1, 2. ა) მუს ორთჷ ნამთინე ხელისუფლება ღორონთიშ ხალხიშ წინააღმდეგ დო მუნერ რეაქცია უღნა თინეფს? ბ) მუჭო შემლებნა ვორდათ ბედნერეფ, მუჟამსით ფთხოზნა? (კომენტარ გუკეთით გალენ გვერდის მოჩამილ სურათის ხოლო).

 ᲩᲥᲘᲜ საქმიანობა ამდღა 30-შე მეტ ქიანას ვარდა შეზღუდულ რე ვარდა ვარიებულ. თე ქიანეფშე ნამთინეს მართველეფ ციხეს ოხუნუანა ჩქინ და დო ჯიმალეფს. დაშუესო თინეფქ მუთუნ? თინეფ ციხეს თიშენ ვა ხენა, ნამდა იეჰოვაშ თოლს მუდგარენ გლახა აფნა კეთებულ. თინეფ უბრალოთ ბიბლიას კითხულენა დო გურაფლენა, შხვეფს ეჩიებნა მუნეფიშ რწმენაშ გურშენ დო იშაყარნა თანამორწმუნეეფწკუმა ართო. თეწკუმა ართო, თინეფ ვა თმენა პოლიტიკურ ნეიტრალიტეტის. წინააღმდეგობეფიშ უმკუჯინუო, ღორონთიშ თე მსახურეფქ ვადინუეს სიწმინდე, b გეგმირჩქინეს თიცალ ართგურობა, ნამდგაშა მუთუნს ვა მარიებუ დო თექ თინეფს ბედნერობა მოუღ.

² თქვა ალბათ სურათეფშე ნაძირეფ გაჸინა ნამთინე თე გაბედულ და დო ჯიმაშ გოძიცებულ სახეეფ. თინეფს ოხიოლნა, მუშენდა უჩქნა, ნამდა მუნეფიშ სიწმინდეთ იეჰოვას უხარენა გურს (1 მატ. 29:17ა). იესოქ თქუ: „ბედნერეფ რენა, მიდგას სიმართლეშ გურშენ თხოზუნა. გოხიოლდან, მუშენდა ზეცას დიდ ჯილდო გელნა“ (მათე 5:10—12).

3. მუჭოთ საქმეეფიშ 4:19, 20-შე იძირე, მუნერ რეაქცია უღდეს მოციქულეფს თხოზინშენ დო მუშენ?

³ ამდღა ჩქინ და დო ჯიმალეფს გინუღნა თიცალ მუდგარენ, მუთ პირველ საუკუნეს მახორუ მოციქულეფს გინუღდეს ქადაგებაშ გურშენ. იუდეველეფიშ უზენაეს სასამართლოშ მოსამართლეეფს ართ დო ჟირშა ვა უზოჯებნა თინეფშა, „ხონარ ვეკუღალდესკო დო ვა უგურუაფდესკო შხვეფშა იესოშ სახელით“ (საქ. 4:18; 5:27, 28, 40). მუნერ რეაქცია უღდეს მოციქულეფს? (წეკითხით საქმეეფიშ 4:19, 20). თინეფს უჩქუდეს, ნამდა თე მოსამართლეეფშე ბრელით უმოს აღმატებულს აფუდ თინეფშა ნაზოჯინა, იქადაგესკო (საქ. 10:42). თაშ ნამდა, ღორონთიშ ხალხიშ თე წარმომადგენელეფქ, პეტრე დო იოანექ, გაბედულო თქუეს, ნამდა ღორონთის უმოსო დემორჩილებდეს, ვინემ თე მოსამართლეეფს დო გაცხადეს, ნამდა ვემიოტენდეს ჩიებას იესოშ გურშენ. თენა თიცალ რდჷ, მოსამართლეეფშა უკითხირდესკო: „ქუგაბედუთო, თიშ რაგადის, ნამდა თქვან ნარაგად ღორონთიშშე უმოს მნიშვნელოვან რე?!“.

4. მუჭოთ საქმეეფიშ 5:27—29-ს რე ეჭარილ, მუ ჯგირ მაგალით დუტეს არძა ჭეშმარიტ ქრისტიანს მოციქულეფქ დო მუჭო შემლებნა თე მაგალითის მივაჸუნათ?

