1, 2. ა) მუ მნიშვნელოვან დავალება მიღ სოლომონქ? ბ) მუშენ წუხენდ დავით სოლომონიშ გურშენ?

სოლომონქ არძაშ უმოს მნიშვნელოვან საქმეს, იერუსალიმიშ ტაძარიშ აშენებას ოკო უხემძღვანელკო. თე ტაძარ „არძაშ უმოს დიდებულ დო მუშ სისქვამეთ გიშართილ [იჸიდ] მთელ ქიანას“. მუთ არძაშ უმოს მნიშვნელოვან რენ, თე ტაძარ „ჭეშმარიტ ღორონთი, იეჰოვაშ ჸუდე“ იჸიდ. იეჰოვაქ სოლომონს დავალ თე საქმეშ ხემძღვანელობა (1 მატ. 22:1, 5, 9—11).

² მეფე დავითის ჯერდ, ნამდა ღორონთი ქელუდირთუდ სოლომონს თე საქმეშ კეთებას, მარა თინა ახალგაზრდა რდუ დო გამოცდილება ვა უღუდ. ქაბაღუდუო სოლომონს გაბედულება, მუშ დუდშა გეჭოფკო ტაძარიშ აშენება? ხომ ვეცილებუდ თის ახალგაზრდობა დო გამოცდილება ვა უღუდუნ თინა? თე საქმეშ შეიოსრულებელო თის გაბედულებაშ გიმორჩქინა ოსაჭირუდ.

3. მუ შილებედ იგურუკო სოლომონქ დავითშე?

³ ალბეთ სოლომონ მუამუშ დავითშე ბრელ მუთუნს დიგურუანდ გაბედულებაშ გურშენ. ახალობას დავითის ბრელშა დუცვებ მუამუშიშ შხურეფ ტყარ ცხოველეფშე (1 სამ. 17:34, 35). თიქ დიდ გაბედულება გიმირჩქინ, მუჟამსით გოლიათის ეჩხუპ. დავითიქ ღორონთიშ მოხვარათ გოლიათის გიორჯგინ დო ქუათ დოჸვილ თინა (1 სამ. 17:45, 49, 50).

4. მუშენ ოსაჭირუდ სოლომონს გაბედულებაშ გიმორჩქინა?

⁴ დავით გიმირჩქინანდ გაბედულებას, ათეშენ თის არაგადედ სოლომონშა,  ჸოფედკო გაბედულ დო აუშენებუდკო ტაძარ (წეკითხით 1 მატიანე 28:20). * სოლომონ გაბედულებას ვეგმირჩქინან-და, თის შიში გიორჯგინანდ დო შედეგო, საქმე ვაკეთებედ. თენა უმოს უარეს იჸიდ, ვინემ თე დავალება ჯგირო ვეშიასრულკო.

5. მუშენ მოსაჭირნა გაბედულებაშ გიმორჩქინა?

⁵ სოლომონცალო, ჩქი ხოლო მოსაჭირნა იეჰოვაშ მოხვარა, ნამდა ვორდათ გაბედულეფ დო შევასრულათ საქმე. მორთ, გუვარჩუათ მუსხირენ ბიბლიურ მაგალით, სოვრეშეთ იძირე, მუჭო გიმირჩქინანდეს გაბედულებას ღორონთიშ მსახურეფ. დეფიფქრათ, მუჭო შემლებნა გიმიფრჩქინათ ჩქი ხოლო გაბედულება დო ვაკეთათ ჩქინდა მენდებულ საქმე.

6. მუშენ რე იოსებიშ საქციელ მოსაწონ?

⁶ გუვარჩუათ იოსებიშ მაგალით, ნამუთიქ გაბედულება გიმირჩქინ, მუჟამსით ფოტიფარიშ ოსურქ თიშ ჩილათა დო თიწკუმა სექსუალურ ურთიერთობა მინდომ. იოსების არჩქვენუდ, მუ გლახა შედეგეფ მაჸუნუდ თიშა ვარიაშ რაგადის. მარა თეშ უმკუჯინუო, თიქ ვადაჸუნ ცდუნებას, გაბედულება გეგმირჩქინ დო სწორაშე მიქცუ (დაბ. 39:10, 12).

