ღორონთიშ სიტყვა მოქმედ რე
„ღორონთიშ სიტყვა ცოცხალ დო მოქმედ რე“ (ებრ. 4:12).
ობირეშეფი: 114, 113
1. მუშენ რჯერა, ნამდა ღორონთიშ სიტყვა მოქმედ რე? (ქოძირით სურათ თე გვერდის).
იეჰოვაშ მსახურეფს ჯერა, ნამდა ღორონთიშ სიტყვა „ცოცხალ დო მოქმედ რე“ (ებრ. 4:12). ბრელს ჩქინ დუდშა მაფნა გუნამორსებ, მუჭო შეულებ ბიბლიას ცხოვრებაშ თირუა. ნამთინე, სოიშახ იეჰოვაშ მოწმეთ გინირთუდუნ, ხირულენდ, ნარკომან რდუ ვარდა უზნეო ცხოვრებათ ცხოვრენდ. შხვეფს ხოლო თე ქვეყნიერებას ბრელ მუთუნშა აფდეს მეჭირნაფილ, მარა იშენით, მუდგარენ ორკუდესკონ თეშ გინაფლენდეს დუც (ეკლ. 2:3—11). თინეფქ, მიდგას იმენდ აფდეს დინაფილინ, ღორონთიშ სიტყვაშ ჭყოლოფუათ დოგორეს სიცოცხლეშ შარა დო მომავალიშ იმენდიქ ქაშუეს. თქვა შილებე კითხირებულ გაფდან თეცალ კათაშ ისტორია „გინაჯინალ კოშკის“ მოჩამილ რუბრიკას: „ბიბლია ხალხიშ ცხოვრებას თირანს“. თეწკუმა ართო, ვორწყეთ, ნამდა ჭეშმარიტებაშ მეღებაშ უკულ ხოლო ქრისტიანეფ ღორონთიშ სიტყვაშ მოხვარათ ითირუნა დო სულიერო წიმიულას აგრძელენა.
2. მუჭო მოქმედენდ ღორონთიშ სიტყვა პირველ საუკუნეშ ქრისტიანეფწკუმა?
2 ვა რე გასაკვირ, ნამდა ამდღა ჭეშმარიტებაშ გაგებაშ უკულ, ბრელ თირანს მუშ ცხოვრებას. პირველ საუკუნეშ შურითცხებულ ქრისტიანეფქ ხოლო დოთირუეს მუნეფიშ ცხოვრება (წეკითხით 1 კორინთელები 6:9—11). * მუჟამსით პავლე მოციქულქ მიშინუ თი კათა, მით ღორონთიშ სამეფოშ დამკვირდებაშ ღირს ვეჸიდესინ, თიქ გეუძინ: „თეცალ რდუ თქვანდე ნამთინე“. მარა თინეფქ დითირეს წმინდა წერილეფიშ დო წმინდა შურიშ მოხვარათ. ნამთინექ ქრისტიანო გინირთუნ თიშ უკულ, სერიოზულ შეცდომეფ დუშვ დო ღორონთწკუმა ურთიერთობაქ გილელ. ბიბლიას მოშინაფილ რე პირველ საუკუნეს ცხოვრენდუნ ფერ ართ შურითცხებულ ქრისტიან, ნამუთ კრებაშე გარიცხეს, მარა ჭიჭე ხანიშ უკულ თიქ დირთ კრებაშა (1 კორ. 5:1—5; 2 კორ. 2:5—8). გურშა ველამკინანანო თიშ რჩქინა, ნამდა ჩქინ და დო ჯიმალეფქ ღორონთიშ სიტყვაშ მოხვარათ დოთირუეს მუნეფიშ ცხოვრება?
3. მუს გუვარჩიენთ თე სტატიას?
3 ღორონთიშ სიტყვა ჩქინო ხეშამალაფარ რე დო თის დიდ ძალა უღუ, ათეშენ მუთ შილებენ ჯგირო ოკო გეგმიბრინუათ თინა (2 ტიმ. 2:15). თე სტატიას გუვარჩიენთ, მუჭო შემლებნა ღორონთიშ სიტყვას ქიმეფჩათ საშვალება, იმოქმედას 1) ჩქინ ცხოვრებას, 2) მსახურებას დო 3) მუჟამსით სცენაშე ვოგურუანთ. თეშე დაფიქრება მიმეხვარებნა, გეგმოფხანტათ ზეციერ მუმაშ ჸოროფა დო სიმარდულ, ნამუთ ჩქინ საჯგირობუოთ მოგურუანა (ეს. 48:17).
