხ: „იეჰოვაშ ნამ თვისება ძირჷ თე მუხლშე?“ „მუ ჯგირობუას მოიღანს ბიბლიურ ჭეშმარიტება?“ „მუს ფიქრენქ ნაგურეფშე?“ (იგავ. 20:5). არძაშ უმოს მნიშვნელოვან თინა რე, ბიბლიაშ მაგურაფალს მუსხით უჸორს დო გიმირინუანს ნაგურეფუს დო ვართ ხოლო თინა, მუსხი უჩქჷ.

6. მუშენ იჸუაფ ჯგირ ბიბლიაშ გურაფაშა გამოცდილ მასწავლებერიშ ჸუნაფა?

⁶ ქიმერჸუნსო ბიბლიაშ გურაფაშა თი მაუწყებელეფ, მით გამოცდილ მასწავლებერეფ რენა? თაშ ქორენ-და, ქოკითხ თინეფს, მუს ფიქრენა თიშე, მუჭო ატარენქ ბიბლიაშ გურაფას დო მუსხით ჯგირო ირინუანქ ბიბლიას. თანდაბლობა რე აუცილებერ, ნამდა გაუჯგუშე გურაფაშ უნარეფ (ქეშუდარით საქმეები 18:24—26). თეშ უკულ ქოკითხ გამოცდილ მაუწყებელს, მუს ფიქრენს, ქინანჭუნო ბიბლიაშ მაგურაფალ თის, მუდგას გურაფლენს. თეს გეძინელ, შეილებ, თე მაუწყებელს თხუე, ნამდა, მუჟამსით ართ ვარდა მუსხირენ მარათ შხვადო იჸუაფუქ ულირ,  სქან მანგიორო ჩატარას ბიბლიაშ გურაფა. თეშნერო ვართ ბიბლიაშ გურაფა გოჩირთუ დო მაგურაფალ ხოლო ქოძირუნს, მუსხით მნიშვნელოვან რე თინა. დღას ვეფიქრა, ნამდა თე ბიბლიაშ გურაფა „სი“ გოკუთვნ დო შხვას ვა უღჷ თიშ ჩატარებაშ უფლება. სი ხომ თინა გოკო, მუთ ბიბლიაშ მაგურაფალშო იჸუაფ არძაშ უჯგუშ, მუდგაშა მიშურს თინა, ნამდა თიქ უმოს მეტ რჩქინა მიღას ჭეშმარიტებაშ გურშენ.

7. მუ მეხვარებ ბიბლიაშ მაგურაფალს ქიჸოროფუას თინა, მუდგას გურაფლენს?

⁷ ბიბლიაშ მაგურაფალქ ოკო ქოძირას, ნამდა შურდოგურით ოგურუანქ დო რჯერს ღორონთიშ სიტყვას ინოჭარილ ჭეშმარიტება (1 თეს. 1:5). შედეგო მეტ შანს იჸუაფ, ნამდა ქიჸოროფუას თინა, მუდგას გურაფლენს. შეიოლებერ ქორენ-და, ქუწი პირადო სი მუჭო მიგეხვარ ბიბლიურ პრინციპეფით ცხოვრებაქ. თეშნერო თინა ქიმეხვადუ, ნამდა ბიბლიას მოჩამილ რე პრაქტიკულ რჩევეფ, ნამუთ მუს ხოლო გიმადირთუ.

8. ხოლო მუშ კეთება შეილებ, ნამდა მეხვარე ბიბლიაშ მაგურაფალს დო მუშენ იჸუაფ თენა ჯგირ?

⁸ ბიბლიაშ გურაფაშ დროს ქეჩი მაგურაფალს თინეფიშ ისტორიეფ, მიდგას თიცალ სირთულეეფ უღდეს, მუნერით მუს უღჷ, მარა გიორჯგინეს თინეფს. შეილებ კრებაშე თი მაუწყებელ მიდეჸუნე, მიდგაშ მაგალით გიმადირთუ თის ვარდა შეილებ თეცალ გურიშემაკინალ შემთხვევეფ დოგორე jw.org^®-ის მოჩამილ სტატიეფიშ სერიას: „ბიბლია ხალხიშ ცხოვრებას თირანს“. * თეჯგურა სტატიეფ დო ვიდეოეფ მეხვარებ ბიბლიაშ მაგურაფალს, ქოძირას, მუსხით ჭკვერულ რე, იცხოვრას ბიბლიურ პრინციპეფით.

