მიაჸუნით იეჰოვაშ მაგალითის დო გეგმირჩქინით ყურადღება
„ბედნერ რე, მით ყურადღებას აქციენს გაჭირებულს“ (ფსალმ. 41:1).
ობირეშეფი: 130, 107
1. მუჭო გიმირჩქინანს ჸოროფას ღორონთიშ ხალხ?
ღორონთიშ ხალხ სულიერ ოჯახიშ წევრეფ რენა, ნამუთ გიშეგორუნა ჸოროფათ (1 იოან. 4:16, 21). მინშა ჩქინ და დო ჯიმალეფ ართიანიშ გურშენ დიდ მსხვერპლშა მეულა. მარა უმენტაშო ართიანიშ ჸოროფას თინეფ ჭიჭე საქმეეფიშ კეთებათ გიმირჩქინანა. მუჟამსით შხვეფს ჯგირო ვოქცუთ დო ყურადღებას გიმიფრჩქინანთინ, ღორონთიშ მაგალითის მეპჸუნთ, მუჭოთ საჸოროფო სქუალეფ (ეფეს. 5:1).
2. მუჭო გიმირჩქინ იესოქ თიშნერ ჸოროფა, მუნერით იეჰოვას უღუდ?
2 იესო სრულყოფილო მეჸუნდჷ მუშ ზუციერ მუმაშ მაგალითის. თიქ თქუ: „ქუმორთით ჩქიმდა, თქვა, მით მანგარო ხანდენთ დო მონკა ოღალ მეიღნა, დო მა ჭყანაშა ქუმოიჸონანთ . . . მუშენდა თანდაბალ დო ლიბ ხასიათიშ ვორექ“ (მათ. 11:28, 29). თაშ ნამდა, მუჟამსით იესოშ მაგალითის მეპჸუნთ დო გაჭირებულეფიშ ყურადღებას გიმიფრჩქინანთინ, ზეციერ მუმაშ მოწონას მიბღენთ დო ხეს შეუნწყუნთ ჩქინ ბედნერებას (ფსალმ. 41:1). მორთ, გუვარჩუათ, მუჭო შემლებნა ყურადღებაშ გიმორჩქინა ოჯახიშ წევრეფწკუმა, კრებას დო მსახურებას.
გეგმირჩქინით ყურადღება ოჯახიშ წევრეფწკუმა
3. მუჭო შეულებნა ქომონჯეფს ყურადღება გეგმირჩქინან ოსურეფწკუმა დო გაუგან თინეფს? (ქოძირით სურათ 28 გვერდის).
3 ოჯახიშ დუდეფ ოჯახიშ წევრეფშე ზრუნვაშ ჯგირ მაგალითის ოკო ირზენდან (ეფეს. 5:25; 6:4). მაგალთო, ბიბლია თინეფს მოუწოდენს, ყურადღება გეგმირჩქინან ოსურეფწკუმა დო გაუგან თინეფს (1 პეტ. 3:7). ყურადღება დო ართიანიშ გაგება ართიანწკუმა კავშირს რე. მაგალთო, ყურადღებიან ქომონჯის არჩქილე, ნამდა მუშ ოსურ ბრელ მუდგარენით გენესხვავებ თიშე. მარა თენა თის ვა ნიშნენს, ქომონჯ ოსურშე უჯგუშ რენ (დაბ. 2:18). თეგვარო თინა აფასენს ოსურიშ გრძნობეფს, თეს გეძინელ, ღირსუანო დო პატიცემათ ოქცუ თის. ართ კანადელ და მუშ ქომონჯიშ გურშენ იჩიებ: „თინა ირო აფასენს ჩქიმ გრძნობებს დო დღას ვამრაგად, თაშ ოკო ვა ბგინაფლენდე დუც. თეს გეძინელ, ირო მირჩქილე. მუჟამსით სწორ ვა რენ ფერ აზრიშ თირიუას მოხვარუნ, ლიბ ხასიათის გიმირჩქინანს“.
4. მუჭო ოკო გიმირჩქინას ქომონჯიქ ოსურიშ ყურადღება, მუჟამსით საქმე ოხუ საპირისპირო სქესწკუმა ურთიერთობას?
