1. მუშენ რენა იეჰოვაშ თაყვანიშმცემლეფ ბედნერეფ? (ქოძირით სურათ მა-17 გვერდის).

იეჰოვაშ მოწმეეფ დასურო ბედნერ კათა რენა. თინეფიშ კრებეფს, კონგრესეფს დო მეგობრულ შეხვალამეფს ირიათო ხიოლ დო სასიამოვნო გარემო რე. მუშენ რენა თინეფ ბედნერეფ? თეშ მთავარ მიზეზ თინა რე, ნამდა იჩინენა დო ომსახურნა იეჰოვას, „ბედნერ ღორონც“. თეს გეძინელ, ოცადნა მიაჸუნან თიშ მაგალითის (1 ტიმ. 1:11; ფსალმ. 16:11). იეჰოვაშე მოურს ბედნერობა, ათეშენ თის ოკო ჩქი ხოლო ბედნერეფ ვორდათ დო ხიოლიშ ბრელ მიზეზის მარზენა (კან. 12:7; ეკლ. 3:12, 13).

2, 3. ა) მუ რე ბედნერობა? ბ) მუშენ ვა რე ადვილ, ვორდათ ბედნერეფ?

² მუშ რაგად შილებე თქვანდე? ქორეთო ბედნერ? მუჭო შეილებნა ხოლო უმოს ბედნერო იგინათ დუდ? ბედნერობა ნიშნენს, მუჟამსით დუც ჯგირო გინაფლენქ, კმაყოფილ რექ ცხოვრებათ დო ხიოლს ვადინუანქ. ბიბლია იჩიებ, ნამდა ნამდვილ ბედნერეფ თინეფ რენა, მიდგას იეჰოვაწკუმა ჯგირ ურთიერთობა უღჷ. მარა ამდღარ დროს ადვილ ვა რე, ვორდათ ბედნერეფ. მუშენ?

³ სტრესულ სიტუაციეფიშ დროს, მუნერით რე საჸოროფო პიროვნებაშ ღურა ვარდა გარიცხვა, ოჯახიშ აკორღვაფა დო სამუშაშ დინაფა, შილებე მემდინან ხიოლქ. უბედურობაშ მიზეზიქ შილებე  ოჯახურ პრობლემეფქ, სამუშაშ ვარდა სკოლას გეძიცაქ, რწმენაშ გურშენ თხოზინქ ვარდა დაპატიმრებაქ იჸუას. უბედურო შილებე დუდ თიმწკუმა ხოლო იბგინათ, მუჟამსით ჯამრთელობაშ პრობლემეფ, ქრონიკულ ლახალა ვარდა დეპრესია მიღნა. მარა ვაგმოჭყორდან, ნამდა იესო ქრისტე, ნამუთ „ბედნერ დო ხვალე ართ მეფე“ რე, გურშა ელუკინანდჷ ხალხის (1 ტიმ. 6:15; მათ. 11:28—30). გვალას ქადაქებაშ დროს იესოქ შხვადოშხვა თვისება მიშინუ, ნამუთ გურიშ გუმატახალ სიტუაციეფიშ უმკუჯინუო, ხეს უნწყუნს ჩქინ ბედნერობას.

4, 5. მუჭო შემლებნა ვორდათ ბედნერეფ დო მუ ოკო ვაკეთათ, ნამდა ვა ვოდინუათ თინა?

⁴ პირველ თვისება, ნამდგაშა იესოქ ყურადღება გამახვილ, განსაკუთრებულო მნიშვნელოვან რე: „ბედნერეფ რენა სულიერს მოჸუმენაფილეფ, მუშენდა თინეფიშ რე ზეციერ სამეფო“ (მათ. 5:3). მუჟამსით სულიერ საზრდოს ბღებულენთ დო პირველ ადგილშა ღორონთიშ თაყვანიშცემა გემრენა, თეთ ვოძირანთ, ნამდა სულიერ საკითხეფ მოინტერესნა. თენა მოხვარნა, უმოს ბედნერეფ ვორდათ. ჩქი თიშ რწმენა ხოლო მემანგარებნა, ნამდა ღორონთ მალას მუშ დუნაპირებუს შეასრულენს. „მშვენიერ იმენდი“, ნამუშ გურშენ ბიბლია მირაგადნა, მიმეხვარებნა ბოლოშა მიფთვინათ პრობლემეფიშ დროს (ტიტ. 2:13).