9. მუჭო შეილებ ელუჩე ბიბლიაშ მაგურაფალს, ნამდა ნაგურეფ მუშ ოჯახიშ წევრეფს დო მეგობრეფს ქეჩუას?

⁹ ბიბლიაშ მაგურაფალ დაქორწინებულ ქორენ-და, თიშ მეუღლე ხოლო ქოგურაფლენსო? თაშ ვარენ-და, ქუწი, თიქ ხოლო ქიდიჭყას გურაფა. ქელუჩ ბიბლიაშ მაგურაფალს, ნამდა ნაგურეფ მუშ ოჯახიშ წევრეფს დო მეგობრეფს ქეჩუას (იოან. 1:40—45). მუჭო შეილებ თეშ კეთება? მაგალთო, ქოკითხ: „მუჭო ეუნწყუნდჷ თე ბიბლიურ გურაფას სქან ოჯახის?“ ვარდა „ნამ ბიბლიურ მუხლის გიმირინუანდჷ, ნამდა თე საკითხ მეგობარს გეუნწყიკო?“. თეშნერო, ბიბლიაშ მაგურაფალს მასწავლებერო მამზადენქ. უკულ, მუჟამსით მზათ იჸუაფ, შეიალებე მოუნათლავ მაუწყებელო გინირთას დო კრებაწკუმა იმსახურას. შეილებ ქოკითხე ბიბლიაშ მაგურაფალს, ხომ ვეჩინენს მითინს, მიდგას ბიბლიაშ გურაფა ოკო. თაშ ქორენ-და, ხეთეშე  დეკავშირ თი პიროვნებას დო ქუწი, ნამდა შეილებ ბიბლია ოგურუე. ქაძირე თის ვიდეო „მუჭო ატარენა ბიბლიაშ გურაფას?“. *

10. მუჭოთ 1 თესალონიკელეფიშ 2:7, 8-ს რე ეჭარილ, მუჭო შეულებ მასწავლებერს, მიაჸუნას პავლე მოციქულიშ მაგალითის?

¹⁰ მასწავლებერეფქ მთელ გურით ოკო გეგმირჩქინან პირად ინტერეს ბიბლიაშ მაგურაფალიშ მიმართ. ქუჯინ თინეფს, მუჭოთ მომავალ სულიერ და დო ჯიმალეფს (წეკითხით 1 თესალონიკელეფიშ 2:7, 8). თინეფშო ადვილ ვა რე, მიოტუან ქვეყნიურ მეგობრეფ დო დოთირუან მუნეფიშ ცხოვრება, ნამდა ემსახურან იეჰოვას. ჩქი ოკო მივეხვარათ თინეფს, ნამდვილ მეგობრეფ კრებას დოგორან. პირველ რიგის სი ოკო რდე თიშ მეგობარ; ხვალე ბიბლიაშ გურაფაშ დროს ვარინ, შხვა დროს ხოლო ქიმიაკითხე თის. შეილებ დოურეკე, ქიმეჭარე ვარდა ჭიჭე ხანით ქიმერთე. თეშნერო ოძირანქ, ნამდა ზრუნენქ თიშე.

11. ხოლო მუს მოკონა, მივეხვარათ ბიბლიაშ მაგურაფალეფს დო მუშენ?