ჩქინ ცხოვრებას
4. ა) მუ რე საჭირო ღორონთიშ სიტყვაქ ჩქინწკუმა ქიმოქმედასინ? ბ) მუ დროს რე თქვანო მოხუჯურ ბიბლიაშ კითხირი?
4 ღორონთიშ სიტყვაქ ჩქინწკუმა ქიმოქმედასინ, რეგულარულო ოკო იპკითხათ თინა, ქორე შეილობერ-და, ირდღას (იეს. 1:8). მუშო ოკო რაგად, ამდღა ბრელს გინოხარგელ გრაფიკ უღუ. თეშ უმკუჯინუო, მუთუნს ოკო ვემეფჩათ უფლება, გომჩირთან ბიბლიაშ კითხირქ (წეკითხით ეფესოელები 5:15, 16). * ნამთინეშა ბიბლიაშ კითხირ მოხუჯურ რე ოჭმარეს, შხვეფ ონდღეს კითხულენა, ნამთინე ხოლო სერით. თინეფ ფსალმუნმაბირეცალო გინაფლენა დუც, ნამუთიქ ჭარ: „მუჭო მიჸორს სქან კანონი! მთელ დღას თიშე ფიფქრენქ“ (ფსალმ. 119:97).
5, 6. ა) მუშენ რე ფიქრი მნიშვნელოვანი? ბ) მუჭო შეილებნა ნაკითხირშე იფიქრათ თეშ, ნამდა ჯგირ შედეგიქ ქუმაჸუნას? გ) მუჭო გოხვარნა პირადო თქვა ბიბლიაშ კითხირ დო თიშე ფიქრი?
5 ხვალე ბიბლიაშ კითხირ ვა რე დასაბაღ, მნიშვნელოვან რე, იფიქრათ ნაკითხირშე (ფსალმ. 1:1—3). ხვალე თე დროს შემალებენა გეგმიბრინუათ თექ მოჩამილ სიბრძნე. მნიშვნელობა ვა უღუ, ბიბლიას ბეშტელო იპკითხანთ დო ვარ ელექტრონულ ფორმატით, მიზან თინა ოკო რდას, ნამდა თიქ ჩქინ გურს ქენანჭას.
6 მუჭო შეილებნა ნაკითხირშე იფიქრათ თეშ, ნამდა ჯგირ შედეგიქ ქუმაჸუნას? ბრელშო ჯგირქ იჸუ ბიბლიაშ კითხირიშ დროს გაჩენდას დო მუშ დუც ქოკითხას: მუს მოგურუანს თენა იეჰოვაშენ? მუჭო შემლებ თაქ მოჩამილ პრინციპიშ ცხოვრებას გიმორნაფა? მუ საკითხის მოსაჭირ გაუჯგუშება? მუჟამსით ფიფქრენთ ღორონთიშ სიტყვაშენ დო თექ ნაკითხირშენ ბლოცულენთინ, თე დროს მოკოდან იჸი ცხოვრებას თიშ გიმორნაფა (2 კორ. 10:4, 5).
მსახურებას
7. მუჭო შემლებნა ბიბლიაშ გიმორნაფა მსახურებას?
7 მუჭო შემლებნა ბიბლიაშ გიმორნაფა მსახურებას თეშ, ნამდა ჯგირ შედეგიქ ქუმაჸუნას? ართ-ართ ნაბიჯ რე, ხშირას გეგმიბრინუათ თინა, მუჟამსით ვუქადაქუთ დო ვოგურუანთ შხვეფს. ართ ჯიმაქ თქუ: „კარდოკარ იეჰოვაწკუმა ართო ქოქადაქენდე, ვემეჩანქო საშვალებას, თიქ ხოლო ქორაგადუას?“. თე ჯიმაშ სიტყვეფშე იძირე, ნამდა მუჟამსით მსახურებაშ დროს ხალხის პირდაპირ ბიბლიაშე გიშუკითხანთინ, იეჰოვას ვარზენთ საშვალებას, ქუდურაგადუას თინეფს. ჯგირო გიშაგორილ მუხლიშ ეშაკითხირს ბრელით უმოს მეტ ძალა უღუ, ვინემ ჩქინ ნათქუელს (1 თეს. 2:13). ქოკითხით თქვან დუც: ქიგმიბრინუანქო ირნერ საშვალებას, ნამდა ხალხის ბიბლიაშე გეგშუკითხე სახიოლო ამბე?
