1. მუ იმენდ მუჩეს იეჰოვაქ?

 ᲘᲔᲰᲝᲕᲐ მარადიულ სიცოცხლეშ დიდებულ დუნაპირებუს მარზენა. ნამთინეს თიშ იმენდ უღჷ, ნამდა ზეცას იცხოვრენს, მუჭოთ სულიერ ქმნილება (1 კორ. 15:50, 53). მარა ბრელს უღჷ იმენდ, ნამდა დედამიწას აში ულიებ, სრულყოფილ დო ბედნერობათ ეფშა სიცოცხლე (გამოცხ. 21:3, 4). მარადიულ სიცოცხლეს ზეცას ველუთ დოვარ დედამიწას, ჩქინ იმენდ ჩქინო მანგარ ძვირფას რე.

2. მუშა რე ჩქინ იმენდ გერსხილ დო მუშენ შემლებნა თეშ რაგად?

² სიტყვა „იმენდ“ ბიბლიას გიმორნაფილ რე თეცალ შინაარსით: თიშ იმენდ, ნამდა მუდგარენ ჯგირ ქუმოხვადუ. მომავალიშ გურშენ ჩქინ იმენდ აუცილებერო შისრულებ, მუშენდა თინა იეჰოვაშე მოურს (რომ. 15:13). მიჩქნა, ნამდა თიქ პირობა დოდვჷ დო თინა ხოლო მიჩქნა, ნამდა სიტყვას მუთუნით ვა გოტახუნს (რიცხ. 23:19). დარწმუნებულ ვორეთ, იეჰოვას ქოთ სურვილ უღჷ დო ქოთ ძალა, გაკეთას ირფელ, მუთ დემეპირეს. ჩქინ იმენდ გერსხილ ვა რე ფანტაზიაშა დო თიშა, ნამდა უბრალოთ მოკონა თაშ მოხვადას. თინა გერსხილ რე ფაქტეფშა დო რეალურ რე.

3. მუს გუვარჩიენთ თე სტატიას? (ფსალმ. 27:14)

³ ჩქინ ზეციერ მუმას უჸორთ დო ოკო, თის ვონდუდათ (წეკითხით ფსალმუნიშ 27:14). მუჟამსით იეჰოვაშ მიმართ ჩქინ იმენდ ძალიერ რე, შემალებენა გივორჯგინათ განსაცდელეფს დო მუდგაქ ვა მოხვადასინ, გაბედულებაქ დო ხიოლქ ვამდინან. მორთ გუვარჩუათ, მუჭო ფთხილანა იმენდ. ქიგიფშინანთ, მუჭო გჷ ჩქინ რწმენა ღუზას დო მუზარადის; თეშ უკულ ქობძირუნთ, მუჭო შემლებნა იმენდიშ გამანგარება.

4. მუჭო მოგენს იმენდ ღუზას? (ებრ. 6:19)

⁴ ებრაელეფშა მეჭარილ წერილს პავლე მოციქულქ ჩქინ იმენდ ღუზას უგურუ (წეკითხით ებრაელეფიშ 6:19). თინა ხშირას მოგზაურენდჷ ზღვათ. ათეშენ ჯგირო უჩქუდ, ნამდა ღუზაშ დანიშნულება რდჷ, ტალღეფს გემ უკონტროლოთ ვეგლუჸონაფუდკო. ართშა, მუჟამსით თინა გემს რდჷ, დიდ ქარბორიაქ გელალ. თე ქარბორიაშ დროს თინა ორწყედ, მუჭო უტენდეს წყარშა ღუზეფს მეზღვაურეფ, ნამდა გემქ კირდეეფს ვარაგუკო (საქ. 27:29, 39—41). მუჭოთ ღუზა ოხვარ გემს, ტალღეფქ უკონტროლოთ ვეგლეჸონას, თეშ ჩქინ იმენდ მოხვარნა, ქარბორიაცალ პრობლემეფიშ დროს იეჰოვას ვაჩვეთხუათ. თიშ მოხვარათ ვა ვოდინუანთ სიმშვიდეს, მუშენდა მიჩქნა, ქარბორია დეწყნარებ. ფშუდან, იესოქ გუმაფრთხილეს, ნამდა თხოზინს ქეშეფხვადუდით (იოან. 15:20). მომავალიშ გურშენ დუნაპირებუეფშე ფიქრ მოხვარნა, მუთუნს ვემეფჩათ უფლება, გეგნომიჸონან ქრისტიანულ შარაშე.

