1. მუ რეაქცია უღჷ ხალხის თი სიბრძნეშ მიმართ, ნამუთ სახალხოთ გილეძახ? (იგავ. 1:20, 21)

 ᲑᲠᲔᲚ ქიანას ხშირას ვორწყეთ სამეფოშ მაქადაგებელეფს, მით გოძიცებულ სახეთ გერენა თიცალ ადგილეფს, სოდეთ ბრელ ხალხ რე დო ლიტერატურას არზენა მიკმალ-მუკმალს. დღას ქიმეიღებნანო მონაწილება მსახურებაშ თე საინტერესო ფორმას? თაშ ქორენ-და, ალბათ დეფიქრებუდით თი სიტყვეფშე, ნამუთ იგავეფიშ წიგნის ენოჭარ სიბრძნეშ გურშენ, ნამდა თინა სახალხოთ გილეძახ, მუშენდა ხალხიქ ქიმირჩქილუას თიშ რჩევეფ (წეკითხით იგავეფიშ 1:20, 21). ბიბლიას დო ჩქინ პუბლიკაციეფს მოჩამილ რე „ნამდვილ სიბრძნე“ — იეჰოვაშ სიბრძნე. თენა რე ინფორმაცია, ნამუთ ხალხის აუცილებერო ოსაჭირ, ნამდა პირველ ნაბიჯ გეგნოდგან სიცოცხლეშ შარაჸურე. ჩქი მოხიოლნა, მუჟამსით მიდგარენ ჩქინ პუბლიკაციას ეჭოფუნს, მარა არძა თაშ ვართჷ. ნამთინეს ვაკო თიშ გაგება, მუს იჩიებ ბიბლია, შხვეფ გუმოძიცანა, თინეფ ფიქრენა, ნამდა ბიბლია მოჯვეშებულ წიგნ რე. რენა თიცალეფ ხოლო, მით აკრიტიკენა ბიბლიურ გურაფეფს ზნეობრივ ნორმეფწკუმა დაკავშირებით დო აცხადენა, ნამდა მით თე ნორმეფ მეჸუნს, რე უხეშ დო შხვეფშე მართალო მეუღ დუდ. მარა იეჰოვა ჸოროფათ აგრძელენს თიშო ხანდას, ნამდა ჭეშმარიტ სიბრძნე არძაშო ხეშამალაფარ რდას. მუჭო ორთჷ თინა თეს?

2. მუჭო რე ამდღა ნამდვილ სიბრძნე ხეშამალაფარ, მარა მუს ისხუნუანს ხალხიშ უმენტაშ?

² იეჰოვაქ მუშ სიტყვა, ბიბლია, თითქმის არძა ადამიანშო გინაშქვჷ ხეშამალაფარო. მუშ რაგად, შილებე ბიბლიაშა გერსხილ პუბლიკაციეფიშ გურშენ? იეჰოვაშ ჭყოლოფათ თინა 1 000-შე მეტ ნინაშა რე ხეშამალაფარ. მით თე სიბრძნეს ურჩქილე, მუთ ნიშნენს კითხირს დო ნაგურეფუშ გიმორნაფას, კურთხეულ იჸუაფ. მარა ხალხიშ უმენტაშ ჸუჯის ვათხინს  ჭეშმარიტ სიბრძნეს. გადაწყვეტილებაშ მეღებაშ დროს თინეფ ვარდა მუშ დუდშა დო ვარდა კინ ადამიანეფშა რენა დაიმენდებულ. თინეფ შილებე ჟიშე გიმოჯინედან, მუშენდა ჩქი მეპჸუნთ თის, მუდგას ბიბლია იჩიებ. თე სტატიაშე ქობძირუნთ, მუშენ უღჷ ხალხის თეშნერ რეაქცია. მორთ პირველო გუვარჩუათ, მუჭო შემლებნა მიბღათ სიბრძნე იეჰოვაშე.

3. მუ მიშურს ნამდვილ სიბრძნეშა?