⁴ მოციქულეფქ, თიშ ჯგირ მაგალით დომტუეს არძა ჭეშმარიტ ქრისტიანს, ნამდა „ღორონთის ოკო დევემორჩილათ მუჭოთ მართველს დო ვართ ხოლო ადამიანეფს“ (წეკითხით საქმეეფიშ 5:27—29). სიწმინდე ვადინუესინ თიშენ, თინეფ გოლახეს, მარა იუდეველეფიშ უზენაეს სასამართლოშე გიმიშესინ, „ოხიოლდეს, ნამდა თიშ [იესოშ] სახელიშ გურშენ შეურაცხყოფაშ ღირსეფქ იჸუეს“ (საქ. 5:40—42).

5. ნამ კითხვეფს ოკო მეფჩათ პასუხ?

⁵ მოციქულეფიშ თე მაგალით ორჩქინანს მუსხირენ კითხვას. მაგალთო, თინეფიშ გადაწყვეტილება, ნამდა ღორონთის უმოსო დემორჩილებდეს, ვინემ ადამიანს, მუჭო მეურე ბიბლიურ მითითებას: „არძაქ დემორჩილას ხელისუფლებას“? (რომ. 13:1). მუჭო შეულებნა ქრისტიანეფს ამდღა, „დემორჩილან მთავრობეფს დო ხელისუფლებეფს,“ მუჭოთ მოციქულ პავლექ თქუ დო, თეწკუმა ართო, ვადინუან სიწმინდე ღორონთიშ,  ჩქინ არძაშ უმოს დიდებულ მართველიშ, წოხოლე? (ტიტ. 3:1).

6. ა) მი იგულისხმებ რომაელეფიშ 13:1-ს მოშინაფილ „ხელისუფლებას“ დო მუ ვალდებულება მიღნა თიშ წოხოლე? ბ) მუ მიჩქნა არძა ადამიანურ მართველობაშ გურშენ?

⁶ წეკითხით რომაელეფიშ 13:1. თე მუხლის მოშინაფილ ტერმინს „ხელისუფლება“ იგულისხმებ ადამიანურ მართველობეფ, მით აკონტროლენა შხვეფს. ქრისტიანეფქ ოკო დემორჩილან თე მართველობეფს. თინეფ ყურადღებას აქციენა, ნამდა წესრიგ რდას საზოგადოებას, ხალხიქ დემორჩილას კანონეფს დო მინშა იეჰოვაშ ხალხის ხოლო იცვენა (გამოცხ. 12:16). ათეშენ ჩქი ვალდებულ ვორეთ, მეფჩათ თინეფს, მუთ ოკუთვნუნა. თენა შილებე რდას ოგაფურ, ხარკ, შიშ დო პატი (რომ. 13:7). მარა მთავრობეფს ხვალე თიშენ უღნა ძალაუფლება, ნამდა თეშ უფლებას იეჰოვა არზენს. იესოქ ჯგირო ქაძირუ თე პრინციპ, მუჟამსით რომაელ მართველიშ, პონტიუს პილატეშ, წოხოლე გერდჷ. პილატექ უწუ, ნამდა თიშ რსხება ვარდა ღურა, მუშ ხეს რდჷ, მუდგაშეთ იესოქ უპასუხ: „ჩქიმდე მუთუნნერ უფლება ვა გაღვენუდ, თენა ჟიშე ვა გაფდას მეღებულინ“ (იოან. 19:11). მუჭოთ პილატეშ შემთხვევას რდჷ, არძა ადამიანურ მართველეფიშ დო პოლიტიკოსეფიშ ძალაუფლება შეზღუდულ რე.

7. მუ შემთხვევას ვა ვომორჩილუთ ადამიანურ მართველობეფს დო მუ ოკო შუდან თინეფს?

⁷ ქრისტიანეფქ ოკო დემორჩილან ხელისუფლებას, მუჟამსით თინეფიშ კანონეფ ვაწინააღმდეგ ღორონთიშ კანონს. მარა ვა ვომორჩილუთ თიმწკუმა, მუჟამსით თხულენა, გუვაკეთათ თიცალ მუდგარენ, მუთ ღორონთიშ კანონს ოწინააღმდეგ ვარდა პირიქით მივარიენა თიცალ მუდგარენიშ კეთებას, მუდგას ღორონთ ითხინს. მაგალთო, თინეფ შილებე ახალგაზრდა ქომოლკათაშე თხულენდან, გეჭოფან იარაღ დო მიდართან ოჩხუპებშა მუნეფიშ ქიანაშ დაცვებელო. c ვარდა შილებე მივარიენდან „ახალ ქვეყნიერებაშ თარგმანიშ“ დო ბიბლიაშა გერსხილ პუბლიკაციეფიშ გიმორნაფას, ქადაგებას დო შხვეფწკუმა ართო თაყვანიშცემას. მუჟამსით ხელისუფლებეფ არასწორო ირინუანა მუნეფიშ ძალაუფლებას, მაგალთო, თხოზუნა იესოშ მოწაფეეფს, თინეფს პასუხ მეთხიებნა ღორონთიშ წოხოლე. იეჰოვა ირფელს ოკვირ! (ეკლ. 5:8).