5. მუჭო მეხვარ იესოს იმენდიქ, მუჟამსით ღურას ელუდ?

⁵ გუვარჩუათ, მუჭო მეხვარ იმენდიქ იესოს, რდუკო მტკიცას, თიშ უმკუჯინუო, ნამდა ტანჯებულო ღურას ელუდ. ახ. წ. 33 წანაშ 50-ა დღაშ დღესასწაულს მოციქულ პეტრექ ციტატა მიჸონ ფსალმუნს მოჩამილ წინასწარმეტყველებაშე, ნამუთ მანგარ სქვამას ეჭარუნს, მუნერ მშვიდას დო დარწმუნებულ რდჷ იესო: „იმენდიანო იპჸიქ, მუშენდა ვა დომტენქ სამარეს დო ვა მასქიდუქ სქან მსახურს, ნამდა ჭიე-ჭიეთ მტვერო გინირთას. . . . მანგარო გეფხარენქ სქან წოხოლე, მუშენდა სი ემოფშანქ ხიოლით“ (საქ. 2:25—28; ფსალმ. 16:8—11). მართალ რე, იესოს უჩქუდ, დოღურუდ, მარა უღუდ მტკიცე იმენდ, ნამდა ღორონთ გათელენდჷ დო აშიდ ხიოლ ზეცას მუშ მუმაშა დორთათ (ებრ. 12:2, 3).

6. მუ თქუ ართ ჯიმაქ იმენდიშ გურშენ?

⁶ ქრისტიანულ იმენდიქ ბრელ ჩქინ და დო ჯიმას მეხვარ გარზებას. გუვარჩუათ ინგლისის მახორუ ართ ჯიმაშ, ლეონარდ ჩინიშ, შემთხვევა. თინა პირველ მსოფლიო ომიშ დროს ციხეს ქუდახუნეს თიშ გურშენ, ნამდა ჯარშა ვედჷ. ჟირ თუთას თინა ხვალე უხედეს საკანს. თეშ უკულ ძნელ სამუშას ოკეთებაფუანდეს. უმოს გვიანო თიქ ჭარჷ: „ჩქიმ შემთხვევეფქ ქუმოძირუ, მუზმათ მნიშვნელოვან რე იმენდ გარზებელო. ჩქი მიღნა მაგალითეფ იესოშ, მოციქულეფიშ, წინასწარმეტყველეფიშ დო მიღნა ძვირფას დუნაპირებუეფ ბიბლიას. თე ირფელ მარზენა მომავალიშ დიდ იმენდის დო მოხვარნა გარზებას“. იმენდიქ ღუზაცალო იჸუ ლეონარდშო დო თაშ იჸუაფ ჩქინო ხოლო.

7. მუჭო ამანგარენს განსაცდელეფ ჩქინ იმენდის? (რომ. 5:3—5; იაკ. 1:12)

⁷ ჩქინ იმენდ უმოსო იმანგარებ, მუჟამსით ურზუთ განსაცდელეფს დო ბღებულენთ იეჰოვაშ მოხვარა დო მოწონას (წეკითხით რომაელეფიშ 5:3—5; იაკობიშ 1:12). შედეგო, თიშე ბრელით უმოს ძალიერ იმენდ მიღნა, ვინემ თიმწკუმა მიღდეს, მუჟამსით პირველო გებგით სახიოლო ამბე. სატანას ოკო, განსაცდელეფქ მინომლუან, მარა იეჰოვაშ მოხვარათ შემლებნა თითოულს გივორჯგინათ.

8. მუჭო მოგენს იმენდ მუზარადის? (1 თეს. 5:8)

⁸ ბიბლია ჩქინ იმენდის მუზარადის ხოლო უგურუანს (წეკითხით 1 თესალონიკელეფიშ 5:8). ჯარიშკოჩ მუზარადის გირთვანდჷ, ნამდა დოთხილუკო დუდ. ჩქი სულიერ ომს ვორეთ დო მოსაჭირნა, გონება დიფთხილუათ ჩქინ ნტერშე, სატანაშე. თინა ბომბეფცალო გიმორღვანა ცდუნებეფს დო თიცალ აზრეფს, ნამდგას შეულებ აზროვნება გილამლუან. მუჭოთ მუზარად თხილანდჷ ჯარიშკოჩიშ დუდის, თეშ იმენდ თხილანს ჩქინ  აზროვნებას, ნამდა იეჰოვაშ ართგურქ ქუდოფსქიდათ.