³ სიბრძნე შილებე თაშ გემნწყათ: უნარ, სწორ გადაწყვეტილებაშ მიოღებელო გეგმიბრინუათ რჩქინა. მარა ნამდვილ სიბრძნეშა უმოს მიშურს. ბიბლია იჩიებ: „იეჰოვაშ შიშშე მოურს სიბრძნე, უწმინდესიშ გურშენ რჩქინა გონიერებას ირზენს“ (იგავ. 9:10). თაშ ნამდა, მუჟამსით მნიშვნელოვან გადაწყვეტილება მაფნა მიოღებელ, ჩქი ოკო გეფთვალისწინათ იეჰოვაშ აზროვნება, უწმინდესიშ გურშენ რჩქინა. თეს გუვაკეთენთ ბიბლიაშ დო ბიბლიაშა გერსხილ პუბლიკაციეფიშ გურაფათ. თეშნერო გეგმიფრჩქინანთ ნამდვილ სიბრძნეს (იგავ. 2:5—7).

4. მუშენ შეულებ ხვალე იეჰოვას ჭეშმარიტ სიბრძნე მუჩან?

⁴ ხვალე იეჰოვას შეულებ მუჩან ნამდვილ სიბრძნე (რომ. 16:27). მუშენ შემლებნა თიშ რაგად, ნამდა სიბრძნე იეჰოვაშე მოურს? პირველ, მუჭოთ გუმაჭყაფალს, თის ულიებ რჩქინა უღჷ მუშ გუნაჭყეფუეფიშ გურშენ (ფსალმ. 104:24). მაჟია, თიშ არძა მოქმედებაშე სიბრძნე იძირე (რომ. 11:33). მასმა, იეჰოვაშ ბრძნულ რჩევეფს ირო ჯგირობუა მოუღ თინეფშა, მით თინეფს ირინუანს (იგავ. 2:10—12). ნამდვილ სიბრძნეშ მეღება ქუმოკონან-და, ოკო გეფთვალისწინათ თე სუმ ჭეშმარიტება დო ქიმეფჩათ თინეფს საშვალება, მიხემძღვანელან გადაწყვეტილებეფიშ მეღებაშ დო მოქმედებაშ დროს.

5. მუ რე თიშ შედეგ, ნამდა ხალხის ვა ჯერს, ჭეშმარიტ სიბრძნე იეჰოვაშე მოურსუნ?

⁵ ბრელ, მიდგას მსახურებას შეფხვადუთ, აღიარენს, ნამდა ბუნება, ნამდგას ორწყენა, მართალო სარკო რე. მარა ვა ჯერა გუმაჭყაფალიშ არსებობაშ დო ევოლუციას უკინენა ხუჯის. შხვეფ აცხადენა, ნამდა წანა ღორონთიშ, მარა ბიბლიურ ნორმეფ მოჯვეშებულო მიორჩქუნა დო ისხუნუანა, მუნეფს მუჭო ოკონან, თეშ იცხოვრან. მუ რე თეშ შედეგ? ქორენო მსოფლიო უჯგუშ თიშ გურშენ, ნამდა ხალხ ღორონთიშ მანგიორო მუშ დუდშა რე დაიმენდებულ? ქიმიოგორუესო თინეფქ ნამდვილ ბედნერობას დო მომავალიშ სანდო იმენდის? მუდგას ვორწყეთ, მარწმუნენა თე სიტყვეფიშ ჭეშმარიტებაშა: „სიბრძნეთ, ინონჭაფაშ უნარით დო განზრახვათ იეჰოვაშა მითინს ვაწარნე“ (იგავ. 21:30). თენა ჯგირ მიზეზ რე ჩქინო, ნამდა იეჰოვაშე მიბღათ ნამდვილ სიბრძნე. სანარღოთ, თეს ბრელ ვართჷ. მუშენ?