⁵ ქუმოკონა ბედნერეფ ქუვორდათ-და, მნიშვნელოვან რე ჯგირ ურთიერთობა მიღდან იეჰოვაწკუმა. მოციქულ პავლექ ღორონთიშ შთაგონებათ ჭარ: „ირიათო იხარით უფალს. ხოლო ართშა გირაგადუთ: იხარით“ (ფილ. 4:4). იეჰოვაწკუმა ხოლოშიან ურთიერთობა მაღვენუნა, მუჭამსით მიბღენთ თიშე სიბრძნეს. ბიბლია იჩიებ: „ბედნერ რე კოჩ, ნამუთიქ დოგორ სიბრძნე დო კოჩ, ნამუთ გონიერ რე. სიცოცხლეშ ჯა რე თინეფშო, მით ხეს მეკიდუნს თის, დო ბედნერ რე თინა, მიდგას მანგარო მეუკიდ თიშა ხე“ (იგავ. 3:13, 18).

6. ხოლო მუშა რე დამოკიდებულ ჩქინ ბედნერობა?

⁶ ირიათო ბედნერეფ ქუვორდათინ, მნიშვნელოვან რე, გეგმიბრინუათ ბიბლიაშე ნაგურეფ, მუთ ჯგირო იძირე იესოშ სიტყვეფშე: „თე ირფელ ქოიჩქუნან-და, ბედნერეფ რეთ, მუჟამსით თაშ იქციებუთ“ (იოან. 13:17; წეკითხით იაკობი 1:25). * თეშ კეთება აუცილებერ რე, დეპკმაყოფილათ სულიერ მოთხოვნილება დო ვორდათ ბედნერეფ. მარა მუჭო შემლებნა ვორდათ ბედნერეფ, მუჟამსით თესხი უბედრობა ხვადუ? ქობძიართ, ხოლო მუ თქუ იესოქ გვალას ქადაქებაშ დროს.

7. მუჭო შილებე ბედნერეფ რდან თინეფ, მით გლოვენა?

⁷ „ბედნერეფ რენა თინეფ, მით გლოვენა, მუშენდა გურშა ელაკინუნა“ (მათ. 5:4). ნამთინეს შილებე კითხვაქ გურჩქინდას: მუჭო რე შეიოლებერ ბედნერ რდან თინეფ, მით გლოვენა? იესო მუშ სიტყვეფს ვა გულსიხმენდჷ არძას, მით გლოვენს. ამდღა ბრელ, მით ღორონც ვეჩინენსინ, გლოვენს, მუშენდა პრობლემეფს შეხვადუნა თე „ბოლო დღალეფს“, ნამუთ ძნელ გინაღალარ რე (2 ტიმ. 3:1). მარა თეცალ კათა ხვალე მუნეფიშ დუდშე დო პრობლემეფშე ფიქრენა, ათეშენ ვა უღნა ღორონთწკუმა ურთიერთობა და ბედნერეფ ხოლო ვა რენა. თაშ ნამდა, იესო მუშ სიტყვეფს თი კათას გულისხმენდჷ, მით ოცად სულიერ მოთხოვნილებაშ დაკმაყოფილებას. თინეფ გლოვენა, მუშენდა ორწყენა, ნამდა ხალხიშ უმენტაშის ვაკო ღორონთწკუმა ურთიერთობა. თინეფ აღიარენა, ნამდა ცოდამეფ რენა დო უჩქნა ამდღარ გურიშ გუმატახალ მდგომარეობაშ მიზეზი. იეჰოვას არჩქილე თინეფიშ, გურშა ელუკინანს დო ოხვარ, რდან  ბედნერეფ მუშ სიტყვაშ საშვალებათ (წეკითხით ეზეკიელი 5:11; 9:4). *

8. მუჭო უნწყუნს ხეს ლიბ ხასიათ ბედნერობას?