7. მუჭო გიმირჩქინ რახაბიქ გაბედულება? (ქოძირით სურათ 28 გვერდის).

⁷ გაბედულებაშ გიმორჩქინაშ ხოლო ართ მაგალითის რახაბ მარზენა. მუჟამსით ისრაელ მზვერავეფქ იერიხონშა, თიშ ჸუდეშა ქიმერთესინ, თიქ შილებედ შიშის ქენოლკო დო ვემიღკო თინეფ. მარა რახაბის იეჰოვაშ ჯერდ, ათეშენ გაბედულება გეგმირჩქინ, დატყობინუ თინეფ დო ქიმეხვარ ნტებას (იეს. 2:4, 5, 9, 12—16). თის წანდ, ნამდა იეჰოვა ჭეშმარიტ ღორონთი რდუ დო თინა მუდგანერო ხეშა ქეშუჸოთანდ თე დიხას ისრაელეფს. თიქ ვადუშკურდ მითინს, ვართ იერიხონიშ მეფეს დო თიშ კათას. რახაბიქ გაბედულო იმოქმედ, შედეგო მუშ დუდ დო ოჯახიშ წევრეფ ხოლო გინასკილიდუ (იეს. 6:22, 23).

8. მუჭო იმოქმედ იესოშ გაბედულებაქ მუშ მოციქულეფწკუმა?

⁸ იესოშ ართგურ მოციქულეფ ხოლო გაბედულებაშ ჯგირ მაგალითის ირზენა. თინეფ ორწყედეს, მუჭო გიმირჩქინანდ იესო გაბედულებას (მათ. 8:28—32; იოან. 2:13—17; 18:3—5). თიშ მაგალითიქ მეხვარ თინეფს გაბედულებაშ გავითარებას. მუჟამსით სადუკეველეფქ მოწაფეეფს იესოშ გურშენ გურაფა გილუვარესინ, თინეფს იშენით ვემუტებნა თეშ კეთება (საქ. 5:17, 18, 27—29).

9. მი მიმეხვარებნა გაბედულებაშ გიმორჩქინას, მუჭოთ თენა 2 ტიმოთეშ 1:7-შე იძირე?

⁹ იოსებიქ, რახაბიქ, იესოქ დო თიშ მოციქულეფქ გაბედულება გეგმირჩქინეს დო თექ მეხვარ თინეფს ჯგირ საქმეეფიშ კეთებას. მარა თენა თის ვა ნიშნენდ, ნამდა ნაბეტანო რდეს მუნეფიშ დუდშა დაჯერებულ. თინეფ იეჰოვას ონდუდეს. ჩქი ხოლო შეფხვადუთ თიცალ სიტუაციეფს, სოდეთ დემესაჭირებნა გაბედულებაშ გიმორჩქინა. თეცალ დროს ჩქინ დუც ვარინ, იეჰოვას ოკო მივენდათ (წეკითხით 2 ტიმოთე 1:7). * მორთ, გუვარჩუათ, მუჭო გიმიფრჩქინათ გაბედულება ოჯახის დო კრებას.

10. მუშენ ოსაჭირნა ახალგაზრდეფს გაბედულება?

¹⁰ ქრისტიან ახალგაზრდეფ ხშირას შეხვადნა თიცალ სიტუაციეფს, მუჟამსით იეჰოვას ემსახურანინ თიშენ, გაბედულებაშ გიმორჩქინა დესაჭირებნა. თინეფს შეულებნა მიაჸუნან სოლომონიშ მაგალითის, ნამუთიქ გაბედულება გიმირჩქინ, ჭკვერულო გეგნოჭყვიდ საკითხეფ დო თეგვარო ტაძარიშ აშენებაშ საქმე ბოლოშა ქიმიჸუნ. მართალ რე, ქრისტიან ახალგაზრდეფს შეულებნა მშობლეფიშ ხემძღვანელობას მიაჸუნან, მარა მუნეფიშით ოკო გინოჭყვიდან სერიოზულ საკითხეფ (იგავ. 27:11). თინეფს გაბედულებაშ გიმორჩქინა ოსაჭირნა, ნამდა სწორაშე გეგნოჭყვიდან, მუნერ მეგობრეფ დო გართობა გიშეგორან, მუჭო დოსკიდან ზნეობრივო სუფთეფქ დო მუჟამ ინათან. თე დროს ახალგაზრდეფქ გაბედულება ოკო გეგმირჩქინან, მუშენდა სატანაშ წინააღმდეგ მეულა, ნამუთ ღორონც გიაძიცენს.