6. მუჭოთ იგავეფიშ 1:22—25-ის რე მოჩამილ, მი ველერჩქილუანს ნამდვილ სიბრძნეშ ძახინს?

⁶ ბრელ ჸუჯის ვათხინს ჭეშმარიტ სიბრძნეს, მუჟამსით თინა „ქუჩას გილეძახ“. ბიბლიაშე იძირე, ნამდა სუმ კატეგორიაშ ადამიანეფ იჩიებნა ვარიას სიბრძნეშენ: „გამოუცდელეფ“, „გიმაძიცალეფ“ დო „უგუნურეფ“ (წეკითხით იგავეფიშ 1:22—25). მორთ უჯგუშო ქობძირათ, მუშენ იჩიებნა თინეფ ვარიას ღორონთიშ სიბრძნეშე დო მუჭო შემლებნა ვა ვაგურათ თინეფს.

7. მუშენ უსხუნ ნამთინეს, ქუდოსქიდას „გამოუცდელო“?

⁷ „გამოუცდელეფ“ რენა თინეფ, მით ხეთეშე იჯერენა ირფელს, მუდგას მირჩქილუანა დო ადვილო იღორებნა (იგავ. 14:15, სქოლიო). თეცალეფს ხშირას შეფხვადუთ მსახურებას. მაგალთო, დეფიქრით თი მილიონობით ადამიანშე, მით რელიგიურ ვარდა პოლიტიკურ ლიდერეფშე რენა ღორებულ.  ნამთინეშო მანგარ ნწარექ იჸუ თიშ გაანალიზებაქ, ნამდა დაღორეს. მარა იგავეფიშ 1:22-ს მოშინაფილეფქ ისხუნუეს, ქუდოსქიდესკო „გამოუცდელეფო“, მუშენდა თაშ მოწონა (იერ. 5:31). თინეფს შუროთ ვაკონა თიშ გაგება, მუს იჩიებ ბიბლია ვარდა თიშ ნორმეფით ცხოვრება. პირიქით, მოწონა თიშ კეთება, მუთ მუნეფს ოკონა. ამდღა ბრელ თეშ ფიქრენს, მუჭოთ ართ რელიგიურ ოსურკოჩ კანადაშე. თიქ იეჰოვაშ მოწმეეფს თეცალ მუდგარენ უწუ: „მღვდელქ მიმოჩილითუეს-და, თენა მუშ პრობლემა რე დო ვართ ხოლო ჩქინ“. მუშო ოკო რაგად, ჩქი ვამკონა, ვაგურათ თინეფს, მით შეგნებულო ველერჩქილუანს (იგავ. 1:32;  27:12).

8. მუ მიმეხვარებნა დაბრძენებას?

⁸ ბიბლია ელამჩანა, გამოუცდელეფო დოფსქიდათინ თიშ მანგიორო, ვორდათ აზროვნებათ „ძინათებულეფ“ (1 კორ. 14:20). ჩქი მიბღენთ სიბრძნეს, მუჟამსით ბიბლიურ პრინციპეფს ჩქინ ცხოვრებას გეგმიბრინუანთ. თაშ ქიმიფქციებუთ-და, ჭიე-ჭიეთ ქობძირუნთ, მუჭო შეულებ თე პრინციპეფს მიმეხვარან, დუდ ეუჩილითუათ პრობლემეფს დო მიბღათ ჭკვერულ გადაწყვეტილებეფ. ჯგირ იჸუაფ, ჩქინ დუდ გეგნვამოწმათ, მუჭო მიღნა თე კუნთხუთ საქმე. მაგალთო, ჭიჭე ხან ქორე, მუთ ბიბლიაშ გურაფა დიჭყით დო კრებაშ შეხვალამეფს ოსწრუთ, მარა დიო ხოლო ვემეიძღვინებნა დუდ იეჰოვაშა დო ვანათეთ-და, ქოკითხით თქვან დუდის: „მუ მაფჷ ოკეთებელ, ნამდა ქიმვოჭირინუე თე მიზნეფს? ნათილ ქუვორექ-და, ქუვოცადუქო, სახიოლო ამბეშ უჯგუშ მაქადაგებელ დო მასწავლებერქ ქიპჸუე? ქაძირანსო ჩქიმ გადაწყვეტილებეფ, ნამდა მეპჸუნქ ბიბლიურ პრინციპეფს? ქიგმიფრჩქინანქო ქრისტიანულ თვისებეფს შხვეფწკუმა ურთიერთობაშ დროს?“. ნამთინე მხარეს გაუჯგუშება მოსაჭირნან თენა ქობძირით-და, ყურადღება გეგნიბღათ იეჰოვაშ შეხსენებეფშა, ნამუთ „ბრძენო გინაშქვანს თის“, მიდგას გამოცდილება ვა უღჷ (ფსალმ. 19:7).