⁸ „ბედნერეფ რენა ლიბ ხასიათიშ კათა, მუშენდა დემკვირდენა დედამიწას“ (მათ. 5:5). მუჭო უნწყუნს ხეს ლიბ ხასიათ ბედნერობას? ჭეშმარიტებაშ გაგებაშ უკულ პიროვნება თირანს მუშ ცხოვრებას. ართ დროს, შილებე თინეფ უხეშეფ დო აგრესიულეფ რდესკო. მარა ახალ პიროვნებათ თირუაშ უკულ, გიმირჩქინანა თიცალ თვისებეფს, მუნერით რე გაჭირებაშ გურშა მეღალა, ჯგირიშ კეთება, თანდაბლობა, ლიბ ხასიათი დო მოთვინება (კოლ. 3:9—12). შედეგო, უღნა მშვიდობა, შხვეფწკუმა ჯგირ ურთიერთობა დო რენა ბედნერეფ. ღორონთიშ სიტყვა თეცალ კათას ოპირ, ნამდა დემკვირდენა დედამიწას (ფსალმ. 37:8—10, 29).

9. ა) მუ გაგებათ „დემკვირდენა დედამიწას“ ლიბ ხასიათიშ კათა? ბ) მუშენ შილებე რდან ბედნერეფ „სიმართლეს მოშკირენაფილეფ დო მოჸუმენაფილეფ“?

⁹ მუს გულისხმენდჷ იესო, მუჟამსით თქუ, ნამდა ლიბ ხასიათიშ კათა დემკვირდენა დედამიწას? იესოშ შურით ცხებულ მოწაფეეფ დემკვირდენა დედამიწას, მუჟამსით ქიდიჭყანა მეფეეფო დო მღვდელეფო მსახურებას (გამოცხ. 20:6). მილიონობით კათა, მიდგას ვა უღჷ ზეციურ მოწოდება, დემკვირდენა დედამიწას თი გაგებათ, ნამდა იცხოვრენა თექ მარადიულო, ქიმიოჭირინუანა სრულყოფილებას, აღვენუნა მშვიდობა დო იჸუაფნა ბედნერეფ. იესოქ თინეფიშ გურშენ თქუ: „ბედნერეფ რენა სიმართლეს მოშკირენაფილეფ დო მოჸუმენაფილეფ“ (მათ. 5:6). ახალ ქვეყნიერებას თეცალ კათა ბოლოშა დეკმაყოფილენს სულიერ შკირენას დო ჸუმენას (2 პეტ. 3:13). მუჟამსით ღორონთ უბადობას საბოლათ მოსპუნს, თინეფ დღას ვეწუხენა თი უსამართლობაშე, ნამუთ ამდღა არსებენს (ფსალმ. 37:17).

10. მუს ნიშნენს ჭყოლოფაშ გიმორჩქინა?

¹⁰ „ბედნერეფ რენა თინეფ, მით ჭყოლოფას გიმირჩქინანა, მუშენდა თინეფს ხოლო ქიჭყოლოფუანა“ (მათ. 5:7). ებრაულ სიტყვა, ნამუთ ჭყოლოფათ რე გინოთარგმნილ, ნიშნენს გურშა ელაკინას დო გემუანო მოქციებას თიშა, მით იტანჯებ. ჭყოლოფაშ გიმორჩქინა უბრალო ემოციაშე მეტის ნიშნენს. ბიბლია მოგურუანა, ნამდა ჭყოლოფაშ გიმორჩქინა შხვეფშა პრაქტიკულ მოხვარას ხოლო ნიშნენს.

11. მუს ბგურაფლენთ ჭყოლოფაშ გურშენ იესოშ მოჸუნაფილ იგავშე?