11, 12. ა) გაბედულებაშ მუ მაგალით დომტუეს მოსექ? ბ) მუჭო შეულებნა ახალგაზრდეფს მიაჸუნან მოსეშ მაგალითის?

 ¹¹ ახალგაზრდეფს გინაჭყვიდირალ აფნა, მუ მიზნეფს მიოჭირინუან ცხოვრებას, ნამუთ ართ-ართ მნიშვნელოვან საკითხ რე. ნამთინე ქიანას მიორჩქუნა, ნამდა ახალგაზრდეფიშ მთავარ მიზან ოკო რდას უმაღლესის გურაფა დო თიცალ სამუშაშ შიბა, სოდეთ დიდ ხელფას აღვენუნა; თე ირფელქ შილებე მანგარო იმოქმედას თინეფწკუმა. შხვა ქიანეფს ხოლო გლახა ეკონომიკურ პირობეფიშ გურშენ, ახალგაზრდეფ შილებე დუც ვალდებულო გინაფლენდან, ოჯახის მატერიალურო ქელუდირთან. თეშნერ სიტუაციეფს ქორეთ-და, მოსეშ მაგალითშე დაფიქრება მიგეხვარებნა. თის ფარაონიშ ოსურსქუა რდუნდ, ათეშენ შეულებუდ გიმორჩქინელ კოჩი ჸოფედკო ვარდა დიდ ქონება დუშაყარუდკო. ვა რე გამორიცხულ, მოსეშა თენა ელუჩამდესკო ფარაონიშ ოჯახიშ წევრეფს, მასწავლებელეფს დო შხვეფს. მუჭოდგა ვაჸოფედკონ, მოსექ ვადაჸუნ თინეფს დო გაბედულო ქიდეკინ წმინდა თაყვანიშმცემლობაშ მხარე. თიქ მიენდ იეჰოვას დო ვარია ქოთქუ ეგვიპტეშ ქონებაშე (ებრ. 11:24—26). იეჰოვაქ აკურთხ მოსე დო მუშო ოკო რაგად, მომავალს თინა უმოს მეტ კურთხევეფს მიღენს.

¹² იეჰოვა თი ახალგაზრდეფს ხოლო აკურთხენს, მით გაბედულებას გიმირჩქინანს, ოცად სულიერ მიზნეფიშ მეჭირნაფას დო სამეფოშ საქმეს პირველ ადგილს გიორინუანს. ღორონთი ქიმეხვარებ თინეფს, ქიმკაჯინან მუნეფიშ ოჯახიშ საჭიროებეფს. პირველ საუკუნეს, ახალგაზრდა ტიმოთეს პირველ ადგილშა გეურდ სულიერ მიზნეფიშ მეჭირნაფა დო თეშ კეთება თქვა ხოლო შეილებნა * (წეკითხით ფილიპელები 2:19—22). *

13. მუჭო მეხვარ ართ დას გაბედულებაშ გიმორჩქინაქ სულიერ მიზნეფიშ მეჭირნაფას?