4 ყურადღებიან ქომონჯ თიმწკუმა ხოლო ფიქრენს ოსურიშ გრძნობეფშე, მუჟამსით საქმე ოხუ საპირისპირო სქესიშ პიროვნებაწკუმა ურთიერთობას. თინა ვა ფლირტავენს დო ვართ განსაკუთრებულ ყურადღებას გიმირჩქინანს შხვა ოსურწკუმა. ქომონჯ თაშ თი დროს ხოლო იქციებ, მუჟამსით საქმე სოციალურ ქსელეფიშ დო ინტერნეტიშ გიმორინაფას ოხუ (იობ. 31:1). მუშო ოკო რაგად, თინა ოსურიშ ართგურ სქიდუ, მუშენდა თინა უჸორს. თეს გეძინელ, უჸორს იეჰოვა დო ჯოგჷ თინა, მუთ გლახა რე (წეკითხით ფსალმუნები 19:14; 97:10). *
5. მუჭო შეულებ ოსურს გეგმირჩქინას ქომონჯიშ ყურადღება?
5 მუჟამსით ქომონჯ მუშ ხემძღვანელიშ, იესო ქრისტეშ მაგალითის მეჸუნს, თინა ოხვარ ოსურს, გეგმირჩქინას თიშ პატიცემა (ეფეს. 5:22—25, 33). ოსურ ქომონც პატის ცენს, ათეშენ ოცად გაუგას დო ჯგირო მექცუას თის, მუჟამსით კრებაშ საქეეფით რე დაკავებულ ვარდა შხვა პრობლემეფ აფჷ მაგვარებელ. ართ ბრიტანელ ჯიმა იჩიებ: „მინშა ჩქიმ ოსურ ორწყე, ხასიათ მათირუ დო მეხვადუ, ნამდა მუდგარენ მაწუხენს. თე დროს თინა იგავეფიშ 20:5-ის მოჩამილ პრინციპის გიმირინუანს დო მოთვინებათ ელჷ მოხუჯრ დროს, ნამდა ჩქიმ გრძნობეფიშ გურშენ ქივეჩუე, მუჟამსით საკითხ კონფიდენციალურ ვა რე“.
6. მუჭო შემლებნა ელვუჩათ ბაღანეფს, ნამდა გეგმირჩქინან ყურადღება შხვეფწკუმა დო მუ ჯგირობუა აღვენუნა თინეფს?
6 მუჟამსით მშობლეფ ართიანიშ ყურადღებას გიმირჩქინანა, ჯგირ მაგალითის არზენა მუნეფიშ სქუალეფს. მუშო ოკო რაგად, პირველ რიგის მშობლეფიშ პასუხიშმგებლობა რე, სქუალეფს შხვეფწკუმა ყურადღებაშ გიმორჩქინა ქუდაგურუან. მაგალთო, შეულებნა გეუნწყან, ნამდა ვეგლერულან სამეფო დარბაზის. მუჟამსით მეგობრულ შეხვალამეფს რენან, მშობლეფქ ოკო უწუან ბაღანეფს, ნამდა დიო უნჩაშეფს ქაცალან ოჭკუმალიშ გინოღალა. მუშო ოკო რაგად, კრებაშ არძა წევრის შეულებ მეხვარას მშობლეფს. მაგალთო, შილებე ბაღანაქ ყურადღება გეგმირჩქინას ჩქინწკუმა თით, ნამდა კარ გომინჯან; თე დროს ოკო ვაგმოჭყორდან თიშ ცქვაფაქ. თენა ჯგირო იმოქმედენს ბაღანეფწკუმა დო თინეფ ქოძირნა, ნამდა „შხვაშა ჯგირიშ კეთებას უმოს ბედნერობა მოუღ, ვინემ მეღებას“ (საქ. 20:35).
ყურადღება გეგმიფრჩქინათ კრებაშ წევრეფწკუმა
7. მუჭო გიმირჩქინ იესოქ ყურადღება ბუჸინა დო ყუც ვარჩქილედუნ ფერ კოჩიშ დო მუშ გურაფა შემლებნა თე მაგალითშე?