¹¹ აფრიკას თეცალ გამონათქვამ არსებენს: „ბაღანაშ რდუალას მთელ სოფელ ოსაჭირ“. თეშნერო შემლებნა ფთქუათ: „პიროვნებაშ მოწაფეთ მომზადებას მთელ კრება ოსაჭირ“. ათეშენ ბიბლიაშ მასწავლებერეფ მუნეფიშ ბიბლიაშ მაგურაფალეფს კრებას თიცალ ქრისტიანეფს ოჩინებაფუანა, მიდგას ჯგირ გავლენა აღვენუ თინეფწკუმა. თაშ ნამდა, თინეფს შეულებნა სასიამოვნო ურთიერთობა უღდან ღორონთიშ ხალხწკუმა, მით თინეფს სულიერო დო ემოციურო ქელუდირთუ. ჩქი მოკონა, ბიბლიაშ მაგურაფალქ დეახლოვას ჩქინ მოჸოროფე ქრისტიანულ საჯიმალოს. თენა მეხვარებ, ვა უღდას ხოლოშიან ურთიერთობა თინეფწკუმა, მით ვა უნწყუნს ხეს, ქიჸოროფუას იეჰოვა (იგავ. 13:20). ბიბლიაშ მაგურაფალს ჯვეშ მეგობრეფ ოჭიშის ქურთინუანან-და, თის არჩქვენუ, ნამდა შეულებ ნამდვილ მეგობრეფ იეჰოვაშ ორგანიზაციას დოგორას (მარ. 10:29, 30; 1 პეტ. 4:4).

12. მუშენ ოკო ვეჩუათ ბიბლიაშ მაგურაფალს ქრისტიანულ მეძღვინუა დო ნათუაშ გურშენ?

¹² ბიბლიაშ მაგურაფალს ხშირას ქეჩი, მუსხით მნიშვნელოვან რე ქრისტიანულ მეძღვინუა დო ნათუა. პიროვნებაშა ბიბლიაშ გურაფაშ მთავარ მიზან რე, მივეხვარათ თის, გინირთას ნათილ მოწაფეთ. ბიბლიაშ რეგულარულო გურაფაშ დოჭყაფაშე მუსხირენ თუთაშა დო განსაკუთრებულო შეხვალამეფშა გილულაშ უკულ, მაგურაფალს ოკო არჩქილედას, ნამდა გურაფაშ მიზან რე, მივეხვარათ თის, ქიდიჭყას იეჰოვაშ მსახურება, მუჭოთ ნათილ იეჰოვაშ მოწმექ.

13. მუ ნაბიჯეფს გინოდგუნს ბიბლიაშ მაგურაფალ, ნამდა დინათას?

 ¹³ ჭიე-ჭიეთ ბიბლიაშ მაგურაფალ, ნამდგას ღორონთიშ მსახურება ოკო, ქიმიოჭირინუანს მიზანს დო დინათუ! დუდშე თინა იეჰოვას გეჩინებაფუანს, ქიჸოროფუანს დო რწმენას გავითარენს თიშ მიმართ (იოან. 3:16; 17:3). თეშ უკულ ბიბლიაშ მაგურაფალ დეახლოვებ იეჰოვას დო კრებას (ებრ. 10:24, 25; იაკ. 4:8). შედეგო, თინა მიოტენს გლახა საქმეეფს დო მინანიენს ცოდვეფს (საქ. 3:19). თეს გეძინელ, რწმენა აღძრენს თის, შხვეფს ხოლო ქეჩუას ჭეშმარიტება (2 კორ. 4:13). საბოლათ თინა დუდის მეუძღვინენს იეჰოვას დო თეშ სიმბოლოთ დინათუ (1 პეტ. 3:21; 4:2). თენა მანგარ ბედნერ დღა რე არძაშო! მუჟამსით ბიბლიაშ მაგურაფალ თე ნაბიჯეფს გინოდგუნს, ხშირას ქაცქვე დო გურშა ქელუკინ თის, ნამდა გაგრძელას თე შარაშ მეჸუნა.

14. მუჭო შეულებ ბიბლიაშ მასწავლებერს ქოძირას, სულიერო წიმი ქიმურს დო ვარ ბიბლიაშ მაგურაფალ?

¹⁴ მოთვინება მოსაჭირნა, მუჟამსით ვოხვარუთ ბიბლიაშ მაგურაფალს, დუდ მეუძღვინას იეჰოვას დო დინათას. მარა საჭირო რე ქიგებგათ, მართალო ქაკონ დო ვარ თის იეჰოვაშ მსახურება. ქიძირენო, ნამდა ბიბლიაშ მაგურაფალ ოცად, დემორჩილას იესოშ მითითებეფს? დოვარ უბრალოთ საინტერესო ინფორმაციაშ მეღება ოკო ბიბლიაშე?