8. მუშენ ვა რე დასაბაღ ქადაქებაშ დროს ხვალე ბიბლიურ მუხლეფიშ ეშაკითხირი?
8 მუშო ოკო რაგად, ხვალე ბიბლიურ მუხლეფიშ ეშაკითხირ ვა რე დასაბაღ, მუშენდა უმენტაშის წარმდოგენა ვა უღუ ვარდა ბრელ მუთუნ ვარჩქილე ბიბლიაშ გურშენ. თაშ რდუ პირველ საუკუნეს დო თაშ რე ამდღა ხოლო (რომ. 10:2). ვეფიფქრათ ოკო, ნამდა ჩქინ გიშაკითხირებულ მუხლის ხეთეშე ქიგეგენა. გუმეორათ ოკო მთავარ სიტყვეფ ვარდა აზრეფ დო გეუნწყათ თიშ მნიშვნელობა. თეგვარო, შემალებენა ღორონთიშ სიტყვა გენიბღათ თინეფიშ გურშა დო გონებაშა (წეკითხით ლუკა 24:32). *
9. მუნერ შესავალ შემლებნა ვაკეთათ მუხლეფიშ ეშაკითხირშახ, ნამდა ხალხიქ დაფასას ბიბლია?
9 მიდგას ვუქადაქუთინ თინეფ დაფასენა ბიბლიას, მუჟამსით ბიბლიურ მუხლეფიშ ეშაკითხირშახ შესავალს გუვაკეთენთ. მაგალთო, შემლებნა თეცალ მუდგარენ ქოუწუათ: „მორთ, ქობძირათ, მუს იჩიებ გუმაჭყაფალ თე საკითხშენ“. ქრისტიან ვარენ ფერ პიროვნებას შილებე ქუწუათ: „ქობძირათ, მუს იჩიებ წმინდა წერილეფ“. პიროვნებას, ნამუსით რელიგია ვა ინტერესუნ, შემლებნა ქუწუათ: „ქუგაფნანო გუნაგონებ თე ჯვეშ ნარაგადა?“. ჯგირ იჸუაფ დეფიფქრათ თითოულ პიროვნებაშე დო თიშე, მის მუჭო დუჭყათ ჩიება (1 კორ. 9:22, 23).
10. ა) მუ შემთხვევა უღუდ ართ ჯიმას მსახურებას? ბ) თქვა მუჭო გინაფლენთ ღორონთიშ სიტყვაშ ძალას მსახურებას?
10 ბრელქ ქოძირ, ნამდა მსახურებას ღორონთიშ სიტყვაშ გიმორნაფას ჯგირ შედეგ მოუღ. მაგალთო, ართ ჯიმა წანეფიშ დინახალე მიაკითხანდ ართ მოხუცებულ კოც დო ჟურნალეფ მეუღუდ. ართშა თიქ „გინაჯინალ კოშკიშ“ ახალ გიშაშკუმალაშ მეჩამაშ მანგიორო, გეგნოჭყვიდ თე ჟურნალს მოჩამილ ბიბლიურ მუხლი წუკითხირუდკო. თიქ 2 კორინთელებიშ 1:3, 4 გეგშუკითხ, სოდეთ ჭარ: „გაჭირებაშ გურშა მიმაღალარ დო გურიშ ემაქექაფალ მუმა . . . ირნერ გაჭირებას გურშა ემქექუანა“. თე სიტყვეფქ თეშ იმოქმედ თე კოჩწკუმა, ნამდა ქოთხუ ჩქინ ჯიმას მაჟიაშა ხოლო წუკითხირუდკო თე მუხლი. თიქ თქუ, ნამდა მუს დო მუშ ოსურს მანგარო ოსაჭირდეს გურიშ ელაკინა დო ბიბლიათ უმოსო დეინტერეს. მსახურებას ღორონთიშ სიტყვაშ გიმორნაფა დასურო მოქმედენს ხალხწკუმა? (საქ. 19:20).
