1. მუ მნიშვნელოვან საკითხშე ეჩიებუდ იესო მუშ მოწაფეეფს ღურაშ წოხოლენ სერს?

ღურაშ წოხოლენ სერს იესოქ მოწაფეეფწკუმა ჩიებაშ დროს, სოდგარენ 30-შა მიშინუ ჸოროფა. თიქ განსაკუთრებულ ყურადღება მიაქცუ თის, ნამდა მუშ მოწაფეეფს ართიან ოკო უჸორდესკო (იოან. 15:12, 17). თინეფ შქას ჸოროფა თიცალ არგამა იჸუაფუდ, ნამდა შხვეფ ქიმეხვადუდეს, მი რდუ სინამდვილეს იესოშ მიმაჸუნალ (იოან. 13:34, 35). იესო იჩიებუდ დუდგინოდვალირ ჸოროფაშ გიმორჩქინაშე, ნამუთ გრძნობაშე უმოს რე. თიქ თქუ: „ვა არსებენს თიშე უმოს დიდ ჸოროფა, მუჟამსით ნამთინე დუც დოდვანს ოღურალო მეგობრეფშო. თქვა ჩქიმ მეგობრეფ რეთ, მუჟამსით ჩქიმ მცნებეფს იცვენთ“ (იოან. 15:13, 14).

2. ა) მუთ ჩინებულენა ამდღა ღორონთიშ მსახურეფს? ბ) მუ კითხვეფს მიაჩამუ პასუხ თე სტატიას?

² იეჰოვაშ მოწმეეფ გიმირჩქინანა ნამდვილ, დუდგინოდვალირ ჸოროფას დო ართობას მუთ ოძირანს, ნამდა თინეფ ღორონთიშ ხალხ რენა (1 იოან. 3:10, 11). ჩქი მარდულეფ ვორეთ, ნამდა იეჰოვაშ მსახურეფ ეროვნებაშ, ნინაშ დო ულირ ცხოვრებაშ უმკუჯინუო,  გიმირჩქინანა თიცალ ჸოროფას, მუნერით ქრისტეს უღუდ. შილებე თეცალ კითხვეფქ გომრჩქინდან: „მუშენ ოკო გიმიფრჩქინათ ჸოროფა, განსაკუთრებულო ამდღა? მუჭო ელამკინანა იეჰოვა დო იესო გურშა ჸოროფათ? მუჭო შემლებნა თითოულქ გიმიფრჩქინათ თიცალ ჸოროფა, ნამუთ „გურშა ელუკინანს?“ (1 კორ. 8:1).

3. მუჭო მოქმედენს ამდღანერ გაჭირებათ ეფშა ცხოვრება ხალხწკუმა?

³ ამდღა ცხოვრება გაჭირებათ დო ტანჯებათ რე ეფშა (ფსალმ. 90:10; 2 ტიმ. 3:1—5). ათეშენ ბრელ პიროვნება ემოციურ სტრესიშ თუდო რე დო ფიქრენს, ნამდა ვა ღირჷ ცხოვრებაშ გაგრძელება. ირ წანას 800 000-შე მეტ კოჩ იჸვილუნს დუც — ირ 40 წამს სოდგარენ ართ კოჩ. სანარღოთ, ბრელ ქრისტიანქ ხოლო თაშ მიქცუ დო სიცოცხლე დუდიშ ჸვილუათ დასრულ.

4. ნამ ართგურ მსახურეფ ნატრენდეს ღურას?

⁴ ბიბლიურ დროს ხოლო, ღორონთიშ ნამთინე ართგურ მსახურ თიცალ პრობლემეფ უღუდ, ნამდა ღურას ნატრენდჷ. მაგალთო, ჭუათ გამწარებულ იობიქ თქუ: „რინაქ გემეჯოგ. ვა მოკო ცხოვრება“ (იობ. 7:16; 14:13). იონა გურგოტახილ რდუ თი ირფელშე, მუდგაქ თიშ დავალებაშ შესრულებას მაჸუნ დო თქუ: „ქორთხინქ, იეჰოვა, მიდეღ ჩქიმდე ჩქიმ შურ, მუშენდა რინაშა ღურა მისხუნ“ (იონ. 4:3). ართშა ართგურ წინასწარმეტყველ ელია ხოლო თიცალ სტრესიშ თუდო რდუ, ნამდა ღურა ინატრჷ დო თქუ: „მეტ ვეშემლებ! მიდეღ ჩქიმდე ჩქიმ შურ“ (1 მეფ. 19:4). მარა იეჰოვა აფასენდჷ თე ართგურ მსახურეფს დო ვაკოდ თინეფიშ ღურა. თეცალ გრძნობეფიშ გიმორჩქინაშ გურშენ, ღორონთ ვა გარისხებე თინეფშე. თეშ გინაწონს თიქ ქიმეხვარ მუშ მსახურეფს, სიცოცხლეშ ხიოლქ დართესკო დო ჸოროფათ გურშა ელუკინ, ნამდა გუგრძელებდესკო ართგურო მსახურება.