9. მუჭო ოძირანა „გიმაძიცალეფ“, ნამდა ვარიას იჩიებნა სიბრძნეშენ?

⁹ მაჟია ჯგუფ, მით ველერჩქილუანს ღორონთიშ სიბრძნეს, რენა „გიმაძიცალეფ“. მინშა თეცალეფს ხოლო შეფხვადუთ ქადაგებაშ დროს. თინეფს ოხიოლნა შხვეფიშ გოძიცა (ფსალმ. 123:4). ბიბლიაქ გუმაფრთხილეს, ნამდა ბოლო დღალეფს ბრელ იჸუაფუდ თეცალ (2 პეტ. 3:3, 4). მართალ ლოტიშ სასინჯოეფცალო, ამდღა ხოლო ნამთინექ შილებე ყურადღება ვემიაქცუას ღორონთიშ გაფრთხილებას (დაბ. 19:14). ბრელ გაძიცანს თინეფს, მით ბიბლიურ პრინციპეფით ცხოვრენა. თე გიმაძიცალეფ თაშ თიშენ იქციებნა, „ნამდა მუნეფიშ უღორონთე სურვილეფს რენა ეჸუნელ“ (იუდ. 7, 17, 18). მუ ზუსტას მეურე ბიბლიას ეჭარილ გიმაძიცალეფ ამდღარ განდგომილეფს დო თინეფს, მით ვარიას იჩიებნა იეჰოვაშე.

10. მუჭოთ ფსალმუნიშ 1:1-ს ჭარჷ, მუ შემლებნა ვაკეთათ, ნამდა ვა ვაგურათ გიმაძიცალეფს?

¹⁰ მუჭო შემლებნა დუდ დიფთხილუათ, ნამდა ვა ვაგურათ გიმაძიცალეფს? ართ-ართ მუთ თეს მიმეხვარებნა, რე, დუდ ეუჩილითუათ თინეფწკუმა ურთიერთობას, მიდგას კრიტიკულ დამოკიდებულება უღჷ (წეკითხით ფსალმუნიშ 1:1). თეშა მიშურს, ვა ურჩქილათ დო ვებკითხათ თიცალ მუდგარენ, მუთ განდგომილეფშე მოურს. ჩქი მარჩქილენა, ნამდა ფრთხილას ვეპჸით-და, შილებე ადვილო გენმევითარან კრიტიკულ აზროვნებაქ დო ჭიე-ჭიეთ ქიდიბჭყათ ეჭვიშ მიშაღალა იეჰოვაშა დო ორგანიზაციაშე მეღებულ მითითებეფშა. თაშ ვა მოხვადასინ, შემლებნა ჩქინ დუდის ბკითხათ: „წესო ხომ ვა მიღჷ მუდგარენ უარყოფითიშ რაგად, მუჟამსით ახალ მითითებას ვარდა ახალ გაგებას ბღებულენთ? ჩვევათ ხომ ვა მიღჷ ხემძღვანელ ჯიმალეფიშ კილიშ გორუა?“. მუთ უმოს მალას დეფთხინუანთ თეცალ დამოკიდებულებეფს, თით უმოსო ვასიამოვნენთ იეჰოვას (იგავ. 3:34, 35).