მუჟამსით სცენაშე ოგურუანთ
11. მუ პასუხიშმგებლობა უღნა თინეფს, მით სცენაშე ოგურუანა?
11 არძას მოხიოლნა კრებაშ შეხვალამეფშა დო კონგრესეფშა გილულა. თეშ მთავარ მიზეზ იეჰოვაშ თაყვანიშცემა რე. თეს გეძინელ, თაქ ნაგურეფუს ჩქინო ჯგირობუა მოუღ. სცენაშე ოგურუანან თი ჯიმალეფს დიდ პატი დო თეწკუმა ართო, დიდ პაუხიშმგებლობა ხოლო უღნა (იაკ. 3:1). თინეფ დარწმუნებულ ოკო რდან, მუდგას ოგურუანან თინა, ღორონთიშ სიტყვაშა რე გერსხილ. სცენაშე ქაგურუანთ-და, მუჭო შეილებნა ღორონთიშ სიტყვაშ გიმორნაფა თეშ, ნამდა ქიმოქმედას აუდიტორიაწკუმა?
12. მუ ოკო აკეთას გიშმაულარქ, ნამდა თიშ მოხსენებას მთავარ ადგილ უკებდას ბიბლიას?
12 თქვან მოხსენებას მთავარ ადგილ ბიბლიას ოკო უკინებდას (იოან. 7:16). ათეშენ ჯგირ იჸუაფ დეფიქრათ, ნამდა აუდიტორიაშ ყურადღებაქ ბიბლიაშა გეგნორთას დო ვართ ხოლო მოჸუნაფილ შემთხვევეფშა, მაგალითეფშა ვარდა მოსხენებას გინოჩამაშ სტილშა. თეს გეძინელ, ვაგგოჭყორდან, ნამდა ხვალე მუსხირენ მუხლიშ ეშაკითხირ ვა ნიშნენს ბიბლიაშე გურაფას. ბრელ მუხლიშ კითხირით შილებე ნამთინ მუხლიშ დამახსოვრებაქ ვეშიალებუან. ათეშენ გურგედვალირო გეგშაგორით მთავარ მუხლეფ, დრო გეგმურთით თინეფიშ კითხირს, ენწყუმას დო ქაძირეთ, მუჭო შეულებნა თე ირფელიშ გიმორნაფა ცხოვრებას (ნეემ. 8:8). მუჟამსით მოხსენება გეგმაშა რე გერსხილინ, ჯგირო ქიდიგურეთ გეგმა დო გეგმირკვით თექ მოჩამილ მუხლეფი. ქეშეცადით, ქიგეგათ, მუჭო ოკავშირ ართიანს გეგმას მოჩამილ წინადადებეფ დო მოჸუნაფილ მუხლეფი. მოსხენებაშ მთავარ აზრეფიშ ოგურაფალო, გეგმირინეთ ოკითხეთ გიშართილ მუხლეფი (შეილებნა ქოძირათ პრაქტიკულ რჩევეფი, ნამუთ მოჩამილ რე წიგნის, „იგურე თეოკრატიულ მსახურებაშ სკოლას“, დუდეფი 21—23). მუთ არძაშ უმოს მთავარ რენ, ქოთხით იეჰოვას, ქიმგეხვარან გეგნოჩათ თიშ სიტყვას მოჩამილ ძვირფას აზრეფი (წეკითხით ეზრა 7:10; იგავები 3:13, 14). *
13. ა) მუჭო მეხვარ ართ დას კრებას შეხვალამას კითხირებულ ბიბლიურ მუხლიქ? ბ) მუჭო მოქმედენს თქვანწკუმა კრებაშ შეხვალამას კითხირებულ ბიბლიურ მუხლეფი?