5. მუშენ ოსაჭირნა და დო ჯიმალეფს ჩქინ ჸოროფა განსაკუთრებულო ამდღა?

⁵ შილებე ჩქინ და დო ჯიმალეფ გვალო თიცალ მდგომარეობას ვა რდან, ნამდა ღურას ნატრენდან, მარა თინეფ შხვადოშხვა სტრესულ სიტუაციეფს შეხვადუნა, ათეშენ გურშა ელაკინა ოსაჭირნა. ნამთინეს თხოზნა ვარდა გიაძიცენა. შხვეფ კრიტიკაშ ვარდა ჭორაობაშ მსხვერპლი რენა მუნეფიშ სამუშას. თეს გეძინელ, შილებე დამატებით საათეფს მუშენდან ვარდა ძნელ სამუშას ასრულენდან. ნამთინეს იეჰოვაშ მოწმე ვა რენ ფერ მეუღლე ოჯახის პრობლემას ურჩქინანს. თეცალ სირთულეეფიშ გურშენ, შილებე კრებას ბრელ ქრისტიან ფიზიკურო დო ემოციურო გინოშულადირ რდას. მის შეულებ მეხვარას თეცალ და დო ჯიმალეფს?

6. მუჭო ელუკინანს გურშა იეჰოვა მუშ მსახურეფს ჸოროფათ?

⁶ იეჰოვა არწმუნენს მუშ მსახურეფს, ნამდა უჸორს თინეფ. წერმიდგინით მუჭო ელუკინანდჷ გურშა ართგურ ისრაელეფს, იეჰოვაშ სიტყვეფიშ მორჩქილაფა: „ჩქიმ თოლს ძვირფას რექ, ათეშენ პატიცემულო ითვალუქ დო მა ხოლო ქოიჸოროფე . . . ვა გაშქურნას, მუშენდა სქანწკუმა ვორექ“ (ეს. 43:4, 5). მუჭოთ ართგურ მსახურს, სი შეილებ დარწმუნებულ რდე, ნამდა იეჰოვას მანგარო უჸორქ. * ღორონთიშ სიტყვა ჭეშმარიტ თაყვანიშმცემლეფშენ იჩიებ: „ძალიერ რე თინა დო გირსხენს. ხიოლით გეხარენს სქანით“ (სოფ. 3:16, 17).

7. მუ გაგებათ შემლებნა შევადარათ იეჰოვა მოჸოროფე დიდას? (ქოძირით სურათ მა-12გვერდის).

⁷ ვა უღჷ მნიშვნელობა, მუნერ პრობლემას შეხვადუნა იეჰოვაშ მსახურეფ, ღორონთ ოპირ, ნამდა გამანგარენს დო გურშა  ელუკინანს თინეფს. ბიბლიას პკითხულენთ: „დუგოდიარუანა დო ხეთ გილაიჸონანა, კართეშა ქეწოიხუნუანა. მუჭოთ დიდა ეუქექუანს გურშა მუშ ქომოლსქუას, მა ხოლო თეშ ეიქექუანთ გურშა“ (ეს. 66:12, 13). დეფიქრით, მუნერ უსაფრთხოდ გინაფლენს ბაღანა დუც, მუჟამსით დიდას ხეთ გილაჸუნს დო ულაჸაფ თის. თე მაგალითით იეჰოვა მოძირანა, ნამდა მანგარო უჸორს მუშ თაყვანიშმცემლეფ. ირიათო რჯერდან, იეჰოვაშო ძვირფას რეთ დო მანგარო გაფასენა (იერ. 31:3).

8, 9. მუჭო შეულებ იესოშ ჸოროფას ჩქინ გამანგარება?