9. მუნერ რე თინეფიშ ცხოვრება, მიდგას ვა უღნა იმენდ?

⁹ მარადიულ სიცოცხლეშ იმენდ მოხვარნა, იმოფქმედათ ჭკვერულო დო მიბღათ სწორ გადაწყვეტილებეფ. იმენდიქ დემესუსტეს დო ხორციელ აზროვნებას ჩქინ გონებაშა მოქმედებაშ საშვალება ქიმეფჩით-და, ქაწომდინნა მარადიულ ცხოვრებაშ მიზან. დეფიფქრათ ჯვეშ დროს მახორუ მუსხირენ კორინთელ ქრისტიანიშ შემთხვევაშე. თინეფქ მიოდინუეს ღურელეფიშ გათელებაშ იმენდიშ მიმართ რწმენა, მუთ ღორონთიშ მნიშვნელოვან დუნაპირებ რე (1 კორ. 15:12). მუჭოთ პავლექ თქუ, მიდგას მომავალიშ იმენდ ვა უღჷ, ხვალე მუშ დუდიშ სიამოვნებაშე ცხოვრენს (1 კორ. 15:32). უმენტაშ, მიდგას ღორონთიშ დუნაპირებუეფიშ იმენდ ვა უღჷ, ამდღანერ დღათ ცხოვრენს დო ირნერო ოცად, ამდღა გაუჯგუშას მუშ ცხოვრება. მარა ჩქი იმენდ ღორონთიშ დუნაპირებშა მაფნა გინოღალირ. ჩქინ იმენდ, თაშ ქოფთქუათინ, მუზარადცალო თხილანს ჩქინ აზროვნებას დო მოხვარნა, მთელ ყურადღება ხვალე ჩქინ დუდშა ვეგნიბღათ, მუდგათ იეჰოვაწკუმა ურთიერთობას გილებლუანდით (1 კორ. 15:33, 34).

10. მუჭო რთხილანა იმენდ ტყურა აზრეფშე?

¹⁰ ჩქინ იმენდიშ მუზარად თიცალ ფიქრეფშე ხოლო ფთხილანა, ნამდა აზრ ვა უღჷ მუთუნიშ კეთებას ღორონთშე მოწონაშ მიოღებელო. მაგალთო, ნამთინე შილებე ფიქრენდას: „მა დღას ვეპჸიქ თინეფ შქას, მით მარადიულ სიცოცხლეს მიღენს; თიცალ ჯგირ ვა ვორექ, ნამდა თინა დემსახურე; დღას ვა მაკეთებე თი ირფელ, მუდგას ღორონთ ჩქიმდე ელჷ“. ქიგიშინით, იობიშ ითამ გურიშემაქექაფალ მეგობარ ელიფაზიქ ხოლო თეცალ მუდგარენ თქუ: „ღურა მოძუნ ფერ, ნამ კოჩ რე სუფთა“. უკულ ღორონთიშ გურშენ თქუ: „ვანდჷ ღორონთ მუშ წმინდეფს დო ზეცა ხოლო ვა რე სუფთა თიშ თოლს“ (იობ. 15:14, 15). მუშმადიდა ტყურა რე! ვაგგოჭყორდან, სოვრეშე მოურს თეცალ აზროვნება — სატანაშე. თის ჯგირო უჩქჷ, თეცალ ფიქრეფს დუდის ქიმეფჩანთ-და, ჩქინ იმენდ ჭიე-ჭიეთ დესუსტებ. თეშ მანგიორო, ჩეთხინეთ თეცალ ფიქრეფ დო ყურადღება იეჰოვაშ დუნაპირებუეფშა გეგნიღით. ეჭვ დღას ვემშეღათ, ნამდა იეჰოვას ოკო, მარადიულო იცხოვრათ დო მიგეხვარებნა თეშ მეჭირნაფას (1 ტიმ. 2:3, 4).

11. მუშენ ოკო გიმიფრჩქინათ მოთვინება, მუჟამსით ველუთ ჩქინ იმენდიშ შესრულებას?