8. მუ განსხვავება რე ხელისუფლებაშ დო იეჰოვაშ ძალაუფლებაშ შქას დო მუშენ რე საჭირო თეშ რჩქინა?

⁸ მუშო ოკო რაგად, ხელისუფლებას დიდ ძალაუფლება უღჷ, მარა თიშ ძალაუფლება უზენაეს ვა რე. ხვალე იეჰოვა რე თინა, მიდგას უზენაეს ძალაუფლება უღჷ. ბიბლიას თინა ბრელშა რე მოშინაფილ ტიტულით „უზენაეს“ (დან. 7:18, 22, 25, 27).

9. მუ ძირჷ ხილუეფს წინასწარმეტყველ დანიელქ?

⁹ წინასწარმეტყველ დანიელქ ძირჷ ხილუეფ, სოვრეშეთ მიკორჩქინდჷ, ნამდა იეჰოვას არძა ხელისუფლებაშე უმოს ძალაუფლება უღჷ. დანიელქ დიო ძირჷ ოთხ ქვერსემ მხეც, ნამუთ ასიმბოლოენდჷ ჯვეშ დო ასეიან მსოფლიო მპყრობელეფს. თენეფ რენა: ბაბილონ, მიდია-სპარსეთ, საბერძნეთ, რომ დო ამდღარ მართველ, ინგლის-ამერიკა (დან. 7:1—3, 17). თეშ უკულ დანიელქ იეჰოვა ღორონთ ძირჷ, ნამუთ ზეციერ სასამართლოშ ტახტის გეხედ (დან. 7:9, 10). თე ართგურ წინასწარმეტყველიშ ხილუას მოჩამილ დეტალ ჯგირ გაფრთხილება რე ამდღარ მართველეფშო.

10. მუჭოთ დანიელიშ 7:13, 14, 27-შე იძირე, მის არზენს იეჰოვა დედამიწას მართველობაშ უფლებას დო მუს ოძირანს თენა ღორონთიშ გურშენ?

 ¹⁰ წეკითხით დანიელიშ 7:13, 14, 27. იეჰოვა არძა ძალაუფლებას გიწუღანს ადამიანურ მართველობეფს დო არზენს თის, მით უმოსო იმსახურენს დო მით, უმოს ძალიერ რე. მი რე თენა? მიდგარენ, „მით კოჩიშ სქუას მოგენს“, იესო ქრისტე, დო „უზენაესიშ წმინდეფ“, 144 000, მით „მარადიულო, სადღამუშოთ“ იმეფენა (დან. 7:18). არგამა რე, ხვალე იეჰოვა რე უზენაეს, მიდგას უღჷ უფლება, თეცალ მუდგარენეფ აკეთას.

11. ხოლო მუ ჭარჷ დანიელქ თიცალ, სოვრეშეთ იძირე, ნამდა იეჰოვა რე უზენაეს?

¹¹ მოვლენეფ, ნამუთ დანიელქ ხილუას ძირჷ, მეურე თის, მუდგა თეიშახ აფუდ ნარაგად. თიქ თქუ: „უზენაეს მეფენს ადამიანეფიშ სამეფოშა“ დო გეუძინ: „მიდგას ოკონ, თის ამეფენს“ (დან. 2:19—21; 4:17). ქოჸოფენო შემთხვევეფ, მუჟამსით იეჰოვაქ მიდგარენს მიდუღ ვარდა ქიმეჩ მართველობა? მუშო ოკო რაგად, ქო.

12. ქიმიჸონით მაგალით, მუჭო მიდუღ იეჰოვაქ ულირს ნამთინე მეფეს მართველობა (ქოძირით სურათ).