⁸ ჭეშმარიტ ქრისტიანეფს ხოლო ართ მუდგარენ მარწმუნენა ღორონთიშ ჸოროფას. ბიბლია იეჰოვაშენ იჩიებ: „თეშ ქიჸოროფუ ქიანა, ნამდა ქიმეჩ მუშ ხვალეგუნაჭყეფ სქუა, მუშენდა მიდგას თინა წანს, ვა ღურას დო მარადიულ სიცოცხლე უღუდას“ (იოან. 3:16). მუშ სიცოცხლეშ დათმებათ, იესოქ ჩქინწკუმა დიდ ჸოროფა გიმირჩქინ დო თეთ ჯგირ მაგალით დომტუეს. ღორონთიშ სიტყვა მოპირნა, ნამდა მუთუნნერ გაჭირებას ვაცილებე, მუმაშორან იესოშ ჸოროფას (რომ. 8:35, 38, 39).

⁹ მინშა თიცალ პრობლემეფ მიღნა, ნამუთ ფიზიკურო დო ემოციურო გინობშულიდნა ვარდა იეჰოვაშ მსახურებას ხიოლს მიდმამღანა. ირიათო ქოფშუდან, ნამდა იესოს მანგარო ვუჸორთ დო ქომჩანა თიშ ძალას, გავურზათ სირთულეეფს (წეკითხით 2 კორინთელები 5:14, 15). * იესოშ ჸოროფა მამანგარენა დო მარზენა თიშ ძალას, დუდ ვა დობდვათ თიმწკუმა ხოლო, მუჟამსით გაჭირებას, თხოზინს ვარდა გურიშ გოტახუას შეფხვადუთ.

10, 11. მიშ პასუხიშმგებლობა რე გურგოტახილ ჯიმალეფიშ გურშა ელაკინა?

¹⁰ ართ-ართ საშვალება, ნამდგათ იეჰოვა გურშა ელამკინანა, ქრისტიანულ კრება რე. თითოულს შემლებნა იეჰოვაშ ჸოროფა თით გიმოფხანტათ, ნამდა მიჸორდან დო გურშა ელვუკინათ ჩქინ და დო ჯიმალეფს, ხვალე სულიერო ვარინ, ემოციურო ხოლო (1 იოან. 4:19—21). მოციქულ პავლექ ქრისტიანეფს ელუჩ: „გურშა ეუქექეთ დო გამანგარით ართიან, მუდგასით ქოთ ორთუთ“ (1 თეს. 5:11). კრებაშ არძა წევრის შეულებ მიაჸუნას იესოშ დო იეჰოვაშ მაგალითის და დო ჯიმალეფიშ  გურშა ელაკინათ დო გამანგარებათ (წეკითხით რომაელები 15:1, 2). *

¹¹ კრებას ნამთინეს შილებე ემოციურ პრობლემეფ უღდას დო ექიმიშ მოხვარაქ დესაჭირას (ლუკ. 5:31). უხუცესეფ დო კრებაშ წევრეფ ექიმეფ ვა რენა, მარა იშენით შეულებნა ქელუდირთან თეცალ და დო ჯიმალეფს. ბიბლია იჩიებ: „გურშა ელუკინით გურგოტახილეფს, ხუჯ ქუდუკინით სუსტეფს, მოუთვინით არძას“ (1 თეს. 5:14). არძა ქრისტიანქ ოკო მიღას შხვეფიშ გაჭირება გურშა დო გეგმირჩქინას მოთივნება, მუშენდა თეთ გურშა ელუკინანს გურგოტახილეფს. ქელუკინანთო გურშა შხვეფს? მუჭო შეილებნა ხოლო უმოსო ეუქექუათ შხვეფს გურშა?

12. მუჭო მეხვარ ართ დას კრებაშ წევრეფიშ გიმორჩქინელ ჸოროფაქ?