¹³ ართ ქრისტიან დას, ნამუთ ალაბამას (აშშ) ცხოვრენს, სულიერ მიზნეფს ქიმიოჭირინუკონ თიშენ, გაბედულებაშ გიმორჩქინა ოსაჭირუდ. თინა იჩიებ: „ჭიჭენობას მანგარ მორდებუან ვორდ. კრებას და დო ჯიმალეფწკუმა ონდეთ ვახერხენდ ურთიერთობას. კარდოკარ უჩინებ კათაწკუმა რაგად ხოლო მანგარო მიჭირდ“. მშობლეფიშ დო თანაქრისტიანეფიშ მოხვარათ თიქ ქიმიოჭირინუ მიზანს დო ქიდიჭყ პიონერო მსახურება. თინა იჩიებ: „სატანაშ ქიანას თიცალ მიზნეფი მიორჩქნა ჯგირო, მუნერით რე უმაღლესის გურაფა, სახელი, ფარაშ დო ქონებაშ შაყარუა. ხშირას თეცალ მიზნეფიშ მეჭირნაფა ვა რე შეიოლებერ. თეს სტრესი დო გურგოტახუა მოუღ. თეშ გინაწონს, იეჰოვაშ მსახურებაქ დიდ ბედნერობა დო კმაყოფილება მომიღ“.

14. მუნერ სიტუაციეფს შილებე დესაჭირან მშობლეფს გაბედულებაშ გიმორჩქინაქ?

¹⁴ ქრისტიან მშობლეფს ხოლო ოსაჭირნა გაბედულებაშ გიმორჩქინა. მაგალთო, შილებე თქვან უნჩაშ ხშირას რთხინდან სამუშაშ უკულ ონჯუას ვარდა საბატონ დო ჟეშხას ხოლო მუშობას. შილებე თე დრო ოჯახწკუმა ართო თაყვანიშცემაშო, მსახურებაშო ვარდა კრებაშ შეხვალამეფშო გაფდან გიმორთილ. გაბედულება რე საჭირო, თეცალ დროს ვარია ქუწუათ თქვან უნჩაშის დო თეგვარო ჯგირ მაგალით ქიმეჩათ სქუალეფს. შილებე კრებას ნამთინე მშობელ მუნეფიშ ბაღანეფს თიცალ მუდგარენიშ კეთებაშ უფლებას არზენდას, მუთ ვა გოკონა თქვან ბაღანაქ აკეთას. თი მშობლეფქ შილებე ქორკითხან, მუშენ გილუვარუანთ თქვან სქუას თეშ კეთებას. გეგმირჩქინანთო გაბედულებას დო გეუნწყუნთო ტაქტიანო თეშ მიზეზის?

15. მუჭო მეხვარებ ფსალმუნიშ 37:25 დო ებრაელეფიშ 13:5 მშობლეფს?

¹⁵ გაბედულებას გიმიფრჩქინანთ, მუჟამსით ვოხვარუთ სქუალეფს უღუდან სულიერ მიზნეფი დო ქიმიოჭირინუან თის. მაგალთო, ნამთინე მშობელ შილებე დუც არიდანდას სქუალეფშა თიშ რაგადის, იმსახურან პიონერო, ვარდა თექ სოდეთ, მაქადაქებელეფიშ საჭიროება რე, თეს გეძინელ ბეთელს დო სამშენებლო პროექტეფს. მშობლეფს შილებე თიშა ოშკურდან, ნამდა მუჟამსით ხანშა გემშულან, სქუალეფს ვეშიალებენა თინეფიშ მიკოჯინა. მარა, ბრძენ მშობლეფ  თეცალ დროს გაბედულებას დო იეჰოვაშ დუნაპირებუშ რწმენას გიმირჩქინანა (წეკითხით ფსალმუნი 37:25; ებრაელები 13:5). * გაბედულებას დო იეჰოვაშ ნდობას გეგმირჩქინანთ-და, სქუალეფს ხოლო ქიმეხვარებუთ თე თვისებეფიშ გიმორჩქინას (1 სამ. 1:27, 28; 2 ტიმ. 3:14, 15).

16. მუჭო მეხვარ ნამთინე მშობელქ მუშ სქუალეფს სულიერ მიზნეფიშ მეჭირნაფას დო მუ შედეგიქ მაჸუნ თეს?