¹² იეჰოვაქ არგამათ ქაძირუ, ნამდა თის უღჷ „უზენაეს ძალაუფლება“ ხელისუფლებეფშა. ქობძირათ სუმ მაგალით. ეგვიპტეშ ფარაონქ მონათ გინაშქვჷ ხალხ დო ვარიას იჩიებუდ თინეფიშ გათავისფალებაშენ. მარა ღორონთიქ დერსხჷ თინეფ დო ფარაონ ჭითა ზღვას ქინაშქვიდუ (გამ. 14:26—28; ფსალმ. 136:15). ბაბილონიშ მეფე ბელშაცარს ნადიმ უღუდ, სოდეთ გენედიდ მუშ დუდ „ზეციერ უფალიშ წინააღმდეგ“ დო იეჰოვაშ მანგიორო ოქროშ დო ვარჩხილიშ ღორონთეფს ცენდჷ თაყვანს (დან. 5:22, 23). მარა ღორონთიქ მიდუღ თის დიდება. თიმ სერს ბელშაცარ დოჸვილეს დო თიშ სამეფოქ მიდიელეფს დო სპარსელეფს გეგნაჩ (დან. 5:28, 30, 31). პალესტინაშ მეფექ, ჰეროდე აგრიპა I-ქ, მოციქულ იაკობ დოჸვილ დო მოციქულ პეტრე ციხეს ქიმთახუნუ თი მიზანით, ნამდა თინა ხოლო დოჸვილკო. მარა იეჰოვაქ ეცილ თის მუშ გეგმაშ შესრულებას. ღორონთიშ ანგელოზიქ თინა დოჸვილ (საქ. 12:1—5, 21—23).

13. ქიმიჸონით მაგალით, მუჭო გიორჯგინ იეჰოვაქ ართ მიზანშო აკონწყილ მართველეფს.

¹³ იეჰოვაქ დამტკიც, ნამდა მართველეფიშ გაერთიანებაშე უზენაეს ხოლო რე. იეჰოვა ბრძოლენდჷ ისრაელეფშო დო მეხვარ თინეფს, გიორჯგინესკო ართ  მიზანშო აკონწყილ 31 ქანაანელ მეფეს. შედეგო ისრაელეფქ ხეშა ქეშიჸოთეს დუნაპირებ ქიანაშ დიდ ნაწილ (იეს. 11:4—6, 20; 12:1, 7, 24). თეს გეძინელ, იეჰოვაქ თინეფს მეხვარ, საბოლათ გიორჯგინესკო მეფე ბენჰადადის დო შხვა 32 მართველს, მით ისრაელს ობრძლდეს (1 მეფ. 20:1, 26—29).

14, 15. ა) მუ თქვის ნაბუქოდონოსორ დო დარიოსიქ იეჰოვაშ მართველობაშ გურშენ? ბ) მუ თქუ ფსალმუნმაბირექ იეჰოვაშ დო თიშ ხალხიშ გურშენ?

¹⁴ იეჰოვა ირიათო ამტკიცენდჷ, ნამდა უზენაეს რდჷ. მუჟამსით ბაბილონიშ მეფე, ნაბუქოდონოსორ, თიშ მანგიორო, ნამდა ხვალე იეჰოვა მირჩქინკო განდიდებაშ ღირსო, მუშ ძალიერება დო სიდიადეთ იცქვანდჷ, ღორონთიქ თინა ხანგათ გინაშქვჷ. ნორმალურ აზროვნებაქ დართუნ, ნაბუქოდონოსორქ განადიდ უზენაეს დო აღიარ, ნამდა იეჰოვაშ სამეფო მარადიულ რე. უკულ გეუძინ: „მითინს ვეწარნე თიშა“ (დან. 4:30, 33—35). თიშ უკულ, მუთ ღორონთიშ წოხოლე დანიელიშ სიწმინდექ გიმოცადებულქ იჸუ დო იეჰოვაქ ლომეფშე ირსხჷ, მეფე დარიოსიქ ზოჯჷ: „დანიელიშ ღორონთშა გოშქურდან, მუშენდა თინა რე ცოცხალ დო მარადიულ ღორონთ. თიშ სამეფო დღას ვეკოცენს, დო თიშ მეფობა სადღამუშო რე“ (დან. 6:7—10, 19—22, 26, 27).

¹⁵ ფსალმუნმაბირექ თქუ: „იეჰოვაქ ვემიოჭირნაფუ ერეფს მუნეფიშ გეგმეფშა, თიქ აკარღვჷ ხალხეფიშ ჩანაფიქრ.“ თიქ გეუძინ: „ბედნერ რე ერ, ნამდგაშ ღორონთ იეჰოვა რე, ხალხ, ნამუთ თიქ მუშ საკუთრებათ გიშეგორ“ (ფსალმ. 33:10, 12). თენა მართალო ჯგირ მიზეზ რე, სიწმინდე ვა ვოდინუათ იეჰოვაშ წოხოლე.