13 კრებაშ შეხვალამას ბიბლიურ მუხლეფიშ გიმორნაფაქ მანგარო იმოქმედ ართ დაწკუმა, ნამუთ ავსტრალიას ცხოვრენს. თის რთულ ბაღანობა უღუდ, მარა დეინტერეს ბიბლიაშ გურაფათ დო დუდ მეუძღვინ იეჰოვას. თეშ უმკუჯინუო, თის იშენით უჭირდ თიშ დაჯერება, ნამდა იეჰოვას უჸორდ თინა, მარა დროხანიშ უკულ ქიდეჯერ თენა. მუქ მეხვარ თის? თიქ დეფიქრ კრებაშ ართ-ართ შეხვალამას კითხირებულ მუხლშე დო დუკავშირ თინა შხვა ბიბლიურ მუხლეფს. * თქვა ხოლო გიღდესო შემთხვევა, მუჟამსით კრებაშ შეხვალამეფს ვარდა კონგრესეფს კითხირებულ ბიბლიურ მუხლეფქ თქვანწკუმა იმოქმედ? (ნეემ. 8:12).
14. მუჭო შემლებნა ვოძირათ, ნამდა მიჸორა დო ვაფასენთ იეჰოვაშ სიტყვას?
14 იეჰოვაშ მარდულეფ ოკო ვორდათ თიშენ, ნამდა მუშ სიტყვა, ბიბლია მუჩეს! ღორონთიქ შეასრულ მუშ დუნაპირებ დო თიშ სიტყვაქ ამდღარ დღაშახ ქიდოსკიდ (1 პეტ. 1:24, 25). ათეშენ, ჯგირ იჸუაფ რეგულარულო იპკითხათ ღორონთიშ სიტყვა, გეგმიბრინუათ თექ მოჩამილ რჩევეფ დო შხვეფს ხოლო ქიმვეხვარათ თეშ კეთებას. თეშნერო ქუვოძირანთ, ნამდა მიჸორა დო ვაფასენთ ხვალე ღორონთიშ სიტყვას ვარინ, მუთ არძაშ უმოს მთავარ რენ, თიშ ავტორს, იეჰოვა ღორონც.
^ აბზ. 2 1 კორ. 6:9—11: 9 მუჭო?! ვაიჩქუნანო, ნამდა უმართლოეფს ღორონთიშ სამეფო ვა დაკვირდებენა? დუდ ვედეღორათ: ვართ მეძავეფ, ვართ კერპთაყვანიშმცემელეფ, ვართ მრუშეფ, ვართ თი კოჩეფ, მიდგას გარყვნილებაშო გიმირინუანა, ვართ მამათმავლეფ,10 ვართ მახირალეფ, ვართ ჰარამეფ, ვართ შუმილიეფ, ვართ მალანძღარეფ დო ვართ მიდმაღალარეფ ვედეკვირდენა ღორონთიშ სამეფოს. 11 თეცალ რდუ თქვანდე ნამთინე, მარა გესუფთით, გეთავისუფალით დო მართალეფო რეთ მერჩქინელ ჩქინ უფალ იესო ქრისტეშ სახელით დო ჩქინ ღორონთიშ შურით.
^ აბზ. 4 ეფეს. 5:15, 16: 15 ჯგირო ქიდეკვირით, ნამდა უგუნურეფცალო ვარინ, ბრძენეფცალო გილართათ, 16 ჯგირო გეგმირინეთ თქვან დრო, მუშენდა დღალეფ უბადო რე.
^ აბზ. 8 ლუკ. 24:32: თინეფქ ართიანს უწუეს: „გურ ვა მაფდესო გოღვიღვინაფილ, მუჟამს თინა შარას მირაგადუდეს დო წმინდა წერილეფს ემწყუნდესინ?“.
^ აბზ. 12 ეზრ. 7:10: ეზრაქ გურ მამზად იეჰოვაშ კანონს რჩევაშ ოგორალო, თიშ შეიოსრულებელო დო ისრაელს წესიშ დო სამართალიშ ოგურაფალო. იგავ. 3:13, 14: 13 ბედნერ რე კოჩი, ნამუთიქ სიბრძნე ქოძირ დო კოჩი, ნამუთიქ ჭკუა ქიშუ, 14 მუშენდა სიბრძნეშ შიბა ვარჩხილიშ შიბაშ უჯგუშ რე დო ოქროშე უჯგუშ ნაშიბ რე.
^ აბზ. 13 ქოძირით ჩარჩო „მნიშვნელოვან მომენტი“.