¹¹ წეკითხით ლუკა 10:30—37. * იესოშ მოჸუნაფილ სამარიელიშ იგავშე ჯგირო იძირე, მუს ნიშნენს ჭყოლოფაშ გიმორჩქინა. სამარიელს მანგარო ეცოდ გაჭირებას ინოლაფირ კოჩიქ, ათეშენ გეგნოჭყვიდ თიშ მოხვარა. თე იგავიშ მოჸუნაფაშ უკულ იესოქ თქუ: „მეუ დო სი ხოლო თაშ მიქცი“. თაშ ნამდა, ჩქინ დუც ოკო ქოპკითხათ: მა ხოლო ქიფქციებუქო თაშ? ქიგმიფრჩქინანქო ჭყოლოფას, მუჟამსით შხვეფს უჭირა? შემლებუნო უმოს გუვაკეთე, ნამდა ქიმვეხვარე თინეფს? მაგალთო, ქუვოხვარუქო ხანშამიშულირეფს, ქომონჯღურელეფს ვარდა თი ბაღანეფს, მიდგაშ მშობლეფ ვა რენა იეჰოვაშ მოწმეეფ? ქელვუკინანქო გურშა თინეფს, მიდგას გურ აფჷ გოტახილ? (1 თეს. 5:14; იაკ. 1:27).

12. მუჭო უნწყუნს ხეს ჭყოლოფაშ გიმორჩქინა ბედნერობას?

 ¹² მუჭო მოუღ ჭყოლოფაშ გიმორჩქინას ბედნერობა? ჭყოლოფაშ გიმორჩქინათ შხვეფს ჯგირს ვუკეთენთ დო თეს ჩქინო ბედნერობა მოუღ. თეს გეძინელ, მიჩქნა, ნამდა თეთ იეჰოვას ვუხარენთ გურს (საქ. 20:35; წეკითხით ებრაელები 13:16). * თი კოჩშე, მით ჭყოლოფას გიმირჩქინანს, დავით მეფექ თქუ: „იეჰოვა დოთხილანს თის დო სიცოცხლეს ქეშუნარჩუნენს. ბედნერ ქიგიადვალუ თის დედამიწას“ (ფსალმ. 41:1, 2). ჭყოლოფას გეგმიფრჩქინანთ დო შხვეფს გურშა ელვუკინანთ-და, იეჰოვა ხოლო გეგმირჩქინანს ჩქინწკუმა ჭყოლოფას დო ირიათო ბედნერეფ იპჸით (იაკ. 2:13).

13, 14. მუ კავშირ რე ჯგირ გურ დო ბედნერობაშ შქას?

¹³ იესოქ თქუ: „ბედნერ იჸუაფნა ჯგირ გურიშ კათა, მუშენდა თინეფ ღორონც ქოძირნა“ (მათ. 5:8). ჯგირ გურ ქომღუდანინ, საჭირო რე, ჩქინ ფიქრეფ დო კორნებეფ ხოლო სუფთა რდას. თეშ კეთება მნიშვნელოვან რე, მუშენდა მოკონა იეჰოვაქ ჩქინ თაყვანიშცემა მიწონუას (წეკითხით 2 კორინთელები 4:2; * 1 ტიმ. 1:5).

¹⁴ თინეფს, მიდგას ჯგირ გურ უღნა, შეულებნა ბედნერო ემსახურან იეჰოვას, ნამუთ იჩიებ: „ბედნერეფ რენა თინეფ, ნამუთიქ გინახვეს მუნეფიშ გინძე მიკაქუნალ“ (გამოცხ. 22:14). ცხებულ ქრისტიანეფქ მუნეფიშ მიკაქუნალ თი გაგებათ „გინახვეს“, ნამდა სუფთეფ რენა იეჰოვაშ თოლს. თინეფ ჯილდოთ მიღენა უკვდავებას დო ზეცას მარადიულო ბედნერეფ იჸუაფნა. თეს გეძინელ, შხვა ქრისტიანეფ ხოლო, ნამუსით დედამიწას ცხოვრებაშ იმენდ უღნან, ღორონთიშ მეგობარეფ იჸუაფნა. ბიბლია იჩიებ, ნამდა „თინეფქ გინახვეს, მუნეფიშ გინძე მიკაქუნალ დო დარჩიალეს კირიბიშ ზისხირით“ (გამოცხ. 7:9, 13, 14).

