40 წანაშ დინახალე ისრაელეფ, უდაბნოს, ძირითადო მანანას ჭკუმუნდეს (გამ. 16:35). რდჷ ჟირ შემთხვევა, მუჟამსით იეჰოვაქ თინეფს ოჭკუმალო ჭყორ ხოლო მეჩჷ (გამ. 16:​12, 13; რიცხ. 11:31). მარა მინშა შხვა მუდგარენეფს ხოლო ჭკუმუნდეს.

იეჰოვას მინშა მუშ ხალხ გაჩერებელო თიცალ დიხაშა მეჸუნდჷ, სოდეთ წყარ დო ოჭკუმალ აღვენუდეს (რიცხ. 10:33). ართ-ართ თეცალ ადგილ რდჷ ელიმ, „სოდეთ 12 წყურგილე დო 70 პალმაშ ჯა“, საეგებიოთ, ფინიკ რდჷ (გამ. 15:27). ართ წიგნის თეცალ მუდგარენ ჭარჷ: „ფინიკიშ პალმა ბრელ დიხას ფალუნს უდაბნოს მილიონობით ადამიან ძირითადო ფინიკის ჭკუმუნს. თიშე ზეთის ხოლო ორთნა დო ოცხოვრებელიშ მანწყუალო ხოლო ირინუანა“ (Plants of the Bible).

შილებე ისრაელეფქ უადი-ფეირანს ართ-ართ დიდ ოაზისის ხოლო გაჩერდეს. ართ წიგნის ჭარჷ: «უადი-ფეირან, ნამუთ 130 კმ სიგინძაშ რე, ართ-ართ არძაშ უმოს დიდ, უსქვამაშ დო ცნობილ უადი რე სინაიშ ნახევარკუნძულს. თე უადიშ შესართავშე 45 კმ-იშ მაშორას რე სოდგარენ 5 კმ-იან მანგარ სქვამ დო პალმეფით ეფშა ფეირანიშ ოაზის, ნამუთ ზღვაშ დონეშე 610 მეტრას რე. თინა სინაიშ ნახევარკუნძულიშ „ედემიშ ბაღ“ რე. ჯვეშ დროშე მოჸუნაფილ, თე ანთასობით ფინიკიშ პალმაშ ოძირაფშა ქიანაშ ხალხ მეურს».

ისრაელეფქ ეგვიპტეშე ცომ, ცომიშ გიოზალ, დო საეგებიოთ, ჭიჭე მარცვლეულ დო ზეთ მალეღეს. მუშო ოკო რაგად, თე ირფელ ბრელ ხანს ვა უბაღდეს დო მალას ქეშელიებდეს. ხვალე თენა ვარინ, ეგვიპტეშე მალეჸონეს შხურეფ დო ანაყუ საქონელ (გამ. 12:​34—39). მარა უდაბნოს, რთულ პირობეფიშ გურშენ, თე საქონელშე ნამთინე ალბათ დოღურუდ. ნამთინეს ისრაელეფ დოჸვილუნდეს დო ოჭკუმუნდეს ვარდა მსხვერპლო შეწირენდეს. ნამთინე შემთხვევას საქონელს ტყურა ღორონთეფს ხოლო წირენდეს a (საქ. 7:​39—43). თე ირფელიშ უმკუჯინუო, ისრაელეფს ირიათო ჸუნდეს შხურ დო საქონელ, მუდგას ამტკიცენს იეჰოვაშ სიტყვეფ, ნამუთ მუშ ხალხის უწუ, მუჟამსით ვედემორჩილეს თის. თიქ უწუ:  „თქვან ქომოლსქუალეფ უდაბნოს 40 წანას ჭყიშეფ იჸუაფნა“ (რიცხ. 14:33). თაშ ნამდა, შილებე მინშა ხორც დო ბჟა ხოლო უღდეს, მარა თისხი ვარ, მუსხით 3 მილიონ ადამიანს 40 წანას უბაღუდ. b

მარა მუშ რაგად შილებე შხურ დო საქონელიშ ოჭკუმალშე? c მუჭოთ იძირე, თიმ პერიოდის, უდაბნოს ხშირას ჭვენდჷ, მუდგაშ შედეგო ოდიარე ხოლო ეფალუნდჷ. „წმინდა წერილეფიშ ორკვიებელს“ ჭარჷ, ნამდა 3 500 წანაშ წოხოლე თი უდაბნოს, სოდეთ ისრაელეფ რდეს, ბრელით უმოს წყარ რდჷ, ვინემ ამდღა. თე ტერიტორიას ამდღა ბრელ ეშასქირაფილ ტომბა ადგილ რე, მუთ ამტკიცენს, ნამდა თექ ართ დროს ხვეიანო რდჷ წყარ. მარა თეშ უმკუჯინუო, უდაბნო იშენით გიშასქირაფილ დო ოშქურანჯ ადგილ რდჷ (კან. 8:​14—16). იეჰოვას წყარ სასწაულებრივო ვა გურჩქინუდკონ, ისრაელეფ მუნეფიშ შხურ დო საქონელამო დოღურუდეს (გამ. 15:​22—25; 17:​1—6; რიცხ. 20:​2, 11).

ისრაელეფშა რაგადებულ მოსეშ სიტყვეფშე იძირე, მუშენ არზენდჷ ღორონთ მანანას თინეფს ოჭკუმალო. ღორონთის ოკოდ, თინეფქ ქიგეგესკო, ნამდა „კოჩ ხვალე ქობალით ვარინ, იეჰოვაშ პიჯშე ეკნაულა ირ სიტყვათ ცოცხლენს“ (კან. 8:3).