15. მუს ოკო დეკვირას ბიბლიაშ მასწავლებერქ?

¹⁵ დროშ მიკულაწკუმა ართო ქიდეკვირ, მუ ნაბიჯეფს გინოდგუნს ბიბლიაშ მაგურაფალ. მაგალთო, ქიგმოხანტუნსო მუშ გრძნობეფს იეჰოვაშ მიმართ? ქოლოცულენსო? (ფსალმ. 116:1, 2). ქუმოწონსო ბიბლიაშ კითხირ? (ფსალმ. 119:97). რეგულარულო ქასწრუნო შეხვალამეფს? (ფსალმ. 22:22). დითირუო ცხოვრებაშ წეს? (ფსალმ. 119:112). ქეჩიებნო მუშ ოჯახიშ წევრეფს დო მეგობრეფს, მუდგას გურაფლენს? (ფსალმ. 9:1). მუთ არძაშ უმოს მნიშვნელოვან რე, ქაკონო იეჰოვაშ მოწმეთ გინორთა? (ფსალმ. 40:8). ბიბლიაშ მაგურაფალ თე ნაბიჯეფს ვეგნოდგუნს დო სულიერო წიმი ვემურს-და, მეგობრულო, მარა ალალას ქუდურაგადე თე საკითხშე. *

16. მუქ შილებე ოძირას, ნამდა პიროვნებაწკუმა ბიბლიაშ გურაფაქ ოკო მეჭყორდას?

¹⁶ დროშ მიკულაწკუმა ართო ქიდეკვირ, ოკო გაგრძელე დო ვარ პიროვნებაწკუმა ბიბლიაშ გურაფა. ქოკითხ სქან დუდის: „ვემზადებუნო  ბიბლიაშ მაგურაფალ გურაფაშო? ვაკონო კრებაშა გილულა? დიო ხოლო უღუნო გლახა ჩვევეფ? ხოლო ვაფნო დოტებულ ტყურა რელიგია?“ თე კითხვეფიშ პასუხეფ დადებით ქორენ-და, თიწკუმა ბიბლიაშ გურაფაშ გაგრძელება თიცალ იჸუაფ, ნჩურუა ოგურუე თიცალ პიროვნებას, მიდგას შოლუა ვაკო! ბიბლიაშ მაგურაფალ მუდგას გურაფლენსინ, მთელ გურით ვაფასენს დო მუშ ცხოვრებას მუდგარენეფიშ თირუა ვაკონ-და, მუ აზრ უღჷ თიწკუმა გურაფაშ გაგრძელებას?!

17. მუჭოთ 1 ტიმოთეშ 4:16 -ის ჭარჷ, მუს ოკო დეკვირას თითოულ ბიბლიაშ მასწავლებერქ?

¹⁷ ჩქი სერიოზულო ვუჯინეთ მოწაფეეფიშ მომზადებაშ პასუხიშმგებლობას დო მოკონა, მივეხვარათ ბიბლიაშ მაგურაფალეფს, სულიერო წიმი მიდართან დო დინათან. თე მიზეზიშ გურშენ ვოგურუანთ ბიბლიაშე დო თეს მთელ გურით დო დამაჯერებელო ვორთუთ. ჩქი ელვუჩანთ თის, მეგობრეფ კრებას დოგორას. ყურადღებას ვუმახვილენთ მეძღვინუა დო ნათუაშ მიზანშა დო დროშ მიკულაწკუმა ართო ვოკვირუთ, ქიმურს დო ვარ ბიბლიაშ მაგურაფალ სულიერო წიმი (ქოძირით ჩარჩო „მუ ოკო აკეთან ბიბლიაშ მასწავლებერეფქ, ნამდა ბიბლიაშ მაგურაფალეფ ნათუაშა ქიმიჸონან“). ჩქი მოხიოლნა, ნამდა მონაწილებას ბღებულენთ თე სიცოცხლეშ მარსხებელ საქმეს! მორთ გინოჭყვიდილ მაფდან, მუთ შემლებნან ირფელ გუვაკეთათ, ნამდა ჩუვატარათ თიცალ ბიბლიაშ გურაფა, ნამუთ პიროვნებას ნათუაშა მიჸონანს.