¹¹ ირო ვა რე ადვილ, მიღდან ძალიერ იმენდ. შილებე მოთვინება მიჭირდან, მუჟამსით ღორონთიშ დუნაპირებუეფიშ შესრულებას უჯინეთ. მარა იეჰოვა მარადიულ რე დო თინა დროს შხვანერო უჯინე (2 პეტ. 3:8, 9). თინა მუშ დუნაპირებუს თიმწკუმა ასრულენს, მუჟამსით თეშო არძაშ უჯგუშ დრო რე დო თექ შილებე თიმწკუმა ვეჸუას, მუჟამსით ჩქი ველუთ. მუ მიმეხვარებნა, მიღდან ძალიერ იმენდ თიმწკუმა, მუჟამსით მოთვინებათ ველუთ, მუჭო შეასრულენს იეჰოვა მუშ დუნაპირებუეფს? (იაკ. 5:7, 8).

12. მუჭოთ ებრაელეფიშ 11:1, 6-ის ჭარჷ, მუჭო რე დაკავშირებულ იმენდ რწმენაწკუმა?

¹² ჩქი ძალიერ იმენდ მაღვენუნა, მუჟამსით იეჰოვაწკუმა, ჩქიმ იმენდიშ გარანტიაწკუმა, ქიპჸით ხოლოს. ბიბლიას მანგარო რე დაკავშირებულ ჩქინ იმენდ რწმენაწკუმა, ნამდა იეჰოვა არსებენს დო თინა „აჯილდოენს თინეფს, მით მთელ გურით გორუნს თის“ (წეკითხით ებრაელეფიშ 11:1, 6). მუთ უმოს რეალურ რე იეჰოვა ჩქინო, თით უმოსო ბჯერა, ნამდა თინა მუშ არძა დუნაპირებუს შეასრულენს. მორთ ასე გუვარჩუათ, მუჭო შემლებნა უმოს ხოლოშიან  ურთიერთობა მიღდან იეჰოვაწკუმა, მუთ ჩქინ იმენდის გამანგარენს.

13. მუჭო შემლებნა უმოსო დევეახლოვათ ღორონთის?

¹³ ლოცვათ ქუდურაგადეთ იეჰოვას დო იკითხით თიშ სიტყვა. მართალ რე, იეჰოვას ვა ვორწყეთ, მარა შემლებნა თიწკუმა ხოლოშიან ურთიერთობა მიღდან. ჩქი შემლებნა ლოცვათ ქუდურაგადუათ დო ბჯერდან, ნამდა თინა ქუმომრჩქილუანა (იერ. 29:11, 12). ჩქი შემლებნა ღორონთის ურჩქილათ თიშ სიტყვაშ კითხირით დო ნაკითხერშე დაფიქრებათ. მუჟამსით ბკითხულენთ თიშე, მუჭო ზრუნენდჷ იეჰოვა ულირს მუშ ართგურ მსახურეფშე, ჩქინ იმენდ უმოსო იმანგარებ. ირფელქ, მუდგაქ ღორონთიშ სიტყვას იჭარ, „ჩქინ ოგურაფალო იჭარ, მუშენდა მოთვინებათ დო წმინდა წერილეფშე მეღებულ გურიშექექაფათ მიღდან იმენდ“ (რომ. 15:4).

14. მუშენ ოკო დეფიფქრათ თიშე, მუთ იეჰოვაქ ულირს შხვეფშო აკეთ?

¹⁴ ქიფიქრით, მუჭო ასრულენდჷ იეჰოვა მუშ დუნაპირებუეფს. ქიგიფშინათ, მუ აკეთ იეჰოვაქ აბრაამ დო სარაშო. თინეფ თი ხანშა რდეს მეჭირნაფილ, ნამდა უკვე სქუალეფ ვეურჩქინდუდეს, ვარინ იეჰოვაქ დეპირ, ნამდა სქუა აჸვენუდეს (დაბ. 18:10). მუ დამოკიდებულება უღუდ აბრაამს თე დუნაპირებუშ მიმართ? ბიბლია იჩიებ: „იშენით იმენდ უღუდ დო წანდჷ, ნამდა ანაყუ კათაშ მუმათ გინირთუდ“ (რომ. 4:18). თიშ უმკუჯინუო, ნამდა კოჩიშ გინაჯინუშე თე დუნაპირებუშ შესრულება შეიოლებერ ვა რდჷ, აბრაამს იშენით ჯერდჷ, ნამდა იეჰოვა შეასრულენდჷ მუშ სიტყვას (რომ. 4:19—21). თეცალ შემთხვევეფშე ბგურაფლენთ, ნამდა შემლებნა ბჯერდან, იეჰოვა ირო შეასრულენს მუშ დუნაპირებუეფს, ვა უღჷ მნიშვნელობა, მუზმათ რეალურო იძირე თინა.