¹² მუჭო შეულებ ჩქინ გიმორჩქინელ ჸოროფას გურშა ელუკინას თინეფს, მიდგას დიდ პრობლემეფ უღჷ? ართ და, ნამუთ ევროპას ცხოვრენს, იჩიებ: „მინშა დუდიშ ჸვილუაშე ფიფქრენქ, მარა ჩქიმ კრებაქ მანგარო მოხვარ. თინეფქ ღურას გინმოტეს. და დო ჯიმალეფ ირიათო გურშა ელამკინანა დო ჸოროფათ მოქცუნა. მართალ რე, ბრელს ვა უჩქჷ, ნამდა დეპრესია მიღჷ, მარა მთელ კრება ელამრე. ართ ჩილ დო ქომონჯ მშობლეფცალ მაფჷ. თინეფ ჩქიმდე ზრუნენა დო პირდაპირ გაგებათ 24 სათის ჩქიმწკუმა რენა“. მართალ რე, ბრელს ვეშულებ თეცალ ელარნა, მარა არძას შემლებნა ქუვოძირათ, ნამდა მოკონა შურ დო გურით მივეხვარათ და დო ჯიმალეფს, მით ემოციურო იტანჯებ. *

13. მუშ კეთება რე მნიშვნელოვან, მუჟამსით შხვეფიშ გურშა ელაკინას ვოცადუთ?

¹³ ჯგირო ქუმურჩქილეთ (იაკ. 1:19). ყურადღებათ მორჩქილაფაშე ჸოროფა იძირე. შეილებნა ტაქტიან კითხვეფ ქუდუსვათ თანაქრისტიანს, ნამდგას ემოციურ პრობლემა უღჷ. თენა მიგეხვარებნა უმოსო ქინანჭათ თიშ გრძნობეფს. თეგვარო, შეგალებენა გურშა მიღათ თანამორწმუნეშ გაჭირება დო გამანგარათ თინა. თეს გეძინელ, სახეს ხოლო ოკო გიგოხედან, ნამდა შურ დო გურით გოინტერესნა თიშ მდგომარეობა. მოთვინება გეგმირჩქინით დო ბოლოშა ქაცალით რაგად, მუჟამსით დეტალურო გეჩიებნა მუშ მდგომარეობას. თენა თანაქრისტიანს ხოლო მეხვარებ ქიგენდან დო უმოსო ქუმოირჩქილუან, მუჟამსით ოცადუთ გურშა ელუკინათ თის. თქვან გიმორჩქინელ ჸოროფა თინეფს ელუკინანს გურშა.

14. მუშენ ოკო ევუჩილითუათ დუდ კრიტიკას?

¹⁴ დუდ ეუჩილითეთ კრიტიკას. მუჟამსით დეპრესია უღუნ ფერ პიროვნება ფიქრენს, ნამდა აკრიტიკენთინ, უფრაშო იგინანს დუც. თეს გეძინელ, თქვა ხოლო გაიჭირდუნა გურშა ელუკინათ თის. ბიბლია იჩიებ: „გურუგუჩამუო ჩიება ხამუშ გეშკუმალაცალ რე, ბრძენიშ ნინა ოსკილიდუანს“ (იგავ. 12:18). მართალ რე, გარძახ ვა მოკონა, ჩქინ სიტყვეფ „ხამუშ გეშკუმალაცალ“ რდას, მარა უდუფიქრებუო რაგადის ხოლო შეულებ შხვეფს გურ გუტახას. ქუმოკონა შხვეფს გურშა ელვუკინათ-და, თინეფიშ გაჭირება გურშა ოკო მიბღათ დო ჩქინ დუდ თინეფიშ ადგილს წერმიბდგინათ (მათ. 7:12).

15. ნამ საშვალებეფ მიმეხვარებნა ჸოროფათ ელვუკინათ შხვეფს გურშა?

¹⁵ გურშა ელუკინით შხვეფს ღორონთიშ სიტყვათ (წეკითხით რომაელები 15:4, 5). *  გასაკვირ ვა რე, ნამდა ბიბლია გურშა ემქექუანა, მუშენდა თინა თიცალ ღორონთიშ ნაჭარა რე, „ნამუთ მოთვინებას მარზენა დო გურშა ელამკინანა“. თეს გეძინელ, მიღნა ბიბლიაშ გურაფას მოხვარნან ფერ პუბლიკაციეფ (ქოძირით „საგუშაგო კოშკის პუბლიკაციების საძიებელი“, „“იეჰოვას მოწმეების საკვლევი სახელმძღვანელო“). თე საშვალებეფ მიმეხვარებნა დობგორათ გურიშ ემაქექაფალ აზრეფ დო გავურზათ პრობლემეფს. თე ირფელიშ ჭყოლოფათ შემალებენა და დო ჯიმალეფს სულიერ აზრეფ გეგნოფჩათ დო გურშა ელვუკინათ.

16. მუ თვისება ოკო გიმიფრჩქინათ, მუჟამსით დეპრესია უღუნ ფერ პიროვნებას ელვუკინანთ გურშა?