15, 16. მუ გაგებათ ძირუნს ღორონც ჯგირ გურიშ კათა?

¹⁵ მუ გაგებათ ძირნა ჯგირ გურიშ კათა ღორონც, მუჟამსით ბიბლიას ჭარ, ნამდა თიშ ძირაფა ვა რე შეიოლებერ? (გამ. 33:20). ბერძნულ სიტყვა, ნამუთ ძირაფათ რე თარგმნილ, ნიშნენს გონებაშ თოლით ძირაფას, გაგებას დო ინონჭაფას. თი კათა, მით ღორონც გურიშ თოლეფით ორწყენ, დასურო იჩინენს თის დო აფასენს თიშ თვისებეფს (ეფეს. 1:18). იესო სრულყოფილო გიმირჩქინანდჷ ღორონთიშ თვისებეფს დო ათეშენ შეულებუდ თქუკო: „მა ბძირუნ თიქ, მუმა ხოლო ძირჷ“ (იოან. 14:7—9).

¹⁶ ღორონთიშ თაყვანიშმცემელეფს შეულებნა დეკვირან თის, მუდგას თინა მუნეფიშ საჯგირობუოთ ორთჷ დო თეგვარო უჯგუშო ქინანჭან ღორონთიშ თვისებეფს (იობ. 42:5). თეს გეძინელ, თინეფ გურიშ თოლით ორწყენა,  თი დიდებულ კურთხევეფს, ნამუსით ღორონთ მუშ ართგურ დო ჯგირ გურიშ მსახურეფს მეჩანს. მუშო ოკო რაგად, მუჟამსით ცხებულ ქრისტიანეფ ზეციურ ჯილდოს მიღენან, პირდაპირ გაგებათ ქოძირნა ღორონც (1 იოან. 3:2).

17. მუჭო უნწყუნს ხეს ბედნერობას მშვიდობაშა ხეშ შენწყუალა?

¹⁷ იესოქ თქუ: „ბედნერეფ რენა მშვიდობაშ ხეშ შემანწყუალეფ“ (მათ. 5:9). თინეფ, მით მშვიდობაშა ხეშ შენწყუალას ოცადნან, დასურო ბედნერეფ იჸუაფნა. მოწაფე იაკობიქ ჭარჷ: „სიმართლეშ ნაყოფი მშვიდობიან პირობეფს ითასუ, თინეფშო მით მშვიდობას უნწყუნს ხეს“ (იაკ. 3:18). მუჟამსით მიდგაინწკუმა კრებას ვარდა ოჯახის დაძაბულ ურთიერთობა მიღნან, შემლებნა ღორონც ფთხუათ, ქიმმეხვარან მშვიდობაშა ხეშ შენწყუალას. შედეგო, იეჰოვაშ წმინდა შურ ქიმმეხვარებნა ქრისტიანულ თვისებეფიშ გიმორჩქინას დო ბედნერეფ იპჸუაფუთ. იესოქ ქუმოძირეს, მუსხით მნიშვნელოვან რე, ვეცადათ ხე შევუნწყუათ მშვიდობას. თიქ თქუ: „ძღვინს ქიმიღანქ სამსხვერპლოშა დო თექ ქუგგაშინე, ნამდა სქან ჯიმას მუდგარენ უღჷ სქან წინააღმდეგ-და, ქიდიტე სქან ძღვინ სამსხვერპლოწკუმა, მეუ, დიო სქან ჯიმას გერიგ დო მუჟამს დირთუქინ, უკულ შეწირ სქან ძღვინ“ (მათ. 5:23, 24).