¹⁶ ართ წყვილქ, ნამუთ შეერთებულ შტატეფს ცხოვრენსინ, მეხვარ მუნეფიშ სქუალეფს, უღდესკო სულიერ მიზნეფ. ბაღანეფიშ მუმა იჩიებ: „სქუალეფს ჭიჭენობაშე ურაგადუდით, მუ ხიოლ მოუღ პიონერო მსახურებას დო კრებაშ საქმეეფს მონაწილებას. ამდღა თინეფიშ მიზან ზუსტას თენა რე. სულიერ მიზნეფიშ მეჭირნაფა ოხვარ ჩქინ სქუალეფს ვეიაჸუნან თის, მუდგა სატანაშ ქიანას რე მეღებულ დო ყურადღება იეჰოვაშა გეგნიღან“. ართ ჯიმა, ნამუსით ჟირ ბაღანა ჸუნს, იჩიებ: „ბრელ მშობელ მთელ მუნეფიშ დროს დო ენერგიას მიკახარჯენს თის, ნამდა სქუალეფქ უმაღლესის ქიგურუან, სპორტის მიაჸუნან ვარდა ჯგირო გატარან დრო. მარა უჯგუშ იჸუაფ ქიმვეხვარათ სქუალეფს თიცალ მიზნეფიშ მეჭირნაფას, ნამუთ იეჰოვაწკუმა ჯგირ ურთიერთობაშ საშვალებას ქიმეჩანს თინეფს. სულიერ მიზნეფიშ მეჭირნაფას ხვალე სქუალეფშო ვარინ, ჩქინო ხოლო დიდ კმაყოფილება მოუღ“. რჯერდან თიშ, ნამდა ღორონთი აკურთხენს მშობლეფს, მით ოხვარ მუნეფიშ სქუალეფს უღდან სულიერ მიზნეფ დო მიოჭირინუან თის.

17. მუ დროს შილებე იჸუას საჭიროქ გაბედულებაშ გიმორჩქინაქ კრებას?

¹⁷ გაბედულებაშ გიმორჩქინა კრებას ხოლო რე საჭირო. მაგალთო, უხუცესეფს გაბედულება ოსაჭირნა, მუჟამსით სამართლებრივ საკითხეფს გინოჭყვიდუნა ვარდა ნამდგაინ თანაქრისტიანს სასწრაფო სამედიცინო მოხვარა ოსაჭირ. ნამთინე უხუცესი ხოლო გაბედულებას გიმირჩქინანს, მუჟამსით ციხეს ოგურუანს ბიბლიას დაინტერესებულეფს დო თექ კრებაშ შეხვალამეფს ატარენს. მუშ რაგად შილებე დაუქორწინებელ დალეფშე? თინეფს შეულებნა მეტ აკეთან მსახურებას, მაგალთო იმსახურან პიონერო, გეგნორთან თევრე, სოდეთ მაქადაქებელეფიშ საჭიროება რე, მიღან მონაწილება ადგილობრივ სამშენებლო პროექტეფს ვარდა იგურუან სამეფოშ მახარობელეფიშ სკოლას. ნამთინეს შეულებ გალაადიშ სკოლა ხოლო გემკორთას.

18. მუჭო შეულებნა ხანშა მიშულირ დალეფს გაბედულებაშ გიმორჩქინა?

 ¹⁸ ხანშა მიშულირ დალეფ კრებაშო კურთხევა რენა. კრებაშ წევრეფ მანგარო აფასენა თეცალ დალეფს. ნამთინეს ვეშულებ ისხიშ კეთება ღორონთიშ მსახურებას, მუსხის ადრე ორთუდ, მარა თინეფს იშენით შეულებნა გაბედულებაშ გიმორჩქინა დო ჯგირ საქმეეფიშ კეთება (წეკითხით ტიტე 2:3—5). * მაგალთო, ხანშა მიშულირ დას გაბედულებაშ გიმორჩქინა დესაჭირებ, მუჟამსით უხუცესეფ ქოთხინა თის, ქელუჩას ახალგაზრდა დას მოკრძალებულო მიკიქუნას. თიქ გენჭირელო ოკო ვადურაგადუას თის; თეშ მანგიორო, გემუან რაგადით ოკო დაფიქრას, მუჭო შილებე თიშ მიკაქუნალქ იმოქმედას შხვეფწკუმა (1 ტიმ. 2:9, 10). თეგვარო ჸოროფაშ გიმორჩქინას შეულებ კრებაშ წევრეფიშ გამანგარება.