15. მუშენ ოკო დეფიფქრათ თი ირფელშე, მუთ ღორონთიქ ჩქინო აკეთ?

¹⁵ დეფიქრით, მუ აკეთ იეჰოვაქ თქვანო.  ქიგიშინით, პირადო თქვა მუ ჯგირობუა მოიღეს ღორონთიშ სიტყვას მოჩამილ დუნაპირებუშ შესრულებაქ. მაგალთო, იესოქ დემეპირეს, ნამდა ზეციერ მუმა აუცილებერ საჭიროებეფს ვამმარკენდეს (მათ. 6:32, 33). იეჰოვაქ თიშა ხოლო დუმარწმუნეს, ნამდა ქომჩანდეს წმინდა შურს თიმწკუმა, მუჟამსით ფთხინდით (ლუკ. 11:13). თიქ შეასრულ თე დუნაპირებუეფ. შემლებნა ქიგიფშინათ შხვა დუნაპირებუეფ ხოლო, ნამუთ იეჰოვაქ შემსრულეს. მაგალთო, თიქ დემეპირეს, ნამდა მაპატიენდეს, გურშა ელამკინანდეს დო სულიერ საზრდოს ვამმარკენდეს (მათ. 6:14; 24:45; 2 კორ. 1:3). თიშე ფიქრ, მუთ ღორონთიქ უკვე აკეთ ჩქინო, გამმანგარენა თიშ იმენდის, ნამდა მომავალს ხოლო შეასრულენს თის, მუთ დემეპირეს.

16. მუშენ რე იმენდ თეცალ ძვირფას ძღვინ?

¹⁶ მარადიულ სიცოცხლეშ იმენდ ძვირფას ძღვინ რე იეჰოვა ღორონთშე. ჩქი ველუთ დიდებულ მომავალს, ნამუთ მართალო რეალურ რე. თინა მოქმედენს ღუზაცალო დო მოხვარნა, ვა ვოდინუათ ართგურობა. შედეგო, ჩქი მტკიცას გივორეთ განსაცდელეფიშ, თხოზინიშ დო ღურაშ წოხოლე ხოლო. თეს გეძინელ, მოქმედენს მუჭოთ მუზარად, ნამდა დოთხილუას ჩქინ აზროვნება. შედეგო, შემალებენა ვარია ქოფთქუათ თიშ კეთებაშე, მუთ არასწორ რე დო ვაკეთათ ჯგირ. ბიბლიაშა გერსხილ ჩქინ იმენდ მოხვარნა ღორონთწკუმა დაახლოებას დო თის ხოლო მოძირანა, მუშმანწარას უჸორთ თის. ჩქი ჯგირობუას მომღანა, მუჟამსით მაღვენუნა ძალიერ იმენდ.

17. მუშენ მოუღ ჩქინ იმენდის ხიოლ?

¹⁷ „გეხარით იმენდით“. თე სიტყვეფით გამანგარ მოციქულ პავლექ რომაელეფ თინეფშა მეჭარილ წერილს (რომ. 12:12). პავლე გახარებულ რდჷ, მუშენდა ჯერდჷ, ნამდა ართგურობას ვადინუანდ-და, მიღენდჷ ზეცას მარადიულ სიცოცხლეს. ჩქი ხოლო შემლებნა გეფხარათ იმენდით, მუშენდა დარწმუნებულ ვორეთ, ნამდა იეჰოვა შეასრულენს მუშ დუნაპირებუეფს. მუჭოთ ფსალმუნმაბირექ ჭარჷ: „ბედნერ რე კოჩ, მიდგას . . . იეჰოვაშა უღჷ იმენდ, . . . მით ირიათო ართგურ რე“ (ფსალმ. 146:5, 6).