7 მუჟამსით იესო დეკაპოლისის რდუნ, ხალხიქ „ჸუც ვერჩქილედუნ ფერ დო ბუჸინა კოჩ“ ქიმუჸონ (მარ. 7:31—35). თიშ მანგიორო, ნამდა ხალხიშ წოხოლე დუსქილიდუაფუდკო, იესოქ თინა „ცალკე გემკიჸონ“ დო დასქილიდუ. მუშენ მიქცუ იესოქ თაშ? შილებე მუშ მდგომარეობაშ გურშენ, თე კოჩ ხალხიშ წოხოლე უხერხულო გინაფლენდკო დუც. შილებე იესოქ გეთვალისწინ თენა დო ზუსტას ათეშენ მიქცუ თაშ. მუშო ოკო რაგად, ვეშემლებნა იესოცალო დუვოსქილიდუათ შხვეფ, მარა შემლებნა ყურადღება ქიმვაქცუათ თანამორწმუნეეფიშ საჭიროებეფს დო გრძნობეფს. მოციქულ პავლექ ჭარ: „ყურადღება გეგმიფრჩქინათ, ნამდა წუვახალისათ ჸოროფა დო ჯგირ საქმეეფშა“ (ებრ. 10:24). იესოქ ქინანჭჷ ყუც ვარჩქილედუნ ფერ კოჩიშ გრძნობეფს დო გეგმირჩქინ თიშ ყურადღება. თენა ჯგირ მაგალით რე ჩქინო!
8, 9. მუჭო შემლებნა ხანშა მიშულირ დო ლეხ და დო ჯიმალეფიშ ყურადღებაშ გიმიფრჩქინა? (ქიმიჸონით მაგალითეფ).
8 გეგმირჩქინით ხანშა მიშულირეფიშ დო ლეხეფიშ ყურადღება. ქრისტიანულ კრება ჸოროფათ გიშეგორუ დო ვართ ხოლო თით, ნამდა საქმეს ეფექტურო ორთნა (იოან. 13:34, 35). ჩქი მიჸორა ხანშა მიშულირეფ დო დალახებურეფ, ათეშენ ვოცადუთ ქიმმივეხვარათ თინეფს, დესწრან ქრისტიანულ შეხვალამეფს დო მონაწილება მიღან მსახურებას. შილებე თეშ გურშენ ჩქინ გეგმეფქ მაჸუან ოთირალქ ვარდა თინეფს ბრელქ ვაკეთებუან, მარა ჩქი იშენით ვოხვარუთ თინეფს (მათ. 13:23). მაიკლი, ნამუთ ინვალდიშ ეტლით გილურს, მანგარო აფასენს თი მოხვარას, მუდგას მუშ ოჯახშე დო და დო ჯიმალეფშე ღებულენს. თინა იჩიებ: „თინეფიშ მოხვარაშ ჭყოლოფათ შემლებ შეხვალამეფიშ უმენტაშის დევესწრე დო რეგულარულო მიბღე მონაწილება მსახურებას. განსაკუთრებულო სტენდით მსახურება მოპწონს“.
