მუთ უმოსო იძინანდჷ ქადაგებაშ საქმე, თით უმოს მეტ პუბლიკაცია რდჷ საჭირო. ბრუკლინიშ ბეთელს ჯიმალეფ გიშაშქვანდეს ჟურნალეფს, მარა მანგარ ყდა უღუდუნ ფერ წიგნეფს შხვა კომპანიეფს ობეშტაფუანდეს. თუთეფიშ დინახალე დასაბაღ წიგნეფ ვებეჭდუდუნ თიშ გურშენ, ჯიმა რუტერფორდიქ სტამბაშ ზედამხედველს, ჯიმა რობერტ მარტინს, კითხჷ, მუზმათ შეიოლებერ რდჷ, წიგნეფ მუნეფიშით დუბეშტუდესკო.

ჯიმა მარტინ იშინანდჷ: „თენა დიდებულ იდეა რდჷ, მუშენდა ნიშნენდჷ მთლიან ასოეფიშ ემანწყუალ, გალვანოსტეგიურ, ობეშტალ დო ემანწუალ მანქანეფით მონწყილ ახალ სტამბაშ გონწყუმას“. ჯიმალეფქ ბრუკლინს, კონკორდ-სტრიტიშ 18 ნომერს, იჯარათ გეჭოფეს შენობა, ნამუთ სტამბაშო მანწყის.

არძას ვა ხიოლებ თე ახალ გადაწყვეტილება. ართ-ართ სტამბაშ ხემძღვანელქ, ნამუთ თეიშახ ჩქინ წიგნეფს ბეშტანდჷ, ქუმორთჷ თე ახალ შენობაშა დო ჯიმალეფს უწუ: „თქვა მაღალ ხარისხიშ ობეშტალ საშვალებეფ გიღნა, მარა მითინ ვა რჸუნა თიცალ, მით თე ტექნიკას ერკვიებ. ამშვ თუთაშა თე ირფელ გილელებ დო გინარღვაფალო გინირთუ“.

ჯიმა მარტინ იშინანდჷ: „თიშ სიტყვეფ ლოგიკურო რჩქუდ, მარა თის ოჭყორდუდ, ნამდა უფალ ირიათო ჩქინწკუმა რდჷ“. ჯიმა მარტინ მართალ რდჷ. თე შემთხვევაშ უკულ ხეთეშე სტამბას ირდღას 2 000 წიგნ იბეშტუდ.

წიგნეფიშ ბეშტუაწკუმა ართო, იეჰოვაშ ხალხიქ ხოლო ახალ მეთოდიშ გიმორნაფა ქიდიჭყჷ სახიოლო ამბეშ გაცხადებელო. თენა რდჷ რადიომაუწყებლობა. 1922 წანაშ 26 ფრევალს, ჟეშხა ონჯუას, ჯიმა რუტერფორდიქ პირველ მოხსენება აკეთ რადიოთ. თიშ მოხსენებაშ სათაურ რდჷ, „ამდღა მახორუ მილიონეფ დღას ვა ღურუნა“. რადიო რდჷ ლოს-ანჯელესის, კალიფორნიას (აშშ).

თე მოხსენებას სოდგარენ 25 000 ადამიანქ ურჩქილ. თინეფშე ნამთინექ მადლობაშ წერილ ხოლო მაჯღონ. ართ-ართ წერილ მაჯღონ  სანტა-ანას, კალიფორნიას, მახორუ უილარდ აშფორდიქ. თიქ მადლობა უწუ ჯიმა რუტერფორდის საიტერესო მოხსენებაშენ დო უკულ გეუძინ: „ჸუდეს სუმნერ ლეხ პუნს, ათეშენ ჩქი ვეშმალებედეს მოხსენებაშ ორჩქილშა მეულა, თინა ჩქინწკუმა გოხოლუას გაიკეთებდესკონ ხოლო“.

რადიოთ ქადაგებაქ უკულიან მარეფს ხოლო გეგრძელ დო წანაშ ბოლოშო, მუჭოთ „გინაჯინალ კოშკის“ ჭარუდ, სამეფოშ ცნობა რადიოშ საშვალებათ 300 000 ადამიანქ მირჩქილუ.

ხალხიშ დადებით გამოხმაურებაქ ბიბლიაშ მარკვიებელეფს გინაჭყვიდირაფუ, მუნეფიშ რადიოსადგურ აშენესკო სტეიტენ–აილენდის, ნამუთ ბრუკლინიშ ბეთელშე იშენდოიშენ შორს ვა რდჷ. უკულიან წანეფს ბიბლიაშ მარკვიებელეფ თე სადგურს, WBBR-ს, გეგმირინუანდეს, ნამდა სახიოლო ამბე უმოს მეტ ხალხიშ ჸუჯშა ქიმიღესკო.