11. მუჭო უჯინენა „უგუნურეფ“ იეჰოვაშ ზნეობრივ ნორმეფს?

 ¹¹ მასმა ჯგუფ, მით ვარიას იჩიებნა ღორონთიშ სიბრძნეშენ, რენა „უგუნურეფ“. თინეფ უგუნურეფ რენა, მუშენდა შეგნებულო ვა ცხოვრენა ღორონთიშ ზნეობრივ ნორმეფით დო თის ორთნა, მუთ მუნეფიშ თოლს რე სწორ (იგავ. 12:15). თეცალეფ მუთუნო ვემირჩქინანა იეჰოვას, მიდგაშეთ მოურს სიბრძნე (ფსალმ. 53:1). მუჟამსით მსახურებაშ დროს თინეფს შეფხვადუთ, უმენტაშო უხეშო მაკრიტიკენა, მუშენდა ვაფასენთ ბიბლიურ ნორმეფს, მარა ვართ მუთუნ უჯგუშ მარზიებენა ჩქინდა. ბიბლია იჩიებ: „უგუნურშო ჭეშმარიტ სიბრძნე ვემიჭირინენ ფერ რე, თის ორაგადე მუთუნ ვა უღჷ ქალაქიშ კარმინოლეფწკუმა“ (იგავ. 24:7). უგუნურს ნამდვილ სიბრძნეწკუმა დაკავშირებულ ართ სიტყვა ხოლო ვა რაგადე. მუ გასაკვირ რე, იეჰოვა მაფრთხილენდან, „ჩეთხი უგუნურ კოჩის“ (იგავ. 14:7).

12. მუ მიმეხვარებნა, ვა ვაგურათ უგუნურეფს?

¹² ჩქი ვა ბგუთ თინეფს, მიდგას ჯოგნა ღორონთიშ სიბრძნე. თეშ გინაწონს, იპჸოროფუანთ თეშ ცხოვრებას, მუჭოთ თენა ღორონთის ოკო, მუდგაშა თიშ ზნეობრივ ნორმეფიშ მეჸუნა ხოლო მიშურს. თი შედეგეფიშ ართიანშა შედარებათ, მუთ მორჩილეფს დო დაუმორჩილებერეფს უღნა, შემლებნა თე ჸოროფაშ გამანგარება. ქიდეკვირით, მუნერ პრობლემეფს გიტახანს ხალხ დუდშა თიშ გურშენ, ნამდა უგუნურო იქციებ დო ვარიას იჩიებ ღორონთიშ სიბრძნეშენ; უკულ დეფიქრით, მუზმათ უჯგუშ რე თქვან ცხოვრება თიშ გურშენ, ნამდა ომორჩილუთ ღორონთის (ფსალმ. 32:8, 10).

13. მანძალენანო იეჰოვა თიშ ბრძნულ რჩევეფიშ მორჩილებას?

¹³ იეჰოვა სიბრძნეს ირ კოჩშო ხეშამალაფარო გინაშქვანს, მარა მითინს ვანძალუაფ თეშ მეღებას. თინა ეჭარუნს შედეგეფს, მუთ მოჸუნს თინეფიშ მოქმედებას, მით ველერჩქილუანს სიბრძნეს (იგავ. 1:29—32). თინეფ, მით ისხუნუანა, ვა დემორჩილან იეჰოვას, მუნეფიშ მოქმედებეფიშ შედეგის მიღენა. დროშ მიკულაწკუმა ართო, თინეფ მუნეფიშ დუდის ხვალე ოწუხებელს, გაჭირებას დო საბოლა განადგურებას მოუღანა. მარა მით ურჩქილენა იეჰოვაშ ბრძნულ რჩევეფს დო მეჸუნა თის, ღებულენა დუნაპირებუს: „მით მირჩქილე, უსაფრთხოთ იცხოვრენს, დო უბედრობაშ შიშ ვეშაწუხენს“ (იგავ. 1:33).

