მუს ორთუთ, მუჟამსით დროშ გაგება გოკონა? ალბათ კიდალაშ საათის მიკაჯინეთ ვარდა ხეშა გიჯინეთ. მუჭო პასუხენთ, მუჟამსით მეგობარ დროს გოკითხნა? პასუხიშ მეჩამა შხვადოშხვანერო შილებე. მორთ, ქობძირათ მუჭო.

მაგალთო, ონდღეშ უკულ 1 საათ დო 30 წუთ რე მიკულირ. თე დროს, თი ქიანეფს, სოდეთ დროს 24 საათიან სისტემათ კოროცხნან, იჩიებნა, ნამდა ვითოსუმ საათ დო ეჩდოვით წუთ რე. მინ ადგილეფს თე დროს თქუანა, ნამდა ჟირიშ გვერდ რე. თენა ნიშნენს, ნამდა 2 საათშა 30 წუთ მეძჷ. დროშ რაგად თიშა რე დამოკიდებულ, სო ფცხოვრენთ დო მუნერ წეს რე გავრცელებურ ჩქინ მხარეს.

თინეფ, მით ბიბლიას კითხულენა, შილებე დეინტერესან, მუჭო კოროცხუნდეს ჯვეშო დროს. თეს შხვადოშხვა მეთოდით ორთუდეს. ებრაულ წერილეფ მიშინუანს „ოჭმარეს“, „ონდღეს“, „ნაონდღერს“ დო „ონჯუას“ (დაბ. 8:11; 19:27; 43:16; კან. 28:29; 1 მეფ. 18:26). მინშა დროს უმოსო აკონკრეტენდეს.

ბიბლიურ დროს რდეს ყარულეფ, მით განსაკუთრებით სერით რდეს საჭირო. იესოშ დაბადებაშახ საუკუნეეფით ადრე ისრაელეფქ სერ სუმ ნაწილო გორთეს, ნამუსით ყარულობაშ დროს უძახდეს (ფსალმ. 63:6). მსაჯულეფიშ 7:19-ს მოშინაფილ რე „შკა სერიშ ყარულობაშ დაჭყაფ“. იესოშ დროს ებრაელეფს მიშაღალირ აფდეს ბერძნეფიშ დო რომაელეფიშ დროშ ეკოროცხუაშ სისტემა დო სერს ოთხ ნაწილო რთუნდეს.

სახარებეფს მუსხირენშახ რე მოშინაფილ ყარულობაშ დრო. მაგალთო, „სერიშ მანთხა ყარულობაშ“ დრო რდუ, მუჟამსით იესოქ მერთ მოციქულეფშა, მით ნავს ინოხედეს (მათ. 14:25). ართ-ართ მაგალითის იესოქ თქუ: „ჸუდეშ მინჯეს ქოუჩქუდას, მახირალ ნამ ყარულობაშ დროს მაკითხანსინ, კურცხაშე იჸუაფ დო ჸუდეს ვა გატახაფუანს“ (მათ. 24:43).

მოწაფეეფწკუმა ჩიებაშ დროს იესოქ ოთხხოლო დრო მიშინუ: „ათეშენ, კურცხას რდათ, მუშენდა ვაიჩქუნა მუჟამ იჸუაფ თი დრო, მუჟამსით ჸუდეშ მინჯე მოურს: დღაშ ბოლო, შკა სერი, მუმულიშ ჸიონშახ დო ვარ გოთანა“ (მარ. 13:35). თაქ მოშინაფილ „დღაშ ბოლო“ იჭყაფუდ ჩხანაშ ენულაშე დო ითებუდ სოდგარენ ონჯუაშ 9 საათშო. „შკა სერი“ ჯოხოდ ონჯუაშ 9 საათშე სერიშ 12 საათშახ პერიოდის. თეშ უკულ მიშჷ დრო, ნამუსით იესოქ „მუმულიშ ჸიონშახ“ დრო დოუძახ. თენა შკა სერშე ოჭმარეშ 3 საათშახ იგრძელებუდ. შილებე ზუსტად თე დროს მიოჸიონ მუმულქ თიმწკუმა, მუჟამსით იესო ჭოფილ აფდეს (მარ. 14:72). ბოლო ნაწილ, „გოთანა“, იჭყაფუდ ოჭმარეშ 3 საათშე ჩხანაშ ეშულაშახ.

მართალ რე, თი დროს მახორუ ხალხ ჩქინცალო ვა კოროცხუნდჷ დროს, მარა თინეფს უღდეს მუნეფიშ სისტემა დო შეულებდეს შხვეფშა დროშ რაგადი.