9 ბრელ ბეთელს რენა ხანშა მიშულირ დო მიკოლუაფა ოსაჭირნან ფერ ბეთელელეფ. მოჸოროფე ზედამხედველეფ თე ართგურ და დო ჯიმალეფიშ ყურადღებას თით გიმირჩქინანა, ნამდა ოხვარნა წერილეფით დო ტელეფონით ქადაქებას. 86 წანერ ჯიმა ბილი, ნამუთ დაშორებულ ტერიტორიას მახორუ ხალხის წერილეფით უქადაქუნ, იჩიებ: „ვაფასენთ წერილეფით ქადაქებაშ უპირატესობას“. ართ და ნენსი, ნამუთ 90 წანას რე მენჭაფილ, იჩიებ: „წერილეფიშ ჭარუა ჩქიმო მსახურება რე დო ვართ ხოლო უბრალო საქმე. ხალხის ოსაჭირ ჭეშმარიტებაშ გაგება!“. 1921 წანას დაბადებულ და ეტილი იჩიებ: „ჭუა ჩქიმ ირდღაშიან ცხოვრებაშ ნაწილ რე. მინშა თიცალ გლახათ ვორექ, ნამდა ბარგიშ მიკოქუნა ხოლო მიჭირს“. თე ირფელიშ უმკუჯინუო, თიშო ხიოლ მოუღ ტელეფონით ქადაქებას დო მუსხირენ კინ მეკითხირ ხოლო უღჷ. 85 წანერ ბარბარა რაგადანს: „გლახა ჯამრთელობა მიღჷ, ათეშენ მიჭირს სრულ დროთ მსახურება. მარა ტელეფონით ქადაქება საშვალებას მარზენს, ნამდა შხვეფწკუმა იფქადაქე. ათეშენ იეჰოვაშ მარდულ ვორექ!“. ართ წანაშე ნაკლებ დროს, ართ-ართ ბეთელიშ ხანშა მიშულირ და დო ჯიმალეფქ 1 228 საათ იქადაქეს, 6 265 წერილ ჭარეს, 2 000-შე უმოსშა რეკეს დო 6 315 პუბლიკაცია გავრცელეს! მუშო ოკო რაგად, თეთ მანგარო გახარენდეს იეჰოვაშ გურს (იგავ. 27:11).
10. მუჭო შემლებნა მივეხვარათ და დო ჯიმალეფს, კრებაშ შეხვალამეფშე სარგებელიშ მეღებას?
10 გეგმირჩქინით ყურადღება კრებაშ შეხვალამეფიშ დროს. მუჟამსით და დო ჯიმალეწკუმა ყურადღებას გიმიფრჩქინანთინ, თეთ ვოხვარუთ სრულ სარგებელ მიღან კრებაშ შეხვალამეფშე. თეშ ართ-ართ საშვალება რე, დროულო ქიმეფრთათ კრებაშა, ნამდა დაგვიანებათ შხვეფს ვევეცილათ. მინშა შილებე ვეველუთინ ფერ საქმექ გემკომრჩქინდან დო ათეშენ დემეგვიანან, მარა დაგვიანება წესო ქომღუნან-და, ოკო დეფიფქრათ, მუჭო შემლებნა ყურადღებაშ გიმორჩქინა. ირიათო რშუდან, ნამდა ჩქინ მენძელეფ იეჰოვა დო იესო რენა (მათ. 18:20). თინეფ დასურო იმსახურენა პატიცემას!
11. მუშენ ოკო გეთვალისწინან კრებას დავალებათ გიშულან თი ჯიმალეფქ 1 კორინთელეფიშ 14:40-ის მოჩამილ მითითება?
11 და დო ჯიმალეფწკუმა ყურადღებაშ გიმორჩქინაშ ხოლო ართ-ართ საშვალება, თე ბიბლიურ მითითებაშ მეჸუნა რე: „ოღონც ირფელ წესიერო დო ორგანიზებულო ხვადუდას“ (1 კორ. 14:40). ჯიმალეფს, მიდგას კრებაშ შეხვალამას დავალება უღნან, ხემძღვანელობას მეჸუნა დო მუნეფშო გიშართილ დროს ვეგნაჩილითუანა. თეგვარ საქციელით ყურადღებას ხვალე მუნეფიშ უკულ გიშმაულარ ჯიმალეფიშ ვარინ, კრებაშ წევრეფწკუმა ხოლო გიმირჩქინანა. ნამთინეს შილებე ჸუდეშახ შორ შარა გეუძდას. შხვეფ შილებე საზოგადოებრივ ტრანსპროტშა რდან დამოკიდებულ. ნამთინეს შილებე ჸუდეს იეჰოვაშ მოწმე ვარენ ფერ მეუღლე უჯინედას.
12. მუშენ იმსახურენა მანგარო ხანდენან ფერ უხუცესეფ განსაკუთრებულ ყურადღებას? (ქოძირით ჩარჩო „გეგმირჩქინით თინეფიშ ყურადღება, მიდგას ხემძღვანელობა ოვალ“).