16. მუშა შემლებნა ვორდათ დარწმუნებულ „დიდ გასაჭირწკუმა“ დაკავშირებით დო მუშენ? (ქოძირით სურათ).

¹⁶ ჩქი წებკითხით, მუ აკეთ იეჰოვაქ ულირს. მარა მუს ოკო ველდათ თიშე ხოლოჟამო? შემლებნა დარწმუნებულ ვორდათ, ნამდა იეჰოვა მუშ ართგურ მსახურეფს ირსხენს „დიდ გასაჭირიშ დროს“ (მათ. 24:21; დან. 12:1). თეს გაკეთენს, მუჟამსით  ერეფიშ კოალიცია, ნამდგას ჯოხო გოგ მაგოგიშ დიხაშე, დუდის ქიგიანთხუ ღორონთიშ ართგურ ხალხის. თე კოალიციაშა გაერთიანებულ ერეფიშ ორგანიზაციაშა მიშურსუნ თი 193 წევრიქ გემშართასინ ხოლო, მუთუნ ვაღოლნენა იეჰოვაშ დო თიშ ზეციერ ლაშქარიშ წინააღმდეგ! იეჰოვა მოპირნა: „განდიდებულ დო განწმენდილ იპჸუაფუქ ბრელ ხალხიშ თოლიშ წოხოლე. გამჩინებაფუანა დო ქიგეგენა, ნამდა მა ვორექ იეჰოვა“ (ეზეკ. 38:14—16, 23; ფსალმ. 46:10).

17. მუს წინასწარმეტყველენს ბიბლია მსოფლიოშ მეფეეფშენ დო თინეფშენ, მით ღორონთიშ წოხოლე ართგურობას ვადინუანა?

¹⁷ იეჰოვა ქიმწიჭყანს საბოლა ომს, არმაგედონს, დო განადგურენს „მსოფლიოშ მეფეეფს“, მუჟამსით გოგ მაგოგიშ დიხაშე დუდის ქიგიანთხუ ღორონთიშ ხალხის (გამოცხ. 16:14, 16; 19:19—21). მარა „მართალეფ დემკვიდრენა დედამიწას დო უდანაშაულოეფ იცხოვრენა თექ“ (იგავ. 2:21).

18. მუშ ოკეთებელო რდეს მზათ ჭეშმარიტ ქრისტიანეფ დო მუშენ? (დან. 3:28)

¹⁸ საუკუნეეფიშ დინახალე ბრელ ჭეშმარიტ ქრისტიან საფრთხეშ თუდო გიორინუანდჷ მუშ თავისუფლებას დო სიცოცხლეს ხოლო, მუშენდა უჸორდჷ იეჰოვა, მუშ უზენაეს მართველ. თე ქრისტიანეფს გინოჭყვიდილ აფდეს, ვა უდინუაფდესკო იეჰოვაშ ართგურობა. თინეფ გუნა სუმ ებრაელს, მიდგას ვა უდინუაფ უზენაესიშ მიმართ ართგურობა დო თე უზენაესიქ ირსხჷ თინეფ გოთართალაფირ ფეჩქშე (წეკითხით დანიელიშ 3:28).

19. მუშ მიხედვით გასამართლენს იეჰოვა მუშ ხალხის დო ათეშენ მუ ოკო ვაკეთათ ამდღა?

¹⁹ ფსალმუნმაბირე დავითიქ ჭარჷ, მუზმათ მნიშვნელოვან რე, ვა ვოდინუათ სიწმინდე ღორონთიშ წოხოლე. „იეჰოვა გეგშუღანს განაჩენს ხალხეფს. იეჰოვა, გუმასამართლ ჩქიმ სიმართლეთ დო ჩქიმ უმწიკვლობათ“ (ფსალმ. 7:8). უმოს გვიანო კინ დავითიქ თქუ: „ჩქიმ სიწმინდექ დო სიმართლექ დოფთხილუას“ (ფსალმ. 25:21). ცხოვრებას არძაშ უჯგუშ რე, ვა ვოდინუათ იეჰოვაშ მიმართ ართგურობა დო მუდგაქ ვა მოხვადასინ, დღას ვა დაფთმათ თინა! შედეგო დუდის ფსალმუნმაბირეცალო ქიბგინანთ, ნამდგაქ ჭარჷ: „ბედნერეფ რენა თინეფ, მით გილულა წმინდათ, იეჰოვაშ კანონით“ (ფსალმ. 119:1).