1922 წანაშ 15 ივანობაშ „გინაჯინალ კოშკის“ ჭარუდ, ნამდა 5—13 სექტემბერს სიდარ–პოინტის, ოჰაიოს, იჸუაფუდ რაიონულ კონგრეს. თე კონგრესიშ დასწრებაქ ბიბლიაშ მარკვიებელეფს მანგარ დიდ ხიოლ მოუღ.

მუშ პირველ მოხსენებას ჯიმა რუტერფორდიქ აუდიტორიას უწუ: „ბოლოშა ვორექ დარწმუნებულ, ნამდა უფალ აკურთხენს თე კონგრესის დო თიშე ბრელით მეტ მოწმეს გუტენს, ვინემ აიშახ ჸოფე დედამიწას“. გიშმაულარ ჯიმალეფ ირიათო ელუჩანდეს აუდიტორიას, მონაწილება მიღესკო ქადაგებაშ საქმეს.

8 სექტემბერს, ობიშხა დღას, სოდგარენ 8 000 კოჩიქ გაფშჷ აუდიტორია. თინეფ მოულირ რდეს ჯიმა რუტერფორდიშ მოხსენებაშ ორჩქილშა, ნამდაქ მანგარო მეწონეს. თინეფ ელდეს, ნამდა რუტერფორდ გენწყუნდჷ, მუს ნიშნენდჷ აბრევიატურა „ADV“, ნამუთ მოსაწვევს გეჭარუდ. ქუდოზოჯუდესინ, თოლშა ქუმუოლდეს გერთელ ნოჭკერ, ნამუთ სცენაშ ჟი მიკობუდ. არტურ კლაუსიქ, ნამუთ თე კონგრესშა ტულცაშე, ოკლაჰომაშე, რდჷ მოულირ, თიცალ ადგილს ქუდოზოჯ, სოვრეშეთ მოხსენებაშ რჩქილა ჯგირო შეიალებედ. თეცალ ადგილიშ გორუა ვა რდჷ ადვილ, მუშენდა თე კონგრესის ვერინუანდეს ვართ მიკროფონს დო ვართ შხვა თეცალ საშვალებას.

 მოხსენებას მუთუნქ ვეცილკონ თიშ გურშენ, თავმჯდომარექ გეგმაცხად, ნამდა თინა ქიდიჭყაფუდუნ უკულ მიდგას დეგვიანებუდ, დარბაზშა მინულაშ უფლება ვაღვენუდ. ოჭმარეშ 9:30-ის ჯიმა რუტერფორდიქ მოხსენება ქიდიჭყჷ იესოშ სიტყვეფით, ნამუთ ეჭოფილ რდჷ მათეშ 4:17-შე: „მონჭაფილ რე ზეციერ სამეფო“. მუჟამსით თიშ გურშენ იჩიებუდ, მუჭო მირჩქილუანდჷ ხალხ სამეფოშ გურშენ ცნობას, თიქ თქუ: „მუჭოთ იესოქ მიწის, მუშ მოულაშ დროს ქიდიჭყანდჷ მოსავალიშ ეჭოფუას. თე პერიოდის თინა მუწკუმა გაკოშაყარანდჷ მართალეფს დო ართგურეფს“.

ჯიმა კლაუსი, ნამუთ მთავარ აუდიტორიას მილახედ, იშინანდჷ: „ვა მოკოდეს, ართ სიტყვაქ ხოლო გიშმოსქიდესკონ“. მარა თიქ ართუცფას დუდ გლახათ იგინ დო დარბაზიქ დატებელქ აჸუ. თის გურქ დოჭყორდჷ, მუშენდა უჩქუდ, დარბაზის ქიდიტენ-და, უკულ ვემნართედ.

მუსხირენ წუთიშ უკულ დუდ უჯგუშო ქიგინ. თინა იშინანდჷ, ნამდა აუდიტორიაჸურე ულა ქიდიჭყუნ, თევრეშე ტაშიშ ხონარ ქიგეგონ. თეშ გურშენ ხოლო უმოსო ქინაჭკირ ინტერესიქ დო იფიქრჷ, ნამდა მუდგათიინ ორთვალშა გეშეშ-და, შეიალებედ, მირჩქილუკო თე დიდებულ მოხსენება. თე ახალგაზრდა, 23 წანერ, ჯიმა კლაუსიქ დოგორ საშვალება ორთვალშა ეშულაქ. აკოშკა ენჯამილ რდჷ დო თევრეშე ხონარ მანგარო ჯგირო ირჩქილედ.