18, 19. მუშენ შეულებნა ქრისტიანეფს რდან გახარებულეფ თიმწკუმა ხოლო, მუჟამსით თხოზინს შეხვადნა?

¹⁸ ბიბლიას პკითხულენთ: „ბედნერეფ რეთ, მუჟამსით რლანძღუნა, რთხოზუნა დო ჩქიმ გურშენ არძანერ უბადობას ეკკაწამენა“. მუს გულისხმენდჷ იესო? თინა ეთმონწყუნს: „გოხიოლდან, მუშენდა ზეცას დიდ ჯილდო გელნა; თქვანშახ ცხოვრენდესინ თი წინასწარმეტყველეფს ხოლო თაშ თხოზდეს“ (მათ. 5:11, 12). მუჟამსით მოციქულეფ გოლახეს დო ქადაქება აუკრძალესინ, თინეფქ „მიდართეს სინედრიონშე დო ოხიოლდეს“. მუშო ოკო რაგად, მოციქულეფს ლახუა ვარინ, თინა ოხიოლდეს, „ნამდა თიშ სახელიშ გურშენ შეურაცხყოფაშ ღირსეფქ იჸუეს“ (საქ. 5:41).

¹⁹ ამდღა ხოლო იეჰოვაშ ხალხ ხიოლით ურზჷ თი წინააღმდეგობეფს დო სირთულეეფს, ნამუსით იესოშ სახელიშ გურშენ შეხვადნა (წეკითხით იაკობი 1:2—4). * მართალ რე, მოციქულეფცალო ჩქი ხოლო ვა მოხიოლნა, მუჟამსით სირთულეეფს შეფხვადუთ, მარა იეჰოვაშ ართგურეფ ქუდოფსკიდუთ-და, თის შეულებ მიმეხვარან წინააღმდეგობეფიშ გარზებას. მაგალთო, 1944 წანაშ არგუსოს, მთავრობაქ ჯიმა ჰენრიკ დორნიკ მუშ ჯიმაწკუმა ართო საკონცენტრაციო ბანაკშა გოუტუ. მარა მოწინააღმდეგეეფ იჩიებდეს: „თინეფშა მუთუნიშ კეთება ვადგანძალებე. თინეფშა ტანჯებას ხიოლ მოუღჷ“. ჯიმა დორნიკ ეთმონწყუნს: „მუშო ოკო რაგად, ტანჯებაშ სურვილ ვამღუდ, მარა იეჰოვაშ ართგურობაშ გურშენ თე ირფელიშ გინოღალაქ ხიოლ მომიღ . . . მთელ გურით ლოცვაქ იეჰოვაწკუმა დუმაახლოვ დო თინა ჩქიმო საიმენდო დამხმარე რდუ“.

20. მუშენ მოხიოლნა „ბედნერ ღორონთიშ“ მსახურება?

²⁰ მუჟამსით ღორონთიშ მოწონება მიღნა, შემლებნა ბედნერეფ ვორდათ თხოზინიშ, ოჯახშე წინააღმდეგობაშ, ლახალაშ ვარდა სირჩინუეშ უმკუჯინუო (1 ტიმ. 1:11). თეს გეძინელ, შემლებნა ბედნერეფ თი კურთხევეფიშ გურშენ ხოლო ვორდათ, ნამუსით მოპირნა ღორონთ, ნამდგაქ „შეიოლებერ ვა რე ტყურა ქოთქუას“ (ტიტ. 1:2). მუჟამსით იეჰოვა მუშ ნარაგადის შეასრულენს, ამდღარ პრობლემეფ საერთოთ ვაგმაშინენა. სამოთხეს თიშნერ კურთხევეფ მელნა, ნამუშ ბოლოშა წარმოდგენა რთულ რე. ჩქი დასურო მანგარ ბედნერეფ იპჸუაფუთ დო მუჭოთ ბიბლიას ჭარუნ, გეფხარენთ „დიდ მშვიდობათ“ (ფსალმ. 37:11).