12 სულიერ ჭყიშეფ, მით კრებაშო მანგარო ხანდენა დო მსახურებას გურგედვალირო ქადაქენან, განსაკუთრებულ ყურადღებას იმსახურენა (წეკითხით 1 თესალონიკელები 5:12, 13). * მუშო ოკო რაგად, თქვა აფასენთ თი შრომას, ნამუსით უხუცესეფ თქვან საჯგირობუოთ ორთნა. თაშ ნამდა, ირნერო ითანამშრომლით დო ქელუდირთით თინეფს. თეს გეძინელ, თინეფ „კურცხას რენა თქვან შურიშ გურშენ, მუშენდა ოვალნა თენა“ (ებრ. 13:7, 17).
გეგმირჩქინით ყურადღებიანობა მსახურებას
13. მუშ გურაფა შემლებნა თევრეშე, მუჭო ოქცუდ იესო ხალხის?
13 იესოშ გურშენ ესაიაქ იწინასწარმეტყველ: „გინოტახილ ნოჸელას ვეგნოტახუნს დო მაჭვიტაია ფიტილს ვა შკირიტუნს“ (ეს. 42:3). იესოს უჸორდ ხალხ დო თინეფიშ მდგომარეობაშა მიშეშ. თის არჩქილედ თი კათაშ გრძნობეფ, მით სიმბოლურ გაგებათ „გინოტახილ ნოჸელას“ დო „მაჭვიტაია ფიტილს“ ქოგუდ. შედეგო, თინა ყურადღებას, სიჯგირას დო მოთვინებას გიმირჩქინანდჷ; თიწკუმა ბაღანეფ ხოლო ჯგირო გინაფლენდეს დუც (მარ. 10:14). მუშო ოკო რაგად, ვეშემლებნა იესოცალო ქინვანჭათ შხვეფიშ მდგომარეობას დო ვოგურუათ თინეფს. მარა ჩქი თინეფიშ ყურადღება ოკო გეგმიფრჩქინათ, მიდგას მსახურებას შეფხვადუთ. ქადაქებაშ დროს ოკო ქიდვეკვირათ, მუჭო ვეჩეუბუთ, მუ დროს მივაკითხანთ დო მუსხი ხანს ვეჩიებუთ.
14. მუშენ ოკო დევეკვირათ მუჭო ვეჩიებუთ ხალხის?
14 მუჭო ოკო ვეჩუათ ხალხის? ამდღა მილიონეფ „ძალა გიშალიებურ დო მიკოცუმილ“ რენა, მუშენდა თინეფწკუმა გლახათ მოქმედენს კომერციულ, პოლიტიკურ დო რელიგიურ ლიდერეფ (მათ. 9:36). შედეგო, ხალხის მითინიშ ნდობა ვა უღჷ დო იმენდ აფჷ დინაფილ. ათეშენ, მნიშვნელოვან რე შხვეფიშ გაჭირება გურშა ქიმიბღათ, გეგშაბგორათ სიტყვეფ დო ქიდვეკვირათ, მუნერ ტონით ვურაგადუთ. სახიოლო ამბეს ბრელ ხვალე თიშ გურშენ ვერჩქილუანს, ნამდა ჩიებაშ დროს ბიბლიას გიმიბრინუანთ ვარდა ლოგიკურო ვურაგადუთ; თინეფ ორწყენა, ნამდა დასურო მოიტერესნა თინეფიშ მდგომარეობა დო პატიცემას გიმიფრჩქინანთ.
15. მუჭო გიმიფრჩქინათ პრაქტიკულო თი ხალხიშ ყურადღება, მიდგას ვუქადაქუთ?