19. ა) მუჭო შეულებნა ნათილ ჯიმალეფს გაბედულებაშ გიმორჩქინა? ბ) მუჭო შილებე ფილიპელეფიშ 2:13-ქ დო 4:13-ქ მეხვარას ჯიმალეფს გაბედულებაშ გიმორჩქინას?

¹⁹ ნათილ ჯიმალეფქ ხოლო ოკო გიმირჩქინან გაბედულება დო აკეთან ჯგირ საქმეეფი. კრებაშო კურთხევა რენა თი გაბედულ ჯიმალეფ, მით ოცადნა მეტ პასუხიშმგებლობეფ მიღან (1 ტიმ. 3:1). მარა ნამთინე ჯიმა დუც არიდანს თეშ კეთებას. შილებე ადრე დაშვებულ შეცდომაშ გურშენ თინა ფიქრენდას, ნამდა ვა რე ღირს, რდას მომსახურე ვარდა უხუცესი. ნამთინექ ხოლო შილებე იფიქრას, ნამდა ვაკეთინე მუშა მენდებულ საქმე. თქვა ხოლო თაშ ქოფიქრენთ-და, იეჰოვა მიგეხვარებნა გაბედულებაშ გიმორჩქინას (წეკითხით ფილიპელები 2:13; 4:13). * ქიგიშინით მოსეშ მაგალით; დუდშე თინა ხოლო ფიქრენდ, ნამდა ღორონთშე მენდებულ დავალებაშ შესრულება ვეშიალებედ (გამ. 3:11). მარა, იეჰოვაქ ქიმეხვარ თის დო დრო ხანიშ უკულ მოსექ გეგმირჩქინ გაბედულება მუშა მეჩამილ დავალებაშ შეიოსრულებელო. ნათილ ჯიმას ხოლო შეულებ თეცალ გაბედულებაშ გიმორჩქინა, მუჟამსით ღორონც ქოთხინს მოხვარას დო ირდღას წეკითხენს ბიბლიას. თის გაბედულებაშ მაგალითეფშე დაფიქრება ხოლო მეხვარებ თე თვისებაშ გიმორჩქინას. თეს გეძინელ, შეულებ თანდაბლურო ქოთხუას უხუცესეფს, ქელირინუან კრებაშ საქმეეფიშ კეთებას დო ქუწუას, ნამდა მზათ რე ირნერ საქმეშო. ჯგირ იჸუაფ არძა ნათილ ჯიმაქ გეგმირჩქინას გაბედულება დო მიღას მონაწილება კრებაშ საქმეეფს!

20, 21. ა) მუჭო გამანგარ დავითიქ სოლომონ? ბ) მუ შემლებნა ბჯერდან?

²⁰ მეფე დავითიქ ქუგაშინ სოლომონს, ნამდა ტაძარიშ შენებაშ ბოლოშა იეჰოვა იჸუაფუდ თიწკუმა (1 მატ. 28:20). მუშო ოკო რაგად, სოლომონქ დეფიქრ თე სიტყვეფშე დო ნება ვემეჩ მუშ ახალგაზრდობას დო გამოცდილება ვა უღუდუნ თის, ქეცილკო თე საქმეშ შესრულებას. თიქ დიდ გაბედულება გეგმირჩქინ დო იეჰოვაშ მოხვარათ შკვით წანა დო გვერდიშ დინახალე გეიაშენ თე დიდებულ ტაძარი.

²¹ იეჰოვა ჩქი ხოლო მიმეხვარებნა ვორდათ გაბედულეფ დო შევასრულათ ჩქინ საქმე ოჯახის დო კრებას (ეს. 41:10, 13). მუჟამსით იეჰოვაშ მსახურებას გაბედულებას გიმიფრჩქინანთინ, შემლებნა ბჯერდან, ნამდა იეჰოვა კურთხევეფს ვამმარკენა, მუჭოთ ამდღა თეშ მომავალს ხოლო. თაშ ნამდა, გეგმირჩქინით გაბედულება დო საქმეს ქეშუდირთით!