არტურ თექ ხვალე ვა რდჷ. თიშ ნამთინე მეგობარ ხოლო ორთვალს გიმახედ. თინეფშე ართ-ართიქ, ფრენკ ჯონსონქ, ქიმირულ თიშა დო კითხჷ: „ჯაყვა ხომ ვალაიძ?“.

არტურქ უპასუხ: „ქო, მიღჷ“.

„სი ჩქინ ლოცვეფიშ პასუხ რექ!“ — უწუ ფრენკიქ. «ქარწყექო ეთი გერთელ ნოჭკერს, ნამუთ თოკეფით ლისმარს რე მიკომარგებულ? ქურჩქილ მოსამართლეს, a მუჟამსით  თინა ქოთქუანს: „გაცხადით, გაცხადით!“, თე ოთხხოლო თოკ ოკო გეგნოჭკირე».

თაშ ნამდა, არტურს ხეს ჯაყვა უკინებუდ დო შხვეფწკუმა ართო ელუდ ნიშანს. თეშ უკულ ხეთეშე ჯიმა რუტერფორდიქ მოხსენებაშ მთავარ ნაწილშა გინილ. თინა შურ დო გურით რაგადანდჷ დო ხონარმაღალო თქუ: „რდათ უფალიშ ართგურ დო ჭეშმარიტ მოწმეეფ! იბრძოლით ონდო ბაბილონ ბოლოშა ვა გოდინუ. იქადაგით თე ცნობა ირდიხას! მთელ მსოფლიოქ ოკო ქიგეგას, ნამდა იეჰოვა ღორონთ რე დო იესო ქრისტე — მეფეეფიშ მეფე დო უფალეფიშ უფალ. თენა არძაშ უმოს მნიშვნელოვან დრო რე ისტორიას. მეფე მეფენს! თქვა რეთ თიშ ცნობაშ საჯაროთ გუმაცხადებელეფ, ათეშენ გაცხადით, გაცხადით, გაცხადით მეფეშ დო თიშ სამეფოშ გურშენ!“.

არტურ იშინანდჷ, ნამდა თიქ დო შხვა ჯიმალეფქ გეგნოჭკირეს თოკეფ დო ბანერქ, მუთუნ ვა ცილებუნ თეშ, გინწყჷ. ბანერს მოჩამილ რდჷ, მუს ნიშნენდჷ „ADV“. თექ მიკოჭარუდ: „გაცხადით, გაცხადით მეფეშ დო სამეფოშ გურშენ“. „ADV“ რდჷ აბრევიატურა ინგლისურ სიტყვაშ „advertise“, მუთ ნიშნენს გაცხადებას, ქადაგებას ვარდა დამოწმებას.

სიდარ-პოინტის ჩატარებულ კონგრესიქ მეხვარ და დო ჯიმალეფს, ყურადღება უმოს მნიშვნელოვან საქმეშა, სამეფოშ გურშენ ცნობაშ ქადაგებაშა, გეგნიღესკო. თეს გეძინელ, თე პროგრამაქ თინეფს ხოლო მეხვარ, მიდგას ქადაგებას მონაწილებაშ მეღება ოკოდ. ართ წიგნეფიშ გილმაღალარ (ასე პიონერ ჯოხო) ოკლაჰომაშე (აშშ) ჭარუნს: „ტერიტორიას, სოდეთ ჩქი მსახურენდით, ხალხ მაღაროეფს მუშენდჷ დო მანგარ უღონობას უწიენდეს ცხოვრება“. თინა იჩიებ, ნამდა, მუჟამსით თე ხალხ ქიმირჩქილუანდჷ ცნობას, ნამუთ ჭარჷ ჟურნალს „ოქროშ ხანა“, უმენტაშ შემთხვევას „თინეფ ნგარას ქიდიჭყანდეს“. თიქ მუშ წერილ თეცალ სიტყვეფით ათუ: „მუშმადიდა კურთხევა რე, ნამდა შემლებნა გურშა ეუქექუათ თინეფს“.

თე ბიბლიაშ მარკვიებელეფს არჩქილედეს, მუზმათ მნიშვნელოვან რდჷ იესოშ სიტყვეფ, ნამუთ ლუკაშ 10:2-ს ენოჭარ: „მოსავალ მართალო ბრელ რე, მარა ემაჭოფალეფ ჭიჭე რენა“. წანაშ ბოლოშო თინეფს უმოსო აფდეს გინოჭყვიდილ, ირდიხას გაცხადესკო სამეფოშ ცნობა.