14, 15. მუს ბგურაფლენთ იგავეფიშ 4:23-შე?

¹⁴ ღორონთიშ სიბრძნეშ მეჸუნას ირიათო ჯგირობუა მოუღ ჩქინდა. მუჭოთ გუვარჩით, იეჰოვაქ მუშ ბრძნულ რჩევეფ ადვილო ხეშამალაფარ გინაშქვჷ. მაგალთო, მთელ იგავეფიშ წიგნის მოჩამილ რე დროულ რჩევეფ, ნამდგაშ მეჸუნა გაუჯგუშენს ჩქინ ცხოვრებას. მორთ ასე თეცალ ბრძნულ რჩევეფიშ ხვალე ოთხ მაგალით ქიმიპჸუნათ.

¹⁵ დეცვით თქვან სიმბოლურ გურ. ბიბლია იჩიებ: „ირფელიშ უმოსო გურ დოთხილე, მუშენდა თევრეშე მოურს სიცოცხლე“ (იგავ. 4:23). დეფიქრით,მუშ კეთება რე საჭირო, ნამდა დეფცვათ ჩქინ ფიზიკურ გურ. ჩქი ოკო ბჭკუმათ ჯანსაღ ოჭკუმალ,  დასაბაღო იბვარჯიშათ დო ჩეფთხინუათ გლახა ჩვევეფ. თეცალ მუდგარენს ვორთუთ ჩქინ სიმბოლურ გურიშ ოთხილარო ხოლო. ირდღას ვარზენთ საზრდოს ღორონთიშ სიტყვაშე; ვემზადებუთ კრებაშ შეხვალამეფშო, ვოსწრუთ დო მონაწილებას ბღებულენთ თინეფს; აქტიურეფ ვორეთ თით, ნამდა რეგულარულო ბღებულენთ მონაწილებას მსახურებას. თეს გეძინელ, დუდის ეუჩილითუანთ ირფელს, მუთ გლახა ჩვევეფს გუმოვითარებაფუანა. ათეშ გურშენ, ჩქი შორს ვორეთ თი მუდგარენეფშე, მუდგას შეულებ გლახათ იმოქმედას ჩქინ აზროვნებაშა, მაგალთო, უზნეო გართობაშე დო გლახა საზოგადოებაშე.

16. მუშენ რე ამდღა მანგარ დროულ იგავეფიშ 23:4, 5?

¹⁶ რდათ კმაყოფილ თით, მუთ გიღნა. ბიბლია ელამჩანა: „ვემკახარჯა სქან ჭყანა სიმდიდრეშ შაყარუას. თის ქიმკაჯინექინ, თექ ვა დორხვადუ; არწივიშ ფსუალეფს ქიჩანუანს დო ცაშა ქოფურინუნს“ (იგავ. 23:4, 5). ჩქი ვამღუნა გარანტია, ნამდა მატერიალურ სიმდიდრე ირიათო მაღვენუნა. ამდღა ქოთ ქონებიერ დო ქოთ გაჭირებულ ფარაშ ოშიბშა რე გინულირ. თე მიზეზით თინეფ ხშირას გილმელუანა რეპუტაციას, ურთიერთობეფს დო ჯამრთელობას ხოლო (იგავ. 28:20; 1 ტიმ. 6:9, 10). თეშ გინაწონს, სიბრძნე მოხვარნა, გაწონასწორებულ დამოკიდებულება მიღდან ფარაშ მიმართ. თეშნერო დუდის ევუჩილითუანთ ჰარამობას დო იპჸუაფუთ კმაყოფილეფ დო ბედნერეფ (ეკლ. 7:12).

17. მუჭო შემლებნა მიღდან „ბრძენიშ ნინა“, მუჭოთ თენა იგავეფიშ 12:18-ს ჭარჷ?