¹⁶ გეგმირჩქინით ლიბ ხასიათ. ბიბლია იეჰოვა ღორონთიშ გურშენ იჩიებ, ნამდა თინა „მოჭყოლოფე დო გურიშ ემაქექაფალ მუმა“ რე, ნამუსით მუშ მსახურეფიშ გაჭირება გურშა მეუღ (წეკითხით 2 კორინთელები 1:3—6; * ლუკ. 1:78; რომ. 15:13). პავლექ თე საკითხის ჯგირ მაგალით მუჩეს. თიქ თესალონიკელ ქრისტიანეფს მეჭარ: „გიფერუანდით, თეშ მუჭოთ მეძუძურ დიდა გალუაფ დუც მუშ სქუალეფს. სათუთ გრძნობეფ მიღნა თქვანწკუმა დო ათეშენ ხიოლით გინორჩით ხვალე სახიოლო ამბე ვარინ, ჩქინ შურეფ ხოლო, მუშენდა ქიმეჸოროფით“ (1 თეს. 2:7, 8). მუჟამსით ლიბ ხასიათის გიმიფრჩქინანთინ, ღორონთიქ შილებე ჩქინ საშვალებათ თიცალ პიროვნებაშ ლოცვას ქუპასუხას, მიდგას დეპრესია უღჷ.

17. მუ მიმეხვარებნა, ნამდა და დო ჯიმალეფს გურშა ელვუკინათ ჸოროფათ?

¹⁷ თქვან ჯიმალეფშე სრულყოფილებას ველდათ. ჩქინ და დო ჯიმალეფს გაწონასწორებულო ოკო ვუჯინედათ. თინეფშე სრულყოფილებას ქიველუთ-და, გურ გომტირხუნა (ეკლ. 7:21, 22). ირიათო ქოფშუდან, ნამდა იეჰოვა რეალურო აფასენს მუშ მსახურეფიშ მდგომარეობას. თიშ მაგალითის ქიმვაჸუნუთ-და, მზათ იპჸუაფუთ შხვეფიშ არასრულყოფილება მიფთვინათ (ეფეს. 4:2, 32). ჩქი ვა მოკონა და დო ჯიმალეფს ვოგინაფუათ, ნამდა მუთ საჭირო რენ თის ვართუნა. ჩქი მოკონა გურშა ელვუკინათ თინეფს დო თი ჯგირ საქმეეფ მიფშინუათ, ნამდგას ორთნა. შურ დო გურით ცქვაფა გურშა ელუკინანს თინეფს დო მეხვარებ, გეხარან იეჰოვაშ მსახურებას. წერმიდგინით, მუშმაჯგირა იჸუაფ, მუჟამსით თე ირფელს გუვაკეთენთ (გალ. 6:4).

18. მუშენ ოკო მოკოდან შხვეფიშ გურშა ელაკინა ჸოროფათ?

¹⁸ იეჰოვა დო იესო აფასენა მუნეფიშ ართგურ მსახურეფს (გალ. 2:20). ჩქი მთელ გურით მიჸორა და დო ჯიმალეფ დო მოკონა ჸოროფათ იბზრუნათ თინეფშო. ქუმოკონა შხვეფს გურშა ელვუკინათ-და, ოკო გეფთვალისწინათ ბიბლიურ რჩევა: „თიშე იმჭუათ, მუთ მშვიდობას დო ართიანიშ გურიშ ელაკინას ომსახურ“ (რომ. 14:19). შურ მოლნა თი დროშა, მუჟამსით სამოთხეს იფცხოვრენთ, სოდეთ ვეჸუაფ ლახალა, ჩხუპ, ღურა, თხოზინ, ოჯახურ პრობლემეფ დო შხვა გურიშ გოტახუაშ მიზეზეფ. თექ ანთას წანაშ ბოლოს კაცობრიობა სრულყოფილებას ქიმიოჭირნუანს. თინეფ, მით საბოლოო გამოცდას ჩაბარენან, ღორონთიშ სქუალეფ იჸუაფნა დო მიღენა „ღორონთიშ სქუალეფიშ დიდებულ თავისუფლებას“ (რომ. 8:21). თაშ ნამდა, მორთ, გეგმიფრჩქინათ ჸოროფა, ნამუთ გურშა ელმუკინანს დო ქიმვეხვარათ ართიანს თე სახიოლო კურთხევეფიშ მეჭირნაფას!