15 ქადაქებაშ დროს ყურადღებაშ გიმორჩქინაშ შხვადოშხვა პრაქტიკულ საშვალებეფ არსებენს. მაგალთო, კითხვეფიშ გიმორნაფა გურაფაშ ჯგირ საშვალება რე. კითხვეფიშ დასვებაშ დროს, პატიცემა ოკო გეგმიფრჩქინათ. ართ პიონერ თიცალ ტერიტორიას ქადაქენდჷ, სოდეთ ბრელ მორდებუან დო დუდშეკებულ პიროვნება ცხოვრენდჷ. ათეშენ, თინა ვა სვენდჷ თიცალ კითხვეფს, ნამუთიქ შილებე თინეფ უხერხულს ქინაჸათკო. თეშა მიშეშ თი კითხვეფ ხოლო, ნამდგაშ პასუხ ვა უჩქდეს ვარდა შილებე სწორას ვა უპასუხესკო. მაგალთო, თინა ვაკითხუდ: „ქოიჩქუნანო ღორონთიშ სახელ? ქოიჩქუნანო, მუ რე ღორონთიშ სამეფო?“. თეშ მანგიორო თინაურაგადუდ: „ბიბლიაშე გებგჷ, ნამდა ღორონც სახელ ნოღვე. ქიშილებენო თინა თქვა ხოლო ქუგოძირუათ?“. მუშო ოკო რაგად, არძა კულტურა დო ხალხ ართიანშე გენესხვავებ, ათეშენ ჩქი წესეფს ვა ვადგინენთ. მარა ყურადღება დო პატიცემა ირიათო ოკო გიმიფრჩქინათ. თეს უჯგუშო გუვაკეთენთ, მუჟამსით ადგილობრივ ხალხის ჯგირო გეფჩინებაფუანთ.
16, 17. მუჭო გიმიფრჩქინათ მოყვასიშ ჸოროფა თიმწკუმა, მუჟამსით საქმე ოხუ თის ა) მუ დროს მივაკითხანთ? ბ) მუსხი ხანს ვეჩიებუთ?
16 მუ დროს ოკო მივაკითხუათ? კარდოკარ ქადაქებაშ დროს ჩქი დაუპატიჟებელ სტუმარეფ ვორეთ. ათეშენ მნიშვნელოვან რე, თიცალ დრო გეგშაბგორათ, მუჟამსით ხალხიქ შილებე უმოსო ქუმომრჩქილუან (მათ. 7:12). მაგალთო, ჩქინ ტერიტორიას მახორუ ხალხის გითორულაფა ხომ ვა უჸორს? თაშ ქორენ-და, შეილებნა დიო იმსახურათ ქუჩას, სტენდის ვარდა კინ ქიმიაკითხუათ თინეფს, მით გიჩქნა, ნამდა კურცხე რე.
17 მუსხი ხანს ოკო ვეჩუათ? ამდღა ხალხიშ უმენტაშის ჩოლამა ვა უღჷ, ათეშენ ჯგირ იჸუაფ ბრელ დრო ვემდუღათ, განსაკუთრებულო თიწკუმა, მუჟამსით პირველო მივაკითხანთ. უჯგუშ იჸუაფ ჩიება ხეთე გუვათუათ, ვინემ ბრელ ხანს გაფჩენდათ (1 კორ. 9:20—23). მუჟამსით ქოძირნა, თინეფიშ მდგომარეობაშა მიშურთინ, უმოსო ქიმიკორინუანა ჩქინწკუმა კინ ჩიებას. მუშო ოკო რაგად, ღორონთიშ შურიშ ნაყოფ ჩქინ ქადაქებაშე ხოლო ოკო იძირედას. თეგვარ საქციელით „ღორონთიშ თანამშრომელეფ“ იპჸუაფუთ დო ჩქინ საშვალებათ იეჰოვაქ შილებე მიდგაინ ქიმიჸონას ჭეშმარიტებაშა (1 კორ. 3:6, 7, 9).
18. მუ კურთხევეფს მიბღენთ, მუჟამსით შხვეფიშ ყურადღებას გეგმიფრჩქინანთ?
18 მორთ, ირნერო გეგმიფრჩქინათ შხვეფიშ ყურადღება ოჯახის, კრებას დო მსახურებაშ დროს. თეგვარო ბრელ კურთხევეფს მიბღენთ მუჭოთ ასე, თეშ მომავალს ხოლო. ფსალმუნეფიშ 41:1, 2-ს პკითხულენთ: „ბედნერ რე, მით ყურადღებას აქციენს გაჭირებულს; უბედრობაშ დროს იეჰოვა დერსხენს თის . . . ბედნერიშ სახელ ქიგიადვალუ თის დედამიწას“.