¹⁷ ჩიებაშახ დეფიქრით. ფრთხილას ვეპით-და, ჩქინ სიტყვეფქ შილებე სერიოზულ ზიანიშ მიზეზიქ ქიჸუას. ბიბლია იჩიებ: „გურუგუჩამუო ჩიება ყამაშ გეშქუმალაცალ რე, ბრძენიშ ნინა — მკურნალცალ“ (იგავ. 12:18). ჯგირ ურთიერთობეფს ვა ვოდინუანთ, მუჟამსით დუდის ეუჩილითუანთ ჭორაობას დო შხვეფიშ კილიშ გურშენ ჩიებას (იგავ. 20:19). ჩქინ ჩიებაქ დუმაზიანებელქ ვარინ მკურნალქ იჸუასინ, საჭირო რე, გურ გევოფშათ ღორონთიშ სიტყვაშე მეღებულ რჩქინათ (ლუკ. 6:45). მუჟამსით თიშე ფიფქრენთ, მუდგას ბიბლია იჩიებ, ჩქინ სიტყვეფქ შილებე გინირთას „სიბრძნეშ წყურგილეთ“, ნამუთ გიშაცოცხალენს შხვეფს (იგავ. 18:4).

18. მუჭო მოხვარნა იგავეფიშ 24:6-იშ გიმორნაფა, წარმატებულ ვორდათ მსახურებას?

 ¹⁸ მიაჸუნით ხემძღვანელობას. ბიბლია თეცალ პრაქტიკულ რჩევას მარზენა წარმატებაშ მიოჭირნაფალო: „ბრძოლაშ ჸუნაფას ბრძნულ რჩევა ოსაჭირ; ბრელ ელმაჩამალს რსხება მოუღ“ (იგავ. 24:6). გუვარჩუათ, მუჭო მოხვარნა თე პრინციპიშ მეჸუნა, ვორდათ წარმატებულ ქადაგებაშ დო გურაფაშ საქმეს. თიშ მანგიორო, ნამდა მსახურებას ჩქინობრა მეთოდეფით მივაჸუნათ, ოკო გიმიბრინუათ თი მითითებეფ, ნამდგას ბღებულენთ. ქრისტიანულ შეხვალამეფს ბღებულენთ ბრძნულ ხემძღვანელობას, სოდეთ შხვეფიშ მაგალითშე შემლებნა ბძირათ, მუჭო ვოგურუათ ბიბლიაშე. თეს გეძინელ, იეჰოვაშ ორგანიზაცია მარზენა პრაქტიკულ საშვალებეფს — პუბლიკაციეფს დო ვიდეოეფს — ნამდგას შეულებ მეხვარას ხალხის ბიბლიაშ ინონჭაფას. ქოგურაფლენთო თე საშვალებეფიშ ეფექტურო გიმორნაფას?

19. მუს ფიქრენთ თი სიბრძნეშენ, ნამდგას იეჰოვა ირზენს? (იგავ. 3:13—18)

¹⁹ წეკითხით იგავეფიშ 3:13—18. მუზმათ მარდულ ვორეთ თი რჩევეფშენ, ნამდგას ღორონთიშ სიტყვაშე ბგებულენთ. სო იპჸიდით ასე თინეფიშ უმშო?! თე სტატიას ჩქი გუვარჩით პრაქტიკულ სიბრძნეშ მუსხირენ მაგალით, ნამუთ წიგნ იგავეფს რე მოჩამილ. მარა, მუშო ოკო რაგად, მთელ ბიბლია ეფშა რე იეჰოვაშ ბრძნულ რჩევეფით. გინოჭყვიდილ მაფდან, ირიათო იფხემძღვანელათ იეჰოვაშ სიბრძნეთ. მართალ რე, ქვეყნიერება ვაფასენს თეცალ სიბრძნეს, მარა ჩქი დარწმუნებულ ვორეთ, ნამდა „ბედნერ ჯოხო თის, მიდგას მანგარო მეუკიდ თიშა [სიბრძნეშა] ხე“.